نسختي الرمادية

حلقة 30

#نسختي_الرمادية 🖤✍ حلقة 30

فاتو أيام 💔💔

أمي منهارة ،، ومعتصم مش معروف وين محبوس ولا عند مني ...
زيد ما خلى من سأل عليه ... لكن مفيش فايدة 💔

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

رحمة ورويدة سجلو ف تقنية طبية ..
وأني فاتني التسجيل بحكم مافي حد بيرفع ويجيب ..
قعدت على اعصابي لان لو فات وقت التسجيل مرات يضيع عليا السمستر 😭💔
قعدت كل مرة نشوف ف كلية .. وجامعة .. نلقى فيهم مسكرين الطلبات ..
لين كلموني رويدة ورحمة بيمشو تاني قالولي برا معانا نقنعو المسجل العام بش يقبلك ولان نسبتي قوية درت احتمال ان مرات يقبلني 🥺❤

خو رويدة رفعنا وحطنا ❤ ..
كنت متأنقة بزيادة ،، فيا طهقة بنات الجامعة متع خلاص اني كبرت 😊 .. متحمسة وبعيوني هلبااااا أمال🥺
خايفة آمالي تندحر لي رماد .. ونرجع خايبة 💔😔
بس توكلت على ربي وقلت نحاول منيش خاسرة شيء ❤👌🏻
خشيت للمكان .. معاي صحباتي ..
نشوف ف شباب وبنات يمشو .. مكان غريب عليا .. وحياة جديدة .. الشمس دافية ونازلة عالأشجار .. وصوت العصافير ..
الهواء متحرك ،، تحسي وانتي هنايا ب طاقة متجددة وان الوقت يفووت بسرعة ..
خشينا للمبنى طلعلنا واحد قاللنا شن تبو ممنوع الدخول 🤨 ..
يا والله نهار المبارك 🤦‍♀️ .. من اولها ممنوع وتسكيرة فالوجه 🥺
قتله لو سمحت اني جاية بنستفسر ..
قالي على شني 🤨 ؟
قتله نبي نسال عالتسجيل..
قالي وين كنتي راقدة !! 😒 موعد التسجيل فات 🙄 ..
ومن اسلوبه .. عن قريب حدفت عليه ملفي وقتله نقعها واشرب ميتها كليتكم .. بس خطم من ورانا راجل خمسيني وخش للمكتب ..
نخصتني رحمة قتلي هذا هو المسجل 😣 ..
مشى كلماته رويدة .. قتله يا استاد زميلتي صارولها ظروف وهي شاطرة وراغبة الكلية هادي خليها تخش تستفسر بسس .. 🥺
قعدت رحمة تقنع فيه حتى هي واني ساكتة نكابر 😤..
قعد يشبحلي 🙄 وقالي خشي باهي .. وانتو استنوها قدام الممر ..

شبحتلهم بعيوني وقعدو يأشرولي بعيونهم متع بري بري 😍😍 مشى خشيت 😑 قلت السلام عليكم ..
رد عليا .. عليكم السلام تفضلي ..
قتله ممكن شوية من وقتك يا استاد ..؟
قالي قداش ليا معش سمعت طالب يحكي بالادب هوا 😁 تفضلي هي ..
قتله اني خاطري نسجل هنايا وموعد التسجيل فاتني لان صارولي ظروف .. 🥺 زعما شن الحل برأيك !! وبالله متقوليش راجي للسمستر الجاي .. 💔😔
قالي هادي تعتمد على نسبتك ..
قتله مداما عالنسبة معناته حننقبل طول 😁❤
قالي تره نشوف بعيوني ..
مديتله ملفي .. قداش ما كان بشوش ومحترم بعكس المشرف اللي واقف البرا ..
قعد يقولي مشاء الله نسبتك ممتازة .. احني نبو الطلبة اللي زيكم .. بعتالي قعد يدقق عالاسم قالي مني عادل الهنشيري ؟
قتله بوي 😁 .. بضحكة
قالي ايه هههه عارف بوك شيء طبيعي !! 😂 قصدي وين يخدم ؟؟ نعرف واحد نفس اسمه يخدم ف مبنى الإذاعة ..
قتله هذاكا بوي 😊❤ ..
قالي اااه ايييي نعرفه 😊.. متوفي هوا ... قتله ايه .. 😔 قالي عندي خوي يخدم معاه فالاداعة .. ابراهيم ..
قتله حي عمو ابراهيم 😍 و مرته ابلة نادية
قالي مشاء الله تعرفيهم صار .. قتله ايه كانو يجونا قبل ..
قالي .. باهي انستينا .. خلاص اعتبري نفسك تقري هنايا .. و يوم تنزيل المواد تعالي معاهم ..
قتله بجديات صحيت والله ما كنت متوقعة ان حتقبلوني🥺 ..
قالي هذا نصيبك .. 😊 .. تبي اي حاجة .. تعالي للمكتب طول اعتبريني زي بوك ..
قتله شكرا بارك الله فيك 🥺❤ ..