نسختي الرمادية

حلقة 19

#نسختي_الرمادية 🖤✍ حلقة 19

تمت العطلة الصيفية ،، صحباتي كلهم فرحانين بمرحلة الثانوي ،، إلا أني متنكدة 💔
معتصم سجلني ف ثانوية بعيدة بالباص باش منقراش مع رحمة ورويدة 😭

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

حسيت بالوحدة 😣 نفكر كيف حنقدر نتأقلم عالمكان ،، و كيف حندير صحبات تانيات ومنقعدش بروحي..
فاتو ايام واني كل يوم انقرز على امي ونقوللها البنات اللي نعرفهم كلهم بيقرو ف ثانوية شارعنا ،، بس ولدك يبي ينطرني لمكان بعيد 😤😤
قتلي المهم كملي قرايتك وفكينا من نشفته والله ما ناقصة 😔 سادني مشاكلكم

وفيوم سمعني نهدرز اني وامي خشلنا تقول راكبه جن ..
قالي تزيدي كلمة تانية الا ما نبطلك و تقعدي فالحوش 😡
كمية القهر اللي عشته بعد وفاة بوي منقدرش نوصفه 💔 معمريش ارتحت ،، فديت خلاااااص 😭😭
قبل لما كنت صغيرة ،، قداش ما كانو يضربو فيا بالمتل ،، كانو يقولو بنت عادل عايشة احسسن عيشة وشن تبي بوها يجيبلها،، ولما بوي ادرق انقلبت حياتي و بدت حتى قرايتي مستكترينها عليا 💔😔

فاتو ايام مدايرة اضراب لا ناكل لا نشرب ،، بشير يقوللي خيرك ويقعد يكشخ ،، لدرجة يجيبلي ف شكلاتة ولا بيتزا ويحدفلي فيهم من البلكونة بالدرقة ،، اهتمامه خلاني ندمنه ،، حبه ينسي فيا فجحيمي اللي عايشاته ،، بس كل منحط راسي عالمخدة نتضايق ،، نحس بحاجة غلط ونخاف لو يمسكني معتصم واني نتكلم بالتيليفون ..

وفيوم خش معتصم وقاللي حصلتلك باص بيرفعك ويجيبك .. هزّيت راسي بألم .. قتله امي اما مدرسة اللي دخلتها فيها ..
قاللها دخلتها ف مدرسة مع اخت صاحبي بنت كويسة بيقرو ف ثانوية قرجي ..
اني لما سمعت بكلمة قرجي انغصّيت 😥 معااااااااااذ💔

ااااااه ي حسرة قلبي اااااه ...

كان راقيلي فالبداية بس بعتالي فرحت لما عرفت انه حنقعد في مكان سكنة معاذ ❤
بلكي نتعرف على بنات فالمنطقة هاديكا ويطلعو يعرفوه ونقدر نوصل فيه 😔 قعدت ننسج فالاحلام الوردية نتخايل اني ماشية وبصدفة نلقاه خاطم ❤ ونجتمعو من جديد اااااااه 😌❤

و لثواني أنبني ضميري ،، كيف يا شيراز تفكري بشخص وانتي فحياتك راجل .. ترضي بشير يفكر ب بنت تانية غيرك؟؟ لالا منرضاش ..
أعوذ بالله من الشيطان الرجيم 😤 خلاص انسيه..

_______♡■☆Kd°•Sha▪La'Bi☆■♡_______

بشير بدا ديما لاهي ويتغنى بالشعر وأني نخدمله ف فيديوات وينزل لمتابعينه ..
فيوم لقيته منزل مقطع ،، كان مصمم بطريقة احترافية
عجبني الكلام ❤وجي على بالي واستاحشته ..
اتصلت بيه رد عليا هاه ي عسل
قتله وينك مكلمتنيش اليوم بككل
قالي طالع مع الشباب.. تو نكلمك لما نروح .. قتله باهي
نزلت لوطى لقيت امي تخيط باليبرة .. قلتلها خيرك ساهرة ..
قتلي مش جايني نوم .. و كان وجهها حزين 💔
ركزت فالقماشة اللي تخيط فاها لقيتها سورية بوي 💔
قلتلها هادي سورية بابا 🥺
قتلي بطمتها طايحة قلت نردهالها .. 😔
وقعدت ماسكة عبرتها وعلى لمسة حنونة كانت حتبكي .. قلتلها ادعيله يما بالرحمة 😭 وادعيلنا ربي يصبرنا ع فراقه الغالي .. قتلي ان شاء الله يجيك نصيبك زيه حنون ❤ تفكرت بشير وقلتلها يريت 😌💜
خشلنا معتصم من الباب،، قالي شن ساهرة نوضي ارقدي غدوة بيبدا يجيك الباص 😒 كان مش من الخدمة راهو اني اللي حنرفعك ونجيبك ..
قلت ف خاطري الحمد لله اللي ربي فكني منك 😤
قعد يزن على راسي نوضي ونوضي .. لين نضت ..
ركبت خشيت لداري وخطر ع بالي نكلم بشير بس قلت مرات يخش معتصم ولا حاجة .. خن نزيد نصبر 😣
فتحت القجر بش نطلع كريمة ترطيب .. قعدت خاشة متركنة قعدت نمنكت لين قابلني غلاف ..
قلبي عصرني💔😔 طلعته ويدي ترجف
نشبحله و افكاري اداهم فيا ،، نبي نشبح لورقة معاذ ❤ بس هكي حنخون بشير ،، لا يا شيراز احرقاها خيرلك ،، قعدت نتمتم بروحي وقررت نرده الغلاف بدون منشبحه .. وقفت بش نفتح الباب ونلقى معتصم يتصنت عليا 😰 قعدت مصدوم واني نرعش
قالي أ أ أ😨 كنت بناخد منك بيرو ..
قتله أ أ أ 😬 تتتت تو نجيبلك .. خشيت نرعش ونفكر علاش كان يتصنت عليا ،، بلكي شاك فيا 😱
مديتهوله وقعد هوا واقف .. مشى رجعت زينت داري وخشيت للحمام ...
اتكيت بضهري واني بنموت من الرعبة ،، شن هذا ؟؟
شن دزلك لهذا كله ،، ديما حاجة الدرقة تخوف 😭
خليته لين ينزل ويبات فالملحق .. ورجعت لداري لقيت بشير❤ متصل تلات مرات
عاودتله قعد يقولي عام بش تردي ،،!!! 😑 قريب رقدت
قتله كان بحداي خوي ..
قالي اني تاعب بنشوفك وبنرقد ..
قتله حتى ني تاعبة والله😑
قاللي شن هو اللي اديري فيه انتي ؟؟ ..
قتله خليك متعرفش احسسن 😒
قالي ياسر بلا طولة اللسان ..
قتله انت اللي تكشخ والله 😤
قالي خيرك تنقي يااااسر ..
قتله اني انق ؟؟ 😳 باااااهي باااااه ..
قالي تصبحي على خير ..
اني قعدت ساكتة مبيتش نرد عليه ،، وهو سكت بعتالي سكر عليا ..
قعدت دقيقتين قلت كالعادة سكر وحيعاودلي ..
بس للأسف متنازلش المرة هادي ..
ضعفت و ولى خاطري،، خلاص شيراز ،، مفيش كرامة بين اي زوز يحبو بعض ..
عاودتله يسكر عليا .. لمرة الاولى والتانية ..
تعفلقت ومعش عاودتله ...
حطيت راسي ع وسادة وفتحت نت .. لقيته فاتح
اتصلت بيه عالنت يطلع مشغوول
فوتت خمسة دقايق نفس الشيء مشغول ،،
نصف ساعة والخط مشغول .. من بيكلمه فالنت وفالوقت المتأخر هوا
...
قعدت نفركس ف ايميله لقيت وحدة معلقتله ربي يحفظك ي اعسل
قداش متعفلقت 😤😤 درتله سكرين وقتله منو هادي احني متفقين فالصفحة بس .. مش ع ايميلك الخاص ..
العلامة الخضراء متعه تسكرت ،، عاودتله يقولي الشخص غير متاح .. يعني سكر النت ...
قعدت الليلة كلها واني نغلي 😤
لين خداني النوم ،، نضت الصبح صليت ولبست بدلة الثانوي الجديدة ❤
لبست ساعة ووشاح أبيض وسبيدرو أبيض وشنطة جديدة وادوات .. خديت مصروفي من امي وطلعت بعد ما كلكلس الباص..
ركبت لقيته شيباني ،، اتطمنت ❤😌 اصلا معتصم مش حيخليني الا مع الشيابين 🤷‍♀️
طول الطريق واني نتأمل فيها و مؤة مرة نطلع ف تليفوني نشوف ف بشير عاودلي او لا .. ونخش للمحادتة نشوفه عرض مسجاتي او لا .. تنهدت ورديته ف جيبي ..
قمت راسي لقيت لافتة مكتوب فؤها قرجي .. قلبي عصرني ❤🔥🥺
قعدت السيارة تمشي فالشوارع واني نتأمل ف كل حاجة من التراب للمباني للمحلات للجوامع ،، ندور ف اي حاجة تربطني بمعاذ،، على اي شبه ..
زعما توقف اهني ،، ؟ زعما تخش للمحل هذاكا ؟
وين مكانك ؟؟؟ 🥺 ووين ديارك 💔
وقف الباص قدام المدرسة وخشيت ..
اااااه ،،، يا رب وكلتلك أمري ،،
خشيت لقيتهم طابور ،، وقفتني الاخصائية تأخير ،، قلتلها ي ابلة نسكن بعيد وهذا اولي يوم .. قعدت تشبحلي وادقق ف ملامحي .. قتلي من وين انتي غريانية ؟؟ قلتلها لالا ،، قتلي جبالية ،،؟؟ قلتلها طرابلسية سكان الاصليين ،، قتلي غزالة ربي يبارك .. خلاص سامحتك المرة هادي .. وربي يحفظك من العين ..
قلتلها بارك الله فيك يا ابلة مشكورة 🙃❤
خشيت مع الطابور ومنعرفش حتى وين فصلي ..
خطمت على المكتب وسألت على اسمي نازل ف اما فصل قالولي اولى تالت 3/1
خشيت فالممر نسمع ف دوشة وعياط .. كملت مشيي وتلفتت ع يميني شبحت للفصل الاول قمة الهدوء وواضح البنات اللي فسطه عاقلات ..
خطمت ع فصل التاني الابلة مقعمزة تشرح وهما يسمعولها .. امالا الدوشة منين 🤷‍♀️
كملت طريقي ووصلت قدام فصلي وتخش فيا بنت واتطيحني .. بووووم 💥💣
قعدت تكشخ قتلي ديري عيون ،، مبيتش نرد علاها لان واصح عليها مسترجلة واصلا طلعت تجري ف الممر تتزحلق جيهة الفصول الاخيرة ..
وقفت نفضت هندامي،، ونسمع ف صوت التدربيك والتزغريط ..