نسختي الرمادية

حلقة 34

#نسختي_الرمادية 🖤✍ حلقة 34

طُلعت أمي وأني وراها ..
نشبح ف خمسة انفار ملثمين راكبين عالصور ويبو ينزلو بالحبال ..
قعدت نجري من غلّي عليهم لين سبقت أمي 😡🔥🔥

ضربت البطمة بقبضة يدي ،، لين انفتحت البوابة

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

انفتحت البوابة طلعولي جماعة ملثمة بسلاحاتهم ،، و بينهم واحد لابس نظارات متكي على سيارة بلاك عالية مصفحة ..
اني قعدت نشبحله من فوق للوطة 🤨.. مشى بعد بضهره وقعد يقرب ونحى نظارته و دارها ف فتحة صدره بين بطمات السورية ..
قعدت نقدّم وامي وراي .. قلتلهم تفضلو 🤨 ؟
نشبح ف عمي الصديق وولاد عمي جايين من بعيد ،، اما مفتاح وولاده يشبحولنا من البلكونة ..

كلمت الراجل قتله من حضرتك ؟ وشن تبي هنايا؟ 🤨

قعد يشبحلي و ساكت ..

قتله مدامك متبي شي .. امالا طلّع اللي خاشين لحرمة بيوت الناس بدون إذن👌🏻 وبرو فحالكم ... 😤
وكيف بنسكر البوابة .. حط يده عالباب ..
قالي : الكلام مش مع النتايات .. شنو معندكمش رجالة فالحوش 😏
قتله: الرجالة اللي عندنا مشو يسترزقو بالحلال .. وخلونا احني اللي ف غيابهم نساوين ب مية راجل 🤨
قالي : تلقحي مليح انتي 😏 ...
جي معين وباقيتهم .. وصار نقاش بيناتهم ..

عمي فنّص فيا و اشّرلنا براسه مشى خشيت اني وامي للجردينة ..
امي ترعش وتقوللي هادو منو ؟
اني ف راسي ألف سؤال وسؤال.. وحمدت ربي ان مخليت شيء ف الحوش
قلتلها يماااا بري خشي قيمي فلوسنا وذهبنا ونحي وراق الحوش من خزنة بابا ..
قتلي علاش شن دخلهم .. قلتلها غر اسمعي بعتالي نقولك..
مشت امي وقتلي خشي الداخل مناقص غير هادو يكحلو فيك ..
الناس والجيران كلها تلقطو .. غر اسمع وتعالى .. ناضو يضربو فالرصاص عالحيوط و عالأرض ..
عمي يعيط يقوله فيه ناس مريضة .. 😰 فيه ناس عندها الجلطة متتحملش 😤 ..
جي واحد من وراه ودفه .. وكيف بدر بيضربه جو قامو عليه السلاح ..

اني نشبحلهم وندعي لربي إن يجعل كيدهم ف نحرهم ..😣

ثواني حتى خش الراجل ومعاه عمي ..
قعدو يحكو مع بعض وجو ناحيتي ..
عمي: بري جيبيله وراق الأرض والملكية ..
الراجل : تي متلزمنيش 😎👌🏻 عندكم لغدوة الصبح .. الصّفة هادي تتقلع باللي فيها ..
نلقى مخلوق واحد قاعد اهنايا اللي ما ندفنه فسطها ..
قتله .. شن تقول انت ؟ من اللي بيطلع ؟
قالي: تو تعرفي غدوة من اللي حيطلع 😏 ..

قتله: سألتك ونبي الجواب ..
قالي : الأرض اللي انتو فيها ملك الدولة .. وعندكم لغدوة بش تقيمو حاجاتكم..
من صدمتي ضحكت .. قتله: شني ؟؟ 😁😂..
قتله : تي منطقة شط الهنشير مسميينها على اسم عيلتنا الهنشيري .. تجي تقولي انت ملك الدولة 😑
تي حتى فحكم القدافي مطلعناش ؟؟؟
قالي : ماكم أزلام ومخانب كنتو مستفيدين ..
قتله: احترم نفسك .. و ادوي كويس .. احني رزقنا معرقين عليه جدودنا ..
قاللي .. ههع من الطليان ؟
قلتله.. عالاقل جدي دار فايدة واسمه انشهر بمنطقة تامة .. اما جدك شن دار 🤨😑
قالي: غر الجمال هذا منبيش نفسده لكن بتزيدي اتطولي لسانك الا ما نوكله للكلاب .. 😡
قلتله وانت بصفتك شني جاي اهني ؟؟ لمن تتبع ؟ جاي بورقة من المحكمة ؟ إذن تفتيش ؟ ولا غر تخشو لحوش فيه نساوين وخلاص😑
شبح لعمي اللي يرعش .. قاله تي انت ومتجرأتش تسألتني هكي ..
و بغفلة يضرب عمي على بطنه لين يجي طايح .. قعدت ندف فيه ونقوله عمي كبير فالسن 😭😤 احترم نفسك يا مريض 😭😭 ..
صغار عمي مخلوهمش يخشو ..
وعمي طايح من الضربة يتوجع ..
قلتله .. انت شن تبي من الاخير ..
قالي .. نبو باقي الأرض لمشروعنا
قتله.. اما ارض واما مشروع ؟؟
قالي.. الأرض اللي وراكم عالبحري .. اللي عمك التاني باعهالنا .. توا مزال دوره حتى هوا .. اني كملت من هنايا .. الفلل اللي هنايا كلكم حتطلعو منهم ..
---
-------
-----------