نسختي الرمادية

حلقة 14

#نسختي_الرمادية 🖤✍ حلقة 14

فيوم مقعمزين فالجردينة ومعانا عماتي ،،
جي الصديق وقعد يضبح عليهم لدرجة انخلعنا نحسابو فيه حاجة ،،
ناضت فطوم وقتله شن فيه ان شاء الله خير 😰
قاللها تعالي اطلعيلي البرا انتي و عُلا ،،
ناضت فطوم بتطلعه قالتلها عُلا والنبي شوفيه شن يبي والله ما خاطري فالنوضة 😅
قالتلها باهي ..
سلسبيل بنت عمتي : اكيدة على ادوية ومصاريف جدي 😒
عُلا: لالا ادويته موجودة واموره طيبة
امي: ان شاء الله خير وخلاص 😔
اني نشبح ف فنجان القهوة اللي بيدي وسااااااارحة لمكان بعيييييييد ،، مكان فيه بروحي أني وبس 👌🏻🔥

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

خشت فطوم و وجهها متغيّر ،، قعدت اتضبح على اختها من بعيد
قالتلها عٌلا: شن فيه شن يبي؟
قالتلها غر تعالي الحقيني
ناضت عُلا : بيهبلوني هادم،، اااه رجليا بيتكسرو 😅
سلسبيل : ديما وانتي رجليك يا خالتي،، شكله صغارك 24 ساعة وانتي تجري وراهم 😂

مشتلها عُلا وطلعو من بوابة حوشنا ،،

أما احني قعدنا مقعمزين ،، خش ضياء وقعمز بحدانا
سلسبيل قعدت تقوله جبت اللي قتلك عليه ؟؟
قاللها حي نسيت 😅
قتله تي باهي باه تو نطلع نجيب حاجتي بروحي
قاللها واطلعي من شادك 😒
طلع تيليفونه من جيبه وقعدت اخته تتسهوك عليه ،، قتله وخيي وخييي نبدلو تيليفونات 😉😉
قاللها زيدي غادي ،، لا نبدلك لا تبدليلي 😌
رن موبايله ورد عليه
قاله ،، اني اهنايا فالجردينة .. باهي هي ..
ناض ضياء وخش للملحق
قلتلها أكيد معتصم ،، مش عارفة شن وراها الصحبة هيااااا ..
قتلي سلسبيل : ايييه 😂😂 عاد هو اللي شاريله التيليفون ،، و ديما يعطي فيه ف فلوس ..
اني استغربت 🙄 ،، تفكرت من أسبوع قعد ينق على امي عطاته ألف على أساس يبي منه واحد دين ،،
قلتلها امتى عطاهوله هوا ..
قتلي من أربع أيام ..
اني زبطت الموضوع طول ..
،،
،،
،،
،،
،،
،،
،،

_______♡■☆Kd°•Sha▪La'Bi☆■♡_______

جي الليل
خشلنا زيد راقيله بيتفجر
قتله امي خيرك شن فيه
قاللها مفتاح ينق عالقسمة ،،
قتله اني : وامتى هو منقش عليها 🤨
قال: ماهو توا ضاقت بيه خلاااااص ،، متعاقد مع شركة ليبية بيبعلهم الأرض من فترة وعطل عليهم فالتسليم وكان مينفّدش الإجراءات حينحبس ..
قتله امي وباه شن دخلنا احني ،، اونا خوته يتفاهمو معاه ..
قاللها ماهو بوي ميت قبل جدي .. يعني ميورتش 😒 ريتي كيف يبي يلوليلنا ايدينا 😡
قتله امي تي متفاهمين عالقسمة من قبل ما يتوفى بوك وكل واحد ومكانه غر مرضة جداك ورفوعها لتونس هذا علاش مداروش وراق رسمية ..
زيد: توا خليت الصديق يقنّع فيه اما خليل الكلب وهو مسكرين روسهم ميبوش يعطونا حقنا ..
قتله اني : لو بتجي حتى للدين مفروض ميقسموش لين جدي يتوفى ،، مش هو حي وبيقسمو 😑
زيد: قاعد يحلم بالفندق اللي بتبنيه الدولة عالبحر وبيحصل وراه الملايين 😏 .. ان شاء الله زقوم اللي يدير فيه كله ..
قتله: هذا علاش امبكري عمي الصديق ينادي على عماتي ..🤔
امي : يا ودي اني معش نبي من الدنيا شيء ،، غر يخلونا ف حالنا ..
قتله : و يندري جدي عمر عالموضوع ؟
قاللي : لالا جدي وجداي ميندروش ..
قتله هو هذا ،، قبل بوي راقيله على قصة القسمة وجدي حي ، و ديما يعرقل فالموضوع ،، من قال يموت قبله وخوته بيطلعوه ميورتش .. 😔💔
قاللي : الحمد لله مستورين و بونا خادم على روحه مش عابي علي رزق حد 😒
قتله امي : غر جدك يتنازلنا بالاوراق على قطعتنا اللي شاريينها من جدك و الاراضي التانية الله يسامحهم منبو رزق حد 👌🏻
قلتلها اشبح :: مفتاح من قبل ينق على بوي يبيه يتنازله عليها ... هذا كل مرة طالعلنا بموضوع جديد🤷‍♀️