نسختي الرمادية

حلقة 28

#نسختي_الرمادية 🖤✍ حلقة 28

نسمع .. بس مدورتش ..
خشيت للصالة قلتلهم صباح الخير ..
ردو عليا قالولي صباح النور ..
خليتهم يهدرزو وخشيت للمطبخ خديت طاسة حليب وسبعة تمرات وصبيت قهوة من الترمس سخونة 😋..
وطلعت قعمزت بحداهم ،،
مرت عمي: مشاء الله وجهك ناير وشادة صحتك
امي: تتمرن وتاكل ف اكل صحي .. مش بعيد حتى اني بنتمرن معاها نطلع حتى للجردينة كل عشية نتمشّى ونهرول عالخفيف ..
رقية مرت عمي: ايه الواحد مهما يكبر يشد صحته خير..
امي: وتوا ضياء بيشدوه ولا شنو؟
رقية: اشبح .. لين يروح الصديق ويقوللنا .. فطوم خليتها قعدة متغششة ..
وأني نشرب فالقهوة.. قلتلها علاش خيرها متغششة؟ 😒
قتلي رقية: ضياء طلعو فالتحاليل متعه عنده الإيدز و السرطان لقوه منتشر💔
اني انصدمت 😳 قلتلها ايدز ؟؟
امي: ايييه .. ابصر من شنو انتقله يا ناري🥺 .. البلاد هادي لا عاد فيها تعقيم ف العيادات ولا حتى عند الحلاقين ..
قلتلها و سرطان شنو اللي جاه ؟
قلتي مرت عمي .. عمك مقاليش ..

قعدنا نهدرزو عادي لين خش علينا معتصم وجهه أسود
امي قتله خيرك مروح بكري من المستشفى ..
قعد متلبك وخاش بعضه مردش عليها ..
مشت ناضت لحقاته هي ومرت عمي يقولوله خيره ضياء صارتله حاجة؟؟ 😱
قاللهم بتعصب .. تي لا روحت بكري وخلاص😤
امي: امالا خيرك نكلم فيك مش على بعضك ووجهك رايح حاااالة ..

وقتها وكأني كنت نعرف الإجابة .. 💔 حسيييييت 💔
طلع من الحوش واتصل عمي بمرته وقعدت تكلم فيه ..
قاللها جايه سرطان الشرج وتوا بيديروله صورة بش يعرفو وين منتشر واما مرحلة ..

سكرت مرت عمي وقالت لامي نوضو نمشو لفطوم راهو ضياء تاعب هلبااااا ..
قالتلها امي من شني يجي السرطان هذا أول مرة نسمع بيه ..
و بلا ارادة مني قلتلها السرطان هذا يجي من الزنا زي قوم لوط ..
مرت عمي وامي انفلتو فيا 😳..
قلتلهم برو ابحثو عليه فقوقل .. الفايروس هذا يسبب ف سرطان الرحم للنساء .. وسرطان الشرج للرجال والنساء اللي يديرو فالزنا ..
امي: ربي يهدي وخلاص ..

سكتت و تنهدت رقية بعتالي قالت : والله قبل من مدة طوييييييلة الواحد ميحبش يجبد اعراض الناس لكن ولدي معين قالي لقيت صورته من غير لبس عند واحد من الشارع يهدد فيه بش يعتدي عليه.. ومشو ضربوه وكسرو الجهاز وشد ضياء مرجه طريحة ..
امي: والله ما باين عليه عاقل ومتسخر ومعمريش سمعت كلمة غلط منه .. لا حول ولا قوة الا بالله 💔 هذا البو اللي يخلي صغاره وميندريش عليهم لا حيين لا ميتين ..
مرت عمي: امالا شني .. لاهي بمرته الجديدة ومسيب ولده وبنته .. ميحسابش الوقت هوا تربية الولد أصعب من البنت ..
،،،،
،،،،،،،
طلعو لحوش جداي اما اني سيبت كل شي وقعدت نفكر في معتصم علاش راقيله ...

....
جي الليل ..
روحت امي من حوش جداي متضايقة على ضياء ..
وولاد عمي فالجنان يهدرزو مع زيد ويوشوشو ..
ومعتصم مجاش للحوش بكككل ..
قتلي امي مخشش معتصم؟
قلتلها جي قبل لمغرب وطلع معش شبحته ..
قتلي ضياء تاعب هلبااااا .. احتمال يطلعو بيه لتونس غدوة ..
قلتلها ربي يشفيه ..
قتلي خيرك معش تتحشمي تدوي ف دوة اكبر منك .. وين تندري عليه ضياء شن ايدير ولا ميديرش راهو كل كلمة حتتحاسبي عليها .. وزيدك زايد مرت عمك دوتها هلبااااا امبكري قالت شيراز قالت كدا وكدا فالنت .. ستر ربي بحدا بنات عمك بس قالتها الدوة هادي .. وحلفتها تسكر عالموضوع والا لو قالتها بحدا عماتك راهو جو خنقوك 😡