نسختي الرمادية

حلقة 20

#نسختي_الرمادية 🖤✍ حلقة 20

نضت مفزوعة وقلبي قابضني 😰
صبيت مية ف طاسة وشربت ،، ونحاول نتفكر اللي حلمته،، خمسة صغار يعيطو قدامي زعما شن معناته ،،🤷‍♀️
---------•••
وقفت عالمرايا لبست وشاحي وقمت شنطتي ونزلت ،،
لقيت امي تمسح ف الغبرة .. مدتلي مصروفي واني طلعت للباص،، نشبح ف بشير واقف بحدا سيارته ،،
قلبي عصرني 💔 باهي مدامك تحبني واني متاكدة تحبني ، علاش متغيّر عليا علاااااش🥺

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

دارلي بوسة من بعيد اما اني نزلت عيوني بزعل وركبت للباص ،، قعدت نشبحله من الروشن ومشينا ..
جاني مسج فتحت تيليفوني لقيته باعتلي محلوّة يا بطة ..😘
كالعادة لما يغلط يقعد يدير ف مبادرات بش نرضى ☺🤷‍♀️

معاه •• تحسي بأنوثتك ك امراءة ،، ب الحب بكل انواعه ❤
يديرلك المستحيل،، و يلحقك لآخر الدنيا بش يرضيك ،، حبه مميز مش زي حب أي راجل تاني،،
و يمكن لأنه شاعر يفهم ف الغية والصوب ،، تحسيه استاد فالغزل ،، لدرجة اوقات نخاف منه ومن كلامه المعسول ،، يحب يتملكك بالكامل ..

واني فالطريق قعدت نفكر 🤔 ،، بااااهي البنات كلهم يبعتو ف صورهم ،،
خلاص هو يحبك يا شيراز 🥺 ومن حقه يشوفك زي ما هو يبعتلك ف صوره من غير ما يقولك لا .. ،، وهو صاحب ولد عمك وخوتك يعرفوه ،، مستحيل حيضرك ولا حيهزا عليك،
شوفيه كيف ناض وقف قدام حوشكم الصبح ،، وكيف يجي كل ليلة يفتح ف اغاني ويوقف قدام بلكونتك بش يشبح ضي روشنك والع .. ويقعد يصورلك فيه ويبعتلك صورة ضي دارك ويقولك كنت نتخايل فيك كيف راقدة و يتغزل بيك .. ❤❤
قطع سرحاني صوتي عمي متع الباص قالي وصلنا
نزلت وسكرت الباب وخشيت للثانوية ..
وقفت فالطابور وقدامي المسمومة الشاطرة ابتهال ..
نسمع فيها تتأفف وتاخد فالوشاح وتحدف فيه كل شوية لين مرة من المرات جي ف عيني .. نضت نعيط وجعتني الضربة وعيني ولت حمراء 😣 قلتلها خيرررك 😡 مريضة انتي ؟؟ فيك جن راكبك ؟؟ اوقفي زي الناس الطبيعية .. 🤬
قتلي خيرك تعيطي 😑 قلتلها من عبطك .. ضربتيلي عيني 💔
جتنا ابلة الرياضيات تحز .. قعدت ابتهال تحرش فيا .. قلتلها ضربتني على عيني .. قتلي عادي ناشاتك .. قلتلها هي تلعب بيه وشاحها مش مرة ومش تنين .. مداما واقفة ف طابور المفروض تحترم نفسها وتعرف ان فيه واحدين بيوقفو وراها 🤨
ابلة الرياضيات سكتت ،، وهي ساكتة 🤐 ..
تلفتت لقيت ( تسنيم و نور واميرة ) يشبحولي و يقولولي خيرك.. وسعي بالك ..
قربت نور مني وقعدت تسأل فيا .. قتلي تو نوراها ..
جت وقفت قدامي وقعدت تهدرزلي على عمايلها ،، لين خلتني نضحك بدموعي ..
المشرفة متع الطابور تقول نسمع ف صوت ضحك فالجيهة هيا .. 😡 تي والله كان نحصل عليها الا ما نديرلها استدعاء .. اني شديت ضحكتي ونور تعلق على ابتهال كيف توقف وتمشي .. ومرة مرة تنخص فيها ب طوبلي وهي تعيط .. 😂😂
قرينا النشيد وقعدنا نخشو .. ومع الزحمة صار الجري .. تجي تسنيم ادف ابتهال وتطيح بين البنات فالزحمة ويطيحو معاها زوز تانيات.. قعدو يضحكو عليهم .. نظاراتها طاحو منها و تكسرو شوية قعدت تكشخ وتقول من دفني 😡 .. خطمت بحداها عفست على شنطتها الملوحة بقصد .. وهي يزيد ما يرقالها 😂😂
خشيت لمقعدي الاخير وقعمزت ،، وهي لحقتني تعكز ..
قتلي ان شاء الله يتكسرو رجليك 😡.. قلتلها ان شاء الله فيك .. 😒
جت نور وقعمزت بحداي .. وتسنيم واميرة قدامنا كالعادة .. 🤷‍♀️
جت ابلة الرياضيات تشرح ،، ومع الدوشة والمشاغبة وهي متعرفش تشرح للأسف .. منفهمو منها ف شيء ..
المنهج صعب ،، ومش فاهمة ولا حاجة .. الابلات المقومات فالفصلين الاولات .... واني انسانة متفوقة نغار على مستواي 😣👌🏻 خديته الموضوع على محمل الجد ..
طلعنا للإستراحة .. فتحت تيليفوني لقيت بشير متصل بيا مكالمة .. طبست عليا نور قتلي اووه بشبوش ،،!! 😂
قعدت نشبحلها وقلتلها ووه قزقازة 😌
قتلي تسنيم شن صار فيكم قعدين متعاركين ..
قلتلها ايه ،، ولا ..
قتلي اميرة كيف تجي ..
حكيتلهم الجديد متعي ،، قالولي والنبي شن فيها ابعتيله مداما تحبو بعض ..
اتصل بيا تاني .. قعدو يشجعو فيا نرد عليه لين رديت ..
قتله الو .. قالي بعياط وينك .. هكي مترديش،،!!
قتله خيرك تكشخ 😡 قالي بدينا فالنقان ..😑
قتله شن هياااا .. صبح ره 🤨
قالي ححي مكانش عندي علم والله 🙄 وقعد يضحك
قتله تضحك 😑 قالي نحبك لما يرقالك.. 😁
قتله لما يرقالي بسس ،، 😒
قالي بدينا فالنقان ،،!! 😉
قعدت نضحك عليه .. صح انق عليه اوقات علاش الكدب 😁😂
قالي بخصوص موضوعنا .. خلاص متزعليش مني ومعس نبي منك شيء الا راحتك.. اني كان بودي نكونو زي باقي الناس المرتبطة .. لكن منبيش نزعلك مني ونغصبك على حاجة انتي متبيهاش ..
قتله تعرف حبيبي ،،!!
قالي نعم .. يا روحي
قتله كلامك هذا كله زاد ما خلاك تكبر ف عيوني .. وخلاني نتأكد اني حبيت الراجل الصح👌🏻😘
قاللي منبيش نخسرك .. راحتك عندي بالدنيا..❤