نسختي الرمادية

حلقة 31

#نسختي_الرمادية 🖤✍ حلقة 31

متخافوش فيه حلقة .. وربي قصة هروب الضي والتغطية ليبيانا مفددتهم لكن مش حنرخي بيكم .. حاليا راكبة فالدور الخامس نصطاد فالتغطية 😭 تلاتة ايام مفيش تغطية رغم الضي يجي .. اللي تعرف حد فالليبيانا تقوله عالمشكلة😭

السرد 👇🏻👇🏻
سكرت الباب وراهم وخشيت ،، و طول انغم قلبي وتمنيتهم لو يباتو معاي 😭❤ ...
لقيت امي تاكل فالبسبوسة وتشكر ف تطييب رحمة ..
قلتلها مش منه فراس جي خطبها ،، من البسبوسة 😉
قتلي امي شوره 😂😂 .. امالا خودي منها الطريقة
قلتلها لالا اني لو نديرها البسبوسة حيطفش مرة وحدة 😂😂 ..
--
----
-------

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

خشيت لداري ونقول .. شن بيضمهالي توا 🥺😭
شمرت على يديا وبديت نرد فالحاجات لمكاناتهم بدون تركيز .. وركبت عالكرسي ورديتهم الفوق ..
جت عيني ف حاجات بشير المحطوطة عالمكتب 💔 ..
وقفت ومسكتهم .. فتحت السنسلة ومسكتها بيدي .. وقمت الفاتورة .. قريت اسماء الحاجات اللي شاريهملي والتاريخ والوقت بالثانية محسوب 💔.. تفكرت كل شيء .. بس قلت الحمد لله 😌❤ الحمد لله اللي جتني ف هكي ولا جتني ف حاجة تانية .. الحمد لله اللي ربي بينلي حقيقته ومعش قعدت مغشوشة بيه .. قمتهم في يديا و خديت ولاعة ومع شوية مذكرات زايدات وطلعت للجردينة جيهة الشواية المبنية بالطوب .. حطيت كدس الأوراق وولعت فيهم النار .. و بديت ننفخ فيهم ومع النسمة بدت تلهلب 😂🔥 ..
هادي الفاتورة .. حذفتها ..
وهذا باكو الكنينكس .. وهادي السنسلة .. وكيف بنحدفها مهانتش عليا منظرها حلوة 😣 .. أصلا فضة مش حتذوب من النار يعني 🤷‍♀️ ...
غدوة أول بنت تتصبح عليا فالجامعة حنعطيهالها .. منه نفرحها ومنه نتخلص منها 😌👌🏻 ..
وهوبااا .. رديتها فالجيب ..

رجعت لداري وقعدت نتصفح ونحضّر ف محاضرة غدوة .. لقيت الاشتراك بيتم والقيقات فاضلات ..
قعدت انزل ف اغاني وبرامج بش نتمهم .. المهم ميسحبوهمش المدار واللبيانا😈😈نياااهاااهااا
نزلت الواتس والفايبر والسناب واللي نلقاه انزله ..
قعدت نفعّل فالسناب واشتركت فيه .. اما باقي البرامج خليتهم يتحملو وخشيت رقدت 😴

نضت الصبح ،، لبست ودرت فطور خفيف وقعمزت نتروّق فالجردينة والسيارة قدامي نسخّن فيها ..
عجبتني الإضاءة .. قلت خن ناخد لقطات بالسناب هذا اللي البنات كلهم منزلينه واني لا 🙃 ..
ياااا لطيف 😳 .. خيره وجهي هكي .. 😰

نغير ف الفلاتر وكل مرة وجهي يتغير شكل ..

تاريته السناب هذا اكبر وهم .. لو يسكروه عالبنوت اشبح شن حيصيرلهم .. تحسها الثقة والتجكتير وين تنزل فصورها وهي بالسناب تقول توم كروز ... وهي كان يصوروها بلا سناب صورتها يرقدو بيها الصغار فالقايلة .. 😒
تم إلغاء التثبيت ✔ ..
أيوااااه 😌👌🏻 ... نبيه وجهي اصفر اني ونبي عيوني مبلقات زي ما هما 😁..