أحببتك خطأً

الفصل السادس عشر

السلام عليكم🌷
عايزة أقول إن ده آخر فصل هينزل، هنوقف  عشان رمضان، كل سنة وأنتوا طيبين وبخير🌷
بعد رمضان هنستكمل  الرواية
دمتم بخير✨🌷
###

#أحببتك_خطأً
#الفصل_السادس_عشر
#بقلمي_شهد_سامح

*****

وقفت همس أمام المرآة وقامت بوضع حجابها على رأسها وهي تقول: تفتكروا يا بنات عمار هيرضى يصالحني

كانت الفتايات جميعا يتجمعن بغرفتها لتفكير في خطة تجعل عمار يقبل اعتذارها

نطقت جنة التي كانت تطعم ابنتها: أنا كجنة مفتكرش

رمقتها ريانة بغيظ قائلة: ونبي تقعديلنا على جنب أنت وتخليكي في بنتك، نازلة من الصبح تفاؤل

قذفتها جنة بالوسادة قائلة: تصدقي إنك لو مسكتيش هقوملك بالشبشب

نظرت لهما همس بغضب قائلة: مش وقت خناق، بسرعة أجيب ايه لعمار وأنا رايحة أصالحه

تحدثت هنا تلك المرة قائلة: كتاب، أبيه عمار بيحب الكتب جدا خصوصا الي بتتكلم عن قضايا الإدمان، هو كان قالي قبل كده إنه مهتم بالموضوع

نظرت لها جنة بخبث قائلة: البت هنا دي الوحيدة فينا الي عارفة عمار

قالت رنيم بابتسامة: أنا برضو لاحظت، ممكن تكون بتحبه

نظرت لهم همس بصدمة قائلة: يخربيت التفكير، ايه دااااااه، بتحب مين، اخرجوا برة يلا خلاص شطبنا

ضربتها ريانة بخفة قائلة: والله ما خارجين من هنا غير لما نعرف هنا بتحب عمار ولا لا

اتسعت عين هنا بغير تصديق ثم هتفت: أحب عمار ايه أنتوا مجانين يا حبايبي، متجيش معاكوا إنه زي زياد ويمكن أكتر، لا إزاي تفكير زبالة

تعالت ضحكات جنة قائلة: أهو أنا ببقى مبسوطة وأنا شايفة الدنيا بتولع بسببي

رمقتها هنا بغيظ قائلة: الي مصبرني إن أنت الكبيرة هنا فساكتة

عدلت من ملابسها بغرور قائلة: طبعا أنا محدش يقدر يعملي حاجة

أشارت لهم همس بالصمت ثم نظرت لريم قائلة: ساكتة ليه، قولي رأيك في الي هنا قالته

ابتسمت ريم قائلة: هقول ايه، بالنسبة لفكرة الكتاب لطيفة

هتفت جنة بضحكة: ريم دي العاقلة الي فينا أقسم بالله

قالت ريم بابتسامة: مش مسئلة عقل، بس لو كان في داعي للكلام كنت اتكلمت

أخذت همس حقيبتها وهي تقول: طيب يا شباب أنا هروح أشتري كتاب وأروح لعمار الشركة ادعولي

نهضت هنا ثم قامت بتقبيلها وهي تهمس بأذنيها: ربنا معاكي، حاولي تصلحي الدنيا مع زياد بالمرة حاساها معكوكة، زياد بيحب الكتب الرومانسية بس تكون فيها فكرة