اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
- أنتِ مراتي يعني حلالـي فاهمـة ولا مش فاهمة..؟
"تحت مُسمى الشرع والزواج مش لازم كل حاجة بتحصل تكون صح، مش لازم نسكت على حقوقنا ونعدي كتير ونرضى بالواقع ونعمل زي الناس الكُبار ونقول لازم نستحمل علشان العيال، الكرامة لو راحت مبترجعش، الثقة لو اتلغت مينفعش نمسح من عليها علامة إكس وكله يبقى تمام، الحب لو انتهى القلب هيتعب، بس مفيش مانع من تعب هيشفي كل خلية فينا"
- مش فاهمـة وبقولك تاني أهه أنا مش فاهمة، أعملك إيه يعني علشان أنا مراتك، عايزني أرضى أنك تتجوز لا وكمان تجبها تعيش هنا إيه البرود ده..؟!
"محستش إلا وبشعري هيتخلع من جدوره "
-هتجوزها وهجيبها هنا ومش هتقدري تعملي حاجة ..! كفاية حته عيل مش عارفه تجبيه
-اتقي ربنا ياشيخ والتفت ليه لعله يرزقك، يمكن ربنا ليه حكمة في كدا، ويمكن أنت أصلًا متنفعش تكون أب
- طب روحي وأنتِ طالق
"كياني اتهز مش هكذب حسيت بخنجر مسموم غرز في نص قلبي وبوظ كل خلية فيه، مش معقولة دا معتز اللي فضل يتقدملي كل شويه ويترفض مش معقولة حب تلات سنين يروح هدر، بس دا الحل وكان لازم يكون دا الحل في الأول والأخر كله مقدر ومكتوب"
-فرح هتفضلي قاعدة كدا يا بنتي دا حتى مايرضيش ربنا
"فرح" كان نفسي يكون ليا من اسمي نصيب، كان نفسي حد يحبني زي ما أنا بحب، ماحسش إني بدي من غير مقابل، كان نفسي أتقدر..وبس.
_نعم يا ماما .؟
_نعم يا ماما..!! أنتِ مش شايفه نفسك يا ضنايا بقالك أربع شهور على الحال ده تروحي شغلك وتيجي تقعدي لوحدك، هو ولا همه يا عبيطة اللي يبيع بالرخيص أوعي تبصيله..ارميه ورا ظهرك زي ماهو عمل، وربنا هيسعدك وهيعوضك.
_بس أنا مش حزينة عليه..أنا حزينة على نفسي.
_هوني على قلبك يابنتي فإن له ربًا سيملأه نورًا يكفيه .
نزلت وروحت شغلي كالعادة بس وأنا جايه لقيت بنوته صغيرة واقفة قدام الباب بتاع العمارة وبتعيط، مقدرتش مقربش منها ويمكن غريزة الأمومة اللي جوايا هي اللي دفعتني إني أضمها وأحاول أسكتها.
