_الأول كنت بسمعك بقلبي مش بوداني دلوقتي حتى دواني قرفانة تسمع صوتك..صوتك اللي كان أكتر حاجة بتحسسني بالأمان..طلقني حالًا
_نسمـة...نسمـة مالك فوقي
انتفضت من مكاني ووشي كله مياه..بصيت لإسلام اللي قاعد جنبي التفت على الكومود جاب منديل وبدأ يمسحلي وشي وحضني
_إهدي يا حبيبتي مجرد كابوس وراح لحاله
مسكت فيه جامد هو هنا حقيقي وأنا اللي كنت بحلم..إسلام حب الطفولة مستحيل يخوني..إسلام بيحبني للدرجة اللي قالي فيها مرة "أنا بتنفسك..إسلام من غيرك ولا يسوى"
_إسلام مستحيل يفكر يخون نسمة..نسمة حياة إسلام
قالهالي بعد ما بعدني من حضنه وبص في عيوني كأنه عارف قد إيه أنا خايفه..ابتسمتله إبتسامة بسيطة خالص
_نسمة أنتِ مش بس مراتي وحبيبتي من واحنا صغيرين أنتِ كياني..أنا بحبك وبحب إبتسامتك المميزة اللي محفورة في ذاكرتي، بحب عيونك اللي بيلمعوا لما أكون جنبك، بحب وشك وبشرتك وبحة صوتك وضحكتك، بحب سحر أسلوبك في التعامل وازاي بتعرفي تقنعيني بحاجة أنا واخد مئة قرار إني أرفضها بس معاكِ بوافق، بحب حساسيتك من الورد ودا بيثبتلي إن مفيش وردة بتحب ورد، بحب حنيتك عليا وطهارتك..بحبك لمدي العمر يا نسمة وخليكِ عارفه إن قلب حبك الحب دا كله مستحيل يقدر أو حتى يفكر مجرد تفكير يخونك.
