اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
_شهل يا ولدي عايزة البشارة الليلة
مش لازم علشان صعيدي يبقى دماغه ناشفة وحجر زي ما كل الناس بتقول..أنا حبيبي غير الكل عملة نادرة في وسط عالم المتشابهات دول كلهم..النهاردة كان فرحنا كنت مبسوطة أوي لما سافرت معاه الصعيد وعملت الفرح هناك قد إيه الناس بسيطة ووشها بشوش..وأنا البساطة بتخطف قلبي.
_سيبك منيها وغيري خلجاتك علشان تنامي علشان اليوم كان طوويل جوي عليكِ
قربت منه وبوسته على خده
_ربنا يخليك ليا يا حبيبي
أخدت البيجاما بتاعتي ودخلت الحمام اللي في الأوضة علشان أغير أنا فعلًا تعبت النهاردة كفاية موضوع السفر من القاهرة لوحده كان متعب غيرت وأخدت الفستان في ايدي وطلعت لاقيته غير وقاعد على السرير أول ما شافني ابتسملي وقالي
_يلا تعالى كلي لقمة عشان هتتعبي لو نمتي على لحم بطنك
حطيت الفستان على الكنبة وقربت قعدت جنبه اتصدمت لما بصيت لصنية الأكل
_إيـه كل دا هو في حد هيجي يأكل معانا
انفجر في الضحك وأنا مستغربة هو بيضحك على إيه أنا مقولتش حاجة تضحك..
_خلصت ضحك يا حضرت العمدة..!!
هز رأسه وهو لسه بيبتسم
_قولي بقا إيه كل الأكل ده.. أنا لما كنت بعمل عزومة لصحابي مكنتش بعمل نص الأكل ده
_طب إيه رأيك إن صنية العشا دي لازمن تنزل من اهنه فاضية
كنت لسه هرد عليه بس سمعت صوت خبط على الباب وصوت مامته بتنادي
_طمني يا ولدي..
أنا عقدت حواجبي ومش فاهمة حاجة لقيت إياد بيطبطب على ايدي ويقولي
_كلي على قد نفسك عاد بجا..وأني هشوف أمي وجاي طوالي
هزت رأسي وابتسمتله فتح الباب لقى مامته بتحاول تبص جوا أنا شوفتها وعملتلها باي..إياد خدها وخرج بعيد عن الأوضة.
