_هيتجوز..!!
الكلمة على قد ما فيها من سعادة واضحة للبعض، فيها وجع كبييييير بالنسبالي، إحساس إن الحاجة اللي روحك فيها بتتسحب منك بيوجع بدرجة تخليك عايز تصرخ بس مش لاقي صوتك.
_أنا عارفه إن في مشاعر جواكِ لـ ياسين بس.....
قاطعتها بكل إنهيار جوايا بحاول أتلاشاه
_بس الحكاية خلصت...خلصت يا ماما
سبتها وقومت دخلت أوضتي وقفلت الباب ووقفت قدام المرآية وبصيت لنفسي وأنا مش لاقيه حاجة أواسي بيها نفسي، ايدي اتحركت وبدأت أحسس على كل جزء في وشي وأسأل نفسي هل أنا وحشة..!! هل ناقصني حاجة..!!
دخلت البلاكونة وفي ايدي تليفوني معرفش ليه مسكته، بس أهه حاجة أمنع نفسي بيها من التفكير فيه..
محستش بنفسي غير وأنا بكلم هالة صاحبتي الوحيدة، عايزه أخرج اللي جوايا ومش عارفه..عايزة أفضفض وحاجة كابسة على نفسي
_هيتجوز يا هالة... ياسين هيتجوز خلاص
لقيتها سكتت ولأول مرة تسكت وأنا بحكيلها مشكلة يمكن مش عارفه تقول ايه، أو بتدور على رد مناسب لحالتي دي.
_مش نصيبك يا أميمة..مش نصيبك
مسحت دمعة فرت من عيني غصب عني وكملت
_لو كان في طريقة أخليه بيها نصيبي صدقيني مكنتش هفكر ثانية
سكتنا احنا الاتنين أنا مش قادرة اتكلم وهي مش عارفه تقول إيه، لحد ما لقيتها فجأة قالتلي الحقيقة اللي أنا عارفها بس بنكر فيها علطول
_مبيحبكيش
دموعي نزلت بصمت تام
_بس أنا بحبه
قفلت التليفون خالص ورميته في جانب وبصيت للسما كتير ودعيت ربنا يخفف من وجع قلبي.
مر خمس أيام والنهاردة السادس، يوم فرحه على سلمى..يمكن وجعي دلوقتي أضعاف أضعاف أضعاف يوم ما خطب لأني دائمًا كان جوايا إحساس إن الخطوبة مش هتكمل..ياسين وسلمى مختلفين عن بعض تمامًا، بس يمكن الإختلاف هو مسمار الإنجذاب..أنا مش هحضر الفرح دا قرار أخدته بيني وبين نفسي قبل ما ماما تيجي تقعد معايا وتقنع فيا إني لازم أحضر وأتجاوز المرحلة دي وإني مش لازم أبان ضعيفة قدام حد..خاصة هو
لبست وجهزت ومسحت دموعي وكل حاجة بتوجعني أنا مش ضعيفة، مش هخلي الحب يضعفني، كنت لسه يادوب خرجت من باب أوضتي لحد ما سمعت طنط إلهام مامت ياسين بتعيط وماما بتهدي فيها سمعتها بتقول
"الحقيني يا سعاد سلمى سابت ياسين قبل كتب الكتاب.. أعمل إيه ساعديني بالله عليك"
اترددت في ودني ساعتها جملة كنت دائمًا برددها على لساني مع كل خذلان "من ترك يُترك ولو بعد حين"
أنت تقرأ
خبــايـا الحــب
Short Storyمجموعة قصصية القلوبُ لا تعرف التيمُّم ... إمّا أن ترتَوي بمن تحبّ أو تعطش حتى تجف. 🥀❤️
