اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
_اقلعيه
أحيانا بتكون عارف أن اللي بيحصل غلط وأنت مش راضي عنه بس مبتحاولش تغير أي حاجة بتسيب كل حاجة للنهاية، وبتحاول تقنع نفسك إن دا من باب التجربة مش أكتر أهي نجحت كان بها منجحتش أهو بتتعلم منها، عامل زي اللي بيسيب نفسه للتيار من غير مقاومة..من غير رد فعل.
قومت من مكاني متعصبة
_مستحيل
بابا شدني قعدني وبصلي بتحذير
_اقعدي يا بت هو إيه اللي مستحيل..!!
_أنت مش سامع دا بيقولي إقلعي الخمار.!
قام هو وقف "عريس الغفلة" وقال بثقة
_والله هو دا اللي عندي تقلعي الخمار وتلبسي زي بقيت البنات يا أهلًا وسهلًا مش موافقة خلاص براحتك
_أنا مش سلعة حضرتك جاي تشتريها يا محترم ولا بايرة علشان تتمنظر عليا..متفرحش بنفسك أوي كدا..أقولك على حاجة أنت مش واخد بالك منها..أنت إنسان مريض وكل واحد بتفكيرك العقيم ده يبقى مريض..الناس بتسعى للستر وأنت بتسعى للعُري، لو هتبقى مبسوط ومراتك ماشية لابسه ضيق وشعرها باين واللي يسوى واللي ميسواش يبصلها فأنت مش بس مريض ومحتاج تتعالج دا أنت ديوث كمان.
طلعت كل الكلام اللي كنت عايزة أقوله ودخلت أوضتي وقعدت أستغفر قال عايزاني أقلع الخمار قال يأخي تبًا لك
بعدها بشويه لقيت باب الأوضة فتح جامد وبابا داخل يزعقلي
_عجبك اللي عملتيه ده يا وش الفقر أنتِ..!!
اعتدلت وقومت وقفت قصاده واتكلمت بهدوء رغم إني متعصبة بس مينفعش صوتي يعلى على أبويا
_وأنا عملت إيه يعني يا بابا..عريس معجبنيش وأنتهينا
_ومعجبكيش ليه يا روح أمك الراجل ملؤ هدومه ومعاه فلوس تعيشك ملكة وكل طلباتك مُجابة
