اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
_هتتجوزيـه ورجلك فوق رقبتك
كل اللي عايزة أعرفه ساب بنات مصر بحالها وجالي أنا ليه..؟ هو إمام جامع ماشاء الله عليه..إيه اللي يخليه عايز يتجوز واحدة أكيد في نظره كاسية عارية..!! كل اللي أعرفه عنه اسمه وإنه ساكن في الشارع اللي ورانا وبس ودي مش معلومات كفاية إني أقعد معاه دلوقتي
_يلا العريس قاعد في الصالون
بابا عمره ما شد عليا بالطريقة دي، من بعد وفاة ماما الله يرحمها وهو بيعاملني كأني كل حاجة بالنسباله بيقولي إنه شايف ماما فيا.
دخلت لابسه بنطلون جينز أزرق وبلوزة بيضاء وطرحتي
_السلام عليكم
رفع رأسه ونزلها تاني بسرعة
_وعليكم السلام ورحمه الله وبركاته
قعدت قصاده ومش عارفه أقول إيه يمكن لأن دا أول عريس يتقدملي علشان كدا متوترة أو الموقف نفسه يستحق التوتر..!!
_اشمعنا أنا..؟
_لأنك وقعتي في طريقي من غير ترتيب ما بينا..في يوم وليلة شوفتك حسيت إني منجذب ليكِ معرفش ازاي أو إيه اللي شدني ليكِ، يمكن ملامحك البريئة اللي كانت أول مرة أشوفها وأنتِ واقفة قدام محل القماش وأنتِ بتقولي لصاحبتك إنك نفسك تلبسي فستان طويل وواسع بس مفيش حاجة مساعداكِ على كدا..ويمكن لأنك نصيبي فعلًا
_بس أنا مش مناسبة ليكِ...قصدي يعني بص لنفسك وبصلي..!
كمل كلامه وهو باصص في الأرض برده..بيتجنب يبصلي
_جوهر الإنسان النقي بيبدأ من جوا..لو عايز يتغير يفتش جواه على الحلو ويخرجه علشان يمحي الوحش..وبعدين كل واحد فينا عنده جانب وحش بس الشاطر اللي يمسح الوحش بالحلو اللي جواه..أنا شايفك نصيبي وصليت استخارة وفجأة لقيت نفسي جاي على هنا
_وإفرض أنا مش عايزة أتغير...إفرض الوحش بتاعي طغى على الحلو لما مسحه..!
_الوحش والحلو اللي جوا كل واحد فينا عاملين زي الخير والشر بيفضلوا يتصارعوا لحد ما واحد فيهم يقتل التاني بس كل دا بيحصل بإرادة من الإنسان...وأنا شايف وحوشك بتتصارع وأنتِ الحكم اللي هيقرر الكأس لمين.
