_يعني إيه أمضي على محضر بعدم التعرض لمراتي..!!!!
الصدمات حالة طوارئ، جزء لا يتجزأ من حياة كل شخص فينا، عبارة عن تقلبات لفوق ولتحت، مد وجزر، حالة من الارتقاء والانتكاسة، السعادة والحزن، البهجة المبالغ فيها أو....البؤس.
التفت بصلي بصة كانت تدب الرعب في قلبي الأول لكن دلوقتي لأ، قرب مني خطوة قدام الضابط اللي وقف تربصًا لأي تصرف غير لائق منه، وهمس بشر:
_محضر عدم تعرض..محضر عدم تعرض يا دكتورة..!!
رفعت رأسي وبصيت في عينيه، عينيه الأحب لقلبي كانت وهتفضل أجمل عيون في العالم كله، بلعت ريقي بتوتر وقولتله بثقة مزيفة:
_أيوه..محضر عدم تعرض يا بشمهندس
بص للضابط ولا كأنه موجود قرب لدرجة خطيرة وقبل ما أرجع لورا همسلي بنبرة دبت القشعريرة في نفسي:
_هتعرض..مراتي وأنا حُر أتعرضلها بالطريقة اللي أحبها، أو اللي هي تحبها مش هتفرق.
وشي احمر ورفعت عيوني لعيونه تاني لقيت خليط من المشاعر الغضب، الحزن والانتقام وال..اللهفة، بصيت للضابط بتوتر وقولت بصوت خفيض:
_يا حضرة الضابط
خرج الضابط من ورا مكتبه وجه وقف قدامه، بينما التاني ابتسم بسخرية، فاتكلم الضابط بهدوء وقال:
_اتفضل يا أستاذ امضي وخلصنا
الشرر في عينيه اشتعل أكتر وفي أقل ثانية اختفي وحل مكانه العبث فالتفت للضابط وقاله:
_مش تسألها عن نوع التعرض يا حضرة الضابط الأول..!!
الضابط كان لسه هيتكلم بس مسكت شنطتي وطلعت جري، وقفلت الباب ورايا جامد وقفت قدام عربيتي وأنا حاطه ايدي على صدري بحاول أخد نفسي بإنتظام، لقيته خارج من القسم والإبتسامة اللي على وشه اختفت وحل مكانها زعابيب أمشير.! فتحت باب العربية وقبل ما أركب شدني وقفل الباب وأتكلم بعصبية كأنه مش مستوعب اللي حصل لسه:
_محضر عدم تعرض..أنا يتعملي محضر عدم تعرض ومنك أنتِ..من مراتي..!
مسكت ياقة قميصه بعصبية من بروده اللامتناهي وهمستله:
_هو بالعافية..!! يأخي بقولك طلقني مش عايزة أبقى مراتك..أنت إيه..مبتحسش..!!
رفع حواجبه بخبث وقال:
_أحسنلك أكون مبحسش دلوقتي لأن مع المسكة بتاعتك دي..هندخل القسم تاني بس بقضية تحرش
مسحت على وشي وصوتي غلبه الضعف وقولت بقلة صبر:
_إبعد عندي عملية..الكلام معاك مش بيقدم ولا بيأخر
بعد خطوتين لورا واتكلم:
_هروح ألقيكِ في البيت..!
_لأ
ركبت العربية ومشيت ومخدتش بالي إني بعيط غير لما وقفت في إشارة مرور ولقيت بنوتة صغيرة بتبيع ورد واقفة عند الشباك وساكتة يمكن خبطت على الشباك بس أنا مسمعتش فتحت الشباك ولسه هديها فلوس لقيتها بتمدلي ايدها بوردة وبتقولي بإبتسامة:
_خدي الوردة دي ومتعيطيش...أنا مش عايزة فلوس
أنت تقرأ
خبــايـا الحــب
Short Storyمجموعة قصصية القلوبُ لا تعرف التيمُّم ... إمّا أن ترتَوي بمن تحبّ أو تعطش حتى تجف. 🥀❤️
