_مدمن..!!
على مدى العصور، والضغوطات، والصدمات، مفيش بني آدم مش بيتعرض للذهول، للمفاجأة، من حدث مكنش يتوقع حدوثه وحدث بالفعل.
الصمت لما يكون من جهة المذنب بيكون صمت قاتل.
إنتظار الإجابة أسوأ من رمي السؤال.
_من امتى الموضوع ده..!!
رفع رأسه بصدمة واتجنب يبص في عيوني وقعد بيحاول يتكلم بس مش عارف يجمع جملة مفيدة على بعضها.
قربت من الترابيزة اللي كان قعد جنبها وزقيت كل اللي عليها وقعته بما فيها كيس البودرة.
_يا خسارة
همست بيها وجريت بره الأوضة بسرعة وقبل ما أدخل أوضتي قرب مني جامد ووقفني قدام الحيطة وهو قدامي تمامًا، كان بيتنفس بصوت عالي خوفني منه أكتر، مسك دراعي وضغط عليه وقرب من ودني بطريقة اربكتني وقال
_متقوليش لحد ولا حتى أمي
_هقو....
مش عارفه منين جاتلي الجراءة والقوة علشان أعاند قدامه وهو في حالة زي دي، قاطعني لما حط ايده على بؤقي وهمس بصوت أضعف
_خافي على نفسك يا حبيبة.
ساب ايدي وبعد دخل أوضته، وأنا..!! في حالة ذهول مش قادرة أخرج نفسي منها، لؤي ممكن يأذيني بجد..!! حسيتها في صوته مش مجرد جملة تهديديه وخلاص.
دخلت أوضتي بسرعة وقفلت الباب عليا من جوه وانهرت في العياط مش عارفة علشان أي سبب بالضبط، هل لأني يتيمة ولا لأن الشخص اللي بحبه يخذلني فيه بالشكل ده..!!
فات نص ساعة لما لقيت الباب بيخبط وخوفت أفتح يكون لؤي، وقفت ورا الباب لحد ما اللي يتكلم لحد ما سمعت صوت خالتي.
_حبيبة أنتِ هنا يا بنتي..؟
مسحت دموعي وفتحت الباب بعد ما أخدت نفس طويل وحاولت ابتسم في وشها بس قاطعتني وهي بتقول
_حبيبة..!! مالك يا بنتي أنتِ معيطة.؟!
هزيت رأسي بأيوه لأني مش هعرف أكذب وشكلي باين عليه كدا، أخدتني في حضنها وطبطبت عليا
_فيكِ إيه يا بنتي..؟
"فيا ابنك" كان نفسي أقولها بكل صراحة بس كعادتي الجبانة همستلها
_افتكرت بابا وماما بس يا خالتو.
_ادعيلهم بالرحمة يا حبيبتي هما عند اللي أحسن مني ومنك دلوقتي.
على ذكرى ماما وبابا بكيت أكتر واستأذنت منها إني محتاجة أبقى لوحدي، وهي قدرت الموقف ووافقت.
قفلت باب الأوضة عليا تاني وفضلت أعيط كتير أوي، كل حاجة في حياتي ماشيه بالعكس.
بعدها بشويه سمعت صوت خالتي وهي بتخبط وبتناديني علشان أكل، رفضت بحجة إني مليش نفس وعايزة أنام، أصرت كتير أطلع أكل بس فضلت مصممة إني مطلعش لحد ما زهقت ومشت.. وأنا نمت وجوايا صورة مشوهه لـ لؤي.
أنت تقرأ
خبــايـا الحــب
القصة القصيرةمجموعة قصصية القلوبُ لا تعرف التيمُّم ... إمّا أن ترتَوي بمن تحبّ أو تعطش حتى تجف. 🥀❤️
