خبــايـا الحــب

"38"

_يعني أي للكبار فقط أنت مجنوووون..!!

فقد الثقة وعدم الشعور بالأمان ناحية شخص أكتر من مقرب منك، الشخص اللي بتأمنله وتثق فيه ثقة مختلفة عن ثقتك بالآخرين..شيء محزن جدًا.

_فين الجنان في كدا كلها كام شهر وتبقي مراتي ودا شيء طبيعي.

ابتسمت بسخرية واستهزاء من نفسي قبل منه وكلمة واحدة بتردد في بالي "أنتِ اختارتي غلط" بصيت للشاشة قدامي ومش قادرة أحرك لساني وأتكلم بس بصعوبة حركت صوابعي وكتبتله رسالة

_تعالى بكره خد حاجتك

استنيت لما شاف الرسالة وقفلت علطول، حطيت الموبايل جمبي ورجعت رأسي لورا وبصيت للسقف ودموعي هي الوحيدة اللي كانت مرفقاني في لحظة زي دي..

الخداع بقا مصطلح رخيص وعادي من كتر ما الناس بقت بتستخدمه، وليه..!! ليه نخدع بعض ونرسم وشوش مش وشوشنا.!! ليه نخلي الواقع كله بأقنعة مزيفة، ليه متبقاش الصراحة عنوان لكل حاجة في حياتنا.!!

ببساطة لأننا كلنا بنحب المسكن اللي بيريح عقولنا وقلوبنا عن ضجة العالم، بنلاقي في الخداع اللي مش بنلاقيه في المصارحة فبنلجأله، وأول المفعول ما يزول نشوف الناس وحشين، طب واحنا فين، ما احنا منهم برده.!

أيوه العيب فيا أنا كمان علشان إديت الأمان لأول شخص اهتم وطبطب على القلب الموجوع."

نمت وياريت النوم يقدر على اللي في دماغي، قومت الصبح وأخدت نفس كبير إستعداد ليوم جديد بكل تفاصيله...وإرهاقه، فتحت التلاجة وطلعت الأكل وبدأت أحضر الفطار، وحطيته على صنية متوسطة وطبعًا منستش القهوة بتاعت بابا، أخدت الفطار ودخلت الأوضة عند بابا وصحيته

_يا أستاذ رحيم المصلحة واقفة وعايزاك

قام قاعد وسند ظهره على السرير وقال بهدوء وهو بيلبس نظارته

_ياااه يا رهف..أيام يا بنتي وعدت

رفعت الغطا من عليه وسندته لحد ما وقف علشان يغسل وشه وقولتله

_مش عايز تنزل موحشكش الشارع، موحشتكش المصلحة.!!

رجعت بيه للسرير تاني وقعد وحطيتله صنية الفطار قدامه، لقيته رفع صورة ماما اللي جمبه وبصلها بشغف وابتسم تلقائي زي كل مرة يبصلها فيها وقال

_أمينة بس اللي وحشتني يا رهف، كل حاجة في بعدها بارده وملهاش طعم.

معرفش ليه بس جه في بالي بعد كلام بابا السؤال اللي سألوه لـ قيس ابن الملوح لما قالهم
"‏- هل ماتت ليلىٰ ؟
- لَيلىٰ لا تموت ، ليلىٰ فِي قَلبي ، أَنَا لَيلىٰ.."

الحب حلو للي يعرف يعيشه صح، للي يعرف معناه الحقيقي، اللي يسعى لحب الروح مش حاجة تانية، الحب حلو...ويابخت صحابه