اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
_ميشرفنيش أبقى جوزك بعد اللي حصل... أنتِ طالق
زيي زي آي بني أدمه كنت عايشه حياتي في هدوء وبساطة بعد العواصف اللي مريت بيها، اتقدملي شاب كويس وأخلاقه كويسة كان جارنا بما إن مفيش حاجة تعيبه وافقت عليه، فاضلنا مخطوبين خمس شهور وبعد كدا كتبنا الكتاب ودلوقتي فاضل شهر على الفرح، في أول أسبوع في الشهر كنت راجعة من الشغل متأخرة شويه مش كتير يعني الساعة كانت 10 محستش بنفسي غير وأنا بصرخ لما لقيت حد بيشدني لمكان ظلمة..
_طالق..!!
_أيوه طالق يا ملك طالق وستين طالق عايزاني إزاي أكمل حياتي مع واحدة مغتصبة..!! أنا مش هعرف أتأقلم مع القصة والحياة دي ولا حتى هقدر أنسى إن حقي مبقاش حقي..!
_بس أنا مليش ذنب..!
_دا اللي عندي
_طب وفرحنا اللي قرب..والناس..!!
_يولعوا ميهمنيش حد غير سمعتي اللي هتتشوه لو ارتبطت بيكي
أكتر حاجة ممكن توجع إن يكون جواك كلامي عايز تقوله بس مش لاقي اللي يسمعك، أكتر حاجة ممكن تتعبك إنك تتخذل من شخص كنت واثق إنه عمره ماهيخذلك، طبعًا أمي وأبويا الله يرحمهم وأنا عايشه لوحدي الكل بدأ يعرف إننا اطلقنا وبدوا يسألوني وأنا بكتفي بالصمت التعب النفسي اللي أنا كنت فيه زاد الضعف ومفيش حد يخفف عني.
عدا أسبوعين وفي أول يوم في الأسبوع التالت لقيت الباب بيخبط الساعة 9 الصبح لبست اسدالي وقومت فتحت لقيت شاب طويل وبشرته بيضا ولابس بدلة زرقا بس شايل الجاكت بتاعها على أيده وجنبه شنطة سفر كبيرة قبل ما اتكلم لقيته رفع وشه وبصلي وابتسم
_لسه زي ما أنتِ يا ملك
_أفندم..؟
_أنا زين بن خالتك سامية يا ملك، معقول مش فاكراني..!!؟
زيـن..!! معقولة ده زين وأخيرًا افتكر يرجع بعد إيه وإيه اللي خلاه يظهر دلوقتي...بعد ما بدأت أنساه..شكله اتغير جدًا من ساعة ما سافر السنين غيرت فيه كتير..بقى أحلى وأشيك وأكيد اتجوز
اتجوز..!! معقولة طب أنا ليه مصدومة ومتفاجأة كأني لسه بحبه.. أنا خلاص مبقتش بحبه، هو شخصية أنانية متستاهلش الحب..ميستاهلش يفضل في قلبي بعد اتخلي عني وأنا محتاجاه.
