خبــايـا الحــب

"33"

_طول بالك السلاح يطول يا ولدي

_ركبتنا العار بللي عملته ياما..ركبتنا العار

الحب طريق سالك للكل بس مش ليا، نعمة الحياة مبسوط مش بتعدي عليا، الإعتراف بالحق مش فضيلة دا عار بالنسبة للبنت، أنك تكون قوي وتطالب بحقك مش مسموح بيه، أنك تفرح علشان عملت إنجاز مش مكتوبالك، كل دا ليه..!! لأنك بنت

_بَعد عن شعري يا ناجي أني مغلطتش

شدني من شعري أكتر وصرخ فيا كأني عاملة جريمة أو قتلتله قتيل

_مغلطتيش صوح..دايرة على حل شعرك ويا يونس وتقوليلي مغلطتيش

_إلحقيني ياما..ااااه

_كفاية يا ولدي البت عتموت في يدك

زق أمي بعيد وقام شددني من شعري مقومني وضربني بالقلم وسحبني وراه لفوق

_أني هعرف أربيها صوح كيف

_ربيها يا ولدي ربيها كيف ما أنت عاوز بس بلاش تقتلها

اتخذلت..اتكسرت..انطفيت..أمي كانت أخر أمل ليا بدل ما تزعقله وهي عارفه أنه هيسمع كلامها بتقويه عليه بتقوله ربيها وهي عارفه قسوة ناجي عامله إزاي.

دخلني أوضتي بعد ما طلع كل غيظه وفهمه الغلط عليا وحبسني وقفل الباب بالمفتاح وقالي ولا فيه أكل ولا شرب موتي كدا مكانك قبل ما اقتلك أنا.

القسوة بتولد الجبروت وناجي أخويا مش بيحبني، كل دا لأني من أم غير أمه وعايز يخلص مني بأي طريقة أو يجوزني لأي واحد من اختياره هو علشان يعرف يتحكم كويس في البيت والأرض.

بس اللي ميعرفهوش إن أنا مش عايزة حاجة من كل الكلام ده..كل اللي كان نفسي فيه إن أحس بالأمان اللي ضاع مع وفاة بابا.

اتنهدت وفتحت باب البلاكونة يمكن الهوا يكون قادر يطفي النار اللي جوايا غمضت عيني ونديت له

_يونس..النبتة الحلوة اللي في أرض حياتي القاحلة، اتربينا سوا من واحنا صغيرين لحد ما بدأت أكبر وأمي قالتلي إني مينفعش ألعب مع صبيان تاني حتى التعامل بينا بقا بحدود كبيرة أوي ورغم كل حاجة إلا إن حبي ليه بيزيد مش بيقل، رغم إنه مشغول بس مبينساش يطل علينا كل فين وفين، عارفين إحساس نقطة المياه اللي بتنزل في جوف واحد عطشان..! وجوده في حياتي نقطة المياه دي.

محستش على نفسي غير والصبح طلع وأنا نمت مكاني من الوجع ويمكن من كتر الذكريات، قومت خبطت على باب الأوضة بالعافية جسمي مفهوش حتة سليمة

_ياما..ياما

بعدت عن الباب لما حسيت بحد بيفتح من برا، وفعلًا كانت أمي

_أما كويس إنك جيتي..شوفتي ناجي عمل فيا إيه ياما

_تستاهلي القتل صوح يا فرح