كحل العيون

البارت{22}

((#كحل_العيون))

البــــــــــارت الثاني والعشرون💕💕

وإرد والگاك !..
لاموني هلي ورديت ...
وثيابي تعاتبني وبعدني اهواك ..

((محسن الخياط))
~~~~~~~~~~~~~~~~~~~~~~~~~~~~
بقلم :اختكم الصغيره استبرق الكردي 👸🏻💕
~~~~~~~~~~~~~~~~~~~~~~~~~~~~
رجعنه للبيت العصر تقريبا الساعه ب 4 وهذا بداية شته من وكت يصير المغرب.. نزلنه خاله على كيف ونمشيه ايسر من جه واني من جه وأسماء نزلت لغراض ودخلت قبلنه

دخلنه واحنه نمشي خاله على كيف لان تعبانه دخلنه وذبحوا خروف(جريان دم) يسموه على سلامة خالتي دخلنه خالتي بغرفته وتمددت بفراشه جانت خاله ام حيدر موجوده هيه وبناته سلمت عليها وهيه تدعينه الله يرزقنه بذريه...

هاي الفتره ياهو الي يشوفنه وصاح ليش لسه كلشي ماكو يمعودين بعد وكت بس الناس ماتفهم يردون تزوج منا خلف منا من يكولون لايسر يكون جوابه :بعد وكت العمر كدامنه...

بس اني اعرف يتمنه يصير عدنه طفل اليوم قبل باجر هوه كلش يحب الجهال يعني جهال اخوته واخواته من يجون يطير بيهم طيور ياخذهم ويونسهم وميخلي شي بنفسهم حته همه يحبوا اني هم كلش احب الأطفال وكان فبالي انو بس اغسل من الشهريه نكضي السالفه بس اني غسلت منا طاحت خالتي منا الحمد لله على كل حال......

شويه واجه ايمن وكال : اني نذرت لو الحجيه كامت بسلامة انسوي ثواب للامام الحسين ونعزم اهلنه ونطلع منه للعوئل المتعففه اذا الله سهل حضرن رواحجن...

احنه متعودين كل اسبوع اقل شي ٣ عزايم وكعدات وهاي السوالف هاي الله اذا يحبنه يخلي ٢ بلسبوع يعني متعودين على كسرة الضهر واذا اجن عماته تلعب نفسي من كلشي لان كلامهن وعيونهن ينكطن سمممم .....

باوعت للبيت هذا شته واحنه بعدنه مفارشين انداريت لهناء...

ايفان :اكلج يعني باجر يجن عماتج

هناء :اوووووف لا هله بيهن بس اي طبعاً بيها لحم ودبينه اكيد يجن

كوه عصرت الضكحه وطلعت مني :ههه لج ماكدر اضحك حته.. بس اكلج البيت مامنضفينه

هناء :يااا عشتوو وشبي البيت احله من وجه ام صباح الخوثه

ايفان :ديله كومي خل نفرش البيت مدام البنات خالج هنا.... انداريت على بنات خاله ام حيدر...

ايفان :بنات بله امر عليجن خلنه كلنه نكوم نفرش لبيت خاله تعبانه وبس احنه وباجر يجون خطار وعيب من العالم شنو وكعت خاله نعوف البيت وانتن من اهل الدار

كلهن كامن لفن شالاتهن عدل...

مريم :ياا صدك جذب هسه نفر البيت فر ونخلصه كله عد عيناج مرت النقيب

كوه ضحكت :ههههه ياحياتي

ام حيدر :والله هلايفان خوش ايفان اطلب من الله يحفظكم ويستر عليكم ويرزقكم من حيث لا تحتسبون .... ويله بنياتي شدن الهمه لبيت الشيخ حمدان وانه هسه جايه وياجن...