كحل العيون

البارت {24}

البــــــــــارت الرابع والعشرون 💕 💕

واخذ دور السمه مو حلو دور الكاع...
وضــل فــلاح تــزرع مايـزرعــونك...

((مصطفى العيساوي))
~~~~~~~~~~~~~~~~~~~~~~~~~~~~
بقلم :اختكم الصغيره استبرق الكردي 👸🏻💕
~~~~~~~~~~~~~~~~~~~~~~~~~~~~
دخلت للغرفه هوه جان كاعد وكاض راسه بايده من دخلت رفع راسه وضل يباوعلي بس نضراته غريبه وساكت....

حطيت الجاي كباله على الطبله وهوه عينه عليه باوعتله باستغراب وكعدت يمه

مد ايده لزم لستكان بيده وايده الثانيه بيها جكاره شرب شويه من الجاي ورجعه لمكانه وحط الجكاره بحلكه ويحجي :اااااااايي يبت كلبي سولفيلي سجاد منين يعرفج؟؟؟؟

-والله ياعيني سجاد لا اعرفه ولا يعرفني كل الي اعرفه بصير صديق زيد ويشتغل ويه بابا..

ايسر :هاااااااااا زين شنو هاي مال ياخذج ويردج وين جان ياخذج؟؟؟؟؟

ايفان :من صارت سالفة ابن عمك بوقته اتصل عليه زيد كالي ماكدر اجيج عندي شغل بس مكال انو احمد داعم واحد المهم كال راح يجيجن سجاد صاحبي ياخذجن بس اني اصلا ماعرف سجاد جنه وكافين بباب المدرسه اجه سال عني ومن عرف اني ايفان كال اني سجاد صديق زيد والله الولد من حجه عينه ابد مارفعه علينه وضل هوه يوصلنه لحد اخر يوم .....وهاي اني كبرت وماحب جذب واذا مجذبه انشاء الله اموت..

باوعلي صفح دار وجه وبتسم وحجه :اسم الله... زين وشني سالفة الحمل ترا شياطين الدنيا كلها متربعه براسي....

ضحكت وتقربت كعدت بصفه وحضنت كتفه:ههههههه تدري انتم تجذبون الجذبه وصدكوها هههههه

ايسر :شنو ولج احنه جذابين ؟!!!!

ابتسمت :لا حياتي بس خاله (وسولفتله السالفه كلها) وهههههههه

ضحك وطفه جكارته ومد ايده وره ضهري ولمني لصدره هوه صدره جبير واديه وكتافه عراض بحيث من يحط ايده ورا ضهري اصير هاكدوتي...

ايسر :ههههههههههههه يله مو مشكله انشالله الله يهديج علينه...

ضلينا نسولف ونضحك وسالني على علاقة جدوو بعمه سولفتله الي اعرفه.... شويه وسالته :اكول عيني

-كولي

-صليت اليوم

-اي الحمد لله

بسته بخده باوعلي باطراف عيونه وابتسم طلع فونه يلعب بي لعبه مال كلاش كتله خل انزله مقبل كال لا تنزليه ماتفيدج بيها زلم كتله وذا كال نتها النقاش....

سكتت مالي خلك ابتعدت عنه رحت بدلت ولفيت راسي ونمت على وجهي من التعب...

ماكعدت غير لساعه ب10ونص وميته جوع كمت بدلت ولبست حجابي ونزلت جانو كلهم كاعدين بلهول بيت ابو سجاد وخاله خطيه هم كاعده وايسر  ماكو رحت سلمت عليهم شويه ورحت للمطبخ  فتحت الثلاجه لكيت اكو باقي من العشه كباب عروك وبتيته وزلاطه سويت لفه وكعدت اكل اذكرت فوني كلت اخلص واصعد لهنوه تنطيني ياه....