كحل العيون

البارت{41}

((#كحل_العيون))

البــــــــــارت الواحد والاربعون 💕💕

تعال اتمرجح بروحي ......
اجيبن خلك مامتعوب اناغيك بطواريه....

((وجدان النقيب))....

~~~~~~~~~~~~~~~~~~~~~
بقلم :اختكم الصغيره استبرق الكردي 👸🏻💕
~~~~~~~~~~~~~~~~~~~~~

فتحت عيوني على وسعهن من الصدمه واني اشوف مريم حاطه حجابها على راسها باهمال وشعرها كله طالع وحجاب ثاني لافته على صدرها وجانت لابسه بنطرون بيجي ممرود كله دم ...

من صدمتي صحت وكلها اجت على صوتي شمرت الخواشيك من ايدي على السنك وركضت الها ..

كوه تمشي ومدنكه راسها وتبجي لزمتها وهيه ترجف مشت كم خطوه ووكعت من طولها اجوو الولد ايسر وايمن ايسر يضرب على وجها جابو مي رشو عليها مكعدت ...

كلنه عبالنه مسويه حادث او داعمتها سياره ...
وكان على وجها اثار ضرب وركبتها وصدر الثوب الي لابسته مشكوك وصدرها كله كدمات وتخرمش ..

اني من شفتها خفت ودعيت انو الي ببالي مو هوه ..

ايمن صاح الايسر يشغل السياره ..
وايمن شال بنته بعد ماحط عليها عبايه وراحت وياهم خالتي ورناااا..

طلعوو يركضون احنه دخلنه جوه لمينه السفره ورجعنه الاكل وكلوبنه غاديه نار عليها وبالنه كله يمهم ...

مريم كلش احبها لاستقبالها نصيحه واحترامها وسوالفها لطيفه ...

كلش تاذيت عليها وعلى وضعها ضلينه ننتضر لل3 واتصلت على ايسر وسالته كال :-ايفان بعدين اني اجي واكلج هسه ماكدر ..

بعدني مرديت سد الخط بوجهي ...دخلنه حالتة قلق ايسر مو بطبعه هيج يقفل الجهازز بوجهي ابد ممسويها قبل بس الضاهر صاير شي حتى هيج تصرف ...

نوب متنه من الجوع وبيبي ام سعد كاعده وتدعي كون ماكو شي وايهاب ومهيمن صعدو وراحو وراهم وجدو صبيتله غده وتغدى وضل كاعد يم بيبي ...

نوب الجهال خطيه جاعو ومسلم يبجي كلت لهناء :- هنوه فدوه روحي صبي للجهال خطيه جوعانين واني راح ارضع مسلم ..

-جا خوش خطيه فحط من البجي

راحت هيه واني كلت لسعد :-سعود عمه اصعد جيبلي الممه وقوطية الحليب مال مسلم ..

مكال شي راح ركض جابهم واجه سويتله المميه وخضيتها اله على السريع وهوه فحط حطيتها بحلكه وكام يرضع على السريع حبيبي جوعان بسته بخده ياربي شكد احب الجهال ....

شويه ونام وهناء جابت صينيه جبير صابه الغده كلنه لبيبي تجي ويانه كالت ماشتهي ...

كعدنه احنه وجهال وياكلون وكل شويه واحد سال :-شبيه مريم ليش هيج وكعت .....خاف تبجي .....خاف تعورت ...خاف وخاف ضلوو يحجون..