شكولينا

الجزء الثالث

#شكولينا 🍫
#الجزء_الثالث
#الجمان_الفريد

اللي فايتاته صلاة او خش عليه وقت صلاة يصلي الأول بعدين يقرا...اول ماتتحاسب عليه الصلاة يوم غدوة...💕
تانيا..
حابة نوضح ان اغلب اللي تقروا فيه فالرواية هادي حقيقي وصاير مش كله من وحي خيالي..في اللي سمعته ع لسان ناس وفي ماوقفت عليه بروحي..وراهو ياما صاير ومدرق ورا حيوط الحياش...
《تنويه...في كلام حيكون مؤذي وغير مقبول نعتذر عنه مسبقا بس هو ع لسان الشخصيات اللي في منهم هلبه في مجتمعنا ومايعبرش ابدا عن وجهة نظري...نتمنى انكم تحاولوا تتقبلوا لان كل شي حنكتبه حيخدم قصة الروايه والرساله متاعها》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
في دار التقعميز..
رنده:شعر نور طول نوريه..
نوريه بإبتسامه رفعت حواجبها نزلتهم..
وجيهه وهي ترتب في عالة الشاهي عقدت حواجبها وهي تقول:صوت تكسير..
عفاف:ايه حتى اني سمعته..
ناضت وجيهه وهي تقول:اشبح شن كسرتلي هديكا..
ومشت طلعت تجري وناضت وراها عفاف..
نوريه؛مرخيات..
رنده:دبر راسها اللي كسراته تشريه...
"يانوريه تعالي"
انخلعوا الزوز..والزوز مع بعض ناضوا طلعوا من الدار يجروا..
وين وصلوا في الكوجينه..
لقوهم يعانوا في منى يحاولوا ينوضوها..
نوريه:خيرها دعوتها هادي..
وجيهه بقلق:ياحليلي اني..
وعفاف تبخ عليها في الميه وتقول:منى..منى..
ومنى قاعده تأدي في أداء تستحق عليه الاوسكار ولاغلطه كأنها ميته مش فاقده الوعي..
واحد من صغار البنات مشي يجري للمربوعه وقدام الرجاله قال..
مؤيد:خالي خالي مرتك ماتت..
مروان من الفجعه لوح طاسة الشاهي اللي كانت في يده وناض طلع يجري..
وبوه مع الرجاله الموجودين يتسائلوا عن اللي سمعوه..
الحاج الشريف ناض وهو يقول:عن اذنكم ياجماعه..
ومشي طلع من المربوعه..
••في الكوجينه..
مروان بخوف:منى..خيرها منى..
وجاها فكها من امه وقعد يخبط ع وجهها:منى..منى..حبيبتي..
منى في نفسها"ياربي قال حبيبتي قدامهم هههههه"
مروان ودموعه في عيونه :شن صارلها المراة..
"وجيهه"
نوريه:بوي..
ناضت وجيهه طلعتله وهي نقول:نعم..
الشريف:خيرها مرت ولدك.
وجيهة:مش عارفه خيرها مغمى عليها مابتش تنوض..
الشريف:نوض يامروان ارفع مرتك للعياده تحرك..
مروان ناض بيها وقامها بين ايديه وطلع بيها من الكوجينه..
وخواته طلعوا وراه...
الشريف:جيبولها حاجه غطوها بيها..
رتيل مشت تجري جبدت عبايه من ع الشماعه خدتها منها عفاف وغطت بيها منى..
وطلع بيها مروان وهو يقول:كلموا سفيان ينزل يرفعني مش قادر نسوق..
الشريف:اتصلوا بسفيان.
رنده:هي تو نكلمه يابوي..
ومشت طول للدار تاخد تليفونها..
••فوق..
سفيان متكي ع سريره يتفرج ع فيديوهات في تليفونه ويضحك..
وزهور حداه تحدده في لبسه العربي..
رن تليفونه شاف المتصل استغرب رد طول وهويقول:خيرك
..................ناض من مكانه وهويقول...نازل نازل..
سكر منها وقال لمرته:سيبي اللي في يدك وانزلي لوطا..
زهور:شن صاير..
سفيان بنرفزة:مرت مروان اشبح شن صايرلها هي بري انزلي بسرعه..
ومشي طلع..
هي فكت المكوى من الضي ومشت لحقاته..
••لوطا..
الشريف:كيف صار فيها هكي؟
وجيهه:وين نندري عليها ياحاج لقيتها مغمى عليها في الكوجينه وخلاص..
الشريف:قصدك كانت في الكوجينه بروحها؟!
عفاف:تغسل في الماعين يابوي..
الشريف:مراة بحالة كيف حالتها مخليينها حاصله في الكوجينه بروحها!
قعدوا ساكتين مش قادرين يردوا..
ع خشة زهور للحوش..
الشريف:وانتم ماشاء الله من غير امكم اربعه مقعمزات دقوا في الحنك ومخليات المراة تعاند في الكوجينه بروحها..
نوريه شبحت لزهور وقالت:خلاص هاني خاشه نغسلهم..
الشريف:تخشوا كلكم..
رنده وهي تشبح لزهور من فوق لتحت:حاضر بوي..
الشريف شبح لوجيهة وحرك راسه يمين ويسار بعدين قال:لاحول ولاقوة الابالله...ومشي..
وجيهة تجاهلت وشبحت لزهور وقال:نزل سفيان لخوه..
زهور:ايه عمتي وحتى طلعوا ..
نوريه؛مافيها شي غير دلع زايد وخلاص..
ومشت خشت للكوجينه..
رنده:هيا زهور..
زهور هزت راسها ومشت خشت وراهم..
ووجيهة مشت مع بنتها رتيل للدار وهي تخمم في منى..
لما خشت للدار..
زبيده بقلق:هاه قولولي خيرها منى؟
وجيهة بقلق:مش عارفه ياعمتي راجلها رفعها مغمى عليها..
زبيده بخوف:يالطيف خيرها..
قعمزت وجيهه وهي تقول:والله ماني عارفه ياعمتي..
🌺🌺🌺🌺
وفي كوجينه الحاج عبد الودود.
كانت لينا تنشف في الأرضيه وهي تهمس بالإستغفار..
عادتها في كل وقت تكون فاضيه او مشغوله بشي بروحها مااطيحش من لسانها كلمة"أستغفر الله"...
بعد كملت تنشيف..
حطت بكرج حليب ع النار بش توتي النسكافيه..
ومشت للدولاب طلعت من المعمول بالتمر اللي دايراته وبدت تحط فيه في مترد..وخدت طروف من الشكلاطه متاعها وحطتهم معاها..
وهي تحط فيها جي بين عيونها عدنان..
ارتسمت ع وجهها ابتسامه خفيفه حلوة..دامت للحظات لعند ماأستاقضت لنفسها ..حركت راسها يمين ويسار بسرعه بعدين علت صوتها وهي..
استغفر الله...استغفر الله...استغفر الله..
ومشت تشوف الحليب...وقفت عليه وشبحت لحصة حوش خوها المسلفرة من العشي وهي تقول..تي وينه عبدالله هدى؟
.............
"والله ما وقتك استغفر الله العظيم"
هدا عبدالله يعاند في سيارته اللي وقفت بيه في الطريق..
خبط كفوفه ع بعض وهو يقول بغضب:البخت الاحرف..
في نفس لحظه..
خطمت من جنبه سيارة عسكريه..
في السيارة..
عدنان وهو يشبح لعبدالله وسيارته من المرايه قال:سيدي نوقفوله نشوفوا خيره ؟
القائد:وقف ياعدنان..
وقف عدنان السيارة ع تركينه ونزل منها ومشي لعبدالله..
لما قرب منه قال:السلام عليكم..
عبدالله لما هيئته خاف وقال؛والله السيارة عطلت بيا ياافندي..
ابتسم عدنان وقال:واضح..تبي مساعده..
عبدالله ابتسم وقال:لا والله هدي تبي الورشه مرة وحده..
عدنان:اني عندي شويه خبرة خل نجرب نشوفها بالك يطلع معاي شي..
عبدالله وهو مبتسم:شوف ياافندي..
شمر عدنان كمام قميصة العسكري للمرفق وقرب للسيارة وبدي يشوف فيها..
والقائد متاعه يشوفله من المرايه الجانبيه..
شاف عبدالله وهو ماشي للكوفني فتحه وطلع منه حاجات وجي لعندنان بيهم..
وعدنان خداهم وبدي يشتغل ع السيارة...حوالي ربع ساعه..
وبعدين مشي قعمز في السيارة شغلها واشتغلت..
طلع من السيارة وهو يقول:طلعت حاجه بسيطه..
عبدالله ضحك بإحراج وهو يقول:من كثر مادارتها بيا ماعاد عندي خاطر نصلحها ..
ضحك عدنان وقال:مازال تنفعك كمل بيها لين ربي يسخرك وتاخد غيرها..
عبدالله:آمين..
عدنان:ماتبي شي تاني..
عبدالله:لا نبي..بكرا ان شاء الله تتفضل للحوش ع الغدي..
ابتسم عدنان وقال:بارك الله فيك..
عبدالله:نحكي مني جد..
عدنان؛عزومتك واصله تسلم.
عبدالله؛عليا الطلاق ماضال الا جاي بكرا للحوش ومتغدي..
عدنان فتح عيونه ع وسعهم وقال:ربي يهديك ياراجل علاش حالف يمين تي حتى حرام الله يسامحك..
عبدالله بضحكه:يسامحنا جميعا..خلاص توا فات فيا وحلفت تبي تخربلي حوشي..
عدنان بضحكه:شن بنقولك...ع خاطر اليمين اللي حلفته مش رادك..
عبدالله ابتسم وقال:هات رقمك ترا..
عدنان بإبتسامه:سجل عندك..
طلع عبدالله تليفونه وقال:مل ترا.
عدنان مل عليه الرقم وهو يسجل..
عبدالله:الاسم الكريم..
قاله:عدنان الشريف..
عبدالله؛معاك خوك عبدالله..واتصل بعدنان..
رن عند عدنان التليفون قاله:خلاص تو نسجله...هي نستأذن.
تصبح على خير..
عبدالله؛قدامك كل خير بارك الله فيك..
عدنان مشي بسرعه للسيارة وركب وهو يقول:سامحنا ياافندي..
القائد ابتسم وقال؛ولايهمك...
شغل عدنان السيارة وتحرك والقائد متاعه يشوف لأيديه كيف ملبزات شبحله وقال...انت من افضل الضباط اللي مروا عليا من وقت طويل ياعدنان..
عدنان ابتسم بإحراج وقال:شهاده نعتز بيها..
القائد:هادي حقيقة ياعندنان مش ديما يقابلني ضابط حسن خلق زيك..
عدنان:بارك الله فيك يأفندي ان شاء الله ديما نكونوا عند حسن الظن..
هز القائد راسه وهو مبتسم...
••وركب عبدالله سيارته وتوكل للحوش..
اول ماوصل نزل ومشي طول لباب الكوجينه الخارجي لقي الباب مسكر..
اتصل بلينا...
••في دارها..
هي وخواتها يشربوا في النسكافيه مع الحلو ويهدرزوا..
لينا وهي تلعب بخصلات شعرها المموج قالت بدهشه متفاعله مع القصة اللي تحكي فيها اختها:وااك مقوى راسها سلفتك هدي..
امال:تعرف كيف تاخد حقها مش كيفي اني..
هناء تنهدت وقالت:حني ديما مغلوبات ع امرنا ماني عارفه ليش يعني ع خاطر مش واخدين ع طول لسان وقلة الأدب!
امال:الله يسامحهم هلنا ربونا زياده عن اللزوم..
لينا:الله يربحهم..ع الاقل مانخلوا يدعي علينا من ورانا ويدوي علينا بالشر..
امال:ايه تلقي من يعفس عليه ويعدي بس..
جت لينا بترد رن تليفونها..قاماته وشافت المتصل..
فتحت الخط طول؛هاه عبدالله جيت.....هيا هاني طالعه..
سكرت ولمت شعرها وناضت وطلعت تجري من الدار..
هناء:كم عمرها لينا تو؟
امال بضحكه:معاش تعرفي عمرها توا؟
هناء؛نبي بالزبط..
امال:يحني ماشيه في 25..
هناء؛اها معناها ماتمشيش معاه..
امال:من هو؟
هناء:خو سلفتي كبير عمره 37عام قات يدوروله وقالتي اخته نشوفلها فكرت طول في لينا لكن مسألة العمر خلتني نفوته.
امال:اها احسن كبير واجد عليها وهي مازال صغيره..
هناء:وين صغيرة امدادها عندهن صغار بيخشوا للمدرسه..
امال؛خلي البنت تعيش حياتها بالله لاحقه ع الراجل والعويله وهمهم..
تنهدت هناء بحسرة وهي تقول:غير امتى حتى اني ربي يعطيني هالهم..
بانت ع وجه امال ملامح الحزن وهي تشوف لاختها بعدين فيسع رسمت ابتسامة مواساة وقالت:العاطي حي هنيوه سيورك تحملي وتجيبي وتجي تشكي من دوشتهم وتفرحي منين يرقدوا كيف مااني فرحانه تو..
ضحكت هناء من بين دموعها وهي تشوف لصغار اختها راقدين..
••في الكوجينه..
عند الباب..
عبدالله وهو شاد صونية عشي عيلته:بيجي غدوة ع الغدي اعبوا بغداهم..
لينا هزت راسها بإيجاب وقالت:باهي..
عبدالله:هي تصبحي ع خير..
لينا:قدامك كل خير..
طلع وهي سكرت الباب..
ومشت طول للدار..
خشت ع خواتها وهي تقول:عبدالله عازم واحك بكرا ع الغدي..
امال:وكالعاده عابي علينا حني نطيبوله..
لينا رفعت كتافها ونزلتهم ...
هناء عضت ع صبعها بقهر بعدين قال:ااه ياقهرتنا..
وامال ولينا يضحكوا...
🍀🍀🍀🍀🍀
ومن حسرة حموات ع حظهم مع خوتهم ونساوين خوتهم..
لحموات حظهم في خوتهم ونساوين خوتهم ينحسدوا عليه ومع هدا مش عاجبهم..
نوريه وهي تحط في الصفر على بعض بعد مانشفتهم:واني فالتاسع وبطني قدامي سيقت جنان حوش شيابيني اللي تقول جردينة سوق الثلات شايفتيه انتي رنده.
رنده:ايه هداكا عالم..
عفاف:واني حامل في رنوشه فالسابع نقطف مع عزوزتي في الزيتون ونلم من الصبح للظهر ولاقلت اخ ولا اه..
نوريه:حظوظ ناسنا بينا سعدودهم..
رنده:ايه والله بخوت..
وزهور تسمع فيهم وهي تمسح في الدولاب حاسه بجبل مقعمز ع قلبها...
نوريه تنهدت وقالت:خلاص اني خل نحط القهوة ع النار..
رنده:ايه حطي حطي..
نوريه:زهور بري شوفي الدار تبي كنس..
زهور شبحتلها وقالت:باهي..
وكيف جت بتطلع جي سفيان وهي يقول:السلام عليكم..
ردوا عليه السلام..ماعدا نوريه اللي خدت بعضها ومشت طلعت..
هو طنشها..
رنده:شن صار معاكم؟
سفيان:طلع عندها هبوط ركبولها تغذيه..
عفاف:شن ماتاكلش باهي!
رنده:مروان يشري ويعرم وهي تتدلع..
سفيان:انتم نساوين هالوقت معاش تنفعوا لشي مش زي نساوين زمان زي امي وحناي كتينه حديد هدوكا...
عفاف:حتى خواتك ياغالي طالعات لأمهم وحناهم..
زهور:ترا شويه سفيان..
وسعلها وهو يقول:باتي هني الليله..
زهور شبحتله وهي متفاجئة بعدين قالت:حاضر..
سفيان:غدوة بنجيب حوت نبيكم كلكم تتعاونوا عليه..
زهور:معناها نمشوا لحوش ماليا العشيه..
سفيان؛تس فوتيه غدوة..تو نشوف نهار تاني..
زهور بلعت ريقها وشدت دمعتها وهي تقول:باهي..بعدين مشت طلعت..
سفيان:وين بنتك فرخه عفاف ليا وقت عليها..
عفاف بضحكه:في الدار حدا حناتها..
ضحك ومشي طلع من حداهم..
رنده:ريتيها قبل بتشليك لحوش ماليها..
عفاف:سلم الصقر اللي قاللها اقعدي..
رنده:ايه والله سلم وخيي لولا الحركه اللي دارها مع نويرة..
عفاف:تو يتراضو..
خشت عليهم نوريه وهي تقول:شن قاللكم..
عفاف:هبوط..
نوريه؛هبوط شني اللي بيجي لهالهايشة وين نشوفها نلقى فمها منفوح ويلوي..
ضحكوا خواتها..
بعدين رنده قالت :هديكا جت بتهرب غدوة لحوش اماليها
نوريه:عادتها ولابتشريها نهار يكون في حوسه تهرب..
عفاف:لكن سفيان قاللها قعمزي ..
نوريه:احسن
رنده:وقاللها تبات هني الليله..
نوريه بضحكه:خلها بش تنوض الصبح تعول مع امي بديت معاش نحب النوضه بكري..
رنده:والله زي حالاتي..
عفاف:انتي من الحمل..
رنده:ايه صح...
نوريه:قهوة ولانسكافيه يابنات..
عفاف:لاقهوة خير..
رنده:ايه..القهوة اخف..
نوريه:تمام...
••ودارو قهوتهم وحطوا معاها شوية حلويات ..
ومشوا للدار..كان مازال قاعد فيها سفيان..
ولقوا زهور تبدل في شمال بنت عفاف..
عفاف:واك عملتها..
سفيان:غيرتلها زهور..
عفاف :صحيتي مرت خوتي نشوفها عندكم ياربي..
زهور شبحت لسفيان وقالت:آمين..
وسفيان ياخد في فنجان القهوة من رنده..
وجيهة:امتى بتطلع غدوة..
سفيان:تمانيه الصبح بعون الله..
زبيده:سفيان:كثر من الحوت سلم ولدي..
سفيان بضحكه؛اني والمقسوم ياحناي تو نحاول...
وجيهة:ترا كلم مروان شوفه..
سفيان؛خيرك يام مرته اموره تمام مافيها شي..
وجيهه:تي اني مش عليها هي ع ولدي مسكين اللي قاعد يتبهدل في العيادات ويحط في دمه قلبه عليهم..
عفاف؛صدقتي يام هما ع الليله ياخدوا في هداكا الحساب..
سفيان:مش بايته يام حاجة ساعتين ويروحوا..
🏵🏵🏵🏵
"والله ناكل "
مروان:مالا علاش صار فيك حبيبتي..
منى:من النفسيه الزفت..
مروان؛خيرها نفسيتك بس..
منى:نبي نغير جو مروان نبي نطلع من الروتين شويه..
مروان:كيف يعني مافهمتش..
منى تنهدت وقالت:شن رايك غدوة نطلعوا قداش لينا ماطلعاش من لما حملت..
مروان ابتسم وقال:خلاص وتي روحك غدوة العشيه بعون الله طالعين..
ابتسمت منى..
مروان؛ربي مايحرمني ..
ضحكت..
هو غمضت عيونها وفتحهم وهو يشوفلها ابتسامه حلوة ع وجهه...
منى في نفسها"المهم عندي هدوكا اللفعات حصلوا في الماعين الليله وغدوة حاصلين هههه"..
ورسمت ع وجهها ابتسامه عريضه وهي تشوف لراجلها..
🏵🏵🏵
بعد كملت تغديه روح بيها طول للحوش وركبوا طول لشقتهم..
وقعدت المسكينه زهور مع العيله بعد ركب راجلها يرقد..
مجبورة تسمع هدرزتهم وتسايرهم وتتحمل بصارتهم الجارحه..
مرة ع وزنها وجسمها لانها فاخمه شويه..ومرة ع صوتها اللي كان مرخي شويه..
خلاها تقعد ساكته باقي الوقت المهم معاش تسمع تجريحهم..
ولما جت امهم بتنوض ترقد..
رنده؛نوضي سايري عزوزتك زهيرة..
زهور ناضت وهي تقول:تصبحوا ع خير..
وطلعت هي وعزوزتها للدار اللي ترقد فيها وجيهة هي وعزوزتها..
وهما قعدوا سهرنات في دارهم...هدرزة وقرمه وضحك للساعه خمسه قبل اذان الفجر..
🌺في هالوقت..
في اللؤلؤة السمراء...
فاقت لينا ع صوت المنبه اللي تعدل فيه بس تصلي القيام
الصلاة اللي مستحيل تخليها لينا..
ومرات تفيقلها من غير منبه..
بعد ماتوضت....
خدت صلايتها ومشت لتركينه فاضيه في الحوش وبدت تصلي...وفي سجداتها كانت ماتبطلش دعاء لنفسها وكل حد تحبه محتاج لدعاء..وكانت ديما تختم في دعائها ب..
"رب هب لي زوجا طيبا صالحا اكون له قرة عين ويكون لي قرة عين انك سميع الدعاء"
زيها زي اي بنت تحلم بالآستقرار وانها دير عيله وهدا حقها طبيعي...
وبعد ماتكمل صلاة..
تبدا تستغفر...لأنها تعرف كويس عظم الإستغفار في وقت زي هدا...
وهي تستغفر خطرت عليها اختها هناء وقعدت تفكر في حالها ليها عامين متزوجه وماجاهاش صغار برغم انها عالجت هلبه ومشت حتى لتونس لكن كلهم يقولولها مسألة وقت وهالوقت طول...والخوف كل الخوف ان راجلها ينجبر يطلقها بش يتزوج غيرها..او يتزوج عليها..
وقفت استغفار ورفعت عيونها وهي تدعي بتوسل..
"ربي اجبر بخاطر هنيوه ياربي اعطيها الذريه ياربي اكرمها ياكريم يلي مافي اكرم منك ياربي"..
ودموعها نزلوا..نزلت عيونها وقعدت تبكي بصمت ورجعت تستغفر تاني..
لعند ماآذن الفجر...
💎وعلى صوت الآذان فاق عدنان...
وقعد ينوض في صحابه واللي يعصى معاه منهم يصب عليه ميه..
"عدنان يازفت"
"لا ياراجل"
عدنان بعصبيه مصطنعه؛نوض صلي انت وياه نوض..
وطلع من حداهم وهو يضحك..
.......
ماشيين يجروا في رجليهم جر..
:صقع سميتري..
:استغفر الله كان خليتنا نصلوا في الدار بس..
عدنان؛اسكت انت وياه..
سكتوا وهما يشبحوله بإمتعاض..
لين وصلوا للجامع وخشوله...
كانوا اهل المنطقه اللي هما فيها مركزين عليهم وعرفوهم ضباط في الجيش جايين من بعيد ولأنهم اهل كرم وناس اصيله..فكروا يديروا الواجب مع ضيوفهم..
واللي هدا بعد تمت الصلاة جاهم يعزم...
كلهم قبلوا العزومه الا عدنان اللي كان معزوم مسبقا..
🌺🌺🌺
واللي لما سمعت بجيته الحازة..
حمت ع خاطره خبزة الفتات من الصبح بش يديروه ع الغدي..
وبناتها يعولوا ع فطورهم وفطور بوهم وصغارهم..
مع العشرة الصبح..
خش عبدالسلام بمرته نجمه وبناويتهم..
لينا وهي حاضنه البنات:نهوله اسوله..
نجمه؛شخبارك ياعمتي ان شاء الله طيبه..
الحازة وهي تسلم عليها بالسيف:الحمدلله.
عبدالسلام؛وين باتي يما؟
الحازة:يسبح في الحمام..
عبدالسلام؛مال خل نعدي نقعمز في المربوعه لين يطلع..جيبلي قهوة يالينا.
لينا:حاضر..
بنات مشوا يجروا مع صغار عمتهم يلعبوا في الجنان..
ولينا مشت للكوجينه..
نجمه؛وين امال وهناء؟
الحازة؛فوق يلمن في المخزن..
حولت عبايتها وقعمزت وهي تقول:باهي ربي يعاونهن..
"السلام عليكم"
نجمه:وعليكم السلام اهلا وريده..
وجتها ورده وهي تقول:واخيرا جيتي..
وبدوا يسلموا ع بعض سلام حار والحازة تشبحلهم..
نجمه:شن حالك يامينه شن دايرة..
وردة:الحمد لله بخير..انتي شن حالك..
نجمه:الحمد لله في نعمه..
قعمزوا الزوز..
ورده رفعت حاجبها وهي تقول؛شن حالك عمتي..
الحازة تنهدت وغيرت عيونها عنها؛من ربي كويسه..
نجمه شبحت لعزوزتها بإستغراب..
اما وردة طنشت وقالت؛ايه شن تخبرينا نجمه..
نجمه شبحتلها بعدين ابتسمت وقالت:شن بنخبرك كساد ياحنه..
وردة:ايه والله كلنا قالتلنا الكساد وهني مافيش وين اطيريه..
نجمه؛ايه والله صدقتي..
ناضت الحازة من حداهم ومشت..
وهما يشبحولها بعدين شبحت  نجمه لورده وقالت بإبتسامة استغراب؛شن ساير؟
وردة شبحتلها برفعة حاجب وقالت:ياحنه امس..
🍀🍀🍀🍀🍀
رحمة وسفر فطور وصغار ودوشه..
ومنى تتكلم وهما يسمعولها..
منى:والله ناكل وراده بالي..
وجيهة:زيدي ردي بالك..هاك كولي..
وعطتها تفاحه..
رنده:سلم عزوزتها اللي خايفه عليها يابختكم يانساوين خوتي ياريت عزوزتي زي امي..
نوريه:امي مافيش منها..
عفاف:الا والله لكن حتى عمتي الله يوجهلها الخير تعامل فيا زي بنتها تعرفي يام وين نلتموا غادي تقوللهم مايطيب حد كان عفاف مانحب ناكل كان من ايديها..
وجيهه بإبتسامه؛ماشاء الله
رنده؛هدا شيبانيا ديما يقول خلو الطرابلسيه ادير البازين رغم انهم ورفله يام يقولي بازينك اطعم من بازين بناتي..
وجيهة:معلماتك اديريه من وانتي في الاعدادي..
نوريه:ايه صح بازين رنده مش عادي..اني سلافي كل يوم متغديين مع خوهم يقولوله تطييب مرتك خير ماتطييب الهبنك اللي عندنا..
ضحكوا..
ماعدا منى وزهور اللي كانوا مبتسمات بالسيف..
زبيده:ايه عاد الحوت بالذات انتي فيه فنانه نبيه من تحت ايدياتك..
نوريه وهي تأشر على عيونها؛من العين ديه قبل ديه..
نور بنتها؛ماما نبي الحمام..
نوريه بإنفعال؛ماتشوفيش فيا نتسمسم..
وجيهه:بالله زهور خوديها دخليها الحمام خل امها تفطر زي الناس..
زهور:حاضر اللاي..
وناضت وهي تقول؛هي تعالي نور..
وناضت البنت مشت معاها للحمام..
فجأة...رن تليفون وجيهه..
وجيهه؛وراك رنده مديهولي..
التفتت رنده وخداته من وراها شبحت المتصل قالت:عدنان..
فتحت عليه وردت:عنونه..
"مني رنده الشفشه"..
فتحت المايك وقالت بضحكه؛شن جو ياشفش مستاحشاتك..
"والله اني اكثر..اكيده الشفشات التانيات معاك ولا"
نوريه؛وليدي..
"نوري الحب شن جو"
نوريه بضحكه؛استاحشتك يامعفن نحساب روحي بنجي نلقاك..
"اخر الاسبوع هدا ان شاء الله"
نوريه؛خلاص تجي تلقاني قاعده هني عشرة ايام اني..
منى لما سمعتها شن قالت من الخلعه قريب جابت في مكانها..
وزهور اللي كانت جايه بنور لما سمعتها فنصت تفنيصه لين قريب عيونها طلعوا..
"وين حسين"
نوريه؛في الشرق
"اها"
عفاف:عدنان..
"اووو ضحاكه شن جو"
ضحكت عفاف وقالت؛مليح..شن جو الجنوب..
"تمام...شن حال الضراري "
ضحكوا خواته..
نوريه:فطروا وطاروا للجنان..
"غير يردوا يفسدوا حاجه لجدهم"
نوريه غمزت وهي تقول:لا صغارنا عاقلين مش متاعين فساد..
"هييهه عطيني امي عطيني وخليني ساكت.."
وخواته يضحكوا..
خدت وجيهه التليفون من رنده وهي تقول:شن حالك يما..
"في خيار الخير حبي شن حالك انتي وبوي واللا زبيده"
زبيده:كويسين كويسين انت شن حالك وشن داير غادي.
"اموري تمام ومية مية ياحناي حتى اليوم معزوم ع الغدي"
وجيهة؛ماشاء الله..
" زهور"
رنده:سفيان جي..
ناضت زهور طلعتله ووراها رنده..
رنده:سلمك جياب..
سفيان؛اهو تعلمي من اختي شن تقول وقولي زيها..
قامت زهور الصندوق وهي تقول:سلمك جياب ..ولفت ومشت..
رنده؛نكبتك نكبة وخيي..
سفيان:من جبهالي؟!
رنده ضحكت وهي ترفع في الصندوق التاني جتها عفاف تجري خداته منها وهي تفنص:هبلتي..
شبحت لسفيان وقالت؛سلمك جياب..
والزوز خشوا بسرعه..
اما هو ضحك بعدين مشي بيركب لشقته..
نوريه ناضت وهي تقول لمنى؛هي نوضي للا مافيك شي نوضي..
منى ضحكت بالسيف وناضت مشت وراها وهي تقول في نفسها..
"عطيك نايضه"..
🍀🍀🍀🍀
وفي حوش الناس اللي بيضيفوا عدنان..
كانوا امال وهناء يجروا ع غدي العزومه مع امهم..
اما لينا خاشه للمربوعه اضم فيها ومع بنات خوها وخواتها.
نهال:محلاها شعرك عميمه كيف الفنانه...وسمت اسم وحده..
لينا ضحكت وقالت؛اين اسمع انا ولاهي..
اسيل؛لا انتي عميمه انتي عيونه كبار ولونهن كيف القهوة..
ضحكت لينا..
نهال:وخشمك واقف وقوف ع قولت ماما..
اسيل حطت يدها ع خد لينا وقالت؛ووجهك حلو..
حضنتها لينا وقالت:انتي الحلوة..
خوله بنت امال؛نبي شعري يولي طويل كيف شعرك عمتي..
لينا:خل نكملوا لم المربوعه بعدين نقوللكن كيف يولي شعركن طويل..
••طلعت امال من الكوجينه وهي عاصبه محرمة ع راسها.
شبحت لنساوين خوتها اللي يشبحوا لنقال وحده منهم ويتكلموا ع شي عاجبهم يشوفوا فيه..
تنفست بعصبيه ونادت بصوت عالي:لينا..
الزوز انخلعوا وشبحولها..
ع جية لينا تجري والبنات وراها..
لينا؛نعم ..
شبحت امال لكناينهم بحده وقالت؛تعالي عاونينا... ومشت للكوجينه ولينا لحقتها..
في الكوجينه..
امال؛اه لو يخلني عليهن نصب هالطنجره وهي تغلي فوق روسهن.
لينا بضحكه؛اعوذ الله عليك اجرام..
هناء؛يبنها..تعالي دير الطاجين..
لينا بضحكه:حاضر..
الحازة للصغار:انتن عدن اطلعن هيا..
مشوا البنات طلعوا...
🌺🌺🌺🌺🌺
بعد صلاة الجمعه...
"هي تفضل خوي عدنان"
عدنان بإبتسامه؛يزيد فضلك..
خش عدنان وبعد عبد السلام اللي سكر الباب..
عبدالله؛تفضل تفضل..
وتوجهوا التلاته بإتجاه المربوعه...
.........
الحازة؛الراجل وصل هي ابدن سقن..
وبدوا البنات يسقوا في الفتات..
وبعد كملوا...
جي عبد الله طلع الصفرة ومشي بيها للمربوعه..
عبدالله:انستنا ياأفندي..
عدنان بإبتسامه؛الله يانسك.
حط عبد الله السفرة وقال؛هي تفضل..
شاف قدامخ سفرة حلوة تفتح النفس بس اثار استغرابه وجود التمر مع الحار في السفره.
وماكانش يعرف ان هادي عاده عند بعض اهل الجنوب...
عبدالودود؛هي اقرب سمي بالله..
قرب عدنان من السفرة وهو يقول؛سامحونا تعبناكم.
عبدالودود؛تعب شني ياولدي مافي شي من قيمتك..
عدنان:بارك الله فيكم...
🌺🌺🌺🌺
"ايوه بريكه"
"واخيرا تواضعتي ورديتي"
لينا؛والله ماكنت فاضيه..
بريكه؛فيش كنتي اديري..
لينا؛خوي عازم صاحبه حصلنا فغداه..
بريكه؛امم..باهي..اليوم ماعندكش انتي ولا..
لينا:اها الجمعه لا خيرك نسيتي!؟
بريكه بضحكه؛لا مانسيت..غير بنقولك..في حد حملني امانه ليك وقالي وصليهلها..
لينا بإستغراب:امانه! من منو؟!
بريكه؛الضباط متاعين امس..
لينا بدت تتوتر..
بريكه؛هداك الطويل العريض الأشقر..لقيته امس في الليل مولي يشوف في اصحابه وقفني وقالي..انه لقي اسم لشكولاطه متاعك..
لينا وقلبها يدق بسرعه؛تصمتي خالتي بريكه..
بريكه؛والله العظيم..قالي قعد في بالي وفكرت فيه واجد مش عارف ليش لين طلع معاه اسم..شكولينا..
لينا ضحكت وقالت؛شكولينا!
بريكه بضحكه:اها ع قولته..شكولاته..ولينا..
شكولينا..
لينا؛قولي والله العظيم مادايرة فيك مقلب..
بريكه ضحكت وقالت؛والله العظيم هدى اللي صار..وع فكرة راهو اسمه عدنان..
لينا حطت يدها ع فمها وهي مبتسمه وساكته..
بريكه؛ع العموم هاني وصتلك الامانه هي بالسلامه..
لينا بصوت مكتوم؛بالسلامه..
ونزلت تليفونها وهي تفكر في كلام بريكه بعدين قالت:شكولينا..محلاه..
"لينا"
انخلعت لينا بعد سمعت صوت اختها امال اللي زي الرعد.
وطلعت من الدار تجري...
🍀🍀🍀🍀🍀
"هادي اخر سفرة "
منى:ايه اخر سفرة..
مشي مروان ومنى سكرت الباب..
رفعت نوريه السفره وقالت؛هي تعالوا..
وطلعت بالسفره وطلعوا وراها زهور ورنده ومنى..
تغدوا غداهم...ونوريه تشكر وتحط في تطييبها وتتبيلتهت للحوت وخواتها وامها وحناها يزيدوا ينفخوا فيها..
ومنى وزهور زي من يكسر في رقبتهم...
بس منى كانت في داخلها فرحه مدسوسه لأنها حتطلع بعدين مع راجلها تغير وجوه وجو عكس المسكينه زهور اللي انحرمت من زيارة اهلها لثاني اسبوع...
••بعد كملوا غداهم...
خشوا كلهم يغسلوا في الماعين..
ومروان حداهم بعد ماجاب السفر..
مروان؛ياودي يانويرة ياهكي الكسكسي بالحوت وهكي الحوت يابلاش..
نوريه:صحتين ع قلبك وخيي..
مروان؛هي عجلوا وكملوا بكري ووتوا رواحكم..
التفتت منى وشبحتله بإستغراب..
عفاف:نوتوا رواحنا!
مروان؛ماقاتلكمش منى العشيه بنطلعوا كلنا ويخي الفكرة فكرتها..
شبحولها..
ورنده برفعة حاجب:شكلها تبيهالنا مفاجأة قبل..
منى شبحت لمروان وقالت؛ايه صح خربها عليا..
ومظهرها البارد هدا بخفي عاصفه صايرة في داخلها.
وصرخه لو طلعتها طيرت بيها الطيور من اعشاشها..
نوريه:مالا هيا سقدوا ارواحكم ليا وقت ماطلعتش..
مروان بضحكه:نصلوا العصر ونطلعوا..
ومشي طلع من حداهم وخلا منى بتموت...
وزهور تسرقلها في النظر وتقول في نفسها..
"ادني في النار لخبزتها صحة ليها"..
🍀🍀🍀🍀🍀
"لينا هاك ركبي الغربال"
لينا؛هاتي..
وخداته مش طلعت من الكوجينه متوجهه للدورج..
وهي ماشيه خطمت من حدا الصاله اللي فيها نساوين خوتها وامها..
نجمه وهي تلبس في شنطتها؛والله بنعدي لحوش خالتي في المنشيه اليوم دفع بنيتها..
الحازة؛ماريناك ياكبدي!
نجمه؛تو نجي  نهار تاني عمتي وان شاء الله مايتعبوكن البنات هي بالسلامه..
وسلمت ع الحازة بالخد...بعدين سلمت سلفتها وقالت..
نجمه:نتلاقوا..
وردة:بالسلامه..
ومشت نجمه طلعت بدون ماتعبر حمواتها ولاتسلم عليهم..
اما ورده قالت:هي بالسلامه توا
وانسحبت وركبت لشقتها..
🌺فهالوقت..
بعد ماطلع عبدالسلام بمرته..
طلع عدنان ومع عبد الله يسقد فيه..
🌺لينا بعد ماحطت الغربال قعدت تشوف في حاجات في المخزن طلعوهم خواتها بعد مارتبوه..
شويه سمعت اصواتهم..
حست صوت الراجل اللي مع عبدالله مألوف..
مشت وقفت ورا الروشن وهي مدرقه تشوف..
لين جو عيونها عليه لما شافاته وركزت فيه كويس..
حطت يدها ع فمها وهي مصدومه قالت؛ياربي! مش مصدقه!..
شافت عدنان طلع من الحوش وخوها خش داخل.
ادرقت وهي تقول بدهشه..
"ياربي!مستحيل هدى كله يكون صدفه! "
••وخوها عبدالله ركب لشقته
خشلها وتوجه للدار..
عبدالله؛اما راجل ماشاء الله عليه ماتقولش في اخر العشرين بكل عليما يبان عقله كبير ورزين..
وردة؛عبودي.
عبدالله؛نعم..
ورده؛فاده وماله ونبي نطلع ..
عبدالله؛توا؟
وردة؛ايه تطلع غير نجمه اللي كل يوم في التركينه وكل اسبوعين في الشرق..
عبدالله؛تي باهي ياودي ماقلنا شي...خلاص وتي روحك وخل ننزل نجيب سالم تغيريله..
وردة؛مش لازم خليه عند عمته..نبي نطلع اني وياك برواحنا زي اول ايام زواجنا..
ابتسم عبدالله وقال؛ادللي اللي تبيه يصير...
ابتسمت ورده وقالت؛نجيهولي ياربي...

يتبع …
الفصول الاربعة