شكولينا

الجزء الحادي والخمسون _القسم التاني

#شكولينا
#الجزء_الحادي_والخمسين2
#الجمان_الفريد

كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
خشت تجري وهي بتموت من الخوف لاقت امها شدتها وقعدت تقول وهي ترعش:والله مادرت حاجه والله ياماما..
وجيهه وهي مفجوعه:خيرك اسم الله شن في!؟
ع طلعة رنده من الدار والكناين وحده جت من الحمام والتانيه جت من جنان الكوجينه تجري..
لينا بخوف:شن في!!؟
"رتيل ياحيوانه"..
منى هربت طول لدار التقعميز..
ورتيل ادرقت ورا امها وهي ترعش وتبكي:والله ياماما مادرت حاجه اقسم بالله..
ع جية سفيان لما شافاته رتيل عيطت..
سفيان بعصبيه شديده:تعالي جاي ياحيوانه تعالي..
رنده:شن في ياسفيان..
سفيان وهو جاي ناحية رتيل قال بصوت عالي:سكري فمك انتي..وانتي تعالي جاي..وجبدها من ورا امه اللي كانت تقول بخوف:شن في ياولدي قولي شن درات!؟..
ورتيل تبكي وترجف تقول:نتزرى في صحتي مادرت حاجه والله...ومالحقتش نكمل كلامها ويجيها كف...
كلهم عيطوا..
ولينا في عز العاصفه اللي صايرة ركزت ع صغارها لقتهم واقفين يشبحوا لسفيان بخوف..
مشت خدتهم الزوز ودخلتهم لمنى اللي كانت مقعمزة ومضبطه ولدها من الخوف..سكرت عليهم وولت طلعت..
لقت سفيان ضرب رتيل الكف التاني وهو يقول:تقرني فيا يامسخه ياحيوانه مع خو صاحبتك..تحسابي فات عليا من الاول كنت زابط من الاول ياكلبه...
رتيل واثار الكفوف ع وجهها والدموع تنزل عليهم قعدت تقول بنفس النبروة المرعوبه المرتجفه:والله لا والله العظيم..
سفيان بغضب شديد؛اسكتي ياكلبه..وعطاها كف تاني..
امه جت تحز وهي تقول:تربح ياولدي خلاص بالله عليك خلاص..
سفيان بعد امه وجبد رتيل من وشاحها ولوحها ع مندار...
ورتيل تكمشت في بعضها وقعدت تعيط..
سفيان وهو داهش :تو نوريك ياكلبه تو نربيك من اول وجديد..ومشي للكوجينه..
رنده وهي ترعش:حي عليها ياماما..
وجيهه قعدت تندب وهي تقول:شن دايرة ياكلبه شن درتي..
رتيل وهي تبكي وتعيط :والله مادرت حاجه..
شبحوا كلهم لباب الكوجينه لقوا سفيان طالع بعصا..
لما شافوه امه واخته قريب ماتوا من خوفهم ع رتيل..
اما لينا هدا وين استاقظت من صدمتها في اللي تشبح فيه..
عرفت راجلها كويس كان فقد اعصابه خلاص عقله يوقف عن التفكير ومعاش يعرف شن يقول ولاشن يدير..
خافت ع رتيل وعليه هو يدير حاجه يموت من الندم عليها بعدين..
جاته وقفت قدامه وشدت ذراعاته وهي تقول بصوت يرجف:سفيان تعوذ من الشيطان ووحد الله..
سفيان غمض عيونه وقال بصوت عالي:حولي من قدامي..
وجيهه:حولي يالينا تو يديرلك حاجه اني نجي بينه وبينها مانخليشي يقربها..
ومشت تقت ع بنتها رتيل اللي كانت ترعش وتبكي..
ورنده تشوفلهم ودموعها ينزلوا..
سفيان فتح عيونه وقال؛قتلك حولي..
لينا استجمعت قوتها وقالت؛لامش محوله..سفيان اصحى لروحك ومادير شي تندم عليه بعدين ياسفيان الله يربحك..
سفيان؛لينا حولي..
لينا شد عليه وقالت:سفيان نسألك بالله تعالى معاي انا نفهمك كل شي..
قعد يشبحلها بحده...
ونزلت يدها من ع ذراعه ليده حضنها بيدها بحنان بعدين حولت منها العصا وقالت...خش...
غمض عيونه وهو يحاول يتحكم في اعصابه بعدين فتحهم..
وسحب نفسه منها ومشي للكوجينه...
وهي مشت لحقاته وسكرت الباب..
وجيهه تنهدت براحه بعدين التفتت لبنتها قالت؛نوضي لدارك نوضي..
رتيل وهي تمسح في دموعها وتبلع في ريقها وناضت بسرعه ومشت تجري للدار وسكرت عليها..
وامها واختها قعدوا واقفه في الصاله..
داخل...
لينا؛انا اقرب حد لرتيل ونعرف كل شي يصير معاها والله والله العظيم اختك مادارت حاجه غلط والله..
سفيان بعصبيه؛مالا شن اللي شفته بعيوني...ريته واقف عليها في الشارع قدام الناس..خبط الباب بقوة وقال...في الشارع والناس كلها تتفرج...ناقصين حني ناقصين!!مش سادنا البلي اللي حني فيه...اللي قاعدين نرقعوا في امه والله اعلم شن مازال بنشوفوا ونسمعوا....
رنده برا تسمع فيه فهمت قصده بكلامه..
كلامه كان قاسي وصابها في وسط قلبها ووجعها...
وامها تسمع فيه شن يقول وتشبحلها..
••داخل.
سفيان:الناس كلها برا شهدت ع اللي صار عركه ودوشة صارت بسببها الكلبه هادي...الحيوانه...
لينا بلعت ريقها وهزت راسها وقالت؛باهي..لكن صدقني انا متأكده اختك مادارت شي كان هو تمادى معاها مش ذنبها هو اللي ضايقها مش هي...
سفيان هز راسه خبط بيده ع الباب..بعدين مشي طلع من جهة الجنان..
لينا قعدت معاه بعيونها بعدها مشت طلعت وراه...
وقفت برا وقعدت تشبحله وهو ماشي لين درق من قدام عيونها..
وشويه وسمعت صوت الباب وانفتح وتسكر...
تنهدت وقالت؛اللهم اني استودعك اياه احميه من نفسه يارب..
ومشت خشت داخل...
🍁🍁🍁
فهالوقت..
انحزت العركه بين بين رياض ومبشر وكل واحد مشي في حاله..
كل واحد هام في الشوارع بسيارته وهو يحاول يستوعب اللي صار..
رياض ماكانش قادر يصدق ان البنت اللي يحكوا عليها لبعض..وحده...
مش مصدق ان البنت اللي يبيها صاحبه هي نفسها حبيبته..
تي هو ساعده يتقرب منها قبل...!
حاس عقله حيوقف...متمني اللي صار كله يكون كابوس ويبي يفيق منه...
🍁اما مبشر عقله قاله ماقال عقل اخته لأخته..
رياض حط عينه ع البنت اللي تبيها ويبي ياخدها منك تعبا قلبه اتجاهه بالحقد الشديد...والصداقه ماتت..وحييت في مكانها العداوة...
🍁🍁🍁🍁
بعد العاصفه عم الهدوء الحوش..
بس كانت القلوب مازالت ترجف من الفجعه...
ورتيل راقده في سريرها وهي غامه روحها بالشرشاف ودموعها ينزلوا وهي راقده وقعدت تحلم وتهتري بيه..
ورنده مقعمزة ع سريرها وتشبحلها بحزن وكلام خوها يتردد في وذانها..
ياترى في شي جديد صار خلا سفيان ينفعل لهالدرجه ويقول كلام زي هدا!..
خدت نفس عميق وشبحت لتليفونها اللي كان ع الكاميدنو..
قعدت تشبحله للحظات..بعدين خداته..
🍁🍁🍁🍁
"باهي تو نص ساعه وجاي"...
يتكلم بالتليفون وهو يقرا في ملف قدامه بعدين قال..
انس:وشن قلت اني نص ساعه وجاي ماتكسرليش الراس..
تأفف بعصبيه وسكر عليها وحط التليفون ع المكتب..
شويه ورن بنغمة رساله..
انس غمض عيونه وقال بنفاذ صبر؛تس..
بعدين فتحهم وخدي التليفون وفتح الرساله..
(السلام عليكم استاذ انس..اني رنده بن عامر نبي نعرف كان في جديدصار حطني في الصورة)
ابتسم ابتسامه خفيفه..وتنهد بعدين بدي يكتب...
🍁هي كانت شاده تليفونها وتشبحله بتوتر..
شويه وصلتها رساله..
(وعليكم السلام..مافي شي مهم غير ان الخصم حيحضر الجلسه الجايه ودار محامي)
هي بعد ماقرت الرساله خافت هلبه...محمد حيحضر الجلسه الجايه ودار محامي!..
قلبها انقبض بقوة لدرجة انها حطت يدها عليه..
شويه وصلتها رساله تانيه..
(ماتخافيش كل شي تحت السيطره..وكلي امرك لله وخل عندك ثقة في المحامي متاعك)
يدوب ارتسمت ع وجهها ابتسامه لما قرت كلامه..
صح هدا من روعها شويه بس مازال الخوف موجود...
حطت تليفونها ع تركينه..
وخدت المصحف وفتحاته وبدت تقرا...
🍁🍁🍁🍁🍁
الساعه4:30 عصرا..
طلعت من الحمام وهي لابسه بيجامه مستورة ولافه الفوطه ع شعرها...
وهي ماشيه شافت ولادها وبنتها طالعين مع بعض يجروا
وقفوا قدامها وقال كبيرهم..
الشريف:امي عمي بيطلعنا معاه ل*****
نوريه:بوكم عنده علم..
مؤيد:ايه قاله عمي..
نوريه:وينه بوكم..
الشريف ومؤيد؛في حوش جدي..
هزت راسها وقالت؛بروا وردوا بالكم ع بعضكم..
الثلاته قالوا؛حاضر..
ومشوا مع بعض..
نوريه:شريف عيونك ع خوتك..
الشريف:حاضر يام..
قعدت واقفه تشبحلهم لين طلعوا..
بعدين تنهدت ومشت للدار النوم..
وصلت فيها وخشتلها..
فكت الفوطه وقعدت تنشف في شعرها..
ومشت للدولاب بطلع مجفف الشعر..
فتحاته...
وفتحت فمها وعيونها بدهشة...
قعدت جامده وهي تشبح في شي قدامها بهرها وفاجئها هلبه...
كانت علبه مجوهرات مفتوحه في عقد كبير لؤلؤ حقاني مع حلق كبير....
وتحتهم كرت..مدت نوريه يدها وخداته وبدت تقرا...
لما قرت اللي فيه عيونها تعبوا دموع..
ابيات شعر..كانوا اول ابيات بعتهم حسين لنوريه في رساله ايام الجامعه والوحيدات...
يالؤلؤا يسبي العقول أنيقا
ورشا بتقطيع القلوب رفيقا
ماإن رأيت ولاسمعت بمثله
درا يعود من الحياء عقيقا...
••عقدت حواجبها بإستغراب لما قرت في الأخير..
"اقلبيه"
قلبت الكرت...وبدت تقرا بعدين ضحكت..
"عندك ساعه وتي فيها روحك واطلعي للسيارة"..
حطت يدها في نصها وهي تضحك بتعجب..بعدين رجعت شاقت لعقد وحلق اللولو..حطت يدها في نصها وعضت ع شاربها وهي تضحك..
بعدين حركت راسها يمين ويسار...
🏵🏵🏵🏵🏵
بعد ساعه..
مقعمز في السياره يشبح من ورا نظاراته الشمسيه للمرايا ويستنى...
شويه بانت عليه وهي جايه من بعيد تنهد بإبتسامه..
بعدين شاف روحه سوا شعره وياقة سوريته ورجع شافلها لقاها واصله فيه..
فتحت السيارة وركبت...
وهو يتأمل فيها...بعدين قال؛والله ماتولي سيارة كان لما تركبيها انتي..
نوريه:اكيده نفس الكلام قلته لهديكا وين تركب السياره..
حسين؛يشهد عليا ربي ماسمع مني الكلام هدا غيرك ولاتتساوي عندي مع حد في الدنيا غير انتي ماتبيش تصدقي..
وشغل السيارة وهو يشوفلها وهي تشبح القدام وخلاص..
تنهد بعدين تحرك بالسيارة...
وخلا اكرام تسحن عليهم وهي تتفرج ع التلفزيون مع عزوزتها وسلفتها مها متكيفه بالقهوة وبشكلها كيف مغتاضه...
🌺🌺🌺🌺
وفي مكان تاني..
كان مقعمز في المحل متاعه فاتح ع البث المباشر لبرنامج "4ونص".... ويسمع في الاعلاميه بشرى كريم شن تقول من مقدمه حلوة عنها قبل الإتصال بيها...
"هي مدام ماشاء الله عليها مبدعه في مجالها اني شخصيا جربت الشكلاطه متاعها اللي وصلتني لهني حاجه الله يبارك..فيها بنة زايده الكلام اللي سمعته عنها ماكانش مبالغ فيه ابدا...هي شكلاطه بس الباين فيها سر خاص خلاها تميزت بطعم خاص......وهي معانا توا بش نعرفوا منها السر ..وقالت بضحكه..كان رضت تصرح بيه طبعا"
هدت ضحك بعدين قالت..
"مدام لينا عبد الودود مساءالخير"
🌺🌺🌺
لينا وهي في الغرفه الداخليه متاع المحل متاعها ملتمات حواليها ردت تقول:مساء النور استاذة بشرى..
"تشرفنا بوجودك معانا حبيبتي..."
لينا:تسلمي..الشرف ليا انا وهدى شي يسعدني..
"ويسعدنا حتى اني حبيبتي..لينا خبرينا عن #شكولينا اللي طلعت من سبها وانتشرت في ليبيا كلها ومنها لمصر وتونس وحتى تركيا وصراحة تستحق ابداع شكلا وطعما...خبرينا كيف كانت بدايتك ووين تعلمتي صناعة الشوكولا"
لينا:اول شي مشكورة ع كلامك الجميل اللي يسعد القلب..تاني شي..انا تعلمت صنع الشكولاته في سبها من اخت صديقه ليا اسمها نجاح المقرحي بعد ماخديت الشهاده الثانويه هي كانت دورة وخديت فيها شهاده...وقعدت نخدم عليها ونبيع في المحيط متاعي واللي جربوها عجبتهم واجد وبدت منهم تنتشر في المنطقه اللي ساكنه فيها وبعدها سبها كلها وطلعت لبعض مناطق الجنوب..وقتها ماكانش عندها اسم شكولاته بس...وكنت نسوق ع صفحة في الفيس اسمها "حلو سبها"
"اها معناها للأسم حكايه بروحها"
لينا ابتسمت وقالت:ايه...في من ذاقها وسأل مستغرب ليش مايكونش عندها اسم خاص فكرت في الموضوع واجد وفكرت في اسماء واجد لعند ماجاني الاسم عن طريق وحده عزيزة عليا واجد خالتي بريكه كانت تخدم معاي رئيسة الممرضات في مستشفى المركز الطبي...الاسم يكون من اسمي...#شكولينا..
"حلو..يعني كنتي ممرضة قبل مدام لينا"
لينا:ايه وتفرغت توا لشكولينا بس..
"حلو حلو..وبعدين كيف انتشرتي ووصلتي لهني"
لينا:لما انتقلت للعيشه في طرابلس كنت نخدم في البيت ونوفر في طلبيات..خدمت مع محلات..لعند مادرت محل بروحي والحمد لله من فضل الله نجحت فيه..
"وينه المحل متاعك بالزبط"
لينا:في ****** تحديدا في *****
"في ******* تحديدا*****...تخدمي ع الشوكولا والحلو قالوا"
لينا:ايه الحلو شغل سلفي وحماتي ..
"جميل يعني محل عائلي"
لينا:والله شن بنقولك اللي حواليا حاليا كلهم يدعموا فيا شغلهم معاي دعم ليا انا الحمد لله ربي حطني في عيلة تعامل فيا كيف بنتهم.. دعموني كلهم اولهم والد زوجي وامه الله يحفظهم وخواته وسلفتي..وقبلهم خواتي وباتي وامي الله يرحمهم..باتي الله يرحمه كان ديما يدعم فيا على اي شي نديره وممكن لولاه من بعد الله ماكنت احترفت صناعة الشكولاته..
"الله يرحمهم ويغفرلهم...لينا يالينا..كليت شكلاطه هلبه في حياتي بس اللي جتني منك في طعم مميز ووالله ماكلام دعائي وربي شاهد..في بنة زايده..في سر ورا البنة هادي يالينا"
لينا؛لا والله مافي سر بس انا نحب الشكولاته ونحب خدمتي فيها والواحد لما يحب شي يبدع فيه...الحاجه وين تندار بنية وشغف كيف مانقولوا بقلب ورب حتطلع غير...
"كلام حلو...وفعلا الواحد لما يخدم بشغف يبدع...لينا شاركتي معرض المنتجات المنزليه والشكلاطه متاعك صار عليها اقبال كبير غادي..احكيلنا عن التجربه هادي"
شبحت لينا للبنت اللي تخدم عنها وقالت؛هدي فكرة بنت تخدم معاي اسمها ابتهال الشارف شجعتني ع المشاركه وشاركت ورب العالمين وفقنا وبصراحه تجربه مفيده واجد خلتنا اسمنا معروف واجد ووصللكم..
"والشهرة هادي والنجاح استحقنها شوكولا #شوكلينا بجدارة...لينا في نهايه حوار معاك شن حابه تقولي لاي بنت عندها مشروع وتبي تبدا لكن متردده او متخوفه من عدم النجاح"
لينا:نقول اول حاجه حبوا الشي اللي انتم تخدموا فيه يعني مايكون عندكم مجرد مصدر لكسب الرزق..والاهم استعينوا ديما بالله وتوكلوا عليه ربي لما يشوف عبده يخدم ع شي يحبه ويتقنه ويكون عنده فيه طموح يساعده ويوصله لفوق مايتوقع ان الله لايضيع اجر من احسن عملا..
"رائع كلام جميل جدا"
لينا قاطعتها وقالت؛لو تسمحيلي استاذة بشرى تبي نشكر بالأسم ناس كان ليها فضل كبير عليا من بعد الله"
"تفضلي حبيبتي "
لينا:صديقاتي وزميلاتي اللي دموعني بكل شي يقدروا عليه..مريم وامل لايمكن ننسى وقفتكن معاي...شخص كان له دور كبير ومهم واجد في رحلة #شكولينا الله يرحمه ويغفرله ويجعله مئواه الجنه لايمكن ننسى دعمه واللي داره معاي معروف عند الله وعند كل مايعرف لينا عبد الودود...واخيرا ومسك الختام...زوجي...سفيان بن عامر..الراجل هدى كان اول من خلا اسم #شكولينا ينتشر في البلاد..الراجل هدى صبا مع لينا دعم لينا آمن بطموح لينا ودار كل شي بش يخليها تنجح..المحل اللي نخدم فيه توا هو اللي خداه وجهزه وفاجئني بيه وهو اللي سوقله...المراة لما تلقى راجل يقدرها ويؤمن بيها ويدعمها حتكون ناجحه ديما وين ماكانت..وانا ممنونه له واجد من بعد الله..
"فعلا كلامك صحيح وعن تجربه الراجل لما يدعم زوجته يزيد ثقتها بنفسها وبالتالي هي حتنجح حتى لو تعرضت لعراقيل وصعوبات ربي يخليكم لبعض لينا عزيزتي سعيده جدا بوجودك معانا اليوم ونتمنى اسم #شكولينا يزيد يتألق وينتشر ويوصل لأعلى من هكي ان شاء الله "
لينا:ان شاء الله..نشكركم واجد ع هاللفتة الحلوة ودعمكم الدائم ليا ولغيري مشكورين جدا..
"تسلمي حبيبتي هدا واجبنا حني في قناة سلام هني هم من اكبر همومنا هو دعم شباب البلاد دعم مشاريعهم وافكارهم والاخد بيدهم بش يوصلوا للمكان اللي يطمحوا انهم يوصلوله..مشكورة عزيزتي لينا وموفقه دوما ان شاء الله تعالى"...
لينا:تسلموا مشكورين واجد...
وانتهت المكالمه..واول ماكملت العاملات اللي يخدموا معاها كلهم صفقولها...وهي حطت يدها ع قلبها وقعدت تضحك وهي منحرجه وقلبها يدق بقوة....
شويه جتها رساله ع تليفونها..
هدت ضحك وقالت:تسلمن حبيباتي تسلمن..هيا توا كل وحده تشوف قريب ساعه راحت...
كلهم قالوا بإبتسامه واصوات متقطعه:تمام..يللا..
ومشت كل وحده لهت بحاجه...
وهي شافت الرساله اللي جتها..
(قولي للسواقه ماتجيش...نحبك)
قعدت تضحك بعد ماقرت الرساله وقلبها يدق بقوة...
شويه رن تليفونها..فتحت الخط وردت..
لينا بإبتسامة فرح:اموله...
🏵🏵🏵🏵🏵
وفي مكان تاني....
تحديدا في ميدان الشهداء...
كانوا مقعمزين ساكتين..تبادلوا بضع كلمات بسيطه...
بعد صمت مادامش طويلا قال..
حسين:مذكرة اول طلعة لينا بعد الزواج..
مررت نظرها قدامها وقالت؛مش هلبه..
ابتسم وهو يشوفلها شويه بعدين قال:اني مذكرها كويس بكل تفصيل حتى مذكر شن كنتي لابسه..سروال اسود كتان وبلوزة طويله لونها ابيض في الاسود وشاربتك لونها ابيض فيها زي الورد الاسود الصغير..
شبحتله وهي متفاجئة كيف تفكر اللبسه بتفاصيلها..
هو ابتسم بحت وقال:مستحيل ننسى...كنتي دايرة خط كحل خفيف ع عينك ماركزتش عليه لما طلعتي بعدين شفته مذكرة شن درتلك عليه..
شبحت القدام وابتسمت..
حسين؛انتي من غير تذهبي الشيرة يابال ديري حاجه في عيونك...
نوريه؛وانت كنت مغيار هلبه..
رفع حاجبه وقال:ومازلت..
شبحتله شدت ضحكتها بعدين غيرت عيونها عنه..
وهو يتأمل فيها بإبتسامه...
شويه آذن عليهم المغرب..
تنهد وقال:هي نوضي نمشوا نصلوا بعدين نكملوا مشوارنا..
ابتسمت وناض وهو ناض معاها...
🌺🌺🌺🌺🌺
في الطريق...
سفيان:كلامك كله عجبني..برغم اني حسيت من نبرة صوتك انك مرتبكه بس تكلمتي حلو هلبه..
لينا.بضحكه:اها كنت مرتبكه واجد لكن الحمد لله مشت الامور..
شد يدها وقال؛ نصلوا قبل...بعدين بنمشوا لمكانا نتعشوا غادي..
لينا شبحتله وقالت:اهم حاجه تكون عاطي علم..
ضحك وهز راسه بإيجاب...
وهي ضحكت بعدين شبحت القدام....
🏵🏵🏵🏵🏵🏵
بعد المغرب...
في احدى المطاعم...
مقعمز مقابلها يشبحلها وهي مرة تشبحله ومرة تغير عيونها عنه...
بعدين قالت..
نوريه؛امتى بتطلب العشي مانبيش نعطل ع الصغار..
حسين رفع حواجبه وقال؛القعاد معاي بروحنا ولى يملل توا..
نوريه؛ندوي ع الصغار اني..
حسين ضيق عيونه وقال؛لسانك يقول شي وعيونك يقولوا شي تاني..
غيرت عيونها عنه هي ساكته..جو في عيون واحد كان يشبحلها طول غيرت عيونها عنه وشبحت لحسين خافت ينتبه..
ابتسم حسين وقال:شن اذكرتي لما قريتي الشعر؟
نوريه من الارتباك بدت تدوي بدون تحفظ قالت:ايه اول رساله بعتهالي..
حسين بضحكه؛قالتلي سالمه وقتها قرتها ومزقتها وبعدين طلعتي داستيها..
ضحكت ضحكة خفيفه..
حسين بإبتسامه؛قداش كنتي شايفه روحك..قداش تعبتيني معاك...
نوريه؛صدقا لولا البنات قعدوا يزنوا ع راسي ويقنعوا فيا بيك ماكنتش مرتك توا..
هو تلاشت ابتسامته وعقد حواجبه بغضب من الغيره لمجرد انه تخيل لو كانت نوريه مرت واحد تاني غيره..
نوريه ابتسمت وقالت:اللي تفكر توا عارفاته..حارة ولا ماتحملتهاش...
حسين؛مانبيش نعاود نفس الكلام يانوريه لكن انتي اللي تجبري فيا نقوله...
قالوا الزوز مع بعض...انتي هكي تبي..
ضحك وحرك راسه يمين..
وهي قعدت تشبحله بإبتسامه بعدين غيرت عيونها عنه جو في عيون نفس الشاب كان يبتسملها..
هي رجعت شافت لحسين وابتسمتله بتوتر..
شبحلها حسين:خل نطلبوا العشي احسن..
نوريه؛اممم...
هو قعد يشبحلها بطرف عينه وهي تشوفله بإبتسامه متوترة...
🌺🌺🌺🌺
"لكن في حاجه قعدت في قلبي مضايقتني منك لعند توا"
سفيان عقد حواجبه بتساؤل:اللي هي؟
لينا؛ايام المعرض توقعت انك تعدي معاي او تجي زيارة لكن ماجيت بكل..
قعد يضحك..
وهي تشبحله برفعة حاجب..
شويه هدى ضحك بعدين قال:مافيش يوم من ايام المعرض ماكنتش فيه...
عقدت حواجبها بعدم فهم..
سفيان رفع سبابته وحطها ع الطاوله وقال: ايام المعرض كلها واني غادي..
لينا وهي متفاجئة:كيف!؟
سفيان:مالا شني...تتوقعي نخليك بروحك غادي كنت نراقب من بعيد لبعيد ونشوف فيك شن ديري....
وهو يتكلم يذكر في روحه كيف كان يشد في الزوار ويكلم فيهم عن الشكولاته متاعها وهما طول يمشوا يجربوا فيها لين دارلها زحمه...فضل يحتفظ بهالشي لنفسه يبيها تحس انها نجحت بروحها غادي بدون مساعده من حد...
لينا ضحكت بمفاجئة بعدين قالت:تدوي منك جد ترا احلف..
سفيان:تكذبي فيا!؟
لينا بضحكه؛لاحاشاك مش قصدي بس انت في دير في حاجات العقل مايستوعبش انهن يطلعن منك انت.
ابتسم ورفع حواجبه ونزلهم بعدين قال:اني الغير متوقع..
لينا بإبتسامه؛تصدق بديت نحب حتى غرورك هدى..
مصمص شواربه وهو يشبحلها بإبتسامه...
وهو تشوفله بإبتسامة حب.
تنهد بعدين عقد حواجبه وقال:نتعشوا..
هزت راسها بإيجاب وهي تضحك..
هو تنهد تاني بعدين قعد يدور ع النادل..
🍁🍁🍁🍁🍁
في وحده من المولات..
مقعمز في وحده من المطاعم ع طاوله بروحه..
وهما مقعمزين مقابلينه ع طاوله تانيه...
طليقته وصغارها..
الصغار ياكلوا..والام تشبح لبوهم وخلاص..
وهو كان ياكل بعصبيه...
منها ومن تصرفاتها...
جي بيطلع صغاره بش يشروا حوايج..لقاها معاهم تبي تمشي والحجه الصغار شادين فيها..
برغم صدمته في اهلها اللي طالقينها تطلع مع طليقها عادي..
مشاها ع خاطر صغارها..
وفي طلعة حاولت تتقربله وهو يزيد نفور وكره ليها...
وطولت للطلعه لين وصلت للعشي وهدا كله ومافي حد من اهلها دورها بكل...
كمل عشاه..هي ناضت ومشتله وقفت عليه وقالت....
رولا:ممكن تليفونك شويه غير هاتفي شحنه تم..
غمض عيونه بنفاد صبر بعدين فتحهم ومدلها التليفون..
هي ابتسمت وخداته ومشت بعدت بيه...
وهو شبح لصغاره لقاهم يشبحولهم بإبتسامه..
هو ابتسم بحب واشرلهم يجوه..
وهما ناضوله يجروا..
انشغل بيهم وخلاها تفتش في تليفونه..
كانت تشوف في الرسايل لين جت قدامها رسايله هو ورنده...
كانوا مختلفات عن غيرهم من الرسايل اسلوب انس معاها كان مختلف..
صح مايجوش اربعه رسايل بس كان واضح فيهم شي المراة تزبطه بسهوله..
قعدت تشبحله بنظرات غيرة كلها تملك..
هي تحب انس حب تملك..تبيه ليها هي وبس تسيبه وتوليله يكون ليها ومش لي غيرها..
رجعت شافت للتليفون تاني نسخت الرقم وبعتتاه ليها رساله بعدين مسحت كل شي...
ودار اتصال ماتمش برقم امها...بعدين رسمت ع وجهها ابتسامه لطيفه مصطنعه ومشتله...
قعمزت قدامه وحطت التليفون وقالت:شكرا...
هو خداه بدون مايشبحلها وناض قال:هيا بابا نروحوا غدوة عندي خدمه بكري..
رولا؛هيا حبيباتي نوضوا خلاص بابا يبي يرتاح..
الصغار ناضوا..
هو مشي قدامهم وهو معصب وهي لحقاته بالصغار...
🏵🏵🏵🏵🏵🏵
"هي خلاص تعشينا خل نوضوا"
حسين؛الصغار في حوش عمهم راهو مش في حوش جدهم ماتخافيش..
نوريه؛عند مها لالا عيب هي نوض..
حسين فنص وقال:نوريه..
غيرت عيونه عنه وهي ساكته استفزها الراجل اللي يشبحلها ع قد ماحاولت تتجاهله هو غير طاولته وجي قعمز في الطاولة اللي وراهم مباشرة تبي تغير مكانها لكن خافت من حسين يلاحظ ويفهم..
شويه...
وتغيرت موسيقى المكان لأغنيه عاطفيه...
هي استغربت بعدين قالت:شكله في حد بيحتفل بحاجه هني!؟.وقعدت ادور بعيونها...وهو يشوفلها..
شويه وبدت تركز في الاغنيه اذكرتها وشبحتله...
هو ابتسم..
رفعت حواجبها وخدت تليفونها وشافت التليفون انصدمت...
ع جية واحد يجر في طاوله عليها تورته صغيره...
وجابها وحطها قدامهم..
كان محطوط عليها رقم 10...
النادل:بطول عمركم مع بعض ان شاء الله..
حسين:ان شاء الله..
مشي...
وهي تشبح قدامها للتورته وهي مازال مش مستوعبه..
حسين:نسيتيه ولا؟
نوريه شبحتله وقالت؛ليا عذري..
حسين؛طبعا ليك عذرك في كل شي انتي ماتغلطيش..
نزلت عيونها لرقم عشره وقعدت تشوفلها..
حسين:عشرة سنين وانتي هكي وهدا طبعك..واقسم بالله حتى بطباعك الصعبه نحبك..نحبها فيك كلها كلها يانوريه...
حطي في بالك صعب ع الراجل هلبه يشوف مرته تسلم فيه لغيرها بالساهل بالذات لو كان يحبها....وانتي سلمتي فيا وبعدين عفتيني بكل ومع هدا مازال نحبك واكثر من قبل..
هي قعدت تشبحله وعيونها مليانات دموع...
ابتسم وطلع من جيبه باكو صغير ...فتحه وحطه قدامها وقال:تتزوجيني مرة تانيه...
هي ماقدرتش تمنع روحها من الضحك..
قعدت تضحك...واللي حواليهم يتفرحوا وهما فاهمين احتفال بذكرى زواجهم بس مش فاهمين شن اللي قاعد يصير بيناتهم توا..
نوريه هدت ضحك وقالت؛منين متعلمه هدا كله؟
حسين غمز وقال بضحكه:شديتها مسلسلات تركيه مع اكرام..
نوريه رفعت حاجبها وقعدت ساكته..
ضحك وقالت:برودك الايام اللي فاتوا نطلعه من عيونك اليوم..هاتي يدك..
مدت يدها وهي مبتسمه خداها ولبسها الخاتم كان فيها حبة لولو حتى هو....
هي شبحتله بعدين شبحت لحسين وهو يشبح فيها شويه وركزت ع الراجل اللي وراه غمزلها..
غيرت عيونها وقالت لحسين:خلاص هي خل انوضوا..
هو شبحلها بإستغراب وقال:فيك حاجه تانيه انتي..
نوريه:حاجة شني مافي شي...
هو قعد يشبحلها شويه بعدين مرر نظره ع المطعم..
نوريه شدت يده وقالت:هيا نوض..
هو التفت شبح وراه...ركز ع الشاب لقاها داير روحه مركز في تليفونه...
غير عيونه لنوريه..بعدين طلع يدها وناض..
نوريه بخوف:حسين!
وحسين ولاعبرها..ومشاله وقف حدا طاوله وخدي طاسة العصير..
الشاب قام عيونه وشبحله..
صبها حسين في وجهه...
الراجل شهق وناض واقف...
والكل يشبحولهم.
حسين؛اطلعي اركبي السيارة...
نوريه:حسين..
حسين بصوت عالي:بري..
الشاب بصدمه:كنك يا را شن في..
حسين :كني تو تعرف كني..وجبده من تيشرته وطاح فيه الضرب ..والدنيا جت تجري وتحز...
وهي مشت بسرعه طلعت من المطعم وقلبها يدق من الخوف على حسين...
قعمزت في السيارة وهي ع نار....
شويه وطلع وفي يده بوكس حلو..
جي للسيارة وركب ومدلها البوكس وقال؛خيرك ماتكلمتيش من الاول..
نوريه:خفت من العار اللي درته توا..
هو سوا قميصه ومدلها البوكس بعدين قال:شدي..
هي هي خدت من الباكو وهي شاده ضحكتها..
وهو شغل السيارة وتحرك..
شويه وانفجرت ضحك...
وهو يهز في راسه ويقول:اضحكي اضحكي..
نوريه بضحكه:خطروا عليا ايام الجامعه قداش عركه صارت غادي انت سببها..
هو ابتسم بعصبيه...
شويه رن تليفونه...
خفتت ضحكتها..
وهو طلعه من جيبه وشاف المتصل حطه ع الصامت وحطه قدامه..
نوريه؛مرات مريضه..
حسين:تتعود تعتمد ع روحها...المهم توا بنمشوا للبحر نغير جوي اللي عكره السفتول هداكا ونكملوا باقي هدرزتنا..
هي ابتسمت وقالت:براحتك..
هو شبحلها بعدين شبخ للطريق وابتسم..
🍁واكرام تتصل وتعاود لين أيست من رده عليها..
لوحت تليفونها ع السرير وقالت بغيظ؛باهي ياحسين تو تشوف...

يتبع …
الفصول الاربعة