#شكولينا
#الجزء_السابع_والخمسين"القسم الاخير"
#الجمان_الفريد
🍁انتم مع الأجزاء الأخيره من رواية #شكولينا🍁
كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
صوت صرخة عالي..
سمعوه الحاجه رمضانه ومها...
مها طلعت من الكوجينه تجري ورمضانه ناضت بالسيف وبدت تمشي بصعوبه وهي تقول:عياط مني هدا!!؟
في الجنان..
نوريه بصدمه:شن درتي يابنت شن درتي؟!
جتها تجري وشدتها من ذراعها وهي تهزب فيها:كيف ديري هكي ياحمارة كيف..
نور بحقد:شريرة هادي نكرهها..
طلعت اكرام من الروشن وهي تقول:احمدي ربك ماجتش فيا والله لو جت فيا طلعت قتلك انتي وامك ياقليلة الربايه..
نوريه:احترمي نفسك خيرلك سكتلك هلبه راهو..
اكرام:مصح وجهك وخلاص فوق اللي داراته فرختك مازال تطلقي في لسانك انتي!
شويه سمعت صوت مها ورمضانه جايات بدت تبكي بتصنع...
ومها فتحت الباب عليها..
اكرام وخرت وهي تقول ببكي:شن ندير في روحي شن ندير والله مليت من هالعيشه ياريتني ماخدينك ياحسين..
مها تشبح للروشن شافت نوريه..
ورمضانه تقول:خيرك شن جاك!؟
اكرام:شوفي ياعمتي للدولاب شوفي..
شبحوا مها ورمضانه للدولاب لقوا مرايته مكسرة..
اكرام:هادو نوريه وبنتها..
رمضانه:كيف!
اكرام:اهو شوفي بعيونك..
واشرتلها ع الروشن...
رمضانه شافت نوريه واخده بنتها وتمشي بسرعه..
اكرام:زايد ناقص تبي تقتلنا ياعمتي اني والعيل...
رمضانه بملامح غضب هزت راسها وقالت:تعالي يامها اضربيلي ع رقم حسين من هاتفي..
ولفت ومشت طلعت..
مها شبحت لإكرام من فوق لتحت بعدين طلعت وهي تقول :حاضر ياللاي..
بعد طلعوا اكرام رفعت حاجبها وقالت بهمس:درتيها بيدك يانوريه...
ومشت طلعت وراهم وهي دايره روحها مفجوعه وتبكي..
🍁 بعد ربع ساعه..
جي حسين وكان معصب ع الآخر قبل ليوصل لحوش اهله..
اتصل بنوريه تجي للحوش..
ونوريه جت بروحها.....وقعدت معاه راجلها وعزوزتها في دار عزوزتها برواحهم..
نوريه:والله العظيم مانندري ع نور لين دارت اللي دراته..
رمضانه:ماهو من تعباية الراس..
نوريه:الكلام هدا ليا اني ياعمتي؟
رمضانه:عيل وتدووا قدامها عيل ماتفهمش هادي كان مافي حد وجهها..
نوريه:عمتي نوريه مش صغيره وتشبح في كل شي وتفهم وحضرت المشكله اللي دارتها اكرام ياعمتي..
حسين وهو عاقد حواجبه:مشكلة شني..
نوريه شبحتله وقالت:قلت لعمتي نبي نمشي غدوة لحوش بوي بش نحظر يوم عرفه مع خواتي بحكم ان امي مهناش هي نطت فيا بسبعه لسانات وماخلت وماقالت واني ساكته ما تكلمتش..نكذب اني ياعمتي!؟
رمضانه:المراة قلبها مليان منكم انتي وسلفتك من تصرفاتكم وحركاتكم..اني يانوريه نبي كل وحده فيكم تقعد ع حالها ماتعادوش بعض بش صغاركم مايتعادوش...عاد انتي يانوريه الكبيره والعاقله..
نوريه هزت راسها وقالت؛حاضر ياعمتي حاضر واهو قدام حسين انس معاش نجي جنبها ولانحتك بيها بس لو هي بدت عليا انتي تردي عني ياعمتي..
رمضانه:حاضر..وبنت برميلها وعاقبيها ع اللي داراته بش معاش تعاوده...
نوريه:حاضر ياعمتي حاضر...نستأذن ياعمتي..
رمضانه؛بري..
مشت نوريه طول طلعت...
بعد ماطلعت حسين شبح لأمه وقال:مش كان ربي غانينا عن وجع الراس هدا...
امه تنهدت وقالت؛سلم ولدي انت شد شويه عليهم الزوز معاش ترخي هما شافوك طيب وحنين تمادوا..
حسين:اني نعاملهم بما يرضي الله امر واقع وانحطيت فيه..
رمضانه؛باهي ع راحتك..لكن ماتميلش لوحده وتفوت الاخرى اللي يصير بيناتهم يولي الصغار بعدين..
حسين هز راسه وهو مضايق بعدين قال؛ماتبي شي يام..
رمضانه:خش شوف اكرام...
حسين:بعدين بعدين..ومشي طلع من حداها..
رمضانه تنهدت ومشت طلعت من دارها حتى هي...
🍁🍁🍁🍁
"سفيان نبي نقعد مع الهام"
سفيان:بعدين نردك مرة تانيه انتي وعفاف..
رتيل:مانبيش نخلي الهام ياسفيان..
سفيان؛رتيل اركبي وماتناقشنيش.
بضيق رتيل ركبت جنب منى وعفاف..
وسفيان تحرك للحوش...
وعيون رياض وهو يتكلم بالتليفون برا عليهم..
رياض:لامش جاي اليوم غدوة ان شاء الله نمشي ونشوف الوضع.....السلام عليكم..
وسكر وولى خش للحوش...
🍁🍁🍁🍁
وولوا العشيه عفاف ورتيل لحوش اهل الهام..
وكانت رتيل معاهم يد بيد تعول ع العزي..ومرة مرة تقعمز حدا صاحبتها تواسيها وتهون عليها..
وخوتها حضروا الجنازة بعدين روحوا لحوش العزي وقعدوا غادي ساعة وروحوا...
بلغ سفيان الحاج الشريف بحالة الوفاة..
صدمه الخبر ووجعه جاره هلبه بالذات علاقتهم بعد المشكله اللي صارت توترت ومعاش ولت زي قبل..
والخبر وجع وجيهه وتمنت لو كانت موجوده مع جارتها بش تواسيها في مصابها..
لكن بنتها رتيل قامت بالواجب معاهم تمشي الصبح تروح الظهر..وتولي العشيه وتروح بعد صلاة..
وفي المرتين مشوا معاها لينا ومنى...
🍁🍁🍁🍁
وجي يوم عرفه...
في البقاع الطاهرة..
ع صعيد عرفه كانت رنده عايشه في حالة من الندم والذل والانكسار...كانت تستغفر وتبكي....
وذنوبها يمروا قدام عيونها كل شي داراته في حياتها كان فيه ظلم لغيرها...
اذكرت حتى اللي صار معاها مع محمد..اذكرت بنتها..
وقعدت تبكي وهي تقرا...
"عسى ربنا أن يبدلنا خيرا منها إنا إلى الله راغبون"
ومانزلتش من ع صعيد عرفة الا وهي حاسه روحها فعلا انولدت من جديد...صفحة بيضا خاليه من اي نقطة سوداء..
وهدا من جميل ظنها بربها ....
🌺وفي بلدها الأم..
كانت مرت خوها في مكان ما من جنان الحوش..
واقفه تدعي...
"يارب قر عيوني بشوفة ولدي سليم معافى يارب وفرحنا بيه انا وباته..يارب انك تخلي محبة سفيان لعويله خوه كيف محبته لعويلته وماتخلي يفرق بينهم ولايحسوا معاه بحر وياسمين بالحرمان من الاب يارب..
يارب انك تحفظ سفيان وتنجيه ليا من كل شر وماتحرمني منه عمري كله وحدك العالم قديش نحبه يارب..
يارب عوض رنده خير...وخلي حالها من الحسن للأحسن يارب العالمين..
يارب..اغفر لباتي وامي وارحمهم واجعل قبورهم روضه من رياض الجنه...واغفر لعدنان وارحمه واجعل قبره روضة من رياض الجنه يارب العالمين وعوضه بالحور العين يااكرم الأكرمين..
ربي آتني في الدنيا حسنة وفي الآخرة حسنه وقني عذاب النار...
وصل اللهم وسلم وبارك ع نبينا محمد..."
🌺🌺🌺🌺
الساعه 10:00ليلا..
في حوش فتحي الساحلي ...
يوم فرق السو...
في دار الهام...
مقعمزات الزوز مع بعض وحاضنات ايدين بعض..
الهام بوجه شاحب وعيون منفوخات من البكي:ماسييبناش بات معانا من هداكا اليوم لليوم وفطوره معانا..
ماخلا ماجاب وماخلا ماكر...ويسأل ع امي بإستمرار حتى اليوم الصبح خش شافها وهدرز عليها..وشفتي امس خواته كيف قعدوا معانا نهار كامل يعولوا هما وبناويتهم والله لين تحشمنا منهم..عليك عيله مقومه وعليك راجل هو يارتيل..ربي يحبك هلبه..
الهام تحكي ع رياض ورتيل قلبها يدق بقوة...وع وجهها ابتسامه خفيفه وعيونها معبيات دموع..
فجأة رن تليفونها..
قاماته وقالت:شكله خوي بيروح..ناضوا الزوز مع بعض..
ضمت رتيل الهام وهي تقول:عيده في الجنه ان شاء الله..
الهام ودموعها ينزلوا:آمين..
بعدت رتيل وباست راس صاحبتها وخدودها..
بعدين طلعوا الزوز مع بعض برا..
سلمت ع راضيه ام الهام..وطلعت مع اختها عفاف ومرت خوها لينا..
عفاف؛نوال وناديه من وين يعرفوا عيت عمي فتحي..
رتيل:ولدهم صاحب خو الهام..
عفاف:اها...
وهما طالعين من الحوش..
تصادفوا هما ومبشر ورياض واقفين حدا الخيمه..
مبشر لما شاف رتيل غير وجهه عنها..
ورياض شبحلها شويه بعدين شبح لصاحبه لقاها مايشبحش جيهتها ابتسم ابتسامه خفيفه..
اما هي لما شافت رياض غيرت طول عيونها عنه وقلبها يدق بقوة وهي تتفكر في كلام الهام عنه..
ركبوا سيارة سفيان...
سفيان:حوش من الساحلي من امتى يعرفوا ناس في الدوله؟
لينا:في الدوله؟
سفيان:ايه شفت عندهم اليوم في الخيمه **** **** وخوه ***** وهو خوهم الصغير قالوا...
عفاف:الولاد صحاب قالوا..
سفيان:اها..وتحرك...
عفاف:شكلك مش عارف ان الناس هما جو خطبوا رتيل..
رتيل فنصت بصدمه..
ولينا شبحت لسفيان..
سفيان وهو عاقد حواجبه:لمني!؟
عفاف:لخوهم الصغير قالوا..
سفيان شبح لرتيل من المرايه وفي عقله قاعد يربط في الاحداث ببعضها .
اذكر يوم العركه اللي ماشافش فيه رياض وين..
واذكر حبسة مبشر اللي كانت بسبب عركته مع واحد واصل..
تلخبطت عنده الامور..وبدي عقله يألف في السيناريوهات عاد..
🌺🌺🌺🌺
"اختك برا الموضوع ماليها علاقه لابهدى ولاهدى"
سفيان وهو يشوفلها كيف تحددله في لبسه العربي جاها وهو يقول:ياعليك شرموله وخلاص..ناقصين هم حني..ترا حولي
لينا بعدت وقالت:خلاص قصة انتهت وعدت ع حالها..
سفيان خدي المكوى وقال:بري قعمزي..
لينا:هات خل نكمل..
سفيان؛قتلك بري قعمزي يابطه..
لينا:بطة في عي..وسكتت..
وهو يشبحلها ع جنب..
هي ضحكت وقالت:اسفه...بس والله ماسمنت عاديه كيف قبل..
سفيان:بالعكس سمنتي وهلبه حتى شدقتي..
ضحكت لينا ومشت قعمزت ع السرير وقالت:كلمت الحجاج؟
سفيان وهو يحدد؛بوي بكري اتصل بيا يسأل عن الوضع شريتوا خرفان ولا مازال ومن بيعيد معاكم اول يوم وهكي..
لينا:هما شن حالهم..
سفيان:الحمد لله..اصواتهم كانت مرتاحه..
لينا؛كلمت عمتي ورنده حتى هما؟
سفيان:ايه..
لينا؛باهي كويس الحمد لله..
سكتوا شويه بعدين لينا قالت..
لينا؛حبيبي اليوم كلمني عبد الله يأكد ع جيتنا للمزرعه..
سفيان:كلمني حتى اني..
لينا:رابع يوم العيد خواتي بيجن يباتن عندي في الشقة..
سفيان :ماعندكش مشكله..
لينا:اشبحلي ترا..
شافلها.
لينا:نحبك دنيا..
ابتسم كمل كوي...وهي تتأمل فيه بإبتسامة حب..
🍁🍁🍁🍁
توتي في الحاجات اللي بيعدوا بيهم شاهي العاله..
خشت عليها حماتها وقالت:نوريه شن الجو..
نوريه:تمام..
:نوريه ديما هكي هديكا مقعمزة متسندرة وانتي ومها اللي تحوسوا؟.
نوريه:بالله وخيتي ماتكلميني عنها مانبيش مشاكل ووجع راس..
:مع منو..
نوريه:مع عمتي ماتبيش من يقربها..
هزت حماتها راسها بعدين لفت ومشت طلعت..
ونوريه تنهدت وخدت السفره وطلعت وراها...
وتوجهت للصاله..
وصلت فيها وخشت مشت حطت السفره حدا حماتها الكبيرة اللي دير فالشاهي...
حماتها الكبيره قالت:صحيتي نويرة اليوم ماغيبتوش جهد انتي ومها وبعض الناس مادين رجليهم وخلاص..
رمضانه شبحت لبنتها..
والباقي شبحوا لإكرام ماعدا نوريه اللي كانت تشبح للتلفزيون..
إكرام وهي متفاجئة:كانك عليا اني تعبانه الحمل متعبني هلبه..
:وخيرها نوريه حامل ومن بكري وهي قايمه الحوش ع راسها اختي اهي قدامك حامل حتى وبطنها قدامها والحوش كله كنساته..كلنا حملنا وتحركنا في حياشنا مافيش وحده طيحت من حوسة الحوش..
رمضانه:فوزيه..
:معليشي يام سامحني مانقدرش نسكت مايجيش هكي راهو الكيد كله جاي ع مها ونوريه بس حتى هي حركيها اهي زي الفرس ماشاء الله لبس ومكياج والراحه باينه في وجهها شوفي الفرق بينها وبين نوريه وابرار الزوز باين وجوههم التعب لكن ماغيبوا جهد..
سكتت رمضانه ماقدرتش تقول شي كلام بنتها حق..
:هو نوضي سلم كرومه نوضي عولي ع الكاكاويه نوضي جاتك في حاجه ساهله..
اكرام انحرجت هلبه وتحاصرت شبحت لنوريه لقتها ماتشبحلهاش بكل ناضت وهي تقول:حاضر...
ومشت من حداهم وفي نفسها تدعي ع حماتها فوزيه..
ونوريه ومها بردت قلوبهم ع الآخر...
🍁🍁🍁🍁
"عقله معاها وخلاص ياوخيتي اول مرة نشوف وليدي هكي".
:سموحه هي؟
فاطمه:زي الريمه غير عيونها سادات..
:صار احلا من هديكا..
فاطمه:ماتجي حداها شي..هدا غير عيلتها ناس الله يبارك وامها تخش الخاطر..
:شوقتيني نتعرف عليهم..
فاطمه:تعرفي في بالي بعد يروحوا من الحج ناخدكم ونمشولهم ونتكلم فيها..
:خود شور ولدك قبل مادير شي من وراه تعرفي انس لما ترقاله..
فاطمه:لالا مانقدرش حاجه تخصه من وراه..
شويه سمعوا باب الحوش انفتح.
:ولد الحلال عند ذكره..
شويه وخش عليهم شاف خالته ابتسم وقال:اووو خالتي آنسيتنا..
:الله يأنسك انوسي..
انس جاها سلم عليها وقال؛شن الامور..
:الحمد لله في خيار الخير..
انس:شن حال العيله فردا فردا..
:كلهم بخير ويسلموا عليك..
انس بضحكه:درتي سيارة معاش قعدتي ولاخليتي امي في الحوش..
ضحكت فاطمه..
وخالته ردت بضحكه تقول:ماورانا شي اني وامك خل نوسعوا خاطرها نفرهدوا ع ارواحنا..
انس بإبتسامه:فرهدوا فرهدوا...مازال مش مروحه ولا؟
:لامازال..
انس:تمام نبدل وجايك نكمل معاك الهدرزة..
:هي نراجي فيك..
انس:الكيف يام..
:تو نوض اني نديرلك..
انس:خير وخير...ولف ومشي لداره...
:الله يبارك عليه وليدي زين وشخصيه..تو هدا ينقاله لا..
ضحكت فاطمه وقالت:تسلمي..هي نوضي ديريله القهوة..
🍁وناضت خالته بديرله القهوة..
وهو اللي حس روحه رجع بالسنين عشر سنين للخلف لأيام المراهقه..
قعمز ع كرسي مكتبه وقام تليفونه وخش ع الفيس وطول لحساب رنده لقاها منزله ستوري جديد..
مصورة المزدلفه...وكاتبه عليها الآيه القرآنيه..
"عسى ربنا ان يبدلنا خيرا منها إنا إلى الله راغبون"
ابتسم..بعدين حط التليفون ع تركينه...وناض وحول جاكيته...
🍁🍁🍁🍁
وعدت هالليله...
وطل يوم العيد...
كان الاستعداد فيه ع قدم وساق...
عدة الذبح.....
لوازم العصبان والشوا....وجنان نظيف ومجهز بش يحوسوا فيه الرجاله....
وبعد الصلاه..
روحوا الرجاله لحوش الشريف..
عمامه وولادهم...والنساوين من ليلة العيد كانوا موجودات في الحوش..
ومع الزحمه والحوسه اتصل بيهم الشريف فيديو وعيد عليهم وهدرز شويه..
ورنده اتصلت بأختها وعيدوا هي وامهة وهدرزوا ...
وكلهم لاحظوا ع رنده الراحه النفسيه...حتى من وجهها كان ناير والفرحه باينه في عيونها...
🍁ومن جهة تانيه انس..
بعد العصر مشي انس لحوش اهل طليقته بش ياخد صغاره..
ماباش ينزل من السيارة ويدق ع الباب اتصل بصاحبه بش يطلعهم..
وطلع صاحبه وعيدوا ع بعض..
:خش بوي يبي يعيد عليك..
انس قعد واقف يشبحله وهو ساكت..
:تي خش ياراجل راجل كبير طلبك مش واكلينك راهو خش..
انس بإحراج خش مع صاحبه..
رفعه للجنان وين مامقعمزين بوه وخوته..
عيد عليهم كلهم وجابوله كرسي وقعمز..
:شن حالك ياانس شن داير..
انس:الحمد لله ماشيه..
:جاي تاخد الصغار..
انس:ايه..
:والله حالهم واجعني مش مستقرين بكل بينك وبين امهم..
انس:لاهما مستقرين مع امهم واني ناخد فيهم مرة مرة..
واحد من خوتها قال:مش كان تلموا الشمل خير..
ابتسم وقال:تكلمنا في الموضوع هدا هلبه قبل..
بوها قال:ونتكلموا تاني مافيش مشكله مادام نسعوا للخير..
انس:الخير هو وضعنة الحالي حاج رجب..
صاحبه قال؛هو عيد وايام مباركه ادحر فيهم الشيطان وفكر في مصلحة صغارك..
انس بإبتسامه:الشيطان مدحور من زمان والطلاق رحمه راهو مش ديمه شر..
:راسك مسكر ياراجل..
صاحبه؛باهي حق اللي سمعناه ناوي تتزوج..
انس هز راسه بإيجاب..
بوها قال:لاكان هكي خلاص ربي يتمملك ع خير وهي يبعتلها نصيبها..
انس:إن شاء الله..هي وين الصغار؟
صاحبه:شويه وطالعين..
بوها قال:اشرب قهوتك اشرب..
انس قام الفنجان ورشف منه بعدين حطه...
🍁🍁🍁🍁
وفي جنان حوش الفرجاني....
كان حسين واقف ع الشوايه ويشوي..
وخداه صغاره..
واكرام تهدرز عليه..
ومها ونوريه يوتوا في السلايط ع الطاوله...
وخوه مقعمز يهدرز ع امه...
اكرام:من بكري واقفه نتفرج ماقلت توكلني طرف شوايه؟
حسين:بعد نكمل كولي لين يطلع من عيونك..
اكرام:باهي اني عيني في هديكا حسونه..
مها فاتت من حداهم ومشت قعمزت جنب راجلها لما شافت امه ناضت خشت..
شافت حسين واكرام..لقاته يوكل فيها..
راجلها قال بضحكه؛حسين خلاص فقشها..
مها:مش منه م هالبوبريصه اللي واخدها..
راجلها قعد يضحك..
شويه شافوا حسين ماشي لنوريه يوكل فيها طرف شوايه وصغارهم يشبحولهم..
ع طلعة رمضانه..
رمضانه:انكلب حسين..
:قعد الشوا دابه وداب نساوينه..ناض ومشي خدي من الشوا وجي لمها وكلها..
حسين:شن ياااا
:امت تحساب الشوا دابك وداب نساوينه حاج متولي..
ضحكت مها ورمضانه شدت ضحكتها...واكرام تقلب في عيونها مش عاجبها...اما نوريه تاكل وهي مبتسمه .
حسين:ماري ولانكون حسود..
:زعمه...
ضرباته مرته ع يده..
رمضانه بضحكه بصدمه:حي عليها هادي!
ضحكوا كلهم ماعدا اكرام اللي كانت تاكل وبادي ع وجهها ملامح الإزدراء...
☘☘
وعدا اول يوم العيد على خير..
وجي تاني يوم...
وجو نوريه وعماتها لحوش الشريف...
وفات عليهم يوم حلو بالمرة....
جي فيه عبدالصمد جاب سقيطه كامله...
عيدوا عليه سفيان ومروان عادي قدام الناس وهو ماطولش خدي بناته ورفعهم لحوش جدهم وماطلبش يعيد ع عفاف عارفها مش حتطلعله...
وفات هاليوم...
وجي ثالث يوم العيد...
مع الساعه عشرة الصبح..
طلعوا لينا وسفيان لحوازة عم وردة مرت عبدالله...
وكانت لينا ملهوفه ع شوفة خوتها وصغارهم..
لما وصلوا للحوازة وخشت سيارتهم...
الصغار كلهم جو يجروا لينا..
اللي نزلت من السيارة وجتهم وقعدت تحضن فيهم كلهم..
لينا:ياعمري توحشتكم دنيا دنيا واجد واجد هلبه هلبه..
قعدوا يضحكوا خوتها وراجلها وهما يسمعوا فيها..
عبدالسلام:اوو سفيان..
سفيان:اهلا..وسلموا ع بعض وعيدوا ع بعض...
وعبدالله يعيد ع لينا..
بعدين تبادلوا عبدالسلام عيدع لينا وعبدالله ع راجلها..
وصغار خدوهم باقي الصغار وخشوا بيهم...
شويه وخوتها خدوا سفيان لوين مافي عدايله..
ولينا مشت للنساوين..
لاقوها خواتها وسلموا ع بعض سلام حار وعيدوا ع بعض..
بعدين عيدت ع نساوين خوتها اللي اهلوا وسهلوا وعيدوا عليها..
وماخلوهاش تنوض بكل من حداهم..
هناء:ريتهن كيف يتقربن من لينا
امال:اها ياحنه يدورن في مصالحهن نجمه تبي عبدالسلام يدير مشروع هو وسفيان..
هناء:عارفتها هديك الحربه..اما ورده عيونها ع دبش لينا وذهبها قريب تموت..
امال:ربي يكفيها شر عيونهن...
هناء:آمين...
🍁وفات اليوم حلو بلمة لينا مع اهلها....
ومع الليل روحت لحوشها وبدت تستعد لإستقبال خواتها اليوم اللي بعده...
وطل اليوم اللي بعده..
ومع الغدي جو خواتها برجالتهم..
استقبلتهم في حوش شيابينها هي وحمواتها وسلفتها...
قضوا يومهم كله غادي وكانت الأجواء حلوة واريحيه..
حتى بنات امال تعرفوا ع بنات عفاف ونوريه وولوا صحبه...
بعد العشي..
ركبوا لينا وخواتها لشقتها..
فرشت للصغار في الدار ورقدوا..
وهما التلاته خشوا في السرير وقعدوا يهدرزوا..
لينا:انتن لوشفتن حياتي معاهن من الاول ماتصدقنش حالهن معاي توا..راني تعبت معاهن واجد..مش هنا بس حتى مع الناس اللي هني..كيف انا السمرا نكون كنة عيلة الشريف بن عامر البيض الحمر الشقر..ياما ريت من نظرات تقهر وسمعت كلام جارح وفوتت ومشيت وربك سبحانه من عنده قواني وسخر قلوب الناس ليا مش كلهم طبعا المهم هل داري..
هناء:تعبتي مع سفيان..
لينا:اها واجد..
امال؛طبعه مش كيف طبع عدنان؟
لينا:اختلاف جذري..عدنان الله يرحمه كان كيف النسمه لطيف وطيب سهل ولين ...عكسه سفيان عصبي وواعر شكاك شويه وطباعه صعبه كنت نخاف منه واجد واجد
هناء:وتوا..
لينا بإبتسامه؛نحبه دنيا دنيا...
امال بضحكه:شن اللي خلاك تحبيه..
لينا:حبه ليا...كان يحاول يغير من روحه بش يرضيني ويكسبني..كان يدير في حاجات يستغربوا فيها هله وكل من يعرفه وين نشوف استغرابهم نتأكد من حبه لينا..
تصدقن يفهمني من غير مانحكي من نظرة عيوني..يعرف شن نحب وشن نكره من غير مانقوله..لو زعلت منه مايحبش يراضيني بطريقه مباشرة مرات يدير في حاجات يخلني نرضى غصب عني..اها ماتغيرش واجد وهو يقول في طباع فيا صعب يتحولن نبيك تحبيني بيهن..تنهدت وقالت..وعشقته بيهن..
هناء بضحكه؛الله...عليك قصة تهبل قصتكم..
ابتسمت لينا..
امال:باهي معاش تذكري في عدنان؟
هناء شبحت لامال..
لينا تنهدت وقالت:الله يرحمه ويسامحه حيقعد ذكرى حلوة في حياتي عشت معاه ايام حلوة واجد وسيبلي احلى حاجه في دنيتي بحر وياسمين..
امال:وين نقعد مع روحي نقول سبحان مقدر الاقدار..هو كاتبلك نصيبك في سفيان من البدايه وكان له تدبيره فتوصيلك ليه كل شي لحكمة مش من فراغ.
لينا وهي تشبح في الفراغ:صح..ربي كان يبي يمتحن سفيان امتحان يغيره للأحسن ويطلع منه كل شي حلو هو كان داسه....
هناء:ربي يهنيكم ووتشوفوا عويلكم ع خير
لينا حطت يدها ع بطنها وقالت بإبتسامه:آمين...
🌺🌺🌺
وطلع عليهم تاني يوم..
ومن الصبح سقدت لينا خواتها اللي سافروا عن طريق الجو لسبها.... على امل لقاء تاني يكون قريب ان شاء الله
☘☘☘☘
وتعدي الأيام وراها الأيام..
ويجي يوم مرواحة الحجاج...
نوريه بضحكه؛حاجه رنده..
رنده بضحكه؛حاجه نوريه...
وضموا بعضهم بقوة من شدة الشوق والفرحه من قبل نوريه لما شاف حال اختها كيف ولى..
بعدوا عن بعض ونوريه تقول:الله يبارك الله يبارك ربي يتقبل منكم..
رنده:اللهم آمين..
نوريه:حاجة وجيهه..
وجيهه لاهيه تسلم على منى..
نوريه باللهجه المصريه:ياحاجه وجيهه حمد لله ع السلامه
وجيهه طلقت منى وردت عليها بنفس اللهجه:حاجه نويرة الله يسلمك ياختي..
ضحكوا...
ونوريه بدت تسلم علي امها.
ورنده بعد سلمت ع عفاف جت للينا..
رنده؛شكولينا..
ضحكت لينا وقالت:حمد لله ع سلامتكم حج مبرور وذنب مغفور بإذن الله..
وحضنوا بعض...
رنده:آمين والفال ليك..
لينا:يارب....
🌺وخلال ساعه تعبا الحوش..
والاقارب كلهم جو...ودارو عشي كبير ع مرواحتهم وذبحوا زوز قعدان..لأن ضيوف الشريف هلبه...
ويومها سفيان بش يريح مرته وبمعيتها النساوين كلهم حصلوا راحه لما جاب طباخ يطيب..ووقفات يعولوا ويغسلو الماعين...
اليوم اللي بعده مشوا وجيهه والشريف مع رتيل لحوش فتحي...قاموا بواجب العزاء...
☘☘☘
وبري ياأيام وتعالي ياأيام..
وجي اسبوع عرس اخت منى...
وحضراته العيله...واكرام كانت ع راس الحاضرين..
خافت منى من البدايه تصير مشاكل..
بس الهدوء كان حذر طول ايام العرس...
جي لهند عرس حلو وكامل ماناقصه شي..
واهل ياسين شرفوا لينا ورفعوا راسها باللي جابوه وداروه..
كانت لينا تسمع في كلام جارح وتلقيح من هني وهني..
ناس نعلق عليها عيني عينك وناس تعلق ع اهل منى كيف عطوا بنتهم البيضا الحمرا لراجل اسمر..
بالذات جده اكرام اللي كانت تقول فيها عيني عينك..
"لوحوا بنتهم تلويح عطوها لعبد"
وهي كانت تحاول تتجاهل ماتبيش تتعب نفسيتها ع شي مايستاهلش...
☘☘☘☘☘
من بعد العرس..
قعدت الأيام تمشي بهدوء تام...
خش شهر اغسطس وعدا..
ومازالت عفاف قاعده في حوش اهلها....
حاول عبد الصمد معاها بس هي مسكرة راسها ع الطلاق...
وخوتها وبوها معاها..
بس لأمها رأي تاني..
وجيهه:انتي ترضيها ينقال ع حوش بوك حوش المطلقات..
عفاف وعيونها مليانات دموع:لانموت خير!
وجيهه؛مش حتموتي يابنتي ان شاء الله مش حتموتي لما تقعمزي مع راجلك وتتكلموا بالعقل كل شي حيتصلح وكان هو مايبيكش راهو ماقعدش صابر عليك هكي...
زبيده:تبي الحق ولا ولد عمه يابنتي راهو انتي وخوتك غلطوا عليه في حق الراجل وياما صاروا من مشاكل وراها غطرسة خوتك ورفعة خشمك انتي..
وجيهه:حناك عندها حق وحتى اني ماكنتش نعامل فيه باهي راهو..
عفاف:يعني هو الباهي وحني اللي ماننفعوش..
وجيهه:ماقلتش هكي..الغلط منك ومنه..اسمعي بنيتي العشيه الراجل بيجي واني بنقعمز حداكم ونهدرز معاه اسمعي منه وحتى هو يسمع منك وانسوا اللي صار بيناتكم ..
زبيده:اسمعي كلام امك بنيتي المراة ماليها الا حوشها وراجلها وصغارها..ماتقزنيش بناويتك سلم بنتي راهو لو طلقتي يولوا زي القزونات...
عفاف تنهدت بألم وهي تفكر في كلامهم جزء فيها اقتنع بيه وجزء رافضه...
🍁وبعد العصر..
جي عبد الصمد لحوش الشريف..
استقبله استقبال كويس وقعمز هدرز هو وياه شويه..
بعدين طلع وخشت عفاف ومعاها امها وقعمزوا...
وجيهه:شن حالك ولدي وشن حال العيله..
عبدالصمد:االحمد لله ياعمتي يسلموا عليكم..
وجيهه؛عليك وعليهم السلام..
عبدالصمد شبح لعفاف وقال:شن حالك عفاف؟
عفاف بدون ماتشوفله:الحمدلله..
تنهدت وجيهه وقالت:ولدي..صل ع النبي..
عبدالصمد:اللهم صل وسلم عليه..
وجيهه:ولدي اني عارفه انكم الزوز غالطين في حق بعض واللي صار مع بنتي يالاش انها قعدت تكمد وتسكت لين مرضت..اني مفروض نوقف معاها ونقوللها اطلقي لكن اني مادرتش هكي علاش؟ ع خاطر حاجتين اولهم البنات...وتانيهم لاني عارفه ان اللي صاير بيناتكم كله بسبب هلبه حاجات غلط صارت زمان..
عبدالصمد؛عليك نور ياعمتي..يشهد عليا الله الحوش هدا لما جيته بش تاخد عفاف خشيتله بنيه صافيه ماكنت نبي شي تاني اخطا عفاف..لكن انتم كنتوا تشوفولي ع اني خاش ع طمع ونبي نستفيد منكم واقسم بالله عقلي مافكر في هدا بكل..لزيتوني ووليت لانها نبيها مني جد وبنيه صافيه..وبعد خديتها..شفت منكم اسوا معامله استكراد احتقار مش حاسبيني شي ودايرين الفرق بيني وبين حسين..وعمي الله يسامحه ويخلف عليه كان الوحيد اللي يعامل فيا معامله كويسه دخلني معاه الخدمه وساعدني ووقفني ع رجليا وبعد ماقدرت ندير لروحي اسم لقيت نفس في عيونكم قاعد زي مااني وفوق سفيان كان يتمنن عليا في الماشيه والجايه كان لازم يحسسني اني مانسوى شي لولاكم..تصرفاته خلتني نولي علي اخته هو اللي وصلني لهالمرحله معاها وطبعا هي ماقصرتش ياما هانت وتجملت...
عفاف؛ماطلعش روحك بريء اللي درته فيا مالاش مبرر ان عشت معاه زي الخدامه..خدامة شني تي كلبه..هزايب واهانات وكلام جارح تتصبح عليا بكلام زي السم وترقدني والدمعه ع خدي..تعرف لو كنت في الأصل كويس ماديرش هكي في مرتك وام صغارك..
عبدالصمد وعيونه يرقرقوا:ماننكرش اني غلطت معاك هلبه والله ماننكر واللي صار فيك من وراي خلاني كرهت روحي ياعفاف..عفاف اقسملك بالله لو وليتي لحوشك تشوفي شي تاني بني آدم عبدالصمد اللي الأول..
عفاف حركت راسها بالنفي وقالت:مش قادره نصدقك..
وجيهه:صلي ع النبي يابنتي..
عفاف:اللهم صل وسلم عليه..يام معاش عندي فيه ثقه نخاف لو وليتله نموت يام..
عبدالصمد تلقائيا:ان شاء الله اني ولاانتي..
عفاف ناضت ومشت طلعت من حداهم وهي تبكي..
وعبدالصمد معاها بعيونه المليانات دموع..
وجيهه:معليش زيد اعطيها تو تلين اهو شوفها المرة هادي ماجابتش سيرة الطلاق بكل..
تنهد وهز راسه وقال:مش مشكله تقعد لامتى ماتبي كان بتولي في النهايه..
ع خشة الشريف:عطيها وقت زياده وحتى انت زيد فكر..
ناض وقال:ماعندي في شن نفكر ياعمي عارف روحي شن نبي..ع العموم بارك الله فيكم..نستأذن..ومشي طلع من الباب جوه بناته يجروا قعد يحضن فيهم ويشم ويبوس وهما كذلك..
وجدهم وحناهم يتفرجوا عليهم وقلوبهم موجوعه...
☘☘☘☘
طالعه من الكليه..
وهي لابسه جلباب واسع فضاض لونها بني هافت وشاربه كبيره بلون مقارب بس مازال اهفت..وع كتفها شنطه يد صغيره..
متوجهه لسيارتها..
لما قربت توصل فيها...
لمحاته في سيارته..هالمرة جاي بدون مايتخفى ماعنده علاش يدرق هيئته...
لما شبحتله ابتسملها..
هي قلبها قعد يدق بقوة..يدوب ابتسمت ونزلت راسها..
هو فتح الباب ونزل وجاها..
انس:السلام عليكم..
رنده بدون ماتشوفله؛وعليكم السلام..
انس:مانبيش ناخد من وقتك هلبه..اكيد فتحوا معاك الموضوع ولا؟
رنده هزت راسها بإيجاب..
انس:شن نجيب امي وخالاتي..
رنده شبحتله وقالت؛وطليقتك.
انس بإستغراب:خيرها؟
رنده:مش حتكون موجوده في حياتك بأي شكل غير الصغار طبعا..
انس؛ولا حتى بالصغار..الصغار نطمن عليهم من خوالهم ويجوني كل اسبوع يقعدوا يومين وهما مرتاحين لوضعهم هدا..يعني مش حيكون في بيني وبينها اي تواصل..
رنده:مش حيجي يوم وتقول بنردها..
انس:رنده ليا عام مطلقها كان نبي نردها راهو رديتها من زمان..
رنده:مرات تحنلها..
انس بضحكه:علاش اني حبيتها بش نحنلها؟! رنده زواجي منها كان تقليدي حتى بعد الزواج قلبي قعد مسكر عليها ماحبيتهاش...رنده اني اول مرة نعيش الحب ونعرفه لما عرفتك انتي..
دارت وجهها عنه من الخجل وقلبها قريب يطلع من مكانه..
انس:هاه يارنده تعبتيني راك..
شبحتله وقالت:خايفه نندم..
انس:ايه حتندمي وهلبه لأنك ماعرفتنيش من زمان..
ضحكت وقالت:عليك ثقه..
ضحك وقال:انتي لو تعطيني فرصه تتأكدي بروحك..
تنهدت وقالت بإبتسامه:ابعت خالتي فاطمه وان شاء الله خير..
ابتسم بفرح وقال:تمام..العشيه..
رنده ضحكت وفتحت باب السيارة وركبت..
وهو وخر عنها وحط ايديه في نصه وقعد يشبح لسيارته كيف تتحرك..خدي نفس وزفر وهو في قمة الفرح بعدين لف ومشي لسيارته ركبها وتحرك وراها...
🍁وفي حوش شيابين اختها نوريه..
كانوا الحموات ملتمات عند امهم..
ومعاهم الكناين يهدرزوا
:طالب علم هو يانوريه ملتزم منين ري اختك طالعه من حوشنا وهو في جرت راجلي يبي يفتح الموضوع مع حسين..
نوريه:مش عارفه شن نرد عليك اني نكلمها ونشوفها نرد عليك..
:تمام..
اكرام:تصدقي يانوريه..
شبحتلها نوريه..
اكرام:اختك هادي تعجب فيا ع قد ماشافت وصار فيها مازال واقفه ع رجليها..لو كنت في مكانها وخديت راجل زي طليقها طعن في شرفي ودارني نبات في الفنادق مع الرجاله راني انتحرت..
كلهم شبحوا لنوريه بصدمه..
ونوريه قريب ماتت في مكانها..
رمضانه:العفو ياربي ياسيدي شن تقطفي انتي !!؟
اكرام:والله ياعمتي هدا اللي سمعته من عيلة ولد خال امي بنتهم كنة حوش الشريف وهي اللي حكتلهم القصه..شبحت لنوريه وقالت...منى....
#اذكروا_الله_ذكرا_كثيرا
يتبع…
الفصول الاربعة
