شكولينا

الجزء الثاني

#شكولينا 🍫
#الجزء_الثاني
#الجمان_الفريد

الصلاة اولا💕💕💕
《تنويه...في كلام حيكون مؤذي وغير مقبول نعتذر عنه مسبقا بس هو ع لسان الشخصيات اللي في منهم هلبه في مجتمعنا ومايعبرش ابدا عن وجهة نظري...نتمنى انكم تحاولوا تتقبلوا لان كل شي حنكتبه حيخدم قصة الروايه والرساله متاعها》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
"علاش!؟"
سفيان:افتحيه وتو تعرفي علاش..
كلهم قعدوا يشبحوا لنوريه..
ومنى من الدار حاطه وذانها عندهم وتسمع..
نوريه فتحت شعرها وهي خايفه...
سفيان: قللتي عقلك ودرتيها..مش حرام عليك...!
نوريه وهي محرجه وخايفه:مافيها شي تو يطول..
سفيان:تو يطول! تحسابي روحك صغيره! ديري في جو مش ليك كبرتي راك اعقلي..
وجه نوريه انخطف لونه من الاحراج..
وكلهم يشبحولها...
رنده ماتحملتش في اختها انها تتهزب قدام الكنه قالتله:خلاص سفيان ماصار شي..
سفيان:سكري فمك انتي..مادخلكش..
وجيهه:صل ع النبي ولدي خلاص..عندها راجل راضيه..
سفيان مط شواربه للأسفل بإزدراء بعدين لف ومشي وهويقول:ناس تكبر تعقل وناس تكبر تهبل..
زهور من خوفها منهم لحقاته...
اما نوريه دموعها غلبوها ناضت طول ومشت طلعت من الصاله..
وجيهة ناضت ولحقتها وهي تقول:نويرة بنتي...
رنده مشت قعمزت حدا عفاف وهي تقول:شن دخله فيها هو..
عفاف:تعرفي سفيان وعقليته اني لما نجي ع خاطره هو متقيده في لبسي برغم ان راجلي مايعدلش ..
رنده:والله حتى اني لبست القفطان هدا خوف منه هو ومن لسانه..
زبيده:سفيان كيف حياة جده مايحب العوج..
رنده:لكن حني عند رجاله ياحنينه هو مفروض معاش يدخل فينا..
زبيده:خوكم الكبير هدا زي بوكم يدخل فيكم ونص..
سكتت رنده وعفاف مابتش تناقش حناها عارفينها تحب سفيان هلبه وتفضله عليهم وعندها هو مايغلطش..
نور بنت نوريه:ماما تبكي..
رتيل:تعالى نونو حبيبتي...
جتها بنت اختها ضمتها وهي تمسح ع شعرها..
عفاف:عادي نونو حبيبتي ماما وخالو سفيان خوت يتعاركوا زيك انتي وخوتك وبعدين يتصالحوا..
ع جية زهور خشتلهم وهي تقول:ربي يهديها عارفه طبعه وعقليته هي..
رنده بحده:خلاص سكروا ع الموضوع....
سكتت زهور..
عفاف:الجو مصقع في الصاله تنوضوا نخشوا الدار..
زبيده:ايه خير...تعالوا نوضوني..
ناضوا رنده وعفاف لحناهم...
ورنده تقول:ديريلنا سحلب زهور..
عفاف:ايه الجو مايبي الاسحلب..
زهور:باهي..
ومشت طول للكوجينه وهي تقول"سمسام"..
•••خشوا الدار على منى اللي دارت روحها راقده
رنده جتها وهي تقول:خميرة نوضي ياسرك نوم..
منى دايرة روحها ماشيه هي النوم..
طبست عليها هزتها وهي تقول:منى..منى..
منى دارت روحها ناضت مخلوعه:اممم..
رنده:نوضي نوضي..نوضي عاوني سلفتك في الكوجينه..
ومشت للروشن سكراته كويس ودارت عليه الستار..
منى مررت نظرها عليهم ودارت روحها تتثاوب بعدين ناضت ومشت طلعت من الدار..
وهي ماشيه للكوجينه سمعت صوت عزوزتها جاي من الدار تانيه وهي ترضي في نوريه..
وصلت للكوجينه وخشت وهي تقول:شن ديري.
التفتت زهور وقالت بضحكه:سحلب..
منى قعدت تمسح بإيديها ع رقبتها وهي تزفر بعدين قالت:مسح على كبدي..
وزهور تضحك..
ع خشة رتيل شبحتهم يضحكوا قالت:شن يضحك فيكم!
زهور تلاشت ضحكتها وهي تقول:عادي خطرت عليا حاجه حكيتها لمنى..
رفعت رتيل حاجبها وقالت:اممم..
ومشت للغاز ولعاته وحط عليه بكرج الكاكاو بش تسخنه وقعدت واقفه عليه..
زهور شبحت لمنى بعدين قالت:طلعي المكسرات من الدولاب  وارحيهم منى..
منى:باهي...ومشت ادير اللي قالتها عليه زهور..
ورتيل قعدت ع روسهم..بعد سخن الكاكاو صبت منه وقعمزت شرباته في الكوجينه...
هدا كله بش ماتعطيش فرصه لزهور منى يهدرزوا عليهم....
وهما الزوز طول الوقت ساكتات الا من بعض الكلمات المحدود...هاتي..خودي..جيبي..صبي...
لين وتوا صفرة السحلب وطلعوا بيها وهي معاهم من الكوجينه..
🍀🍀🍀🍀🍀
"اني طالع"..
هدا عدنان بعد ماجهز نفسه بش يطلع من المستشفى ويوجه فهالكلام لزملائه..
رد عليه واحد فيهم:هي شويه ولاحقينك..
طلع عدنان وكان ناوي يمشي يسأل عن حالة صحابه ويشوفهم كان سمحوله..
وهو ماشي شاف مريم وقفها وسألها..
عدنان:لوسمحتي اختي نبي نسألك ..
مريم وهي تشوفله بإنبهار:تفضل..
عدنان:بنسال ع الضباط اللي خشوا العمليات اليوم وينهم توا..
مريم ابتسمت وقالت:فوق في العنايه..
عدنان:تمام..شكرا..
ومشي...
مريم شبحت القدام ومشت وهي تقول بهمس:ماشاء الله..
••وصل عدنان في الدروج وركب..
وهو راكب جت لينا نازله..
وقفت شويه وهي تشوفله.
هو نزل عيونه وركب وع وجهه مرسومه ابتسامه لينا يدوب شافتها..
بعد نزلت مشت طول..
واما هو وقف شبحلها من فوق وع وجهه نفس الابتسامه...
بعدين كمل ركوب..
🌺اما لينا وهي ماشيه قعدت تقول لروحها..
"ليش يصير منين نشوفه؟! حتى هو ماشاء الله الله اكبر كيف الغزال" غمضت عيونها بشده بعدين فتحتهم وقالت..
لينا:استغفر الله العظيم..استغفر الله ياربي..
ساوت بالطوها وكملت طريقها ماشيه..لمحت وحده واقفه لابسه خمار تشبحلها..
مااهتمتلهاش..
لعند ماخطمت حداها شدتها من ذراعها..
لينا انخلعت وشبحتلها..
"فرخة لينا ماعرفتيني"
لينا وهي حاطه يدها ع قلبها:من ؟!
قامت المراة خمارها وهي تضحك..
لينا بدهشه:هناء..
نزلت هناء اخت لينا خمارها وقالت بضحكه:اها هناء يامضروبه ع راسك..
وسلمت عليها بالخد..
لينا بضحكه:من امتى تلبسي في خمار انتي؟
هناء:سي السيد حكم الله غالب..
لينا:وباهي كيف تبيني نعرفك وانتي لابستيه قالولك عيوني عيون ذئاب!
هناء بضحكه:لا عيون غزله..
ضحكت لينا وبعدت عنها وهي تقول:خيرك جايه ان شاء الله خير..
هناء:جايه نروح بيك ..
لينا بخوف:خيره باتي!
هناء بضحكه:ماخيره شي يامرعوشه غير في واحد يعرفه عزمه ع عشا فرح وقال لشعبان وحني جايين ندهموا عليك ونروحوا بيك..
لينا:بس مازال شوي بترجوا..
هناء؛لا والله مافيها كيف خودي اذن ولادبري..
تنهدت لينا وقالت:باهي..
سمعوا صوت هدرزة شباب..
شبحت اختها يمينها لقتهم زوز لابسين عسكري..
هناء:جابوهلكم جرحى الاشتباكات!
لينا شبحتلهم وقالت:اها...
شافت عدنان جاي من بعيد طول غيرت عيونها..
هناء شبحتلها وقالت؛هي عدي كلميهم وهيا شعبان يراجي..
لينا وهي مرتبكه بعض شيء:حاضر..
ومشت بسرعه وعيونها القدام وماتبيش تشبح جيهتهم..
لين فاتت من حداهم..ولما حست روحها بتقرب من عدنان نزلت عيونها...
وعدنان يسرقلها في النظر..
لما وصلت في اخر الممر سمعت واحد ينادي
"عدنان"..
وقفت والتفتت شافتهم يوجهوله هو في النداء..
ارتسمت ع وجهها ابتسامة بإستغراب..
بعدين مشت بسرعه وهي تضحك بإستغراب وتقول في نفسها..
"زعمه صدفة ولامقصودة؟! "..
تلاشت ضحكتها وهي تقول..
"شن نفترش نا!! استغفر الله لارسمي اليوم عقلي خاف"..
وتماسكت وكلمت طريقها....
🍀🍀🍀🍀🍀
"وباهي لعند امتى بيقعد غادي"
وجيهة بضيق:والله ماني عارفه..شهور ولاسنين..
رنده:لاوين سنين نهاري..
عفاف:هكي خدمتهم والله اعلم امتى ينقلوه..
ع خشة نوريه ومازالت ملامح البكاء في وجهها..
رنده:تعالي نويرة حداي..
مشت قعمزت جنب رنده..
ناضت زهور بتمدلها طاسه سحلب وين وصلت فيها.
ربعت نوريه ايديها وردت بجفاف:مانبيش..
زهور:غير خودي والله يهبل..
رنده؛خلاص رديها للصفرة...
نوريه:ع شن كنتوا تهدرزوا..
زهور مشت ردت الطاسه وولت لمكانها..
ومنى تشبحلها وتقول في نفسها"تستاهلي"
وجيهة؛ع خوك عدنان وقعادها في الجنوب..
نوريه:تعرفي يام لو زوجتوه راهو ماصارش هكي..
وجيهه:على عينك يابنتي ع قد مادرت فيه شي مسكر راسه..
منى:تخافي ياعمتي يديرلكم زي ولد حماة اختي..
شبحولها..
ووجيهه قالت:شن دار..
منى وهي تقرمش في المكسرات:حتى هو بعتوه للجنوب روحلهم بوحده من غادي..
شهقوا البنات..
ووجيهة قالت بإزدراء؛هدا ماناقص..
نوريه:ووك عليا لو يديرها ننجلط..
منى:والله زي مانحكيلكم تحكي عليها اختي هو ابيض يللش وهي صباغ ستين..
رنده:هدا واحد متروشق ووخي عاقل مايديرش هكي..
زبيده:ايه عدنان بعقله مايديرهاش..
منى:والله ماتندري ياحناي ياما منهم داروه..
رتيل ضحكت وقالت:تخيلوا فوقكم انتم تجينا كنه عبده..
ضحكوا خواتها ..
وهما الزوز شبحوا لرتيل..
وجيهه:لا والله ولدي مايديرها اقسم بالله كان دارها ثديي اللي رضعته منه نقصه..
نوريه؛حتى اني يام خديتها جديات مستحيل تصير...
رنده:ولو...حني لازم نديروله حل ع الأقل في حكايه قعاده غادي...شن رايكم نخطبوله..
نوريه شبحتلها بعقدة حواجب وهي تقول؛عندك وحده؟
رنده شبحت لزهور بطرف عينها وقالت؛تقريبا...
فجأة اذن المغرب..
وجيهه:صدق الحق وزهق الباطل..
رنده:نوض نصلي بعدين نكملكم...
نوريه ناضت وهي تقول؛شن مش دايرين عشي!..
ع خشت شريف ولد نوريه..
وقف في الباب وهو يقول:قاللكم جدي جايين سبعه انفار للعشي ..
ناضت وجيهه وهي تكلم في كناينها:هي نوضوا نوضوا شن تراجو..
ناضوا الزوز...
زهور قامت السفرة وطلعوا الزوز من الدار ووراهم عزوزتهم..
اما الحموات اللي هادي بدت توتي في روحها في الصلاة...
🍀🍀🍀🍀🍀
في الطريق..
"في قتلى؟"
لينا؛لالا الحمد لله جرحى بس وكلهم حالتهم كويسه..
شعبان:ربي يكون في عونهم مساكين مسيبين هلهم وناسهم وحواشينهم بيش يموتوا هنى..
هناء:حتى هي بلادهم ياشعبان وهدي وظيفتهم لابجميل ولامنه..
شعبان:اها لكن حني الاولى بحاجه كيف هدي عندنا شباب يخبطوا الحيط يهدوه وقاعدين مرقدين ومخليين مسؤولية حمايتنا على غيرنا..
لينا؛كان في عندنا امكانيات هنى راهو مافي حد قصر ياشعبان لكن الجنوب منسي بالمرة ماحد معبره سنين الاخيره بس زعميتهم التفتولنا..
هناء:مسبلين بالبعد..
لينا؛عليك سبله...مانقول غير ربي يبعتلنا من يتقيه فينا بس ويكون وطني قلبه على بلاد كلها مش ناس دون ناس..
شعبان؛وربي يعطينا حتى حني قلوب حيه ونحسوا ببلادنا مش غير المسؤولين..
هناء؛في هدي صدقت..
شعبان؛هدي بس!
ضحكوا هناء ولينا...
••وصلهم شعبان لحوش العيله وتسقد..
وين خشوا لقوا اختهم امال في الحوش بصغارها..
لينا بضحكه:عليك ليله سمحه..
امال وهي تسلم عليها:شخبارك يابنت..
لينا؛تمام...خل نعدي نبدل دبشي ونصلي ونجيك..مستاحشاتك دنيا دنيا.."هلبه"
ومشت تجري لدارها..
امال:شن هنو لبستي خمار..
هناء تنهدت وقالت:حكمه وحكم هله..
امال:اااخ وخلاص هو في راجل هله مش خاشين في حياته وحياة مراته..
الحازة:في ياحنه في..خوتك..
شبحولها الزوز وقالت أمال..
امال؛خيرك يمي..
تنهدت الحازة وهي تهز في راسها بحسرة وبناتها يشبحولها..
••وفوق في حوش الكنه..
اللي كانت ادور في حوشها وهي تفكر وتقول لروحها..
"اكيد توا بيديروا عشي قنين...افف واني شن بناكل"
ع طلعة عبد الله من الحمام..
شافها ادور هكي قاللها:شنو وردة ليش ادوري هكي مريضه في حاجه توجع  فيك؟
وردة؛لا عبودي لكن خاطري في تطييب خواتك جايني الوحم ع ماكلتهم هما وامك..
عبدالله بضيق؛كيف يعني تبي تنزلي بعد المشكله اللي صارت بدري!؟.
ورده:لا..لكن نبيك انت تنزل تجيبلي مايردوكش خواتك..
عبدالله قعد ساكت وهو يفكر..
ورده؛ع خاطري عبودي الوحم بيقتلني..
عبدالله؛باهي هما مايعرفوا انك حامل مش انتي قتي دسها؟
وردة:ايه..انت قوللهم انت تبي ترفع منه لسلومه اي شي تصرف عبودي..
تنهد وقال؛باهي حاضر نصلي وننزل..
ورده ضحكت وهي تقول:سلمه ياربي...
...........
"الحقيرة"
الحازة:الحقير خوك مش هي..
هناء؛خزي والله كلا خوتي هادوم حرام ينقال عليهم تريس..
امال:دلاديل لنسوانهم العقارب...
هناء؛وهن شايفات رواحهن علينا وعليهم..ااخ بس كان نعرف من يشكن بناتنا اللي عدوا خدوهلي من الغرب والشرق تلاقى السم مع بعضه..
الحازه:ماتقولي هكي يابنتي الكي والباهي في كل مكان غير خوتك ماطاحو كان في الكي..
امال:من بختنا الاسود..
الحازةتنهدت وقالت:الله غالب..هي صبن صلن وخشن وتن عشاكن..
🍀🍀🍀🍀🍀
وجيهة:هيا بسرعه خفوا ارواحكم..
زهور:حاضر الللاي..
ع خشة نوريه وهي تقول:شن بديروا يام..
وجيهه:شربه ورز بالخلطه وجنبه طاجين وطروف كفته من الغدي..
نوريه:ساد خير بركه..غير زودوا الكميه سبعه راهم..
ومشت طلعت...وامها طلعت وراها..
التفتت منى شافتهم وهما طالعات تأكدت انهم بعدوا بعدين شبحت لزهور وقالت:قداش لينا وحني اللي نجروا ع العزايم اللي قريب كل يوم...خيرها ماريحتنا اليوم وحركت بناتها..
زهور:بناتها ضيوف ياحنه..
منى بقهر:آاه ياربي ااه امتى تفرج علينا بس..
زهور ابتسمت بتهكم وقالت:اشتغلي اشتغلي وفكينا من بلاهم..
وبدوا الزوز يوتوا في العشي وكل وحده شدت حاجه..
فاتت عشرة دقايق...
وسمعوا رنده تنادي..
"زهور"
منى؛اللفعه الصفرا تنادي..
مصمصت زهور ايديها وهي خايفه...
ومشت طلعت وهي تفكر في شن تبيها رنده..ومافيش الا موضوع واحد في راسها..
وصلت للدار وخشت وهي تقول:نعم..
رنده:ترا سكري الدار..
زهور وهي تبلع في ريقها من الخوف مشت سكرت الباب بعدين جتها وهي تقول:ان شاء الله خير..
رنده:تعالي قعمزي..
مشت زهور وقعمزت حداها..
رنده:شن حال ماليك معاش مشتيلهم..
زهور:ناويه غدوة بنمشيلهم ان شاء الله..
رنده:اممم..باهي قوليلي اختك الصغيره مكمله قرايتها..
زهور:ايه العام هدا تتخرج..
رنده:امم..باهي ماعندهاش موضوع مش متكلمين فيها..
زهور وهي مش فاهمه شي:لالا..
رنده:اممم..كويس الصراحه اختك عاجبتني وحتى امي وخواتي وبالمجمل عيلتك كلها تنحب..
زهور:تسلمي..
رنده:نبوا اختك لخوي عدنان شن رايك؟
زهور وهي متفاجئه:والله مش عارفه شن نقولك فاجئتيني..
رنده ضحكت وقالت:مش مشكله انت اعرضي الموضوع ع اختك وشوفيها شن تقول وردي عليا..
زهور:ان شاء الله..
فجاة انفتح الباب وخشت عفاف وسكرت الباب وهي تقول:زهور..
وقعمزت جنب اختها وهي تقول:قلتليلها..
رنده:امم..تشوف اختها وترد علينا..
عفاف:والله مالاقيه خير من خوي وعيلتنا ولاانتي شن رايك زوزو..
زهور ابتسمت بالسيف وهي تقول:اكيد تو نكلمها اني وان شاء الله خير..
الزوز قالوا بأصوات متقطعه:ان شاء الله..
عفاف:امم..وتو خلي هالموضوع ع جنب وتعالي للمهم..
بلعت زهور ريقها..
عفاف:مافيش حويجه زهور..
زهور وجهها ولى اصفر  وهي تقول:مازال ربي ماسخرش..
رنده:والله غريبه حكايتكم..اني من اول شهر حملت واهي سلمت في السادس وانتي لتوا مافي شي..عاينتوا؟
زهور عيونها تعبوا دموع وهي تقول:والله اني وياه كشفنا وطلع مافينا شي والدكاتره قالوا مسألة وقت..
شبحوا لبعض..بعدين عفاف قالت..
عفاف؛اسمعيني جاي..
••وبدت عفاف تكلم فيها ع حاجات خاصه ورنده كذلك..
اخترقوا خصوصياتها واحرجوها وضايقوها وتكلموا معاها في شي مايحقلهمش يدخلوا فيه..
وزهور ماقدرتش تشد دموعها..حست بالإهانه بالذات ان عفاف ورنده اصغر منها ومتجاوزين معاها كل الحدود...
وياقداش في رنده وعفاف في عائلاتنا تعطي نفسها حق بما انها حمي انها تدخل في كل شي يخص خوها ومرته...
ومش عارفه من اللي عطاهم هالحق..
وفي هلبه زي زهور مغلوبات ع امرهم مايقدروش ياخدوا موقف ولايديروا ردة فعل ..خوف من الزوج..وخوف من تفاقم المشاكل وتوصل لطريق مسدوده هي الطلاق المرفوض عند هلبه عائلات...ومع هالحاله مجبورة زهور تسمع وتبلع وتغص...
💎وفي هالوقت...
كانت منى في الكوجينه بروحها تعاني وقريب تنفجر..
منى وهي تقرض في المعدنوس بهمس تقول:كله طلع من عظامي اليوم كله..سحيقة تسحقهم كلهم..
🍀🍀🍀🍀🍀🍀
في كوجينة الحاج عبدالودود..
كانوا حبات الشوكولا متاعه يعولوا ع العشي..
وصغيرتهم تهدرز بحماس وهما يسمعولها..
لينا؛وخدت مني الباكو وعطت كل واحد فيهم طرف..
هناء:كان ع اللي ريتهم اليوم الله يبارك كل واحد اسمح من التاني..
لينا وهي تحاول تخفي ارتباكها:وشن دخلنا بسماحتهم نا نحكي ع حركة بريكه منين سوقت للشكولاطه متاعي..
امال بضحكه:باهي كملي ياشكلاطه انتي..
وهناء تضحك..
لينا:عالموهم..واحد منهم نشد كان عندي صفحة قتله بريكه ايه وعطاته اسمها..مشي قاللها لا الشكولاطه شن اسمها..
هناء:كيف؟
لينا؛اها قالي لازم يكون عندها اسم بيش تنعرف بيه..
امال:وشن بتسميها يعني..
لينا:انتن اقترحن عليا ترا..
هناء وهي تفكر:اممم..سميها...الحازة..
امال ضحكت..
لينا؛صماته فكينا منها الله يربحك...
امال بضحكه:سميها عبودي..
لينا غمضت عيونها وقالت:ييييييه..
هناء بضحكه:شكلاطه ورده..كيف شكلاطة الورد شن رايك والله بعدين عبدالله يحطك ع راسك ويقلك للعمل يوميا..
وامال تضحك..
لينا:نا الغالطه نا اللي درتكن بنادمات وسألتكن..
هناء بضحكه:ماتزعلش ياسمح خل بعدين نقعمزوا رايقين ونفكروا بهدوء..
امال:عندها الحق خل نكملوا حوسه قبل.
لينا تنهدت وقالت:باهي..
ع خشة عبد الله من الباب الخارجي وهو يقول:السلام عليكم.
تلاشت ضحكات امال وهناء وردوا عليه بجفاف..
عبدالله:عافيه يابنات..
الزوز باصوات متقطعه:الحمدلله..
حسهم من تعابير وجوههم مش تمام..
سكت شويه بعدين قال:شن عشاكم..
لينا:طباهج..
عبدالله ضحك بارتباك وقال:يموت فيها سالم كان تخلله منها ع تركينه..
امال:مادرناش واجد..
لينا:لا بالعكس واجد..باتي مش متعشي هنى..لكن ليش ماتخليه ينزل يتعشا معانا..
عبدالله حك راسه من الخلف بالمفتاح بعدين قال:امه شداته قات بيش مايقلقكنش..
لينا:يقلقنا شني هدي؟! خليه ينزل يلعب مع العويله ديما ينشد عليهم حرام..
عبدالله:معليش الليله خليه مع امه وبكرا ان شاء الله ينزل..
لينا:خلاص ع راحتكم تو ندسله قرعته وبعدين نعطيهلك..
عبدالله:تمام..تسلمي..شبح لخواته اللي كل وحده فيهم دايره روحها لاهيه بحاجه وقال..بالسلامه تو..
ومشي طلع..
هناء جت للينا قرصتها..
لينا:ااي..خيرك!
امال:لعند امتى بتقعدي دقن هكي..
لينا:دقن في عيونكن المعامله مع ربي راهي..
ومشت طلعت من حداهم..
هناء:تجلط اختك هدي..
امال تنهدت وحركت راسها يمين ويسار بأسف..
🏵🏵🏵🏵🏵
في المقر اللي قاعدين فيه الضباط..
عدنان وهو يلبس في ساعته قال:بنمشي مع القائد نطمنوا عليهم مش معطلين..
زميله:بالله كان ريت الشكلاطه هديك  سلم عليك..
عدنان خدي شرشاف سريره وحدفه  ع وجهه..
هو تلقاه وقعد يضحك وقال:كان نعرف ليش تحمق وين ندوي عليها..
عدنان:ماهو تدوي في دوة خي تحشم ياراجل اللي ماترضاشي لخواتك ماترضاشي لغيرهم..
زميله:لكن والله جديات البنيه عجبتني غير خسارة جت سمرا برغم ان سمارها هدى احلى ميزه فيها..
عقد عدنان حواجبه وقال:شن المشكله وكان جت سمرا هدا عيب! تفكيرك جاهلي..
زميله؛لا والله ياغالي ماهو تفكير هدى تفكير مجتمع بحاله..
عدنان؛بالعكس في هلبه ناس تعدوها المرحله هادي..
زميله؛وفي واجد ماتعدوهاش ونظرتهم ليها كيف ماهي واحرف..اني والله مايعجب فيه كان السمر ونبي نجوز سمرا لكن عند هل عقليتهم من العصر الحجري..
عدنان:وكان انت مقتنع وتبي مايقدر حد يوقف في وجهك واللي تبيه تفرضه فرض عليهم..
مشي للباب وهو يقول...الا رغباتي مانرضى لحد يتحكم فيها غير ربي..
وفتح الباب وطلع...
ابتسم زميله ع جنب...
🍀🍀🍀🍀🍀
"قعدت تتبكبك ودارتلي فيها جو الدموع"
عفاف:خايفه تقول لسفيان يديرلنا مشكله..
نوريه بزعل؛ويهزبكم زي ماهزبني..
رنده:خلاص نويرة حبي..والله لما يجي يرضيك تعرفيه سفيان انتي قلبه طيب فيسع يولي..
نوريه؛مانبي منه شي غير يخليني في حالي..
رنده ضحكت وقالت:تو نمشي لهديكا نتفاهم معاها ونجيكم..
ومشت طلعت من حداهم..وتوجهت للكوجينه..
وصلت فيها حطت يدها في نصها وقالت:زهور ترا شويه..
زهور سيبت اللي فيدها وجتها..
خدتها رنده من يدها وبعدوا...
وقفوا في نص الممر وهي تقول:الموضوع اللي بكري دوينا فيه خليه بيناتنا مافيش داعي اديرله فبركه وتعاوديه لسفيان..
زهور تنهدت وهي تقول:مش حنقوله بش مانضايقاش..
رنده:ايوه شاطره خليك هكي..بري كملي شغلك..
ومشت من حداها...
زهور شبحتلها بحقد من فوق لتحت بعدين مشت ولت للكوجينه..
ومتى تحرك في طنجرة الشربه وتشوفلها عارفتهم في شن كلموها هدا علاش مابتش تسألها مادام هي ماتكلمتش..
🏵🏵🏵🏵
وفي الجنان..
كانت وجيهة تقطع في النعناع..
جاها سفيان وهو يقول:يام..
ردت بجفاف:امم..
سفيان:غدوة ان شاء الله بنمشي نصطاد ونجيبلكم حوت اديروا بيه غدي في جماعه لبوي جايين يتغدوا عنده بعد صلاة الجمعه..
مشت وجيهه وهي تقول:عارفه..
لحق عليها بسرعه وشدها من ذراعها وهو يقول:خيرك يام..
وجيهه:ماخيرني شي..
سفيان ابتسم برفعة حاجب وقال:حرجانه!
وجيهه شبحتله وقالت:شن رايك انت!
سفيان:ماغلطتش يام..
وجيهة:لاغلطت ونص كيف تهزب اختك هكي
قدام مرتك واطيح في قيمتها تبي تعاركها خودها ع تركينه وحاسبها برواحكم مش هكي..
تنهد وقال؛عندك حق اني اسف..
وجيهة:اسف هادي قولها لأختك مش ليا اني..
سفيان:نقوللها عينها..هدا اللي ناقص..
وجيهه جبدت ذراعها وقالت:مالا فوتني..
ومشت..
سفيان شدت ضحكته وقال:ان شاء الله غدوة نطيح في البحر ونغرق وتفتكي مني..
وقفت والتفتت وهي تقول:اعوذ بالله منك..
سفيان قعد يضحك وهو يقول؛والله ماعرفت يام تبيهالي ولالا..
وجيهه وهي متنرفزة:ان شاء الله في اللي يكرهوك يامتخلف..
ومشت وخلاته..
وسفيان يقول بضحكه:ياوالله عليك امي وخلاص..
🍀🍀🍀🍀🍀
في المستشفى..
بعد مازار عدنان برفقة القائد متاعه زملائه ..
خلا القائد يطلع وهو قعد يدور ع حد لين لقاه...
عدنان ابتسم وقال:ابله بريكه..
بريكه اللي كانت طالعه بتروح ابتسمت لما شافاته وقفت وقال:اهلا ولدي شنو حال صحتك توا؟
عدنان:الحمد لله..
بريكه؛صحابك امورهم طيبه..
عدنان:ايه اللهم لك الحمد..بارك الله فيك..غير وقفت نبي نقولك حاجه..
بريكه:تفضل..
عدنان:هي امانه وبنحملهالك ونبيك توصليها
بريكه ابتسمت بإستغراب وقالت؛اللي هي؟
عدنان:اا..الاخت اللي بكري كانت معاك اللي تبيع الشكلاطه..
بريكه؛لينا..
ضحك عدنان وقال؛ايه..ضحك تاني بعدين قال..قعد في راسي موضوع الاسم الحق مش عارف علاش..المهم لقتيلها اسم ان شاء الله يعجبها..
بريكه بضحكه:اللي هو..
عدنان وهو مبتسم بإحراج؛اسم مشتق من اسمها مع اللي تصنع فيه..شكولاته لينا...نختصروا اسم شكولاته ل شكو وبعده اسمها..يولي...شكولينا..
رفعت بريكه حواجبها بإعجاب وقالت:والله سمح شكولينا..
عدنان ضحك وقال؛عجبك معناها..
بريكه قالت:اها عجبني يا...اسمك..
عدنان ابتسم وقال:عدنان..
ابتسمت بريكه بعدين:عدنان..ربي يحفظك ولدي وحاضر تو نوصلها امانتك..
عدنان:مشكورة جدا..تصبحي ع خير...السلام عليكم.
ولف ومشي بسرعه..
وبريكه تشوفله وهي تقوله؛عدنان...شكولينا...ضحكت بعدين قالت...عدنان...لينا...
وقعدت تضحك وهي ماشيه تغني بصوت منخفض:عدنان ولينا..
لين وصلت سيارة ولدها وركبت..وتحركوا...
🍀🍀🍀🍀🍀
وفي حوش الحاج الشريف..
بعد تعشوا الكل العيله بمعازيم الحاج ..
سفيان كان يبي يرقد لان عنده نوضة بكري الصبح وبعت حد ينادي زهور..
شويه جاته عفاف وقالت:الكوجينه مقلوبه...
سفيان؛من غيرها اربعه..
عفاف:غير خليها تكمل بعدين تركب..
سفيان:اني قلت تركب توا يعني توا..
عفاف تنهدت وقالت:باهي..
ومشت طول...
شويه جت زهور ..
زهور:كان خليتني نكمل معاهم الحوسه..
سفيان:تي هيا سقديني اطلعي..ومشي..
زهور لبست في رجليها وطلعت وراه بسرعه...
••حدا الكوجينه..
رنده؛شيطت عمتك زهيرة ولا..
عفاف:ماصدقت..
رنده؛ماخاطريش نغسل اماعين..
عفاف:ولااني..
ومشت ورنده لحقتها..
ومنى تحوس بروحها في الكوجينه وهي تغلي:خلوني بروحي حاصله في هالهم..
وقفت وحطت ايديها في نصها وقعدت تتفرج ع اكوام الماعين بعدين قالت...باهي..
والله لما نرعشهم هما وولدهم البارد اللي مايحس..
طبست قامت وحده من السفر وحطتها ع الرخامه وهي تقول:واحد تنين تلاته..
وطيحت السفره وطاحت جنبها دايرة روحها اغمى عليها

يتبع …
الفصول الاربعة