#شكولينا
#الجزء_السابع_والخمسين1
#الجمان_الفريد
🍁انتم مع الاجزاء الاخيره من رواية #شكولينا 🍁
كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
طلع من المحكمه وطلع تليفونه اللي كان حاطه ع الوضع الصامت..
لقي مكالمتين من زميلته..
بلهفه وقلق اتصل بيها طول..
انس:السلام عليكم..
بصوت فيه نبرة حزن..
"وعليكم السلام"
عقد انس حواجبه بقلق وقال:إن شاء الله خير صوت مش مريح..
تنهدت بضيق وقالت..
"هي ربحت الحضانه لكن مع الأسف طليقها طلع طالع بالبنت برا البلاد"
غمض عيونه بغضب..
"مسكينه روح خوها وبلغها انهارت طول ورفعوها للمستشفى"
فتح عيونها بفجعه وقال:كيف!!!؟
"ماتحمتلش مسكينه توا كيف سكرت من اختها"
انس وقلبه موجوع ع الآخر:اما مستشفى؟!
"والله مانعرف"
هز راسه وقال:مشكورة استاذه مشكورة..وسكر منها ودور ع رقم سفيان واتصل بيه...
🍁🍁🍁🍁🍁
في المستشفى اللي يخدم فيها مروان.
كانوا موجودين سفيان ومروان ونوريه وبوهم اللي كان مقعمز في وحده من الحجرات يقيسوله في الضغط قلبه انفطر من الوجع ع بنته..
ونوريه مقعمزة ع الكراسي وتبكي بصمت.
وسفيان يمشي ويجي في الممر..
ومروان مع اخته في الحجره..
رن تليفون سفيان...
قامه وشاف المتصل تنهد بعدين فتح الخط ورد..
سفيان:ايوه..
"خوي سفيان كيف الحال"
سفيان:شن بنقولك حال لايسر عدو ولاحبيب والحمد لله..
"شن في ان شاء الله خير !!؟:
سفيان:الشيطان هداكا حاشى اسمه هرب بالبنت برا البلاد...
"شكله كان يحساب الامر محسوم الحكم حيكون لصالحه"
سفيان:والحكم كان لصالح رنده وبعد ماخبرناها وفرحت عرفت بقصة سفره وقلنالها وهي ماتحملتش....اللي نزل بيها لو نزل ع جبل يهده...
"شن صار فيها"
سفيان:انهيار عصبي..
"في اما مستشفى ؟"
سفيان استغرب سؤاله وجاوبه:مستشفى الرازي...
"تمام..السلام عليكم"
سكر سفيان وشاف مروان طالع..ناضت نوريه ومشوله هي وسفيان..
وصلوا فيه وسألاته نوريه...
نوريه:هاه نقدروا نخشوا عليها؟
مروان بضيق:لا خلوها تقعد راقده..بوي شن صار فيه..
سفيان؛راقد في الحجره اللي في اخر الممر ضغطه راقي..
مراون بقهر؛اااه..لولا القضيه اللي كنتوا رافعينها راهو ملحته بطريحه رقده في مكانها الحلوف هدا..
سفيان قعد يشبح في الفراغ ويفكر في كلام خوه وتمنى لو دار لمحمد اللازم من لما سمع بيه جاي اللي زيه ماينفعش معاه الا هالنوع من المعامله...ونادم انه ماتعاملش معاه بيها من البدايه..اهو يشفي غليله...
بعد عنهم ومشي اتصل بلينا يطمن ع الوضع في الحوش..
🍁🍁🍁
في الجنان..
لينا:مافي شي يبكوا وخلاص..عمي شن وضعه..
"راقد حتى هو ضغطه رقي "
لينا تنهدت وقال؛لاحول ولاقوة الابالله..الله ينتقم من اللي كلن السبب..
"آمين..المهم لينا اي حاجه تصير كلميني طول..:"
لينا؛تمام..
"كولي لينا ماتهمليش روحك ارجوك"
لينا:تغديت حبيبي ماتخافش..
"والله ماني مسامحك يالينا كان ماكلتيش"
لينا:والله كليت ياسفيان..وانت..
"كليت..هي سلام.."وسكر..
لينا نزلت التليفون وقال؛عارفاته ماحط في فمه حاجه...
ع طلعة ياسمين وهي تقول:ماما..ميا..
قدمتلها لينا شدتها من يدها وقالت:تعالي ماما..
وخشت هي وياها داخل...
قعمزت بنتها ع الكرسي ومشت بتجيبلها ماتاكل وتسمع في عزوزتها تتكلم بوجع ع بنتها..
••في دار التقعميز...
وجيهه ببكي:شن هالبخت الأسود شن اللي جاها هالبنت شن اللي ترالها...كله من عياط الناس عليها كله من عيون ناس ماترحم حد مايخلوا حد في حاله..
عفاف بدموع:كان تسلم امرها لله وتسأله يعوضها خير في بنتها وخلاص الله غالب هدا اللي مقدر عليها..
وجيهه:وتعيش عمرها كله بقلب محروق وكبد مسحونه..
عفاف:الله غالب يام هدا قدرها..
وجيهه:حسبي الله ونعم الوكيل حسبي الله...جعنك تلقاه يامحمد ياولد فجره جعنك تلقاه وتتلقاه وماتعيش يوم مرتاح ولاتتهنى..احرق قلبك واسحن كبدك احرق دمك وكبر همك ياالله ياربي..
عفاف ببكي:آمين يارب العالمين..
🍁🍁🍁🍁
خش الممر وهو يمشي بسرعه بخوف ولهفه لين بان عليه سفيان..
حاول يتمالك نفسه بش مايبان عليه شي.
وقف ع سفيان وقال:السلام عليكم..
سفيان؛وعليكم السلام..
انس:لاباس عليها شن حالها؟
سفيان؛ انهيار عصبي...عطوها منوم وتوا راقده..
انس حط ايديه في نصه وقال بغيظ:الحقير..
سفيان وهو يشبح في الفراغ:من البدايه كنت متوقع يصير شي قلبي ماارتاحش بكل ماقدرتش نتفائل..
انس؛راهو هو ماكانش حاسب شي سافر وهو حاط في باله ان الحكم حيكون لصالحه..هو ممكن حسب حساب ردة فعلكم...
سفيان قعد يشبحله وهو يفكر بعدين قال؛ااخ لو خليتوني درت اللي فبالي من البدايه..
انس هز راسه وقال:ايه وبعدين يعدموك ع خاطر واحد زي هدا..
ع جية مروان قال؛السلام عليكم..
انس:وعليكم السلام..ان شاء الله لاباس عليها..
مروان تنهد بضيق وقال:لايوريك باس..ياريتها من الاول لارفعت قضيه ولاتعب روحها ماحصلت منها شي غير رقدتها في المستشفى...
انس:من حقها طالب بحضانة بنتها وترد اعتبارها..
مروان؛باهي وطالبت شن حصلت..
انس:برئت نفسها من افترائاته ع الأقل..
مروان:يللا..يعوضها ربي خير في بنتها خلاص توا مفروض تنساها..
سفيان:الكلام ساهل..
مروان؛هدا الصح ياسفيان ماعندها ولاعندنا مانديروا اكثر من هكي شن في ايدينا حني..
سفيان؛كان نعرف وين سافر والله نمشي ناخدها منه..
انس:الموضوع مش ساهل بكل...عندك علم في سفرته الاولى ماكانش في الكويت..نزل في اكثر من دوله بعدين استقر في اليونان لكن ماقعدش فيها طلع عن طريق لوحده من الدول الحدوديه..
مروان:هدا تفكيره اجرامي بحت..
سفيان حرك يده حركه دائريه جنب راسه وقال؛هدا مش مزبوط..نزل يده وقال..مش عارف بنته كيف دايرة معاه..
انس:متعلقه بيه لأبعد حد..
مروان:شكلك متحري عنه كويس..
انس:اكيد..
سفيان:انس خدم حط جهده كله في قضيه رندة..
انس تنهد وقال:وياريت قدرت نديرلها شي..
مروان وسفيان قعدوا يشبحولها بنظرات شك..
ونوريه من بعيد تشبحله وهي مقعمزة..
بس بعدين شافت بوها وهو جاي ناضتله طول..
نوريه:بوي..
خوتها وانس التفتوا شافوه..
نوريه وصلت فيه وشداته وقالت:هاه شن حالك توا..
الشريف::كويس كويس..بنتي شن حالها؟
مروان؛كويسه راقده توا..
انس:لاباس ياعمي الشريف..
الشريف شبحله بشي من الاستغراب وقال:لايوريك بس.
نظرة الشريف اربكت انس وخلاته يقول بعد ماحط كفوفه ع بعض بإرتباك وقال؛هي مالا لاباس عليها نستأذن..
سفيان:اذنك معاك..
انس:تبوا اي حاجه اني موجود كلموني بس..
نوريه قعدت مركزة عليه..
سفيان والشريف قالوا بأصوات متقطعه:بارك الله فيك..تسلم..
انس:السلام عليكم..ولف ومشي...
وهما يشبحوله..
الشريف:علاش جاي..
سفيان:يطمن..
شبح الشريف لسفيان بعدين شبح القدام ومشي قعمز ع واحد من الكراسي ولحقاته نوريه..وبعدين ولاده..
سفيان:كان تروح يابوي خيرلك..
الشريف:مش مروح لين تفيق..
مروان؛تعب عليك يابوي وانت مش واكل شي..
الشريف:مانبي شي خلوني في حالي توا..
سفيان جي بيتكلم شد مروان من مرفقه سكت..
بعدين خداه وبعدوا ومروان يقول:مش باهي ليه الانفعال..خليه ع راحته واني تو نمشي نجيبله ماياكل..
سفيان تنهد وهز راسه وقعد ساكت..
مروان طلقه ومشي..وسفيان مشي يدير في اتصال يخص الخدمه..
ونوريه قعدت حدا بوها تهدي فيه..
🍁وقعدت رندن راقده لبعد المغرب..
فاقت وهي تمسح في همسات نوريه بالذكر..
كانت نوريه تصلي حداها في الغرفه..
هي مررت نظرها ع الغرفه لين جو عيونها عليها..
نزلوا دموعها وقالت بصوت يدوب طالع:نوريه..
ماسمعتهاش...
رنده عاودت نادتها:نوريه..
نوريه سمعت حس التفتلها لقتها فايقه تشوفلها ناضتلها طول.
نوريه:رنده حبيبتي..
رنده:شن صار..
نوريه:شي..تعبتي شويه..وخدت يدها وشدتها..
رنده شبحت للسقف وقعدت ساكته ودموعها ينزلوا...
نوريه:جعانه ولاعطشانه حبيبتي..
رنده بصوت مخنوق:مقهورة..
نوريه وعيونها غارقات بالدموع:الله يقهره اللي قهرك..
رنده :خلاص بنتي راحت مني..
نوريه قعدت تشبحلها وهي تكتم في بكاها..
رنده:نوريه..
نوريه:نعم حبيبتي..
رنده:ميه..عطشانه..
نوريه:هي شويه بس..فتحت شيشة ميه وجتها بيها..
رنده:نبي نقعمز..
نوريه:باهي شويه هي..
وساعدتها قعمزت...
بعدين فتحت شيشة الميه وساعدتها تشرب..
بعد ماشربتها قالت:جعانه..
رنده حركت راسها بالنفي..
نوريه مشت خدت كرسي وقعمزت...
ورنده سرحانه وتفكر بعدين قالت:شكله ربي يبي يعاقبني ببنتي..
نوريه:يعاقبك ع شنو شن دايره!!؟
رنده بعد سمعت سؤال نوريه جي قدام عيونها مشهد نساته وتوا رجعلها اواذكراته..
🔺️قبل اكثر من عام...
طلعت برا وهي تشوف فيهم كيف منزلين زهور من فوق وهي تعيط وتبكي وتقول:عيلي راح راح عيلي..
لينا:افتح الباب ياعدنان.
عدنان بتوتر:هيا هي..وفتح الباب...
ولما جو بيركبوها شبحت لرنده اللي لقتها واقفه في الباب تشبحلها بكبر مصطنع ومن داخلها خايفه.
زهور بعياط؛جعنك تلقيه يارنده..جعنك تلقيه وتتلقيه ياربي..
وركبوها للسيارة...
رنده؛شن درتلك اني ياتافهه مادرتلك شي ربي مايبيكش تجيبي صغار مش اني...
لينا شبحت لرنده بكره...
رنده:ريتوا كيف تشبحلي هادي ماناقص كان انتي..
عدنان بغضب:رنده..
رنده:فنص في مرتك ماتفنصش فيا اني..
عدنان:لولا الحاله اللي حني فيها وريتك..وركب السيارة..
ولينا ركبت معاه..
رنده:خليك ماشي وراها خليك لين تبيعنا ع خاطرها..
وجيهه:خشي داخل وسكري فمك نوريه دخلي اختك..
رنده:مش خاشه.
ربيعه:من بكري نسمع وساكته خشي داخل تحركي خشي..
وجتها دفتها ودخلتها داخل ونوريه ورتيل وعفاف خشوا وراها..
ووجيهه ركبت جنب زهور...
وطلع عدنان من الحوش..
🔺️في الوقت الحاضر..
رنده ببكي:دموع زهور...عياط زهور..قهرة زهور..
نوريه:شن درتيلها زهور انتي مادرتيلها شي..انتي واجعك خوك لاكان مرتاح ولامتهني وحتى ذريه ماعنده فكرتي في مصلحته وبس..
رنده؛ماتكابريش ع غلط يانوريه اني ياما كابرت ع الغلط وكنت نقول في نفس الكلام..واهو الكلام بيني وبينك وماقلته لحد قبل..اللي صار فيا توا عقاب..ربي عاقبني ع اللي درته..قهرني اضعاف ماقهرتها..زي ماحرمتها من عيلها للابد حرمني من بنتي..تعرفي يانوريه..كبر محمد وطغيانه ذكرني بنفسي اني كنت هكي..كنت ندير مانبي ومقتنعه ان الحق معاي نبرر لروحي ونقتنع بمبرراتي لين بديت نشوف في روحي ع حق في كل شي نديره..لعند مادرت بيا درته وذقت من اللي ذوقته لغيري ووقتها بس عرفت اني شن كنت ندير..
نوريه:لالا انتي محمله نفسك ذنب انتي مادرتيشي..لاقتلتي لاكليتي حق حد..وبعدين زهور اللي تحكي عنها بري شوفيها كيف عايشه عيشه اني وياك مانحلموش بيها..انتي درتي فيها خير وفي سفيان خير هوينا متزوج وعايش متهني ويراجي في عيل..من اللي صاير فيه حاجه غيرنا حني كلهم عايشين متهنيين ومرتاحين ويبرطعوا..حني بس اللي حظوظنا مايله وسعودنا طايحه والناس فاتحه عيونها علينا مش مخليتنا في حالنا حني مادرنا لحد شي طول في عمرنا في حالنا كافيين خيرنا شرنا..لكن اللي يقربنا ياكل ع راسه..
رنده قعدت تشبح لنوريه بخوف..
خافت عليها من حالة المكابرة اللي عايشه فيها...خافت لو يصير فيها ماصارلها...
🍁واللي زي نوريه في حياتنا هلبه لايمكن يركبوا رواحهم الحق وان اعترفوا بخطئهم لازم يكونوا في موقف قوة وكل شي جاي معاهم..في ناس هكي تموت ولاتشوف نفسها غالطه اوظالمه🍁
🍁🍁🍁🍁
تاني يوم الصبح..
جي حسين روح بنوريه..وسفيان جاب رتيل تقعد مع رنده...
لكن ماقدرش يخش عليها لأنه ماكانش وقت زياره.
••رتيل:هدا مصحفك...وهادي مصليتك..
رنده خدت المصحف وفتحاته وبدت تقرا..
ورتيل قعمزت وقعدت تتفرج عليها..
رنده وهي تقرا دموعها نزلوا غصبا عنها...وبدت تبكي بصمت..
ورتيل تشبحلها بحزن والدموع في عيونها...
..برا...
"مشكور جدا همام جميلك في رقبتي"
ابتسم وقال:برا خش اني ندور هني...
انس بإبتسامه:اصلي ياصاحبي..
ومشي للغرفه وقف في الباب وقال:شوفي شن خلتيني ندير يارنده...خدي نفس ودق الباب..
ناضت رتيل وفتحاته..وقفت في مكانها جامده من الصدمه.
انس بإبتسامه ارتباك:السلام عليكم..نبي نشوفها شويه بس..
رتيل التفتت لرنده لقتها تقرا ومش مركزة.:رنده..
سكرت رنده المصحف وقامت راسها؛نعم..
زادت رتيل فتحت الباب وقالت؛خش..
ورنده تشوف للباب...
هو خش وكان في قمة الارتباك حاس روحه يدير في تصرف غير سوي ومتهور بس ماقدرش يمنع نفسه..يبي يطمن عليها يبي يحسسها انه معاها في شده طيح فيها ومستحيل يتخلى عنها..
هي لما شافته انصدمت..سكرت المصحف وحطاته ع الكامدينو وقالت؛شن دير هني..
خش وسكر الباب وقال:جيت نشوفك..
ورتيل تشبحله..
رنده بصدمه؛اني شن قتلك اخر مرة وبعدين تصرف زي هدا مايطلعش من واحد بعقله...
رتيل فنصت فيها.
انس:عندك حق.. اللي صار فيك ماخلاش فيا عقل..
ابتسمت رتيل..
ورنده قلبها بدي يدق بقوة وهي تشبحله بصدمه..
هو حط كفوفه ع بعض بشكل عمودي بعدين بلع ريقه وقال:اسف..بس مش بيدي اقسم بالله امس الليل كله ماقدرت نرقد لحظه من كثر مامشغول عليك..
رنده؛انت بتسببلي مشاكل واني مش ناقصه اللي فيا سادني..
رتيل:رنده..
رنده:لارنده لاغيرها..اني مش عارفه اذا كان شايف الوضع اللي اني فيه ولا مش شايفه هو اكثر حد وشوفي شن يدير...تصرفك مالاش الا معنى واحد انت تبي توصل لحاجه عن طريقي اني تبي تفوت الوقت وخلاص سمعت عنهم المحاميين اللي زيك..
هو قعد يشبحلها بصدمه وقال:انتي هادي نظرتك ليا!!؟
رنده بحده؛وهدا علاش غيرتك..
هز راسه وقال:تمام..لاباس عليك واسف مرة تانيه..
ومشي فتح الباب وطلع..
سكرت وراه رتيل الباب وقالت:شن الكلام اللي قلتيه هدا!!؟
رنده؛عجباتك الحركه اللي دارها!؟ وانتي تعرفي ان هادي المستشفى اللي يخدم فيها خوك وكل اللي هني يعرفونا يعني لما يشوفوه خاش شن يقولوا؟
رتيل:كلامك صح..بس هو مسكين كان خايف عليك باينه في عيونه..
رندة:كان خايف عليا حق يخاف ع سمعتي عارفني ناقصه كلام الناس!؟
رتيل:رنده الراجل يحبك..
رنده ودموعها في عيونها:وكيف عرفتي انه يحبني ع خاطر دار حركه زي هادي!؟ غير دار اكثر من هكي وشفتي شن كانت النتيجه..
رتيل؛صوابع ايديك مش زي بعض...
رنده:لازي بعض غير في اللي طويل وفي اللي قصير..
رتيل تنهدت بضيق وسكتت..
شويه دق الباب وخشت الممرضه..
:هاه شن حالك ابله رنده اليوم؟
رنده:الحمد لله...
قدمتلها وهي تقول:الحمد لله..ومدتلها علية شوكولا متوسطة الحجم كانت من #شكولينا وقالت..تفضلي..
رنده بإبتسامه؛من جابها خوي ولامرته؟
؛لالا الاستاذ اللي كان هني..
تلاشت ابتسامه رنده وقالت:حطيها غادي...
حطتها الممرضه وين مااشرتلها رنده...
ومشت طلعت...
رتيل:سخفني الحق..
رنده:بالله رتيل سكري ع الموضوع..وخدت المصحف فتحاته وولت تقرا..ع امل قلبها يهدا شويه...
🍁🍁🍁🍁
"لاتمام هكي ماتغيروا شي"
:تمام....
ومشي من حداه العامل.
وهو رجع يكلم ع الماسنجر في واحد يخدم في المطار ويستفسر منه ع الوجهه اللي سافرلها طليق اخته..
لين في النهايه عطاه المكان..
وطبعا هو هكي يخالف في قانون المطارات...اللي يمنع اي موظف يعطي معلومه عن المسافرين..
بس لأنه صديق سفيان ماقدرش يرده
سفيان:مصر...اكيد منها هي سافر لغيرها...
تنهد وهو يفكر..وقطع تفكيره صوت قال..
"السلام عليكم"
شبح للباب وناض وهو يقول:وعليكم السلام..
قدمله انس وصل فيه وتصافحوا..
انس:كيف الحال..
سفيان:الحمد لله..تفضل..
انس قعمز وهو يقول؛يزيد فضلك..
سفيان؛شن الأخبار..
انس:الحمد لله...
سفيان:توا كيف كنت نكلم في صديق ليا يخدم في المطار قال هداكا سافر لمصر..
انس:ومنها اكيد طلع لبلاد تانيه..
سفيان:اكيد...
انس تنهد وقال؛مسكينه البنت اللي قاعد يستغل فيها...
سفيان؛ان شاء الله مايضرهاش بس...الحق بديت نخاف عليها توا بس بعد عرفت حقيقه بوها..
انس:هو متعلق ببنته هلبه وهي كذلك مش حيضرها بس اني نحكي ع الحرمان اللي عيشها فيه..مستقبلا البنت اللي حتحسه هلبه..بالذات لوعرفت القصه الحقيقيه لاني متأكد انه من توا قاعد يكذب عليها..
سفيان:اكيد..
سكتوا الزوز ..
سفيان شبح لأنس لاحظ عليه التوتر...ضيق عيونه وسأله:قهوة؟
مسح انس ع لحيته ورفع حاجبه متسائل وقال:امم.؟
سفيان:قهوة قهوة تشرب قهوه..
ابتسم انس وقال:احمم..وتنهد بعدين قال..في موضوع نبي نحكي معاك فيه...
سفيان عقد حواجبه وقال:نسمع...
••••••••
حطت طاسة العصير قدامه وقعمزت حداه وهي تسمع فيه بإبتسامه..
سفيان؛صراحه مافاجئنيش..
لينا:ليش كنت ملاحظ عليه حاجه.
سفيان:اني مايفوتني شي..وبدي ياكل..
لينا بضحكه:الله يبارك..
سفيان قعد يمضغ وهو يشبحلها ع جنب..
هي ابتسمت وقربلته طرف كفته..
بلع بعدين كلي الكفته في فم واحد ونتش صبعها..
لينا وهي تفنص:يقولوا تاكل صوابعك وراه مش صوابع اللي داره..
قعد يضحك وهو ياكل لين قريب غص..
قربتله طاسه الميه..هو حرك سبابته بالنفي....
بعدين كمل وبلع وخدي طاسة العصير وقال:مش مهم شن لاحظت المهم لاحظت وخلاص..وشرب من العصير..
لينا:وانت شن قتله؟
سفيان حط الطاسه وقال:قتله الوقت مش مناسب وهي توا مااعتقدش تفكر في الموضوع هدا بكل .
لينا بضيق:صح نفسيتها ماتسمحش تفكر في شي كيف هدا توا..
تنهد سفيان بضيق وشبح للكفته خدي طرف ووقربه للينا..
هي فتحت فمها ونتشت منه..
سفيان:يارقيق ياناعم..حطيها في فم واحد من كبرها هي..
قعدت تضحك..
بعد بلعت كلت الباقي من يده..
وهو ولى يتغدا..
كملت لينا بعدين شبحتله وقالت:سفيان..
سفيان؛روحي..
لينا بإبتسامه:قبل قتلك ع العمرة وانت ولغيت ع فكرة لأنك ماتبيش تخليني بروحي..لكن توا نبي نقولك ع الحج لعمي وعمتي ورنده..
قعد يشبحلها..
لينا:عارفه حكاية الاختيار بالقرعه فاتت بش تقدروا تطلعوا ع حسابكم...اني فكرت فهالشي لاني عارفه اللي بيصير في رنده بعد تطلع من المستشفى حتخش في حالة كآبه وكله حيولي ع عمي وعمتي في النهايه مش حيتحملوا يشوفوا بنتهم فهالحاله..بس لو طلعت من المستشفى ولقت مفاجأة سمحه كيف هدي قدامها حتنشغل بيها هدى مش حاجه عاديه حيروحوا من غادي بنفسيات احسن بواجد...
سفيان هز راسه وقال:اقنعتيني...قعد يفكر وهو يقول..خلاص تو نبدا في الاجراءات من توا...
لينا؛باهي اللي طلعتولها جواز غير اللي راح..
سفيان:قولي باهي اللي عندنا حد نعرفوه في الجوازات كان هدا ماطلعش لبعد عام..
لينا بضحكه:صدقت..
سفيان:ايه حقه بنقولك..
لينا:شني؟!
سفيان رفع حاجبه اليسار وقال:نحبك..
لينا قعدت تضحك..
وهو يشبحلها بإبتسامه بعدين قال:ورب العزة التقعميزة معاك تنسي الهم وتجلي الغم..
لينا:ياعمري نا..هدى اللي نبيه..
تنهد سفيان من الأعماق وولى ياكل..
ولينا تشوفله بإبتسامه حب..
سفيان:تي كولي يامراة..
لينا:والله متغديه لين طالع من عيوني الحمد لله..تغدا انت حبيبي..
سفيان ولى ياكل ومرة مرة يوكل فيها معاه...
🍁🍁🍁🍁
الساعه 5:00عصرا..
مقعمز يهدرز ع امه ويشربوا في القهوة وحداهم صغاره يتفرجوا ع التلفزيون..
انس:ماعندي علاش نأجلها يام..نبي نكون قريب عليها من غير حدود..نبي نوقف معاها من غير ماحد يقول بصفتك شني...نبيها يام..
فاطمه:عارفه ياوليدي وفاهمه عليك..لكن المراة اللي راته مش شويه راهو اخر حاجه تفكر فيها بعد اللي صارلها الزواج..
انس:فاهم يام..لكن اني حاس..لامش حاس متأكد ان في من ناحيتها حاجه حتى هي بس العقده اللي سببهالها زواجها الاول هو اللي مخليها تسكر بابها في وجهي..
فاطمه:باهي اصبر عليها سلم وليدي شويه صبر...
انس تنهد بضيق وشبح للتلفزيون..
وامه تشرب في القهوة وهي تشوفله...
☘☘☘☘☘
ومازالت دور عجلة الأيام...
طلعت رنده من المستشفى وكانت حبيسة دارها ومكتفيه بصحبة المصحف والصلاه..
تاكل وتشرب عادي..بس رافضه تختلط بحد..
وهما خلوها ع راحتها مابوش يضغطوا عليها..
وسفيان كان يجري ع اجراءات السفر للسعوديه وكل شي تم خلال اسبوع...
••في صباح احد الأيام...
طلعت من الكوجينه بتولي للدار..
وقفها خوها وهو يقول:رنده..
هي التفتت شبحتله..
سفيان؛عندي ليك خبرين حلوين بس تانيهم احلا من اولهم..
رنده:يخصوا بنتي!؟
ابتسم سفيان بأسف وقال:لا..
رنده:مافيش شي من اللي بتقوله حيفرحني..
سفيان:نجرب حظي..اولهم انك صفيتي موادك بتقدير ممتاز..
رنده:وثانيهم؟
سفيان:وتي روحك بتسافري..
رنده:راك تقول حجزت راهو مش ماشيه..
سفيان؛ماتبيش تزوري بيت الله؟
تفاجئت وعيونها مليانات دموع..
سفيان بإبتسامه:بش نادولك حاجه رنده..
نزلوا دموعها...
سفيان:هاه تبي ولالا..
رنده:وهدا سؤال ينسأل نبي ونص..
سفيان:خلاص وتي روحك بعد غدوة ان شاء الله بتسافروا انتي وامي وبوي..
رنده من قوة شعورها بالفرح..طول ضمت خوها..
سفيان ضحك وحط يده ع راسها..
ولينا تشوفلهم من الكوجينه وهي تفرط في الفول وع وجهها ابتسامه حب..
☘وعدا يوم..
رنده فيه كانت في قمة الحماس جهزت نفسها معنويا وماديا..
وكانت تراجي في موعد السفر بالساعه والدقيقه..
وبوها وامها اكثر منها...
وجي يوم السفر...
في المطار..
وجيهه:برا ياوليدي ان شاء الله ديما رابح دنيا وآخره وربي يفتحها عليك ويباركلك في ذريتك يارب..
سفيان بضحكه:غادي الدعوات هادي غادي قدام بيت الله وعند جبل عرفه..
رنده:حندعيلك في كل وقت..
سفيان:كان تحبوني حق ادعولي اني ورفيقتي راهو الفكره فكرتها..
الشريف بإيتسامه؛المراة هادي بروحها اني معتبرها نعمه مم لما خشت الحوش وهلبه حاجات تغيرت للأحسن..
رنده:والله حق..برغم اللي صار كله جديات لينا كانت زي الرحمه منزلها ربي..
وجيهه:ايوه زيدوا زيدوا من غير شي براريمه مرخيات..
سفيان:اوماا...!
ضحكوا ...
بعدين ودعهم وقعد واقف يشوفلهم لين ادرقوا من قدام عيونه..
تنهد وقال:في وديعة الله..
🌺ومشي طلع من المطار...
بطريقه للحوش...في نص الطريق..
شاف محلات الذهب...وقف قدامهم ونزل...
ربع ساعه وطلع...بعدين كمل طريقه للحوش...
••••••••
نزل من السياره ومشي من جهة الجنان لقي مرته واقفه تحت المظله ع قفص العصافير..
مشالها وجي وراها لقاها تحطلهم في الميه وهي تقول: عارفتكم عطشانين...هي اشربوا هي....
ماباش يقاطعها لين كملت..
حط يده ع عيونه..
لينا بضحكه:ماعرفتكش الصراحه...من!!؟
سفيان بضحكه:عارفها حركه غبيه غير كان انتي سايري بس...
حول يده وهي التفتت وقالت:نبصر خيرك..
شد يدها وقال:عارفك..وطلع من جيبه انسيال ذهب ابيض وقعد يلبسلها فيه..
لينا وهي متفاجئة:شن هدى!؟
سفيان:شخشير..
لينا بضحكه:قصدي شن المناسبه!؟
لبسها وشد يدها بإيديه الزوز وقال:لو نلقى نهديك كل وقت بمناسبه ومن غيرها..
لينا بضحكه:باهي ياسيدي شكرا..
سفيان وهو يقلد فيها:باهي ياسيدي شكرا...وعقد حواجبه...بدال ماتقولي مش لازم من الهدايا حبيبي انت بروحك هديه..
لينا:لامش حنقولك بلاش من الهدايا لأني نحبهم..
قرصها من أنفها بقوه..
لينا بوجع:اي اي..خشمي قطعته..
وفجأه سكتت وفنصت..
هو حول يده وقال بخوف:خيرك تفنصي هكي!؟
لينا:هات يدك..خدت يده وحطتها ع بطنها..
هو كان عاقد حواجبه فجأه رفعهم وهو يقول بدهشه:تحرك!..
لينا هزت راسها وهي تضحك..
بدي النفس متاعه يتسارع وصدره يعلى ويهبط
قاعد يحس بحركة ولده وقلبه قريب يشق صدره من قوة النبض..
وفجأة بدي يضحك...ودموعه عبوا عيونه وطاحوا..
لينا قعدت تشبحله وع وجهها ابتسامة متأثرة ودموعها غرقوا عيونها وقالت:لهالدرجه فرحان..
سفيان غير عيونه عنها وهو يضحك ويمسح في دموعه ويقول:ماينزلوش الا قدامك الزفت..
لينا قعدت تضحك..ومدت يدها وقعدت تمسحله في دموعه..
شبحلها وقال:ولدي..
لينا:ياعمري..
هو غمض عيونه وتنهد وحط يده ع بطنها مره تانيه وهي حطت يدها ع يده...حس بالحركه من جديد فتح عيونه وقعد يضحك..وهي تضحك معاه..
هو هدا ضحك وابتسم بعدين قال:كل شي حلو جاني منك انتي...وحط يده ورا راسها وقربها ليه وطبع قبله ع جبينها..وهي مبتسمه بحب...وايديهم ع بعض تحس بحركة ولدهم اللي كانت واصلتله مشاعره بوه وامه الحلوة الدافيه...
☘☘☘☘☘
وفي مشاعر اجمل...
عاشتهم رنده بعد يومين من وصولها للسعوديه..
مشت هي وبوها وامها لزيارة مدينة رسول الله...
وهي في الباص كانت تشوف لشوارع المدينه وهي تقول في نفسها..
زعمه مشي في الطريق هادي..يابخت من شافه وعرفه وعاش أيامه في وجوده...
يابخت من تمتعت عيونه بالنظر ليه..من تمتع سمعه بسماع حسه...
يابخت من تكلم من معاه...يابخت من دعاله...
رنده بسبب التزامها بالصلاه عليه غمر قلبها حب يفوق الخيال ..
وحبه اعظم اركان الإيمان..
كان قلبها ينبض بقوة ومشاعرها فياضه لين الدموع نزلوا من عيونها...
🌸ولما خشوا للمسجد النبوي...
رنده قعدت تبكي وبكاها خلا الموجودين في المسجد مركزين عليها...
ماقدرتش تهدا من البكي من قوة المشاعر اللي تحس بيها..
بوها كان يشبحلها وهو متأثر..وامها تمسح ع ظهرها وتهدي فيها بعدين جاها بوها وضمها ومشي بيها هي وامها...
صلوا في المسجد النبوي..وكانت هادي احلا صلاة تصليها رنده في حياتها..
وهي ساجده كانت تدعي بالصلاة الابراهيميه وبس...
ودموعها مابطلوش نزول...
هنيالك رنده..انتي في جوار الرحمه الخالصه المهداة..
هو في حد يجاوره ومايسعد!؟
🌸بعد الصلاة قعمزت هي وامها يذكروا في الله...
وهي بين الذكر والصلاه ع النبي...
بس بوها مشي لقبر الرسول يزور فيه..هي غبطت بوها وتمنت لو ربي خلقها راجل بش تقدر تزور قبره وتكون قريبه عليه لحد كبير...
وياكم تمنينا العيشه معاه...في زمانه...بصحبته..
وهو تمنى يشوفنا....
ومازال في فرصة لهالامنيه تولي حقيقه واقعه في اليوم الموعود..
رنده وهي مقعمزة ومنسنده ع الحيط غلبها النوم ورقدت..
وامها حداها تسبح ع صوابعها...
وهي راقده...
شافت منام....وكأنها تمشي في مكان وهي تايهه والدنيا ليل..
ظلام دامس..
بس في ضي من بعيد طالع....
قعدت تبع فيه...وبدت تجري..
لين وصلت فيه وخشتله..
كان مكان كله نور في نور..مافيشي معالم تانيه نور وبس..
بعدين بدت تلقائيا تقرا في آية...
"عسى أن يبدلنا ربنا خيرا منها إن إلى الله راغبون"
فتحت عيونها لقت روحها تقرا في نفس الآية..
وجيهه:رنده..رنده..
وعت وشبحت لأمها..
رنده:نعم ماما؟
وجيهه:غفيتي..
رنده تنهدت ووزعت نظرها حواليها وقالت:ايه شويه..
وجيهه:هي شويه وبوك يجي ونولوا للفندق..
رنده هزت راسها وبالها مع الحلم وتفكر فيه....
☘☘☘☘
وتمر عليهم الأيام ...
وانتهى شهر ذوالقعده...وخش شهر ذوالحجه..
وبدت رنده صيام من اول يوم مع أداء شعائر الحج..
كانت يوم عن يوم تحس بروحها ولت اقوى من قبل بهلبه..
حست وكأن ربي ربط ع قلبها وقواه وبدت معاش تفكر في بنتها زي قبل..
وبوها وامها يشوفوا فيها كيف ولت وقلوبهم ارتاحت واطمنت عليها..
🍁وفي ليبيا..
كان خوها يحاول يوصل في مكان محمد بأي طريقه دخل هلبه ناس في الموضوع ولهاللحظه ماوصلش لنتيجه...
وعفاف مازال مصرة ع االطلاق وعبد الصمد قاعد يحاول يلين قلبها عليه..
يوم كل يومين ياخد بناته يطلع فيهم ومايروحوش الا بهديه لأنهم وفي وسط كل هديه كان لازم يبعت كلام حب..
عفاف كان كل مايحن قلبها شويه تقسيه وين تذكر شن دار فيها...
اما منى ولت تشوف هلبه لحياة لينا ووضعها مع راجلها وتقارن فيه بحالها..ونازله ضغط ع مروان لين بدي ينفر من الحوش وشبه معاش يروحله...
••السابع من ذي الحجه...
في الكوجينه الخارجيه..
لينا:ربي يهديك يامنى مافكرتيش انه مرات داسهن لعويلتكم ومستقبلكم...مرات يبي يبني..مرات يبي يسافر...
منى:لالا يالينا مروان عنده طبع القفاصه..
لينا:منى ماتخربيش ع روحك راهو المشاكل بيناتكم كترت ماتقعدوش متصافيين واجد..
منى:عندك حق يالينا اللي يده في الميه مش زي اللي يده في النار...
لينا ضيقت عيونها وقالت:كيف يامنى مافهمتش قصدك؟
منى تنهدت وقالت:نقصد لوعايشة عيشتي راك فهمتي عليا..
لينا:انا فاهمه عليك بس مانبي يصير مشاكل بينك وبين مروان..نقولك..قعمزي معاه احكي انتي وياه واعرفي منه هو ليش يدس في الفلوس شن يبي يدير بيهن...
منى قعدت ساكته وهي تفكر في كلامها...
لينا:صدقيني بعد تعرفي حتريحي متأكده انه حيقولك سبب مقنع...
ع خشة رتيل وهي مخلوعه تقول:تسمعوا في صوت العياط!!؟
خشت عليهم عفاف من الجنان وهي تقول:صوت عياط..
منى ولينا مشوا وقفوا عند الباب يسمعوا.
ورتيل واقفه حدا الروشن وتسمع...
لينا:بعيد شويه..
منى:زعمه منو؟
عفاف:ربي يستر...
شويه سمعوا صوت باب الحوش انفتح..
لينا؛صوت سيارة سفيان...
لحظات وسمعوا صوت ينادي..
"لينا"..
شبحولها...وهي طول مشت طلعتله..
وين وصلت فيه لاحظت ملامح وجهه ماتتفسرش...
لينا:مني ياسفيان؟
سفيان بأسف:عمي فتحي الساحلي..
لينا بصدمه:إنا لله وإنا إليه راجعون...
"بالله ارفعني ياسفيان"
التفتوا وشافوا رتيل جايتهم وهي مصدومه ودموعها ينزلوا:بالله عليك سفيان نبي نمشي لإلهام..
سفيان:باهي بري وتي روحك ..
خشت تجري..
لينا:كلنا بنعدوا..
سفيان:باهي بسرعه خفوا ارواحكم اني برا..
ولف ومشي طلع..
ولينا خشت تقول لمنى وعفاف يوتوا رواحهم..
شويه وطلعوا كلهم بالصغار....
رفعهم سفيان حطهم وقعد مع الصغار في السيارة..الشريف وياسمين وبحر....بنات عفاف طالعات مع بوهم...
في الوقت اللي نزلوا فيه النساوين...
كانت في سيارتين تانيه كيف وصلوا..
نزل من وحده فيهم واحد يمشي بسرعه وهو ماشي شاف يساره..
عيونه جو ع رتيل حاشه تجري وهي تبكي وراها اختها ونساوين خوتها..
هو غير عيونه وخش من الباب التاني..
لقي زحمة رجاله...قعد يدور فيها ع صاحبه..
لقاه مقمعز ع كرسي وحاط راسه بين ايديه...واللي حواليه يواسو فيه بالكلام...
رياض:مبشر...
لما سمع صوته نزل ورفع راسه شاف صاحبه قدام..
جاه رياض وهو ناضله والزوز ضموا بعضهم بقوة..
رياض وهو يمسح ع ظهره:عظم الله اجرك في الجنه بإذن الله..
مبشر انهار بالبكي ورياض غصب عنه دموعه نزلوا وهو يمسح ع راسه صاحبه ويقول:قول لاإله الا الله...لاإله إلا الله..
مبشر ببكي:لاإله الا الله...
وواحد من الموجودين:كلنا لهالطريق ياولدي كلنا لهالطريق...
🍁🍁🍁
عند النساوين..
كانت الدنيا مقلوبه بالعياط...
وإلهام قريب تنجن لما شافت رتيل جتها تجري وهي تقول:بابا يارتيل بابا..
ورتيل جتها وهي تبكي وضموا بعض هما الزوز وقعدوا يبكوا..
والكل يتفرجوا عليهم وهما متأثرين ع الآخر....
🍁🍁🍁🍁
مقعمزين في الصاله يهدرزوا...
نوريه:نفكر ياعمتي نمشي غدوة لحوش لبوي ونحضر معاهم يوم عرفه امي مهناش واني في مكانها..
رمضانه:ماتعودتش يابنتي ع يوم عرفه وانتي مش معانا..
نوريه:الله غالب ياعمتي خواتي برواحهم...
اكرام:تو مش اختك هديكا عفاف قاعده في الحوش..
نوريه من غير ماتشبحلها:عفاف مريضه.
اكرام:وحتى اني مريضه وماعنديش حيل نتحرك ومانقدرش ندير كل شي بروحي..
نوريه شبحتلها وقالت:اهي مها معاك..
اكرام:زحمة يوم عرفه تبي وحده ناشطه..
مها رفعت حاجبها وقالت:ياناشطه انتي..
اكرام؛تكلمي زين خيرلك..
مها:انتي اللي اوزني كلامك قبل لطلعيه..
رمضانه:انتي وياها شن ماتشبحوش فيا قدامكم !!؟
مها:هي اللي طولت لسانها ياعمتي..
اكرام:اسم الله عليك ياهاديه يامحترمه..
رمضانه:اكرام!
اكرام:اسمعي ياعمتي من الاخير اني حملي مهدد وبروحي مانقدرش نعول كان تبيني نخسر العيل هداكا كلام تاني..
رمضانه بصدمه:اني نبيك تخسري العيل!؟
اكرام:الكلام مش ليك ياعمتي..
نوريه بتهكم:ربي يشفيك..
اكرام:يشفيك انتي يامسومه ياشرانيه..
رمضانه:اكرام شن جاك!؟
اكرام:من اللي نشوف فيه ونسمع فيه ياعمتي من حركاتهم هي وهادي..من الجو اللي دير فيه بش تكره حسين فيا...تعبتلي نفسيتي كرهتني في روحي...
نوريه تشبحلها من فوق لتحت..
اكرام:راهو معاش متحمله خلاص..
وناضت وهي تمشي ع اساس تبكي..وارتسمت ع وجهها ابتسامه مكر...
رمضانه:راهو عندها الحق..
نوريه ومها شبحولها بصدمه..
رمضانه؛حتى اني نشوف في حركاتكم وتصرفاتكم...متلاقيات عليها الزوز..
نوريه شبحت القدام وهي رافعه حاجبها..
رمضانه؛وانتي يانوريه انسيها حكاية مشيتك لماليك غدوه خليك زي قبل امشي نهار تاني يوم في العشيه وخلاص..
نوريه هزت راسها وهي شادة روحها بالسيف وقالت:حاضر عمتي..نستأذن توا..
وناضت وهي تقول:هيا نوضي نور ماما..
نور ناضت وهي مغلوله بعد حضرت المشكله كامله..
ومشت طلعت هي وأمها..
رمضانه مابتش تشد في نوريه خلها ع راحتها عارفتها غضبانه من اللي صار مابتش تضغط عليها...
شبحت لمها وقالت:نوضي ديري الغدي دورك ولا؟
تنهدت مها وقالت:ايه...وناضت ومشت طلعت من الصاله وهي تقول بهمس..عطيك موت يااكرام ياجربه..
••برا...
نوريه هي وبنتها كانوا ماشيات للحوش ع رجليهم..
نور وهي ماشيه شافت لروشن من رواشن حوش جدها
كان روشن دار نوم بوها اكرام..
شافت تمشي وتجي في وسط...
البنت من كثر ماهي مغلوله مشت تجري خدت رشاده كبيره شافتها قدامها وحدفتها ع الروشن....
#الصلاة_الإبراهيميه
يتبع….
الفصول الاربعة
