شكولينا

الجزء الثامن والخمسين _القسم الاخير

#شكولينا
#الجزء_الثامن_والخمسين"القسم الاخير"
#الجمان_الفريد

🍁انتم مع الأجزاء الأخيره من رواية #شكولينا🍁
كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
"طلقها!!؟"
وجيهه:ايه طلقها..
الشريف بصدمه؛علاش باهي!؟
وجيهه تنهدت وقالت:طلعت مطلعه اللي صار لرنده برا..
سفيان وهو عاقد حواجبه:وهي من وين سمعت بالقصه؟
وجيهه:مذكر ياشريف لما كلمت مروان في العيد كنت نبي نعرف منه شن صاير مع رنده اللي كانت تدعي تدعي حداي وحني فالحرم الحمد ياربي اللي برئتني كيف مابرئت عائشه. حسيت في شي كبير من الاول مدرقينه عليا...بعد ماسألتك وانت مابيتش تقول كلمت مروان وحلفته يقول وهو حكالي..
شويه وطلعت عليا منى وهي تقول بنركب هو قاللها اركبي واني لاحقك شورها كانت تتصنت ..
سفيان؛ليش هو وين كان يكلم فيك؟
وجيهه:في الدار اللي حدا المربوعه..
غمض عيونه وتنفس بغضب بعدين فتحهم..
الشريف وهو عاقد حواجبه:لا كان تستاهل الطلاق المراة اطلع اسرار حوش عربها وتتكلم بعرضهم ماتستاهلش تقعد ع ذمته ولاتقعد لهالعيله كنه..
سفيان:من غير نقاش هادي..
وجيهه:اني وجعني الوليد من بكري يبكي يبيها وشاد في رنده مايبيش يطلقها..
سفيان:تو يتعود ع قلتها وهي تستاهل ننحرم منه بش تحس باللي صار لرنده..
الشريف مسح ع وجهه بعدين قال:إنا لله وإنا إليه راجعون اللهم لاإعتراض...
وجيهه تنهدت وسرحت بتفكيرها وهي مهمومه..
وسفيان كان يشبح لبوه بضيق وخايف عليه...
🌺🌺🌺🌺
"ربي يهديها وخلاص..بس عاد مش طلاق في بيناتهم عيل"
سفيان:مايصيرله شي..
لينا:ساهله عندك لهالدرجه!؟
سفيان:ساهل عندك اللي داراته!؟الله اعلم توا الدوة وين وصلت وشن زادو عليها...عرض اهل راجلها كيف تدوي بيه..
لينا قعدت ساكته ماقدرتش تقول شي شافت ان سفيان عنده حق في كل كلمة قالها..
سفيان لبس تيشرته وقال:مروان كان اكثر واحد خايف من قصة رنده تطلع..حتى القضيه كان ضدها لهالسبب وين طلعت القصه طلعت من مرته هو..خلاص معاش فيها...
لينا تنهدت وقالت؛لاحول ولاقوة الا بالله وخلاص..باهي تعال تعشى..
سفيان جاها حط ايديه ع كتافها وقعد يمشي هو وياها لين طلعوا من الدار وهو يقول:شن العشي؟
لينا:رز بالخلطه وطاجين وشربة عدس..
سفيان:انتي درتيه؟
لينا:انا وعفاف..
سفيان:خلاص قلبي انسي مانبيكش تزعلي من شي كل حد يتحمل نتيجة افعاله..
لينا:وجعتني منى اللي خرب حوشها والعيل اللي بيتشرد..
سفيان؛دارتها بيدها..والشريف ماتخافيش عليه لاهو اول ولاأخر واحد..
وصلوا في الكوجينه جبدلها الكرسي وقال:هي قعمزي..
وقعمزها..
وهو مشي قعمز..
سفيان:بتاكلي معاي راهو..
لينا ابتسمت وقال:باهي وانت بعدين بتوتي معاي ساكو البيبي..
سفيان بضحكه:احب ع قلبي..
ابتسمت وهو وخدي طرف امبطنه ومدلها تاكل..
لينا:بعدين قول بطه..
سفيان بإبتسامه؛تهبلي..
ضحكت وكلت منها..
سفيان:خديتي دواك اليوم؟
لينا هزت راسها..
سفيان؛شربتي البنجر ع الغدي..
لينا:اممم..
سفيان:والعشيه كليتي الجبنه وشربتي الحليب..
لينا:ايه..
سفيان؛مالخبطيش وخديتي الكالسيوم مع الحديد؟
لينا بضحكه:لا ياسفيان راني نعرف..
سفيان:قداش شربتي شيشة مية اليوم..
لينا:قريب استيكه تامه كملتها..
سفيان؛والله ماني مسامحك يالينا كان طلعتي تسايري فيا..
ضحكت وقالت:تو بالله عليك الشهور الاخيره لاحظت عليا تعب مش الدكتورة بروحها ماخلت ماشكرت في حالتي لين خفت عليا من عينها..
سفيان شد يدها وقال:بتجيبي بالعمليه راهو وهدا اللي زايده مخوفني عليك..
لينا بإبتسامه؛ماتخافش النساوين توا قريب كلهن قعدن يجيبن بالعمليه..
تنهد سفيان وقال:كولي كولي..
لينا؛انت اللي كول..هيا رايح ناقص بكل..
سفيان خدي الكاشيك وبدي ياكل وهي تزيد توكل فيه..
وقعدوا يهدرزوا ع موضوع خطبة رنده...
☘☘☘☘
وتعدي الايام...
ومروان طلق منى رسمي وبعتلها مؤخرها مع واحد من خوتها..
ومنى مازالت عايشه حالة صدمه مش مستوعبه اللي صار فيها...
وامها تعاركت مع بناويتها اللي طلعوا الدوة في العيله وقالت معاش تبي من يجيها منهم...
ولابوها لاخوتها ليهم قدروا يديروا حاجه لأن بنتهم غلطت وغلطها كبير ولو كانوا هما مكان مروان راهو دارو نفس الشي...
بس كانوا يبوا بنتهم تاخد حضانة ولدها اللي قريب تنجن عليه...
🍁🍁🍁
"مايبيش يعطيهولها ماكر فيها"
هادي رنده مقعمزة وجنبها الشريف ياكل في كيكه وصديقتها تشبحله بحزن قالت:ماوجعني غير الوليد ياناري...
رنده بحزن:ايه..بنزيد نحاول في بوه يرفعه لأمه حقها يقعد عندها هي..
:شروف..
شبحلها..
:تعالى ترا نوريك حاجه..
الولد نزل من ع الكرسي ومشالها..هي خداته وحطت ع رجليها وفتحت التليفون وحطت برنامج الفلتر متاع الصورة اللي كل مرة اطلع شكل..شوف شوف شروف..
الشريف شبح شكله في شاشة تليفونها قعد يضحك..
هي ضحكت وقالت:هي انفخ هي..قول...اوووف..
نفخ وقعدوا يضحكوا الزوز ع المنظر اللي طلع في الشاشه..
رنده بضحكه:نخش المحاضرة وهو يقعد معاك فدوى..
فدوى:ايه خشي وتو ناخدها منك بعدين..
رنده ناضت وقالت:تمام..سلام توا...ومشت من حداهم..
وفدوى قعدت تلعب مع الشريف....
بعدين خداته وقعدت تدهور بيه وتهدرز عليه في هدرزة طفوليه وهو يجاوب فيها...
بعدين رفعاته للكافتيريا ماخلت ماخدتله من حاجات..وولو قعمزوا مع بعض...
وهي فتحتله اليوتيوب في تليفونها ع برامج اطفال وقعد منسجم معاهم..
وهي منسجمه معاه هو..لين عدت ساعه ونص وطلعت رنده من المحاضرة لقتهم قاعدين في نفس المكان..
وهو مقعمز في حجرها والزوز لاهيين بالتليفون..
رنده بضحكه:ان شاء الله ماتعبكش..
شبحتلها وقالت بإبتسامه؛بالعكس عسل ويهبل عدا معاه الوقت بسرعه..
قعمزت جنبها وقالت:شن واخديتله انتي!!؟
فدوى ابتسمت وقعدت لاهيه بالتليفون..
ورنده ابتسمت وقالت:ربي يهديك..
فدوى:ايه احكيلي شن معنوياتك حبيب القلب بيجي اليوم..
ضحكت وقالت:من الصبح فيا لية متوترة..
فدوى بإبتسامه؛طبيعي..بالذات وانتي تعرفيه ويعرفك و في فقلبك مشاعر اتجاهه...
تنهدت رنده بأبتسامه...
وفدوى تشبحلها وع وجهها ضحكة خفيفه...
🌸وروحت رنده للحوش مع الشريف وفي الطريق خدتله حاجات هو وصغار عمه...
بعد ماخشت للحوش خلاته لاهي مع الصغار..
وصلت صلاتها..وتحركت طول للمربوعه ضم فيها وترتب..
واختها عفاف لاهيه بالكوجينه..
ولينا راقده وخلاص الاسبوع هدا خلوها مرتاحه خصوصا انها مش حتولد طبيعي فمافيش داعي لحركتها..
وعدا الوقت...
وآذن العصر وفات....
وجي وقت لقاء انس ورنده اللي كانوا يراجو فيه بالساعه والدقيقه...
اللي كان موجود في الحوش وقتها من الرجاله بوها بس
خوتها كانوا مشغولين...
رحب بأنس..وقعمز معاه شويه...وبعد ماضيفوه جي دور لقائه برنده...
خلاها بوها تقعمز معاه بروحهم بس البيبان كانت مفتوحه..
رنده كانت لابسه عبايه لونها موف غامق عليها شاربه كريميه وكانت طالعه حلوة بالمرة...وخجوله بزياده..
انس بإبتسامه:شن جو..
رنده شبحتله وقالت بإبتسامه خجل:تمام الحمد لله..
انس؛طبعا تعرفيني ونعرفك مافيش داعي للمقدمات خل نخشوا في صلب الموضوع..شوفي رنده اني انسان جدا متفهم بالي واسع لأبعد حد..عندي قدره وطاقه تحمل كبيره وصبور هلبه..بس مش في كل شي طبعا..
رنده:زي شنو؟
انس بإبتسامه:زي  الانتظار مانحبش نستنى..
رنده:لامعليش بتوسع بالك في حكاية الانتظار هادي اني شويه مرخيه لما نجي طالعه لمكان لازم نوتي روحي ع أقل من مهلي..
انس بضحكه:لالا ماعنديش مشكله بكل..ابتسم وكمل يقول..اني قصدي مانبيش نستنى هلبه اليوم بيجمعني بيك في حوش واحد..
رنده نزلت عيونها وهي متحشمه ع الآخر..
انس؛اعذريني ع جرأتي بس حقيقة مشاعري انتي تعرفيها..
رفعت عيونها وقالت؛وشن تاني..
انس؛امي..مالهاش غيري..راهو مش عزوز واعره نهائيا مراة زي العسل واطيب من قلبها مش حتلقي.. بس قلبها هدا تعبان وتبي من يعاونها وطبعا هني مانقصدش ع خدمة الحوش..نقصد الونس والصحبه..
رنده هزت راسها وبإبتسامه قالت؛فاهمه عليك..
انس؛حوشنا حيكون فوقها شقه ع كبر الحوش ..الحوش فيلا كبيره ع دورين دور لأمي وفيه جناح ليا اني..والدور التاني زي ماقتلك شقتي...والباقي كله تعرفيه..
رنده تنهدت وقالت:باهي انتي توا اسمعني..
انس بإبتسامه:اسمعي..
رنده:نبيك تعرف كويس اني ماكنتش هكي اني قبل كنت واعره وطباعي مش حلوة بكل ممكن كنت اسوأ من طليقتك بمراحل...حتقول علاش تقولي في الكلام هدا توا حنقولك نبي نكون معاك واضحه بش نبدوا بدايه صحيحه..الحمد لله رب العالمين المحنه اللي مرت بيها كان ليها وجه تاني خلاني رنده اللي انت تعرفها توا...لكن..فيا حاجات مازال قاعده زي ماهي..اني لما نزعل مانرضاش بسهوله بكل مش حتقدر ترضيتي لابهديه ولاطلعه حتى لو قبلت منك هالشي وعديتها من داخل مش راضيه ونقعد نساير فيك..ولو اغلاطك كترت اعرف انك حتبدا تخسرني وممكن للأبد..
انس يسمع وهو عاقد حواجبه بإبتسامه..
رنده:نبي علاقتي بيك تكون مبنيه ع الاحترام والثقه والامان الحاجه التلاته اهم من اي شي تاني نبي لما يصير بينا خلاف نقعدوا محترمين بعض ومايطيحش القدر بيناتنا..نبي نكون واثقه فيك ديما..نبي نحس معاك بالأمان ندرق ديما ورا ظهرك انت وين نخاف من شي نبي ننسد عليك بكل جهدي واني عارفه انك مستحيل تخذلني في ولاتكسرني ولاتخيب املي فيك..مانبيش حبك قد مانبي الحاجات التلاته هادم تقدر توفرهملي ولالا...
انس تنهدت من قلبه وقال:رنده هدا كله كان موجود من اول ماعرفتك..درت كل اللي نقدر بش نحسسك بالأمان كنت نبيك تقعدي واثقه فيا وتعرفي اني قد ثقتك يوم سحبتي مني الدعوة اللي صارلي ربي بس اللي يعلم بيه ولتوا نبي نعرف السبب..
رنده؛نقولك بس وعد ماديرش مشاكل..
انس:مش حيصير الا كل خير..
رنده:طليقتك..
عقد حواجبه بتساؤل:خيرها..
رنده:مانعرفش من وين جابت رقمي واتصلت بيا وماخلت ماسمعتني بش نخليك في ليها ولصغارك هددتني حتى بأهلي
مانحكيلكش قداش كرهت روحي وخفت تزيد تكبر مشاكلي اهلي مش ناقصين..مالقيتش قدامي غير هالحل..
انس وهو عاقد حواجبه بغضب ويهز في رجله من العصبيه قال:صار هكي....
رنده خافت وين شافت حالة الغضب المكبوت اللي هو فيها وقالت:من غير مشاكل انس بالله عليك..
غلبت ابتسامة خفيفه ملامح الغضب لما سمع اسمه بصوتها هدي شويه وشبك صوابع ايديه في بعض وقال:قتلك ماتخافيش مش حيصير الا كل خير..باهي وشن عندك تاني بتقولي..
رنده:نبي نكمل قراية ونخدم مانبيش نقعمز في الحوش والسواقه مش مخليتها..
انس:ماعنديش مشكله نهائي بالذات في حكاية السواقه اهو تنسرفي انتي وامي لما نكون مشغول..
ضحكت ضحكه خفيفه..
انس بإبتسامه:وشن تاني؟
رنده:شي..
انس بإبتسامه:معناها خلاص نبدوا في الرسمي..
رنده بإبتسامه:بعد حوسة جياب مرت خوي سفيان ان شاء الله..
انس:امتى؟
رنده:غدوة موعد عمليه يعني بعد اسبوع تقدر تبدا بالرسمي..
انس:ولو انه بعيد لكن نصبروا الله غالب..
رنده بضحكه؛سبوع بعيد!؟
انس:وبعيد هلبه..
ابتسمت بخجل وناضت وهي تقول:تمام عن اذنك..السلام عليكم..
ومشت وهو معاها بعيونه اللي نظراتها كلها حب:وعليكم السلام...
🌺🌺🌺🌺🌺
الساعه 8:00مساءا..
شاد يدها ويمشي بيها وهو يقول:بالشويه عليك..
لينا بإبتسامه حماس:زعم شن جايب اليوم..
سفيان:صبرك بس...وصلوا في دار النوم وقف وقدمها خلاها تخش قدامه..
هي لما خشت ارتسمت ع وجهها ملامح الانبهار لما شافت سرير لونه ازرق محطوط في مكان المكتب متاعه..
سفيان:شن رايك..
لينا:يجنن يهبل الله يبارك..قدمتله وقعدت تتفحص فيه وهو يتفحص في ملامح وجهها اللي كانت كلها فرحه وسعاده..
شبحتله وقالت:تعيش وتجيبله يارب..بس قولي العمال و هالحوسه والدوشه هدي كلهاع خاطر سرير بس!؟
ضحك وقال..تعالي نطلعوا رحلة تانيه لدار الصغار..
ضحكت وجاته تعنقت ذراعه ومشت معاه..وطلعوا..
سفيان:خايف نرقد في نص الطريق..ضربانه ع ذراعه ضربه خفيفه وقالت..صامت..
وهو يضحك..
ووصلوا في الدار...فتحها وخشوا...
هي تفاجئت ع الآخر..كان مبدلها تماما..
ديكورها بين زوز ازرق وردي...
دولاب ابيض..وزوز اسره واحده ورغانه ازرق والتاني وردي..
الفرش بين الازرق والوردي ورسوم ع الحيط بين ورد وبكلات وفراشات..وكرة ودراجه وحاجات تانيه تخص الذكور..
كان دار حلوة بالمرة.
سفيان؛انسيه السرير هداكا معاش فيه لو تبي تحرجي اقعدي في دارك واني نبات في الصالون..
شبحتله لينا وعيونها معبيات دموع قالت:مش عارفه قداش نحبك..مش عارفه..المهم ان الدنيا عندي ولت كلها انت..ياعمري ياحياتي ياروح روحي...
وقربت لقلبه لين ولت ماجاوراته وتسمع في ونبضاته القويه..
وهو يمسح ع راسها وع وجهه ابتسامه حب. قال:تعرفي مرات نحسك بنتي...
لينا ودموعها ينزلوا:وانا نحسك عيلتي كلها..والله ياسفيان نموت فيك ونموت بلاك..
سفيان ريشها من شعرها بخفه وقال:بلا نكد..
لينا بضحكه من بين دموعها:خديته منك..
هو قعد يضحك وهي تضحك معاه...
🌺🌺🌺🌺
وبعد منتصف الليل هي رقدت...لكن هو ماقدرش يرقد غمض كان يفكر في اليوم اللي بعده العمليه متاع الولاده خايف عليها...
بالعاده النساء فهالحاله هما اللي يقعدوا عايشين في حالة قلق وقلة نوم..
بس مع سفيان ولينا كان الوضع مختلف..
هي كانت مرتاحه لانها مستودعه نفسها وولدها الله سبحانه وتعالى وطبيعي تكون مطمنه..
لكن هو كان يكره المستشفى والعمليات مش متحمل فكرة ان لينا حتكون تحت ايدين الاطباء ومشارطهم ...
قعد القلق ملازمه..وضيق الصدر كل ماله يزيد..
طلع من الشقه ونزل لوطا بيقعمز في الجنان....
لقي خوه مروان مقعمز مربع ايديه وسارح..شبحله شويه بعدين مشاله قعمز جنبه...
سفيان:نحسابك في المستشفى..
مروان؛اعتذرت..
شبحله لقي ملامح الهم باديه في وجهه قاله:كانك نادم ردها اكيد تعلمت من غلطها كويس..
مروان:لالا خلاص منى صفحة وطويتها..
سفيان:بسرعه هكي!؟ مذكر ياما صار لما هي طلبت الطلاق..شكله ماكانش من الحب مارضيتهاش ع روحك هي تسيبك..
مروان؛مش تافه لهالدرجه بش نفكر هكي ياسفيان..بعد اللي صار بيني وبينها في شي انكسر هي معاش ولت زي قبل الغلطه اللي غلطتها بنت بيني وبينها حاجز كبير حاول نهده بس هي كانت تقوي فيه...تغيرت هلبه ياسفيان ولت ماديه وتشبح فيا مصرف متنقل وخلاص هات هات هات وكان قلت ماعنديش ماتخلي ماتقول وماتخلي مادير..من كثر النكد والمشاكل بديت نهرب من الحوش كله وهي نفرت منها معاش طايق نشوفها بالعمله اللي دارتها قطعت الشعره اللي قعدت بيني وبينها...
سفيان:عندكم ولد..
مروان؛مايصيرله شي لاهو واول ولااخر عيل بوه وامه يطلقوا..
سفيان؛باهي شن ناوي دير بعد طلبت الحضانه..
مروان تنهد وقال:هدرزت معاي رنده واقنعتني بنعطيهولها..اصلا رنده الوحيده اللي مهتمه بيه ومعدله عليه وبعد تتزوج بيقعد بروحه ماحد مدوره امه اولى بيه..
سفيان:علاش تتكلم هكي كلنا نحبوه ولدك عندي اني ولدي مش ولد خوي
مروان؛خلينا واقعيين يا سفيان مافي حد يجي في غلا صغار  عدنان الله يرحمه..فاهم انهم ايتام لكن الاهتمام بيهم مبالغ فيه جي ع حساب ولدي..وغدوة حتى انت يجيك العيل اللي يراجو فيه اكثر منك وينسوا ولدي بكل...مانبيش ولدي يعيش الفرق والاحساس بالنقص مع امه وخواله لاقي الحب مش زي هني ع الهامش..
سفيان بإستياء:كلامك خي بكل يامروان ماينقالش..
ابتسم بتهكم وقال:خي لأنه حق..
سفيان؛لا مش حق انت متحسس بس..
هز راسه وهو مبتسم بتهكم وقعد ساكت..
وسفيان حتى هو قعد يشبحله بضيق وهو ساكت..
مروان:نطلب منك طلب سفيان..
سفيان:ادلل..
مروان:تسلم...اني لام مبلغ كويس وقريب نكمله وناوي ندير بيه حاجه ..
سفيان:شن هي؟
مروان؛بنهاجر..
سفيان انصدم وقعد ساكت..
مروان:مش لاقي روحي هني ياسفيان هني يشوفوك شاطر وناجح يحاربوك يحصروك في الزاويه مايبوكش تكبر بش ماتاخدش مكانهم...اني عندي طموح مانبيش نقتله هني ...
سفيان:صدمتني فاجئتني مش عارف شن نقولك هجرة مرة وحده..
مروان؛ايه هجره ونبيك تقنع بوي وامي نبي نسافر برضاهم برغم انهم حتى لو رفضوا حنطلع...
سفيان قعد يشبحله وهو ساكت..
مروان:انت اكثر واحد مفروض يفهمني ياسفيان..
سفيان شاف في عيون خوه نظرة الم ممزوجه بالإصرار وجعه قلبه عليه ومالقاش قدامه غير انه يوقف معاه..
سفيان هز راسه وقال:تمام بس اجل الموضوع توا لين يتموا في رنده بعدين اني نفتح معاهم الموضوع..
ابتسم مروان بفرح وربت بيده ع ركبة خوه وقال:منور نيوتن..
ضحك سفيان نص ضحكه بعدين تنهد..
عقد مروان حواجبه وقال؛خيرك!؟
سفيان:مافي شي.
مروان:متوتر ع خاطر عملية المدام غدوة..
سفيان؛هلبه..
مروان:عارفك مادورش ساهله راهو والمستشفى متاعنا ممتاز والكوادر متاعنا ممتازة مافي شي تخاف منه..
تنهد وقال:إن شاء الله خير..
مروان:امتى العمليه هي..
سفيان:بإذن الله غدوة العشرة الصبح...
مروان:ع خير ان شاء الله..
🌺🌺🌺🌺
وجي تاني يوم...
طلع سفيان بمرته مع حاجاتها وعزوزتها معاهم..
وتوجهوا للمستشفى..
سفيان:اقري الاذكار وعاودي...صلي ع النبي كتري كتري...
لينا بضحكه:راني بنجيب بالعمليه..
سفيان:وكان بتجيبي العمليه ماتستعنيش بالله..
لينا:لا طبعا في كل وقتي مستعينه بيه بس انا عليك انت كيف تحكي وكأن نتوجع وقالبتها عياطات..
وجيهه؛خايف عليك ياكبدي...
لينا بإبتسامه:عارفه وانا نبيه يطمن بس متوتر اكتر مني..
سفيان:هيا ديري اللي قتلك عليه ومن غير كترت دوة..
وجيهه:سلم بنيتي اسمعي كلامه ومعاش تناقشي مش ناقص حرق اعصاب..
لينا بضحكه:حاضر..
وكملوا طريقهم للمستشفى..
نزلها سفيان وقعد يمشي فيها وامه ماشيه وراهم بالساكو وهي تشبحله وعيونها مليانات دموع واخيرا حتشوف عيل لسفيان...
سفيان بقلق:ماتوقفيش ذكر وماتخافيش ساهله حبيبي..
لينا وهي مبتسمه بإحراج من الممرضات والدكتورة اللي كانوا يشبحولهم بإبتسامه..
لينا:حاضر..
اماني:هي لينا..
سفيان:بالله يادكتورة تردو بالكم....
اماني بإبتسامه:ماتخافش الامور كلها تمام بإذن الله هي نص ساعه ان شاء الله وتشوف ولدك..
ومشوا ببلينا لحجرة العمليات..
وخلوه هو في حالة قلق لاتوصف..
وجيهه:شد حيلك خير بلاك وين سفيان الجلف..
سفيان:جلف شني يام بس..بالله ادعيلها وخليني في حالي..
ضحكت وجيهه وهي تحرك في راسها يمين ويسار ومشت قعمزت..
🌺وخشت لينا للعمليات..
وسفيان ماقعمز بكل وهو ماشي جاي في المرر ويستنى ع نار..
وكانوا خواته وخوت لينا مرة مرة يتصلوا ويسألوا..
••سفيان:قاعد نراجي ياعبدالله الدكتورة قالت نص واهي فاتت النص ساعه..
شويه شاف اماني جايه..
سفيان بلهفه:اهي طلعت..ومشالها بسرعه ..وامه جتهم..
سفيان:هاه دكتورة..
اماني بإبتسامه:جاك شكلاتينو صغيرون..
سفيان ابتسم بفرح وقلبه طار في وسط ضلوعه بعدين قال:لينا شن حالها..
اماني:الحمد لله صحتها كويسه وامورها تمام..
تنهد وقال:الحمد لله..
"مبارك ماجاك يابونسيب"
استاقظ سفيان لعبدالله اللي مخليه ع الخط:هاه عبدالله الله يبارك فيك...وتباعد من حداهم..
وجيهه:نبي نشوفه دكتورة..
اماني:بعدين شويه خالتي..
وجيهه:باهي لمن يشبه..
اماني بضحكه:جي اسمراني لمامته تقولي حليب وقهوة لكن النقش عاد مازال ماينعرفش توا..
وجيهه:باهي المهم صحته كويسه..
اماني بإبتسامه:الله يبارك غليه وزنه قريب يسكر ع اربعه كيلو..
وجيهه:الله يبارك الله يبارك..
🌺🌺🌺🌺
وشاف سفيان ولده اللي كان في الحضانه مع الصغار لين يطلعوه لأمه...
كانوا عيونه غارقات بالدموع وهو يشبحله وقلبه قريب يطلع من صدره ويجي عنده...ذاب في حبه من اول ماشافه..
وجيهه يإبتسامه:جاك اسماريكا..
سفيان؛احلى ماجاني...
ضحكت امه ومسحت ع ظهره وهي فرحانه...
🌺ووصل الخبر للعيله...
وبعد ماطلعوا لينا للغرفه متاعها وجابولها تليفونها بدت الاتصالات تهل..
لينا:الله يبارك فيك امولتي...........اها نرجى فيكن...........جا اسمر نحس فيه سمح كيف بوه....
شبحولها سفيان ووجيهه بإبتسامه...
لينا بضحكه:باهي نتلاقوا ان شاء الله بالسلامه...
سكرت ومدت التليفون لسفيان وقالت..بعده عني خل نلهى بوليدي شويه..
سفيان رفع حاجبه وهو يشوفلها..
"سفيان"
وجيهه:سلم وليدي اطلع شوف خوك...
ابتسم ولف ومشي طلع..
وجيهه:هي الهي بولدك..
ضحكت لينا بعدين قالت:شن دايرين بحر وياسمين..
وجيهه؛ماتخمميش فيهم مع عماتهم..
لينا ابتسمت وشبحت لسيف الدين ....
🍁وبعد يومين سيف الدين سفيان بن عامر نور حوش جده..
واستقبلوه عماته بالزغاريد..
واول من حطه في حضنه الحاج الشريف اللي ماقدرش يشد دموعه وين راه..
والكل تأثروا من الموقف بالذات سفيان اللي كان يشوف عيلته فرحانه بولده اضعاف فرحته...
وجو خوات لينا ونساوين خوتها وباقي عيلة بن عامر..
وقعدوا اسبوع ماشيين عليهم جايين...وفي اليوم اللي سكر فيه سيف الاسبوع ذبحله بوه العقيقه..
ودارو عشي كبير....
حضروه الحبايب كلهم....
بالنسبه لبحر وياسمين كانوا مستغربين الضيف الجديد امهم وعمهم بش يقربوهم منه اول ماخشوا عليهم جابوا هدايا وقعدوا يقولوا من البيبي...
وطبعا مافيش هداكا الشعور بالغيرة لأن سيف الدين كان محاوط بالإهتمام من العيله كلها مش امه وبوه بس...
🍁من جهة تانيه..
مروان خدي حوايج الشريف وحاجاته ورفعه لأمه...
اللي لما شافاته حست روحها مش قادره تتقبله ..خصوصا ان الشبه بينه وبين بوه كان قوي..وهي حست اتجاهه بشي من النفور وامها لاحظت هالشي وقعدت تعاني في الولد بروحها...
🍁🍁🍁🍁
"خشي فدوى ماتتحشميش"
فدوى خشت للحوش وهي تقول:بسم الله...مررت نظرها ع الجنان وقالت:الله يبارك يهبل منظره وورق الشجر طايح..
ضحكت رنده وقالت:عاد تحبي الجو الرومانسي انتي..
ضحكت فدوى..
رنده:هي تعالي خشي تبيني نكرك كر..
فدوى بضحكه:هاني خاشه..
وهما ماشيات للباب..
جي مروان نازل من فوق بيمشي لخدمته.
هي لما سمعت حس نزوله شافت للدروج..
وهو طول شبحلها من ورا النظارات..
رنده:هدا خوي مروان..
فدوى بخجل:اها..
هو وصل لوطا وقال:السلام عليكم..رنده تعالي شويه...
ومشي من حداهم لسيارته..
رنده:لحظه شويه..ومشتله...
وفدوى قعدت تشبحلهم...وهي تشوف لمروان وتذكر في اللي حكتهولها رنده عن قصته...
مروان:من هي هادي..
رنده؛صاحبتي تقرا معاي في الكليه..
مروان شبح لفدوى..فدوى طول غيرت عيونها وقعدت تمرر فيهم ع الجنان..
هو شبح لرنده وقال:تمام بري...
رنده شبحتله بإستغراب بعدين ولت لصاحبتها...
وهو ركب السيارة وعيونه عليهم..
رنده دخلت صاحبتها ...
وهو شغل السيارة وتحرك وطلع من الحوش..
🍁🍁🍁🍁
"اهم صغارك مش تبيهم خودهم مش ملزومه بيهم"
انس وهو يشبح لصغاره ودموعهم في عيونهم قال:والله ماعاد يولولك لو تموتي يارولا..
رولا:واني مانبيهمش مستغنيه عنهم قول لست الحسن تعانيهم اني بنتزوج ونشوف حياتي..
انس شبحلها من فوق لتحت بإزدراء بعدين خدي صغاره وهويقول؛هي تعالوا بابا..
وطلعهم...
وهي سكرت وراه الباب بقوة....
وبغضب مشت خدت محبس الغرس وحدفاته ع الباب...
🍁في السيارة...
فواز:بابا ماما ضربت فطومه كف..
هو انصدم ولف خد فاطمه ليه لقي صوابعها معلمات ع وجه البنت وفاطمه تبكي..
فواز؛قالت كله منك طلقني بوك..منك..
غمض عيونه بغضب بعدين فتحهم وضم بنته لحضنه...
فاطمه؛ماما خي عاش نبيها معاش نحب فيها..
فواز:حتى اني...
انس لمح صاحبه مروح للحوش قال؛شويه وجاي بابا...
نزل من السيارة وسكرها كويس..
وحي لصاحبه؛فرج..
وقف في مكانه وقال:اووو انس..
وصل فيه ورفع سبابته في وجهه وهو يقول:شدوا اختكم احسنلها يافرج خير ماقسما بالله ننسى انها ام صغاري ونتفاهم معاها بطريقه تانيه..
:شن دارت تاني..
انس:هي عارفه شن دارت وصللها كلامي وكان ماتبوش العار والفضايح شدوها يافرج..
ولأنه عارف اخته ماقدرش يرد عليه بغير:ماعليكش فيها تو نتفاهموا معاها..
انس نزل يده وهز راسه ولف ومشي للسيارة ركبها شغلها وتحرك..
وفرح خش للحوش وهو معصب ع الآخر..
🍁🍁🍁🍁
"ايوه سفيان وينك"
هادي لينا تكلم في سفيان بالتليفون..
"مازال ماطلعتش مازال"
لينا بقلق:معناها بتروح في الليل..
"مش مشكله قلبي الطريق هانيه.."
لينا:باهي لما تطلع كلمني بالله عليك..
"ان شاء الله...هاه شن جو سيف باشا"
لينا بإبتسامه؛باشا ياسيدي كلنا نخدموا فيه..
"حتى هو ولدي"
لينا:عليك مغرور..
"تموتي فيه المغرور"
لينا بإبتسامه:دنياااا..
سفيان:حتى اني نموت فيك هلبه هلبه واجد واجد دنيا دنيا.
قعدت تضحك..
فجأة تغيرت نبرة صوته لما سمعاته يقول لحد
"تمام تمام..جاي...هي هوينا "..
وسكر..
هي ضحكت..بعدين مشت حطت التليفون ع الزيانه وطلعت من دار رتيل لدار التقعميز وين مافي العيله موجوده..
وملمومه ع عالة الشاهي..
وجيهه:كان تجي نوريه غدوة بس..
عفاف:حتى رنده مسكره راسها ماتبيش تكلمها..
زبيده:عاد هما خوات يتزاعلو ويتراضوا لكن القطيعه لا..
وجيه:باهي كيف ندير غدوة لما يلقوها مش حاضرة فضانيه اختها شن نرد ع الناس شن نقول..بديت ندرق في وجهي من هديكا وهادي..اللي يسألها ع رنده واللي يسأل ع مروان واللي يسأل ع عفاف والشماته نشبح في وجوهم..
عفاف:يام اني خلاص بنولي لحوشي ..
وجيهه:كلامي هو اللي خلاك تقولي هكي!؟
عفاف:لاوالله لا ليا وقت واخده القرار هدا غير قلت خل نحضر لمة سيف وبعدين نروح...
زبيده:والله احسن ماديري هدا الصح..
تنهدت عفاف وهزت راسها وقعدت ساكته..
وجيهه:كان تجيبولي نقالي خل نكلم نوريه..
رتيل ناضت وهي تقول:تو نجيبه..
وجيهه:هاك في طريقك ارفعي السفرة لأختك وصاحبتها..
رتيل:حاضر...
🍁🍁🍁🍁🍁
طالعه من حوشها بتمشي لحوش شيابينها تبي تتمشي في االجنان متاعهم لأنهم كبير وواسع..
وهي تتمشى تلاقت مع ضرتها اللي كانت تتمشى حتى هي..
اكرام قعدت تتمختر في مشيتها بقصد الاستفزاز..
ونوريه تشوفلها من فوق لتحت..
لعند ماقربوا يوصلوا في بعض...
نوريه جت قدامها ووقفتها..
اكرام رفعت حاجبها وقالت:خير!
نوريه:خير حبيبتي خير..عندي كلمتين حاصلات في رقبتي ونبي نقولهم..
اكرام ضيقت عيونها وقالت؛ترا قولي...
نوريه:اني مش عارفه علاش انتي ديما حارقه عصابك وقاعده ع وضع الهجوم..برغم اني انتي اللي جيتي عليا واني ولايوم جيت جنبك ولاضريتك..
اكرام؛ماضرتنيش صار!
نوريه:ايه ماضرتيكش..اني كان بنحط راسي براسك والله ماخليتك تقعدي ع ذمته...لكن مخلياتك في حالك ببساطه لأني مانبيش المشاكل..مانبيش حياة حسين تنقلب ويكره الحوش من النكد اللي فيه...شوفي ننصحك نصيحه ممكن تصدمك...معاش تتعاملي معاي باسلوبك هدا بش ماتخسريش حسين..
رفعت حواجبها بتعجب..
نوريه هزت راسها وقالت:ايه..فوتي الدوشه والمشاكل وعيشي حياتك بهدوء اني والله مانفكر في حاجه ضرك ولانبي من يضرني..كل وحده فينا عندها حوشها وحياتها علاش الدوشه هادي كلها!!؟ وهو والله يقعد معاك اكثر مايقعد معاي واني ولامرة عاركتها ولالمت عليه لاني نبيه يعيش مرتاح..وحتى انتي ريحيه وخلي الحياة تمشي بهدوء.
لأنك لو قعدتي متمسكه بتصرفاتك هادي حتخسري العيله كلها مش بس حسين..نصيحه خوديها من وحده تكرهك في الدم لكن تود لراجلها كل خير...
ومشت عنها وخلتها وهي واقفه في مكانها تفكر في كلامها بعدين التفتت وقعدت تشبحلها وهي ماشيه لين ادرقت من قدام عيونها...
🍁🍁🍁🍁
الساعه 9:00ليلا..
في الطريق..
سفيان:اهو اني في الطريق روحي..
"توصل سالم ياربي.."
سفيان:ماتبي شي..
"سلامتك حبيبي"
سفيان؛تمام تو نكلمك اول مانخش طرابلس...
"تمام في امان الله"
سفيان؛سلام..
وسكر..بعدين علا صوت الراديو كان مفتوح ع القرآن..
وحط التليفون قدامه..
مشي مسافه لاباس بيها..وين وصل لوحده من الطرق..
خطمت من جنبه سيارة تمشي بسرعه..بعدين اعترضت طريقه..
هو دار فرينو ووقف وقال:خيره هدا...!
بعدين سمع صوت سيارة تانيه سكرت عليه من الخلف..
والسيارتين انفتحوا ونزلوا منهم مامجموعه 6انفار..
هو حس الوضع غير صحيح..جبد الحديده اللي تحته..وفتح الباب ونزل...
سفيان؛من انتم؟
:هو هدا..
:ايه هو..
سفيان:شن تبوا...
شويه جاه واحد يجري بعصا رفعها عليها صد الضربه عنه بالحديده..
جاه واحد من الخلف شده..
وسفيان يعافر فيه:تي حول غادي يانجس..
وجي واحد منه الحديده..
وطاحوا في ضرب بس كان الضرب محدد الأهداف..
وسفيان اللي حاول يقاومهم ماقدرش..
الضربات قعدت تنهال عليه لين افقداته االوعي ..
ولما طاح لوطا..طاحوا في ضرب برجليهم..
بعدين اللي فيده الحديده خبطه بيها ع راسه..
:خشمه خشمه...
وضربه ع خشمه كسرهوله...
:ترا شوفه قاعد حي!؟
طبس واحد منهم شاف النبض بعدين شبحلهم ودار حركه بيده..
:هي تحركوا اركبوا..
ومشوا يجروا لسياراتهم ركبوها وتحركوا....
وقعد سفيان طايح في مكانه وغايب عن الدنيا....
وتليفونه في سيارته يرن....
"أم سيف...يتصل بك"

#صلوا_على_النبي

يتبع…
الفصول الاربعة