شكولينا

الجزء الخامس عشر

#شكولينا 🍫
#الجزء_الخامس_عشر
#الجمان_الفريد

الصلاة اولا💕💕
《في بعض من الحوارات حقيقيه وهي تعبر عن وجهة نظر اصحابها》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
الساعه 7:30صباحا...
نازل من حوشه..الحواجب معقوده..والوجه مقلوب..
رن تليفونه...
طلعه من جيبه وشاف المتصل رقم دولي..
استغرب..
فتح الخط ورد...
مروان؛ايوه .
"صباح الخير مروان"
مروان:نوريه..
"ايه نوريه كيف حالك وحال وليدك"
مروان:الحمد لله بخير..
وصل لوطا لقي سفيان متكي ع مقدمة سيارته ولاهي بتليفونه
مروان:انتي شن حالك وحال حسين..
"الحمد لله تمام..صغاري شن حالهم رادين بالكم عليهم"
مروان:في عيونا يانوريه..
"باهي الحمد لله..طبعا اني مش حنسأل ع حال امي لاني وين نشدت ع حالها غيرك قلبي وجعني والدم رقي لراسي"
غمض عيونه وتنهد بملل..
وسفيان قام عيونه وشبحله..
فتح مروان عيونه ونزل وهو يقول:خيرها امي مافيها شي حالها خير من حالي وحالك..
"لايامروان لاحبيبي..غلط هكي راهو..هادي امك فاهمه شن معناها امك..كل شي يرخصلها مافي شي يسوى حاجه قدامها لامراة ولاصغار.."
مروان بضيق:تي غير علاش الكلام هدا كله يانوريه..
ضيق سفيان عيونه وهو يشبحله..
وبنبرة باكيه ردت عليه..
"علاش!! معقوله يامروان معقوله امس نكلم امي نلقاها تبكي وواجعها خاطرها تقولي خوتك اللي هدا خدي وجهه هو ومرته وخلوني..هدا وهما قاعدين معاي هكي دارو مالا كان بعاد عني راهم نسوني مرة وحده"
غمض مروان عيونه وتنهد بضيق..
"قالت وين كلمت مروان سمعني كلام اول مرة نسمعه ع خاطر مرته..".
فتح عيونه وقال:شن قلت!!؟
"عارف روحك شن قلت...امك قالت معاد نبي حد ان شاء الله ربي مايخليني مستحقه لحد وان شاء الله نموت خفيفه ظريفه مانثقل ع حد ولايجيني نهار يلوحوني ولادي في دار العجزة"
مروان وهو يشوف لسفيان :لاحول ولاقوة الابالله..
وسفيان يشبحله بقلق وهو مش فاهم شي..
"ياخسارة والله ياخسارة..خسارة ماشقت وتعبت وربت ياخسارة وخلاص.."...
وسكرت في وجهه..
مروان:الو..نوريه..
بعد التليفون وشاف الشاشه لقاها سكرت..
سفيان:خيرها نوريه!؟
مروان شبحله وقال:شيك دارما دارتهالي ع صبح ربي...ع موقف تافه مايستاهلش..
سفيان بإستغراب:موقف شني؟...
🏵🏵🏵🏵🏵
مقعمز في الدار يشرب في القهوة ويشبحلها وهي مقعمزة ع الصلايه وشاده المصحف وتقرا..
سكرت المصحف بعد كملت وناضت وهي تلف في الصلايه وتقول:تبي تفطر هنى ولالوطا؟
عدنان بإبتسامه:هنى..
هي ضحكت وقالت:باهي..
حطت المصحف في مكانه وحولت المصليه وعلقت ومشت طلعت من الدار..
وهو خدي فنجانه ولحقها..
🌺خشت للكوجينه شافت لقفص العصافير بإبتسامه وقالت:هاه تو نحطلكم فطوركم انتم الأولين...
مشت عبتلهم ميه وحطتلهم الماكله الخاصه بيهم وعدنان واقف في الكوجينه متكي ع الحيط وهو يتفرج عليها..
بعد كملت التفتت عليه وقالت؛نحس فيك تبي تقول حاجه من امس .
ابتسم وقال:ما سألتيش نفسك علاش روحت امس بعد قتلك مش مروح..
لينا:لاسألتها وهي جاوبت قالتلي اكيد ماصارش منه وقالوله روح..
عدنان ضحك بعدين قال:لا صار منها..وتمت على خير والحمدلله وعطوني الآذن نروح بس في سبب تاني؟
لينا عقدت حواجبها وهي تقول:شن هو؟
عدنان رفع حواجبه بعدين نزلهم وابتسم بعدين قال:تعرفي انك وجه خير عليا ومعاك انتي متاكد اني حنوصل لكل شي تمنيته..
ابتسمت لينا بفضول تبي تعرف شن يبي يقول...
عدنان:طلع اسمي في دورة فيها 50ضابط في روسيا..
تعكرت ابتسامه لينا وحست صدرها ضاق..
عدنان: مدتها شهر..يوم الآثنين ان شاء الله ماشيين..
لينا حست قلبها انغم وحست النفس هرب عليها..
وكإن الدنيا لفت بيها..شدت في حافة الرخامه...
عدنان جاها وشدها وقال:لينا...!
لينا وهي تحاول تشد روحها:مافي شي عدنان دوخه عاديه..
عدنان وهو عاقد حواجبه بخوف:لا مش دوخه عاديه من لماجيت واني ملاحظ انك مش زي قبل ضاعفه وزي الذابله..
لينا شبحتله وقالت؛ماتبالغ..
عدنان:نبالغ..بعدين خداها وطلعها برا الكوجينه وهو يقول..نفطروا ونرفعك اديري تحاليل..
لينا:لا عاد مش لهالدرجه عاديه تو نفطر ونولي كويسه..
عدنان:بنرفعك اني قلت تم الكلام...قعمزي..
لينا قعمزت وهي تقول بتوسل:عدنان..
هو طبس باس ع راسها وقال:شويه وجاي...ومشي للكوجينه وهي معاه بعيونها اللي غرقت بالدموع...
لينا خافت لما قاللها انه بيسافر يعني شهر كامل حيكون فيهم عدنان بعيد هلبه...شهر مش عارفه شن حيصيرلها فيه وشن بتشوف..
حتى لحوش اهلها ماتقدرش تمشي بعد ماأرتبطت بعمل وخدمه مع ناس...
لهذا هي مضطره تتحمل الجاي بكل شي فيه مهما كان صعب..
🏵🏵🏵🏵🏵
راقده ومتعمقه في النوم...
اول مرة ترقد براحتها ...اول مرة ذوق طعم النومه الهنيه من لما تزوجت..
لكن مش مكتوب عليها تشبع منها...
ناضت مفجوعه وهي تحس بشي قوي نزل ع ذراعها يهز فيها وصوت فيه نبرة عصبيه ينوض فيها...
"نوضي فوق...نوضي"..
هي طول ناضت قعمزت وهي مفجوعه قالت:خيرك شن في؟!
سفيان هز راسه وقال:تحسابي روحك بتفوتيه ولا..نوضي تحركي بدلي حوايجك وانزلي..
زهور بفجعه:خيرك ياراجل شن جاك؟!
سفيان:قتلك نوضي وفوتيهم طروحك هادم
تتمارضي بش ماتنزليش لوطا...
هي قعدت تشبحله بضيق وهي ساكته..
سفيان:اني من اول يوم شن قتلك قولي...شن قلت...مش قلت تبي تكسبيي اكسبي امي وخواتي تبي تخسريني اخسريهم..علاش مصرة تخسريهم..تبي تخسريني!! ماعنديش مشكله اني نسقدك لحوش ماليك ونعطيك كلمتك وينتهي الموضوع..قولي انتي تبي هكي!؟.
هي نزلت دموعها وقالت؛عييت اني عييت ديما واني اللي نكرد ونلهد ونجري بروحي ..مرت خوك مروان بعد جابت معاش نزلت بكل..ومرت عدنان البيه هديكا بمزاجها يوم تنزل ويوم لا وحاطينها فوق روسهم خايفين من راجلها..
هو فنص فيها وقال:شن قصدك..
زهور ودموعها ينزلوا:قصدي واضح..فرق بين اللي داير قدر لمرته وبين اللي مخلي قدرها سلته تحت الرجلين..
وصلاته لأقصى مراحل الغضب كان حيفقد اعصابه وينهال عليها بالضرب..
لكن سفيان ع جفافه وقسوته وشخصيته الصعبه..يستحيل يدير شي زي هدا....
تحكم في نفسه بقوة وقال بصوت هادي لكن يخوف...
تبي تطلقي...!؟
زهور قعدت ترجف من الخوف وهي تشبحله..
سفيان بغضب:تكلمي..
هي حركت راسها بسرعه بالنفي..وهي تبكي..
رفع حاجبه وقال:مال توا...تنوضي..تبدلي وتنزلي لوطا...ولو...شفت منك اي تصرف او قالولي درتي شي مايعجبش...او عاودتي الكلام اللي قلتيه مرة تانيه...
نطلقك طول ولو من يخش بيني وبينك مش حنردك..
فاهمه..
هي تشبحله بخوف وتبكي بس..
سفيان غمض عيونه بعصبيه وقال:فاهمه!؟
هي انتفضت وقالت ببكي:فاهمه..فاهمه....
عطاها نظرة حاده زادت خوفتها...بعدين مشي طلع من حداها..
زهور بهمس وهي تبكي:عيشة سودا عيشه غبرة بخت اسود..
...........
"ايااه علينا يامروان "
مروان وهو يحاول يتمالك اعصابه:اني قلت انزلي يعني انزلي..
منى بحده ودموعها في عيونها قالت:مش نازله هي..
ضم شواربه لقدام بغضب بعدين قال:تمام كان انتي بتسكري راسك اني نكلم بوك يتفاهم ماقدرش يتفاهم معاك يجي يرفعك لكن بروحك بطول..
ارتسمت ع وجهها ملامح البكاء ..
مروان:مازال ربع ساعه ونمشي للخدمه فاتت الربع ساعه مانزلتيش وتي روحك...
ومشي خلاها..
حطت يدها ع شرحها وقعدت تبكي وهي تقول بصوت منخفض...حسبي الله ونعم الوكيل...
🏵وخلال الربع ساعه..
نزلت زهور من فوق...ولحقتها منى وهي شاده ولدها..
وقفوا ع الباب وقعدوا يطقوا...
ورجالتهم واقفين يشبحولهم...
داخل....
وجيهه مقعمزه تشرب في القهوة مع بنتها عفاف وعزوزتها..
زبيده؛نوضي افتحي يابنتي واستهدي بالله..
وجيهه قعدت ساكته..
عفاف؛خليهم يتربوا ياحناي لين يشعفوا...
زبيده شبحت لوجيهه وقالت:لاحول ولاقوة الا بالله...
برا.....
سفيان وهو يشوف للعيل في يد منى قال؛ربي يهديها امي..
ومشي طول بيلف ع الحوش من جهة للكوجينه..
وصل في بابها طق الباب اكثر من مرة لكن بلا فايده..
قام تليفونه واتصل بأخته عفاف..
وتليفون عفاف عند وحده من بناويتها تلعب بيه تسكر ع سفيان وين يتصل بش تكمل اللعبه..
رفع حاجبه وقال:صار هكي!!
واتصل برقم امه...
••عفاف ناضت ومشت للطاوله خدت تليفون امها وقالت:سفيان..
وجيهه:جيبيه..
مشت مدت الهاتف لأمها..
خداته وجيهه وفتحت الخط وردت..
وجيهه:ايوه..
سفيان:تعرفي يام كان مافتحتيش الباب توا قسما برب العزة نطلع ومعاش تعرفولي طريق..تعرفيني نديرها..
هي تنهدت بضيق بعدين قالت؛رتيل...يارتيل...
طلعت رتيل من الكوجينه وهي تقول:نفتح..
وجيهه:افتحي..
🏵🏵🏵🏵🏵
"هي خلاص واتيه"
لينا خدت شنطتها وقالت:ايه..
عدنان خدي مفاتيحه من فوق الزيانه وقالت؛-تعالي..
خداها من يدها وطلعوا....
••وين وصلوا لوطا لينا قالت..
لينا؛خل نعدوا نسلموا ع امك قبل..
عدنان؛بعد نروحوا نهدرزوا عليها ونتغدوا غادي..
لينا:باهي اقل شي خشلها صبح عليها..عمي من اول امس ياخد ويوصي عليها وع جداك قبل يعدي لمصراته..
عدنان ابتسم وقال:تمام بري اركبي السيارة شويه وجاي..
لينا بإبتسامه:تمام..
ومشت للسيارة...وعدنان مشي للحوش...
🏵🏵🏵
سفيان:انتي لو كلمتيني من الأول تصرفت لكن ديري هكي يام تسكري علينا الباب!!
وجيهه قعدت تاكل في صمت..
زبيده:افطر وليدي افطر...
سفيان:مانبيش طارت النيه...
ع خشة عدنان وهو يقول:صباح الخير..
شبحوله وقالوا :صباح النور..
عدنان:كيف حالكم اليوم..
ردوا عليه باصوات متقطعه:الحمد لله..
وجيهه:فطرت؟
سفيان شبحلها..
عدنان:ايه الحمدلله..يام ماشي بنرفع لينا تعاين..
••في الكوجينه
كانوا منى وزهور يشغلوا ودموعهم في عيونهم...
سمعوا حديث عدنان..
زهور حست بضيق شديد لما سمعت اخر كلام قاله..
وجيهه:علاش خيرها؟
عدنان؛مش عارف الصبح جتها دوخه ووجهها مش عاجبني..
وجيهه؛مرتك مش وكاله بالهون ماكلتها توقعت يصير معاها هكي..برا سلم ولدي برا ماتعطلش عليها..
عدنان ابتسم وقال؛تمام..السلام عليكم..
ومشي وهو مستعجل..
سفيان شبح لأمه وقال:كان يعطيني شويه من حظه هالعدنان..
شبحتله امه بطرف عينها..
وهو ابتسم بتهكم..وخدي خبزة وبدي يفطر..
زبيده:افطر سلم وليدي افطر..ربي ينجيه ياربي ويعليه..
ضحكت عفاف..
وهو شبح لحناه بضحكه وقال:تي تعرفي كان مافي حد يحبني في الدنيا سادني.
امه وهي تاكل تشوفله بنظرة جانبيه..
وهو ياكل ويشوفلها برفعة حاجب..
🏵🏵🏵🏵
الساعه 9:45 صباحا..
في احدى العيادات...
لينا:شنو دكتورة..
الدكتورة بإبتسامه؛هو عندك فقر دم بس اللي مخلي اعراضه واضحه عليك شي تاني..
لينا بقلق:شن هو يادكتورة؟
الدكتوره؛-اسمك..شافت الورقه وقالت..لينا...يالينا انتي حامل..
لينا بدهشه:كيف!!
الدكتورة بضحكه:حامل..وبش تزيدي تتأكدي تمشي لدكتورة نساء وبش تعرفي التفاصيل..
لينا ضحكت وهي متفاجئة..
الدكتورة:قداش ليك متزوجه..
لينا:اليوم خشيت 23يوم..
الدكتورة:ماشاء الله الله يبارك..
ابتسمت لينا بفرح وهي مش مستوعبه..
🌺طلعت عدنان اللي جاها طول وهو يقول..
عدنان؛هاه شن صار؟
لينا بضحكه:حامل..
عدنان رفع حواجبه وهو متفاجئ بعدين قعد يضحك..
لينا بضحكه:حتى نا مااستوعبتش..
عدنان بضحكه؛ان شاء الله يجوا توامه..
لينا ضحكت وهي مفنصه عيونها..
عدنان بتساؤل:يعرفوا من توا كانهم توامه ولالا؟
لينا بضحكه:طبعا لا...هي خل نعدوا لدكتورة النساء نشوفوا الوضع..بتخش معايا راهو..
عدنان شد يدها وقال بإبتسامه :تمام..
ومشوا مع بعض وايديهم في ايدين بعض..وقلوبهم متعانقه عناق فرح بالنعمه اللي زادت ربطتهم ببعض اكثر واكثر...
🏵🏵🏵🏵
"هونا وحده اضم في دار التقعميز والتانيه الكوجينه اللي برا"
عفاف تكلم في رنده ع الهاتف..
"مايمشوا الا هكي الكلبات..باهي وهديكا العبده"
عفاف:قال راجلها مريضه رافعها بيعاينها..
"وخيرها زبده الكاكاو"..
عفاف بضحكه:ياحقيره..والله مانندري عليها..
"اسمعي لازم اني تشدلها هي راهو..لو قعدت مخليتها ع راحتها حيتمردوا هدوكا مرة تانيه وينكدوا ع رجالتهم"
عفاف:امي خايفه من عدنان خايفاته ياخدها ويطلع من الحوش واحتمال يعيشوا في سبها تعرفي عدنان انتي كان سكر راسه ع شي..
"هادي لازم نتفاهموا معاها من غير مايكون عدنان في الصورة"
عفاف:خل تروح نوريه بعدين يصير خير..
"هي هادي..ايه حقة امتى بتبدوا حملة التنظيف العيد القريب"..
عفاف:نهار الاثنين ان شاء الله..
"باهي انتي راجلك مازال مطول"..
عفاف توترت من السؤال وقالت:تقريبا مش حاضر العيد هنى هلبه الخدمه اللي عنده غادي..
"معناها بتعدي في حوشنا"
عفاف بشي من الربكه:امم..ان شاء الله...
••في دار التقعميز..
زهور:خلي المكنسه يارنا خليها..
ورنا تلعب ع البطمه مرة تولع ومرة تسكر..
زهور:رفيده شدي اختك..
ورفيده تلعب مع اختها التانيه بالنقال ومش معبرين زهور..
نور بنت نوريه:حولي رنا حولي  .
ورنا تشبحلهم وتلعب بالبطمه...
زهور خلاص بتفقد اعصابها قالت بعصبيه:حولي يابنت..
انخلعت رنا وبدت تبكي...
ورفيدة لوحت التليفون وطارت تجري بش تحرش امها..
زهور غمضت عيونها وهي تقول:استغفر الله العظيم..
وشويه وجت عفاف تجري لبنتها خدتها وهي تقول:علاش كشختي عليها!!
زهور:سلامتها ياعفاف ماخلتنيش نكنس وهي تلعب ع المكنسه..
عفاف:ناديتي عليا مش تكشخي عليها..
وخدت بنتها وطلعت..
شويه وسمعوا صوت سفيان ينادي..
"عفاف"
زهور:ووك عليا اني وخلاص ..
ومشت ولعت المكنسه وكملت كنس..
••في الكوجينه
عفاف خشت لخوها وبنتها في حضنها تبكي..
سفيان:خيرها حبي..
عفاف مدتهاله وقالت:مرتك كشخت عليها..
سفيان :شن هي!؟
عفاف:قالت ماخلتهاش تكنس..
سفيان بعصبيه: زهور...زهور..
عفاف:خلاص فوت اني كلمتها..
سفيات باس خد رنا وقال:خلاص قلبي خلاص..وقعد يمسح في دموعها..
ع خشة زهور:نعم..
سفيان:علاش مكشخه على رنا..
زهور:سلامتها يابنات البنيه مشاغبه مش مهنيه روحها..
عفاف:الله يبارك على بنيتي .
سفيان:مرة تانيه نادي على أمها تتفاهم معاها تفنص فيها حتى التفنيص ياويلك..
زهور بلعت ريقها وقالت:باهي..
ولفت بتمشي...
سفيان:قتلك بري اني..
ولت وقعدت واقفه في مكانها..
سفيان؛بري..
بسرعه مشت طلعت ودمعتها في عيونها...
عفاف:كترتها عليها..
سفيان؛ماتمشي الا هكي هادي..المهم توا اسمعي..قولي لامي الجماعه اللي جايين من زليطن بيجوا العشيه ويقعدوا للعشي  والراجل اللي بيجي يشوف النخل جاي بعد الغدي احسبوه حتى هو..
عفاف:حاضر...ومشت بتقول لأمها...
وسفيان لف ومشي طلع برنا..
وهو ماشي في الجنان..
سفيان؛-قولي سفيان..سف...يان..
رنا:سوفي..
سفيان بضحكه؛يافرعونه..قولي سفيان سفياااان...
رنا؛لاااا..
سفيان عضها من يدها بعدين قال؛قولي سفيان خير ماناكلك..
رنا؛بيش..
سفيان؛معناها بناكلك...وقاعد يعض فيها بلطف ع اساس انه ياكل فيها..وهي تضحك..
••فهاللحظه..
خشت سيارة عدنان...
الزوز جو عيونهم ع سفيان وهو يلاعب في رنا..
بانت ع وجه عدنان ملامح الحزن وقال؛نسيته بكل..
لينا؛شن هو اللي نسيته...
تنهد عدنان وقال؛الطورطه اللي جايبها والجو اللي دايره..قصدي خوي سفيان..
لينا:خيره؟
عدنان:قريب يسكر متزوج ولتوا من غير صغار..
لينا خطرت عليها اختها هناء وقالت:خطرت عليا اختي هناء هديك ليها عامين متزوجه..
عدنان تنهد بضيق وهو يشوف لخوه..
لينا:ربي يرزقهم ان شاء الله..ربي يبعتلهم قسمهم في الوقت المناسب..
عدنان:قريب ان شاء الله..
لينا؛بحول الله وقوته ..
••سفيان لما شافهم جو مشي برنا وقعمز تحت النخله في مكان مستخطي..
وعدنان نزل هو ومرته ونزلوا سفرة البكلاوة وبوكس التورته ومشوا بيه للحوش..
سفيان لما شافهم بشن خاشين عرف السبب..
ابتسم ابتسامه جانبيه وعيونه غرقوا بالدموع..
رنا:سوفي..
ضحك  وقال:فرعونه..وهربت من عينه دمعه مسحها طول...
🏵🏵🏵🏵
"الله يبارك الله يبارك"..
لينا تسمع في وجيهه شن تقول بفرح وهي مبتسمه بخجل..
وجيهه؛على خير وسلامه يارب..
لينا:امين..تسلمي..اللاي..
زبيده:تحلي عويناتك ع خير يابنتي..
فتح عدنان سفرة البكلاوة وقال:من نهار خديتها والخير يهل عليا من كل تركينه..
ضحكت لينا بخجل..
عدنان مد لأمه...وبعدين مد لاخته عفاف..
عفاف وهي تشوف للينا:مبروك..
لينا؛الله يبارك فيك..وين زهور ومنى..
وجيهه:تلقيهم داخل..
عدنان مدلها السفرة ..
هي جاته خدتها وخشتلهم داخل..
لقت منى في دار التقعميز مشغوله بولدها..
لينا:السلام عليكم..
منى بملامح متعبه ابتسمت وقالت؛مبارك حبيبتي تحلي عويناتك على خير..
لينا:الله يبارك فيك..تفضلي..
خدت منى طرف وقالت؛يزيد فضلك..
لينا:وين زهور؟
منى:في الحمام..
لينا :اها..بعدين التفتت ع الصغار اللي كانوا منسجمين يامع التليفون ولاالتلفزيون..
جتهم وهي تقول:شباب..صبايا..
شبحولها..
لينا بإبتسامه:هي تفضلوا..
مؤيد؛نبي كعك مخمر..
لينا بضحكه؛حاضر..
الشريف؛عندي واجب فيه رسمه ترسمهالي؟.
لينا:من عيوني..
نور:ارقدي معاي اليوم نبي حكايه..
لينا:كان قال خالك عدنان باهي حاضر..
ابتسمت منى وهي تشوف للينا وتهز بولدها بش يرقد...
وفي الحمام...
سلفتهم تبكي بحرقه وصمت هادي سلفتها الجديد من قبل تسكر شهر حملت..وهي قريب تسكر سنه وماصار معاها شي..
زادت خافت اكثر..لان سفيان هكي حيزيد شوقه بش يولي عنده عيل..وممكن ياخد قرار انه يستغنى عنها بالزواج عليها اوتطليقها والزواج بغيرها..وهدا شي هي مش قادره تتحمل حتى التفكير فيه..
🏵🏵🏵🏵
"مبارك مبارك..تشوفه ع خير ان شاء الله"
عدنان بإبتسامه:ان شاء الله اني وياك في نفس اليوم نفرحوا هالفرحه..
ضحك سفيان وقال:ان شاء الله...اللي عند ربي مش بعيد..
عدنان؛اكيد..ايه بنقولك..الاثنين الجاي ان شاء الله مسافر لروسيا..
سفيان بآستغراب:روسيا..!
عدنان بإبتسامه:دورة لتدريب 50ضابط غادي لمدة شهر..
هز سفيان راسه بإيجاب وهو يسمعله...
🏵🏵🏵🏵
في الكوجينه...
عفاف:حتى خواتك هكي يحملوا من اول شهر؟
زهور كانت تقطع في اللحم وهي تسمع فيهم وقلبها قاعد يتقطع حتى هو..
لينا:اختي الكبيره قعدت 7شهور بيش حملت..واختي تانيه لها سنتين لتوا ربي مارزقهاش..
زهور قعدت منتبهه معاها..
عفاف:علاش؟!
لينا:ع قد ماعاينوا الدكاترة يقولوا مافيهم شي ومسأله وقت بس..
التفتت زهور وقعدت تشبحلها..
عفاف:قوليلها لو فيها كيف تطلع تعاين برا خيرلها وتلحق عمرها..
لينا:عدت لمصر ولقت نفس النتيجه..هي توا سلمت الامر كله لله..وربك مش حيخيبها..
عفاف:ان شاء الله قريب والله هلبه سنتين..
لينا تنهدت بضيق وشبحت لزهور..زهور لفت ورجعت تكمل تقطيع اللحم..
شافت لينا لعفاف وقالت:نبي ندير حاجه مانبي نقعد مصبيه هكي..
عفاف:بري قعمزي حدا امي ماعندك ماديري..
لينا قعدت تشبح لعفاف..
وعفاف مشت تمصمص في رضاعه بنتها وهي تقول:الله غالب ماعندنا مانديروا..
لينا وهي مضايقه مشت طلعت من الكوجينه وتوجهت لدار التقعميز..
لقت منى لاهيه بولدها ومعاها عزوزتها...
لينا:عمتي..
شبحولها..
لينا:قصدي اللاي...نا كان خشيت الكوجينه درت حاجه بالدرقه في من يفضحني؟
ضحكت وجيهه وقالت:بري عاوني سلفتك بري..
ابتسمت لينا بحماس وقالت:حاضر..
ولفت ومشت طلعت..
منى:كان يندري سفيان!؟
وجيهه:من بيقوله انتي،!؟
منى:مرته..
وجيهه:تجرب تتكلم بس..
منى غيرت عيونها عنها وقالت في نفسها"الدنيا حظوظ الله غالب"
🏵ودارو الغدي لينا وزهور مع بعض..
كانت لينا تحاول تخلي زهور تنسجم معاها وتقرب لها اكثر..
بس زهور كانت حاطه حاجز ماتبيش تحوله..خصوصا انهت تكن مشاعر كره اتجاه لينا..مش لسبب معين غير ان العزوز فضلتها عليهم ووضعها خير من وضعهم في العيله يعني مش لغلط ارتكباته لينا في حقها او إساءه توجهتلها...
بعد الغدي..
طلعوا يغسلوا الماعين برا ومعاهم منى..
لينا:هدى كله صار الصبح!
منى:ايه..
لينا:لاحول ولاقوة الابالله..
زهور:بكري اتصلت بيا نوريه ماخلت ماسمعتني..
منى:حق!!
زهور:كلامها زي السم حسبي الله ونعم الوكيل..
لينا بإستياء:انا لله وانا اليه راجعون..
منى:ااه كان تلقى معاش تروح ..
زهور بضحكه:ايه واطيح عليها رافعه ولايصير هداكا الجري ويدهسوها برجليهم...
لينا بضحكه؛حرام ع خاطر عويلتها
زهور شبحتلها من فوق لتحت..
منى:مش منا ياوخيتي مرمرتلنا عيشتنا قطرتلنا الثوم في عيونا...لاوماشيه تحج ماناقصها الا الحج..ضحكت وقالت..اصلا حتلقى مصرعها يوم رمي الجمرات الرشاده اللي بتحدفها ع الشيطان تولي عليها...
قعدوا يضحكوا لينا وزهور بكتمان...
"هيا..اللي من غادي خشوا داخل"..
لينا من خوفها سيبت اللي فيدها ومشت طول خشت..
زهور:ركبها الرعب..
منى:والله ماتنلام راجلك يخوف..
ومشوا هما الزوز وخشوا داخل وسكروا الباب..
ولى سفيان ومشي لباب الحوش القدامي..
وقف في الفم وقال:ماتعرف حدا يبين راسه من الروشن اتقوا شري...سمعتوا...اتقوا شري...
وسكر الباب بقوة...
وجيهه:سكروا السرينتيات فكونا..
رتيل:حاضر...
••في الكوجينه..
لينا مع نفسها"ماني عارفه كيف عايشه مع هالجمري يازهور..هو جمري وهله جحيم كان الله في عونك"
☘☘☘
ودار الراجل جوله كامله ع 7نخلات الموجودات في جنان الشريف ودارلهم اللازم وسفيان معاه..
اما عدنان هداك الوقت كان راقد لأن عنده العشيه مشوار مهم يخص السفرة..
ومروان مستمر في دوامه لبعد المغرب..
يعني سفيان في يوم عطلته حيقوم مقام بوه في الحوش..
🏵🏵🏵
بعد العصر..
وجيهه:بري رتيل جري جري بخري المربوعه..
رتيل بخوف:الرجاله توا بيجوا ماما حي عليا كان خشوا عليا سفيان يعدمني...
وجيهه:ياودي بري بسرعه مازال ماجوش هما  تحركي..
خدت رتيل المبخره من امها ومشت وهي خايفه..
خشت للمربوعه وقعدت تبخر فيها وهي تشوف لبابها الخارجي المردود بخوف..
وهي ادور وتبخر عطت الباب ظهرها فجأة انفتح..
التفتت وشهقت بعدين تنفست بقوة وقالت بضحكه بدون ماتركز؛خلعتني حسبتك راجل..
سفيان؛شن هي!!؟
هي استاقظت لروحها شن قالت وجت بترقعها:ماحسبتك شي..
سفيان:كيف!!؟
رتيل هربت وهي تقول:خلاص باي باي..
وطلعت تجري من المربوعه..
وصلت الصاله وحطت المبخره ع الطاوله وهي تقول:والله ماعاد مضحيه بروحي.. ومشت تجري لدارها..
وجيهه بضحكه:شكله خش عليها هزبها..يللا مش مشكله المهم المربوعه اتبخرت..
ضحكوا كلهم..بعدين عفاف قالت:حقه يام جايين جيران جدد للحوش اللي حدانا..
وجيهه:ايه واخيرا سكنوا فيه كنت نشوف فيه زي حوش الغوله..
لينا:ليه واجد فاضي..
عفاف:تلاته سنين..
لينا؛وليش ماانباع في المده؟
وجيهه:صارت عليه مشاكل ورث وتوا بس حزت..
زبيده:والله مشاكل هالورث بدت في كل تركينه قداش خوت انقطعوا وهي اللي قتلوا بعضهم ع خاطره..
عفاف؛ايه يومك وتاليك تسمعي خبر واحد قتل خوه..واللي قتلوا خوهم وعيلته..واللي خطف اخته ع خاطر الورث هددها بش تتنازل..
وجيهه:ربي يجيرنا..
كلهم بأصوات متقطعه قالوا:آمين..
وجيهه شبحت للينا وهي ادير في شعر نور وباقي البنات حداها دايرات طابور يراجو في دورهم..
ابتسمت وقالت؛بتقعدي هني لما يسافر راجلك.
لينا:اكيد نا هنى مربوطه بالخدمه..
وجيهه؛وحتى بينا حني مانحبوش كناينا يبعدوا علينا حني..
زهور ومنى شبحوا للينا..
لينا اكتفت بالإبتسامه بدون ماتعلق...
🏵🏵🏵
وعدى باقي يوم السبت..ولحقه الاحد..
وجي الاثنين يوم سفر عدنان..
"امي هالمرة بنوصيك انتي وبوي عليها الله الله في لينا يام.."
وجيهه وعيونها معبيات دموع:في عيوني وليدي ماتخافش عليها .
الشريف:خليك مطمن راهي بنتنا هادي..
عدنان هز راسه وقال:حتى انتم ردو بالكم ع رواحكم..هي السلام عليكم..
ومشي بيطلع من الحوش..التفت شبح لأمها وكأنه مازال يوصي فيها على لينا وهي فهماته..
وجيهه:كون هاني وليدي في عيوني والله في عيوني..
ابتسم بعدين سكر الباب..
حطت وجيهه يدها ع صدرها وقالت:مش عارفه علاش هالو ديما بعيد..
الشريف:اياه عاد فكينا من الدراما ع قولت مروان..
ضحكت من بين دموعها وقالت:حتى هو معاش نشبحوا فيه يومه كله وهو يخدم..
الشريف:هدا هو ياوجيهه كبروا وكل واحد دار لروحه طريق بيمشي..حني علينا ندعولهم وبس..
وجيهه تنهدت وقالت؛ربي يفتح عليهم ويحميهم وين مايكونوا...
🏵🏵🏵🏵🏵
ولينا بعد طلع عدنان قعدت في شقتها ساعه تبكي..وماهدتش الا لما اتصلت  بأمها وهدرزت عليها امها هدتها وقالتلها كلام يريح نفسيتها...
بعد مكالمة امها..توضت وصلت ركعتين وقعمزت تستغفر وبعدين دعت الله يحمي راجلها..ويكون معاها ويدفع عنها كل  شي ممكن يؤذيها من الناس اللي عايشه بينهم..
وبعدين نزلت لوطا تعاونهم في الحمله اللي دايرنها ع الحوش..
وطبعا شرفت رنده...لكن مادارت شي اخطا هالكم مرشة اللي مسحتهم في مكتبة الماعين...
وبعدين صفرة كاكاو وحلو وقعمزت هي وخواتها يدقوا الحنك..
والكيد ع الجواري...قصدي...الكناين...
🏵🏵🏵🏵
الساعه8:30مساءا..
بعد التعب اقترحت لينا يجيوا عشي من برا..وبعد جهد جهيد في اقناع وجيهه وافقت وهي بعد جهد جهيد في اقناع سفيان وافق ع المضض ومشي جابلهم وجبة مشاوي مشكله..
في الكوجينه..
منى:بالله لينا ديري حصة عمي ومروان وغلفيها..
لينا:باهي..
ع خشة زهور اللي كانت ماشيه تحط لسفيان عشاه في المربوعه..
زهور:ترا وين حصة عمي خل ندسهاله..
منى:لينا بدسهاله..
شبحت زهور للينا بحده بعدين مشت للماعين بتغسلهم..
لينا؛شن رايكم نطلعوا نتعشوا في الجنان.
زهور:ايه بش يقولوا تعشوا برواحهم..
منى؛صح لينا تصير مشكله بعدين..
لينا تنهدت وقالت:عندكن حق..لكن والله الجو سمح برا...
فجأة...
سمعوا صوت عيطه..
شبحوا لبعض بفجعه..
لينا:هذا شنو....
"وووه عليا بنتي وووه"..
زهور:عفاف هادي..
التلاته جو بيطلعوا من الكوجينه لقوا..
رنده طالعه تجري برنا..
وعفاف تعيط  وتخبط...
وامها تحاول تهديها ورتيل حداهم تبكي وباقي الصغار مفجوعين..
منى :خيرها!!
عفاف بعياط:ماتت بنتي ماتت..
لينا:شن تقولي!؟
رتيل ببكي :مش عارفين شن كلت وغصت بيه..
عفاف:ووه بنتي...
وجيهه وهي ترعش :ماتقوليش هكي اسكتي..
زبيده اللي قعدت في الدار كانت تدعي:يارب لطفك يارب عفوك...
••برا..
رنا كانت بين ايدين سفيان اللي مش عارف شن يديرلها هو بيموت من الخوف:رنا...رنا حبيتي رنا...
رنده خشت داخل وهي حاطه يدها ع وجهها وهي تبكي..
عفاف:ماتت بنتي ولا ماتت خلاص..
"رنا...كلموا حد يجي ياناس مش عارف نتصرف.. "
سمعت عفاف كلام سفيان طول فقدت وعيها...
لينا كسرت كل الحواجز...
وطلعت تجري..
وصلت برا ..خدت البنت من سفيان بالقوة وقلبتها..
وقعدت ضامتها وهي تقول: بسم الله الرحمن الرحيم ..
الحمدلله رب العالمين الرحمن الرحيم..
وكملت تقرا في سورة الفاتحه وهي تسعف في رنا..
وسفيان عيونه ع رنا كيف وجهها مولي ازرق وفاقده الوعي...
كان حاس روحه حتطلع لو صارت فيها حاجه..
ولينا تسعف فيها وتردد في السورة..
لعند مابقدرة الله..البنت بدت تكح..
لينا حطت يدها في فمها وجبدت حاجه ولوحتها وقعمزت ع روس صوابعها وضمت رنا لحضنها..وهي تقول في وذنها..خلاص ماما خلاص ...
سفيان قعمز ع الدرجه اللي قدامه وهو منهار من الخوف حط راسه بين ايديه وقعد يبكي..
ولينا ناضت برنا ودخلتها داخل..
وين خشت عليهم بيها..
لينا:مافيها بنتك ياعفاف ربي نجاهلك..
عفاف ناضت تجري خدت بنتها وضمتها بقوة..
اما وجيهه جت للينا وضمتها وهي تقول:ربي يحفظك بنيتي..ربي يطول في عميرك...
ولينا ضمت عزوزتها وقعدت تبكي من الرعشه ومن كثر مالموقف اثر فيها..
عفاف:الله يربحك يالينا الله يربحك ياوخيتي..وجتها ضمتها..
ولينا تبكي وتقول..مادرت شي نا ربي اللي دار ياعفاف حمد لله ع سلامتها..
رنده جت للينا مسحت ع ذراعها وهي تبكي..
ومنى ورتيل يتفرجوا ع الموقف وهما متأثرين..
اما زهور فكانت تشبح للينا بنظرات حقد واضحه..
ولينا شبحتلها وقالت:اطلعي لراجلك منهار راهو..
هي طول مشت طلعتله..
وجيهه:عفاف خودي بنتك اغسليلها وجها وطلعيها لخالها تعرفيه قداش يحبها..
عفاف رشفت وقالت ؛باهي ..وضمت بنتها وقعدت تبوس فيها..
ومشت بيها للحمام..
وجيهه:الله يطلعك من كل ضيقه كيف ماطلعتينا ..
لينا؛ربي اللي طلعكم منها انا كنت سبب بس..
وجيهه؛ماغير ربي يرضى على عدنان دنيا وآخره.
ابتسمت لينا بإمتنان وباست ع راسها عزوزتها..
رنده شبحت للينا بغيره بعدين مشت تشوف عفاف وبنتها...
اما وجيهه مشت تشوف سفيان..
منى:ووك عليا نحس في حليبي معاش يصلح بولدي..
لينا بقلق:قعمزي قعمزي..
قعمزت منى وهي ترعش مع بعضها..
اما لينا خشت داخل تجيبلها ميه...

يتبع …
الفصول الاربعة