شكولينا

الجزء الاخير _القسم التاني

#شكولينا
#الجزء_الأخير_"القسم الثاني"
#الجمان_الفريد

كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫
"ايوه فدوى..وصلتي..هي شويه بس"..
وسكرت ومشت خدت ملاية الصلاة لبستها وبتطلع..
عفاف:وين رنده؟
رنده؛فدوى وصلت..
ومشت كملت طريقها وعيون نوال وناديه معاها...
🍁من جهة تانيه وسط زحمه..
ولينا مقعمزة حدا ولدها ومعاها سهيله تهدرز عليها.
لينا بصدمه؛خطب؟
سهيله بضيق:ايه خطب..لكن لاهو ولاامه فرحانين بكل..كان تشوفيه يالينا يوجعك تصدقي نشدني عليها اخر مرة..
لينا بحزن؛الله غالب نصيبات..
سهيله تنهدت وقالت:ايه والله نصيب..
وحداها بمسافه نساوين خوتها يهدرزوا ويشبحولها..
وردة؛لبسها كله ماركات قفطانها واضح من وين..
نجمه؛فلوس ياماما فلوس يحكيلي عبدالسلام ع اللي عندهم ماياكلاش النار.
وردة:راجلك ربط حباله معاهم..
نجمه؛وانتي حركي راجلك خليه يستفيد..
ورده:لاياحنه راجلي خدمته كلها مع عمي والحمد لله حالتنا ولت احسن..
نجمه:ايه ربي يزيد ويبارك..وقامت فنجان النسكافيه وقعدت تشرب..
🍁وحدا الممر اللي يفتح ع الصاله..
رنده؛هاتي عبايتك..
حولتها فدوى وحولت الوشاح ومدتهم لرنده..
رنده؛بري قعمزي غادي ثواني وجايه..
ومشت رنده..
وفدوى وهي متحشمه شافت لينا ومشتلها تسلم عليها..
وصلت فيها وطبست سلمت عليها..
ووجيهه تشبحلها وتفصل فيها تفصيل..
حطت فدوى هديه في شنطه سيف وفلوس.
لينا:غير ليش بش هديك المرة جيتي وحطيتي..
قرصت خده سيف قرصه خفيفه جدا وقالت بإبتسامه:مش خسارة فهالسموح..
لينا:تسلمي يارب نردهولك عن قريب..
فدوى بإبتسامه:تسلمي..
ووقف ع حيلها وبدت تسلم ع الموجودات في الصاله لين وصلت في زبيده طبست باست ع راسها..
زبيده:تبوسي ع الكعبه..
فدوى:تسلمي..
وجت لوجيهه وسلمت عليها..
فدوى:كيف حالك خالتي..
وجيهه وهي تشبحلها بآبتسامه:الحمد لله..شن حالك انتي وحال العيله..
فدوى:الحمد لله..
ع جية رنده؛فدو..
التفتت فدوى وجتها..
رنده خدتها من يدها وقالت؛تعالي نعرفك ع اساور..
ومشوا الزوز مع بعض خشوا لدار التقعميز..
رنده:وهادي البطه اساور..
اساور بضحكه:امشي ياقرده.
وفدوى تضحك بعدين مشت سلمت عليها...
وبعد حوالي ربع ساعه..
بدو يوزعوا في العشي..
كان كسكسي بالبصله بس نظام صواني مش قعاد ومعاه اربعه انواع موالح وسلاطه ومسير وزيتون...
وهما يوزعوا ع الضيوف..
رتيل:تفضلي ابله نوال..
نوال خدت منها وقالت:سلمها ياربي كنتنا..
ابتسمت رتيل بخجل..
وناديه تشوفلها قالت:ماتشبحيش لفرق العمر نادينا نوال وناديه..
نوال:ايوه صح..
رتيل بإبتسامه:ان شاء الله..
وخدت صونيه ومدتها لناديه وقالت:تفضلي ناديه.
ناديه:يزيد فضلك عسوله..
رتيل:صحتين..
ناديه ونوال:سلمك..
نوال:سلمها ياربي..
ومشت رتيل مه الوقافه توزع ع الباقي...
ورنده وراها توزع في المشروب...
ونوال وناديه عيونهم ماتحولوش من عليها..
نوال:زي الغزاله..
ناديه:كان ياخدها زايد ياكبدي والله تشوف دلع عمرها في حياتها ماراته..
نوال:ان شاء الله يارب ان شاء الله...كان وحدانيته بتم ع ايديها خله والله يدلع واحني معاه...
ضحكت ناديه...
🍁وطبعا في وسط هالتقعميزة ناس من المعازيم وهي تاكل وتشرب كانت تعلق عليهم كيف بعد تلاته شهور من وفاة بنتهم دارو العشاوات والعزايم...
زي ماصار بعد وفاة عدنان بالزبط..برغم انهم عارفين انهم مايحزنوش لكن الناس كان ماعلقوا مايرتاحوا🍁
عفاف:غيدو ماما بري طلعي للشريف سفرة المية..
غيداء:حاضر..خدت من امها السفره وطلعت برا..
لقت الشريف ومؤيد واقفين..
غيداء؛هاك خود من يدي بيطيح..
جاها الشريف يضحك خدي السفرة وقال:مالقوش غيرك يادريه..
غيداء:بارد ع فكره..
مؤيد:اسمعي غيداء كان في حكة ببسي جيبي ماحصلتش اني..
غيداء:باهي..وخشت داخل..
والشريف مشي بالسفرة...
شويه طلعت غيداء وفيدها ببسي وميرندا تفاح..
مؤيد؛لمني التانيه..
غيداء:لهداكا الطويل يحبها..
مؤيد ضحك وخداهم....ومشي.
وهي خشت داخل خدت حكه لروحها ودرقتها ورا ظهرها بش ماتشوفهاش امها منعاته عليهم...
ومشت بيها تجري وخشت لدار خالاتها وسكرت الباب..
نور:حيي خديتي مشروب سعدودك حني سن توب زي البيبيات..
رفيده:يحسابوها بحر وياسي وشيرو..
وغيداء فتحت الحكه وقعدت تاكل وتشرب وهي مبتسمه ورايقه ع الآخر..
رفيده بغيظ؛تو نحرش امي..
غيداء:اممم حرشي..
ونور تشبحلهم وهي تضحك..
🍁🍁🍁🍁
"والله ماهاين عليا صغار ولدي يتربوا بعيد عليا"
حسين؛يام وصية نوريه مش حنخالفها لو شن يصير..وبعدين كان قعدوا هني من بيعانيهم اكرام!؟
رمضانه؛غصب عنها..
حسين:لايام لا..نبي صغاري يعيشوا مرتاحين مانبيش شوكه تنخصهم..
رمضانه:عيب حتى قدام الناس ياولدي..
حسين:يام من الاخير الموضوع هدا معاش تكلميني فيه الصغار بيقعدوا عند خوالهم وكان انتي مصرة يولوا نجيبهم لكن قبل نسقد اكرام..
رمضانه:وااك من كساحة راسك معاش يتفاهموا معاك بكل..
حسين:هدا اللي عندي..
ومشي طلع من دارها ..لقي اكرام بعيده شويه وزعميتها تكنس..زبطها كانت تتصنت..فاتها ومشي كمل طريقه..
هي التفتت شبحتله بعدين شبحت لباب دار العزوز وقالت بهمس؛علاش ربي ماخداكش وريحني منك بس..
ومشت وهي في قمة العصبيه وتدعي ع عمتها...
🍁🍁🍁🍁
"اسمعي غدوة جيبيه معاك الكتاب اللي قلتيلي عليه".
فدوى وهي تلبس في كندرتها:تمام..
وطلعوا هما الزوز..
فدوى:لولا مرت خوي ماجيت خليتها تختخه بش جابني..
رنده بضحكه؛زي مرت خوي سفيان كان نبوا منه حاجه ندخولها واسطه..
ضحكت فدوى ...
وهما طالعين شافوا مروان يتكلم بالتليفون وحداه الشريف يلعب..
كانت تبي تناديه بس تحشمت لما شافت بوه..
لكن الوليد هو اللي لما شافها ناداها..
الشريف بفرح؛فدوى...
وجاها يجري...وبوه تبعه بعيونه لين شافها كيف تضحك وقعدت تمسح ع شعر شريف اللي حاضنها..
ابتسم وهو عاقد حواجبه وابتعد من قدامهم..
الشريف:اوبا فدوى اوبا..
ضحمت وقاماته..
رنده:سلامته مولي رزين.
فدوى:ع قلبي زي العسل..وباساته من خده..
رن تليفونه وقالت:هدا خوي...بنروح اني شيرو..
الشريف:لالا..
رنده؛تعالى حبيبي تعالى وخداته منها.
الولد بدي يبكي وهو يقول:فدوى..
وفدوى مشت طلعت وهي مضايقه..
لعند ماوصلت في الباب ومازال تسمع فيه يعيط ويقول فدوي..
هي التفتت شبحتله بإبتسامة شفقه..
شافها مروان وهو مدرق ولاحظ انها طلعت بالسيف زي اللي مش هاين عليها.....
ورنده خشت بالشريف داخل وهي تحاول تسكته.
وماسكت الا بعد وين...ورقد طول من كثر ماعيط...
🌺🌺🌺🌺
الساعه 12:45ليلا..
لينا:مسكين فاقد امه مرة يقول فدوى ومرة يقول ماما..
سفيان وهو ينشف في شعره بالمنشف:من هي فدوى هادي؟
لينا؛صاحبة رنده..متعوده عليها ويحبها واجد..
سفيان:اها..
لينا غطت سرير ولده بالناموسيه وقالت:سفيان في فبالي فكره بنقولك عليها..
سفيان:قولي..
لينا:ع عويلة نوريه الله يرحمها...الشريف ومؤيد حيكبروا ولازمهم مكان مستقل يقعدوا فيه..
سفيان؛كيف مكان مستقل!؟
لينا:يعني مكان ليهم برواحهم في الحوش بيش ياخدوا راحتهم وطبعا بعد سنتين تلاته ان شاء الله....
سفيان؛كملي كلامك حسيته ناقص.
لينا ابتسمت وقالت؛شقة عدنان الله يرحمه..
هو قعد ساكت ويشوفلها..
لينا:بنات عفاف يجن بين الفترة والتانيه ويباتن وهالعاده عندهم من زمان واكيد حتستمر مع الوقت لازم ينفصل بيناتهم من البدايه هكي يكون افضل..طبعا هدا اقتراح وكان شفته في مكانه ديره..
سفيان؛حيقعد في دماغي لين يكبروا شويه كان حيانا ربي..
لينا؛إن شاء الله..
سفيان؛مانيش راقد مازال خاطري نسهر تطلعي نقعمزوا في الصاله..
لينا بإبتسامه؛تمام..تبي نديرلك حاجه..
سفيان؛لالا..تقعميزة هدرزة وبس..
لينا:تمام...
ابتسم وهو يمشط في شعره بعدين جاها خداها من يدها وطلعوا..
لينا:مشيتك تعدلت..
سفيان:خلاص فاتوا قريب اربعه شهور انجبر الكسر..
شبحلها وقال؛لكن قولي الصراحه شكل خشمي مش مأثر ه منظري..
لينا بضحكه؛بالعكس زادك سماحه..
سفيان؛غريبه..
لينا:شن الغريبه..
سفيان:البنات معاش يعاكسوا فيها زي قبل..
قرصاته من ذراعه..
وهو بضحكه يقول:ااي  ياعنشكلك نبصر ياختشه ...
لينا؛قعمز وماتستفزني فهالليل وتخلينا نتعاركوا..
قعمز وهو يضحك وهي قعمزت جنبه وع وجهها ابتسامة عصبيه..
☘☘☘☘☘☘
ومر شهر تاني..
الحياة ماشيه عاديه بروتينها المعتاد...مافيش جديد طرأ عليها..
يوم عن يوم الجرح يبدا يبرا..والنسيان يلعب دوره في حياة الإنسان..
هو مش نسيان تام..يقعد الفقيد موجوده في القلب وفي اعظم مكان في ذاكرة العقل والعمر..
وهي مافي حد بعد موته وقفت الدنيا..
حتى الرسول بعد موته الحياة استمرت وماوقفتش...
وفي الحقيقه الفراق بالحياة اصعب من الفراق بالموت...
🍁مقعمزة هي وصاحبتها داخل مبنى الكليه..
فدوى؛تجنن الروايه..
رنده:ايه وفي متعه فقراية الروايات الإنجليزيه باللغه نفسها..
فدوى:صح..
تنهدت رنده وقالت؛قلبت عليا المواجع..
فدوى قعدت تشبحلها بحزن..
رنده؛تعرفي ع اكثر من مرة بنخش نشوف صفحته ع الفيس بس منعت نفسي بقوة ومارقدت الا بعد ماقريت قرآن..
وتوا خاطري نشوفها بزياده نبي نعرف اي شي عنه..منظره مش رايح من بين عيوني اخر مرة تلاقينا فيها حاسه كسرته وخذلته هلبه..بس مش بيدي...ودموعها عبوا عيونها..
فدوى:كله من طليقك السافل حرم عليك تعيشي زيك زي غيرك..
مسحت رنده دموعها وهي تقول:بنخش عليها ويصير اللي يصير..
وقامت تليفونها وفتحت الفيس..ودارت بحث ع صفحته وطلعتلها وخشت عليها..
وفدوى تشوفلها بضيق..بعدين استغربت لما لاحظت ملامح الصدمه باديه ع وجهها..
فدوى:خيرك رنده شن شفتي..!؟
رنده وهي مصدومه مدت التليفون لفدوى...
فدوى خداته منها وشافت للشاشه رفعت حواجبها بعدين عقدتهم وشبحت لصاحبتها بدون ماتعلق..ومدتلها التليفون..
خداته رنده وهي تضحك بتهكم وتمسح في دموعها وتقول:كلهم زي بعضهم.....فيسع ينسوا...
تنهدت فدوى بضيق بعدين قعدت تمرر في نظرها ع المكان..
سكتوا شويه بعدين فدوى قالت؛مش خاشه المحاضرة
رنده حركت راسها بالنفي...
فدوى:تبيني نقعد معاك..
رنده:لاحبيبتي بري خشي احضري اصلا هكي ولاهكي مش حاضرة نجاح قريب توصل..
هزت راسها وقالت:تمام نتلاقوا بعد المحاضرة..وناضت مشت  من حداها..
ورنده قعدت تسمح في دموعها وغمضت عيونها وبدت تردد..
"عسى ربنا أن يبدلنا خيرا منها إنا إلى ربنا راغبون"
رن تليفونها فتحت عيونها شافتله وردت طول..
رنده:ايوه نجوحه...رشفت وقالت..ايه نراجي فيك......داخل اني داخل........ايوه كملي طول.....ايوه ايوه خودي يمينك..
اهو نشبح فيك...ورفعت يدها واشرتلها..
سكرت نجاح وجتها وهي مبتسمه...
وصلت فيها سلموا ع بعض وسألوا ع احوال بعدين قعمزت نجاح جنب رنده..
نجاح:شن حال خالتي وجيهه
رنده؛الحمد لله احسن من قبل..
نجاح:وصغار المرحومه؟
رنده:الحمد لله كويسين وفي خيار خيرهم..
نجاح؛دوم ان شاء الله..
رنده:تسلمي..انتي شن حالك وحال عويلتك..
نجاح:الحمد لله...تنهدت وقالت..سمعتي بأنس..
رنده كابرت وهزت راسها وكأنها تسمع في سؤال عادي:ايه..ربي يهنيه..
نجاح:حتى انتي شوفي  حياتك وتهني..
رنده ابتسمت وقالت:هاني شايفتها حياتي..
نجاح بإبتسامه؛فاهمه قصدي انتي..رنده حرام عليك شبابك وجمالك من حقك تعيشي حياتي وتتزوجي مرة تانيه وديري عيله ماتحرميش نفسك من هالحق..
رنده؛مانبيشي الحق هدا مستغنيه عنه هكي مرتاحه اكثر صدقيني..
نجاح هزت راسها وقالت؛باهي اسمعيني..في واحد قريب ليا ماشاء الله راجل محترم ومتعلم واموره الماديه مرتاحه هو قبل كان قاري فاتحه في قريبته بس صارت مشاكل بين العيلتين وانفصلوا هي البنيه توا تزوجت لكن هو سكر موضوع بالمرة من بعدها وقعد سنين فايت الموضوع هدا بس متأخر فتحه وقالي دوريلي واني فكرت فيك طول..
رنده بإبتسامه:تسلمي حبيبتي بس اني الموضوع هدا سكرته نهائي ومعاش نبي نفتحه..
نجاح:غير اعطيه فرصه تلاقوا وهدرزوا وشوفوا شن يصير..
رنده:لالالا مانبيش نفتح ع روحي الباب هدا الله يربحك الموضوع هدا سكرته خلاص..
نجاح:غير..
شدت رنده يدها وقاطعتها وهي تقول بإبتسامه:خلاص نجاح حبيبتي مش حتغيري رايي مهما حكيتي..
ضمت شواربها لداخل بأسف وقالت؛خلاص ع راحتك..ربي يفتح عليك...
رنده بإبتسامه:آمين..تسلمي نجوحه.
ابتسمت نجاح وغمضت عيونها بعدين فتحهم..
🍁🍁🍁🍁🍁
"سيتي افتحي الباب"
مشت بسرعه الخادمه الأثيوبيه وفتحت الباب..وخشت ميسم وهو تقول بإبتسامه:شن جو سيتي..
الخادمه:تمام مدام..
نوال؛ميسومه..
ميسم سرعت خطواتها ووصلت في امها ضمتها وقالت:ماما شن جو..
نوال:بالشويه يابنت معاش تنقزي ناسيه روحك؟
ميسم بضحكه:مرات ننسى..
نوال:نهارك احرش..عبيت عليك..
وميسم تضحك..
نوال:راجلك وينه..
ميسم:حاصلين عليه بابا وخوالي..خالو زايد شرده يقولوا خليتني جد فيسع فيسع ياعن شكلك..
نوال بضحكه:صار وصل؟
ميسم:ايه سيارته خشت بعدنا..
نوال؛باهي تعالي خشي قعمزي...
وخشت هي وبنتها داخل..
شويه وخشوا الرجاله زايد وواحد من خوته وولده وراجل نوال..
زايد:الموضوع عندي اني تونشوفه لكن كان لقيته دون المستوى..لن اوافق..
خوه؛لالا تو يعجبك تو تشوف..
مراد؛خالي خالد مش مروح؟
:لاخالد ماشي مع الوفد الليبي ل****** مش حيروح قبل يتم المؤتمر..
مراد هز راسه وهو ساكت..
خشوا داخل كلهم..
زايد:نوال..
جاته وسلمت عليه بالخد وهي تقول؛كبروك الجراين..
زايد غمض عيونه وقال؛خلاص خلاص معاش ذكريني..
راجلها؛غير قوليله حمد لله ع سلامه قبل مستعجله غير ع حرق الدم..
زايد:بكل ياراجل مش عارف كيف متحملها..
ضرباته ع ذراعه..
؛الله غالب شن بندير..
نوال:غير بنتك مقعمزة بس..
زايد وهو يتحسس في ذراعه ويقول:وشن ولدي ماتشبحيش فيه ولاكيف..
قعدوا يضحكوا..
بعدين ناديه قالت:قعمزوا قعمزوا خل نمشي نجيب قهوة..
زايد:نبي ندوش قبل..
ناديه؛باهي..
الكل قعمزوا ماعدا زايد مشي بإتجاه الممر اللي يرفع للحمام..
واخته مشت وراه..
نوال؛زايد..زيدو...
وقف وشافلها:نعم؟
نوال؛هاه شن جو ..
زايد؛تمام التمام والحمد لله..
نوال؛باهي بنقولك من مده هكي مشينا لحوش بن عامر كانت عندهم مناسبه...
حط ايديه في جيوبه وقال بإبتسامه:تزوجت!؟
هي ابتسمت وقالت؛لا المناسبه ماتخصهاش بس عرفت في هالمناسبه انها قاعده سنقل حتى مشروع الزواج هداكا ماصارش منه..
ضيق عيونه وهو يسمع فيها..
نوال:اني خبرتك قلت بالك الموضوع مازال يهمه..
ابتسم وقال:شن غداكم..
نوال بإبتسامه؛كسكسي بالحوت..
زايد؛مليح بكل...هي خليني نمشي ندوش بش نلحق ع القهوة..
ومشي وهي معاه بعيونها لين ادرق من قدامهم..
نوال بضيق:شكله خط في الموضوع..خسارة..
ولفت ومشت متوجهه للكوجينه..
🍁🍁🍁🍁
الساعه 5:00عصرا..
"هاه كلكم غيرتوا"
رفيده؛ايه ماما..
عفاف:هي اطلعوا قدامي..
ومشوا طلعوا مع امهم من الحوش..
عفاف:مش قلت مان عندكم واجب اكتبوه في المدرسه..
غيداء:مافيش حصة فاضيه ياماما..
عفاف؛باهي اركبوا هيا..
ركبوا السيارة..
عبدالصمد:هيا..
عفاف:هيا..
وتحرك طول بالسيارة متوجه لحوش نساباته..
•••••••••
عفاف:بيرفعني نتمشى في ******** ومرات نتعشوا برا بنتعبكم فيهم..
لينا:عدي عدي ومادوري شي..
عفاف:تسلمي يا #شكولينا.
ابتسمت لينا.
وعفاف مشت طلعت..
سكرت لينا وراها الباب وخشت داخل...
لين وصلت لدار التقعميز..
لقتهم مقعمزات داخل ورفيده شاده بحر وياسمين وتبوس فيهم..
غيداء:شكلاطه زغيرون سيف..
ضحكت لينا وقالت:سمح ولا..
نور؛يشبه خالو سفيان..
ابتسمت لينا..
رفيده:وينه حنينه وجيهه؟
لينا؛ماشيه هي وجدك وحناك زبيده لحوش عم امك يهدرزوا..
رفيده:اه..وخالاتي..
لينا:رتيل تقرا في شقة خالك مروان عندها امتحان..وخالتك رنده عدت لحوش اساور...ماعندكمش واجبات؟
رفيده:لالا..
غيداء اني عندي..
لينا:باهي اللي ماعندهن شي يجن معاي للكوجينه بيش نديروا كعك مخمر..
نور بفرحه:يس.
ضحكت لينا وقالت:هي تعالوا..
وطلعت وطلعوا وراها نور وغيداء ورنا وياسمين وبحر يتكركبوا..
غيداء:اووفف منها ابلة الحساب العوبه هادي..
وطرحت كتاباتها وبدت تكتب في الواجب..
🍁🍁🍁🍁
"بدت تمشي يوم واحد في الأسبوع بس"
اساور:خلاص توا عندها عيلة معاش تقدر تاخدها راحتها زي قبل.
رنده:ايه..وبالذات انه سيف سلامته متعب هلبه مشردهم هي وبوه..
اساور:سلامته..شن جو شيرو..
الشريف خش في رنده وهي يشبح لاساور بطرف عينه..
اساور بضحكه:ياوخيتي محلاه..مش عارفه كيف هان ع امه..
رنده:عندك علم تزوجت..
اساور بدهشه:الله!
رنده:ايه خداها سلف اختها عزري قالوا..
اساور:مش عارفه شن نقول ربي يهنيها وخلاص..
رنده:ماسألتش ع ولدها بكل بكل تصدقي...
اساور:تي شن تقولي انتي تلقيها توا تتمنى لو ماجاباته عاد وخداته عزري..باهي مروان شن ردة فعله..
رنده:مرات تحسيه مضايق ع خاطر ولده بس اغلب الوقت جوه عادي..
اساور؛حتى هو خودوله مافي حد احسن من حد.
رنده:قلناله وقال مانبيش نجيب لولدي اي وحده والسلام..
اساور:لااا..شكله حاط عينه..
رنده بإبتسامه؛حتى اني حاسه هكي صاحبتي فدوى..
اساور؛اها اللي جت يوم طهور سيف؟
رنده؛ايه..
اساور؛حلوة وهوديه..
رنده؛لو يقولي عليها طول نكلمها وان شاء الله ترضى..
اساور:ترضى حبيبتي ترضى دكتور وحليوه من تفوته..
رنده بإبتسامه:ان شاء الله..
اساور ابتسمت وقالت:تعالى شيرو خود شكلاطه تعالى حبيبي..
والولد يزيد يدرق في عمته..
اساور بضحكه:الولد شكله يشبح فيا غوله..
رنده ضحكت..
اساور:هادي اللي تحمل بالولد..
🍁🍁🍁🍁
"المهم ياحناتي قعد يرد عليها الكلب وهو يقول لو سطاح فوق مراح الله ماذوقهن"
نور ولينا ديرلها في شعرها؛هي شن دارت بعدين..
لينا؛روحت..
رفيده؛مرت خالو ريحة الكعك طلعت نمشي تشوفه..
لينا؛عدي..
رفيده؛ماتكمليش لين نجي..
لينا بضحكه:حاضر..
ومشت رفيده طلعت..
لينا؛بحر قعمز عن اختك.....
••ومن برا..
خش سفيان هو وولاد اخته..كانوا يحضروا في مباراة لمؤيد..
مسح ع روسهم وهما ماشيين بيخشوا داخل ويقول..
سفيان؛مفروض مشيتوا مع بوكم..
الشريف:قتلك ياخالي مانبيش نشوف مرته..
سفيان؛هو قال نتعشوا برا..
الشريف:بعدين بيرفعنا غادي عارفه..
مؤيد:حتى اني مانبيش نشوفها تشبحلنا في شبحات سم وتلقح في الدوة ياخالي..
تنهد سفيان وقال؛خلاص ع راحتكم..
هي خشوا..
خشوا قبله والشريف نادى:نور...
هو مايبي من نور شي بس يبي يعطي علم انه خاش عادة خداها من خواله وبوه.
سفيان شبحله بإبتسامه..
جاه صوت لينا وهي تقول؛خشوا خشوا..
خشوا مع خالهم داخل..
سفيان:اوو غيداء.
ناضت وسلمت ع خالها:كيف خالو..
سفيان:تمام..امك هني..
غيداء:لالا مشت مع بابا تتمشي..
سفيان:اها..ومشي لدار التقعميز ولحقه مؤيد..
الشريف:عندك واجب ياحميرة..
غيداء؛انت خيرك معاي علاش ديما تتسهوك عليا..
الشريف بضحكه:فيك جو لما تحرجي..
غيداء:فوتني ترا مش ناقصاتك...
الشريف قدملها وشاف في شن تكتب..
الشريف:قسمه مطوله..ترا هاتي نساعدك كان ماعرفتيش..
غيداء؛هاك..
خدي الكراسه وقال:شوفي كيف..
وقعد يفهم فيها وهي مافاهمه حاجه وخافت تقوله يتسهوك عليها..
وحل المسائل كلهم..
الشريف:هاه فهمتي.
غيداء:ايه شكرا..
ناض وهو يقول:العفو..ومشي لدار التقعميز..
غيداء:والله مافهمت حاجه..نكرهه الحساب نكرهه..
🍁وقعمزوا شربوا كاكاو مع الكعك المخمر ولينا وخالهم قهوة..
وقعدت لينا تكمل في الخرافه وكلهم يسمعولها وسفيان معاهم..
وكان مرة مرة يناشب فيها...
لينا؛ييييه خلاص معاش بنحكي هي..
نطوا فيه الصغار..
"خلاص خالي...اسكت خالي..خليها تحكي خالي.."
ورنا قالت:برا اطلع خالو..
لينا شدت ضحكتها..
سفيان:نطلع عينك انتي وياهم..
الشريف بضحكه:باهي بالله عليك خليها تكمل..
شبحلها ع جنب وهي ردتله نفس النظرة..
سفيان:تي بروا طز فيهم اني بنكسد ع ولدي....ومشي خدي سيف اللي كان فاق ويلعب بروحه وقعد يلعب فيه وبحر وياسمين جوه وبدوا بوس في خوهم..
ولينا ضحكت وكملت باقي الخرافه..
🍁هالاجواء الدافيه الحلوة اللي تعودوا عليها صغار نوريه من الصعب جدا وممكن من المستحيل يتحملوا يفارقوها ويعيشوا حياة بارده موحشه مخيفه..🍁
🍁🍁🍁🍁
"خليهم ع راحتهم ماتضغطش عليهم"
حسين:لين ينسوني بالمره..لو تشوفيهم كيف دايرين بخالهك تقول هو بوهم...
اكرام؛هدا وهما صغار هكي مالا وين يكبروا شن يديروا تلقى روحك في دار الوفاء بعدين..
حسين؛شن تخترفي انتي..
اكرام:نقول في الحق واخدين منك موقف علاش بسببي اني!!؟اهو انت توا قلتلهم تعالوا نتعشوا برا قالوا لا....
حسين:صغار صغيرين اللي تتكلمي عليهم هادم!
اكرام:معاش في حد صغير حبيبي الجيل هدا يبيعك ويشريك..
شبحلها من فوق لتحت بعدين ناض ومشي بيطلع.
اكرام؛وين ماشي..
حسين؛لحوشي..
وطلع وخلاها تسحن عليه...
شويه وسمعت صوت عزوزتها وهي تنادي...
"اكرام يااكرام تعالي حطيلي ع تميتليه"
اكرام؛بري اقلبي وجهك عليا غادي..وساوت بنتها وتمددت جنبها وغمضت عيونها بترقد..
ورمضانه تنادي...ولاحياء لمن تنادي..
🍁🍁🍁🍁
الساعه 10:00ليلا..
حطت صفره العشي ع الطاوله وقالت:تبي مشروب ولاعصير..
مروان:عصير..
رنده مشت صبتله عصير وحطت الطاسه قدامه وقالت؛تبي حاجه تانيه..
مروان؛شن دار شريف اليوم..
رنده بضحكه:مادار شي وليدي قعد عاقل..
مروان؛ماخنبش تليفونك وكلم صاحبتك..
رنده:لالا هالمرة هي اتصلت كلماته..
مروان ابتسم وهو عاقد حواجبه وهز راسه..
قعمزت رنده وقالت:لو عجباتك نكلمهالك..
مروان؛مش توا مازال..
رنده:باهي مازال امتى يعني مرات البنت يسبقك ليها حد..
مروان؛معناها مش نصيبي..
رنده تنهدت وقالت؛براحتك..ماتبي شي تاني..
مروان؛تس..تصبحي ع خير..
رنده؛قدامك كل خير...ومشت طلعت من الكوجينه وخلت خوها يتعشى وهو يفكر...
☘☘☘☘
ومازالت تمر الأيام...
ورنده كل مالها تطلع من حالة الفراق اللي كانت عايشه فيها وشبه طلعت انس من قلبها وعقلها ومعاش ولى يشغل تفكيرها...
وفي يوم....
كملت وحده من محاضراتها ومشت طول لمكتب رئيسة القسم اللي علقت اعلان طلبت فيه حضور رنده لمكتبها..
ورنده مشتلها وهي مستغربه وخايفه..
:شن اخبارك رنده..
رنده:الحمد لله..
:الحمد لله..تبي تعرفي علاش طلبتك..
رنده:اكيد..
ابتسمت وقالت:ياستي جاتك فرصه حلوه من ****** يبوك تكوني مترجمه غادي..
رنده:مترجمه!!؟
:ايه وطلبوك بالإسم..لانك متفوقه والاولى ع دفعة الدارسات العليا..
رنده:مش فاهمه يعني علاش يختاروا في طالبه والمترجمين اصحاب مافيش اكثر منهم...
:صدقا مش عارفه السبب بس نرجح انهم يبوا يدعموا الجيل الجديد..
رنده مش مقتنعه هلبه...
:اني نشوف فيها فرصه الصراحه في مؤسسه من مؤوسسات الدوله الكبيرة يعني انتي وكأنك مترجمه للحكومه..
رنده:بصراحه مش عارفه شن نقول..ماتعبوش عليا هلبه اهلي ممكن يرفضوا...
:تمام انتي ردي الشيره وشوفي شن يطلع معاك وخبرينا..
رنده:ان شاء الله..
🍁وروحت رنده والموضوع شاغل تفكيرها هلبه..
فرصة وتجربه حضيفلها ماتبيش تفوتها..وفي نفس الوقت خايفه منها ومن خوتها وبوها مايوافقوش..
مالقتش قدامها في حيرتها هادي غير انها تصلي استخاره..
وتمشي تفتح الموضوع مع بوها وخوتها..
سفيان:لو تضمنيلي ان مافيش طلوع من بعد المغرب ماعنديش مشكله..
مروان؛واني من رايه..
سفيان شبح لبوه وقال:انت شن تقول بوي؟
الشريف:معاكم في كلامكم..
رنده فرحت هلبه لتقبلهم الفكره وقالت:تمام تو نزيد نسأل كان لقيت في خدمه في الليل نفوتهم وخلاص..
سفيان هز راسه بآيجاب..
••••••••
سفيان؛مانبيش نسكر عليها مانبيهاش تزيد تتحسس من وضعها ونفسيتها تتعب..
لينا؛احسن مادرت..ورنده عاقله وتعرف تتصرف..
سفيان هز راسه وقعد ساكت..
لينا قعمزت جنبه وقالت؛حساتك مضايق من حاجه..
تنهد وقال:ايه...من وضع صغار نوريه اللي ولوا معاش متقبلين بوهم...تعرفي اليوم جاني في المحل وحكي معاي في الموضوع..تصوري لمح ان حني اللي مغيرين الصغار عليه..
لينا:مالاش حق يلمح حتى التلميح هو فاهم ان العويله صغار ومش فاهمين شي..هم واخدين موقف منه من لما خدي ع امهم وتوا يفكروا انهم فقدوا امهم بسببه..
سفيان؛ومع هذا يقعد بوهم ليه حق عليهم..المشكله اني وين نجي نفتح الموضوع معاهم بالذات الشريف نحسه هكي يضايق هلبه ومايبيش ياخد ويعطي فيه..نخاف نصر عليهم اكثر يفهموا اني مضايق منهم ومن مسؤوليتهم واني حاجه زي هادي مانتحملش حتى نشوفها في عيونهم..
لينا:خلاص هو يحكي معاهم يجيهم هنى ويحكي معاهم ويفهم منهم ويفهموا منه عياله واعيين واجد بالذات الشريف اكبر من عمره بعقله تقول عمره عشرين عام مش عشرة سنين..
سفيان هز راسه وقال وهو يفكر:هو هدا..مافيش غير هكي المهم نخلص ضميري من ناحيته...
🍁🍁🍁🍁
تاني يوم..
الساعه 10:30صباحا..
بعد ماخدت باقي المعلومات من رئيسة قسمها..
مشت للمبنى الحكومي اللي طلبوها فيه..
وين وصلت غادي..لقت المبنى محاوط بأجهزة الأمن والحراسه..
حست برهبه من المكان..بس كانت تتصنع في القوة والثبات ماتبيش تبين انها خايفه..
ومن اول ماخشت وهي تسأل لين وصلوها لواحد من المكاتب..
الموظفه:اسمك الثلاثي لو سمحتي خل نشوف كان في عندك موعد هني..
رنده"وشن بنكذب يعني": احمم رنده الشريف بن عامر..
سجلت الاسم وقعدت تشوف بعدين قالت:اركبي للدور السادس المقابله متاعك مع الاستاذة اسماء ******..
رنده هزت راسها ومشت طلعت..
وركبت بالأصنصير للدور السادس..ومشت وهي تسأل عن مكتب اسماء لين وصلت فيه..
•••••••
اسماء:تفضلي قعمزي..
رنده قعمزت وهي تقول:شكرا..
اسماء:اسمك..
رنده:رنده الشريف بن عامر..
رفعت حواجبها وقالت:اه..انتي مقابلتك مع الاستاذ زايد شخصيا..
رنده حست بالرهبه بس مابتش تبين وسألت تقول:وعلاش معاه هو مش اني بنخدم مترجمه هني ..
اسماء:مترجمه ليه هو يعني..لما يجو وفود من برا انتي حتكوني موجوده معاه وترجميله شن يقولوا..
رنده زادت خافت وحست ان الحكايه ولت صعبه هكي...
خدت نفس وقعدت ساكته...
اسماء:لحظه خل نعطيه علم...
وقامت سماعة التليفون واتصلت بالسكرتاريه..
ورنده ولت في قمة التوتر حست ان الموضوع كبير...
🍁وعنده هو..
كان في مكتبه عنده اتصال بدبلوماسي انجليزي...
دق الباب..
زايد:تفضل...وكمل باقي مكالمته..
خشت السكرتيره وقعدت واقفه تشبحله..
هو استأذن من الراجل وبعد التليفون وقال:شن عندك؟
السكرتيرة:في مقابله عندك بخصوص موضوع المترجم استاذة اسماء اتصلت وقالت المرشحه للوظيفه جت..
هو هز راسه وقال:اوكي اوكي..قوليلها تجي معاها...
السكرتيرة :حاضر..ومشت طلعت..
وهو اعتذر من الراجل ونهي المكالمه فيسع..
وناض من مكانه..ومشي للمرايه بش يلقي نظره ع نفسه..
زايد:شن جو المراهقين هدا..ولي لمكتبك وخليك بهيبتك..
ومشي طول ولى لمكتبه...
وقعمز كويس وكان بادي يتوتر..
دق الباب..تلقائيا سوا ياقة السوريه والجاكيت..
بعدين حط ايديه ع الطاوله..شبح للآيباد خداه فيسع ودار روحه لاهي بيه..
دق الباب مرة تانيه..رفع حاجبه وقال:تفضل..
وع اساس عيونه ع ايباد..
انفتح الباب وخشت اسماء مع رنده...
اسماء:السلام عليكم..
هو قال:وعليكم السلام..وقعد شويه زعميته لاهي..
ورنده تشبحله وطول ركبها الخوف منه منظره يبان جدي هلبه...
وهي مش متعوده تتعامل مع الرجاله في حياتها هلبه..
فكيف توا مسؤول في الدوله..
تنحنح وحط الآيباد ورفع عيونه فيهم...وهما تقولوا ماصدقوا طول جو ع رنده..
رنده كانت دير فروحها شخصيه قويه وواثقه من نفسها حتى من نظرتها..
هو قعد يشبحلها لحظات..
واسماء تشبحله وتشبحلها بعدين قالت:استاذ هادي البنت اللي طلبتها من كلية اللغات..
هز راسه وهو يشوف لرنده وقال؛عارف..
رنده وتروها نظراته غيرت عيونها عنه..
هو زبطها تحشمت عاند ابتسامته وماخلاهاش تبان بوضوح ع وجهه غير عيونه عنها لأسماء وقال:تفضلوا قعمزوا..
الزوز قعمزوا قدامه..وهو تجنب يشبح لرنده وعيونه قعدوا ع اسماء بس...
🍁فهالوقت..
عند السكرتيره...
جاها واحد من الموظفين طالب يشوفه..
السكرتيرة:عند مقابله مع مترجمه..
:مترجمة شني هادي..ليش هو في لغة مايعرفهاش!؟
السكرتيرة:والله حتى سألت روحي نفس السؤال المعلومات اللي عندي تقول انها خريجة انجليزي وهو فالانجليزي خير من العربي..
:الموضوع في ان..
:شكله هكي..
:نقولك شكلها صاحبتها وجايبها تخدم معاه بش ياخد راحه..
:وارد جدا..ع العموم حني مادخلناش..ابعد عن الشر وغنيله..
:ع قولتك..تمام تو نولي بعدين..
:تمام..
ومشي طلع من حداها.....
🍁🍁🍁🍁🍁
"عيشه تقصر العمر ماسد امه هالعزوز الحرفه وخواته العقارب ماسد هو وهباله مش عارفه شن دايرتله هديكا الرجاله بعد يموتوا نساوينهم بالكثير تفوت الاربعين وينساها وهدا لتوا قاعد يبكيلي عليها"
اختها:ماهو انتي غبيه ماعرفتيش تتصرفي..
اكرام وهي ضامه بنتها وتهز بيها:ماخليت مادرت والله ماخليت مادرت لكن هو شي ياناس مسحور رسمي..
امها كانت تسمع وساكته بعدين قال:وكانهو مسحور حق دوا السحر بالسحر نفسه..
اكرام واختها قعدوا يشبحولها بإستغراب..
امها:ماهوش سحر سحر حق..لكن حاجه زيه مش لازم يديرهولك حد انتي ديريه بروحه..وكان درتيه مش يسنيه نوريه بس ينسيه اللي جي منها...
اكرام:باهي تكلمي يام قولي شن هو...
وبدت امها تحكيها ع الطريقه وهي مركزة معاها تركيز تام لين كملت.
:وين بتلقاه يام هدا!؟
:اني نجيبه..
اكرام:باهي بالله عليك يام عجليلي بيه..
هزت راسها وقالت؛بالكثير نهار الخميس يكون عندك..
اكرام هزت راسها وهي متحمسه ومتلهفه طبق نصيحة امها...

يتبع…
الفصول الاربعة