شكولينا

الجزء واحد والعشرين

#شكولينا 🍫
#الجزء_الحادي_والعشرين
#الجمان_الفريد

قولوا "لاإله إلاالله " تفلحوا..
وحافظوا ع الصلوات والصلاة الوسطى وقوموا لله قانتين ❤الصلاة اولا❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
الساعه 8:30مساءا...
فتح باب الحوش وخش..
جي قدام عيونه سيارته الوحيده المدرسه..
سكر الباب..ومشي بإتجاه باب الحوش الدخلاني..
خدي نفس عميق...وطق الباب..
مافيش من يفتح..عاود طق...وكذلك مافيش من يفتح..
زاد طق مرة...ونفس الشي مافيش من يفتح..
التفت يمينه..
كان في حاجه زي الرف محطوط عليها محبس غرس..
مشاله وحول المحبس وخدي المفتاح اللي تحته..
رده ومشي فتح الباب..
خش للحوش واستغرب الهدوء اللي فيه..
قعد ينادي...
" يام...امي....يام"..
حول من رجليه ومشي كمل طول ووقف في نص الممر وقعد ينادي...
"رتيل...امي"...
مافيش اجابه..
لف ومشي للباب طلع تليفونه واتصل بخوه مروان..
نادى مرتين بعدين انفتح الخط..
"سفيان روحت!"
سفيان:ايه..ولقيت الحوش فاضي..
"حمد لله ع سلامتك"
سفيان:الله يسلمك..
"في حوش نوريه متغديين غادي"
هز راسه وقال:تمام...
"اني نص ساعه ومروح"
سفيان:خلاص نتلاقوا..سلام...
"سلام"..
سكر سفيان ولف ومشي للكوجينه..
خشلها وهو يدور بعيونه كان في صونيه مغطيه ولا حافظه فيها حاجه تتاكل مالقي شي..
مشي للثلاجه فتحها بياخد منها اي شي معلب يسكت بيه جوعه..
اول مافتحها جو عيونه ع علبه #شكولينا محطوطه ع جنب..
جو بين عيونه عيونها...ولونهم....وجمالهم ونظرتهم الحاده..
مد يده للباكو وخداه...سكر التلاجه والتفت للطاوله ومشي قعمز ..
حطها ع الطاوله وفتحها...لقي فيها 4قطع قاعدات منها..
خدي وحده...وكلاها...وشبح للكرسي اللي جاي ع يمينه..
《 انت جايبها هادي!
عدنان بإبتسامه وهو يتأمل في الباكو:ايه..صناعه سبهاويه..
خدي سفيان طرف وحطه في فمه بعدين قال:عجبتني..
وخدي الباكو وهو يقول...بناخدها..
عدنان بضحكه:عارفك ماعندكش الروح معاها..ابتسم وقال.
هي ليك..》
تعبوا عيونه بالدموع وفاضوا..
نزلت في زوره الشوكلاته وكأنها سم..
سكر الباكو..وناض بيه ورده للثلاجه...
ومشي طلع من الكوجينه ودموعه تنزل سيل..
طلع من الحوش وركب لشقته وكأنه هارب من كل شي..
وفي نفسه يتمنى لو يقدر يهرب من كل شي واولهم نفسه...
🌺اما هي من لما روح منهم..
وهي حابسه روحها في الدار..تصلي وتبكي وتسأل ربي يصبرها ويعينها ع الحياة اللي حتبدا تعيشها بعد كم يوم..
اللي تشبح فيها جحيم من قبل ماتبدا...
ولولا ان الدعاء ع النفس بالموت حرام...راهي دعت ع نفسها بيه بس ترتاح من العذاب اللي عايشاته...
🍁🍁🍁🍁
تاني يوم..
الساعه 7:00صباحا...
فتح باب الشقه ونزل منها..
وصل لوطا لقي بوه مقعمز بروحه وقدامه فنجان قهوة ويبان سرحان بتفكيره..
خدي نفسه ومشاله...
وصل فيه...طول كب ع راسه..
الشريف استاقظ وشبحله..
سفيان:صباح الخير..
الشريف غير عيونه عنه وقال:صباح الخير..
سفيان:شن حالك بوي..
تنهد الشريف وقال:الحمد لله ع كل حال..
سفيان؛بوي..
شبحله..
سفيان؛امس كنت حوش الحاج عبدالودود..
تفاجئ الشريف...
سفيان؛مشيت تكلمت اني وياه وبنته..في هداكا الموضوع..
الشريف:شن قلت وشن قالولك..
سفيان :اتفقنا نقروا الفاتحه الخميس هدا ونروح بيهم..
ارتسمت ع وجهه الشريف ابتسامه فرح وعيونها غرقوا بالدموع وهو يقول:تتكلم جديات!!؟
سفيان هز راسه وهو ساكت..
الشريف بفرح؛ربي يرضى عليك دنيا وآخره..ربي يفرج عليك ياولدي كيف مافرجت ع قلب بوك..
سفيان ابتسم بألم وخدي يده بوه وباسها.
الشريف:ربي يرضى دنيا وآخره..ربي يرضى عليك ياولدي رضى لاسخط بعده..
سفيان:آمين...
.............
"الحمدلله ياربي صغار ولدي بيتربوا قدام عيوني..وكنتي الباهيه ولتلي حبيبة الغالي"
زبيده:شن تخرفي انتي شن حبيبة الغالي هادي بتولي مرت ولدك التاني ردي بالك تقطفي القطاف هدا قدامه..من غير شي الحكايه صعبه عليه..
حطت وجيهه يدها ع فمها وقالت؛عطيني قطعه في لساني حتى اني ربي يشدلي فيه بس..
زبيده بحسرة:كان غير عدنان مات وتريح الله يرحمه..الهم كله جاي ع هالمسكين اللي ماعارف لايتهنى ولايعيش مرتاح.
وجيهه:يالله ياللاي ماتزيديني ع مابيا..وبعدين هو بيربي صغار خوه اليتامى ...في خير من هكي..
زبيده هزت راسها وهي تقول:يجعل خيرته فيها ان شاء الله..
وجيهه بإبتسامه رجاء:يارب...
.............
مكالمه هاتفيه..
رنده بضيق:ناري عليه وخيي مش عارفه شن هالبخت ياربي..
"الله غالب هدا نصيبه"
رنده:مش عارفه كيف بيعيش معاها يانوريه هو مش طايق يشرب طاسه الميه منها كيف بيتزوجها بس!
"الزواج هدا حبيبتي لمصلحه وبس..وهو بعدين من حقه ياخد غيرها ويدير عيله ع حاله"
رنده:تتوقعي يديرها وياخد زوز !؟
"لما يبي يشوف حياته يديرها ومافي حد يقدر يمنعه "
رنده تنهدت وقالت:ربي يعوضه خير ونشوفه مرتاح ومتهني مع وحده تستاهله يارب..
"آمين"
.............
ونفس الموضوع قاعد يدور الكلام عنه في حوش اهل منى اللي مشتلهم تزور فيهم بعد العصر..
هند:حييي!سفيان بيرد مرت عدنان اللي يعاف ياكل ماكلتها!
منى:ريتي بالله! مش عارفه كيف بتكون حياتهم هما الزوز لاهو طايقها ولاهي طايقاته..
هند:تعرفي هدا زواج مصلحه زي مايقولوا ع خاطر الصغار بس وكل واحد فيهم حيكون بعيد عن التاني احتمال يتزوج بعدها عادي جدا..
منى بضيق:والله ماتستاهل لينا مسكينه كانت عايشه احلى عيشه مع راجلها بية ماحد يقدر يفرض عليها شي غيره هو
وتوا بتعيش مع هالحصله مصيرها مصير زهور..
هند:مااعتقدش فرق كبير بين الزوز..
منى:فرق الرجاله قبل كانت مرت عدنان الله يرحمه وتوا يتولي مرت سفيان يعني نفس المصير والعيشه المنكوبه هو قبل كان مايحبش زهور ودار فيها هكي..مالا لينا اللي مايطيقهاش كيف بيديرلها؟!..
هند؛حسها وجعتني بزايد..ماسد رادها سلفها ماسد البلي اللي يراجي فيها اللافاعي توا بيحصلوا فيها فرصتهم..
منى:خليهم بروحهم هادم..
هند؛ايه يومها تلاقيت اني ايناس اخت زهور..
منى:الله!
هند:ايه وهدرزت عليها وسألت ع اختها...قالت بدت تخدم هي مفيده في الحار وشغلهم ماشي ماشاء الله فتحوا معمل صغير مشتركين فيه مع وحده جارتهم قالتلك زهور فيه الآمر الناهي..
منى وهي متفاجئة:ماشاء الله!..
هند؛ايه..وقالت خوتها الولاد تزوجوا من تلاته شهور الماكله متاع العرس كلها دارتها هي والعرس هو اللي مشالهم الخدمه وخلاهم ينشهروا..
منى؛طيب فيها والله فرحتلها افتكت..ربي انقدها زهور هادي....شكلها نيتها كانت طيبه واني اللي كنت ظالمتها...
هند:ربي يكون مع هديكا المسكينه ع اللي بصير فيها..
منى بأسف:آمين..
🍁🍁🍁🍁🍁
وتمر ايام هالأسبوع...
جهز فيهم سفيان الدار للينا والصغار..
خداها دار لونها ابيض كريمي...وكل شي من احسنه..
والصغار خدالهم سرير كبير يسدهم مؤقتا...وخدالهم حتى الألعاب والدبش وكل مايخصهم...
كان يديرلهم في كل شي من قلبه..كان حاس في هداكا الوقت انهم امانه خوه ولازم يأدي حق هالأمانه ع اكمل وجه..
🌺اما لينا..
فكانت في كل يوم جديد يطلع عليها متمنيه تصير أي معجزة تنقدها...
دعت ربي هلبه ...استغفرت هلبه......
بس في كل يوم كانت تتأكد ان الزواج هدا قدر محتوم لامفر منه..
عقلها وقتها مافكرش ان اللي فيه هي توا خيره ليها..
بل خلاها ع يقين انه ابتلاء عظيم ولازم تصبر عليه..
وهو فعلا ابتلاء وليس بالأمر الهين..
بس اكبر المحن...تكون منح وحني مش حاسين..
واغلب الإبتلاءات تكون عطايا وحني مش فاهمين...
☘☘☘☘
وعدت هالأيام..
وجي يوم الخميس..
وجو سفيان وامه وخوه مروان...
كانوا واصلين مع العصر...
حطوا امهم في حوش اهل لينا ومشوا للجامع مع بوها وخوتها..
في الصاله..
كانت وجيهه مقعمزة مع الحازة ومعاهم الصغار..
ووجيهه تحضن وتشم وتبوس..والحازة تشوفلها بنظرات شفقه بس قلبها كان واجعها ع بنتها اكثر...
بنتها اللي كانت تجهز في نفسها...وكأنهم تتجهز لحكم الاعدام..
ع وجهه ملامح البؤس مرسومه والدموع مابطلتش نزول..
وخواتها حداها يكلموا فيها..
هناء:خيرتك فيها ان شاء الله وخيتي..
امال:صدقيني يالينا حيجيك نهار تقولي الحمد لله اللي صار هكي..
لينا بحده:ممكن تسكتن مانبي نسمع من حد شي..
سكتوا هما الزوز وشبحوا لبعض بضيق بعدين شبحولها.
وهي تسرت في شنطه ودموعها سيل...
🍁فهالوقت..
في الجامع...
سفيان اللي كان وكيل نفسه قاعد يردد ورا الشيخ في الكلام اللي يقول فيه...كان حاس بشعور موجع...مش مصدق انه توا قاعد يعقد في قرانه ع مراة كانت لخوه يوم من الأيام ومش اي اخ...عدنان...اللي كان يعتبر فيه ولده مش خوه..
وعبدالودود ماكانش فرحان...بس مرتاح هو شايف ان مصلحة البنت وصغارها فهالشي..ومش حيصلح بيهم غير هكي...
كمل الشيخ من سفيان وبدي مع عبدالودود..
وسفيان يسمعلهم وحاش بشي ثقيل محطوط ع قلبه..
وخوه اللي كان شاهد ع العقد طول الوقت يشبحله وحاس باللي يحس بيه..
قال الشيخ....
بارك الله لهما وبارك عليهما وجمع بينهما في خير...
هالدعاء مااستساغتش ودان سفيان سماعه..
بانت ع وجهه ملامح الرفض وهويسمع فيه وقلبه قاعد ينعصر..
شاء ام ابى...دخول لينا لذمته اصبح امر واقع....
🍁🍁🍁🍁
بعد ماتم عقد القران..
ولوا كلهم لحوش الحاج عبد الودود...
ع قد ماحاول فيهم عبد الودود يقعدوا يتعشوا لكن هما رفضوا لازم يروحوا ع طول..
قعدوا مروان وسفيان يستنوا برا في سيارة الأجرة..
شويه وطلعت وجيهه وركبت معاهم...
وبعدها طلعت سيارة عبدالله اللي بيوصل اخته للمطار..
تحركوا السيارتين بإتجاه المطار..
وطول الطريق ولينا في سيارة خوها تبكي..
ماأقرب اليوم من البارحه..وياقداش في فرق بينهم..
عبدالله هو اللي وصلها عروسه للمطار...دموعها كانوا زي دموع اي بنيه طلعت من حوش اهلها لحوش راجلها...
بس هالمرة دموع لينا كانوا دموع قهره وحسرة..
حسرة ع حبيب مالحقتش تتهنى بيه ولاتفرح معاه..
وقهره ع حالها لأنها عاجزة انجبرت تعيش وضع مرفوض رفض تام بالنسبه ليها..لكن ماباليد حيله..
••بعد طول مسافه وصلوا للمطار..
نزلت لينا بصغارها...وخوها نزل معاها بالشناطي..
وجيهه جتها شدت عنها واحد فيهم
اما سفيان مشي لعبد الله وخدي منه الشناطي..
عبد الله:توصلوا سالمين ان شاء الله..
سفيان ومروان:ان شاء الله
سفيان:هي السلام عليكم..
عبدالله: وعليكم السلام...
مشي سفيان بالشناطي خش للمطار ومعاه خوه..
ووراه وجيهه ولينا...
واللي يشوف وجه لينا يحس ان وصف الله في الآيه الكريمه..
¤كأنما يساقون إلى الموت وهم ينظرون¤
ينبطق عليها تماما..ع ملامح وجهها ع نظرات عيونها...
وعزوزتها مرة مرة تشوفلها وتشوف لولدها وحاسه بوجع في قلبها علي حالهم...
••تموا الإجراءات...
ومشوا للطيارة اللي بتوصلهم في رحلتهم..
لينا طول ماهما في المطار كانت تذكر في يوم زفتها لما سافرت مع عدنان..
هدرزتهم ضحكهم..كلام عدنان الحلو..سماحة اسلوبه...وجهه الجميل اللي كانت مزيناته ابتسامه حلوة مريحه..
شتان بين هاليوم وهداكا اليوم شتان...
هي وهو...ولا واحد فيهم شبح لوجه التاني بالغلط..
هي وهو كانوا يتجنبوا يشوفوا لبعض اصلا..
قعمزوا في مقاعدهم...
وكلهم ساد عليهم الصمت المطبق....
وانقضت هالرحله...
ووصلوا لمطار معتيقه...
كانت غادي سياراتهم موجوده خلوهم في المطار لين يروحوا..
نزلوا من الطيارة..وتوجهوا لمكانهم...
وهني كانت اول صدمه لينا تزيد تفيقها وتذكرها بالواقع وطلعها من عالم الذكريات..
لما سمعت عزوزتها قالت..
"اركبي مع راجلك بنتي"..
تلقائيا ارتسمت ع وجهها ملامح عدم التقبل..
وهو ركز عليها..
مشي للسيارة وفتح الباب اللي بتركب منه..
وجيهه:بري بنتي..
لينا وعيونها غارقات بالدموع مشت وع يدها ياسمين..
هو لما شافها جايه مشي ركب في مكانه..
وهي ركبت..
والزوز سكروا بيبان السيارة في نفس اللحظه..
هو لبس نظاراته الشمسيه وشغل السيارة وتحرك..
وهي قلبت بوجهها للروشن...
بعدهم تحرك مروان بأمه اللي كانت واخده معاها بحر...
وطلعوا من المطار...
••في الطريق...
ناضت ياسمين وبدت تعيط..
لينا:هي ماما هي هي حبيبتي...
حطتلها اللاهايه في فمها والبنت مازال تعيط..
لينا:خلاص ماما خلاص..
سفيان كان يحرك في عيونه ناحيتهم ويشبح القدام..
ولينا كانت متوترة هلبه ومش عارفه شن بدير بعدين قالت بدون ماتشوفله...ممكن توقف السيارة وتجيب المرضعه من الشنطه لورا..
هي كانت تراجي تسمع منه جملة تذمر او ردة فعل من هدا القابيل..
لكن هو بكل هدوء درس السيارة ع تركينه..
والتفت خدي الشنطه...حطها ع رجلها وقال:وينها..
لينا:ع جنب..
شافها طلعها..وفتحها ومدها بدون مايشبحلها..
عيونها تحركوا للمرضعه خدتها من فوق وبدت ترضع في بنتها..
وهو خلا الساكو ع رجليه..وتحرك بالسيارة..
جاه اتصال من خوه رد عن طريق السماعه الموجوده في السيارة المربوطه بالتليفون..
سفيان:ايوه..
"خيركم وقفتوا"
سفيان:لا مافي شي مهم هانا وراكم توا..
"تمام"..
سكر مروان..
وهو تابع يسوق ومرة مرة يشبح لبنت خوه بطرف عينه وهي ترضع..
بعد كملت لينا بدت تقرع فيها..
البنيه وراسها ع كتف امها كانت تشبح جهة عمها..
تشبح في شي غريب قدامها غير واضح المعالم..
دارت صوت..
هو شبحلها ابتسم..
بعدين شبح القدام..
رجع شافلها مرة تانيه لقي حليب نازل من فمها ع عباية امها..
هو عقد حواجبه وقال:نزل منها حليب..
لينا حولت بنتها وشافت لكتفها وقالت بضيق:تس..افف..ترا..الوايبس..
هو رجع وقف السيارة ع جنب وقال:وينه..
لينا؛داخل ..
فتح الشنطه وطلعه ومدهولها..
خداتها وهو تحرك طول...
قعدت لينا تمسح لياسمين..
كانت ياسمين تشبح لامها وتبتسم في ابتسامه حلوة بالمرة..
ولينا تبتسملها حتى هي..
بعدين حطتلها اللاهايه في فمها..
وسفيان مرة مرة عيونه يهربوا ناحيتهم..
رجعت ياسمين رقدت مرة تانيه..
والصمت رجع ساد الاجواء..
الصمت اللي رجع للينا الذكريات..
وخلاها تذرف الدموع وين تشوف للصاله اللي دارت فيها زفتها..وللمزين اللي رفعها ليه عدنان اول ماوصلت لطرابلس..
كانت حاسه بقلبها قاعد يتفتت مش قادره تصدق قعدت بين بين نارين...
الماضي الحلم جميل ..
و الحاضر الكابوس مرعب...
هو قعد طول الطريق مايشبحش جيهتها..
لعند ماشاف بالصدفه وهو خاش لمنعطف..
شافها تبكي..
بدت ع وجهه ملامح الضيق وحس بضلوعه انطبقوا ع بعض..
وقعد يتمنى لو السيارة اطير بش يوصلوا فيسع..
ومهما طالت الطريق..
في النهايه وصلوا..
لينا هني كانت حاسه رجليها مش قادرات يتحركوا..
كيف طلعت من هالحوش يصفه  وولتله بصفه تانيه...!؟صفة حتى في الخيال ماتخيلتش انها تحملها...!
كان باب الحوش مفتوح لأن مروان وصل الأول..
لما جي خاش سفيان بالسيارة شاف لبوه وخواته حدا سيارة مروان..
بوه شاد بحر وهو طاير من الفرحه والبنات يلعبوا فيه ويضحكوا بدموع..
لينا قعدت مركزة ع شكل الحاج الشريف برغم اللي هي فيه بس وجعها ع الآخر واشفقت ع حاله وهي تعرف كويس مكانة عدنان عنده...
شبحوا كلهم لسيارة سفيان وهي خاشه..
درس..
فتحت لينا الباب ونزلت...ودموعها سيل..
وهو نزل بعدها وفيده الساكو..
مررت نظرها عليهم..
كلهم كانوا يشبحولها بنظرات هي مافهمتهاش بس اضايقت منه..
جاها عمها وهي شاد بحر قال:حمد لله ع سلامتك بنتي..فرحتي اليوم مش بش بصغار ولدي حتى بيك انتي..كسبت بنت خامسه وعز عليا نخسرها..والحمدلله اللي ردها..
لينا نزلت عيونها وبدت تبكي..
والشريف حط يده ع راسها وهو يقول:كله مقدر ومكتوب والحمد لله ع كل حال..
وسفيان يشوفلهم من ورا النظارات ودموع في طرف العين عالقه..
عفاف:حمد لله ع سلامتكم لينا..
لينا هزت راسها وهي تبكي بصمت..
عفاف وهي تشد في روحها وتتكلم بفرح:ييي ياسمينه كبرت..
سفيان:قولي الله يبارك..
خواته وامه شبحوله..
عفاف عقدت حواجبها بضحكه وقالت:الله يبارك...ترا شويه لينا..
مدتها لينا لعمتها ومشت بيها لعماتها التانيات..
نوريه ورنده وهما يشبحولها قالوا:الله يبارك..
مروان ضحك ضحكه خفيفه..
وجيهه:هي خشوا خشوا صقع...هيا ياشريف..هيا لينا بنتي..
لينا رشفت وهي تمسح في دموعها ومشت خشت معاهم للحوش..
ومروان ولى لسيارته وركبها ناوي يولي للعمل عنده ديوتي..
اما سفيان فقعد ينزل في الحاجات من السيارة..
داخل...
كلهم خشوا قعمزوا في دار التقعميز..
اما لينا خشت للكوجينه لقت منى مقعمزة..
ناضت منى و ع وجهها ملامح الحزن ..
جت للينا وضموا بعض وقعدوا يبكوا..
لينا ضمت بقوة وهي تبكي بالعبره ومنى اللي كانت تبكي معاها في صمت كانت تمسح ع ظهرها تهون عليها..
بعدت لينا وقالت؛شفتي وين وصلت يامنى..
منى بحزن:مكتوب يالينا مكتوب..
لينا قعدت تمسح في دموعها وقالت؛عندك حق..لله الأمر من قبل ومن بعد..
مشت منى صبت طاسة مية وجابتهالها..
خدتها لينا وقعدت تشرب ..ومنى تشوفلها بحزن وقلبها واجعها علي حالها..
"لينا"..
منى:هي تعالي نمشوا للدار..
لينا هزت راسها ومشوا هي ومنى للدار..
لما وصلوا فيها وخشولها..
لقوا البنات محاوطات بياسمين وهما طايرات فيها..
نوريه:سلمها ياربي نجيها هالحنطوشه المحنطشه عسل ياربي عسل..
رنده وهي تقلد في سفيان قالت:قولي الله يبارك..
ضحكوا..
ونوريه قالت بضحكه:الله يبارك..
قعمزت لينا وهي تشوفلهم بإبتسامه باهته..بعدين شبحت لنور لقتها تشوف لأمها بزعل..
لينا:نوارة..
نور شبحت للينا لقتها فاتحه ايديها..
نور ابتسمت وناضتلها تجري وارتمت في حضنها..
ضمتها لينا وهي تقول:توحشتك..
نور:واني توحشتك دنيا دنيا..
ضحكوا وجيهه وبناتها ومنى..
زبيده:كيف حالك يالينا..
لينا:الحمد لله ياحناي الحمد لله ع كل حال..
زبيده هزت راسها وقالت:الحمد لله ع كل حال..
"امي"
منى لبست وشاحها كويس..
وجيهه:خش ولدي خش..
شويه جي سفيان وقف في الباب لقي بحر الدين في يد حناه..وياسمين في يد نوريه..
سفيان:بوي وين؟
وجيهه:اشبح شن عنده بيدير..
سفيان ابتسم وهز راسه بإيجاب..
عفاف:الله يبارك عليهم ينزمطوا زمط...نقشتهم نقشة امهم..
وجيهه:صح..
وسفيان يشبح للصغار وبس..
رتيل:هدا علاش طلعوا طروف..امهم طرف شكلاطه مقربع..
وجيهه فنصت في رتيل..
والباقي شدوا ضحكتهم..
اما لينا فكانت تشوف لنور  وتمسح ع شعرها وهي متحشمه ع الآخر ..
حك سفيان مقدمة انفه وهو يشبح لرتيل بحده ..
ورتيل قريب قتلتها شبحته من الخوف..
رنده:شن علاش طلعوا طروف متاعك..طلعوا لاماليهم حبيبتي والحمد لله..اهم حاجه ورثوها..
لينا شبحت في الفراغ بنظرة حاده..
ومنى واللي حواليها يشبحولها..
بينما وجيهه شبحت لسفيان لقاته يشبح لرنده برفعة حواجب..
بعدين نزل عيونه وخش داخل..
جي لنوريه طبس وقال:هاتي..
نوريه مدتله البنت وهي تشوف لملامح وجهه الحاده..
خدي البنت وهو يسمي بالله بعدين مشي بيها لأمها..
طبس وقال:خودي..
بعدت نور عن لينا..ولينا خدت بنتها...
وكلهم يشوفوا لبعض ويشبحوله..
هو بعد ماعطي البنت لأمها مشي للباب وهو يقول؛شويه تانيه جاييني جماعه يتعشوا هني يام..
وجيهه:نوريه..
نوريه:طيبت اني ومنى كله واتي..
منى"انتي وعينك كذابه كبيرة"
هز راسه بعدين مشي طلع...
نوريه شافت للينا وقالت:بعدين بنهدرز عليك شويه لينا..
لينا شبحتلها بعدين هزت راسها بآيجاب..
ع خشة الشريف وفي يده اكياس وهو يقول:اهو جي جدو..
ابتسمت لينا وهي تشوفله..
قعمز ع ركابه وهو يقول:اهو شوفوا شن جابلكم جدكم..
نوريه؛سلم جدهم ياربي ويطول في عميره..لكن عاد راك تنسى وبيي في صغار تانيين هني..
كانت تقصد ولد مروان وبنتها وبنت رنده...
ولادها ماجوش معاها..وصغار عفاف كذلك مش معاها..
الشريف:جايب للكل حتى اللي مهناش..
رنده:طول في عميرك ياغالي ويعطيك صحيحتك..يابختكم بشيبانيكم..
منى ابتسمت مجامله وقالت:ربي يحفظه..
اما لينا تجاهلت كلام رنده ووجودها من اصله..
ورنده تسحن عليها...
🍁🍁🍁🍁🍁
الساعه 9:00ليلا..
"شن بتفوت القرايه"
سفيان:للآن مش عارف الحق..
؛مش مشكله يقعد يمشي ويجي لين يكمل الدكتوراة..
سفيان؛الحكايه مش ساهله هكي..
ابوبكر:فعلا مش ساهله..
سفيان تنهد وقال:يصير خير...انتم بشروني شن جو الكليه..
:زفت ياغالي..
سفيان :بشرك بالخير..
ضحكوا الموجودين..
ابوبكر بضحكه:ماتاخدش ع كلامه الوضع مولي خير من قبل..صاحبك يخدم بقلب ورب..
:ايه والله جديات طلع عكس التوقعات..
سفيان:باهي طلع في منه فايده هالبدوي..
ابوبكر:ايه ياحضري يامتعالي..
ضحك سفيان..
شويه رن تليفونه..
طلعه من جيبه شاف المتصل..
كانت امه..
ناض وهو يقول:نستأذن شباب..
هما قالوله باصوات متقطعه؛خود راحتك..
مشي طلع من حداهم متوجه للكوجينه وقف في نص الممر ونادى..
"أمي."
نوريه؛طلعي لراجلك السفرة..
لينا كانت تمصمص في الصواني ومش مركزة..
منى:لينا..
لينا شبحتلها وقالت:اممم..
منى:تكلم فيك نوريه..
التفتت لنوريه..
"يام".
اشرت نوريه ع الباب وقالت؛طلعي لراجلك السفره..
لينا قعدت تشبح لحظات لنوريه وهي مش مستوعبه..
نوريه:خيرك طرشتي معاش تسمعي..
ع خشة عفاف وهي تقول:شن ماتسمعوش فيه تبوه يسمعنا وسخ ودانا..
نهضت عفاف السفره وطلعت..
ونوريه تشوف للينا برفعه حاجب..
لفت لينا للاوندينو وولت تغسل في الماعين..
ومنى تشبحلها..
نوريه خبطت بيدها ع الطاوله ومشت طلعت بعصبيه..
نزلوا دموع لينا وهي تقول؛مش عارفه شن هالناس اللي ماتحس في شهرين نسوه خلاص..ويبوني حتى نا ننسى ونقبل غيره عادي يكون راجلي من بعده..نا لعند توا نشوف في روحي مرات عدنان..عدنان وبس..
منى:خلاص اهدي حبيبتي واسكتي وتجنبي المشاكل معاهم من اول يوم..
لينا ابتسمت بحسرة وقالت:صدقتي تو بيحصلنها فرصه اللي كان فارض عليهم شخصيتي عدى...الله يرحمه..
سيبت اللي فيدها ومشت طلعت للجنان وقعدت تبكي..
منى تنهدت بضيق وقالت:لاحول ولاقوة الابالله...
🍁🍁🍁🍁🍁
"اللي كانت ادير فيه زمان معاش يمشي توا.."
رنده؛توا تعرف حجمها الطبيعي وتوقف عنده توا هي عند.سفيان اللي رضانا عنده مقدم ع كل شي..
نوريه:اني توا همي في وخيي مانبيشي يزيد يتكدر نبيها تتعامل معاه عادي وماتغملاش قلبه اكثر ماهو مغموم والله خايفاته ياخد وجهه ومعاش يولي..سادنا واحد راح افادنا انهردت...وحطت يدها ع عيونها وقعدت تبكي..
ورنده تشوفلها بحزن ودموعها ينزلوا..
ع خشة عفاف وهي تقول:شن في..!؟
وسكرت الباب وراها..
🍁🍁🍁
وبعد العشي..
وهما يغسلوا الماعين..
خشوا عليهم للكوجينه...
عفاف؛منى ترا شويه..
منى شبحت لإيديها ومصمصت ايديها بعدين مشت طلعت..
سكرت وراها رنده الباب وقعدت واقفه عليه..
ولينا تشبحلهم بحده..
نوريه؛شوفي ياآنتي ياشن سماك ربي..ايه..لينا..انتي توا راد عليك ووليتي لعيلتنا وانتي ع ذمة واحد تاني من خوتي..
وخيي مسكين اللي ماعنده حظ وبخته ديما مايل اللي ديما يضحي ويتنازل بش يريح والديه...هو بروحه مش ناقص بش تقلبي وجهك فيه وتتعاملي معاه هكي..خلاص هو توا راجلك وليه عليك واجبات لازم ديريهم قدام ربي..
عفاف:نعرفك عاقله يالينا وتعرفي ربي..اشبحي للي داره سلفك حاجه كبيره راهو..تنازل هلبه هلبه تنازل سفيان واللي زيه ع اللي داره معاك ومع صغار خوه لازم ينحط تاج فوق الراس..
نوريه:وشويه عليه وخيي..
رنده وهي ترفع في  سبابتها وتنزل: ولأن اللي داره تضحيه كبيره لازم تعرفي ان من حقه لو جاك نهار وقال نبي نتزوج تمشي تخطبيله مش تعترضي لا تخطيبله..
نوريه:مفروغ منها القصه هادي..
عفاف؛طبعا حقه..
نوريه:ان شاء الله تكوني فهمتي الكلام واستوعبتيه..
لينا مررت نظرها عليهم وهي تقول؛تعبتوا ارواحكم الكلام هدى كله عارفاته ومقتنعه بيه..
نوريه:مالا طبقيه ماما..
لينا؛كله حنطبقه بس وحده وحده عليا راجو لين ننسى عدنان  حتى نا..
رنده:شن قصدك..!؟
نوريه:شن هي!!؟
وعفاف تفنص في لينا بصدمه..
وهي قعدت تمرر في نظرها عليهم بتحدي..
نوريه خبطت الطاوله وجت بتقدملها..
"يام"..
ابتسمت لينا وقالت:ترا شويه..
ومشت من حداهم..وحطت يدها ع يد الباب وفتحاته..
وهما يشبحولها بغيظ شديد..
برا..
سفيان؛ي...وسكت..
لينا وهي تشبحله بجديه :نعم..
ارتبك وغير عيونه عنها بس حاول يبين قدامها العكس وهو يقول:في عصير تفاح..
لينا:في..
حك مقدمة انفه وقال:تمام جيبيه..
لفت وخشت..
وبلع ريقه وحرك رقبته يمين ويسار وهدا كله من التوتر والأرتباك..
وهي داخل كانت توتي في سفرة العصير والتلاته واقفات يشبحولها بحده..
خدت السفرة بعد كملت طلعتله ومدتهاله..
هو شدها من تحت وخداها ومشي..
وهي خدت نفس ولفت بتولي للكوجينه..
"لينا تعالي يالينا بحر ناض"..
طول مشتله..
وهما قعدوا واقفات في الكوجينه يسحنوا عليها..
نوريه:تو تحصل ماعندها وين تهرب..
رنده:الحقيرة...
ومشوا التلاته طلعوا من الكوجينه متوجهات لدار رتيل..
منى وهي طالعة من دار التقعميز شافتهم وقالت بهمس:اعوذ بالله منكم..
ومشت للكوجينه...
🍁🍁🍁🍁
بعد ساعه ونص..
روحوا اصحاب سفيان...وهو حان موعد نومه لأنه ناوي تاني يوم يمشي يصطاد حوت..
وطبعا حيركب يبات في شقته..
وطبعا توا مش حيركب بروحه..
••في دار التقعميز..
وجيهه:شن هالصقع اللي نزل..
منى:ايه الليله سميتري..
وجيهه:ردي بالك من لبس الصغار لينا..
لينا:حاضر..
"يما"..
قلب لينا انغم...عارفه شن بيصير توا..
وجيهه ناضت ومشت طلعتله:نعم ولدي..
سفيان مد لأمه الشنطه اللي ينحطوا فيها الأطفال وقال:قوليلها تحطهم فيها قبل تطلع..
وجيهه:تبيها تركب توا؟
سفيان وجهه ولى احمر وهو يقول لامه؛عارفه غدوة بنمشي نصطاد لازم نوض بكري..
وجيهه ابتسمت وقالت:باهي..
خدت الشنطه منه ومشت خشت بيها للدار..
وجيهه:هاك بنتي حطي فيها الصغار وقالك هيا اركبي..
بلعت ريقها وكأنها بلعت نار نزلت عليها حرقتها...
خدت من عزوزتها الشنطه وفتحتها وحطت فيها بحر وياسمين..
ووجيهه تشوفلها لاحظت وجهها كيف بان عليه الموت..
وجيهه كانت حاسه بلينا وفاهمه عليها ومقدرة صعوبه الوضع..
ومنى كذلك وهي تشوفلها..
ناضت لينا بصغارها وهي تقول:تصبحوا ع خير..
ومشت طلعت...
ردت عليها منى..
لكن وجيهه ناضت وطلعت وراها..
وجيهه:لينا..بنتي..
وقفت لينا والتفتتلها..
وجيهه:سفيان صح واعر وفيه حاجات خيي عليها...لكن والله طيب وحنين ع الآخر..
لينا مابتش تاخد وتعطي معاها في الكلام...تقعد ام في النهايه ومعذورة هي تبي تلايم الحال وخلاص..
ابتسمت مجامله وهزت راسها بإيجاب بعدين قالت:تصبحي ع خير..
وجيهه:قدامك كل خير..
لفت لينا ومشت...قلبها بيفر من الخوف..
لبست في رجليها وطلعت من الحوش..
لقاته واقف يشوف لتليفونه..
ماحسش بوجودها من البدايه وهي ماتبيش تكلمه..
شويه وحس بأنه في حد واقف..قام عيونه وشافلها بعدين نزل عيونه للصغار وقال:تعالي..
مشي للدروج..
وهي مشت وراه وكأنها نتجر جر...
ضامه الشنطه لحضنها لما بدت تركب وراه الدروج..
وكل ماتركب درجه تزيد تنخنق اكثر واكثر..
لين وصلوا للشقه..
هو فتح الباب ع وسعه...بعدين وخر وقال؛خشي..
هي نزلت عيونها ومشت خشت داخل...
وهو خش وراها وسكر الباب..
سفيان؛خشي..
حولت من رجليها ومشت خشت...
وهي ماشيه اذكرت الحادثه اللي صارت في زهور..
وجي قدامها كل شي تعرضتله زهور وعاشاته مع سفيان من اللي سمعت عنه واللي راته بعيونها..
زاد مقتها وكرهها لسفيان..
وين وصلوا وسط الحوش هو سبقها وقال:تعالي..
هي مشت وراه وع وجهه ملامح كره واضحه..
وصل في الدار اللي دراهالهم..
فتحها وقال:هادي داركم..
هي خشت للدار وفي قلبها خوف كبير...
لما شافتها تفاجئت..
مررت نظرها عليها..عجبتها هلبه..الذوق كان رفيع..
وكل شي فيها حلو...بالذات سرير الاطفال..
هو كان يشوف لرده فعلها وهو مضيق عيونه...بعدين رفع حاجبه وقال..فيها شي ناقص او مش في مكانه؟
هي بدون ماتلفتله:لا..
سفيان:تمام....لف ومشي لداره...
هي سمعت صوت خطواته بعدت التفتت..
شبحت لباب الدار...لقت عليه مفتاح..
مشت حطت شنطة صغارها السرير وجت للباب..
خدت المفتاح وسكراته حطت فيه المفتاح ولفاته اكتر من مرة...
هو في دار لما جي بيحول جاكيت متاعه سمع صوت تسكير الباب بالمفتاح..
ضحك بعدم فهم...بعدين رفع حاجبه ومشي للباب..
وسكره بقوة....
هي سمعت تقربيعة الباب بلعت ريقها...ومشت لصغارها...
طلعتهم من الشنطه وحطتهم في سريرهم..
بعدين مشت لشناطيها بش بطلع منهم حوايج وتبدل...
بعد بدلت...
خدت المصحف وقعمزت تقرا في القرآن....
وهي تقرا فيه قعدت تبكي شويه شويه...
بعدين انهارت بالبكي...ضمت المصحف بقوة وقعدت تبكي بعبرتها وتقول:يارب...
هو فتح باب الدار وطلع للحمام...
جاه صوت بكاها..
اضايق ع الآخر..وخش للحمام....
شويه وطلع وهو مازال يسمع في صوت بكاها..
تنهد بضيق..
وخش لداره...سكرها عليه...
ومشي رقد ع سريرة وتغطى...
هيأ نفسه للنوم بس ماباش يجيه...
قعد يفكر في كل شي...ودموعه بدوا ينزلوا بروحهم...
وعدت هديكا الليله بين دموعه ودموعها..
لين ربي انزل عليهم رحمته وخلا النعاس يغشاهم...ورقدوا هما الزوز...
وعدت كم ساعه...لقبل الفجر بربع ساعه..
فتح عيونه فجأة...لما سمع باب الحمام تسكر..
مرر نظره حواليه...بعدين ناض...ونزل من السرير ومشي طلع من الدار..سمع صوت باب الدار التانيه يتسكر بالمفتاح..
تنهد...بعدين مشي للكوجينه..
خشلها خدي طاسة ميه وشربها...وبعدها ولى للدار..
وهو ماشيلها...رجع سمع صوتها وهي تبكي..
غمض عيونه بشده بعدين فتحهم ومشي للحمام..
🌺وهي وقتها كانت ع سجادة الصلاة بعد ماصلت الوتر قعدت تدعي لعدنان وماقدرتش تتمالك نفسها وبدت تبكي بالعبرة..
لعند مااذن الفجر...
هو بدل ومشي طلع من الشقه ناوي الجامع..
اما هي بعد ماضلت...خدت كرسي الزيانه ومشت قعمزت حدا صغارها وبدت تتأمل فيهم وهما راقدين وهي تسبح..
🍁🍁🍁🍁
"لالا ماما لا حبيبي لا"...
خش للشقه وهو يسمع في عياط في الصغار..
عقد حواجبه ومشي للدار طول..
طق الباب..
هي سمعت صوت دق الباب وقالت:نعم..
"خيرهم يبكوا"
لينا بهمس:افف وانت شن دخلك..
مشت حطت بحر ع السرير...وخدت وشاح حطاته حط ولفاته  عليها بسرعه لان الولد يبكي هلبه خداته من ع السرير..
هو طق مرة تانيه..
هي مشت فتحت الباب وقالت بنبرة جديه ممزوجه بالأنزعاج:عنده غازات شكله..
سفيان:واخته خيرها تبكي..
لينا:طبيعي يعني دام هو يبكي هكي اكيد اخته بتبكي معاه..
هو قعد يشبحلها بحده..
وهي لفت وقعدت تمشي وتجي بولدها وتحاول تسكته..
سفيان وجعوه الصغار هلبه قاللها:باهي مافيش حل..
لينا وهي عاطيه بالظهر:انزل ناديلي اللاي..
سفيان:تمام..
ولف ومشي طلع بسرعه...
وهي تحاول تسكتهم...
لحظات وكان خاش سفيان بأمه..
وجيهه:لينا..
طلعن لينا لوجيهه وهي تقول:غازات يااللاي كان في عندكم كمامين خل نديروهله..
وجيهه:هاتيه عنك وبري شدي اخته..
مدت لينا بحر لحناه ومشت خشت للبنت..
سفيان وهو متوتر:شن نديرولهم يام..
ع طلعة لينا بياسمين..
وجيهه:رضاعه كمامين..
سفيان عقد حواجبه وقال:شن هي هادي!؟.
وجيهه:انزل لوطا في القجورة اللي جهة التلاجه رابع واحد تلقى فيهم كيسه فيها يانسون جيبها..
سفيان:هو هدا بس..
لينا بتوتر:ايه عدي خف روحك..
شبحلها وين كلماته بهالأسلوب..جاي بيعطيها نظره من نظراته اللي تخوف..
بس ياسمين ماخلاتاش ولينا تحط فيها حدا كتفها شحت الوشاح ..وخلت امها من غير حجاب..
وعاد امها من غير حجاب بشكل شعرها المموج الطويل...جميله لأبعد حد..
هي طول رقت الوشاح ومشت خشت بالبنت داخل..
وجيهه:سفيان! ..
استاقظ وشبحلها..
وجيهه:هياا..
هو عقد حواجبه بإرتباك و قال:هيا هي ماشي..
ومشي بسرعه طلع من الشقه وهو يقول..
استغفر الله العظيم وخلاص..
وصل لوطا خش للحوش وتوجه للكوجينه وين خشلها..
نسي هو علاش جاي..
عقد حواجبه وقال:شن قالك جيب هي!؟
قعد يدور بعيون في الكوجينه ومش قادر يذكر..
سفيان لعصبيه:شن قالت جيب الزفت...وخبطه قبضة يده اليمين براحة كفه اليسار..
بعدين مسح بيده ع شعره...ومشي طلع من الكوجينه  ومشي لدار رتيل..
طق الباب بقوة..
في دار التانيه ناضوا خواته مخلوعات..
ونوريه مشت فتحت الباب وهي تساوي في شعرها سألاته وقالت؛خيرك اللطف ع الصبح شن في..
هو بإنزعاج:بالله نوريه خشي كملي نومك..
وقعد يطق ع الباب ويقول بعصبيه:فرخة رتيل..نومة اهل الكهف..
زبيده من الصاله:شن دايرة هالفرخه تاني ع صبح ربي..
طلعت رنده وقالت:شن دارت ياسفيان..
سفيان وصلت عنده حدها قال:بتخشوا تدمدروا توا ولاكيف..
جبدت نوريه رنده وخشوا وسكروا الباب..
شويه انفتح باب دار رتيل وطلعت وهي ترعش"اقسم بالله مادرت حاجه وتنرزى في صحتي وتنرزى في....ماحستش بروحها الا وهي مجبوده من يدها ...
مشي بيها للباب وهو يقول:اسمعيني كويس وركزي معاي اركبي فوق لشقتي تلقي امي قوليلها قالك سفيان شن هو وينه ابالزبط اللي قلتي عليه..
رتيل هزت راسها وقالت:حاضر..
ومشت جري طلعت وهي حفيانه..
وهو حط ايديه في نصه وقعد واقف يراجي..
شويه جاته رتيل وهي تقول؛قالتلك في اخر قجر حدا التلاجه سقد روحك وانت تتمرخى..
فنص فيها..
رتيل بخوف:هي قالت وحق ربي مش اني..
هو شبحلها من فوق لتحت وقال: اكيدقالتها قدامها..بكل امي هادي..
ومشي للكوجينه..
وين ماقالتله امه فتح الدرج ...جي قدامه عيونه اليانسون..
قال..ايوه..هو هدا..
وخداه ومشي بيه بسرعه للشقه..
وصل فوق وخش..
وجي لامه وقال:اهوا..
جاته امه مدتله بحر وقال:هات جاي..
هو عطاه الشكارة وخدي الولد..
وقعد يمشي بيه ويجي..
ولينا داخل عاطيه المرضعه لياسمين ترضع فيها...
لحظات وصوت بكي بحر هفت..
هي حولت المرضعه وحطت في مكانها اللاهايه..ومشت طلعت من الدار..
شافت سفيان يمشي ويجي ببحر وهو سكت عنده...
جاته امه وقالت:خيره سكت..
ابتسم سفيان وقال:تعالي شوفيه..
جت وجيهه لقاته حاط راسه ع كتف سفيان وعيونه مفتوحات ويشبح هني وهني..
ضحكت وقالت:ياروحي عرف عمه..
ضحك سفيان وقال:كيف ترا..
وجيهه بضحكه:وين نندري عليه هكي يقولوا..
لينا وهي تشوفلهم دموعها نزلوا وولت خشت داخل..
قعمزت حدا بنتها وقعدت تبكي بصمت...
كانت تتمنى يكون عدنان بطل هالموقف.....لكن اقدار الله حالت دون ذلك..
مسحت دموعها وقالت:الحمد لله ع كل حال...
🏵وخدي بحر رضعة الكمامين...
وارتاح عليها ورقد..
وهو واخته بعد ماتسببوا في ساعة استنفار رقدوا بالنوم..
ووجيهه نزلت لوطا..
اما سفيان فكان يجهز في نفسه للمشيه للبحر.
لبس كاجوال وكبوط جلد اسود وطاقيه صوف سودا غطا بيها راسه وودانه...وشال لفه ع رقبته..
خدي العده وجي طالع..
"لوسمحت"..
وقف والتفتلها وهو رافع حاجبه..
لينا بدون ماتشوفله؛طلع لبسك العربي بيش نحددهلك...
سفيان:مش من اختصاصك..
لينا شبحتله وقالت؛كيف!؟.
سفيان؛انتي هني موجوده بش تربي صغارك وبس..اي شي يعنيني مالكش بيه علاقه..
ابتسمت بتهكم وقالت:اكيد كلامك هدى يزيد يريحني..لكن في حاجات نا ملزمه بيهن قدام هلك ع اقل..واللي نعرفه عنك انك ماتعرف ادير حاجه تخصك بروحك ديما معتمد ع غيرك..واكيد حتقول لحد من اللي لوطا يدير الحاجه هدي وهكي انت بتجيبلي الكلام ونا ماعندي بال للمشاكل والكلام فاضي..فلو سمحت طلعهن..
عقد حواجبه وقال:في حد مكلمك؟
لينا؛لا...
سفيان شبحلها شويه بعدين حط حاجاته ومشي خش للدار..
لينا خدت نفس عميق وقالت:صبرني ياربي..
شويه وطلع وهو يقول..تلقيهم ع السرير وياربت ماتقربي شي تاني غيرهم..
وخدي حاجاته ومشي بيطلع....
وقف لما سمعها قالت..
"ربي يكون في عونك"...بنبرة استهزاء..
لما التفت لقاها خاشه للدار ومسكرة وراها الباب بالمفتاح..
ضحك بغيظ..بعدين عض ع شاربه...وغمض عيونه وهو يمصمص في شواربه...
هدا كله بش يلجم نار غضبه..
بعدين فتح عيونه ولف ومشي وطلع من الشقه...
🏵🏵🏵🏵🏵
"زهور هكي ساد"
زهور وهي في الكوجينه واقفه ع نساوين خوتها؛ايه هكي ساد..وخفي روحك.انتي وياها..
ومشت طلعت من الكوجينه..وخلتهم الزوز يتمتوا عليه بالدعي..
وين وصلت في الصاله جتها اختها ايناس وهي تقول؛ياعند ليك خبر سمعته امس في الليل..
زهور:ان شاء الله خير...
ايناس:ريتي مرت عدنان الله يرحمه اللي كانت سلفتك السبهاويه؟
زهور:ايه خيرها...
ابتسمت اختها بدهشه وهي تقول...
"ردها سفيان"

يتبع…
الفصول الاربعة