شكولينا

الجزء السادس عشر "" القسم الاول""

#شكولينا 🍫
#الجزء_السادس_عشر"القسم الاول"
#الجمان_الفريد

اسفه جزء قصير غير ما لهيتش..
الصلاة أولا💕💕💕《
《في بعض من الحوارات حقيقيه وهي تعبر عن وجهة نظر اصحابها》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
يوم الخميس..
الساعه الثانيه ظهرا..
درست السواقه بالسيارة قدام الحوش..
لينا:هي نتلاقوا على خير كل سنه وانتي طيبه..
السواقه:كل عام وانتي بخير..
نزلت لينا من السيارة وهي تقول:في امان الله..
السواقه:بالسلامه حبيبه..
مشت لينا للباب...والسواقه مشت..
فتحت الباب بالمفتاح وخشت لقت عمها مقعمز يتكلم في التليفون..
ابتسمت وحياته بحركة اليد...وهو ردهالها مع ابتسامه..
مشت طول لينا لحوش العيله من جيهة الكوجينه..
مشت للاوندينو اللي برا...حطت شنطتها ع تركينه وقامت كمامها وقعدت تغسل في ايديها...بعد كملت خدت شنطتها ومشت طول للكوجينه
خشت وهي تقول:السلام عليكم..
ردوا عليها السلام وهما يشبحولها...
منى"يابختك تطلعي وتغيري في جو ووجوه"..
زهور"مازال تخش الكوجينه هي!! مقوى راسها"
حطت شنطتها لوطا وقالت :تسقوا..
منى:ايه..
مشت لينا وين مافي السفر طلعتهم وبدت توتي فيهم...
ع خشة وجيهه للكوجينه..
قعدت تمرر في نظرها عليهم بالوحده وتذكر في اللي صار يوم امس..
عيونها كانوا ع لينا وخطر عليها شكلها امس وقت المشكله..
🔺️ في وقت سابق...يوم الأربعاء...
"تاخد فيا ع قد عقلي يام..تستغفلي فيا..!؟"
وجيهه:سفيان صل ع النبي ياولدي..
سفيان بعصبيه:عليه الصلاة والسلام..مدام هكي يام اني منكم معاش نبي ناكل ولانشرب..واقعدوا فيها انتم وياها..
ولف ومشي طلع من حداها...
هي بضيق:كيف ندير معاه اني هدا كيف..
ولفت ومشت للكوجينه..
لقت لينا فوسطها تلم في الماعين وملامح الحده مرسومه ع وجهها ودموعها محبوسات في عيونها..
واللي حواليها...منى وعفاف كانوا يعانوا فيها وعيونهم عليه ونظراتهم نظرات أسف...
وجيهه:الله غالب بنتي هدا عقله ماعندنا مانديروله..
لينا:احمم..مش مشكله..تعودت..
🔺️الوقت الحاضر...
غيرت وجيهه عيونها عن لينا وشبحت لزهور واذكرت الحديث االلي دار بينهم امس..
🔺️في وقت سابق...يوم الإربعاء..
وجيهه بنظرات حاده:انتي قلتيله ولا..
زهور بشي من الخوف':ايه اني..لكن هو عارف من قبل قالتله رفيده بنت عفاف بعدين ناداني وحلفني واني خفت ماقدرتش نكذب..
وجيهه:تو نسألها رفيده اني وكان طلع كلامك كذب ياويلك..
زهور:هوينا قدامك واسأليها..
🔺️الوقت الحاضر..
وجيهه:امتى روحتي لينا
لينا التفتت وقالت:كيف حالك اللاي توا...
وجيهه:الحمد لله...روحتي توا؟.
لينا:اها هدي خشتي..
وجيهه:باهي سقدوا الرجاله قريب يوصلوا
زهور:اهو خلاص كملنا ...
وجيهه هزت راسها ومشت طلعت من حداهم..
🏵🏵🏵🏵
كملوا تجهيز السفر...
وماكان في حد قاعد غير سفيان نزل مش شقته بش يرفعهم للمربوعه...
في الجنان..
زهور:تغديت..
سفيان:ايه..
زهور:شن تغديت؟!
سفيان:خديت من برا...ومشي بالسفره..
زهور تنهدت وخشت للكوجينه وهي تقول؛تو بيقعد ع ماكله المطاعم بس لين بطنه تنهرد..
منى:هو اللي أوفر الصراحه..
زهور؛هو هدا طبعه واعر...عياف ماياكل كان من اليد اللي واثق فيها..
منى:باهي وطي صوتك تو تجي لينا تسمعك..
زهور بصوت منخفض:وكان سمعت ع اساس معدله هي..ريتيها اليوم اول ماروحت خش الكوجينه ولاكإن صارت حاجه امس..طبعا تبي تخلي وجيهه في الجيب..
منى سكتت وهي تصب في المشروب..
زهور:حتى انتي ردي بالك معاش تاخدي راحتك معاها وانتي تدوي..
منى التفتت شبحتلها..
زهور:الثقه في الرسول والرسول مات..
قعدت تشبحلها منى شويه وهي تفكر في كلامها بعدين غيرت عيونها عنها وكملت صبان المشروب..
شويه..
وطلعت زهور بالسفرة..
ووراها منى بالمشروب..
وين خشوا الدار...
لقوا لينا مقعمزة ع صفره وحواليها الصغار توكل فيهم وتهدرز عليهم..وهما منسجمين معاها..
عفاف وهي تشوف لبناتها كيف ياكلوا ابتسمت وقالت:اول مرة نشوفهم ياكلوا هكي..
شبحتلها لينا بإبتسامه بعدين قالت:هيا نور كملي هدي راهو كان ماكلتيها مافي كاستردا..
نور كلت طول..
وجيهه:عندنا كاستردا؟
لينا:لا خديتها ونا مروحه وعدتهم البارح..
وجيهه:اها...
زبيده؛اسمعي يالينا نبي مقطع باللبن الليله..
لينا بضحكه:حاضر حناي..
زهور"معاش تاكل كان ماكلتها توا!!كان نعرف شن دايرتلكم بس"
ومنى تشوف للينا مرة مرة وهي تفكر في كلام زهور عنها...
🏵🏵🏵🏵🏵
الساعه 5:15 عصرا..
مقعمزه ع صلايتها تسبح بهدوء..
فجأه انفجعت...
لما سمعت اصوات بناتها يقولوا...
"بابا جي".
عضت ع شاربها من االخوف وهي مغمضة عيونها بشده..
فهالوقت...
كانت زهور في الكوجينه تجري وتوتي في ضيافة راجل عفاف..
مبادرا منها ماحد قاللها ادير شي.
ع خشة وجيهه شافتها شن دير بعدين قالت؛بعد تكملي كلمي راجلك يجي يرفع.
زهور:حاضر اللاي..
ومشت طلعت من حداها..وتوجهت للصاله..لما خشتلها قالت:خيره راجلك روح توا؟ مش قلتي بتعيدي عليه..
بلعت ريقها وقالت؛وين نندري عليه يام!..
وجيهه:مالا من يندري!! ماقالكش مروح؟
عفاف بإنزعاج:خلاص يام عاد كان في شي تو تعرفيه..
وناضت ومشت طلعت من حداها وامها اللي
استغربت في ردها لحقتها طول..
🏵🏵🏵🏵
"لاياعمي ماسافرتش بكل..هي قالتلكم مسافر!؟"..
الشريف:كيف! هي قالت مسافر وحتى العيد مش معيد هني..
ابتسم بتهكم وقال:لا والله ياعمي ماصارت...اني جبتها هني كنت نبي نأدبها بس.
سفيان برفعة حاجب:تأدبها!
شبحله وقاله:ايه..اختك ولت مقصرة اتجاه حوشها ولما ناقشتها قعدت تعلي في صوتها وتعيط..قلتلها نرفعك تقعدي في حوش ماليك بش تعقلي وتعرفي كيف تدوي مع راجلك..
الشريف:من اي ناحيه مقصره؟
:اتجاه حوشها ياعمي واتجاهي..
سفيان:لو قعمزت معاها وتفاهمتوا باالعقل خير من الجو المتخلف اللي درته...
الشريف:سفيان!
:ع خاطر ياعمي بنعديها.
سفيان:واني ع خاطر بوي نخليك تعديها.
الشريف:سفيان..
سفيان مسح حواجبه ورفعهم وهو يشبح لراجل عفاف بكبر..
الشريف:الأفضل نجيب زوجتك هني وتفاهم انت وياها قدامنا...
سفيان ناض ومشي طلع بش يناديها..
:ع خاطر ياعمي سكتت وقاعد نسكت لسفيان..
الشريف:خليك في مشكلتك انت وزوجتك وخلي سفيان ع جنب توا.
هز راسه وقال؛حاضر عمي..
..........
وجيهه بحده:كان الحكم للنساوين راني وريته قدره هالأجرب هو كان يحلم حتى الحلم يناسب الشريف بن عامر.
عفاف بدموع:تمادى هلبه يام تمادرى..
"عفاف"
وجيهه:خش خش ياسفيان..
فتح باب الدار وخش وسكرها وراه..
••في الكوجينه
منى:شكلها صايرة مشكله..
زهور:تصدقي والله حسيتها من الأول حالها ماعجبنيش..
منى:امم..تعرفي راجلها الوحيد اللي مايحباش مروان ...
زهور بضحكه:ممكن اكثر بنادم يكرهه سفيان بعد لينا..
ضحكت منى وقالت:خزي تافهه.
وزهور قعدت تضحك..
شويه انفتح باب الدار..شبحوا الزوز لباب الكوجينه شافوا سفيان فات وبعده عفاف وباين ع وجهها ملامح البكي..
زهور بصوت منخفض:ربي مايغيب عليهم بلي..
منى:اللي يدير سيوره يلقى خير ولاشر
🌺🌺🌺🌺🌺
في شقتها..
مقعمزة في الصالون وهي تتكلم بالتليفون..
لينا ببكي؛ماكنت نحسابه هكي يابريكه..ماكنت نحسابهم بيزدروني ويقرفوا مني ع خاطر لوني يابريكه..ماكنت نحسا ان مازال في ناس تفكر بهالعقليه..تصدقي في من ناس مايبوا يسلموا عليا باليد..تصدقي!
"ايه نصدق يالينا لاني ياما سامعه عن ناس لقوا معامله احرف من اللي لقيتها"
لينا ودموعها تنزل:باهي اني نفهم ليش هكي ليش! يعني اللب خلقنا واحد سبحانه خلقنا كلنا كيف بعضنا بس الفرق الوحيد اللون...يعني هما منقرفين من خلقة ربي..من بنادم كيفهم كيفه ربي كرمه وخلقه في احسن تقويم!!
"هدي المشكله هي تلقيه مسلم ويفكر تفكير جاهلي"
رشفت لينا وقالت:لكن والله صعب واجد واجد الوحده تخش عيله تواجه فيها الحموات مع السلاف..الراجل كيف بتتفاهم معاه قوليلي كيف ديرله لو فكرت تحطه عند حده الكل يجي ضدها هي ويطلعوها قليله ربايه...لكن هو عادي يبدا راجل وحاط راسه براس مرت خوه!
"ماخطمتش من يالاه الرجوله سلفك هدى"
لينا:اعوذ بالله منه..في حياتي ماكرهت بنادم كيفه اللي ريته منه وسمعته..مادار خاطر حتى لخوه..
"انتي تجنبيه بس يالينا لان هدى حاطك في راسه مادام مايبيك لخوه من الأول معناها ناوي يطفشك"
لينا؛وانا والله ماني مخليه عدنان لو شن يديروا هو ولاخواته..مستعده نتحمل ع خاطر عدنان كل شي..
'والله هو يستاهل راجل باهي لكن الحلو مايكملش طلع من عيله متخلفه."
لينا:حاشى عمي واللاي..
"اييه ياللاي انت"
ضحكت لينا من بين دموعها وقالت؛يقولوا اللاي هنى..
"انتي تسكري عام عندهم تولي تحكي طرابلسي"
لينا بضحكه:اها في كلمات علقن في لساني بديت نقول فيهن..
"مع الوقت لسانك كله يتغير"
لينا ضحكت وقعدت ساكته..
"ايوه بنيتي اضحكي وخليها ع الله..واعرفي انها ماصفيت لحد كل واحد عنده ماساده من الهموم والمشاكل..ومايقدرها ع حد كان اللي متوكل ع ربه ومصفي نيته كيف ما الشتاوة تقول..
الدنيا واسعه وعريضه...ياسعد اللي نيته بيضا..'
لينا بضحكه؛باهي اللي اتصلت بيك...ماقدرت نتصل بغيرك مانبي حد من عيلتي ينشغل عليا..وفي نفس الوقت انتي صاحبة خبرة في الحياة هدي ماينفعني حد كيفك..
"امتى ماتبي بنتي كلميني في أي وقت"
لينا بإبتسامه:ان شاء الله..
🏵🏵🏵🏵
"شن عاطي بنتي ليك ولا لاماليك اني؟"
:ياعمي قصدي هادي حاجه عاديه وين المشكله لو ساعدت مرة مرة..
الشريف:تساعد مش تخدم....
سفيان؛دوة نساوين مانبوش تتعمقوا فيها..بإختصار اختي ملزمه بحوشها وصغارها بس..
هو شبح لعفاف بعدين هز راسه وقال:تمام مش مشكله..هي نوضي وتي روحك انتي والصغار..
شبحت عفاف لبوها..
هز الشريف راسه بإيجاب..
هي تنهدت وناضت ومشت طلعت..
سفيان؛ياريت مرة تانيه مشاكل تافهه زي هادي تحلوها بيناتكم..
ابتسم راجل اخته برفعة حواجب وقال:إن شاء الله حاضر..
••وروحت عفاف مع راجلها وصغارها...
لكن امها قعدت تسحن ع راجلها اللي مداير في بنتها الويلات ع قولتها..
سفيان بإزدراء:كلا راجل بنتك هدا من يوم ريته واني كارهه وكان مش بنتك رضت بيه والله ماينكتب علينا نسابوا شكل زي هالشكل..
وجيهه:الواطي..مش ساده قاعده خدامه ليه وماليه ومش عاجبه...
ع خطمة الشريف من حداهم ماشي لسيارته..
وقف والتفت لوجيهه وقال:مرة تانيه هدرزي مع بناويتك اعرفي خيرهم..ماتقعديش زي الأطرش في الزفه وحني معاك..
ولف ومشي لسيارته.
وجيهه:هي تفضل جتني الدوة...
ابتسم سفيان وقال:وين ياحاج..
فتح الشريف سيارته وقال:تاجوراء عندي جماعه بنشوفهم غادي..
هز سفيان راسه...
الشريف:ماتنسوش غدوة ياوجيهه ان شاء الله..
وجيهه:ان شاء الله..ان شاء الله...
ركب الشريف سيارته وتحرك..
وسفيان ووجيهه يشبحوله لين طلع من الحوش والباب تسكر وراه..
فجأة..
"ياليل ياليل"..
سفيان شبح يمينه وقال:لاحول ولاقوة الابالله جيرة السو هادي حتى فهالأيام المباركه..
وجيهه:قالوا من ***** فرقة افراح..
سفيان ضحك بتهكم وقال:زمزامات يعني..واضحه من لونهم..
وجيهه شبحتله ع جنب بعدين ناضت ومشت خشت داخل..
سفيان:اليوم مروح مأخر يام...
وجيهه:باهي باهي..وخشت داخل..
وهو مشي لسيارته..
🏵🏵🏵🏵🏵
الساعه 12:00ليلا..
"رقد"
منى بهمس:ايه...
وحطاته في سريره...
بعدين مشت بتلبس عبايه ووشاح..
مروان :هيي وين ماشيه!؟
منى وهي تلبس فنصت فيه وقالت:وطي صوتك..بننزل اندير معاهم العصبان..وبعده السحور..رد بالك ع شيرو..كان ناض عطيه المرضعه اللي جنبه..
ومشت طلعت من الدار..
وهو معاها بعيونه بعدين غمض عيونه بإستياء وفتحهم وقال:عيشة تقصر العمر..
............
سفيان؛رد بالك تقربهم ولاتجي جيهتهم..
زهور بضحكه:ياودي حاضر ماتخافش مانخلي حد يقرب من حصتك..
سفيان هز راسه ورجع شاف للاب توب..
هي ابتسمت بعدين لفت ومشت طلعت من حداه...
سفيان بتذمر؛اففف..شن البنادمه التافهه هادي!! كان نعرف مني بس نمسح بيك الوطى مسح...
🏵🏵🏵🏵🏵
مدايرات دايرة ع صونية كبيره في وسط الجنان..
مقعمزين ع حصيرة كبيرة...يحشوا في العصبان ويتسامروا..
لينا:نحنا عندنا القلايه تخش في المناسبات كلها في الفرح فالغالب نديروا فيها هي..
وجيهه:لتوا خاطرنا في الفتات متاعكم شكر فيه عدنان هلبه..
لينا بإبتسامه:هو يختلف ع اللي ديروا فيه انتم ان شاء الله ربي يسخر ونديره ..
زهور:اللاي سمعت عفاف يومها قالت بديرو العاده متاع كل عام يوم الموسم انتي قلتيلها ايه..شن هي العاده؟
وجيهه:ياحنه عمك الشريف في الموسم لما يجيب عمك عمال مصاروى افارقه بش يفطر هو وياهم..
منى:ومن قال صايمين ولامسلمين اصلا؟!
وجيهه بضحكه:ايه صح...لكن هو قصده الصدقه...يوكلهم ويعطيهم حصة من اللحم من الخرفان اللي يذبحهم يوم الموسم..
لينا بإعجاب:ماشاء الله!
وجيهه بإبتسامه:مش هكي وبس قبل العيد بيومين لازم يمشي بروحه يفرق ع ناس محتاجه ضحايا للعيد هي صح ممكن ماتنحسبش ضحيه ع اللي ياخدها لكن اهو يفرحوا بيها صغويرة..
زهور:ربي يباركله في رزقه..
كلهم باصوات متقطعه:آمين..
وجيهه؛اييه عمكم هدا ربي يحفظه ليه يد في الخير في كل شي..تعرفوا علاش يحب يجيب ضيوف لحوشه ويعزم..ديما يقولي الضيف يجيب البركه معاه لاهل الحوش..
لينا:من كان يؤمن بالله واليوم الآخر فليكرم ضيفه..باتي ديما يقول فيها وين يجينا الضيف..
منى:والله حتى بوي هكي يام عزم وكرم..
وجيهه:ربي يديم عزهم..
الزوز قالوا:آمين..
زهور:هدا عصبان سفيان اللاي في صونيه بروحه..
شبحوا منى ووجيهه للينا لقوها لاهيه باللي دير فيه..
وجيهه:باهي بري دسيه في الفريز اللي برا..
ناضت زهور بالصونيه ومشت طلعت من حداهم...
وجيهه:لينا نبوا منك انتي سحورنا الليله خل نذوقوا قلايتكم..
لينا شبحت لعزوزتها بإبتسامه وعيون تلمع فيها الدمعه:وشن بيتسحر سلفي سفيان؟
منى شبحت لوجيهه..
وجيهه:بيتسحر في حوشه..
لينا هزت راسها ورجعت شافت للمصران اللي تحشي فيه...
وجيهه غيرت عيونها عنها وشبحت لمنى.
ومنى تشبح للينا بضيق...
وجيهه؛هيا خفوا ايديكم خل نكملوا بسرعه...
🏵🏵🏵🏵
تاني يوم...
من الساعه عشرة الصبح وهما يحوسوا ع الحوش وع العشي...
لينا طول الوقت كانت تستغفر مابطلتش استغفار...
ولما جي وقت مابين الظهر والعصر..
خدت تركينه في الجنان وقعدت تدعي من قلبها..
"يارب كون معايا وعطيني الصبر والقوة وسخرلي القلوب القاسيه المتكبرة يارب وادفع عني شر اصحابها كان مابتش تلين..
يارب ماتخلي حد يفرق بيني وبين عدنان يارب ارجوك ادفع بحولك وقوتك شر كل من يبي يفرق بيني وبينه يارب..يارب تمملي حملي ع خير وكبر في داخلي ذرية صالحه يارب تكون ليا قرة عين نا وبوهم يارب..ويارب انك تفرحني بحمل اختي يارب يارب يارب...ويارب تفرح زهور بحملها وتعينها ع الراجل اللي عندها وتسخرلها قلبه والله واجعتني واجد...ويارب يارب انك تفتحها عليا وترزقني من واسع فضلك كل خير دنيا واخره...واخر شي يارب يارب يارب...لاتجعلني ظالمه ولامظلومه ولا ذاله ولامذلوله يارب...ماتخليني ندير شي يخلي خلقك يدعوا عليا بقهر وانت تستجيب دعائهم يارب..يارب....آتني في الدنيا حسنه والآخرة حسنه وقني عذاب النار..وصل اللهم وسلم وبارك ع نبينا محمد"
🏵🏵🏵🏵🏵🏵
الساعه 8:30مساءا...
في الجنان..بساط كبير مطروح...
عليها 7سفر ماكله...وكل سفرة عليها 5نفار...
والشريف مابيناتهم هو وولده مروان..
بس سفيان..
كان في الجنان من الجهه التانيه يتعشى بروحه وزهور تاكل معاه..
وهما يتعشوا جي مروان للكوجينه شبحهم قال:صحه صحه..
سفيان بضحكه؛تعشيت!
••في الكوجينه
منى:شكله مازال يبي خل نويتله قبل يقولي..
ولينا تشوفلها وهي توتي في سفرة العشي متاع النساوين..
برا...
مروان بضحكه:واهو سايرت بوك..
سفيان :والله ماك مجبور تسايره وتتحمل الصنه والعبيد..
زهور فنصت في سفيان وهي شاده ضحكتها..
ومروان فنص وحط يده ع فمه اشارة لسفيان انه يسكت..
سفيان ضحك بسخريه وقال:شن كذب !!؟
داخل..
منى وهي تحط في الماكله لمروان تشبح للينا..
اللي قامت السفرة ومشت طلعت من الكوجينه وهي تقول بهمس"حقير منحط"..
منى بعد ماطلعت لينا قالت:لاحول ولاقوة الابالله...
••في الدار..
حطت لينا السفرة وقالت؛هي اقربي اللاي..
ناضت وجيهه وهي تقول:ترا نادي ع رتيل..
لينا:باهي..
ومشت طلعت لدار رتيل..طقت عليها الدار..
"خشي"..
فتحت الباب وقالت:تعالي كم بتعشي..
ابتسمت رتيل ونزلت من سريرها وجت للينا شدتها من يدها وقالت؛بعدين تعاليلي الدار نبيك في موضوع..
ضحكت لينا برفعة حاجب وقالت:تمام..هي تعالي..
ومشوا طلعوا مع بعض لدار التقعميز..
🏵طبعا لينا ع العشي شاده الصغار تاكل هي وياهم وهما تعودوا عليها معاش ولوا ياكلوا الا في وجودها..
صغار نوريه كانوا معاها ماعدا الشريف كان مع جده برا.
نور:نبي ميه..
لينا؛باهي..
ناضت ومشت طلعت من الدار وقرب توصل فيها..
"هدا منو دايره"
زهور:مرت مروان..
قام منه طرف وقعد ياكل ..بعدين شبح لسويسرول دجاج منظره مغري لابعد حد...
رجا لين بلع بعدين اشر ع السويسرول وقال:وهدا..
زهور بضحكه:مرت عدنان..
ارتسمت ع وجهه ملامح الإزدراء وقال:دسيلي من الحاجات اللي درتوها وركبهالي فوق بش بعدين نولي عليها..وتوا ديري شاهي..
برا...
لينا ولت ومشت وقفت ورا الحيط تراجي فيه امتى يطلع..
فهالوقت..
طلعت منى من دار التقعميز لقتها لابده حدا الحيط استغربت
منى:خيرك واقفه هني؟
لينا:الجمري في الكوجينه..
منى حطت يدها ع فمها وهي تضحك..
ولينا شدت ضحكتها وهي معصبه..
منى بضحكه:تعالي معاي نخش اني وياك هو يطلع
لينا:ابدا والله ماني خاشتها وهو فيها..
منى بضحكه:تو ماتخافيش من فريق نويره..خايفه من سفيان!
لينا:ريتي فريق نويره هدى اضربيه في 60 الناتج اللي يطلعلك على عشرة اضعافه الجمري بردعهم كلهم..
منى قعدت تضحك..
"خلاص اني راكب توا نص ساعة وننزل"
وهو طالع شبح ايمينه شاف منى واقفه..هي طول نزلت عيونها .
وهو غير عيونه عنها ولف ومشي للباب..
شبحتله وقعدت معاه بعيونها لين طلع..
منى:هي تعالي طلع..
لينا:منى ياريت مايوصلش زهور كلامي اللي قلته..
منى:عيب عليك لينا قصدك اني نعاود في الدوة!
لينا:لا مش هدى قصدي مرات تقولي الكلام قدامها بحسن نيه بصارة يعني وهي تضايق مني مهما كان راجلها ماترضى فيه..
منى ابتسمت وقالت:مانقول شي ماتخافيش وهي تعالي..
ابتسمت لينا ومشت مع منى للكوجينه...
خشوا للكوجينه...
مشت لينا بتصب ميه لنور...
رن تليفونها طلعاته من جيبها وشافاته لقت المتصل اختها هناء...
مشت بسرعه للدار عطت نور الميه وقالتلها شويه وجايه..
وولت للكوجينه..وعاودت ع اختها..
لينا:ياهلا بهنو..
"هلا بيك صح فطوركم ع قولتكم"
لينا بضحكه:قولت من!؟
"عرب الغرب ماك وليتي منهم توا خلاص"
ضحكت لينا وقالت:الله يسلمك..عافيه ياحنه .
"الحمد لله ياحنه..لامازلتي منا وفينا ماتخافيش".
لينا بضحكه:باهي كيف حال شعبان..
"ياكوكتيل انت الحمد لله..اهو فرحان وطاير من الفرحه ومش عارف وين يحطها"..
لينا بضحكه استغراب:ليش!؟
"هاك ياحنه افرحي حتى انتي مرته اللي اختك طلعت حامل"
لينا صاحت من الفرحه..
وسلفاتها انخلعوا..
وعزوزتها سمعت صوتها جت للكوجينه تجري..
"طبقتلي الطبله"
لينا حطت يدها ع فمها وبدت تبكي..
وهما يشوفولها..
وجيهه؛خيرك يابنتي من تكلمي!
منى:اختها..
وجيهه شبحتلها بإستغراب..
ولينا تبكي..
جاها صوت اختها الباكي وهي تقول
"من نهاى قتيلي ع الاستغفار واني شاداته في الاول كنت نفكر في الذريه بس ..بس بعدها سبحان الله بديت نستغفر بيش نحس بالراحه لو نقولك يالينا شن جانا من خير الايام اللي فاتت وقداش في حاجه تيسرتلي تصدقي في ناس تغيرت معايا يالينا شن مايتصدقش..واهو ربي ختمها معايا ووصلني للي نبيها وفرحني في يوم كيف هاليوم المبارك"
لينا ببكي:قتلك ياهناء والله حتى وانتي في عز همك تكوني مرتاحه..
"الحمد لله رب العالمين"
لينا؛وهاه استمري مش توقفي..ربي يتتملك حملك وتشوفيه ع خير يارب..
"اللهم آمين...هي خل نكلم امي نبشرها"
لينا:مازلتي ماقتيلها؟!
"لا قلت نخبرك انتي الاولى لانك السبب"..
ابتسمت لينا وقالت:باهي خبريها وفرحيها فيسع بالسلامه
"بالسلامه وكل عام وانتي بخير"
لينا:كل سنه وانتي طيبه...
ونزلت التليفون وقعدت تمسح في دموعها وهي مبتسمه وتقول:اختي هناء حامل..
وجيهه:هادي اللي ليها عامين متزوجه؟
لينا هزت راسها بإيجاب..
وجيهه:طيب فيها..ربي يتتملها ع خير..
منى؛مبارك عليها تحل عويناتها ع خير..
لينا:الله يبارك فيك..تسلموا..
زهور ودموعها في عيونها:مبروك..
وجيهه:الفال ليك حتى انتي..
زهور:يارب..
ولينا تشبحلها..
وجيهه تنهدت ومشت طلعت...
لينا وهي تشبح لزهور:لزمت الإستغفار ليها شهور وربك كرمها..
زهور:هدا مادارت مادارت شي تاني؟!
لينا حركت راسها بالنفي:لا..سلمت الامر لله وبس..
زهور قعدت تشبح للينا وهي تفكر..
ومنى قعدت تشبح لزهور بشفقه...
🏵🏵🏵🏵🏵
مكالمة هاتفيه..
سفيان:ايه زي العاده..
"ربي مايقطعهاله..."
سفيان:آمين..ايه قول انت شن داير في بلاد الدببه..
ضحك وقال
"دببة شني ياراجل روسيا هادي حتى في الصيف مصقعه الصيف متاعهم الشتي متاعنا"
سفيان:قصدك لابس كبوط ومتلتم!!
"لاعاد مش لهالدرجه بس صقع..المهم بنوصيك سفيان"
سفيان:ع شني؟
"نبيك تكلم بوي يرفع المراة لأهلها تالت يوم العيد"
عقد سفيان حواجبه وقال:اعتقد صعب ياعدنان..
"علاش"
سفيان حك حاجبه وقال:ع حسب مانعرف يعني..في اول شهور حمل ممنوع تسافر طيارة والبر مش باهي حتى هو والطريق طويله..
"تصدق مافكرتش فيها..باهي كيف يصير لازم تمشي لاهلها في العيد"
سفيان:هما يجوها كان هدا..
قعد عدنان ساكت وهو يفكر..
سفيان شدت عظمة انفه بصوابعه وغمض عيونه حاس براسه مصدع ويبي يشرب منبهات:هاه ياعدنان شني؟
عدنان؛تمام تو نشوف..
سفيان فتح عيونه وقال؛قولي علاش ماكلمتش بوي منك ليه..
"متحشم منه ياراجل طلبت منه هلبه حاجات "
سفيان ضحك وقال:تمام..هي اني بنسكر بننزل نشرب حاجه تعدل دماغي..
"اوكي..هي كل عام وانت بخير"
سفيان:كل سنه وانت طيب..رد بالك ع روحك..السلام عليكم
"وعليكم السلام...سلم ع الجميع"
سفيان؛يوصل...في امان الله..
سكر سفيان بعدين فتح باب الحوش وطلع..
🏵🏵🏵🏵🏵
"امم شن هو الموضوع اللي تبيني فيه"
رتيل؛امم..لينا توا انتي اول راحد حبتيه في حياتك خوي عدنان؟
لينا بضحكه:ايه.
رتيل؛قصدك زمان في المدرسه لما كنت زيي ماعجبك حد..
لينا:لاانا لما كنت في عمرك عقلي في قرايتي بس.
رتيل:خلينا منه الجو هدا وقولي الصراحه.
لينا بضحكه:وحق ربي عقلي في قرايتي بس..كنت نخاف نفكر في الحاجات هدي ونعرف انها حرام وعيب.
سكتت رتيل وهي مضايقه..
لينا شبحتلها شويه بعدين قالت:انتي احكيلي اللي عندك ونا نوعدك نساعدك..
رتيل:وعدك يكون سر لينا سر..
لينا بضحكه:اكيد رتوله..
رتيل ابتسمت وبدت تحكيلها..
🏵🏵🏵🏵
في دار التقعميز..
كانوا موجودات منى وزهور..
يوتوا في الحنه...
منى:لاحبيبتي تالت يوم ماهو تاني يوم بيجوا البنات والعيله يعيدوا..لكن اني كان مشيت تالت يوم بنبات..
زهور:حتى اني ان شاء الله يقولوا باهي..
منى:لا والله مادخلي بيه بنبات يعني نبات..
زهور؛زعمه هديكا شن يصير فيها..
منى:قصدك لينا..
زهور:اممم..
منى:كان نعرف علاش من طايقتيها المراة كويسه هلبه..
زهور:انتي اللي عبيطه هلبه..ماتشوفيش فيها شن قاعده بض تولي الكل في الكل وتحط العيله كله في جيبها..
منى:لا نحس فيها عاديه تصرفاتها كلها تلقائيه..
زهور:تصرفاتها عينك..ركزي معاها مرة تانيه وتو تولي لكلامي.
ع خشة وجيهه وهي تقول:هاه شنو لصقتوا؟
زهور:ايه اللاي سامحينا بنعتبوك..
قعمزت وجيهه وهي تقول؛لاتعب لاشي..اولكم عيد كبيرة لازم يشوفوكم بحنتكم...
منى شبحت لزهور وهي مضيقه عيونها...
وجيهه؛هي انتي الاولى انتي الكبيرة..
ابتسمت زهور..
ووجيهه بدت تحني وهي تقول:ربي يحن عليك ويعطيك الصغار..
زهور:آمين...
ع خشة لينا ورتيل..
رتيل:يام اني بنحني ليونه..
شبحولها زهور ومنى..
وجيهه بضحكه:اشيه..
لينا بضحكه؛هي اللي شدت فيا..
وجيهه:باهي ريحتني..
رتيل:هي قعمزي لينا خل نبدوا نلصقوا..
لينا بإبتسامه؛باهي..
وقعمزت هي ورتيل وبدوا يتساعدوا ع اللصقه ويهدرزوا..
ومنى لهت بيدها اليسار تحني فيها..
اما زهور فكانوا عيونها ع لينا وهي تشوفلها بنظرات كلها كره وغيره...

يتبع ...
الفصول الاربعة