شكولينا

الجزء الرابع والعشرين

#شكولينا
#الجزء_الرابع_والعشرين
#الجمان_الفريد

سئل رسول الله ذات مرة..
أي الأعمال أفضل؟ فقال...الصلاة في وقتها...
الصلاة أولا وقبل كل شي❤
قولوا لاإله إلا الله تفلحوا...
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
ياسمين في يد حناها..
وامها تلبسلها في الستريتشه ع راسها وهي تقول بإبتسامه:كملنا...ياسلم بنية ماما السمحه..
وجيهه لفتها ليها وهي تقول:نجيها ياربي وسمحها حبيبة حناها..
ابتسمت لينا وهي شاده في يدها عطر وبودرة الأطفال..
بعدين شبحت لبحر وهو راقد ويلعب بإيديها وضحكت..
منى:اهو حتى حني ياحنينه دوشنا ودرنا شعرنا عدلي علينا..
ضحكت وجيهه وهي تشوف للشريف كيف يشبحلها بغيره وقالت:ماشاء الله ع غزيل حناه ماشاء الله انت احلى منهم كلهم..
ابتسم الشريف بفرحه..
وهما يشبحوله ويضحكوا..
زبيده:غير كان تحلقوله هالغفه...
منى بإبتسامه:عاجبه بوه ياحناي قال نبي شعره يقعد هكي..
لينا بإبتسامه:موضة الشعر اللي هكي توا..
ومنى تلعب بشعرات ولدها وتشبحله..
وفي عز هالجو اللطيف....
يخترق صوت غاضب يشبه الرعد حاجز هالهدوء.
ويرعب الكل..
واكثرهم لينا اللي انتفضت وين سمعاته ينادي..
"لينا"
وجيهه بخوف:خيره اللطف..!
"لينا"
زبيده بخوف:نوضي بنيتي نوضي بسرعه..
لينا حطت الحاجات اللي فيدها وناضت مشت طلعت وهي خايفه..
زبيده:ربي يهديه ويصلح رايه..
وجيهه:مرات هي اشبح شن دايرة..
زبيده:ماعندها مادير غير ولدك كارهها..
ومنى تمرر في نظرها عليهم وهما يتكلموا بقلق...
••برا...
وصلت لينا في الباب وهي تقول..
لينا ؛خيرك؟.
سفيان بنظرة غضب تخوف:تعالي..
مشي  وهي مشت وراه وقعدت تفكر بخوف علاش معصب لهالدرجه..وهي شن دارت!!؟
وصلوا للشقه فتحها وخش..
وهي  خشت بعده..
هو سكر الباب بقوة..
هي انخلعت وشبحت للباب بعدين شبحتله..
هو بغضب:انتي تمشي وتحكي للناس عن حياتك الخاصه!؟
لينا بصدمه:كيف!!؟
سفيان بغضب:انتي اللي كيف تحكي عن اللي يصير في الحوش للي يسوى واللي مايسواش كيف طلعي اسرارك واسرار غيرك للناس كيف!؟ هكي متعلمه ومتعوده انتي!؟
لينا بحده رفعت سبابته فوجهه وقالت؛ماتتمادى احسنلك..
سفيان:نزلي يدك..
لينا:لا..
سفيان:نزليها..
لينا:مش منزلتها لين تعرف حدودك وتوقف عندها..
سفيان فقد اعصابه رفع يده وقال:يا......وبلع الكلمه اللي جي بيقولها
وهي تشبحله بحده وعيونها مفتوحات  ع وسعهم..
تبان من برا ثابته وجريئة...لكن من داخل كانت ميته من الخوف
هو نزل يده وشده ع قبضتها وقال بعصبيه؛مستفزة..مستفزة..مستفزة وبتخليني ندير شي مانبيش نديره..اسمعي اني لتوا مراعي الظرف الاسود اللي انحطينافيه ونحاول نسايرك ونتغاضى ع وقاحتك ع خاطر صغارك..لكن انتي تبيني  نعاملك المعامله اللي تمشي معاك من البدايه..
لينا :قصدك المعامله اللي تمشي معاك انت...الاحترام والحن والاسلوب الكويس ماهنش ليك..
غمض عيونه بنفاد صبر وقال:صبر جميل والله المستعان..
وهي تبلع في ريقها وتقوي في روحها وتحاول تتماسك وتشد دموعها اللي تبي تغلبها..
لف وجهه عنها ومسحه بيده بعدين حط يده ع فمه وفتح عيونه...بعدين نزل يده وشبحلها وقال:اللي يصير هني معاش اطلعيه برا...المراة بنت العيله...ماطلعش اسرار حوشها لحد حتى لأهلها..
هي عقدت حواجبها وهي تسمع في كلامه وقعدت تفكر فيه..
《 الشريف:كان هدا اخطم ع حوش عمتك ربيعه واعطيها هدا..》
ارتخت ملامح وجهها لما فهمت كل شي..
شبحتله وقالت:انا بنت عيله وانت تعرف هالشي كويس..ومافي يوم طلعت اسراري الخاصه لحد..ولو انت سمعت حاجه من حد يااما يكون طالع من غيري او انه ماهوش سر من الأساس..
ضيق عيونه وهو يشوفلها ومن غيظه قعد يحك في شاربه التحتاني بسنونه..
وهي واقفه تشبحله بنفس النظرة البارده والملامح الواثقه..المستفزة المستفزة المستفزة...ع قولته..
ضم شواربه ع بعض بعدين هز راسه وقال:امم..تمام...معناها من اليوم وبرا غادي خدمه مع صغار عمتي معاش في
ضحكت بعدم فهم
سفيان:والله..ماعاد خادمه معاهم مرة تانيه..
ولف ومشي وخلاها واقفه في مكانها تشبحله بعدم استيعاب...
كيف يعني...#شكولينا  معاش في من اليوم!؟
💎هو خش لداره..
حط اللاب توب ع تركينه...وحول بالطوه ولوحه ع الكرسي والشال متاعه حول بعصبه ولوحه ع الكرسي.
وحط يده ع ظهر الكرسي..ويده التانيه حطها في نصه وهو يتنفس بقوة من العصبيه..
شويه وسمع باب الشقه تسكر بقوة..
شبح جهة باب...الدار وبلع ريقه ومازال ياخد في نفسه بسرعه من العصبيه...
🌺اما هي..
بعد ماطلعت دموعها طول نزلوا..
قعدت تنزل وهي تبكي بصمت...
ولما وصلت للحوش..مابتش تخش من بابه القدامي..
مشت لفت عليه وهي مازال تبكي..
لين وصلت في الطاوله والكراسي اللي تحت المظلة حدا العصافير..
قعمزت حداهم وقعدت تشبحلهم وهي تبكي..
جي قدام عيونها شريط حياتها مع عدنان..
عدنان اللي ديما واقف في ظهرها..
اللي احترم رغباتها ووقف وراها بش تحقق احلامها ووفرلها كل شي بش توصل للي تبيه.
عدنان اللي عمره ماوجعها بنظرة..
عدنان الزوج الصالح اللي قرت بيه عيونها..
اللي دعت ايام وليالي بش ربي يوهبهولها...
ووهبه ليها...بس لما وهبه خداه بسرعه!
الحاله اللي هي فيها خلتها متشتته وحايره ومش فاهمه شي..
علاش ياربي بعد ماعطيته خديته..!؟
علاش ياربي تعطيهولي من الأصل كان بتاخده..!؟
باهي وان قلت ان اخدك ليه مصيبه تمنيتك لو ابدلتني خيرا منها...
خيرا منها بأي شي مش شرط زوج...
لكن ياربي انت مش بس خديته لا...انت ابدلت الخير بالشر..
زوج صالح رحيم...بزوج سيء الطباع لئيم..
بزوج كان يحبني ويحترمني..
لزوج كارهني ويتعمد يهيني كل ماسحنتله الفرصه..
علاش ياربي..علاش...في شي درته مايرضيكش..
غلطه غلطتها واني مش عارفه وقاعده ندفع في ثمنها..
ماهو مش معقوله اللي قاعد يصير فيا هدا كله من غير سبب..
ينقلب حالي كله من حال لحال بدون سبب..
🍁هالأفكار اللي دارت في عقلها في هديكا اللحظه خلتها تحس روحها ساخطه ع اقدار الله..
قداش شافت ايام حلوة وعاشت لحظات جميله من اللي خلاها تعيشها غير رب العالمين.
كم مره عطاها فوق دعائها ومسألتها بمراحل..
كم مرة ييسرلها امور متعسره..وقف معاها في كل مرة كانت فيها في موقف صعب..
ولما تعكرت معاها الحياة لاول مرة...جحدت هدا كله ونساته!؟
هو المؤمن مبتلى...هما الأنبياء الأشد ابتلاءا...
والابتلاء مهما كان صعب للمؤمن مايجيش الا بخير..
مافيش بني آدم في الحياة هادي مش حيخش في امتحانات وسط دار هالإمتحان الكبير..
مهما عاش حياة سعيده ومتيسرة وشاف ايام حلوة لابد وحيمر بمحطات توقفه..تتعبه..تكسر ظهره..
وبعدين رجع وقف ع رجليه وكمل الحياة..وحيرجع يضحك تاني ويعيش السعاده..
لابل الصابر المحتسب الراضي..يطلع من هالابتلاء بمنحه عظيمه..ويعيش سعاده ماعاشش زيها قبل.
سعاده تخليه يحمد ربي ليل نهار اللي حطه فهالمحنه...
بعد ماوصلت لهالنتيجه بعد طول تفكير..
مسحت دموعها..
وبعدين شبحت ليدها اليمين..وبدت تستغفر وهي تعقد على صوابعها...تستغفر وتستغفر..
وشويه شويه تسللت الراحه لقلبها لين ملاته تماما..
خدت نفس عميق..
بعدين ناضت ومشت للشيشمه اللي برا...غسلت وجهها...
فجأة آذن المغرب..
وبدت تردد مع الآذان...
لين تم...وبعد ماصلت ع النبي...بدت تدعي من قلبها وتسأل الله..
الصبر...والقوة...والثبات...والرضا...
🌺🌺🌺🌺
بعد صلاة المغرب..
خشت للكوجينه مع سلفتها بش يبدوا في العشي..
منى لاحظتها مهبيه ومطفيه وعيونها عليهم اثر البكي..
ترددت هلبه بعدين قررت تسألها..
منى:خيرك لينا؟
لينا تنهدت وقعدت ساكته..
هزت منى راسها وقالت:ربي يفرج..
لينا:شن العشي الليله؟
منى:مبكبكه وطاجين..
لينا:برواحنا مش جاي حد؟
منى:ايه مروان وسفيان مش متعشيين هني..
لينا تجاهلت اللي سمعاته بعدين قالت:شن تبي تاخدي..
منى:انتي شن تبي.
لينا:خلي اني ندير المكرونه وانتي الطاجين..
منى؛تمام..
🌺رغمه...الألم والغصه..
لازم نكملوا مشوار الحياة...بكل تفاصيلها..
مروا عليها تلاته ايام...
الكلام بينها وبينه معدوم نهائيا..
الصبح يرفعها المستشفى..لما ينتهي الدوام تطلع تلقاه قدامها.
حرفيا...ماتخاطبوش نهائيا بولا كلمه طول هالأيام..
هو كان يتعامل مع امه حتى بخصوص الصغار..
وامه اللي خدت بنصيحة عزوزتها برغم ضيقها من الحال اللي تشوف قدامها....
بس كان عندها تعرف علاش لينا نهت التعامل مع اساور وقفت خدمة الشكولاته اللي ولت متأكده ان سبب المشكله  بينها وبين سفيان بسببها..
كان اخر شي اشتغلت عليه لينا طلبية الدكتورة اللي تخدم معاها..واللي مش عارفه كيف بتعطيها الطلبيه متاعها..
الدكتورة ماتقدرش تجي للحوش..
وتقدر بس تبعت واحد من اقاربها يجيب الطلبيه..
ولينا مستحيل تجيت حد للحوش وتعطيه الطلبيات..
مش حيرضى سفيان بجيان الرجاله للحوش حتى لو ماتعاملتش معاهم شخصيا..
لاهو  ولابوه..
باهي شن الحل!!!...
والمراة طلبيتها لازم توصلها الاربعاء قبل المغرب!..
••الساعه 4:40عصرا..
تمشي وتجي في الجنان اللي قدام الكوجينه وهي تقرا في الأذكار..
بعدين كملتهم..
وقفت وخدت نفس بعدين قالت:عدي يالينا عدي ماتكوني جبانه مش واكلك هو...
زفرت...بعدين استجمعت قوتها..
ومشت...
لفت ع الحوش لين وصلت في الجنان من القدام..
وين ماهو مقعمز شاد كتاب ويقرا..
لينا "ياريتهن نفعن فيك"..
تنهدت بعدين قدمتله..
وقفت قريبه عليه..وكيف جايه بتدوي.
رفع عيونه فيها وضيق عيونه بشي من الآستهزاء وحط رجل ع رجل وقال:خير؟!..
هي عقدت حواجبها وغيرت عيونها عنه وقالت؛بنطلب منك طلب..
سفيان:اللي هو..
لينا؛في دكتورة اللي نخدم معاها تبي مني طلبية #شكولينا ع شان عرس خوها واني عطيتها وعد نديرها وتكون مني هديه..وانا كملتها وهي تبيها اليوم..
حط سبابته فوق حاجبه وهو متكي بمرفقه ع يد الكرسي وقال:ايه واني شن دخلي..
لينا تنهدت بتوتر وقالت؛نبي نوصلهن لها..
سفيان رفع حواجبه وقال:آه يعني اني حنولي مندوب ع اخر الوقت..
لينا شبحتله شويه بعدين قالت؛والله ماكنت نبي نجي نكلملك  غير مانبيش نحط نفسي مع المراة في موقف ونحطها حتى هي فيه...ياريتني حطيت روحي في موقف معاها ولاحطيت روحي في موقف معاك..
ولفت ومشت وهي معصبه..
وهو تبعها بعيونه وع وجهه ملامح ضحكه...
🌺وصلت في الكوجينه وهي مضايقه ومحرجه من الموقف اللي انحطت فيه مع الدكتورة..
لينا:ياربي كيف بندير توا؟!  قعدت تفكر شويه بعدين قالت..مافيش غير اني نكلمها وهي تتصرف بروحها وخلاص..
وكيف جت بتتصل بيها رن تليفونها..
وكان رقم غريب...ضيقت عيونها بإستغراب وهي تشوفله..
بعدين فتحت الخط وحطاته ع وذنها وقعدت ساكته..
"تردي ع ارقام غريبه انتي"..
فتحت عيونها ع وسعهم بمفاجأة..
"تمام تمام بعدين ساهل..ع العموم..وتي روحك بسرعه اني ف السيارة نراجي"..
وسكر في وجهها..
حولت التليفون من ع وذنها وقالت؛مخلوق غريب!..لكن منين جاب رقمي!؟...شن السؤال الغبي هدى ماعنده من وين يجيب يعني..هي بسرعه عدي سقدي روحك قبل يغير رايه..
.........
في الطريق..
وهي تتكلم بالتليفون:ايوه خش ع يمين..
مشي وخش ع اليمين..
لينا:كمل طول...
سفيان كمل طول..
لينا؛وبعدين دكتورة.........اها تمام......مزين ...شني.!!.....شبحت لسفيان وقالت...حدا مزين اسمه الطلقة الروسيه..
سفيان قعد يشبح للافتات بعدين قال؛اهوا بعده هي..
لينا:لا في الشارع اللي وراه..
شبح للينا بطرف عينه..وهي قعدت تشبح القدام عادي..
غير عيونه عنه وكمل الطريق..
لين وصلوا في الشارع..
لينا:اهو وصلنا دكتورة وين الحوش...الموف..تمام..
سفيان؛اووخ..واخيرا...
درسوا قدام الحوش..
لينا؛وصلنا...
شويه وانفتح الباب وطلع واحد طويل وعريض ووسيم..
وين طلع شاف لينا ابتسم..
سفيان:هدا خيره ؟.فتح الباب ونزل وقال...السلام عليكم..
الراجل شبحله وقال ؛وعليكم السلام...
سكر الباب بقوة...ومشي للكوفني وهو يقول؛تعالى ترا..
مشاله الراجل..
وسفيان فتح الكوفني وطلع اكياس الطلبيه وعطاهم للراجل..
الراجل:بارك الله فيكم..
سفيان:فيك بارك الله...سكر الكوفني ومشي طول ركب..
وشغل السيارة وتحرك بسرعه..
سفيان بحده:هادي اول واخر مرة..
هي قعدت ساكته مابتش ترد..
فعلا هادي اخر مرة..ومعاش بتخدم ع الشكولاته تاني...
الخدمه اللي كانت تجري في دم لينا وتعشقها عشق...
من اجمل النعم اللي انعم بيها ربي عليها..وتوا خداها منها..
ولانقول الا مايرضي ربنا...الحمد لله ع كل حال..
ومع هذا الدمعه انوجدت بش تخفف شي من الحزن اللي مالي الروح والقلب..
دموعها نزلوا ورا تانيه..
وهي غيرت وجهها عنه وقعدت تمسح فيهم بش مايحسش بيها...ويعصب منها وتسمع كلام جارح هي ماعندهاش طاقه ترد عليه..
هو حس بيها وشافها بس التزم الصمت التام..
وقعدوا هكي لين وصلوا للحوش ع آذان المغرب..
حطها...
ومشي للجامع...
🌺🌺🌺🌺🌺
"وشن فيها كان طلبت منهم مش نسيبهم راجل بنتهم بيستخسروا فيك شقفة سيارة!؟"
عبد الصمد "راجل عفاف":بوها عادي يعطي مايقولش لا لكن خوها التافه..
امه:وانت شن عليك فيه خوها خله يفتفت لين يشبع ماتعدلش عليه..انت غدوة خليها تمشي لحوش ماليها غدوة بالصغار وبعدين يصير خير..
هز راسه بالموافقه وهو يفكر...
🌺🌺🌺🌺
الساعه 10:00ليلا..
طلعت بالطنجره من الكوجينه بتحطها في الكوجينه الخارجيه...
خشت للكوجينه وحطتها بعدين وهي موليه للكوجينه الدخلانيه...
رن تليفونها..
طلعاته من جيب القونه وشافت المتصل فتحت الخط وردت..
لينا؛السلا عليكم عفاف...
هو كان في الجهة التانيه من الجنان يصور في اول فيديو للإنستقرام بعد 4شهور من الأنقطاع..بعد وفاة خوه..
وهو ينزل فالفيديو...
شافها من بعيد تتكلم في التليفون..
ضيق عيونه وقدم كم خطوه لين جي حدي الشجره وقف وراها وقعد يشبحلها ويسمع...
لينا:اها غدوة معناها..
"ايه غدوة الصبح مسافرة بتحط صغارها في حوش بوي وتمشي للمطار...وحتى اني جايه بصغاري لكن رنده في الشك"
لينا:اها..
"المهم لينا غدوة 14\2 عيد ميلاد نور بنتها وهي تعودت اديره كل عام لكن هالعام ماتقدرش ع خاطر ظرف عزوزتها...فكرت نديروه حني.."
لينا ابتسمت وقالت:حلو..
"كويس...فبنقسموا بيناتنا اني بندير الحار كله...والحلو عليك انتي ومنى باهي"
لينا بإبتسامه:ان شاء الله..
"الطورطه لينا قولي لسفيان يجيبها"..
لينا قلبت عيونها وهي تفكر وقالت:باهي..
"خلاص معناها اتفقنا"
لينا؛اتفقنا خلاص..ابتسمت وقالت...يعني نور مواليد 14\2.
"ايه ياحنه تاريخ مميز"
ضحكت لينا وقالت:بطول عمرها يارب..
"آمين...هي مانعطلش عليك..تصبحي ع خير"..
لينا :قدامك كل خير...بالسلامه...
سكرت لينا وهي مبتسمه بعدين مشت خشت داخل...
🏵🏵🏵🏵
الساعه 12:00ليلا..
بعد رقدت بنتها طلعت من دارها للصاله لقاته قاعد مقعمز يتفرج ع التلفزيون..
وقفت وقالت؛غدوة نبي نمشي لحوش ماليا..
هو بدون مايشبحلها قال:لا..
رنده:علاش..
محمد:هكي..وبري خشي ارقدي..
رنده بإنفعال؛مايجيش هكي راهو مايجيش..
تلفت شبحلها وفنص فيها وهو يقول:نقصي صوتك وخشي ارقدي..ماتخلنيش نرقدك بطريحه..
هزت راسها وقالت:الحق مش فيك الحق فيا اني اللي سكتت ع اللي ديريلي فيه وماقلتش لخوي..
ابتسم بتهكم ورجع شاف للتلفزيون...
شبحت بحده ودموعها ينزلوا..بعدين ولت لدارها...
🌺🌺🌺🌺🌺
مقعمز ورا اللاب توب يشوف في تعليقات المتابعين ع اخر فيديو نزله..
كانت تعليقات حلوة كالعاده كلها تشكر فيه ع المحتوى والأسلوب الحلو في الطرح وهلبه يبعتوله رغبتهم انهم يشوفوا شكل "نيوتن الليبي"..
بس طبعا شي زي هدا مستحيل يصير...مش بش كرها في الشهرة..
حتى خوف داخلي مدفون من معرفه الناس للوجه التاني لسفيان..
اللي مايعرفاش اخطا اقرب اصدقائه ابوبكر وفوزي..
وخوته...مروان والمرحوم عدنان...
في هلبه ناس هكي تحب تبعد جزء منها ع الأضواء بش تقعد محافظه ع صورة معينه يبوها تقعد موجوده ديما في عيون الآخرين..
شويه جاته رساله ع الخاص..
فتحها وشافها...كانت جايه من متابعه..
مصورة علبه #شكولينا  وكاتبه تحتها هدا وين طقينا فيها حاجه خيال مش عاديه...
هو غير عيونه عن اللاب توب وسرح بتفكيره لاإراديا..
جت بين عيونه كل المواقف اللي عاشهم معاها..
ومن كل موقف قاعد يطلع في صفه حلوة فيها تميزها..
قوة شخصيتها...جرأتها...كيف واثقه من روحها..
برغم انها  تعرف نظرته ليها وللي زيها..لكن ولا مرة بان عليها انها مهتمه لهالنظره ولاخلاته يشوف انها حاسه بالنقص قدامه..
غير عن المواقف اللي جمعتهم مع بعض..
لحظات تانيه شافهم فيها..وشاف فيها وجه تاني ليها اللي مستحيل تتعامل بيه معاه...
حنونه...لطيفه...صبورة...طموحه...محبوبه...
ووجودها يعطي طاقة ايجابيه للمكان اللي هي فيه...
ناهيك عن جمالها..
الجمال اللي كان مفكر سفيان انه محصور بلون معين...
اكتشف معاها ان الجمال لو امتلكوه اصحاب بشرة الشوكولا
حيكونوا عبارة عن آية من آيات ابداع الله في خلقه...
وهو يفكر في هدا كله...ماحسش الا وتنهيده طالعه من قلبه..
وقضاته للي هو فيه...
توتر...ارتبك...اضايق....عقد حواجبه...وحط يده ع صدره وقعد يمسح عليه...
بعدين رجع شاف للاب توب..ساوا نظاراته وكمل متابعه للتعليقات...
••بعد عشرة دقايق بالزبط
سكر اللاب توب...وناض..مشي للدولاب طلع حوايجه وبعدين توجه للحمام...
بعد عشرة دقايق تانيه طلع من الحمام وهو حاط الفوطه ع راسه وينشف في شعره ويسمع في صوت الصغار يعيطوا..
تنهد وخش للدار..
مشي وقف ع المرايه وهو مازال ينشف..
وصوت عياط الصغار يخش في قلبه مش فوذانه مش قادر يتحمله..
قعد مغطي بالفوطه راسه وكانت نازله ع شويه من عيونه لما طلع ومشي بإتجاه دارهم..
وصل فيها..وطق الباب..
داخل...
لينا بهمس قالت:ليش هكي ديروا فيا حرام عليكم..
طق تاني..
تأففت بضيق..
وخدت مرضعة بحر..وشبحت للمرايه لفت الوشاح عليها كويس ودرقت شعرها كله..
بعدين مشت للباب...لفت المفتاح وفتحاته..
شهقت بخلعه..
هو بملل:جيبيه جيبي..
هي مدتهوله وعيونها مفنصات وقلبها يدق بقوة من الخوف..
خدي بحر والمرضعه ومشي...
وهي قعدت واقفه في مكانها ومازال مخلوعه تقول:هدى مش طبيعي مستحيل يكون طبيعي..
••في الدار..
يدور بالولد ويقول:اشبح شن تبرطم توا... والولد في يده يعيط..شبحله وقال..خيرك قبل ديما وين نشدك تسكت..!..
وهو يمشي بيه ويجي شبح للمرايه شاف شكله بالفوطه جبدها ولوحها طول..وحط يده ع ظهر بحر وهو يقول...عنده الحق مايسكتش...
وبدي يغنيله في تهويده النوم...ويمشي بيه ويجي لين رقد..
بعد رقد...مشي حطه ع السرير وتمدد جنبه وتغطوا الزوز..
هو قعد يتأمل فيه..
جي بين عيونه طيف عدنان...
الدموع غرقوهم وطاحوا....وقعدوا ينزلوا لين خداه النوم ورقد..
اما هي بعد رقدت بنتها..
لبست اسدال الصلاه ومشت طلعت قعمزت في وسط الحوش وقعدت تقرا في القرآن...ولما جاها النوم..
غفت شويه ع كنبه...
غفوة ماطولتش هلبه لين سمعت اذان الفجر الكاذب...
ناضت ومشت بهدوء للحمام وخشتله..
بعد توضت طلعت وسكرت الباب بصوت...قصدا..
بش تنوضه..
وبسرعه خشت للدار وسكرت عليها..
وهو فعلا ناض من صوت الباب..
قعد في فراشه لحظات لين استاقض بعدين ناض وخش الحمام...
🌺🌺🌺🌺🌺
الساعه 8:00صباحا..
في الصاله..
وجيهه:عزوزتها ماتتحركش لمكان من غيرها ياراجل ونوريه هكي معودتها كان مش عيب راهي في كل جية لينا تجي معاها..
الشريف:لكن بنتك صاحبة صغار وفي المدرسه يبوا من يرد باله منهم ومن قرايتهم..
وجيهه:وشن نديروا حني..
الشريف:منو حني!؟انتي بتردي بالك من الصغار ولاامي..!؟مش المسكينات اللي ماسد شادين الحوش كله بحياشهم وبصغارهم تبيهم يرعوا صغار غيرهم؟!
وجيهه:والله! وعلاش درنا كناين كان مالقيناهمش فهالوقت..
الشريف:لاحول ولاقوة الا بالله..النقاش معاك في الموضوع هدا يرقي الضغط.
وجيهه:ايوه...خاف على صحتك ومعاش تخش في الامور هادي خليها للنساوين وخليك انت في خدمتك..
قعد يشبحلها بإمتعاض..
وهي تشرب في قهوتها...
شويه خشت عليهم لينا بالصغار وقالت:صباح الخير عمي صباح الخير اللاي..
الشريف بإبتسامه عريضه:صباح الخيرات..جيبهم جيبي..
خشتله وهي مبتسمه وعطاته الصغار وهي تقول بصوت طفولي:باخ الخيل شدو..
ضحك الشريف وقال؛ياصباح الفل ..
وجيهه:نوريه بتجي اليوم تحط صغارها وتسافر لتونس..
لينا:ايه قالتلي عفاف..
وجيهه:امتى؟
لينا:امس في الليل كلمتني..
وجيهه:امم..المهم راهو انتي بالذات مأمناتك عليهم..
لينا:في عيوني..
سمعوا صوت كلاكس.
الشريف:اطلعي بنتي اطلعي..
لينا :بالسلامه توا...
ومشت طلعت...
وجيهه:ان شاء الله تصير حاجه تقعمزها في الحوش..
الشريف شبحلها بحده...
وهي خدت سفرة القهوة وناضت بيها..
هو حرك راسه يمين ويسار وقال:ربي يهدي من خلق...
🌺🌺🌺🌺
وكالعاده...
الطريق كلها في حالة من الصمت المطبق...
لعند ماوصلها للمستشفى..
هي نزلت وهو مشي بعد ماخشت..
خشت داخل وهي اللي تقابله من اللي يعرفوها يصبح عليها وهي ترد...
وهي ماشيه...
فاتت من قدام دكتور وين شافها قعد واقف في مكانه وهو مصدوم..
سأله زميله:خيرك..تعرفها!؟
هو قال:تخدم هنى من زمان؟!
زميله:لا ليها اربعه ايام لتوا...ع حسب مانعرف انها جاية من طرف دكتور مروان شفته امس انت..
:ايه عرفته..
:ماقتليش من وين تعرفها؟
ابتسم وقال:بنت بلادي هدي خدمنا نا وياها في المركز الطبي في سبها..
:اها..
بإبتسامه قال:هي كمل بيا جوله في المستشفى..
:تفضل...
🏵🏵🏵🏵
الساعه 11:00صباحا...
شاده سفرة فيها صونية زميته وطاسة شاهي اخضر..
وخشت بيها للمربوعه ع شيبانيها اللي كان يسمع في الراديو..
رنده:السلام عليكم سيدي..
شافها بعدين ابتسم وقال:وعليكم السلام ياطرابلسيه..شنوحالك..
ابتسمت وقدمت حطت قدامه السفرة وهي تقول:الحمد لله سيدي..شن حالك انت..
هوشبح للسفرة وقال:صحيتي صحيتي...
رنده:عمي نكلمك في موضوع..
شبحلها وقال:ان شاء الله خير...قعمزي بنتي..
رنده تنهدت وقعمزت ع ركابها مقابلاته وبدت تحكي...
🌺🌺🌺🌺
خشت لحجرة فيها زوز طبيبات يهدرزوا وهي مشت لشنطتها بتاخد منها حاجه..
بس غصب عنها قعدت تسمع في حديث الطبيبات..
:طلعت في الاخير مسكينه تعبانه نفسيا مش جسديا بس تعبها النفسي ولى ع صحتها..
:علاش خيرها..
:اسكتي بالله طلعت قصتها قصه حكتهالي وهي منهاره...ياحنه كانت متزوجه وعايشة حياة حلوة مع راجلها وعنده منه 3صغار..في يوم الراجل دار حادث توفى ..وبعد توفى طبعا ولت لحوش اهلها بصغارها...بعد تمت عدتها جوها اهل راجلها وطلبوا يردوها لولدهم الصغير..
:وووك...مشناها اللقطه هادي..
:ايه...المهم وهي لان ظروف اهلها صعبه وهي منطقه متزمتين ناسها وبما فيهم ماليها فرضوا عليها توافق..وواقفت برغم ان سلفها اصغر منها بعشرة سنين..
:وووه عليها ووه..
:ايه...وتزوجها وقتلك من اول يوم جيت فيه وهو يقولي رديتك ع خاطر صغار خوي وراني بنتزوج..
:وبعدين.
؛اهو نكملك..طبعا زواجهم كان رسمي...وحملت منه وجابت زوز صغار..
:يععع يععع يععع..كيف يديروا مش عارفه كيف تقبل ع روحها تتزوج خو راجلها ولاهو ياخد مرت خوه..قمة في القرف..
لينا حست وكأنها ضلوعها مطبقات ع قلبها....ودموعها ينزلوا سيل..
:ايه والله حتى اني مش عارفه كيف..شن مقزز...المهم.....توا قتلك يدور يبي يتزوج ويعامل فيها معامله زي الزفت وديما يهين فيها ويتجمل عليها انه واخدها..ديما يحسس فيها انها عزوز وهو صغير وضحى باحلى سنين عمره معاها..
:قصدك حباته هي.
:قالت لا...ماقدرتش من اللي دايره فيا شن بنحب فيه...خوفها كله بعد ياخد يلوحها هي وصغارها الخمسه ويهرب قالت اكثر من مرة يقول فيها..
:تستاهل...كان اني نموت ولانولي لسلفي..ووك..مشناها مشناها اللقطه..
لينا خدت شنطتها ومشت طلعت من حداهم وهي شاده عبراتها بالسيف..
وكارهه نفسها  من الكلام اللي سمعاته..
من كلامهم حست روحها وكأنها تجاوزت حد من حدود الله..
وكأنها وحده فاجرة...او ارتبكت وحده من الكبائر...
حست وكأنها دارت عار....
ماصدقت لقت تركينه فاضيه من البشر..
قعمزت فيها وحطت ايديها ع وجهها وقعدت تبكي بالعبرة..
وقلبها من داخل ينزف في دموعه دم...
شن هالمجتمع اللي عايشه فيه!! لهالدرجه التخلف مستشري فيه...ومتعمق بجذروه حتى اصحاب الدرجات العلميه العاليه بعقلياتهم تعدوا حدود الجهل والتخلف غادي...
الفكرة صعبه....لكن كونها غير مقبوله..هدا فيه اعتراض ع تشريع الله سبحانه وتعالى بحد ذاته..
وين حني من الصحابيه اسماء بنت عميس ..
اللي كانت زوجه لجعفر بن ابي طالب...بعد زواجهم كانت بينهم قصة حب حلوة هلبه...انتهت بإستشهاد جعفر....
وبعد موته كان يبي يردها علي بن ابي طالب "سلفها"..
بس وقتها الرسول رفض لانه مايبيشي ياخد ع فاطمه بنته...
تزوجت اسماء ابوبكر وسيدنا ابوبكر حبها هلبه لدرجة انه وصى قبل ليموت اسماء هي لتغسله...وبعد موته..
سيدنا علي وقتها ماتت عنه السيده فاطمه فهو طول طلب اسماء وتزوجها وربا صغار خوه وصغار بوبكر وصغاره اللي جابتهم منه بعدين...ومدح فيها وفي اخلاقها ودينها وادبها...
الغريب في القصه اني ماسمعتش حد انكر هالفعل ابدا ولاقال انه كان غير مقبول حتى ايام الجاهليه...!
طيب هل تعلمواعلاش عثمان بن عفان لقبوه بذي النورين؟
لانه تزوج زوز من بنات الرسول..
اقرب زوز لبعض...رقية وام كلثوم...بعد ماتت رقية تزوج ام كلثوم...
هل في اشرف...واعف واطهر واحسن...من الرسول وبنات الرسول...!!؟
نعم...الموضوع صعب وثقيل....لكنه مقبول.....
ماتحرموش مااحل الله....
ماتزدروش شرع الله..
ازدروا الحرام...مش حلال...
ازدروا علاقات الحب الغير مشروعه...ومكالمات اخر الليل صوت وصوت الصورة اللي يصير فيهم العار ع اصوله...
والحرام بكل انواعه...
ماهو هدا الغريب..شي زي هدا عادي...بل البعض يشوف حاجه طبيعيه وحلوة.....
لكن مااحله الله نزدروه نتعاملوا معاه وكأنه فاحشة ومقتا وساء سبيلا...
وطبعا...هالحلال ليه شروط...
يعني للوحده لو كانت الظروف تجبرها ع هالشي وماعندها غير الحل...
مش وحده عندها حلول اخرى وتقدر تعيش مستقله بنفسها وتقدر ترعى صغارها بروحها ومافي شي يمنعها...
ماهو اكيد الحق لايراد به باطل.....لأن في منهم عندها عادي تهدم تبني حوشها ع انقاض حوش تاني...وين يجي حد يناقشها تقول...مادرتش حرام!....
في النهايه...
اللي جبرتها الظروف تعيش هالشي فهي لاارتكتب حرام ولادارت عيب....مادام رب الناس راضي...طز في الناس..!!
🏵🏵🏵🏵🏵
"تمشي بإذن الله تمشي يابنتي كيف يمنعك عن حوش هلك"
رنده ببكي:سامحني ياسيدي  كدرتك لكن والله هو اللي وصلني عليه..
اب محمد:خلاص بنتي..نوضي اغسلي وجهك واذكري ربك وبعون الله مايصير الا اللي تبيه..
رنده؛تسلم سيدي ربي يطول في عمرك ويحفظك..
وناضت ومشت طلعت من حداه..
مسحت دموعها وابتسمت بنصر..ومشت للدروج وركبت لشقتها..
وعزوزتها اللي كان مقعمزه في الصاله وشافتها وين خطمت قالت؛هاللفعه هادي..عوذو بالله منها..
🌺🌺🌺🌺🌺
الساعه 2:00بعد الظهر..
مقعمز في سيارته يستنى..
شويه فتحت باب السيارة وركبت..
هو شغل السيارة..
بعدين تحركوا...
سرقلها النظر...لاحظ ملامح الحزن ع وجهها وع عيونها اثر دموع...شبح القدام وعقله قاله انها اكيد تبكي ع خاطر خدمة الشكولاته اللي بطلها منها..
اما هي عيونها وين جو ع محل حلويات بالصدفه اذكرت نور..
قالت:ايه حقه..
هو عقد حواجبه وقال:خيرك..
هي انتبهت لنفسها...وقالت بشي من الضيق:نبيك توقفني ع محل حلويات حدا الحوش امس حجزت عندهم حاجه نبي ناخدها..
سفيان:تمام..
لينا:احمم..ونبي توقفني ع محل مواد زينه..هويناه اسمه ريد فلاور...
هو شبحله شويه بعدين درس قدامه..
لينا:مش معطله..
فتحت الباب ونزلت وسكرت الباب...
سمعت تسكيرة باب تاني..
التفتت وشبحتله لقاته نازل..
غيرت عيونها وقالت في نفسها"تو هدى شن بيدخله معاي داخل.!ربي يعدي هالنهار ع خير" .
وصلوا في الباب..
فتحت الباب وخشت وهو خش معاها..
كان المحل معبي بنات...وكله يبرق بالأحمر..
واللي تبيع فيه بنت وهدا اللي نزل ع خاطر سفيان يحساب اللي يبيع عنصر رجالي..جي بيولي يطلع..
بس تراجع لما شاف واحد طلع من وحده من تراكين كلم اللي تبيع بعدين ولى خش..
لينا قدمت للبنت وقالت بإبتسامه؛السلام عليكم...
اللي تبيع شبحتلها وقالت:حي لينا ياهلا ليك وحشة..
لينا بضحكه:حتى انتي...
البنت وهي تدوي بحماس:شن جوك..شن اخبارك..خف اسلوبها الحماسي لما شافت سفيان واقف وحاط ايديه ورا ظهره ونظاراته الشمسيه قاعدات ع عيونه..
لينا:تمام ماشي الحال والحمدلله..بالله حبيبتي نلقى عندك تشكيلة خواتهم لبنوتات همي من عمر 4سنوات واركب فوق..
:في من عمر 4شهور لو تبي..
طلعت التشكيله اللي طلبتها لينا..
لينا:يهبلوا..
سفيان رفع حاجبه وهو يتفرج عليهم..
وبدت لينا اطلع بالخاتم وتشوف...
سفيان غير عيون عنها ومرر نظره ع المحل يشوف شن فيه..
تفاجىء وين شاف اغلب الموجودات يشبحوله..
غير عيونه عنهم ورجع شاف للينا والخواتم..
لينا:خلاص نبي هادو التلاته..
سفيان حول نظاراته وقال:لوسمحتي..
البنت بآهتمام:تفضل..
سفيان:اللي قلتي منهم من 4شهور وينهم..
البنت بإبتسامه عريضه:هي لحظه بس..
ولينا تشبحله بطرف عينها..
البنت :تفضل..
هو عقد حواجبه بإبتسامه وخدي واحد صغير هلبه لما شافه وتخيله ع يد ياسمين ضحك..
والبنت اللي تبيع عيونها لمعوا لمع..
لينا لما شافت الخاتم ابتسمت.
سفيان:صحي مايضرهمش ولا؟.
البنت؛ايه بضاعتي اصليه ومافيها شي يضر..
سفيان؛تمام...نبي هدا..وهدا..
هي خدتهم وقالت:حاضر..
بعدين مشت...
هو مرر نظره ع المكان لقي البنات مازال يشبحوله..رجع ليش نظاراته وغير عيونه عنهم..
شويه جت البنت ومدتلهم الكياس وقالت:70...35..
لينا فتحت شنطتها وطلعت الفلوس..
لقاته هو حاط الفلوس قبلها وقال:عني وعنها..
هي انحرجت وردت الفلوس للشنطه..
خدت اللي تبيع الفلوس وهي مستغربه..
وهو خدي الكياس وقال:هيا..
ومشي طلع..
البنت شدت لينا وقالت:شن يقربلك؟
لينا قعدت تشبحلها ومش عارفه شن بترد مش قادره اطلع الكلمه من فمها..
النبت بدهشه قالت؛راجلك؟!
لينا بارتباك:اممم..سلام..
ومشت طلعت من المحل بسرعه..
🌺وصلت السيارة وركبت..
سفيان؛خيرك عطلتي..
لينا؛سألتها ع حاجه..
هو تنهد بعدين شغل السيارة وتحرك..
هي تنحنحت وقالت:في محل تاني القدام متاع العاب..
سفيان:ماشاء الله الله يبارك عارفه المنطقه بمحلاتها!
لينا تنهدت وقالت:ايام كانت ترفع فيا السواقه تعرفت عليها وخشيت بعض المحلات مش كلهم..وطبعا كله بإذن...وسكتت.
هو حس بشي وجعه في قلبه...ماباش يزيد كلمه قعد ساكت..
وهي كذلك سكتت وشدت دموعها بقوة..
درس قدام المحل وقال:ننزل بروحي..
فتح الباب ونزل وسكر السيارة..
وهي تنهدت من قلبها...وشبحت ليدها اليمين وبدت تسبح بش ينشرح صدرها اللي ضاق لما اذكرت الكلام اللي سمعاته في المستشفى..
حوالي 7دقايق..
وطلع سفيان معاه حاجات..حطهم في السيارة من الخلف..
بعدين ركب وتحرك..
وكملوا الطريق في صمت مستمر..
لين وصلوا لشارعهم...خدي التورته اللي حجزت فيها لينا..
وبعدين وصلها للحوش...
لينا:نبي ندس الحاجات في الشقه مانبيش حد يشوفهن..
سفيان:تمام انتي بري خشي واني نو نركبهم فوق.
لينا:باهي..
🌺🌺🌺
بعد ما دار اللي قالتله عليه ولى للكليه...
وين وصل في مكتبه وخش..
تفاجى باللي شافه ع الطاوله..
سفيان:هدا شنو؟
ابوبكر بضحكه:هابي فلانتاين دي ..
سفيان قعد يشبه لكيس الهديه والورد وقال:شن الوقت اللي وصلناله هدا!! لاحشم لاجعرة...لادين...لاشي..شن هدا!
ابوبكر:والله ماتعرف تلوم ماليهم ولانلومك انت..
سفيان شبحله ع جنب بعدين قال:ماشي بنعطي المحاضرة ونولي مانلقى شي ع الطاوله..
خدي شيت من ع الطاوله ومشي طلغ..
ابوبكر:يعني شن ديرلهم نلوحهم...والله حرام..خلاص نروح بيهم..فنص وقال..ايه بش ينهد الحوش ع راسي!...باهي شن ندير فيهم..ضحك وقال...نبيعهم ايوه..نطلعوا منهم بفايده..
💎فهالوقت..
وصل سفيان للقاعه...
خش وهو يقول :السلام عليكم..
وين وصل في الطاوله لقي وردة محطوطه عليها..
مرر نظره ع البنات بعدين رجع شافلها..خداها وقال..واجعني والله واجعني بوها وخوتها اللي حطتها هني....ومشي طلع بيها. بيلوحها..
الولاد شبحوا للبنات بنظرات ازدراء كرهتهم في ارواحهم مذنبه وبريئة..
وهو خش ومشي وقف ورا الطاوله وقال؛هي خليكم معاي..
محاضرة اليوم مهمه هلبه...
🌺🌺🌺🌺
ركبت السيارة ببنتها...
هو قال بغضب:تلويلي في ذراعي يارنده! هز راسه وقال...استمري استمري وتو تشوفي وين توصلي.. وشغل السيارة وتحرك...
وهي متجاهلاته تماما...عارفاته يهوش تهويش مايقدر يدير لانه يحبها  ومايقدرش يعيش من غيرها...او هي هكي تحساب...

#وحدوا_الله

يتبع …
الفصول الاربعة