#شكولينا
#الجزء_الأخير"القسم الأول"
#الجمان_الفريد
كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫
المطر خفت وقعدت تبشبش زي مانقولوا..
وهي تحتها لابسه كبوط مطر وحاطه البرنوس ع راسها وهي تحط في ماكله للقطاطيس اللي كانت متقيتهم تحت المظله ودايرتلهم صندوق قعدوا في وسطه..
وكانت تردد في الصلاة الإبراهيميه...
بعد وقفت ع حيلها وهي تتفرج عليهم كيف ياكلوا..
رسمت ع وجهها ابتسامه لطيفه..
بعدين لفت ومشت وخشت للكوجينه وسكرت الباب..
وين طلعت من الكوجينه من الجهة التانيه فاتت من قدامها رنده ماشيه بسرعه..لمحت في عيونها الدموع قعدت تشبحلها لين خشت للدار وسكرت عليها..
تنهدت بحزن ومشت لدار التقعميز وين مافي ولدها بسريره...
••في دار رتيل ورنده..
رنده اول ماخشت حولت شنطتها وقعمزت ع السرير وقعدت تبكي..
ورتيل تشوفلها بحزن..
رتيل:سيبتوا بعض؟
رنده هزت راسها وهي تبكي بحرقه..
رتيل بحقد:الله لايربحه هداكا الحقير الله لايسامحه..
••برا الدار...
في الصاله تحديدا..
كانت وجيهه متكيه وحداها عزوزتها حتى هي متكيه..
وعفاف خشت للكوجينه بش طيب الغدي..
وبناتها يحوسوا ويلموا في حاجاتهم خلاص بيروحوا اليوم...
وعيون وجيهه معاهم ..
زاد صدرها ضاق مع مرواحة عفاف..وقلبها المحروق بدي ياكل فيها عليها..هي مريضه وخافت تصيرلها حاجه..
في حاجه اسمها فوبيا الفقد..
الانسان اللي جرب يفقد حد من عيلته بالذات اللي يريح فجأة..
يبدا خايف ع الباقي خوف غير طبيعي خايف يرجع يفقد حد تاني...
ووجيهه جربت الفقد مرتين في صغارها..وفي واحد منهم قاعد امره معلق بين السماء والأرض...
طبيعي تجيها حالة نفسيه...
كان تلقى تقول لعفاف ماتروحيش لكن ماتقدرش....
وفي عز غرقها في دوامة هالأفكار السوداء...
يخش عليهم الشريف بوجه مستبشر والفرحه باديه في عيونها بدموعها..
الشريف:سفيان فاق ياوجيهه..
ناضت قعمزت من صدمتها بالخبر..
وزبيده ناضت وهي تقول:بالحق..
الشريف بإبتسامه؛حق يام حق..يالينا لينا...
لينا غفت شويه حدا ولده لما سمعت شيبانيها ينادي فيها فاقت مخلوعه وفزت طول ومشت طلعت من الدار
وصلت في الصاله وقالت؛نعم عمي!؟
الشريف:سفيان فاق يابنتي فاق..
حطت يدها ع فمها ودموعها ينزلوا..
ريتوا لما تقعدوا فترة تستنوا في خبر يفرحكم بعد فترة طويله عشتوها مليانه هم وغم وحزن..
اول مايجيكم تنصدموا بيه صدمة فرح تقعدوا مش مستوعبينه...
طلعت عفاف من الكوجينه وهي تقول:سفيان فاق توا كلمني عبدالصمد اتصل يسأل في ابوبكر عليه قال فاق وحتى تكلم..
وجيهه غمضت عيونه رفعت ايديها وهي تقول:الحمد والشكر ليك ياربي الحمد والشكر ليك رحمتنا لطفت بحالنا الحمد والشكر ليك..
وزبيده حتى هي تردد في...الحمد لله رب العالمين..
البنات الصغيرات سمعوا الخبر ومشوا يجروا لدار حالاتهم فتحاته غيداء والثلاته قالوا..
خالو فاق خالو فاق...
رتيل نزلت من السرير وهي تقول:شنو!!؟..
وناضت طلعت من الدار..ورنده طلعت وراها..
رتيل؛حقه سفيان فاق!!؟
عفاف وهي تبكي من الفرحه:ايه فاق وحاله باهي..
رتيل ضمت عفاف بقوة من الفرحه..
ورنده قعدت تقول:يما يام..وخشتلها الصاله وهي تقول..فاق سفيان فاق..وجت حداها وضمتها والزوز يقولوا...الحمد لله ياربي...
لينا وهي تمرر في نظرها عليهم وهي تشوف في فرحتهم صدقت ان اللي هي فيه علم مش حلم..
حقيقه....مافيهاش ذرة شك..
قعمزت ع الدرجه متاع الصاله وانهارت بالبكي..
والكل قعدوا يشبحولها..
الشريف:خيرك يابنتي!؟
لينا بكلام متقطع من البكي:فرحانه...
هما ابتسموا وهي ناضتلها عزوزتها قعمزت حداها وضمتها ..
ولينا شدت فيها وخدت راحتها في البكي..
وهما في وسط هالفرحه اصوات البكي ذكرتهم بجرحهم الجديد..من المكان اللي خلاته اكثر وحده كانت حتفرح لنوضته من بعد امه ومرته... اخته..نوريه..
🍁🍁🍁🍁
وفي العاصمة الألمانيه برلين..
كان مروان واقف يتكلم مع الدكتور..
الحوار باللغة الإنجليزيه..
الدكتور:الاجهزة الحيويه في حالة جيده....ولامشكله لديه عند الراس ولا في المخ او الدماغ...فقط يحتاج لوقت كي يجير كسر عظم الفخد..ايضا كسر عظم الانف يحتاج لإجراء جراحة تجميليه ان اراد هو ذلك..
مروان؛حسنا...سنتحدث معه في هذا الأمر..شكرا جزيلا لك دكتور..
الدكتور هز راسه وهو مبتسم بعدين مشي..
ومروان مشي خش للغرفه اللي طلعوا سفيان ليها بعد مافاق من الغيبوبه..
في الغرفه..
كان سفيان يسمع لأبوبكر وع وجهه ابتسامه متعبه..
ابوبكر؛تقيس في غلاك بالغيبوبه عارفك مغلى عليك لفت النظر..
غمض سفيان عيونه بعدين فتحهم وقال بصوت متعب:اني..ياتافه!؟
ع خشة مروان وهو مبتسم قال:ها نيوتن شن جو؟
شبحلها سفيان وغمض عيونه بعدين فتحهم وقال:كويس..نبي نكلم العيله..
مروان:بعدين شويه صحصح انت قبل وتو نكلموهم..
هز راسه وقعد ساكت شويه بعدين قال
