شكولينا

الجزء الرابع عشر "" تابع""

#شكولينا 🍫
#الجزء_الرابع_عشر"القسم الثاني"
#الجمان_الفريد

اول شي الصلاة اللي فايته فرض او خش عليه وقت فرض يصلي بعدين يقرا...لابارك الله في عمل أخر عن الصلاة...💕
تاني شي...ركزوا معاي كويس في الكلام اللي حتقروه توا..
ليكم الحق انكم تتوقعوا القادم من الاحداث كيف ماكانت توقعاتكم صح ولاغلط اني مش حندخل فيها..
لكن الجدل اللي صاير توا ع توقع ما...حسيته بياخد منحى تاني..
وممكن تمسك الطرفين من المؤيد لهالتوقع والمعارض ليه بآرائهم حيضيع عليكم متعة القراءة ومعايشة الاحداث وفهم الرساله الموجوده بين السطور...
لهذا اني نتمنى انكم تقروا وتعيشوا القصه بدون احكام مسبقه بش تفهموها كويس...
ولازم تعرفوا ان كل كاتب وليه طريقته في طرح مشكله او ظاهرة معينه...وليه طريقته في ايصال الرساله...وهدا المهم عندي ايصال الرساله...
واي روايه اني نكتبها ديما نقول للقراء البدايه متاعها اهم شي فيها لأن البدايه هي الاساس اللي تنبنى عليه احداث الروايه..يعني اللي مش مركز في البدايه مش حيفهم كويس اللي يصير بعدين من تغيرات تطرأ ع الشخصيات....
وفي النهايه لازم نرجع انبه..ان 90% من احداث الروايه حقيقي يعني في 10% منها من وحي الخيال لازم يدخل الكاتب خياله شويه في القصه لأضافة جماليه عليها او للتمويه...وبس....
قراءة ممتعه...
《في بعض من الحوارات حقيقيه وهي تعبر عن وجهة نظر اصحابها》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
في صالة حوش الشريف..
كانوا موجودين الأقارب بالدرجه الاولى للعيله..واهل منى واقاربها..
وكذلك في من حضر من اهل زهور اختها الكبيره والصغيره..الصغيره بالذات اللي كان عندها فضول تشوف مرت عدنان اللي كانت تتمنى تكون زوجته...
ومش هي بس اللي كان عندها فضول اغلب الحضور اللي يبوا يشوفوا كنة عيت الشريف السمراء..
ومن بينهم وحده من اقارب منى..عمتها الكبيره..مراه كبيره في العمر ومن الناس المتمسكه بالأعراف والعادات والتقاليد الباهي منها والمش باهي.
عمة منى:مش باهي يابنيتي راك نافس..
منى:وشن هو اللي دايراته ياعمتي اني مادايرة شي..
عمتها:هدا كله ومادايره شي..مالاكان درتي كيف!!
منى تأففت وامها فنصت فيها..
فهالوقت..
جت لينا...حولت عبايتها وساوت روحها ع مراية المدخل بعدين مشت خشت...
وين وصلت في الصاله وبانت ع الناس الانظار كلها توجهت عليها..
هي من غير شي لون بشرتها بيميزها بالذات لو انحطت في مقارنه مع زوجها واهل زوجها..واغلب الموجودين من اصحاب البشرة البيضا والعرق الأخضر البارز...
نظراتهم بالنسبه للينا كانت جدا محرجه وحسستها بالضيق بس كعادتها تحاول تقوى وتتماسك وتبين عكس اللي هي تحس بيه...
خشت وبدت تسلم ع الموجودين..
هند اول ماشافتها قربت من اختها منى وقعدت تقوللها..
هند:تهبل عطيها دعوه جسمها قفطانها مكياجها شعرها طالعه خيال..بالذات شعرها كيف طويل..
منى وهي تشوف للينا؛ركزي عليهم كيف يشبحولها..
هند؛انتي شوفي عمتك..
منى:ان شاء الله ماتحشمنيش معاها..
وصلت لينا في منى...
سلمت عليها وفي تقول:بطول عمره ياربي ويتربى في عز الله ويجعله من حملة كتابه..
منى:اللهم آمين الفال ليك..
بعدت لينا عن منى وقالت وهي مبتسمه:ان شاء الله..
منى:تعالي نعرفك ع خالاتي وعماتي..
مشت لينا مع منى وهند معاهم وهي تشوف للينا بتركيز..
وقعدت منى تعرف في لينا اهلها والعكس..لين وصلت في عمتها الكبيرة..
العمه لما لينا مدت يدها قعدت مربعه ايديها وهي تقول:مريضة بنتي مانبيش ندعيك..
ابتسمت لينا ابتسامه مجامله ومن داخل اضايقت من الحركه وحستها مقصودة لكن قالت:لاباس عليك..
منى ابتسمت بإرتباك وقالت:تعالي نوريك شروفي..
وخدتها ومشت بيها من حداهم..
ام منى:ربي يهديك ياوخيتي..
عمة منى:ربي هاديني والحمد لله..وبعدين انتي تعرفيني العبيد لانسلم عليهم ولانحب نخالطهم..
وخالات منى يشوفلها بعدم استيعاب مش مصدقين ان فعلا في ناس مازال تفكر هكي..
🏵🏵🏵🏵
لينا:ياعمري ع السماحه الله يبارك..ربي يحفظه بحفظه..قامت تليفونها وقالت:خل نصوره لعدنان قالي صوريهلي..
منى ضحكت..
خدت لينا كذا لقطه للوليد بعدين طلعوا من حداه...
لينا وهي تشوف للعاملات كيف يفرقوا في الشكولاته متاعها ابتسمت وقالت:ان شاء الله تعجبهم..
منى :تو تعجبهم وتشوفي كيف حيسألوا عنها..
شويه وجتهم اساور وفيدها طرف شوكلاته وهي تقول:طالعه تهوسي ليون وشكلاطتك تهوس حتى هي..
ضحكوا لينا ومنى...
لينا بضحكه:صحتين..
••من بعيد شويه..
ايناس:مانحسبهاش حلوة هكي..
زهور:امم هي قنينه..معقوله..
ايناس:شن معقوله ملكة جمال..تخيليها بيضا!
زهور قعدت تشبح للينا بنظرات حسد واضحه..
طبعا يقولوا السلفه تلفه...
وغيرة السلفه احرف من غيره الضرة...
زهور ماحستش اتجاه منى هالشعور قد ماحساته اتجاه لينا اللي من لما جت وهي تحظى بمعامله مميزة وفي فرق كبير بينها وبينهم هي ومنى في شكل الحياه اللي عايشينها مع العيله..
وغير هكي..هما اللي يكردوا ويخدموا في العيله ليل مع نهار ماحصلوش ذرة احترام من اللي حصلاته لينا من وجيهه لينا اللي شبه اغلب وقتها في وتنزل من العشيه للعشيه...
امكانيات لينا اللي تفتقدهم زهور واللي حيخلوه مع الوقت حتكسب اهم افراد العيله كان مش كلهم مخليين زهور تحس بشعور حسد اتجاه لينا..واللي يحسد يتمنى زوال النعمه عن المحسود...
وهدا اللي تبيه زهور ..زهور اللي كل همها كسب رضا اهل زوجها بش تكسب زوجها...
وتوا حتشتشرس في محاولات كسب رضاهم خصوصا بعد المشكله اللي صارت بيناتهم واللي خلتهم ينقموا عليها...
🍁النوعيه هادي من الكناين ولت موجوده بكثرة في العائلات.. النوعيه اللي تنافس ع كسب رضا اهل الزوج ويحوزوا هما بس الثناء واالشكر والتميز...في منهم بش تكره اهل زوجها في سلفتها تطعن في عرضها...الموضوع هدا خطير لانه يتسبب غالبا في خراب البيوت وقطيعة الرحم وممكن يوصل حتى لسفك الدم ..🍁
🏵🏵🏵🏵
"صار نوريه في الحج ياوجيهه"
وجيهه بإبتسامه:ايه عزوزتها تبي الحج وقالت مانمشيش من غير نوريه..
:حتى اني حسيت علاقه نوريه بعزوزتها قويه..
وجيهه:نوريه بنت الكنه الأولى والحاجه رمضانه دارتها زي بناتها يخي خير منهم..ع قد مادارت من كناين بعدها ولاوحده قدرت تاخد مكان نوريه عندها..
:نوريه ماشاء الله عليها فالحه...
وجيهه؛ايه وحوش شيابينها هي فيه الكل في الكل حتى في المناسبات مايعبوش الا عليها كلهم عزوزها وشيبانها وحمواتها..
:يطيحنا الله في كنة زيها..
:وانتي ياوجيهه طحتي في كنه جاتك زي بنتك نوريه..
تنهدت وقالت:ياودي مش لأنها لكن نوريه مافيش زيها فهالوقت..
اهل منى واهل زهور شبحولهم..
والزوز كانوا منحرجات..اما لينا كانت تشبح لعزوزتها وهي مبتسمه ابتسامه جانبيه..
ع جية العاملات بالعشي اللي بدوا يفرقوا فيه..
رنده وهي مقعمزة حدا عفاف:ووك وخييي اللي لمه في سنين حتى في ليله..
عفاف:قالت كله من ماليها هي مادارت شي..
رنده:وانتي ياعبيطه صدقتي طول من وين بيجيبوه ماليها المكحتين..تي هي وين جت عروسه حتى هديه لشيبانها وعزوزتها ماجابتها...
عفاف:هي من االلي جابت معاها هدا كل وحده مكحته اكثر من تانيه..
رنده؛سعدود كان اللي طاحوا فينا حتى سلافنا حسبناهم في الهدايا..
عفاف؛صدقتي..لكن هادي اختيارات خوتك..
رنده:ناري ع بختهم..
سكتوا شويه لماجي دورهم تفريق العشي..
ورنده مركزة بعيونها على لينا واساور كيف يهدرزوا مع بعض ومنسجمات..
رنده؛ضربتها صحبه مع العبده.
عفاف قعدت تشبحلهم وهي تاكل..
.........
اساور:معناها عندك حتى في الترافل..
لينا؛شويه مش واجد.
اساور:بالعكس يهبل الترافل متاعك نبوا منه راهو..
لينا بإبتسامه؛ان شاء الله تو نضيفه للقائمه..
اساور:لينا انتي واخده دورات في صنع الشوكلاته..
لينا؛ايه...دارتها اخت صديقه ليا ايام المدرسه..
اساور:امم حلو..
••ولينا تهدرز مع اساور وعيون البعض عليها وكلامهم عنها
بين اللي عاجباته وبين اللي مش متقبل فكرة زواجها من عدنان لنفس السبب..وفي اللي مستغربين في وجيهه كيف تتعامل معاها عادي بعد ماكانت رافضه وجودها..
ربيعه:شني وجيهه..
وجيهه وهي تاكل:امم..نعم..
ربيعه وهي تشوف للينا؛خديتوا عليها؟
شبحت وجيهه للينا وقالت بعد مابلعت اللي تاكل فيه:امم..هي كويسه الحق وتحسيها تحب جو العيله..لكن الأهم من هدا كله ولدي يحبها ويبيها واني اللي يحبوه صغاري نحبه..
ربيعه:تبي الحق ولا حتى اني عاجبتني هلبه وقلت بنشوف وجيهه كان لقيتها حاطه راسها براسها خل نعاركها ونحرش فيها الشريف..لكن باهي الحمد لله طلع ربي هاديك من عنده..وقعدت تاكل وهي تشوف للينا...
شبحتلها وجيهه شويه بعدين ابتسمت بتهكم وولت تاكل..
🏵🏵🏵🏵🏵
وفي جهة تانيه في حوش الشريف...
المربوعه اللي كانت معبيه رجاله..
مروان؛اللي عنده طموح ياعمي في البلاد هادي مايقعدش اللي يختار يقعد فيها يموت هو وطموحه...
:باهي كان كلكم طلعتوا هالبلاد من بيها؟
مروان؛ليها الله..كلا حني والله مانقدروا نعطوا اكثر ماعطينا .
الشريف؛خيرك تتكلم تقوا بتسافر حق انت!؟
مروان سكت وهو يشوف لبوه بإبتسامه..
:شكله ناوي ياحاج..
الشريف:كان خلاته حكومه سلامته..
:وليش بتمنعه الحكومه!!؟
:قصده الحكومه الاكبر من الدوله ياحاج...افهم عاد..
ضحكوا..
مروان شبح لسفيان وهو شاد ضحكته..
وسفيان يضحك..
سكتوا شويه بعدين واحد من خوت الحاج الشريف قال..
:عاد ناسبتوا من سبها ياحاج نبوا نهار تعزمنا ع فتات الجنوب..
سفيان ارتسمت ع وجهه ملامح الامتعاض..
الشريف بضحكه؛ان شاء الله ان شاء الله كان حيانا الله.
:يحكوا ع الاوضاع غادي قالوا تعبانه قاعدين يستنجدوا بالحكومه اديرلهم حل في هلبه حاجات..
الشريف:عدنان قال باديه تتحسن..
:ياودي مش هداكا التحسن مازال تبي..
سفيان:وهما خيرهم مايعتمدوش ع ارواحهم ويديروا حل! كل شي يبوا غيرهم يديره عنهم... حتى كان تعاركوا في بعضهم ينادونا حني نحزوا...ماريتش تنباله في هالبلاد زيهم..
واحد رد عليه من الموجودين؛كيف تبيهم يعتمدوا ع ارواحهم ينفصلوا ويديروا دوله!! وبعدين انت تقارن فيهم بالغرب والشرق ! المقارنه هادي غلط ياسفيان...الجنوب بسبب بعده اللي يجي يمسك البلاد يهمشه مش البعد بس حتى الطبيعه الجغرافيه والوضع الأمني..اللي صاير في الجنوب توا سببه اهمال الدوله..
سفيان:كلامك مااقنعنيش واني قاعد عند رأيي هما السبب في اللي صاريلهم.
:كلام سفيان فيه وجهة نظر برغم ان الجنوب عنده من الامكانيات ماتحوله لجنه دبي ماكانتش احسن منهم ايام الفقر..وشوف كيف ولت توا..الجنوب لازم يخدموه اهله هما الأولين ..
:ع هكي ينفصلوا خيرلهم..
الحاج:ترا صلوا ع النبي وغيروا الموضوع..
:ايوه نرجعوا لموضوعنا ماعندك وين تهرب من العزومه..
الشريف بضحكه؛ياودي باهي قلنا باهي..
🏵🏵🏵🏵🏵
"كلك بياض حبيبتي"
مفيده "اخت زهور":ربي يحفظه وينبته نبات حسن..
منى:آمين..
التفتت مفيده لزهور وقال:ان شاء الله نفرحولك زي هالنهار..
ابتسمت زهور ابتسامه مزيفه وهي تقول:آمين..
ع خشة رنده للدار اللي فيها "البيبي" وفيدها بوكس صغير..
رنده:هادي هديتي لحفيدنا..وحطتها حداه ع السرير وقالت لمنى..طبعا جو بياض مابياض وفلوس سمعت بأنها حرام وماتجوزش جبتله هديه بس طبعا بهداكا الحساب..
مفيده قعدت تشبحلها كيف تتكلم بغرور واضح بالذات في نظرات عيونها وحركات ايديها..
منى تصنعت ابتسامه وقالت:تسلمي..
رنده:تمام تصبحي ع خير..
ولفت ومشت طلعت وتتبختر كعادتها...
منى لااراديا ارتسمت ع وجهها ملامح الإزدراء..
مفيده:هي زهور حتى حني بنطلعوا خوك يراجي..
شبحت لمنى وقالت:كل شي كان قنين ماشاء الله ان شاء الله ديما عامر بالفرح..
منى بإبتسامه:إن شاء الله..تسلمي حبيبتي...
مفيده:تصبحي ع خير..
منى:قدامك كل خير..
ومشت مفيده طلعت هي وزهور..
منى بعد طلعوا شبحت لبوكس الهديه متاع رنده عكرشت وقالت وهي تقلد فيها:هتيه بهتااكا الحساب نننن..مقرفه..
🏵🏵🏵🏵
في الكوجينه...
لينا وهي تسلم ع اساور:هي تصبحي ع خير..
اساور:وانتي من اهله حبيبتي..بعدين نبعتلك "ادد" ع الفيس اقبلي..
لينا بإبتسامه: ان شاء الله..هي بالسلامه..
اساور:بايات..
مشت لينا طلعت من الباب الخارجي بعد مانزلت الخمار ع وجهها...
واساور طلعت وراها قعدت تشبحلها لين وصلت في الدروج وركبت لشقتها..
هي غيرت عيونها للطاوله والكراسي ..
مشتلهم وقعمزت فتحت تليفونها ولهت بيه...
••فهاللحظه..
سفيان كان جاي من بعيد يتكلم بالتليفون اساور سمعت صوته شبحتله طول..
سفيان؛والله تمام الحمد لله..تمنيتك جيت.
"والله حتى اني نبي نجي غير الظرف اللي منعني قاهر"
سفيان؛ولا يهمك مش مشكله المهم عدت ع خير..
"ايه الحمد لله..اسمع بنقولك"
سفيان عقد حواجبه وقال:ان شاء الله خير!
"فوزي روح"
سفيان بدهشه:فوزي فوزي..فوزي الأسطى مش غيره!
بضحكه رد ابو بكر..
"ايه هو مش غيره..عازم الشباب كلهم لإستراحته في عين زارة وقالي نكلمك رقمك ماحصلاش"
سفيان رفع حاجبه وقال:وماخداشي منك!!
"تي خلاص ياراجل المهم قالك تعالى "
سفيان:لاعزيزي اني مانمشيش بعزومه ناقصه زي هادي..يكلمني هو بروحه...
"عشرة سنين ياراجل عشرة سنين نروح نلقاك زي ماانت متعجرف متغطرس متكبر مختال فخور"
سفيان بضحكه:؛وانت قاعد تافه زي ماانت..
"مقبوله منك نيوتن...شن الأمور"
سفيان مسح حاجبه وقال:تمام..شن اخبارك..
"اخباري تبي تعرفها تعالى غدوة"..
سفيان:باهي خود رقمي من التافه اللي جنبك وكلمني واعزم..
" لالالا انت حالتك اطورت...تتسهوك ولا قول تتسهوك بالله عليك"..
سفيان ضحك وقال:تم يا دكتور...نتلاقوا غدوة ان شاء الله..
"اوكي في انتظار اللقاء تصبح .."
"هاه سفيان"
سفيان؛نخطم عليك غدوة؟
"ياريت والله"
سفيان:خلاص..نتلاقوا بعد الصلاة
"تم تصبح ع خير".
سفيان؛ قدامك كل خير.
سكر ولف بيولي من وين ماجي
"سفيان"..
وقف والتفت..شافها جاياته وهي قايمه عبايتها شويه وطقطق بكعبها وابتسامتها ع وجهه..
ابتسم ع جنب وقال:اساور..
وصلت فيه وقالت:ايه اساور وينك وينك وينك عاش من شافك..
سفيان وهو يبعد في نظره عنها قال:اهو مشغول في هالدنيا..انتي شن امورك..
اساور وهي تشوفله بنظرات حب:ماشيه تخرجت من حاجه وخدمت في حاجه تانيه..
سفيان:ديما هكي انتي مش عارفه شن تبي..
اساور ضحكت بعدين قالت:مش في كل شي..
سفيان:لا والله في كل شي..
اساور بضحكه:ماتحلفش باهي..
••من روشن شقة عدنان..
كانت لينا تسكر في الستاير جو عيونها عليهم استغربت لما شافتهم واقفين مع بعض وسفيان يضحك..
سكرت الستار وقالت:تو مش امه قالت واعر وقديم ! ولافي حاجات دون حاجات!؟...ابتسمت بتهكم ومشت للدار...
••في الكوجينه..
خشت عفاف بش ادير مرضعه لبنتها..
سمعت صوت هدرزة ...
قدمت للروشن...وشافت اساور واقفه تهدرز ع سفيان..
شدت ضحكتها ...بعدين مشت ادير في المرضعه وهي تقول:وينك يارنده...
••سفيان:موفقه..تصبحي ع خير..ولف ومشي..
اساور وهي تشبحله:وانت من اهله...
رجاته لين ادرق من قدام عيونها بعدين قالت..
ان مت يوما في هواك فلاتسل..
فالنحل آثر أن يموت مع العسل..
عفاف بضحكه؛سفيان عسل!!؟وقعدت تضحك وطلعت بسرعه من الكوجينه...
ع خشة اساور اللي جاها اتصال من خوها يستعجلها تطلع...
🏵🏵🏵🏵
فتح باب الشقه وخش..
سكره وراه وحول من رجليه وكمل داخل..
لقي مرته في الكوجينه تاكل..
هي لما حست بيه خش قالت:تبي..تاكل..
هو بإزدراء:معاش تتكلمي وانتي تاكلي..ومشي وخلاها..
هي غمضت عيونها وتنهدت بعدين فتحتهم وقعدت تلم في الماكله..انسدت نيتها...
🏵🏵🏵🏵
"ماحستيش ان وضع زهور بين متاعينها معاش ولى زي قبل"
مفيده:هو من قبل هكي لكن هي ماتبينش والمشكله اللي صارت بينها وبين راجلها فضحتها..
ايناس:معقوله!
مفيده:مش هي بس حتى سلفاتها..عيلة راجلها واعرين وشكلها هدا علاش سكرت موضوع عدنان قبل ينفتح..خافت عليك..
ايناس بحزن؛ياناري وخيتي..
وحده من خواتهم قالت؛زهور الوحيده اللي جي حظها مش باهي..عكس باقي البنات..
مفيده تنهدت وقالت:الله غالب..ان شاء الله ربي يعطيها عيل باك يتغير حالها..
كلهم قالوا؛يارب...ان شاء الله..
:ايه وشن شكل سلفتها الجديده..
ايناس:تهبل تهبل يابنات سمرا صح لكن جميله وجذابه..
مفيده بإبتسامه:بالذات لما تضحك ضحكتها حلوة..
:الله!لهالدرجه..
ايناس:والله...تبوا الحق احلا من زهور وسلفتها..
ضحكت مفيده...
🍁حلاوة الطباع...وجمال القلب يطغى ع الخارج متاع الانسان..يخلي الشين حلو..ويخلي الحلو حلو بزياده..
بياض القلب..وصفاء النيه.. سر الجمال الدائم اللي مايريحش مع العمر🍁
🏵🏵🏵🏵🏵
وعدت ليله الجمعه...
وطلع فجرها....ناضت لينا كعادتها قبل الفجر صلت القيام ..
ولما آذن الفجر نوضت عزوزتها تصلي...
بعد الصلاه...
في الجنان..
مفرشات حصيرة ومقعمزات...
وجيهه وعزوزتها زبيده ولينا...
وجيهه بإندهاش:اول اليوم؟!
لينا بضحكه؛ اها اول يوم الفرح تعدي للكوافير وتلبس الفيلو ةوالعشيه الحفله...بعدين في الليل تسلبه وتلبس بودري ويحنوها حنة الكسرة...وتاني يوم نقولوله يوم الجهاز اللي هو الكسوة عندكم اول ماتنوض العروس تغسل حنتها وتعادوها مع الظهر..
زبيده:مرتين!
لينا بضحكه:اها...والعشيه او مع المغرب اهل العريس يجيبوا الكسوة تطلع العروس وهي لابسه البودري يلبسوها نساوين من هلها وهل العريس الفراشيه ويلبسوها المور وذهبهم ويقعدوا يغنوا عليها بوطويل...وكشك وهكي يعني..
وطبعا الضيافه يافتات وموالح او قلايه وموالح وفي من يدير حلويات معاهم...وتخش العروس تلبس البدله الصغيرة وتصدر..
وجيهه:نهار الكسوة؟!
لينا بإبتسامه؛ايه..وفي الليل يجي العريس لبيت هل العروس وهو لابس الزبون..وتجي مراة كبيرة تحنيهم يحنوا صبع العروس الصغير وصبع العريس الصغير وهو عاد فيسع يمسحها ويحط فلوس في صونيه الحنه اكراميه للعروس..
زبيده:سبحانك ياربي!
لينا بضحكه:ويجي اليوم اللي بتروح فيها نقولوله المرور في بيت العروس مافي شي يومها تلبس العروس البدله الكبيرة يخش العريس لابس جرد فوق زبونه وياخد عروسه ويروح بيها..ايه ويوم الحفله حتى هو يجي ويصور معاها وهو لابس بدله..
وجيهه بإندهاش:ياه قداش فيها ليبيا من ناس وعادات..
لينا بضحكه:طبعا اللي حكيتلكم عنه مش كل هل سبها يديروا فيه...كل قبيله وليها نظامها...ليبيا كبيره واجد وفيها تنوع رهيب...
زبيده؛الواحد يكمل عمره وهو ماعارف عنها شي مهما مشي وجي...
لينا بإبتسامه؛صح..
وجيهه:جي خاطري نحضر عرس غادي.
زبيده:والله حتى اني...
ضحكت لينا وقالت..كان صار عريس قريب في العيله نعدوا مع بعضنا..
ابتسمت وجيهه وقالت؛مال شنو بترفعيني تبي ولاماتبيش ضروري راهو ماتخشيش مناسبه الا واني معاك..
لينا بضحكه:كان خلاك عمي مافي مشكله..
زبيده:ايه غير تعبى..
وجيهه شدت ضحكتها وهي تقول :اللاي!
ولينا تضحك..
زبيده شبحت قدامها وهي تحرك في السبحه وتقول:كان مشي معاها يخليها غير هكي لا..
لينا ضحكت..ووجيهة تشوف لعزوزتها بإبتسامه..
شويه وزبيده قالت:هدا منو؟!..
التفتوا الزوز وشبحوا وين ماتشبح...
لينا ضحكت وهي متفاجئة..
ووجيهه قالت:مش قال مش مروح!! شن هو اللي فيده؟..
وهو جاي ناحيتهم يمرر في نظره عليهم بإبتسامه..
ولينا تشوفله بنظرات كلها شوق وفرح..
وصل فيهم وقال:ياصباح الفل والياسمين ع احلا تلاته تشوفهم عيني..
ابتسمت لينا بخجل..
وجيهه شبحتلها وهي مبتسمه..
زبيده:مش قالوا مانكش مروح؟!..
عدنان حط شنطته وقفص العصافير ع الارض وبدي يحول في بوتيله وهو يقول:شن ماتبونيش نروح ولاكيف..
زبيده:اني كان نلقاك معاش تطلع من الحوش بكل..
هو قعمز وربع رجليه وقال يإبتسامه:وحتى اني كان نلقى معاش نمشي..وشبح للينا..
لينا من الاحراج فيسع غيرت الموضوع وقالت:هدى شنو؟.
عدنان وهو يشوفلها بإبتسامه وحاجبه اليسار مرفوع:عصافير..شن معاش تعرفي العصافير..
لينا ضحكت بخجل وهي تشوف للقفص..
ناضت وجيهه ومشت بتخش الكوجينه..
عدنان شبحلها وقال:تي وين ماشيه يام؟!..
وجيهه وهي خاشه الكوجينه؛ماشيه نجيبلك كتشافيتا..
عدنان قعد يضحك بصوت عالي..
زبيده:حي العار صبح ياولد الناس مازال راقده..
وعدنان مازال يضحك..
ولينا عضت ع شاربها وهي شاده ضحكتها بعدين قالت:عدنان!
وعدنان مايتفكر رد امه يزيد يضحك...
🍀🍀🍀🍀🍀🍀🍀
ومن ساعات الصباح الأولى في الغرب..
لساعات الظهيرة الأولى في الجنوب...
تحديدا في حوش عبد السلام خو لينا
مرته نجمه وهي تحط في تليفونها فالشنطه قالت؛هيا ياعبالسلام..
طلع راجلها وهي يقول:جديات مستغرب فيك مرتين في اسبوع تعدي لهلي!!؟
نجمه:-وليش مستغرب..
عبدالسلام:لأني قبل وين نقولك خل نعدوا نتغدوا عندهم ونروحوا تقعدي تسبلي مية سبله بيش ماتعدي..
نجمه ابتسمت وقالت:ديما نقول من غيري عبالسلام كيف بيصير فيه!؟
هو رفع حاجبه..
نجمه:ماتبحت فيا هك..نا نبي نحافظلك ع حقك ياغالي..
عبدالسلام بإستغراب:حقي؟!..
نجمه:اها...خوك ومراته يرسموا ع الحوش كانك مش ملاحظ..ماسألتش روحك ليش بدوا مقيمين عند هلك صبح عشيه ليل ومرات يباتوا عندهم حتى البيات..هي من امتى وردة طيقك امك ولاتتحمل هلك ديما خشمها في سما ومش حاسبتهم..
عبدالسلام وهو مصدوم؛مال يبوا يورثوا باتي وهو حي!
نجمه؛وبرضاه اخرى ..
عبدالسلام قعد ساكت وهو يفكر في كلامه اللي مش قادر يستوعبه..
نجمه:حل دماغك وعيونك ياعبالسلام وماتقعدش غشيم..
عبدالسلام هز وراسه وقال:عدي اركبي عدي..
نجمه ابتسمت بسخريه ومشت وهي تقول:كيف يصير فيك من غيري ياعبالسلام بس..
وركبت السيارة اللي سبقوهم ليها صغارهم...
وهو لحقها وعقله مع كلامها اللي حركله شعور الكراهيه تجاه خوه...
🍀🍀🍀🍀🍀🍀🍀🍀
"غدي منى واتي"
زهور بلعت ريقها وهي تحاول تكبت غضبها:ايه واتي..
خشت عفاف خدت السفره وطلعت بيها لخوها مروان..
وين وصلت في الباب مدتهاله وهي تقول:قوللها سادك دلع وانزلي مافيك شي..
مروان خدي منها السفرة وهو يقول:عندها عيل بتعانيه..
عفاف:تعانيه حتى لوطا ع الاقل في من يعاونها فيه..
هو مايبيش يكثر دوة هز راسه ومشي ركب..
وعفاف ولت خشت داخل..
وهي خاشه فاتت من حدا الكوجينه اللي فيها زهور تمتم وتقول:وحده متسبله بالعمليه والعيل تقول ماحد جاب غيرها هي بالعمليه..والتانيه معزومه وكل يوم وهي طالعه ومافي من يقدر يقوللها حرف..والهم والكيد كله نازل عليا اني زهور متاع الغم زهور..
..........
"كيف مروان حتى واني في حالتي هادي مش راحميني!!"
مروان:مش راحمنيك!!؟
منى:قولي من لما خديتك امتى تريحت واني من تالت يوم نكرد ونجري وايامي سود..
مروان؛قصدك ماليا يحرثوا عليك.!.
منى ودموعها ينزلوا:بالله عليك هكي بعقلك فكر وشوف..شوف الفرق بينا وبين مرت عدنان..
مروان رفع حواجبه وقال:اها من توا بتديلنا في جو الغيره والممارة..
منى:قول قهره مش غيره..اني نقولك شوف بش تعرف الفرق بينك وبين خوك..
مروان:تقارني فيا بخوي!؟
منى انهارت بالبكي ومعاش عرفت ترد
وهو قال؛كويس..كويس بكل استمري..
ومشي من حداها وخلاها بروحها تبكي بقهر...
🏵🏵🏵🏵🏵
الساعه 5:30عصرا..
في الطريق..
لينا؛انسجمت معاها .
عدنان؛ليهم سبعه سنين متزوجين..
لينا :ايه حكتلي وقالت تعبت واجد في البدايه ع خاطر سوريه...
••يتكلموا عن زوجة صديق عدنان اللي كان عازمه ع الغدي من قبل مايروح من الجنوب وشد فيه للعزومه وعدنان ماقدرش يرده••
عدنان:ايه بش ياخدها تحدى عيلته كامله..
لينا شبحتله شويه بعدين قالت:قالتلي تحملت ع خاطره لانها تحبه وهو يستاهل اي تضحيه...وقالت بعد صبر سنين حاولت فيهم كسب رضا هله حبوها ولت عندهم كيف بنتهم مش بش كنتهم..
عدنان:ايه مزبوط...هي ديما البدايه صعبه خصوصا ان وضعهم كان حساس هي من بلاد تانيه بكل..
لينا"نا اللي من نفس البلاد وماسلمتش ":امم مزبوط..
سكتوا شويه بعدين هي قالت بضحكه:ايه شن قصة العصافير..
عدنان بضحكه:جبتهم بش يونسوك اغلب وقتك في الحوش بروحك قلت نجيبهم بش يونسوك..
ابتسمت لينا بحب وقالت:تعرف انت شنو؟
عدنان وهو يشبح للطريق بإبتسامه قال:شن؟
لينا ؛انت دعاء دعيت ربي بيه واجد في كل وقت اجابه...كنت نقول"اللهم هب لي زوجا يكون لي قرة عين واكون له قرة عين" .
عدنان ابتسم:وانتي هديه ربي اللي جتني من غير دعاء...وتاكدت لما جتني انه يحبني..
ليناوعيونها معبيات دموع:معاد قادره نحكي خلاص الكلام كمل..
ضحك عدنان بعدين قال:نمشوا للبحر..
لينا بضحكه:نمشوا...
🏵🏵🏵🏵🏵
بعد ماخش لشقته مشي للكوجينه..
شرب ميه...وبعدها طلع لدار النوم..
وين خشلها تفاجئ...لما شاف مرته راقده...
سفيان بإستغراب جاها وبدي ينوض فيها:زهور...زهور..
زهور:امم.
سفيان؛خيرك راقده توا؟
زهور؛حاسه روحي مريضه..
سفيان:مريضه! علاش شن تحسي؟!
زهور ؛نحس فروحي فاشله مش قادره نتحرك..
حط يده ع جبهتها بعدين حولها وقال:حرارتك طبيعيه..
زهور:مانعرفش خيرتي حاسة روحي تعبانه مش قادره نتحرك نبي نرقد بس...
شبحلها شويه بعدين قال:تمام..
مشي للدولاب طلع حوايجه...
بعدين شبح للمكيف...مشي خدي جهازه عدله..
ومشي وهويقول:حسيت وضعك مش تمام قولي نرفعك نعاينك..
زهور:باهي..
طلع من الدار وجي بيسكر الباب..بس لما شاف للمكيف خلاه مفتوح...ومشي خش للحمام..
زهور شدت ضحكتها وهي تقول بهمس:اه كان نمرضلي يومين تلاته...وضحكت بكتمان...
🏵🏵🏵
وزهور شدت روحها باقي اليوم عن حوش العيله..
ومنى مقعمزة في حوشها بسبلتها...
اما لينا قاعده هي وراجلها برا ماروحوش...
ووجيهه الوضع هدا مايمشيش معاها...
حست ان الامور بتبدا تفلت من يدها ومش عارفه كيف تتصرف بش ترجع كل شي زي ماكان..
وبنتها عفاف اللي تخدم مراسله لرنده عاودتلها كل شي..
ورنده وصلت الاخبار للحاجه نوريه..وماأدراك مانوريه..
🏵🏵🏵🏵
الساعه 10:00ليلا..
في الصاله..
وجيهه؛خواتك جابوا بعمليات مش غير عمليه ومن تاني يوم بعد يطلعوا من العياده يخشوا الكوجينه ويحوسوا ويعولوا...
مروان:يام منى وضعها خاص..
وجيهه:خاص في شني ان شاء الله..امس في اللمه زي الجن مافيها حاجه ادور وتعرض في روحها والضحكه من الوذن للوذن..
مروان:هالعيل يام العيل..
وجيهه:تجيبه هني العيل نعانوه خير منها..
سكت مروان وهو مضايق..
وجيهه؛شني مش طايب عليك يابابا!
مروان شبحلها وقال:يام من الاخير المراة بدت تقارن في وضعها بوضع مرت عدنان..وبدت تقارن بيني وبين خوي والصراحه عندها حق..
رفعت حواجبها وقالت:عندها حق!! في شن عندها الحق ترا..
مروان:انتي فاهمتيني يام..
وجيهه شبحتله شويه وقالت؛باهي نوض اركب لمرتك نوض وقوللها قالتلك وجيهه معاش نبي نعرفك في شي لافي حزن ولافي فرح..
مروان بصدمه:يام..
وجيهه بعصبيه:تم الكلام خلاص هي نوض..
هو ماباش يزيد يناقشها اكثر خوف من رده فعلها..
خدي بعض وناض طلع..
وهي ناضت وراه وهي تقول:معاش نبي حد يجيني وصلها حتى لخوك هداكا مرته معاش نبيها تنزل..
طلع وهي سكرت وراه الباب بقوة..
بعدين مشت للكوجينه وهي تقول:تو نوريكم..
وصلت في بابها الخارجي جبداته وسكراته بالمفتاح...ومازال تقول بتهديد...تو تشوفوا...

يتبع ...
الفصول الاربعة