شكولينا

الجزء الثاني والثلاثين""القسم التاني ""

#شكولينا
#الجزء_الثاني_والثلاثين"القسم الثاني"
#الجمان_الفريد

"نعتذر امس كان عندي مناسبه مالحقتش نكملها..."
لاخير في عمل يلهي عن الصلاة..
الصلاة اولا ❤
قولوا لاإله إلا الله تفلحوا❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
في صباح اليوم..
مقعمزة تحت المظله وحداها صغارها في الكروسه قدام الشط..
تتفرج ع سلفتها وسلفها كيف واقفين مع بعض ع الشط ويهدرزوا..
كانوا متناغمين مع بعض
يهدرزوا يبتسموا ويضحكوا..
وكأنهم في اول ايام زواج او في شهر العسل..
وولدهم مقعمز حداهم يلعب بألعابه ع الرمله..
شويه وغيرت عيونها عنهم لما شافاته هو جاي يتكلم بالتليفون..
كان لابس سروال جينز اسود..وتيشرت نص كم ابيض في الأسود..وطاقيه بيضا ع راسه ونظارات سود..
وقف قدام الشط وعطاها بالظهر وهو يحكي بالتليفون..
وهي تشوفله بضيق ودموعها معبيات عيونها..
كانت خايفه..
خايفه اللي صار امس يرجع الوضع زي ماكان قبل ليولوا اصدقاء وهي ماتبيش هكي..
تعودت عليه ..ع قربه منها...ع هدرزته عليها ع انصاته التام لما تهدرز...ع بصارته..ع كل شي تعودت عليه منه فهالفترة القصيرة..
كانت حاسه روحها تبي تبكي..
شافاته لما انهى المكالمه..بعدين مشي للشريف قعمز ع روس صباعه جنبه وقعد يهدرز عليه ويناشب فيه..
بعدين وقف ع حيله وهو يضحك..
شافت خوه كلمه وهو رد عليه..والباين رده كان مضحك..
لأن خوه ومرته ضحكوا...
بعدين شبح جيهتها..
بدون مقدمات..بدت نبضات قلبها تسرع في الدق...
ممكن من الخوف والتوتر..
شويه وبدت بطنها تمغص فيها.
لما شافاته جاي ناحيتهم..
كانت خايفه ومتوترة هلبه..
لعند ماوصل فيهم..
وهو يشبح للصغار قال...صباح الخير..
هي تنحنحت وردت:صباح النور..
هو بإبتسامه قال لصغار خوه:صباح العسل ياخرابيش شن جو..اها..قولوا..عجبكم الجو هني..اها..
وهما يكلموا فيه بلغتهم ويضحكوا.
سفيان:بناكلكم بنااااكلكم..
وحط تليفونها ع الطاوله وجاهم وبدي يلعب معاهم وكأنه ياكل فيهم حق...ولما يوقف شويه يدير تعابير بوجهه وكأنه عجبه طعمهم..ويقول باللغة الآنجليزيه...
"Deliciouse"  بمعنى لذيذ..
وهي تشوفلهم وتضحك..
سفيان بضحكه:خرابيش..بعدين مشي وقعمز الكرسي وقال:توا كان يكلم فيا الولد خو صاحبة رتيل..
لينا:اها اللي يبيك تقريه في الفيزياء
سفيان وهو يشبح للصغار:كنت ناسيه بكل يتصل بيا قداش ليه ولأنه رقم غريب ماردتيش واليوم لقيته متصل بيا الفجر قلت خل نشوفه مني..وعاودتله وطلع هو..
لينا:ايه امتحاناتهم قريب..
سفيان؛قالي الأسبوع هدا لا اللي بعده..
لينا:اممم..
سكتوا هما الزوز..
هو غير نظره للبحر..وهي تشبحله..
مستغربه فيه كيف تعامل معاها عادي بعد اللي صار امس بس في نفس الوقت فرحت ان قعد زي ماهو معاها..
شبحلها وقال:تتمشي..
لينا:ياريت بس لمن بنخليهم..
سفيان ابتسم وقال:نرفعوهم معانا اني نشد بحر وانتي ياسمين..
لينا بإبتسامه:تمام..
وناضت من مكانها وهو ناض..
هي طلعت البنت بعدين هو طلع الولد..
ومشوا الزوز بإتجاه الشط..
لينا؛حلو البحر ع الصبح..
سفيان:امم..هادي وفاضي..
وهما ماشيين مروان ومنى كانوا يشبحولهم..
منى:كنت تعرف بمفاجأة امس..
مروان؛خبرني في اخر لحظه...بالرسمي سفيان طاح..
منى شبحتله وقالت؛ايه واضح..بس المشكله فيها هي تحسه مستحيل تبادله نفس الشعور..تصدق امس تشوف في البنات كيف يحوموا عليه وعندها عادي..
مروان؛قتلك قبل وضعهم صعب والظروف اللي جابتهم لبعض كلنا نعرفوها..هي مسأله وقت بس
منى هزت راسها وقالت:مزبوط..
تنهد مروان وشبحلها وقال:قولي لأختك تعتبر موضوعها تم وتقدر تبدا اداوم من الاسبوع هدا
منى؛ربي مايحرمني ميرو..
ضحك مروان وقال:ولا منك ياحمصه..
منى:مبردك كيف شاديتهالي..
ومروان يضحك عليها...
🌺🌺🌺🌺
لينا:ايه اللاي شبهتها بنوريه..
سفيان؛كل ماتكبر تولي تشبهلها هي اكثر...بس بحر فيه شبه منك انتي..
لينا بإبتسامه:حق!؟
سفيان:اني هكي ملاحظ...لون بشرته وعيونه لينا حني لكن ملامحه ليك انتي.
قعدت لينا تشبه لبحر وهي مبتسمه..
سفيان؛شن صار في موضوع المحل امتى بتبدي..؟
لينا:شبه اتفقت اني ومنى هي عليها الحلويات واني الشكولاته..بس قعدلنا نجيبوا وحده ثقه تبيع في المحل..
سفيان:دوري وحتلقي ان شاء الله..بس زي مااتفقنا تبدي خدمه في المحل تفوتي التمريض..
ارتسمت ع وجه لينا ملامح الضيق وقعدت ساكته..
هو لاحظها بس طنش..مش حيرجع في كلامه لو شن ادير..
قعدوا ساكتين شويه بعدين غنى..
كشر كشورة...
هي شدت ضحكتها بقوة.
هو شبحلها بطرف عينه وكمل..
لاتكشر كلنا نحبك...
قلبت وجهها عنه وهي بتضحك خلاص...
وهو كمل..
كشر كشورة...اضحك ليبين سنك..
هي معاش قدرت تشد ضحكتها..
قعدت تضحك..
وهو كمل بضحكه:كشر كشورة..
لينا بضحكه:حفظتها..
سفيان بضحكه:24ساعه وهي تغني في الحوش حتى اللي مايحفظش يحفظ اغانيهم..
لينا؛صداع وازعاج..انا معاش نبي نعودهم عليهم نبي نشغلهم باللعب..
سفيان؛ايه..اني نفكر نجيبلهم العاب تركيب بس نحس فيهم مازال صغار عليها..
لينا؛لا عادي جيبهم.بس حجم كبير..
سفيان:يعرفوا يلعبوا بيهم..
لينا:يتعلموا هما توا في عمر 8شهور قريب يتعلموا..
سفيان:خلاص تو نجيبلهم..
قعدوا ساكتين شويه وهما يتمشوا..
شويه لينا كندرتها حصلت في الرمله وتحولت منها..
لينا؛ تس..
سفيان شبحلها وقال:راجي..
طبس بالولد وجابها...لعند رجلها..
الحركه اربكتها وضايقتها..
سفيان وقف ع حيله وقال:البسي..
لينا:شكرا..ولبستها..
هو تنهد وهز راسه بإيجاب..
بعدين كملوا طريقهم هما الزوز..
لينا شبحتله لقاته موجه نظره القدام..
كانت حاسه بضيق وحاسه بشي واجعها عليه..
غيرت عيونها القدام وهي تقاوم فهالمشاعر...
🏵🏵🏵🏵
الساعه 12:15بعد الظهر..
"فايزة نوضي يستنى فيك"
ناضت وهي فرحانه وتقول:ياوخيتي سلم مريت خوي ربي مايحرمنا منها..
نوريه بضحكه:هي بسرعه تحركي قبل يغير رايه.
قالت:لاخلاص هاني طالعه..هونا نويرة رضاعته واتيه رضعيه لين يرقد.
نوريه:ياودي باهي غير بري بس..
ومشت حماتها طلعت تجري..ونوريه مشت قعمزت وخدت الوليد وبدت ترضع فيه..
ع خشة وحده تانيه من حمواتها:الماعين كلهم غسلناهم نوريه وحطيناهم في المطبخ الخارجي.
نوريه؛كويس..لكن الطناجر خليهم في المخزن متاعه..
:باهي..فايزة رفعها حسين للسوق؟!
نوريه:بعد جهد جهيد في اقناعه..
:سلمها الكنه الباهيه ياربي.
ابتسمت نوريه.
"نوريه"..
نوريه:شن تبي جميله..
"تعالي يانوريه."
حطت نوريه الولد بعد مارقد..
وناضت وهي تقول؛طلعوهم.البساطات ولا؟
حماتها:ايه..
مشوا طلعوا الزوز ونوريه ردت الباب ومشت وهي تقول:من غدوا بيبدا العرس لازم نتموا كل شي اليوم.
:نتموه ان شاء الله..
طلعوا للجنان لقت حمواتها واقفات..
:وينهم اللي للرجاله وينهم اللي النساوين..
نوريه؛اهما للرجاله..وهادم للنساوين..
ع جية سلفها العريس..
:منورة يانوريه..
نوريه بآبتسامه:تسلم..
:متهني بيك والله.
نوريه:بالجميع ان شاء الله.
اخته:والله كلنا متهنيين بيها كل شي مرتب ومنظم كل شي واتي شبه مادرنا شي..
نوريه:مش بجميلي هدا واجبي و العرس عرس وخيي..
:تسلمي بارك الله فيك..
اخته؛هي ارفع هادم..
نوريه:فرشهم مقابل باب المربوعه الخارجي..
:حاضر..
قام الفرشه ومشي بيها...
نوريه:شريف عاون عمك..
الشريف من بعيد
"حاضر يام"..
فجأة رن تليفون نوريه..
طلعاته من جيب القفطان وشافت المتصل بعدين قال:عن اذنكم شويه..
هما بأصوات متقطعه:خودي راحتك..
مشت نوريه خشت داخل وفتحت الخط وردت.
نوريه:صباح الخير رنده...
🌺🌺🌺🌺
"خيرك منى"
منى بقرف:ريحته ادره الكبد..
ربيعه:بالعكس ريحته ادوخ من كثر ماتهبل..
حور:حتى الطعمه مش عاديه..
منى دفت الصونيه وقالت:مانبيشي..
عفاف:غريبه قبل تموتي في الحوت انتي بالذات النوع هدا..
منى:ريحته خي يا عفاف..
وجيهه:خلينا ناكلوا ماتسكريلناش النيه..
ربيعه؛غير شويه ياوجيهه..شكله في حويجه...
منى فنصت وهي تشوف لربيعه.
اساور:باين من وجهك مولي اصفر من امس.
منى:حيي عليا!
وجيهه؛شن حي عليا هادي!؟مالاناويه تخلي لولدي ع هدا بس..
منى؛لامش هكي ياللاي بس كنت نبي الشريف يسكر عامين بعدين نحمل..
لينا بإبتسامه:وربك راد توا..معاش مازاله شي ع العامين..مبارك منمن..
ضحكت منى وقالت:خل نتأكد قبل.
لينا:خوديها مني من توا...اني اللي نعرف..
ربيعه:ايه عاد انتي ممرضه في المجال هدا اكيد بتعرفي اكثر من غيرك..مبروك يامنى والفال ليك يالينا..
لينا انطمست مرة وحده..
وجيهه:آمين يارب العالمين نشوف لسفيان وليد ولابنيه..
ربيعه وهي تشوف للينا بضحكه قالت: قريب ان شاء الله..قريب..ليهم 6شهور متزوجين زيديهم 10شهور تانيات وتشدي عيلهم بين ايديك..
لينا خدت طاسه ميه وشربتها في مرة..
وعيونهم عليها...
زبيده:تي وينها رنده هادي الغدي صقع..
ع جيتها وهي تقول:جيت ياحناي..تسلم عليكم نوريه..
وجيهه؛سلمها وسلم من جاب سلامها شن اخبارها..
رنده قعمزت وهي تقول:اهو يجروا ويوتوا  ليه ليه..
زبيده:ربي يكمل على خير..
وجيهه قالت:آمين...
وفي جنبها اساور وهي تشبح لرنده وتفكر كيف بتقوللها ع اللي عرفاته..واجعتها رنده وماهانتش عليها تقعد راقده ع وذانها هكي...
🏵بعد الغدي...
لحقتها لوحده من الديار..
وين وصلت فيها بتخش..وقفت لما سمعت..
"حور عاد خلي عقلك كبير..صدقيني لو انفتح الموضوع مع سفيان حيفرح بيه"
حور؛على من تضحكي يارنده عليا ولا على روحك..الراجل يحب مرته واضحه زي الشمس..انسي الموضوع هدا وفكروا في غيري لسفيان يارنده..
رنده؛تخافي بعدين تندمي ياحور.
حور:حنندم لو خداني وقلبه عند غيري يارنده..سامحيني بس اني مانرضاش نكون طرف ثالث..
تنهدت رنده بعصبيه وقعدت ساكته..
واساور اللي كانت تسمع في كلامهم وهي مصدومه قالت بهمس..
ياحقيرة رنده...لكن باهي..اشربي اللي جايك اشربي وان شاء الله بالسم..
ومشت تباعدت عن الدار وهي تسحن ع رنده...
🌺🌺🌺🌺🌺
وبعد العصر..
كانوا كلهم مجهزين انفسهم للمرواح..
وماجت الساعه خمسة ونص الا وهما طالعين من المنتجع...
في من تغير جوه للأحسن وللاسوء ..
وفي من خطط يوصل لشي ورجع خايب..
وفي من مكر مكره وعند الله مكره ورده عليه...
وفي من روح بأخبار  حلوة...
وفي من طلع من غنيمه بعكس ماجاها...
🏵🏵🏵🏵
منى ومروان اول ماوصلوا للعاصمه توجهوا لأقرب مخبر تحاليل بش تتأكد منى من حكاية الحمل..
وماطولتش باش طلعت نتيجه وكانت فعلا منى حامل..
ومن فرحة مروان...روح للحوش بالزرده...تورته وعشي واتي...
والعيله كلها فرحت بخبر حمل منى وهالشي خلا عزوزتها تحط الزعل ع تركينه وتفرحلهم...
ولينا في عز اجواء الفرح فقدت سفيان اللي اول ماوصل..
حطهم ومشي...
💎💎💎💎
سفيان؛درت شي عمري ماتوقعت نديره..حسيت روحي زي المراهق وقتها صح بس كنت فرحان ومتأمل..قلت في نفسي خلاص معاش في بعد هكي بش تفهم وتعرف حقيقة مشاعري اتجاهها..لكن هي فيك ياوادي...
ابوبكر:صدقا اني مستغرب مافيش مراة ماتتأثرش لو شافت هدا كله وتزبط..
سفيان عقد حواجبه وقال:تبي تقولي ان هي فاهمه بس تستغبي..
ابوبكر:هدا الباين..
نزل عيونه لفنجان القهوة اللي كان شداه بإيديه الزوز وهو يشبحله بضيق...
ابوبكر:ماضايقش روحك..طبيعي راهو...انت شوف للوضع كيف ولى بيناتكم كنت متوقع قبل انك توصل معاها لهالمرحله!؟...المسأله تبي شويه صبر نيوتن..
شبحله وتنهد بعدين قال:واني في فيدي غير الصبر...؟!
ضحك ابوبكر وقال؛والله وكبرتي يابيضه وبقيتي تحبي..
سفيان بإمتعاض؛غير جينا في مكان عام بس.
ابوبكر؛ياختي ياحلاوتهم وهما عاشقين ومكسوفين...
سفيان حط يده ع طاسة الميه وقال برفعة حاجب؛والله ندوشلك بيها...
وابوبكر يضحك...
هو حرك راسه يمين ويسار بأسف..
وابوبكر مازال يضحك عليه..
💎وروح هو وياه لحوشه وتعشى عنده..وقعدوا سهروا مع بعض للساعه 12..بعدين سفيان روح للحوش..
🌺🌺🌺🌺
وصل للشقة..
فتح الباب وخش..بعدين سكره ورمي اللي في رجليه.
وتوجه للكوجينه..
ع طلعة لينا من الدار للكوجينه..
خشت عليه لقاته يشرب في ميه.
لينا؛وينك هدى كله ؟!
هو اتفاجأ...نزل الشيشه وقال؛-قاعده فايقه؟
لينا:ايه..سهروني اليوم..باين يطلعوا في السنون مرة تانيه..
سفيان :شن حالهم توا..
لينا:لا توا كويسين وبعد جهد جهيد رقدوا...ايه قولي خيرك عطلت لتو..
سفيان:كنت في حوش ابوبكر
هي مشت للثلاجه طلعت منها حاجه وقالت:بعتت رساله قلت فيها انت وينك ع الأقل
سفيان"نخاف نسألك انشغلتي عليا...تقوليلي ايه ماهو الاصحاب ينشغلوا ع بعض":عندك حق  من باب الصحبه اللي بيناتنا حاضر مرة تانيه تو نخبرك..
هي تجاهلت تلقيحه وحطت باكو الكيكه ع الطاوله..
سفيان بإستغراب:شنو هدا؟.
لينا:زردة خوك مروان...ان شاء الله قريب جاي للشريف اخ ولا اخت..
سفيان حس بشي من الضيق بس رسم ع وجهه ابتسامه وقال :ماشاء الله ماشاء الله الله يبارك..
لينا بإبتسامه؛هدي قرعتك..
سفيان:حصتك قصدك ولا؟
لينا بضحكه:اها..
وهو ضحك بألم بعدين قال؛قعدت ناكل غير في زردة غيري...والباين مش حيجي يوم وحد ياكل مني زردة..
وقعمز وقعد ياكل في الكيكه..
ولينا واقفه تشبحله بضيق...
سفيان:ساد هكي مش باهيه ماكله الحلو في الليل..ناض ومشي طلع وهو يقول:تصبحي على خير..
هي تبعاته بعيونها اللي كانوا يشبحوله بحزن؛وانت من اهله...
تنهدت بحزن...بعدين لمت الكوجينه...
ومشت توجهت للدار...خشت وسكرت الباب.
لما جت بتلف المفتاح حست في شي منعها ادير هكي
وخرت عن الباب ومشت ..شافت صغارها..
بعدين مشت قعمزت ع السرير..
ضمت ركابها وسرحت بتفكيرها في كل شي صاير وقاعد يصير...
شبحت لقجر الكومادينو شويه..بعدين فتحاته وطلعت منه الصورة وقعدت تشبحلها...
نزلوا دموعها...طول ردتها لمكانها وسكرت عليها..
بعدين مسحت دموعها...وشبحت ليدها اليمين وبدت تستغفر عليها...
💎اما هو ..
لأنه كان.حاس بضيق شديد..
سيب كل شي ...لاب توب وتليفون وكتب وروايات..
وجي للمصحف..
خداه وقعمز ع سريره وبدي يقرا فيه...
لعند ماجت قدامه آية...
"فاصبر صبرا جميلا¤انهم يرونه بعيدا ونراه قريبا"
وصلت هالآيه لقلبه وحسها رساله موجهه ليه..
ابتسم تلقائيا بعد قراها...وحس بشعور الأمل زاد كبر في داخله...وتفائل هلبه بالجاي من الأيام...
🌺🌺🌺🌺🌺
اليوم التالي..
الجمعه...الساعه 12:30قبل الظهر..
طلعت للجنان لقاته واقف تحت المظله مشتله وقالت:بتطلعوا توا..
سفيان؛ايه شن تبي؟.
لينا؛لاغير بنقولك الغدا كسكسي وانت ماعندكش عليه..نديرلك فتات فتاتكم نبي نجربه..
ابتسم وقال؛ديري اللي يعجبك..
لينا ابتسمت وقالت:تمام..لمحت بعيونها خيط سلك ع السوريه متاعه... بعفويه حولاته وقالت..في امان الله..
هو قعد يشبحلها..
هي حست ان تصرفاتها معاه قاعده تزيد في الطين بله..
اختفت ابتسامتها وقالت بشي من الجديه..خل نعدي نبدا فيه...
ولفت ومشت وهي حاسه روحها تبي تبكي..
قعدت متخبطه وحايره ومش عارفه كيف تتصرف وصراع رهيب قاعد يصير داخلها هي راحت فيه بين الرجلين..
اماهو فكل ماله يزيد يأمل نفسه ان اخر صبره حيكون حلو حلو هلبه...
🏵🏵🏵🏵🏵
"شن بندير يام في قدامي غير هكي حالي كله وقف"
:باهي خلاص اتفقت اني وخواتك نمشوا معاك اليوم..
عبدالصمد؛وقوليلهم يستهدوا بالله خلاص معاش نبي مشاكل كان ردتيها كل حد يقعد في حاله..
:ياودي باهي كان مازال حد جاك ولاعفسلك حوش..
عبدالصمد"وهدا المطلوب ":صلي ع النبي يام وفكينا منه الجو هدا بالله عليك..
:عليه الصلاة والسلام
لكن هاه كان ردونا والله معاد قاصتها خطوه..
عبدالصمد:لالا مايردوناش ان شاء الله..
🌺🌺🌺🌺
خش للشقه متاعه وهو متحلف..
خشلها الدار وقال:انتي شني بالزبط..شن تبيني ندير معاك!؟
رنده:وطي صوتك بنتك راقده.
محمد؛سكري فمك ياكلبه ياللي لاتتحشمي ولاتستحي..ولاك متربيه اصلا..
رنده:هيه هيه احترم.نفسك والزم حدك..
جاها وجبدها من شعرها عيطت وقاللها بغضب:ياحقيرة ياوقحه...تو مش اني قتلك انزلي طيبي الغدي...قتلك امي مش قادره اطيب ولا!!؟ كيف ياحيوانه نروح اني وبوي من الجامع مانلقوش ماناكلوا..
رنده وهي تتوجع؛واختك شن دير قولي غير ماده رجليها وراقده..
محمد ضربها بقوة ع ظهرها وقال:اختي مريضه ياحيوانه مريضه ومرضها انتي مريتي بيه 3شهور ماخليتك لاتمسي ولاتقربي حاجه..
رنده؛والله اني وقتها كنت عروسه واولي حمل مش هي اللي هادي رابع بطن.!وبعدين هيا بروحها ديما تدوي ع فلاحتها ونشاطتها وانجازاتها وهي حامل توا طلعت تاعبه وبتموت!
خبطها.ع ظهرها تاني وقال..حيوانه اقسم بالله حيوانه..
رنده بإنفعال؛ع تصرفاتك هادي وضربك ليا انت الحيوان مش اني..
مجرد.ماكملت كلامها جاها كف قريب طيرلها راسها...ولحقه واحد تاني..
وبدي يضرب فيها بهمجيه وهي تعيط وتبكي..
لين طقوا عليه باب الشقه وقعدوا ينادوا..
"محمد"..
هو سيبها بعد ما قريب طلع روحها.
مشي خدي تليفونها من ع الزيانه..
وطلع من الشقه وسكرها بالمفتاح وهو يقول لأخته وامه وهما يسألوا شن دارلها.
"مادخلكمش مالكمش علاقه"..
ونزل من حداهم ..
:تستاهل غير امتى يتلفها بس..
امها قالت:انزلي انزلي.لحقي ديري حاجه لبوك..
تأففت وقالت:باهي...
ونزلوا لوطا هي وأمها وخلوا رنده في الشقه تبكي هي وبنتها من الألم والخوف..
🏵🏵🏵🏵
الساعه 5:30عصرا..
فتحت باب الدار ع بنتها وقالت:هي اطلعي يابنتي.
خدت عفاف نفس..بعدين مشت طلعت مع امها..
وهما متوجهين للصاله شافوهم رنده ولينا وهما خاطمين من قدام الكوجينه..
منى:اشبح شن بييصير توا..
لينا:ان شاء الله خير
••في المربوعه
الشريف:والله ثم والله لولا الصغار اللي بيناتكم تحلم اني نردهالك..
هو يتكلم وولاده مقعمزين حداه يشبحوا لعبدالصمد بحده..
عبدالصمد:ع كل حال ياعمي بارك الله فيك..
سفيان:صدقني لو تكرر اللي درته..نوعدك نخليك معاش تقوملك قائمه..
هز عبدالصمد راسه وقال في نفسه.
"مدسوسلك كله ياسفيان الكلب"
••••
وجيهه:والله الوحده تعطي بنتها بش تتهنى عليها وتتعشم في اهل راجلها يكونوا معاها زي اهلها ويعاملوها زي مايرضوا يعاملوا بناتهم..اني هدا اللي ماشيه بيه..
من الكوجينه..
منى ولينا اللي كانوا يسمعوا في الكلام شبحوا لبعض بنظرات تهكميه..
ام عبدالصمد:وهي ان شاء الله زي بنيتنا والمشاكل تصير في كل مكان ياوجيهه..
وجيهه:لا اللي صار لبنتي مايصيرش في كل مكان..بنتك دايرة  فوق من واجبها معاكم ومش محصلة منكم احترام وتقدير..
حماة عفاف:والله حني نعاملوا فيها زي الاخت والاخت ماليهاش جميل ع خواتها ولا عيلتها خالتي وجيهه..
وجيهه:كل شي بالأصول يابنتي كل شي بالأصول..بنتكم ايه لكن في النهايه هي مرت ولدكم يعني ملزومه بيه هو بس واللي ديره معاكم بجميلها...
شبحوا البنات وامهم لبعض
وجيهه:بنتي مساعداته حتى في المصروف ومش مكلفه عليه بوها مامنقص عليها شي برغم انها معاش ولى واجب عليه يصرف عليها..يعني جميلها عليه حتى هو..
وحده تانيه من حمواتها:لكن بنت الأصول ماتعايرش راجلها بمعاونتها ليه..
عفاف:انتم استفزيتوني وخليتوني نقول هالكلام في قولة هدا حوش خونا نديروا فيه مانبوا..
سكتوا وماعرفوش شن يردوا..
وجيهه:تبوها تولي خلوها في حالها تربي صغارها بعيد عن الدوشة والمشاكل..
ام عبد الصمد:ع خاطر هالصغويرة كلنا نبوا نلايموهم ع بعض وكان تبينا نقطعوها ماعندناش مشكله.
زبيده:مش قطيعه لكن كل حد يقعد في حاله..
تنهدت ام عبدالصمد وقالت:ان شاء الله ياحاجه ان شاء الله ما يصير الا اللي تبوه..
مررت عفاف نظرها عليهم وع وجهها ملامح نشوة الإنتصار..
وهما كانوا يلقوا يولعوا فيها النار..
🌺🌺🌺🌺
تحت المظله..
واقفين ع بعض يهدرزوا..
لينا:الحق الطريقه اللي ردوا بيها ماعجبتني فيها اهانه وذل واجد للراجل.
سفيان:هو هكي يبي..
لينا:تمام هو يبي تأديب لكن مش ذل عاد..التصرفات هدي تكرهه في عفاف وهي نفس حتزيدها عليه..وتولي حياتهم من غير روح بارده ع الاخر لافيها احترام ولاود..
سفيان:تتحمل نتيجة اختيارها من البدايه ماكانش مناسب ليها لكن هي اصرت عليه..
لينا:برضو اللي درتوه معاه ومع هله غلط ..
سفيان:عندك حق يالينا ماهو ماتندري ع شي وماتعرفيش اللي صاير قبل..
لينا تنهدت وقعدت ساكته..
سفيان:غيريه الموضوع هدا...المهم توا الوليد بيجيني وبنقعمز اني وياه في الجنان من القدام..مانبيش نسمع حس ولا نلمح حد..
لينا؛حاضر..
رفع حاجبه اليسار وقال:سكروا ع الصغار مش يطلعوا وتقعدوا تجروا في جرتهم..
لينا رفعت حاجبها وقالت:باهي وبلاش تلقيح..
ضحك وقرصها من انفها بعدين لف ومشي..
وهي قعدت واقفه ومصدومه في الحركه اللي صارت.حطت يدها ع انفها وهي في قمة الارتباك والتوتر..بعدين مشت بسرعه خشت داخل وسكرت الباب..
🏵🏵🏵🏵
كانت في دارها مقعمزة وهي تفكر..
عندها فضول ورغبه تطلع تشوفه كيف مقعمز مع خوها ويقري فيه..
ناضت وطلعت من دارها..
بعدين مشت لدار التقعميز لقت لينا مقعمزة بروحها مع الصغار..
رتيل:منى مشت لأهلها؟
لينا:ايه بتبات غادي..
رتيل:اممم..خشت وقعمزت حدا لينا...
ولينا تشوفلها بطرف عينها..
رتيل شبحتلها بنفس النظرة بعدين قالت:جي مبشر..
لينا:اسمه مبشر؟
رتيل:اممم..
لينا:ايه ياحنه وليه وقت مع خوك برا..ليش تسألي.
رتيل:لاهكي وخلاص..تنهدت وشبحت للتلفزيون.
ولينا ابتسمت وهي تحرك في راسها يمين ويسار..
رتيل كان مازال خاطرها تهدرز بس خافت لينا تعاركها فضلت تنوض من بحداها وتمشي لدارها..ولينا قعدت معاها بعيونها لين طلعت وقعدت تضحك..
🏵🏵🏵🏵🏵
منى:ايه ردها اليوم قبل لنجي اني روحت معاه...
هند:دارو حكم الطلقة ولا..
منى:ايه نشدوا شيوخ كيف يديروا وردوها ع هالأساس..
هند:وعزوزتك نزلت فيهم..
منى:ايه قتلك كان تسمعيها كيف تدوي تنقهري..قلتلها في خاطري قولي هالكلام لروحك..
هند:مقيوله الجمل مايشبحش لعوج رقبته..
ع خشة امهم..
:هاه منو شن صار في حكايه خدمة اختك..
منى:لاخلاص مروان حطلها ملفها وقال تقدر تبدا من الاسبوع الجاي.
:باهي..المهم مكان كويس..
منى:ايه مستشفى ماشاء الله حتى سلفتي تشكر فيها.
هند:الا ع سيرة سلفتك شن جوها مع راجلها..
منى:اييه كان نحكيلكم شن دارلها في غنيمه..
امها بضحكه:شن عطاها طريحه..
هند ضحكت.
منى:ياريتها طريحتي وطريحتكم..
هند:شوقتيني يادعوة احكي..
وبدت منى تحكيلهم ع المفاجأة اللي دارها سفيان للينا...
هند بدهشه:ااوو نووو هدا سفيان نفسه معقوله!؟
امهم:الحق ياربي هي تنحب غير زينها ساد...
منى:تصدقوا خطرت عليا زهور قلت في خاطري وينك تجي تشوفي..
هند:ايه حقه زهور انخطبت..
منى:الله!
هند :والله بدير عرس في الشتي..
منى:بدير عرس!؟
هند:ايه قالت اختها مش حتنقص ع روحها حاجه..
منى:قاعده صحبه انتي واختها..
هند:ايه جوها مليح الدعوة..
ع خشة شريف يجري مشي ارتمي في حضن حناه..
حناه بضحكه:يبيني نعطيه كيكه مرة تانيه..
الشريف:كيكه نينه..
ضحكوا..
امها ناضت بيه وهي تقول:حاضر ياروح نينه..
🌺🌺🌺🌺
الساعه 9:00ليلا..
"بري اركبي لشقتك بنتي ماعندك ماديري هني"..
لينا:حاضر...
وجيهه:صغار ركبهم سفيان؟
لينا:ايه سبقني بيهم..
وجيهه:باهي..
لينا:تصبحوا ع خير..
وجيهه:قدامك كل خير.
ومشت لينا لباب الحوش لبست في رجليها ومشت بتطلع قابلها الشريف خاش..
لينا؛تصبح ع خير عمي..
الشريف:قدامك كل خير يابنتي.
هي طلعت وهو خش سكر الباب..
🌺وصلت في الشقه لقتها مردودة..
فتحت الباب وخشت سكراته..وحولت اللي فرجليها ومشت لدارها..
خشت..لقاته مقعمز حدا سرير صغار..
لينا:انت هنى..
شبحلها وقال:قعدت حداهم لين تجي..
هي قدمت وشافتهم..
وهو ناض..
سفيان:بترقدي..
هي خافت من السؤال وردت طول:ايه ناعسني النوم.
هو هز راسه وقال:تمام...تصبحي ع خير..
ومشي للباب وقف قدامه شبحلها شويه بعدين طلع وسكر الباب..
هي التفتت شافت للباب..بعدين مشتله ولفت المفتاح..
هو سمع الصوت غمض عيونه وابتسم بألم بعدين فتحهم وخش داره..
🌺🌺🌺🌺
تاني يوم..
الساعه 7:30صباحا..
في الكوجينه..
لينا:اشرب العصير كمله كله..
هو ضحك وخدي الطاسه وشربه..
لينا خدت تفاحه وقسمتها بالنص وقالت:كولها في الطريق.
سفيان بضحكه:ذكرتيني بأمي ايام المدرسه.
ابتسمت لينا..
خدي منها نص التفاحه وقال:ماتبي شي..
لينا:جيلاطي بس.
سفيان بإبتسامه:من عيوني..
لينا ارتبكت غيرت عيونها عنه وبدت تلم في الطاوله وهي تقول:تسلم..
هو قعد يشوفلها بإبتسامه..كلي من التفاحه بعدين مشي بيطلع..
وهي وقفت اللي دير فيه تنهدت بضيق...ودموعها معبيات عيونها...
🏵🏵🏵🏵
الساعه 9:30صباحا
في المستشفى...
في حجرة طبيبة النساء والولاده..
اماني:اليوم زحمه..
اميره:ايه..
طق باب الحجرة هي قالت:تفضل..
انفتح الباب وخش ياسين..
ياسين:فاضيه؟
اماني:حاليا ايه تفضل دكتور..
ياسين خش وخلا الباب مفتوح ومشي قعمز...
ياسين:شن صار في موضوعي..
اماني:ياسيدي خوي لقالك شقة ع قد فلوسك لكن في مكان راقي ..
ياسين: كويس
اماني:نعطيك رقمه تزيد تفهم منه..
ياسين:ياريت والله..ومدلها تليفونه وقال..سجلي..
خدت اماني التليفون..
وهو قال:شنو لينا حتى اليوم مش جايه.
اماني:لينا اجازتها تم اليون ادوام غدوة ان شاءالله..حقه هي قالت قبل كنت نخدم معاه في نفس المستشفى..
ياسين ابتسم وقال:ايه..
ركزت معاه اميره.
وهو كمل يقول؛وقبل كنت نتمنى يصير بينا نصيب بس هي رفضت..
اميرة تفاجئت..
اماني:الله!
ياسين بضحكه:والله..
اماني مدتله التليفون وقالت بإبتسامه:نصيبات..حتى هي قصتها قصة قبل تسكر سنه مع راجلها توفى وخلاها حامل..وبعد جابت بفترة ردها سلفها..
ياسين خدي تليفونه وقال بأسف:ايه سمعت..وماكنتش نعرف ان الدكتور مروان سلفها حتى هو.
اماني:ايه سلفها نعرف من ايام راجلها الأول..
ياسين هز راسه بعدين قال:تمام..مشكورة جدا دكتورة بارك الله فيك..وناض..
اماني:وفيك بارك الله دكتور..
ياسين مشي طلع وهو يقول:السلام عليكم..
اماني واميرة:وعليكم السلام..
🌺🌺🌺🌺
الساعه 4:30قبل العصر..
في الكوجينه مقعمزات ع الطاوله ياكلوا في الجيلاطي..
رتيل:ااه ياقلبي شكلاطه وفانيليا مع بعض..
ضحكت لينا وهي تاكل..
ع خشته هو عليهم وفيده سفرة الغدي..
سفيان:كولوا لين تعرفوه جيلاطي..
شبحوا الزوز لبعض وضحكوا..
حط الصفرة ع الرخامه بعدين كشيك وقعمز بيناتهم ع راس طاوله وجبد منهم الحوض وبدي ياكل..
هما الزوز تبتوا ع لقطه وهما يشبحوله..
سفيان:خو صاحبتك هدا طلع استغلالي جابلي جماعته كلهم للجامعه اليوم..
اتخزرطت رتيل وقعدت ساكته.
هو قعد ياكل وهو رافع ويشبحلها..
لينا:اكيد شكرلهم فيك وفي عطائك وهما عاد وين يحصلوا كيفك يفهمهم الفيزياء..
ابتسمت رتيل..
هو شبح لرتيل وغمز بعينه وقال:تاخد فيا باللسان..
ضحكت لينا..
رتيل شبحت للينا بعدين شبحتله وقالت:عندها الحق..
سفيان حط الكاشيك وقال:ايوه..وانتي شن مصلحتك من انك توافقيها رايي وتقنعيني نقريهم كلهم..!!؟
وجه رتيل ولى اصفر من الخوف..
لينا بضحكه:عليك رعب...شن مصلحتها يعني ماتبيش تنكسف قدام صاحبتها..يعني كان خوها وصحابه لاقدر الله سقطوا مش بيدعوا عليك بعدين عشان مابيتش تقريهم..
رتيل بشي من ربكه؛ايه صح..
سفيان وهو يقلد في صوت رتيل:عندها الحق....ايه صح...
ولينا تضحك بعدين قال:خلي البنيه في حالها..
وخدت منه الحوض وناضت وهي تقول:هي تعالي رتوله.
ناضت رتيل تجري وهي تقول:هيا..
ومشوا طلعوا الزوز وهو بعيونهم معاهم ..
بعدين قعد يضحك...
🏵🏵🏵🏵🏵
"حي عليك تطلع منك كلمه لزهور ياأميرة"
اميرة:علاش..في شن مازال يهمها زهور..
مفيده:اختك ناقمه عليهم نقمه سودا بالذات بعد اللي حكاته ايناس امس..الكلبه ايناس بروحها حكتلي وقالت المدة اللي فاتت كانت تبعتله في الرسايل..
اميرة بصدمه:حي عليها حي..
مفيده:اسكتي وسكري فمك وفكينا من المشاكل مرات ادير حاجه تخرب بيها ع المراة وتولي عليها وعلينا..
اميرة:حي ع زهور الحمارة حي.
مفيده:اللي سمعتيه انسيه سلم وخيتي وردي بالك تحكي لإيناس..
اميرة هزت راسها وقالت:باهي خلاص بنسكت..
☘☘☘
وعدا باقي اليوم..
ولينا لاهيه مع عزوزتها وحماتها في التجهيز لحضور فرح سلف نوريه..
تختار معاهم شن يبوا يلبسوا..
وحتى صبغت لعزوزتها شعرها...وحنت شعر الجده زبيده..
وفي الليل...
حنتهم الزوز..
حنت لعزوزتها حنة عرايسيه..وللجده حنه العزايز ريحه في الرجلين وفي الايدين..
والصغار شدتهم عمتهم..وفي الليل خداهم عمهم وركبهم الشقه..
وهي بعد كملت..
ركبت للشقه...
لقت صغارها راقدين لكن عمهم مش معاهم شبحت جهة داره لقتها مظلمه..
خشت دارها..وسكرت عليها وجهزت لبسها للخدمه..
وبعدين دارت روتينها المعتاد قبل النوم.
قرت وردها ورقدت وهي تقرا في الأذكار...
🌺🌺🌺🌺
في صباح اليوم التالي..
مقعمز في السيارة يستنى فيها..
هي جاته وركبت وهي تقول:اسفه عطلت..
سفيان:مش مشكله..
لينا مدتله الشيشه وقالت؛هاك..
هو ابتسم وخداها..
بعدين فتح درج السيارة وطلع منه علبة مجوهرات صغيرة.
هي قعدت تشوفلها بإستغراب..
هو فتحها ومدهالها وقال:خوديها والبسيها..
هي تفاجئت لما شافت خاتم زواج ذهب ابيض وفيه فص يلمع...
سفيان:هيا..
هي بتردد خداته وجت بتلبسه في يدها اليمين من غير ماتركز..
هو قال:يسار..
شبحتله وقالت:همم!
رفع حاجبه وقال:ف يدك اليسار..
هي ابتسمت بإرتباك ولبساته ..
بعدين شدت بإيديها الزوز شنطتها من التوتر..
هو شبح ليدها بعدين شبح القدام وابتسم ابتسامه جانبيه وقال:بش الكل يعرف انك " Privately owned"
ضيقت عيونها وقالت:شن معناها؟!
ضحك وقال:دوريه بروحك..
وتحرك بالسيارة...
وهي قعدت ساكته ومن التوتر كانت تزيد ع شنطتها بقوة.
وفي داخلها حاسه بمشاعر مختلطه مش مفهمومه...
كل اللي تعرفه انها رافضتها ومش قادرة تتقبلها...بس مش قادره تمنعها....

يتبع …
الفصول الاربعة