شكولينا

الجزء السابع والاربعين الاخير

#شكولينا
#الجزء_47_القسم_الاخير"السحر الحلال"
#الجمان_الفريد
كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫
الساعه 11:17صباحا..
في ساحة المدرسة..
مقعمزة هي وصاحبتها ياكلوا في "الشيبس" ويشربوا في العصير ويهدرزوا..
رتيل وهي تاكل:اممم..قتلك قعدت مصدومه....
الهام؛هو شي غير متوقع..لكن الوليد طلع يحبك جديات..
سكتت رتيل وهي تفكر.
الهام وهي تاكل:يعني..اممم..بش يثبتلك حسن نيته وصدقه معاك دار هالخطوة..حتى لما رفضتيه لما بعت بنت اخته معاش جي بش مايضايقكش شكله...
ورتيل تسمع في الكلام وسرحانه بتفكيرها..
الهام:باهي انتم شن رديتوا؟
رتيل تنهدت وقالت:شن بنردوا يعني لا...
الهام:معناها خلاص بعد هكي بيسكر ع الموضوع بكل مافيش محاولة مادارهاش الراجل وكله لا لا..
تنهدت رتيل تاني وقعدت ساكته..
الهام:بعدين تعالي هني ياجحشة..علاش ماحكتليش قبل ..
رتيل بضحكه:قلت وجه لوجه خير من التليفون...
الهام:ايه والله حقه اني اصلا ماكنتش حنصبر نجيك جري للحوش...
رتيل ابتسمت بعدين قالت؛وخوك مش كلمك عليا..
الهام وهي تشبحلها حركت راسها بالنفي..
رتيل هزت راسها وقعدت ساكته والهام تشبحلها...
🍁🍁🍁🍁🍁
"قصدك حتى بعد درت هكي ردوك؟"
رياض وهو مبتسم ويمرر في نظره القدام؛توقعت يكون ردهم الرفض..
مبشر وهو يشوفله :وانت مازال تبيها..
شبحلها رياض وهو مبتسم وهز راسه بإيجاب..
مبشر شبح القدام وقال:موسع بالك..
رياض:نحبها..
شبحله مبشر..
رياض وهو يخبط بيده ع قلبه خبطات خفيفه يقول:نحبها..فاهم شن معناها الكلمه هادي..
مبشر غير عيونه عنه ومط شواربه ع جنب بتهكم وقعد ساكت..
ورياض ضحك ضحكه خفيفه بعدين حرك راسه يمين ويسار..
🍁🍁🍁🍁🍁
"الطلب زاد عليها واجد"
منى وهي مشغوله بصنع نوع من انواع الحلو:تبيلك حد يساعدك..
لينا:ياريت نلقى..
منى:في وحده قريبتي ماشاء الله طقاشه تحطيها في اي شي تخدمه مزبوط..
لينا:تمام كانك واثقه منها كلميها...
منى:كان مش واثقه فيها مانكلمكش عليها مانبيش نحشم روحي معاك..
لينا ابتسمت وكملت شغلها وهي تلبس في نوع الحلو اللي داراته منى في الشكولاته..
ومن جهة تانيه..
كانت العزوز لاهيه مع الصغار وتلعب معاهم...
ومرة مرة تخطر عليها نوريه وقلبها محروق عليها مش راضيه فيها اللي صارلها..
عارفه بنتها مش مقصرة ومافيهاش عيب ولاسبب يخلي راجلها ياخد عليها..
وتعرفها ماتتحملش حد تحبه يفضل عليها غيرها..
هي تغير ع بوها وامها وخوتها يابال راجلها..
كيف بتتحمل تاخده منها مراة تانيه ويفضلها عليها!..
استاقظت من سرحانها لما سمعت عياط ياسمين لقت خوها بارك عليها ويضرب..
وجيهه:بحر يامعفن حول..
وجت حزتهم من بعض..
ع خشة لينا:ضرب اخته..
بحر قعد يشبح لأمه بخوف..
وجيهه:فكيتها منه فك..
لينا جاته شدت يده وضرباته عليها..
بعدين قاماته وحطاته في الحباس بدون ماتتكلم..
لينا:لين يتأدب..بالله يااللاي ماطلعيه مهما دار..
وجيهه بضحكه:باهي..
ابتسمت لينا وهي عاقده حواجبها ومشت طلعت..
وهي ولت قعمزت وقالت:العب شروفي ماياسي..
شريف:امم..باه..ومشي قعمز مع ياسمين وقعد يركب معاها في المكعبات..
وبحر يشبحلهم من الحباس وهو زعلان..
شبحتله حناه وجعها...خدت شويه من المكعبات ولوحتهم في الحباس وقالت:هي العب حبيبي..
وهو خدي المكعبات وقعد يلعب بيهم وهو يشبح لشريف وياسمين كيف يلعبوا..
🍁🍁🍁🍁
"متزوج ليه فوق15يوم واللي خداها من عيلة***** كانك سامع بيهم"
سفيان هز راسه وقال:تمام...بارك الله فيك يامشري..
ودفله ظرف ابيض..
خداه وقال:تبي اي شي اني حاضر في اي وقت..
سفيان هز راسه وقعد ساكت..
ناض المشري ومشي طلع من المحل..
وسفيان ناض بعده وقال لواحد من اللي يخدموا في المحل:سامي..واشرله ع الكرسي متاعه..
بعدين مشي..
والعامل مشي قعمز في مكانه...
🍁🍁🍁🍁
"هدا وهدا..الزوز هادم متاع المحاضرتين اللي فاتوك..'
رنده؛تمام نمشي نصورهم ونجيك..
:نراجي فيك هني..
رنده:باهي..ومشت بطريقه للمصور..
وصلت فيه وخشت داخل..
كان شبه مزدحم..
قعدت واقفه تراجي..
بعدين طلعت تليفونها وقعدت لاهيه بيه...
شويه...سمعت صوت طفله صغيره تتكلم..
قلبها اللي يعرف هالصوت كويس قعد يدق بأقوى مافيه..
غيرت عيونها عن تليفونها..
شافت شاشة تليفون تاني فيها فيديو لبنتها وهي تلعب مع بوها وتهدرز عليه...
كانت تشبحله والدموع مغرقات عيونها وفاضوا...
وقلبها قريب يوقف من بطء نبضاته...
وقف الفيديو واختفت الشاشه..
التفت..
لقاته وراها يشبح للشاب اللي يصور وهو يقول؛شفتيها كيف كبرت..وقداش متعلقه ببوها...عندك.علم ماترقدش من غيري ماتاكلش من غيري..كان غبت لازم نتصل بيها كل نص ساعه...وللأسف نساتك بكل ومعاش سألت عليك ولاقالت نبي ماما....
تسمع فيه ودموعها ينهمروا...شبحت حواليها لقت اللي هدا لاهي في همه..ومافي حد ملاحظه اللي هي
فيه ماعدا زوز واقفين ع من بعيد ومافهموش شن قاعد يصير بيناتهم..
محمد:بنتي مش حتتربى الا مع بوها وكان تبي تاخدي حضانتها لازم تاخديها ببوها..غير هكي عمرك ماحتشوفيها يارنده..
ومشي طلع المصور وخلاها واقفه جامده في مكانها ومش مستوعبه شي من اللي صار توا..والكلام يتردد على مسامعها ماتسمعش في غيره..
لعند مااستاقظت ع صوت الشاب اللي واقف ع الآله وهو يقول:ياأبله...
شبحتله .
:عندك حاجه تبي تصوريها..
مدتله الشيتات وهي مازال مش بوعيها الكامل معاه..
هو استغرب في حالها وخدي الشيتات وبدي يصور..
شويه جاها واحد.في يده شيشة ميه وقال: تفضلي اختي..
هي حركت راسها بالرفض وقالت بصوت مبحوح:شكرا..
وقعدت تمسح في دموعها وقدمت القدام وركزت مع الشيتات اللي قاعد الشاب يصور فيهم..
وكل من فالمصور مركز معاها...
كمل الشاب تصوير..
عطاته الفلوس وخدت الشيتات وطلعت..
وقعدت ادور بعيونها فيه مالقتلاش اثر..
لين وصلت في البنت عطتها شيتاتها وخشوا مع بعض للمحاضرة..
🍁اول عشرة دقايق منها ماقدرت تركز على شي من المحاضرة...
وهي بس تسمع في كلام محمد...
《 بنتي مش حتتربى الا مع بوها وكان تبي تاخدي حضانتها لازم تاخديها ببوها..غير هكي عمرك ماحتشوفيها يارنده..》
هدا شن قاعد يقول!!؟
كان تبي تاخدي حضانتها لازم تاخديها ببوها!!؟
بعد اللي داره مازال يبيها ترضى توليله!....شن المخلوق هدا مستحيل يكون طبيعي!...
واحد زيه يدير اي شي بش يوصل للي يبيه..
وهو مايخافش من ربي..واللي مايخافش من ربي خاف منه..
انتابها شعور بالخوف الشديد...
للحظه حست روحها خسرت قضيتها...من قبل ما تبدا..
وبنتها خلاص...لازم تنساها وتعتبر روحها ماجابتهاش..
لاشعوريا دموعها قعدوا ينزلوا..
واستاذة الماده شافتها..
:ياطالبه..
زميلتها ؛رنده..خيرك تبكي..
شبحت لزميلتها ..
:عندك مشكله ياطالبه مش قادرة تابعي المحاضرة؟
رنده قعدت تشبحلها وهي تسمح في دموعها لكن فجأة انهارت بالبكي..
خدت الاستاذة شيشتها متاع الميه ومشتلها طول
وزميلاتها يحاولوا يهدوها...
🍁🍁🍁🍁🍁
"قعدت تلعب بعقول الصغار امس فاطمه قالتلي بابا خلي ماما تروح للحوش ماما ولت طيبه وتحبنا"
فاطمه:هدا حالها هي قبل وين تتعارك انت وياها وترفعها لحوش اماليها دير في نفس الشي..
انس بإستياء:كبدي درهت منها يام..والله لولا الخوف من ربي خليتها تحلم تشوفهم..وين كانت معاهم ماتندريش عليهم لاهيه بخدمتها وصاحباتها ولماتها مرات يام يقعدوا بلا غدي ومرات بلاعشي...فاطمه كان مش تنزلك وانتي تهتمي بيها راهي دودت..وتوا دايرة روحها ام مثاليه مافيش منها والمشكله هادم صغار يام ينخدعوا بسهوله..
فاطمه بضيق:تقعد امهم ياولدي الله غالب..
انس:امهم...ايه امهم اللي اني اخترتها وصبرت عليها مفروض طلقتها بعد اول 6شهور ع اللي ريتها منها وقتها ماكانش في صغار..غير تحشمت من صاحبي ماكنتش نبي نخسره..وخسرت سنين من عمري معاها..وحطيت ذنب صغار في رقبتي...
فاطمه؛ماديرش في روحك هكي ولدي هدا مقدر ومكتوب..
حرك راسه بالنفي بعدين ناض ومشي طلع من حداها ورقب لشقته..
وامه تردد بحزن:حسبي الله ونعم الوكيل...حسبي الله ونعم الوكيل...
🍁🍁🍁🍁🍁
"السلام عليكم"..
التفت وتفاجئ وين شاف نسيبه مشاله وهو يرحب بإبتسامه..
حسين:اهلا اهلا ...
وصل فيه وتصافحوا وقعد يسلم عليه بالخد وهويقول؛كيف الحال..
سفيان:الحمد لله..
بعد حسين وهو يقول بإبتسامه:كيف حال عمي وعمتي والعيله..
سفيان:الحمد لله..تعالى برا..
ولف ومشي طلع..
خفتت ابتسامة حسين وهو يشوفله...بعدين عقد حواجبه ومشي طلع وراه..
••قدام المحل..
حسين؛إن شاء الله خير..
ابتسم سفيان وقال؛مبارك..
غير حسين عيونه عنه وهو يحاول يخفي ارتباكه..
سفيان؛عارفها جت متأخره سامحني اليوم بس سمعت..
تنهد وشبحله بعدين قال:اكيد كنت حنبلغكم..
سفيان ضيق عيونه وقال:امتى..بعد ماتزوجت!!؟حني مفروض نعرفوا قبل ولابعد؟!
حسين قعد يشبحله بضيق وهو ساكت..
سفيان:نعذر اختي اللي درقت..لأنها بنت اصل تبي تحافظ ع حوشها ع استقرار صغارها وماتبيهمش يعيشوا المشاكل ومرات التشتت لأنها عارفتنا مش حنرضولها بهالوضع..اختي مراة كامله مكمله والكمال لله وحده..بنت عيله وناس..متربيه صح قايماته وقايمه عيلتك..ربت صغارك احسن تربيه..ومش حتلقى حد يذمها مهما سألت ماتلقى كان اللي يشكر..
حسين هز راسه وقال:عارفه كويس الشي هدا..
سفيان رفع حواجبه وقال؛هدا علاش خديت عليها..!
تنهد حسين وغير نظره عنه..
سفيان؛قعدت معانا 15يوم حتى التلميح مالمحت برغم اني سألتها لكن هي بضحكه ردت عليا حالي باهي وخيي اموري تمام ماتخممش...خسارة مراة زي هادي اطيح في حد مش مقدر قيمتها..
شبحله حسين وقال:ماتتكلمش ع شي انت مش عارف منه الا الظاهر بس..
سفيان؛اللي نعرفه يكفي..صدقني بابونسيب ماعندك عذر بالذات قدامنا حني خوتها وبوي..لو كنت مكانك قبل لندير اي شي نمشي لأهلها ونعطيهم علم فالنهايه حني كنا حنردوا الامر لصاحبة الشأن واللي تبيه هي يمشي..لكن انت خليتنا نعرفوا من برا زي اللي داير عمله ومدرقها وخايف تطلع..واهي طلعت..
حسين وهو عاقد حواجبه:من الاخير انت شن تبي توا؟
سفيان:ولا حاجه..غير اني نبيك تعرف ان القيمه اللي كانت ليك عندنا خسرتها بإيديك..واختي لو في يوم انظلمت صدقني دقيقه معاك زياده مش حتقعد...السلام عليكم...
ومشي من قدامه لسيارته وحسين يتبع فيه بعيونه لين ركب وتحرك...
حسين ضم شورابه لداخل بأسف وغضب بعدين مشي وخش للمحل...
🍁🍁🍁🍁
الساعه 12:50ظهرا..
واقفات في الباب يهدرزوا ويستنوا في الباص..
رتيل:المعادلات هادم بنبدا نحفظهم من اليوم حدير فيهم كويز تو تشوفي..
الهام غيرت عيونها عن الكراسه بضجر وقالت:قداش نكرههم معادلات الكيميا مبردهم....فيسع شبحت لرتيل وقالت...جي جي جي رتيل هداكا جي..
رتيل تلقائيا رفعت راسها وشافت قدامها شبحاته..
هو كان يشوفلها من النظارات وابتسامه جانبيه حلوة مرسومه ع وجهه..
هي نزلت عيونها للكراسه وقالت؛معاش تشبحيله الهام..
الهام شبحتلها وقالت؛تصدقني عجبني هلبه..
شبحتله رتيل وهي رافعه حاجبها اليسار..
الهام بضحكه؛كان ماتبيشي عطيهولي..
رتيل قلبت عيونها وشبحتله لقاته ع حاله..
نزلت عيونها للكراسه وهي شاده ابتسامتها..
الهام؛الباص جي..
رتيل سكرت كراستها ومشوا هي وصاحبتها للباص..
ركبوا وتحرك طول..وهو لحقهم...
لين وصل برتيل للحوش..
نزلت منه ومشت للباب شبحت يمينها شافت سيارته..
شدت ابتسامتها تاني وفتحت باب الحوش وخشت..
سكرت الباب وراها وقعدت تمشي ناحية الباب وهي تفكر في رياض وتقارن بينه وبين مبشر...
لقت روحها تلقائيا وين تذكر اللي داره رياض تبتسم..وتحس بشعور حلو..
وصلت في الباب وخشت..
تعكرت ابتسامتها لما سمعت صوت سفيان وهو يدوي بعصبيه..
سفيان؛قسما بالله قسما بالله لولا ان هي ساكته ماخليتها تقعد عنده..يحسابها رخيصه ولاناقصه بش ياخد عليها ونسكتوله..
الشريف:نوريه مش صغيره ياسفيان نوريه كبيره وعقلها كبير وشخصيتها وتعرف تتصرف ومادام هي اختارت تقعد معاه معناها اختيارها هدا الأصلح بيها..
سفيان حط يده ع رقبته وقال:مش قادر نبلعها يابوي مش قادر..نزل يده وقال..لكن ع قولت اختيارها..وان شاء الله يكون الأصلح بيها...اني طالع بنروح بعد صلاة العشي..
ومشي طلع من حداهم  وفات من حدا رتيل اللي كانت تبع فيه بعيونها وهي مش فاهمه شي..
بعدين شبحت لبوها وامها وقالت:السلام عليكم..
ردوا عليها بدون مايشبحولها..
كملت طريقها لين وصلت للكوجينه لقت نساوين خوتها مقعمزات وع وجوههم باديه ملامح الضيق..
رتيل:شن في؟ خيرها نوريه..
قعدوا يشبحولها بضيق وهما ساكتات..
شبحتلهم شويه بعدين مشت طلعت وهي تقول:خيرهم مايردوش هادم!..
وصلت في دارها فتحتها وخشت لقت مقعمزة ع السرير وسرحانه ودموعها ينزلوا..
رتيل:خيركم شن صاير...خيرها نوريه؟
رنده:راجلها خدي عليها..
رتيل بصدمه:الحقير!...وقعمزت بهده ع سريرها وهي مصدومه..
ورنده بدت تبكي بصمت..ع حالها وحال اختها...
🍁🍁🍁🍁
وفي مكان تاني..
كانت عفاف في حوشها توتي في غدي راجلها وهي تفكر في خواتها ودموعها ع خدودها..
روح راجلها كعادته فهالوقت جعان يبي يشوف الغدي واتي قدامه..
عبدالصمد؛الغدي وين..
عفاف وهي عطياته بالظهر:شويه ونطلعه..
عبدالصمد؛لاخليه هني نبيه هني..
عفاف:حاضر...
خش للكوجينه وقعمز ورا الطاوله..
عبدالصمد:تعبت تعب اليوم..من الفجر واني واقف ع رجل وحده الناس بعد نزلوا المرتبات والمنح اللي هدا يبي يغير اثاث حوشه...ضحك وقال..قل اعوذ برب الفلق ربي نعرفها عينك قويه بري توضي وعطيني مية وضوئك نبخبخ بيها المحل غدوة..
جاته حطت قدامه غداه شبحلها لقي اثار البكي باينه ع وجهها..
عبدالصمد؛ايييه..الواحد جاي تاعب وفاد من الوجوه المقلبه اللي شافها طول النهار يجي يلقى قدامه خليقة مقلبه ومنكده..
رشفت ورسمت ع وجهها ابتسامه مصطنعه وقالت:اسفه..تغدا صحتين..
قلب عيونه وشبح لصونيه الغدي وبدي ياكل..
وهي مشت قعمزت قدامه...
خدت صونية السلاطه وبدت تاكل منها..
وهو يشبحلها بعدين ضحك بسخريه وقال:راك تقولي بتروجمي..اللي عندك مايحولاش كان عملية شفط...
شبحت عفاف لجسمها كان عادي مش زي ماهو يقول بس كلامه اثر فيها وخلاها تشوف نفسها زي ماهو قال..
شدت دموعها بقوة ورجعت تاكل من صونية السلاطه..
عبدالصمد رفع حاجبه وقال:ايه حقه من قالك قصي شعرك؟
شبحتله وقالت متهكمه:قصدك انت لاحظت..غريبه.
عبد الصمد:شن تشبحي فيا اعمى!؟
عفاف:لالا سلامتك..لكن اكيد ماعجبكش مش ماشي معاي ولا...الصبغه حمرا مطلعتني زي المهرجه ولا..
قعد يشبحلها وهو ساكت..
عفاف:مايطلع عليا شي عارفه..وانت مش عاجبك في شي..بس نقولك اني درت هكي لنفسي حبيت نغير وغيرت..
عبدالصمد قعد ياكل بدون مايشبحلها ولايرد بكلمه..
هي ابتسمت بتهكم ودموعها في عيونها وولت تاكل..
🍁🍁🍁🍁
وهداكا اليوم عدا بكآبته...
حتى الجو كان كئيب ومتعب نفسيا..
السمي مغلقه بالسحب السودا...وكانت في كتمه انعكست ع نفسيات الناس..وفي اللي من غير شي نفسيته مدمره..
بس هي هكي الدنيا بكل شي صعب فيها لازم نكملوا مشوارنا وحني مستعنين بمولاها ومولانا ع دنائتها واكدارها...
🌺الساعه 10:30ليلا..
واقفه حدا الروشن وهي تتفرج ع المطر اللي تصب بقوة والسمي تبرق وترعد..
وهي مرة تردد..
استغفر الله العظيم الذي لاإله إلاهو الحي القيوم واتوب اليه...
ومرة تردد..
سبحان من يسبح الرعد بحمده والملائكة من خيفته...
وواكل قلبها القلق ع راجلها اللي مازال ماروحش و ع اتصالاتها مايردش..
لعند ماسمعت صوت بوابة الحوش انفتح..
تنهدت براحه...
ومشت طلعت من الدار وتوجهت طول لباب الشقه..
وصلت فيه وفتحاته..
وقعدت تراجي...
سمعت صوت خطواته ع الدروج..بعدين بان عليها فتحت الباب ع وسعه وقالت:وينك لتوا..
خش وسكرت الباب..
سفيان وهو ماشي؛انشغلت شويه..
ليناوهي وراه:باهي ليش مارديت ع اتصالاتي طمنتني كذبت ع هلك وقتلهم رد عليا وقال بيعطل شوي..
خش للدار وهو يقول؛ماكنتش نبي نرد ع حد..
حول بالطوه خداته منه وقالت:اقل شي بعتت رساله خفت عليك واجد..
شبحلها بعدين تنهد وقال؛آسف..
وخدي حوايجه ومشي للحمام..
هي تنهدت بضيق بعدين مشت حطت بالطوه ع الكرسي وحطاته قدام الدفايه..
شويه وطلع..
لينا:نحطلك عشا؟
سفيان:ماخاطري في شي نبي نرقد بس..
لينا:باهي ع راحتك..
خش السرير وتغطا..
سفيان؛تعالي هدرزي عليا..
ابتمست ومشت قعمزت حداه وقالت:في اشعار جديده عجبوني كتبتها من بدري في المذكرة متاعي شن رايك نلقيها وتسمع القائي وتقولي رايك..
ابتسم وقال؛تمام..
هي فتحت الدرج اللي جنبها طلعت مذكرتها وقعدت تتصفح فيها..
وهو يتأمل فيها..
حطت ع الصفحه اللي تبيها وتنحنحت وبدت تقرا بصوتها العذب المريح....
آمنت بالله ان العسر يتبعه يسر..
كما الصبح بعد الليل ينبلج..
وإننا انما نحيا على امل
فأحسنوا الظن بالرحمن وابتهجوا...
وشبحتله بإبتسامه..
سفيان؛نعم المولى ونعم النصير....سمعيني تاني..
وهي مبتسمه شبحت للمذكرة وبدت تقرا..
قصدت باب الرجا والناس قد رقدوا..
وبت اشكو الى مولاى مااجد..
وقلت ياأملي في كل نائبة..
يامن إليه لكشف الضر اعتمد
اشكو إليك امورا انت تعلمها..
مالي ع حملها صبر ولاجلد
وقعد مددت يدي بالذل مفتقرا..
إليك ياخير من مدت اليه يد..
فلا تردنها يارب خائبة..
فبحر جودك يروي كل من يرد...
🍁والعيون راقده..
هو ناض...توجه لباب الرحيم المجيب المقصود عند النوائب وعلى كل حال..
صلى ركعتين وطلع اللي في خاطره كله وسأل الله التخفيف ع النفس..والقوة ع الحمل...والستر دنيا وآخره...
☘☘☘☘
وعدوا تلاته ايام المطر فيهم ماوقفتش..
وبسببها وقفت هلبه حاجات..
زي لينا اللي قعد محلها مسكر هالفتره ...
ورنده اللي معاش قدرت تمشي للجامعه..
ورتيل اللي مشت يوم بعدين خدت عطله يومين لأن الطرق تسكرت..
بس سفيان ومروان كانوا يحاولوا يمشوا يشوفوا مصالحهم والطريق كانت تاخد منهم وقت طويل علي مايوصلوا..
🍁🍁🍁
وصارت مشكله في الكهرباء بسبب حالة الجو..
كانت تنقطع هلبه...وفي مرة لما ولت دارت التماس ع هلبه مناطق في العاصمه..
تسببت في خساير وكوارث...
•••"ووووك عليا تعالوا المكيف ولعت فيه النار"...
هادي الحاجه رمضانه تستنجد بعد ماانفجر قدامها مكيف الصاله..
جو ولادها يجروا طلعوها...
اكرام بخوف:ووك عليا ياربي شن هدا ان شاء الله الحوش ماصار فيه شي.
مها :باهي اللي قبل لنطلع نزلت تاكو ضي حوشي..
ونوريه ماكانتش حداهم مشت تجري للتاكو...نزلاته... وولادها معاها ع جية سلفها..
:سكرتيه..
نوريه هزت راسها بإيجاب...ومشوا كلهم خشوا للحوش..
حسين:سكرت التاكو يافراس..
:سكراته نوريه..
قعد يشبحلها..
رمضانه؛الثلاجه والفريز شن صار فيهم!
مها لما جي الضي سمعنا صوت جي من التلاجه طول ابله نوريه فكتهم من الضي..
رمضانه؛ربحتي يابنتي..
قلبت اكرام عيونها بملل وشبحت لحسين لقاته يشبح لنوريه..
نوريه؛صوت عياط..
قعدوا يسمعوا معاها..
رمضانه؛جاي من حوش اللافي.!
حسين وخوه طول طلعوا بيشوفوا شن صاير..
نوريه بقلق؛ربي يستر..
🍁وطلع اللي صاير في حوش جيرانهم انفجرت عليهم الدفايه ودارت حريقه راح ضحيتها طفل رضيع موجود في نفس الدار...
🍁🍁🍁🍁🍁
"إنا لله وإنا إليه راجعون"
وجيهه؛عليك فواجع وخلاص ربي يجيرنا..
رنده:الحمد لله اللي امي مراة حريصه في حالات زي هادي ديما التاكو تنزله وتقول كان الضي ولى عادي عند الجيران نفتحه..
لينا:الله يرحمه باتي حتى هو كان حريص واجد كان يدير في نفس الحركه...نحنا عندنا الحمو واجد والضي يصير فيه خلل وياما صارن من كوارث...
منى:توا كلمت اماليا وقالوا ولى عادي ماصارلهم شي..
رتيل؛ايه قالوا مناطق مناطق..
شويه رن تليفون رنده...
لقتها عفاف ردت طول..
رنده:ايوه عفاف..
"بوي حداك"
رنده:لالا في الحمام شن في ؟
"المخزن متاع البضاعه صارتله ماصه وكلاته النار كله"
رنده بصدمه؛اما مخزن..
كلهم شبحولها..
"المخزن متاع الأثاث يارنده توا اتصل بيا مروان وقالي"
رنده:غبارة سودا..!
وجيهه:شن في يابنت تكلمي..
رنده؛المخزن متاع الاثات يام صارت فيه ماصه..
وجيهه خبطت بإيديها ع وجهها
لينا بخوف:ياربي..ومشت تجري للكوجينه بش تتصل بسفيان اتصلت بيه لكن ماردش عليها..
لينا بقلق؛ياريي...ليش ماترد ليش..
🍁والكل حاولوا يتصلوا بس ماحصلوا حد..
وقعدوا في حالة قلق حاولوا يدرقوها ع قد مايقدروا ع الشريف اللي حس ان في شي صاير...
🍁🍁🍁🍁
بعد المغرب..
روحوا مروان وسفيان..
وخشوا طول للحوش...
قعمزوا مع بوهم وامهم ومع رنده وقعدوا يشرحوا في الوضع..
والكناين في الكوجينه قاعدين في حالة قلق بالذات لينا..
🍁الشريف بأسى:إنا لله وإنا إليه راجعون...اللهم اجرني في مصيبتي واخلفني خيرا منها.
سفيان حط يده ع ركبة بوه وقال:ماتخممش بوي بإذن الله حتنحل ونعوضوا الخسارة ونوفوا الديون..
وجيهه؛في المال ولافي الأرواح ياشريف قضاء خير من قضاء..
رنده:ايه بابا..دفع الله ماكان اعظم..
تنهد الشريف وقال:الحمد لله ع كل حال...الحمد لله...
•••••
برا...
سفيان:والله ماني عارف شن ندير حمل ثقيل ومسؤولية كبيرة انحطت ع كتافي مش قدها يامروان..
مروان:وحد الله ياسفيان..
سفيان تنهد بضيق وقال:لا إله إلا الله...
مروان؛بعدين انت قدها ونص..واللي صار مش بيدك خارج عن ارادتك..وبوي صارت معاها ازمات زي هادي من قبل وبعون الله غلبها...حتى تو تعدي بإذن الله...
هز راسه وقال:ان شاء الله....
🍁🍁🍁🍁
"إنا لله وانا إليه راجعون"
رمضانه؛خيرك يابنتي شن صاير..
نوريه ودموعها ينزلوا؛مخزن بضاعه لبوي ياعمتي صارت فيه وانتشت فيه النار..
رمضانه؛يالطيف ياربي..
ونوريه قعدت تبكي..
رمضانه؛تعالي حداي بنتي تعالي..
مشت نوريه قعمزت حدا عزوزتها..
خدتها في حضنها وقعدت اطبطب عليها..
ع خشة حسين لما شافهم هكي خاف وقال:خيركم شن في ؟!...
رمضانه؛مخزن لبوها متاع بضاعه ولعت فيه النار..
حسين انصدم وقال:لاحول ولاقوة الابالله..
ونوريه تبكي وتقول:ياناري ياوبيي ووخييي..مامتلقيين من كل تركينه جتهم المصايب..
رمضانه؛ماتقوليش هكي بنتي راك حاجه بيت الله..اذكري ربك وادعي بالفرج مش تتسخطي..
نوريه ببكي:استغفر الله العظيم..
وحسين يشبحلها بحزن....
🍁🍁🍁🍁
خشت عليها وعيونها حمر من البكي..
عفاف بصوت مبحوح؛العشي واتي..
شبحلها شويه بعدين ناض ومشي طلع من حداها وهي لحقاته..
وصلوا لوسط الحوش لقوا البنات مقعمزات يراجو..
ورنا مقعمزة تاكل بروحها..
قعمزوا معاهم..
عبدالصمد:تعشوا بابا تعشوا..
البنات بدوا ياكلوا..
وعفاف خدت الخبرة وقعدت تقسم فيها وتفرق عليهم..
بعدين قعدت تتفرج عليهم وهي تراجي امتى يكملوا..
رفيده:ماما كولي..
شبحلها عبد الصمد..
عفاف ابتسمت ابتسامه باهته وقالت:كولي انتي ماما..
عبدالصمد؛بابا غيداء ترا هاتي خبرة خل نديرلك نص ماتعرفيش تاكلي هكي..
مدتله غيداء فردة خبزة خداها وقال لعفاف؛نوضي جيبي عصير يبي بشن نعدوا العشي..
هزت راسها وقالت:حاضر..
وناضت ومشت للكوجينه ..
خشتلها وقعدت دور ع عصير يناسب عبدالصمد...
مالقتش غير البرتقال وهدا مايناسبش معدته..
عفاف:كان نقوله مافيش كان برتقال يديريلي قصه..
"مرة تانيه دوري ورا حاجتك وشوفي شن ناقص"
هي التفتت وشبحتله وقالت:حاضر...
قدم وحط فرده ع الطاوله وقال؛رفيده مابتش تاكله...كوليه انتي خير مايتلوح رزقي هدا مانلقاش فالفلوس في الشارع
ولف ومشي طلع من حداها..
هي ابتسمت و مشت خداته وقعمزت وبدت تاكل...
🍁🍁🍁🍁
"بالله عليك كمل العصير بس"
سفيان خدي طاسة عصير برتقال وشربها في مرة...
لينا:عدي للدار نغسل الماعين ونرد العويله ولاحقتك..
هز سفيان راسه ومشي للدار..
ولينا مضايقه هلبه ع خاطر..
ناضت وهي تلم في الماعين...
فجأة رن تليفونه..
مشت خداته من فوق الدولاب..
شافت المتصل..لقتها المراة اللي تخدم عندها في المحل ردت.طول..
لينا؛السلام عليكم
"وعليكم السلام ورحمة الله وبركاته كيف حالك"
لينا:الحمد لله..شنو حالك انتي وحال العويله..
"الحمد لله بخير ونعمه من الله..بنسألك غدوة في خدمه؟"
لينا؛مااعتقدش..
"قالوا غدوة اغلب الطرق مفتوحه والمطر بتوقف علاش مافيش خدمه"
لينا؛والله شن بنقولك..صاير عندي ظرف..ازمة الضي هدي دارت لزوجي مشكله في خدمته الوضع ملخبط واجد..
"اها..ربي يعوضكم خير"
لينا:يارب..والله الوضع صعب بكل..
"معليشي معليشي كله يهون...نقولك ع حاجه نصيحه هي نصحوني بيها مرة ومن بعد ماطبقتها وشفت الفايده متاعها ماخليت حدطايح في مشكله ولامتعسره اموره الاونصحته بيها"
لينا:شن هي؟!
"الصلاة ع النبي..بالصيغة متاع التشهد...هادي افضل صيغه والله يالينا ربي فتح عليا من بعدها هلبه ومنها الخدمه في المحل متاعك..."
لينا:اللهم صل وسلم وبارك عليه..
"هي اصلا دعاء..عندك علم انك لو دعيتي بيها هي ساد..ولو بدي بيها دعائك وختمتيه بيها من غير شك دعائك مستجاب..ومش هكي وبس..انت لو رددتيها وانتي سرحانه ولاسهي قلبك شويه ربي يقبلها..ونزيدك من الشعر بيت..حلمت بالرسول مرتين من كثر ماتمسكت بيها"
لينا وعيونها معبيات دموع؛ماشاء الله...اللهم صل وسلم وبارك عليك..
"شديها من توا وماتبطليش بكل وشوفي شن يصير معاك"
لينا بإبتسامه:ان شاء الله...
🌺ونهت لينا مكالمتها مع المراة..
بعدين غسلت الماعين ولمت حوسة كوجينتها وخدت صغارها ومشت بيهم للدار رقدتهم..
وهي ترقد فيهم فتحت الفيس..
لقت سفيان فاتح...
ابتسمت وكتبت منشور ونزلاته..
فإن جل هذا الأمر فالله فوقه
وإن عظم المطلوب فالله اعظم..
شويه وتفاعل بأحببته ع المنشور.
بعدين خشلها ع الخاص ..
(وينك)
ردت عليه..
(اهم خلاص قريب يرقدوا ونجيك)
هو بعت..
(جيبي معاك طاسة بابونج)
هي ابتسمت وردت..
(حاضر)
🌺🌺🌺🌺
لينا؛ابدا اقرا..
تنهد وقال؛لينا اني تاعب بجديات ودماغي شبه واقف..
لينا:انت ابدا اقراها وشوف شن يصير معاك..ديما نقولك ياسفيان مع السعي في حاجات لازم تاخدهن بش يقونك كيف الماكله والشراب...في القرآن في سورة النساء تحديدا عطي ربي للمسلمين قواعد يتبعوها وقت القتال من ضمنهم صلاة الخوف..برغم انها حرب وهما في وضع معدوم فيه الامان قال لازم تصلوا...وبعد يكملوا الصلاة يذكروه قياما وقعودا وعلى جنوبهم..تعرف ليش..بش يتقووا ويقدروا ع الحرب ويكون النصر ليهم في النهايه... وهدي حرب فيها موت وحياة...يابال مشاكل الدين والفلوس اللي تعتبر بسيطه واجد قدامها...اسعى وانت متمسك بحبل بربي وصدقتي مش حيضيعك بكل..
ابتسم وقال؛هو اني مداير خير في عمري هلبه..بس اللي درته بش ربي كفائني بيك شكله هو الوحيد اللي انقبل...
لينا بضحكه؛باهي..هي ابدى اقرا بش نبدا معاك وكان.حسيت روحك نعست ارقد وتكمل الفجر ان شاء الله..
سفيان بإبتسامه؛حاضر..
وبدوا يقروا هما الزوز كل واحد من تليفونه..
في نص السورة لينا خداها النوم ورقدت..
لكن سفيان قعد يقرا بإستمرار من الراحه اللي حسها لين كمل..
ولما كمل شبح جنبه..لقاها رايحه في النوم..
ضحك..بعدين قربلها غطاها ..وطبس باس راسها..
بعدين حط تليفونه ع الكامدينو ورقد وخداه النوم...
🍁🍁🍁🍁
وناضت مع الفجر كملت باقي السورة..
وبعد الصلاة بدت بورد الصلاة الإبراهيميه..
قعدت تردد فيها همسا وين تقعد بروحها...
وبعد ماسقدت راجلها وهي توصي فيه وترفع في معناوياته..
نزلت لوطا...
رتيل ورنده ماكانوش موجودات..
وامهم قاعده بروحها..
حاولت لينا تغيرلها جوها بالصغار شويه لين نزلت منى وحاولوا ع قد مايقدروا يشغلوها عن التفكير...
🍁🍁من جهة تانيه..
الشريف طلع من الصبح ودار دورة ع صحاب زمان اللي ياما وقف معاهم...وللاسف..كلهم طلعوا اصحاب رخاء بس..
والخير اللي داره معاهم ماثمرش فيهم..
انوجع ع الآخر من الموقف اللي انحط فيه..
ولقي روحه بدون مايحس قدام حوش اخته ربيعه وين ماموجوده...أمه...
🍁🍁🍁🍁
الساعه 12:00ظهرا..
"لو بعنا زوز محلات نوفوا ربع الدين"
سفيان؛مستحيل مش حنبيع شي..
:ياسفيان في وقت محدد للدفع وانت عارف واكيد ماتبيش تخش الحبس..
غمض سفيان عيونه بأسف بعدين فتحهم وخبط بيده ع الطاوله.
:اسمع مني نبيعوا المحل اللي هني والمحل اللي في*****
سفيان:هداكا مش حنجي جيهته لو نخش حبس..
:تصعب فيها ع نفسك ياسفيان..
"السلام عليكم"
شبحوا سفيان والراجل اللي يخدم معاه لباب المحل..
شافوا عبد الصمد خاش.
غمض سفيان عيونه ونزلهم بعدين فتحهم وقال في نفسه"جاي يتشمت..ربي يشد فيه ومانضرباش"
وصل فيهم وصافح الراجل بعدين صافح سفيان..
سفيان اشرله بيده ع الكرسي..
هو قعمز..
الراجل حس ان.القعده عائليه فحب ينسحب؛نستأذن...
سفيان وعبد الصمد:اذنك معاك...
بعدشبح عبدالصمد لسفيان وقال:سمعت باللي صار امس..
سفيان رفع حاجبه وقال؛وجاي تحتفل..
ضحك عبدالصمد بعدين قال؛لاأحتفلت قبل هكي لين شبعت..
قعد يشبحله سفيان بإمتعاض..
عبدالصمد ابتسم وطلع شيك من جيبه وحطه قدام سفيان..
شبحله سفيان وقال:هدا شنو؟
عبدالصمد؛جزء من ديونكم عليا..قلت قبل حنبدا نسدد اللي ليكم عليا شويه شويه.بش نتحرر من حبل جميلكم اللي ربطوني بيه..
سفيان؛ماسمعتاش من حد كلامك. هدا..
عبدالصمد؛هاك سمعته.مني..هدا جزء من الدين والشهر الجاي حنجيب واحد زيه..
وناض وهو يقول:ياريت ماتبلغش الحاج لأنه حيرده..السلام عليكم..
ولف ومشي طلع من المحل وسفيان معاه بعيونه لين طلع..
بعدين قام الشيك وشاف المبلغ تفاجئ هلبه ماكانش مبلغ بسيط...
🍁🍁🍁🍁
متعنقه ذراع صاحبتها وطلعوا للباب...
الهام:ربي يفرج عن قريب حبيبتي..
رتيل بحزن:إن شاء الله..
الهام:اليوم بنروحوا ع حوش جدي بنباتوا غادي..
رتيل:اممم.
لين وصلوا برا..
كانت سيارة مبشر قدام المدرسه..
قعدوا عيونه علي رتيل وهي تكلم في اخته..
بعدين مشت اخته ركبت جنبه وقالت؛هيا..
مبشر وهو يشوف لرتيل ؛راجي شويه...
شبحت الهام وين مايشبح وتنهدت بملل.
جي الباص وركبت معاه رتيل..
وبعد مشي مبشر تحرك..ولاهو علق بشي ولااخته...
🍁🍁🍁🍁🍁
الساعه 5:15عصرا..
في محل #شكولينا
كان حركة البيع عاديه...
وداخل لينا تغلف في طلبيات بش بيبعتوهم..
ومعاها رتيل..
رتيل:احسن حاجه جيت معاك اليوم...
لينا؛حاسه ان في بتمك حكي ع قولت السوريين..
رتيل بضحكه؛ديما كاشفتني..
لينا بإبتسامه:باهي هاتي اللي عندك احكي..
رتيل تنهدت وقالت؛الفترة الأخيره..مش عارفه كيف هكي بديت نحس بشي غريب هكي..ناحية هداكا الولد..
لينا:اين ولد؟
رتيل:هداكا اللي بعت خواته يخطبوا..
لينا ابتسمت وقالت؛-باهي ومبشر..
رتيل بقرف:ييييع..معاش تجيبلي سيرته..
لينا:شن كرهك فيه هكي فجأة!؟
رتيل:قصدك اني ماحكيتلكش؟
لينا:لا ماحكتيلي...
رتيل:اها..مالا خل نحكيلك شن دار هالتافه..
وبدت رتيل تحكي للينا ع اللي صار ليلة العزومه..
لينا:والله حسيت بشي صار معاك ليلتها..
رتيل:طلع واحد تافه يبي يضيع وقت وخلاص..
لينا:باهي وانتي طول نسيتيه..
رتيل:اللي يسمعك يقول كنت متيمه بيه كله مجرد اعجاب وخلاص...
لينا؛شوفي رتيل انتي في السن هدي مشاعرك مش ثابته ماتاخديش عليهن...راجي لين تعدي المرحله هدي وبعدين يصير خير..
رتيل:باهي يعني كيف توا..
لينا:القرايه ثم القرايه ثم القرايه..وهي صبي طلعي معاي..
ناضت لينا ورفعت علبه شكلاطه كبيره..
ووراها رتيل ببوكس طويل معبي حلويات..
طلعوا بيه برا وعطوه للبنت اللي تخدم معاهم في خدمة التوصيل..
لينا:العنوان مكتوب عليهن..
:تمام..
ومشت المندوبه..
ولينا ورتيل خشوا داخل..
بعدين مشي للمكان اللي ينباع فيه الحلو والشكولاته..
لقوا المراة اللي تبيع مقعمزة تحرك في اصابعها وتتكلم بهمس..
ابتسمت لينا..
ورتيل تتفرج ع المكان..
ع خشة زباين..
"السلام عليكم"..
شبحتلهم...شويه وارتفعوا حواجبها وهي متفاجئه..
المراة؛وعليكم السلام تفضلوا..
نوال بإبتسامه وهي تمرر في نظرها ع رتيل والمراة:كنة عيت بن عامر ولا..
لينا وهي مبتسمه؛انا كنة عيت بن عامر..
شبحتلها نوال وهي متفاجئة:اها سامحيني..ومشتلها سلمت عليها..وخلت خوها واقف يشوف لرتيل..
وهي تشوفله بخجل..
نوال؛اني نوال مرة جيت لحوش شيابينك مع اختي في موضوع خطوبه..وشبحت لرتيل..
لينا شبحت لرتيل بعدين شبحت لرياض شدت. ابتسامتها وقالت:اها سمعت عنكن وقالوا خديتن.العنوان...
نوال:ايه..عندي مناسبة جياب بنتي..وان شاء الله حتجيب وليد فنبي منكم نوعين شكلاطه لمناسبه زي هادي.
لينا؛تعالي معاي داخل في.عندي حاجات جديده..
نوال:تمام..
ومشوا الزوز خشوا داخل..
ورياض ابتسم ع جنب بعدين قدم لرتيل..وهي كان قلبها حيوقف من التوتر..
وقف وقال؛معليشي ترا عطيني من هادي..
هي كانت ترعش..خدت طرف شكولاته من المعروض وحطتها قدامه..
هو خداها فتحها بعدين كلاها وقعد يقرا في العبارة المكتوبه ع الحيط..
بعدين قال؛علاش قلتي لا..
رتيل:لان لا..
شبحلها..
رتيل:مانبيش نشغل نفسي بالمواضيع هادي توا..
رياض ابتسم وقال:ولااني نبي نشغلك ولاندير معاك الغلط وحنقعد وراك لين نعطي فيك كلمه..
ومشي للمراة..
وهي تبع فيه بعيونها..
رياض:ترا جيبلي هادي..
المراة:اهيا..
رياض:ايه...
كانت علبة شكولاته صغيرة الحجم..طلعتها وحطتها قدامه...
وهو دفع حقها...
بعدين خداها ومشي لرتيل حطها قدامها...بعدين مشي طلع..
ورتيل تشبحله وهي مندهشة فيه..
المراة:باين عليه شبوب محترم ومتربي كويس..
رتيل شبحتلها بإحراج بعدين خدت العلبه.ومشت خشت داخل..
ع طلعت لينا ونوال..
نوال:خلاص الاثنين الجاي ان شاء الله نجي ناخدهم منك..
لينا؛ان شاء الله..
نوال:فرصة سعيده..بالسلامه..
لينا:بالسلامه...
ومشت طلعت ..
ولينا خشت داخل ومشت لرتيل وقالت:هو هدى..
رتيل هزت راسها بإيجاب..
لينا ضحكت...
رتيل؛قنين صح..
لينا بضحكه:مانعرف..
رتيل:غير قولي..
لينا بضحكه؛مافيش راجل سمح.في عيوني غير خوك..
رتيل وهي مبتسمه بإنزعاج؛يابارده..
ولينا تضحك بعدين قالت؛هي تعالي نلموا الحوسه خوك قريب يجي..
رتيل تنهدت بإبتسامه وقالت:باهي...
🍁🍁🍁🍁🍁
"شوف طيبة بوك وكرمه شن حصل منهم"
سفيان:على الله اجره..
مروان.:لكن والله شي يقهر ياسفيان وين يطيحوا هو اول من يجري بش يرفعهم وين طاح هو مالقي حد..
تنهد سفيان.بضيق وقعد ساكت..
"السلام عليكم"
مروان:صحيح الوجه جي..
سفيان:هدي مروان..
وصل فيهم وقال:كيف الحال...
مروان بضحكه ساخره:قبل كيف الحال مبروك بالذريه الصالحه ان شاء الله وعقبال التالته والرابعه اهم شي ماتنساش تعزمنا عيب رانا نسابه..
تنهد حسين وقال:-اني جاي لموضوع تاني..
مروان؛ثني يامثني..
سفيان؛مروان..
مروان؛لامروان.لاشعبان..يحساب اللي داره عندنا عادي.
كان.عند غير عادي عندنا حني لان بناتنا غاليات..غاليات هلبه...
حسين بنرفزة:اني نبي نفهم انتم ع شنو تحاسبوا فيا..ع شي اختكم هي اللي سعتله بروحها!..يكون في علمك هي اللي فتحت الموضوع وهي اللي قعدت تقنع فيا وهي اللي اصرت يخي..واحد.يلقى مرته مسلمه فيه هكي شن تبوه يدير معاها..انتم لو جربتوا تحسوا اللي حسيته وهي جايه تباركلي بعد قريت الفاتحه وقتها مش حتقوليلي اللي قلتوه ولاتفكروا تحاسبوني من الاساس..
سفيان اذكر نفسه لما مر بنفس الموقف مع لينا..
ومروان خطر عليه اللي صار بينه وبين منى كيف لما اهملاته دور ه الاهتمام عند غيرها..
حسين:ع العموم اني جيت بش نساعد ونرد شويه من جمايل الحاج عليا..مشيت للزوز من التجار اللي ليهم الحاج دين ودفعته ولو نقدر نساعد باكثر من هكي كنت دفعت..وكله ع خاطره هو اولا..بعدين بنته....مرر نظره عليهم وقال...ربي يفرج عليكم ان شاء الله..
السلام عليكم...ولف ومشي طلع...
شبحوا الزوز لبعض بعدين شبحوا القدام وهما مضايقين ع الآخر..
🍁🍁🍁🍁
وقعد سفيان يجري هني وهني بش يحاول يوفي الدين ويخلي اصحاب الدين يزيدوا يطولوا في المده..
وفهالوقت رافقه صاحبه ابوبكر في جولاته في مصراته وزليطن لعله يلقي من يساعدهم بس مع الأسف رجعوا خاليين الوفاض..
وهدا كله ولينا مستمره ع الصلاة الابراهيميه...اللي لقت م وراها تيسير كبير في خدمتها وراحة نفسيه...
وفي يوم...
سفيان؛الجلسه الاسبوع الجاي..والوضع متاع الخدمه قاعده ملخبط هلبه..حاشه روحي مخنوق تقول حاطيني في راس شيشة.
لينا:حتفرج بإذن الله قريب وواجد قلبي هكي حاس..
سفيان ابتسم في عز همه وقال:ماغير يسلملي قلبك هدا اللي من غيره مش عارف شن صار فيا..
ابتسمت لينا بخجل..
شويه ودق باب الشقه...
ناض سفيان وقال:اكيد مروان..
ومشي وللباب فتحه..
مروان:شجو .
سفيان:تمام..
مروان:نسيبك لوطا.
سفيان بإستغراب:نسيبي؟
مروان:ايه..ومعاه راجل كبير في العمر اول ماشافني عرفني لكن اني ماعرفتاش..
سفيان طلع وسكر الباب وهو يقول:نازل نشوف بروحي..
#صلو_على_محمد
#يتبع
الفصول الاربعة