شكولينا

الجزء الحادي عشر

#شكولينا 🍫
#الجزء_الحادي_عشر
#الجمان_الفريد

💕الصلاة اولا
ثانيا...اعزائي..
لو ملاحظين ان الروايه هادي شبه يوميا نزل فيها عكس رواية البطل المغمور..
والسبب..ان الروايه هادي 90% منها احداث حقيقيه اني قاعده نسرد فيها بدون مانجهد عقلي في صنعها لأنها جاهزة اني بس عليا اني نحكيها بأسلوبي الخاص فقط..
الناس اللي تقول ان اللي نكتب فيه مش واقعي ومش موجود وان اني متحامله وخيالي شطح بيا عن الواقع..
لو انتي عايشه حياة مستقرة فيها مشاكل ومناوشات عاديه  ومنغصات روتينيه تصيب اي حد في الحياه..هدا مايعنيش ان غيرك عايشين زيك بالزبط..
نموذج وجيهه وبناتها وتعاملهم مع كناينهم في منه هلبه هلبه ويخي في أسوا...يعني لو ماتعرفيش ان في اهل زوج ياخدوا في مرتب مرت ولدهم غصب عنها....في اللي يضربوا في كناينهم حتى الضرب كان انتي مش مصدقه ان في اهل زوج يضطهدوا في مرت ولدهم زي مافي الروايه...
راهو اني الواقع ماجبتش منه الا شي بسيط جدا....
وصلتني رسايل ع الخاص لنساء عاشوا هالمعاناه واسوا...وفي التعليقات كذا وحده قالت اني نحكي عن حياة هي عايشتها..فلو انتي يلي اتهمتيني بالتحامل واني نسرد في شي مش واقعي ومش موجود لو قريتي التعليقات كانت فتحتلك عيونك ع الواقع الحقيقي اللي انتي ماتعرفي عنه شي....
بجد تعليقها كان مستفز وع اساس انه نقد..اني بس نتمنى تقروا عن كلمة النقد وتفهموا شن هي كويس بعدين تجوا تنتقدوا....والسلام....
💎💎💎💎💎💎💎💎💎💎💎💎💎💎💎💎
《تنويه...في كلام حيكون مؤذي وغير مقبول نعتذر عنه مسبقا بس هو ع لسان الشخصيات اللي في منهم هلبه في مجتمعنا ومايعبرش ابدا عن وجهة نظري...نتمنى انكم تحاولوا تتقبلوا لان كل شي حنكتبه حيخدم قصة الروايه والرساله متاعها》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
بعد سبعة عشر يوما..
🏵في احدى كافتيريات الجامعه..
ع وحده من الطاولات...
كان مقعمز هو وصاحبه يحكوا في موضوع يخصه هو كالعاده..
شرب من فنجان القهوة بعد حطه قدامه وهو يقول:اقسم بالله كانوا احسن ايام حياتي هدوء راحه نفسيه..
ابوبكر:وتو بترجع اضحي بيهم هالهدوء والراحه النفسيه ع خاطر امك.
تنهد وقال:مش بس ع خاطر امي..ضميري يابوصاحب ينغز فيا مرة مرة ويوجعني عليها نحس فيها ضحيه ومالهاش ذنب..
ابوبكر:تحس فيها!
ابتسم سفيان وقال:ياودي ضحيه ولاتزعل ياسيدي..
ابوبكر:سفيان..اني نبيك تفهم حاجه اللي دير فيه هدا مش بر هو..هدا ظلم في حق نفسك وحق بنت الناس ماتبيهاش طلقها ترتاح وتريح..
سفيان شبح لفنجان القهوة وقال:مش قصة بر ياابو بكر لكن مانعرفش نرد لأمي طلب اللي تبيه نديره..بالذات لو جت ترجتني مانتحملش بكل نشوف امي تترجاني طول نلبي طلبها من غير تردد..
ابوبكر؛وتزيد تعيش تعيس اكثر من قبل..تي والله حتى منظرك ولى يخوف ضاعف والهم باين في وجهك مش زي سفيان زمان بكل برا شوف صورك ايام الجامعه وكان ماعندكش نجيبلك..
سفيان تنهد بضيق وقال:خلاص بوبكر سكر ع الموضوع
تنهد ابوبكر وقال:زي ماتبي ياصاحبي.
ورجعوا الزوز يشربوا في القهوة بصمت..
شويه وقال ابوبكر:ايه حقه بنسألك خوك عدنان خطب..
قام عيونه وشبحله...بعدين هز راسه بإيجاب..
ابوبكر:امس شفت صورته نازله في وحده من القروبات واحد منزل بوست تهنئة استغربت الحق كيف ماجبتهاش في السيرة..
سفيان:امس كانت الفضانيه..
ابوبكر:علاش ماقلتش اقلها اتصلت بيه وباركتله..
سفيان ماباش يرد وقعد يشرب من القهوة وهو ساكت..
ابوبكر ضيق عيونه وقال:خيره وجهك انقلب هكي...
سفيان قعد يشبحله هو ساكت..
ابوبكر:زي اللي مش فرحان لخوك..غريبه عدنان بالذات نحس فيك تعزه وكأنه ولدك مش خوك..
سفيان:اكيد..واكثر...
ابوبكر:مالا شن في...
سفيان غير عيونه وقعد يوزع في نظره ع المكان..
ابوبكر:شكلك مش راضي ع موضوعه...باهي من عيلة مني خطب ؟
سفيان ابتسم بتهكم وقال:من سبها..
رفع ابوبكر حواجبه وقال:اها...فهمت...
نزل سفيان عيونه للفنجان وهو يقول:غير الموضوع خل نحكوا في شي تاني..ايه هدرزلي عليك انت مافيش جديد..
ابوبكر بضحكه:مافيش جديد غير اني نراجي امتى نزلي اب في رمضان..
ابتسم سفيان وقالت:تشوفه ع خير ان شاء الله..
ابوبكر بإبتسامه:آمين...والفال ليك يابوصاحب..
هز سفيان راسه وهو مبتسم وخدي الفنجان وشرب منه..
وابوبكر يشبحله وهو مبتسم بأسف...
🏵🏵🏵🏵🏵
ومن سفيان لزوجته زهور...
اللي ولت لحوش راجلها بعد ماجابها واحد من خوتها..
ولت وهي فرحانه..علاش فرحانه...
لأن اللي عاشاته في حوش خلال هالفتره من بوها وخوتها  خلا تشوف جحيم راجلها وأمه وخواته جنة..
الناس عندهم الطلاق ممنوع مرفوض...ولأنهم تمانيه بنات اللي يعطوها كان يلقوا يلوحوا وراها سبعه رشادات...
ولت زهور هالمرة وهي معاهده نفسها انها حتى لو انمسح بكرامتها الأرض مسح مش بس تفوت وتسكت لا بل تشكرهم المهم يرجعوا يرضوا عنها وهالمهمه حتكون صعبه هلبه على زهور...
••طبست باست ع راس عزوزتها وهي تقول:سامحيني اللاي..
وجيهه:الله غالب قلبي طيب قعدت نترجى في ولدي بش يسامحك ويردك..لكن لو عاودتي صنعتك يازهور ماتلومي الا نفسك ع اللي بيديره فيك سفيان بعدين..
زهور هزت راسها والدموع ع طرف ع العين..
وجيهه:نوريه اليوم بتجي بتستسمحي منها حتى هي وتكبي ع راسها..
زبيده شبحت لوجيهه وهي مصدومه..
وجيهه:هادي حماتك تعرفي شن معناها حماتك وفوق هكي اكبر منك يعني لما تغلطي في حقها هدا اقل شي اديريه بش تصلحي غلطتك..
زهور بصوت مخنوق:حاضر..
وجيهه؛وتوا تحركي اركبي لشقتك ضميها بعدين انزلي..
زهور:حاضر..
ورفعت شنطتها ومشت طلعت من حداهم..
زبيده:هلبه هكي يابنتي..
وجيهه:لا مش هلبه ياعمتي حني هكي تربينا وتعودنا وهدا اللي تعلمته منكم الحمي ليها قدر زيها زي عزوزتها بالزبط..
زبيده:لكن مش بالذل يابنتي..
وجيهه:اما ذل هدا ياعمتي ربي يسامحك.! اني نعامل فيهم زي مانعامل في بناتي لو فيهم غلطت غلطتها اني بروحي نرفعها تكب ع راس حماتها وتتعذر منها..
زبيده لما يأست من الكلام معاها قالت:خلاص ديري معرفتك...
وجيهه غيرت الموضوع وهي تقوى:باهي عمتي قوليلي من نعزم على عرس عدنان ومن نخلي...
🍀🍀🍀🍀🍀
"سهريه كبيره...واليوم التاني حفله بسيطه بعد الغدي وبتروح مع عربها"
امال:مش عارفه كيف بنديروا بعد تعدي..
الحازة؛ماتقطعنيش بس..
هناء:شن تقولي يما حني نجوا هنى ع خاطر لينا مش ع خاطرك انتي وباتي!؟
الحازة؛ماهو وين تجن طول الوقت معاها قت بالك بعد تعدي يكسدن وتخف جياتهن..
امال:ربي يهديك يمي..هدى وين بتزيد جياتنا...
ابتسمت الحازة وقالت؛مرحبتين...
••في الدور التاني..
تهدرز بالتليفون مع امها في موضوع يبان مهم..
وردة؛مافهمتكش..
"افتحي دماغك معاي بعد تمشي حماتك هادي الحوش بيفضا ع الشيباني والعزوز انتي استغلي الفرصه واكسبي رضا عزوزك وشيبانيك وخليك مقيمه لوطا"
ورده بقرف؛وعلاش !؟
"ياغبيه انتي وراجلك ماعندكم شي اخطا هالقحفه اللي عايشه فيها لو شغلتي دماغك كويس تخلي الحوش كله ليك انتي وصغارك"
ورده:شن تقولي يام في ورثه راهو..
"ماهو لو انتم عرفتوا كيف تخلوا الشيباني يصخف عليكم لما يقارن بين وضعكم ووضع صغاره الاخرين يعطيهولكم لانكم اولى بيه من عبالسلام اللي عنده حوش سياح نياح والبنات اللي كل وحده عايشه متهنيه في حوش راجلها.."
وردة وهي تفكر في كلام امها؛زعمه يام يصير منه اللي قلتي عليه..
"كان عرفتي كيف تشغلي دماغك وتتصرفي وتفكي روحك من الدلع والجكترة الفارغه يصير"
🍁ايه..يصير..يصير وياما صاير🍁
☘☘☘☘☘☘☘☘☘☘☘☘☘☘☘☘☘
وخش شهر الخير..
ولاول مرة متى وزهور يخافوا من جية رمضان في حياتهم...
اول الأيام مرت بتعب عادي ماكان في حد يجي دابهم هما وبس..ومجرد ماعدوا عشرة ايام..
بدي التعب ع اصوله...العزايم اللي كانت يوميا...ع الفطور وع وع السحور يعني الوحده تقعد مواصله الليل بالنهار..
ومنى بالذات تعبت بزياده لأنها حامل...وكانت مرة مرة وجيهه ترحمها وتخليها ومخليه الكيد كله ع زهور اللي تحاول ترضيهم بشتى الطرق ع حساب نفسها وصحتها....
حاطه في بالها لو هما رضوا عليها ممكن سفيان يرجع يكلمها زي قبل..
زي قبل...اللي كان شبه معدوم فيه التواصل بيناتهم...
بعد اللي صار ولى معدوم بالمرة...وزهور قريب تهبل بش يرجع يرد عليها الصبح لو تصبحت عليه...
وهو في عالم تاني لاهي بالسفره ويجهزلها...
السفرة اللي حتجي في اسبوع عرس عدنان...
عدنان اللي قاعد الخصام بينه وبين خوه اول خصام في حياتهم..واول مرة يزعل سفيان من عدنان...واول مرة عدنان مايراضيش خوه برغم انه قبل كان سفيان يغلط فيه وهو اللي يراضي فيه...
وهالجفاء اللي بين سفيان وعدنان وبين نوريه وعدنان وبين نوريه وسفيان..
مخلي امهم متكدرة ومش عارفه كيف بترجع ترد الخوت لبعض...
ومزال تمشي ايام الشهر..
اللي كانت فيهم الحازة مندهشه في عبدالله ومرته والتغيير اللي طرأ عليهم...
هالتغيير اللي فرح لينا وخلاها تطمن على امها بعد ماتتزوج وتخليها..
هي هكي لينا تحكم ع الناس باللي تشوفه منهم وماتفكرش في النوايا ابدا...
عادة صاحب القلب الطيب هكي يكون نقي حتى في نظرته للناس..وللأسف هو يكون اول المتضررين من حسن الظن المفرط في الأخرين...
وفي الوقت اللي هي تجري وتوتي فيه لعرسها..
حوش اهل خطيبها كانوا يجهزوا ويوتوا..
كانوا ناويين يديروا سهريه ويحجزوا في صاله...
اختارتها نوريه..صاله كبيره وفخمه قصدا اختارتها عناد في خوها اللي رافض تدخلها في حياته...وكذلك تبي تبهر لينا واهلها وتخليهم يحسوا بالفرق الكبير بيناتهم..
☘☘☘☘☘
وعدى شهر رمضان بعد ماهلكوا فيه منى وزهور اللي ممكم يكونوا اكثر من فرحان في العيد في الكرة الأرضيه...
العيد اللي بعد ماعدوا منه تلاته جي موعد سفرة سفيان..
🏵🏵🏵🏵🏵
واقف في روشن الشقه يشبحله بنظرات كلها..
كيف خوه الكبير اللي يحبه زي بوه مش حيكون حاضر في فرحه..
••سافر وانت عارف اني مش راضي بكل..
سفيان ابتسم وقرب من بوه وكب ع راسه بعدين قال:نشوفك على خير...
الشريف تنهد وهز راسه وهو ساكت..
مشي سفيان ركب سيارة مروان اللي بتوصله للمطار...
اول ماطلعت السيارة من الحوش...
طاحوا دموع عدنان غصب عنه بس فيسع مسحهم ومشي بينزل لوطا...
اما زهور اللي كانت واقفه في الناحيه التانيه من الجنان كتمت صوت بكاها بعد طلعت السيارة وحاسه بوجع في قلبه وكأنه ينعصر عصر...
🍁وكنت في كلفي الداعي الى تلفي..
   مثل الفراش احب النار فأحترق...🍁
🍀🍀🍀🍀🍀🍀🍀🍀
هدا حد قدر معاكم...نوار الحوش عطيناكم...
ياعدنان راك تزعلها..ليونه دلوعة هلها...
عدي مربوحه يازينه..اللي عمرك ماوجعتينا..
••وبهالأهازيج..
ودعوا خوات لينا وصاحباتها وكل مايحبها وسقدوها مع ناسها اللي جو يروحوا بيها...
ولأن الرحله في الطيارة طلعت لينا من حداهم بعد ماغيرت الفيلو وهي لابسه بدله رسميه..
خداها خوها عبدالله ومعاه مرته للمطار وين مايراجي فيها عريسها...
طلعت وخلت قلوب مفطورة حزن ع فراقها...
امها...خواتها..صاحباتها...حتى صغار خوتها وخواتها كانوا يبكوا...
وبوها اكثر من حس بالحزن لينا كانت ليها مكانه خاصه عنده ماحد من خوتها طالها...
🌺اما هي فكانت طول الطريق تبكي غصب عنها...
عبدالله:بتعدي بوجه منكد للراجل..
ولينا تمسح في دموعها وهما ينزلوا ...
ورده:مكياجك مشي يالينا تخافي توصلي للمطار الراجل يشوفك هكي يفوتك..وضحكت..
وراجلها سايرها وضحك ع نكتتها البايخه..
بش لينا مش قادرة تكفكف دموعها...
لعند ماوصلوا للمطار...
نزلوا من السيارة...وخشوا للمطار...
قعدوا يدوروا ع عدنان لين شافوه..
هو اول ماشاف لينا ابتسم من قلبه وهي كذلك بادلاته نفس الابتسامه..
وصلوا فيه...سلم هو وعبد الله ع بعض بعدين مشوا وين ماموجوده الطيارة...
عبدالله وورده مشوا قدامهم..
وهو خدي لينا من يدها وقال:واخيرا يا #شكولينا
ضحكت لينا بخجل..
عدنان بضحكه:هالحشم اللي قاتلك..
ولينا مازالت تضحك بخجل وفي نفس الوقت كانت خايفه ومتوتره...
🏵🏵🏵🏵🏵
الساعه 8:00مساء..
في وحده من اكبر صالات الافراح في العاصمه..
كانت مليانه بالمعازيم اللي متلهفين يشوفوا العروسه..
منهم اللي يبي يتشمت ومنهم اللي يبي يرضي فضوله...
ووجيهه وبناتها على اعصابهم...
بينما السلفات اللي اختاروا الزوز يطلعوا بأحلى صورة وبكامل اناقتهم بش يشوفوا روحهم ع سلفتهم الجديده ويخلوا الناس تقارن بيناتهم....
كانوا  يبوا يرضوا فضولهم ويتشمتوا في عزوزتهم وحمواتهم...
••نوريه:شني مازال..
رنده:كلمني قال توا طلع بيها من المزين اكيد ع جيه...
خدت نوريه نفس وزفرت محاوله منها لتهدئة اعصابها..
ع جية عفاف:وصلوا...هي تعالي رنده..
مشت رنده مع عفاف..
ونوريه شبحت لأمها لقت امها حتى هي تشبحله والزوز قلوبهم والعه فيها النار....
زهور:شكلها جت..
منى:اممم..
•••وصلوا رنده وعفاف في باب الصاله..
لقوا عدنان واقف مع عروسته اللي كانت لابسه كاب مدرق وجهها..
رنده عيونها جو ع يده اللي شاده يدها..حست بنخصه في قلبها مش قادرة تتقبل بكل بس ع خاطر خوها حاولت تبان عاديه..
زغردت بعدين ضمت خوها وهي تقول:مبروك عنونه..
عدنان وهو مبتسم:الله يبارك فيك شفشه..
ولينا تسمع فيهم وهي مبتسمه..
بعد طلقاته رنده سلمت عليه عفاف.
عفاف:مبروك عليك وخيي ان شاء الله بهناك..
عدنان:الله يبارك فيك عفو..
رنده ابتسمت مجامله وقالت للينا:مبروك ياعروسه..
لينا:الله يبارك فيك..
عدنان:سلمتكم الأمانه يابنات..
عفاف:كون هاني حبيبي..هي تعالي معانا ياعروس..
وشدوها الزوز ومشوا هما وياها بش يدخلوها دار العروس.
وعدنان مشي طلع...
🏵🏵🏵🏵🏵
في القاعه...
نوريه واقفه حدا امها ورجلها تهز من التوتر والعصبيه:امتى تخش وتريحنا..
وجيهه:اهدي بنتي...
ورتيل تشبح لنوريه كيف دموعها في عيونها ووجهها مولي احمر من الغضب...
فجأة انطفت الاضواء...
والكل بدي في حالة ترقب...
لحظات..
وخشت العروسه ...
لما وقفت ع اول الممر اللي يوصل للكوشه..
ضوا تحتها المكان اللي واقفه عليه وسلطوا عليها من فوق بقعة ضي..
وبدت الفرقه تغني..
"مرحبا يالافيه"
الحاضرات كلهم بعيونهم ع العروسه اللي قعدت تبان اكثر واكثر وهي تدرج...لعند مابدت الصاله تضوى كلها...
ولت واضحه للجميع..
اللي تحولت نظرات عيونهم الفضوليه الي نظرات انبهار..
بقعة الشوكولا المنحوته بإتقان..منحوته بإبداع...جمالها العيون مش قادر تتحول من النظر ليه...
وسبحان المبدع لما يخلق الجمال....خلا للطين اشكال جميله تذهل العيون بغض النظر عن لونه...
وهذا االلي اثبتاته لينا فهالليله اللي خدت الألباب منها من جمال...
الجمال اللي زاده ربي من عنده بهاء طلة وبريق واضح..
لامعه...جذابه....مبهرة....
وتبارك الله احسن الخالقين...
••نوريه كانت تشبحلها بنظرات اعجاب بانت عليها رغمها عنها..
ورتيل عبرت بكلمه وحده وين شافتها"واااو"
اما حمواتها اللي كانوا وراها يساعدوا فيها بش تمشي..
شبحوا لامهم واختهم وهما متفاجئات زيهم زي البقيه...
لما وصلت لينا في عزوزتها ابتسمتلها..
ووجيهه ردتلها الابتسامه...
بعدين غيرت عيونها عنها وقعدت تشبح لمكان الكوشه ..
قلبها كان يخفق بشده من الخوف والتوتر وهي تشوف لنظرات الناس ليها...
بس كانت تحاول تبان ثابته وواثقه من نفسها وفعلا نجحت فهالشي...
وصلوها للكوشه..
قعدت ادور بعيونها في نساوين خوتها...شافتهم الزوز مقعمزات مع بعض الزوز اشرولها بإيديهم يحيوا فيها وهي ردتهالهم..
بعدين ساعدوها حمواتها بش تقعمز...
نوريه خدت نفس بعدين مشتلها وين جت خاطمه حدا زهور ومنى اشرتلهم يلحقوها...
وهما الزوز مشوا وراها...
رنده:مرتاحه هكي...
لينا وهي مبتسمه هزت راسها بإيجاب..
ع جية نوريه والسلفات..
عفاف:هادي اختي الكبيرة نوريه ..طبعا هي مش اكبر وحده قبلها خوي سفيان اكبرنا..
نوريه مدت روس اصباعها للينا ولينا شبحت ليدها ..بعدين صافحتها بنفس الطريقه...
طبست عليها نوريه وهي تقول:مبروك..
لينا:الله يبارك فيك..
وخرت عنها نوريه وقالت:خيره ماجي معاك كان نساوين خوتك..
لينا بإبتسامه:مابيناش نكلفوا عليكم..
نوريه: كان جبتي معاك شارعكم كله ماتكلفونا شي..
شبحوا السلفات للينا...
ولينا ابتسمت وهي مضيقه عيونها وهزت راسها بآيجاب..
عفاف:هادم سلفاتك.
شبحتلهم لينا..
عفاف:منى مرت خوي مروان...
منى:مبروك...
لينا بإبتسامه:الله يبارك فيك..
عفاف؛زهور مرت خوي سفيان..
زهور وهي تشبح للينا من فوق لتحت:مبروك..
لينا بإبتسامه:الله يبارك فيك..
رنده:ماتبي شي..
نوريه:وشن مازال تبي بعد خدت عدنان..
ولفت ومشت ...
لينا تبعتها بعيونها اللي كانت مضيقتهم وهي مبتسمه..
بعدين شبحت لرنده وقالت:لامشكورة..
هزت رنده ومشت وعفاف ساوت للينا الفيلو بعدين لحقت خواتها...
منى:الفيلو متاعك تحفه..
لينا:تسلمي..
ابتسمت منى بعدين التفتت لزهور واشرتلها بعيونها بش يمشوا..
شبحت زهور للينا شويه بعدين مشت..
زهور:ماارتحتلهاش..
منى:بالعكس مريحه هلبه وحلوة هلبه اول مرة نشوف وحده سمرا جميله زيها..
زهور:نحس فيها مكياج بس..
منى:لالا مش مكياج نقشها باين قباله سبحان الخالق..
زهور مطت شواربها بملل وقعدت ساكته..
..........
ورده:حمواتها يخوفوا..
نجمه:بالذات الكبيره شكلها جاياتها ايام سماح..
وردة ضحكت...
🏵🏵🏵🏵🏵
وبدت الحفله...
وكانت اجوائها زي اي حفلة عرس الاجواء المعتاده..
بس لينا كانت طول الوقت تراقب في حمواتها وسلفاتها..
كانت تبي تعرف وضعهم ونظامهم اللي كان حيبان ولو شوي..
لاحظت ان السلفات وين مالحموات وين ماهما..
ولفتت انتباهها نوريه حست انها شخصية صعبه ومتسلطه..
بس الباقي كانوا يبانوا عاديين مالاحظت عليهم شي...
وكانت وين تجي عينها في عين عزوزتها تلقاها تبتسملها وهالشي كان يريح فيها شويه...
••"رنده"
رنده:هلا اساور..
اساور"بنت ربيعه":صراحه قنبله مرت عدنان صح سمراء لكن فاتنه..
رنده ابتسمت مجامله وقالت:ايه الله يبارك عليها..
اساور بإبتسامه:الله يبارك..احمم بنسألك رنده..
رنده:اسألي..
عقدت حواجبها وقالت:سفيان ماحضرش العرس بكل..
التفتت زهور وشبحتلها بحده..
رنده:ايه المؤتمر اللي مشاله مهم ماقدرش يفوته وعدنان عطاه الاذن..
تنهدت بنت عمتها وقالت:يروح سالم ان شاءالله..
شبحتلها رنده بريبه وقالت:ان شاء الله...
وعيون زهور مازالت تشوف لأساور بنظرات غيره حاده...
🏵🏵🏵🏵
في دار العروس..
كانت لينا واقفه تهدرز مع نساوين خوتها..
وردة: ايه بكري اتصلوا بيا ينشدوا..
لينا بإبتسامه رجاء:مانوصيكنش ع امي يابنات هي توا بروحها ديرنها كيف امكن..
ورده:ماتخافيش لينا عمتي في عيونه..
نجمه:ونا كل مانحصل فرصه نزورها...
لينا هزت راسها وهي مبتسمه..
ع خشة خوات عدنان...
لينا شافت وحده فيهم ماعرفتهاش..
مدت يدها وقالت؛اني رتيل اخت عدنان الصغيره..
رنده:ودلوعته راهو ردي بالك..
ابتسمت لينا وصافحت وقالت:حتى نا كيفك اصغر وحده ودلوعة هلي..
شبحوا البنات لبعض..
رتيل:امم..اسمك لينا..ضحكت وقالت..عدنان ولينا...
ضحكت لينا ضحكة خفيفه..
رتيل:غير عاد لينا هديكا مش سمرا...
كلهم شبحوا للينا..
لينا بدت شويه شويه تتوضحلها الصورة واكثر شي بدي واضح هلبه بالنسبه ليها انها الكنه الغير مرغوب فيها..
حاولت تتماسك..وتبان عاديه ماكانتش تبيهم يلاحظوا عليها ان كلامهم يأثر فيها..
ابتسمت وهي قالت:فأما سنه في المدرسه..
رتيل؛تانيه اعدادي..
لينا وهي مبتسمه:اممم..
عفاف:في عندنا صغار بيهبلوا بس يشوفوك تو لما نروحوا تشبحيهم..
نوريه:اني مسافره الايام الجايه وبنخلي صغاري في حوش بوي وتي روحك من توا بش تتهمي بيهم وبماكلتهم وشرابهم ولبسهم وقرايتهم..
نساوين خوتها قعدوا يشبحوا لنوريه بإندهاش..
لينا ابتسمت وقالت؛مافيش مشكله دامك مش معاهم نحطوهم في عيوننا..
رفعت نوريه حاجبها وهي تفكر في قصد لينا من ردها..
وكذلك خواتها...
ولينا تشوف لنوريه بإبتسامه مستفزة بالنسبه لنوريه..
فجأة رن تليفون رنده..شافت الشاشه وقالت:عدنان هدا..شبحتلهم وقالت..معليشي لو تطلعوا..
ورده ونجمه سلموا ع لينا وباركولها بعدين مشوا طلعوا..
شويه وخش عدنان..
لما شاف لينا ابتسم وقال:شكولينا..
خواتها قعدوا يشبحوله كيف جاها وشد يدها زقعد فخصله شعرها وهو يقول:شن جو..
لينا بإبتسامه:تمام..
التفت لخواته وقال:هي بنطلعوا...
رنده؛لبسها كابها..
عدنان قعد يدور بعيونه ويقول:وينه..
لينا:اهو يالاي من هنى.
شبح وين مااشرتله لينا..ابتسم وخداه وبدي يلبس فيها..
وخواته يراقبوا فيهم..
كانت نظرات عيونه ليها تبين انه متيم بيها..
وهي طول الوقت كانت منزله عيونها متحشمه منه وقدام حمواتها..
عدنان:هي خلاص كملنا..شبح لخواته وقال:وسعوا...
وخروا ومشوا طلعوا وهما مضايقات اول مرة يشوفوا واحد من خوتهم يهتم بمرته لهالدرجه وقدامهم..
🏵طلع عدنان مرته..
وركبها السيارة...بعدين ركب هو...
عدنان:الجو تمام..
لينا:تمام...
عدنان:لينا ارفعي الكاب شويه السيارة مظلمه..
هي رفعت الكاب لين بان وجهها..
عدنان قعدت يشبح لعيونها وهويقول:عافيه يالينا..
لينا بضحكه:الحمد لله هلبه هلبه..
عدنان قعد يضحك وهي تضحك معاه...بعدين شغل السيارة وتحرك..
••في الطريق..
عدنان:ياستي حني 3ولاد واربعه بنات..
اكبرنا سفيان استاذ في الجامعه وعمره 36 سنه..
بعده ع طول نوريه خريجة لغة عربيه وعمرها 34 سنه متزوجه وعندها ولدين وبنت..
بعدهم عفاف عمرها 32 خريجة حاسب متزوجه وعندها 3بنات..
يجي بعدها مروان اللي استقلبنا في المطار هدا دكتور عمره31عام...
وبعده يجي عدنان احسن واحد فيهم كلهم سموح وقلبه طيب وعمره 27عام وعسكري والحمد لله اللي جي عسكري بش يتلاقى مع الشكلاطه اللي مقعمزة حداه وقعد وراها لين خداها..
ضحكت لينا..
عدنان بضحكه:بعدين جت رنده تقريبا من عمرك خريجة لغات..ليها 4شهور متزوجه..
ايه وخوتي سفيان ومروان متزوجين ليهم 8شهور تقريبا...
لينا:ماشاء الله ربي يحفظهم كلهم..
عدنان؛ويحفظك لعدنان..
ضحكت لينا وقالت:امين..
🏵🏵🏵🏵🏵
ووصلوا لحوش العيله...
دخل عدنان لينا لحناه زبيده بش تسلم عليها..كان سلام زبيده بارد وعدنان لاحظها بس لينا دارت روحها عاديه ماتبيش عدنان يتكدر...
والصغار كذلك دارو عليها دورة وهما يتفرجوا عليها...
وعدنان يعرف فيها عليهم..
شويه وركبوها شقتها...
وهو طلع بش بيديروله المولد...
🍀🍀🍀🍀🍀🍀🍀
المانيا..
العاصمه برلين..
مقعمز في فيرندا لغرفه من غرف احد الفنادق..
شاد في يده التليفون يتفرج ع البث المباشر اللي دايره مروان للمولد متاع عدنان..
كانت ابتسامته ع وجهه وهو يتفرج عليه ...
اذكر المولد متاعه في عرسه كيف كان عدنان واقف ع يمينه
وفرحته بيه كبيره...
غرقوا الدموع عيونه...مسحهم قبل ماينزلوا..
بعدين ناض وخش داخل...
🏵🏵🏵🏵🏵
الساعه 2:30ليلا..
في الكوجينه مقعمزات ياكلوا..
نوريه:اساور اعع والله هديكا ارحم ..
رنده:قاعده لتوا حاطه عينها عليه..
نوريه:تحط عينها ولا ايديها هو ولاحاسبها خالقه..
رنده ضحكت بعدين قالت:هو مروح غدوة..
نوريه:دارها بعينها..
رنده رفعت حواجبها ونزلتهم..
نوريه:تعرفي العبده هادي مش هوينه..
رنده؛حتى اني لاحظتها..
نوريه:مش مشكله كان عندها ظوافر نقصوهم..
ضحكت رنده...
🏵🏵🏵🏵
تاني يوم...
الساعه 10:00صباحا..
في الطريق..
مروان:ايه جو كلهم..
سفيان :والحاج زيدان وولده؟
مروان:جو هو بس ولده لا رافع مرته لتونس مريضه..
سفيان؛اممم..
مروان:سفيان..
سفيان؛امم..
مروان؛توا كان تلاقيت انت وعدنان باركله..
سفيان ابتسم ع جنب:تي اني بمشيله بروحي نباركله وجايبله معاي هديه..
مروان شبحله بعدين شبح القدام وقال:جديات..
سفيان هز راسه وقال؛جديات..
🏵🏵🏵🏵
"وتيتي الشنطه"
لينا وهي تمشط في شعرها:من بدري..
ضحك عدنان وقال:كويس...بعدين قعد يلبس في ساعته ومرة مرة يشوفلها وهي تمشط في شعرها...
هي انتبهت عليه وقالت:بنقولك ع حاجه من تو بيش ماتقولش بعدين انخدعت ولاغشتيني..
عدنان عقد حواجبه وهو يقول بضحكه:يالطيف..
التفتت لينا وقالت:شعري مش هكي راهو اصله مكركد وطويل غير الله يسامحها اللي فبالي قعدت تزن عليا لين خلتني حطيت هداكا الحساب ع البروتين..
عدنان حط ايديه فجيوبه وقال:ياريت كنت نكلم فيك وقتها راهو قتلك ماتغيري في روحك شي نبيك كيف ماانتي..
ضحكت لينا بخجل..
هو ابتسم بعدين صفق بيده وقال:هيا سقدي نبي ندهور بيك في طرابلس قبل نمشوا المطار..
لينا :حاضر...
هو مشي طلع من حداها...
وهي لمت شعرها فوق ..بعدين خدت وشاحها وشنطتها وطلعت..
............
نزل من السيارة ومشي للسيارة من الخلف..
حط الشنطه ع الكوفني...فتحها بعدين طلع منها حاجه ورجع سرتها بعدين قال...دخلها مروان...
مروان وهو يشوف للي فيده قاله:باهي..
مشي سفيان بإتجاه دروج شقة عدنان..
مروان:سفيان.
وقف وشبحلها..
مروان غمض عيونه بعدين فتحهم...
"وكانه يقول مادير شي يضايق خوك"
فهم عليه سفيان...ابتسم بعدين مشي كمل طريقه...
ركب الدروج....
وصل في الشقه...
ساوا نظارته وخدي نفس...بعدين طق الباب...
🏵داخل..
عدنان كان يدور ع الحوش ويسكر في الميه والضي..
ولينا واقفه قدام مراية المدخل تكتب في رساله لأختها..
فجأة طق الباب..
استغربت..
عدنان:هادي اكيده رتيل بتعطيني القائمه متاعها..افتحي لينا..
لينا:حاضر..
مشت لينا للباب وفتحاته...
هو كان منزل عيونها لوطا قامهم وشافها كيف ادرقت..
ابتسم بتهكم..
لينا:عدنان..
طلعلها وقال:خيرك مني..
لينا بهمس :مش عارفه..
هو عقد حواجبه بإستغراب وقدم وهي انسحبت ومشت خشت للكوجينه..
فتح عدنان الباب لقي سفيان واقف قدامه وهو مبتسم..
سفيان؛صباحيه مباركه ياعريس..
ارتخت ملامح وجه عدنان وارتسمت عليه ابتسامه حلوة..
وقدم لخوه وضمه..
وسفيان ضمه بيد وحده وهو يضحك...
بعدين بعد عدنان شويه وكب ع راس خوه..
سفيان طبطب ع ظهرها وقال:مبارك..مبارك..
عدنان بإبتسامه وعيونه مليانات دموع:الله يبارك فيك..
تعالى خش..
سفيان مرر نظره عليه وقال:كأنك بتطلع..
عدنان:مش مستعجل..خش..
سفيان هز راسه وخش..وخوه وراه وسكر الباب..
سفيان:حاجه بسيطه..ومدله الهديه..
خداها عدنان وقال:جيتك بروحها هديه..
ابتسم سفيان..
عدنان؛خش داخل خش..
سفيان هز راسه وتوجه لداخل الحوش..
اما عدنان خش للكوجينه وقال:هدا خوي الكبير سفيان كان مسافر واليوم روح..
لينا:الحمد لله ع سلامته..
عدنان:الله يسلمك..حط الهديه ع الرخامه وقال:صبي عصير وحطي من #شكولينا..
ابتسمت لينا وقالت؛حاضر..
طلع عدنان..
ولينا بدت تجهز في اللي قاللها عليه ...
وعيونها ع الهديه كان عندها فضول تشوف شن هي..
كملت تجهيز السفره وخدتها طلعت بيها...
وصلت في وسط الحوش وقالت:السلام عليكم..
سفيان حط رجل ع رجل ورفع حاجبه وعيونه في الأرض قال:وعليكم السلام..
ناض عدنان خدي منها الصفره وجي بيها لخوه وقال:تفضل..
خدي سفيان طاسه العصير...ومعاها طرف شكولاته..
حط عدنان السفرة وقعمز...
سفيان:مسافرين قال مروان...
عدنان:ايه بعد ساعتين..
نزل سفيان رجله ورد طاسة العصير والشكولاته للسفرة وهو يقول:قالوا نويت فرنسا..
عدنان شبح للحركه اللي دارها وشبح للينا لقاها منتبهة عليه شن دار..
رجع شافله وقال:ايه..
حط رجل ع رجل وقال:حلوة فرنسا..ماشي حالها..
لينا لفت ومشت للكوجينه وهي مضايقه..
وعدنان تبدلت ملامح وجهه للجديه بعدين قال:انت شن درت في ألمانيا..
سفيان:مؤتمر ومحاضرات وندوات هامشيه..لكن جديات استفدت هلبه..
عدنان:كان طلعت البعثه متاعك راك توا قاعد غادي تقرا..
ابتسم ع جنب وقال:قدر الله وماشاء فعل..
في الكوجينه..
لينا اللي كانت قاعده مضايقه هلبه ...
عيونها كانوا ع الهديه قدمتلها وبدت تحول في غلافها..
بعد حولاته لقتها علبة شكلاطه غاليه التسعيره متاعها قاعده عليها..
حست ان الحركه مقصوده...
تنهدت بضيق وقالت بهمس:واضح كلهم مايبوك يالينا..غمضت عيونها وقالت..كون معاي ياربي...
🏵🏵🏵🏵
في كوجينة حوش العيله...
كانوا الكناين يحوسوا ع الفطور..
زهور:حني حتى لبده ماطقينا فيها وهي بتمشي لفرنسا..
منى:بختها وحظها طاحت في راجل رايه من راسه..
زهور:لاطاحت في راجل يحبها حق..
منى شبحتلها وهي تفكر في كلمتها بعدين قالت:عندك حق..
••وع بعد مسافه منهم في دار التقعميز..
نوريه؛يام هكي مايجيش حتى التانيات يتمردوا بعدين..
وجيهه:خليه توا يدير مايبي بعدين نتصرف..
رنده:طلوع وخدمه..وغدوة ادير السيارة هكي مش حتقدري عليها ولاعلى غيرها بعدين..
وجيهه قعدت تاكل وهي ساكته...
والبنات يشبحوا لبعض ويشبحولها..
••في الكوجينه...
زهور:بالله مدي الحليب..
منى مدت باكو الحليب لزهور...
"زهور"
من فجعتها قريب طاح باكو الحليب من يدها ضحكت وقال:سفيان ولا ضبح عليا!..
منى بضحكه:ايه ياحنه اطلعيله..
بدون وعي منها طلعت تجري بباكو الحليب..
منى فنصت وقالت:زهور..الحليب..زهور..
وزهور ماتسمع في شي طلعت للجنان لقاته واقف يراجي فيها..
لما طلعتلها وشاف شكلها بباكو حليب رفع حواجبه وعيونه يشبحولها من ورا النظارات..
زهور بلهفه:حمد لله ع سلامتك.
حول نظاراته وقال:الله يسلمك..خشي كملي اللي كنتي اديري فيه واركبي وتيلي البدله العربيه وشوفي الشنطه متاع حوايجي..
زهور هزت راسها وقالت:حاضر..
هو لف ومشي..
وهي قعدت واقفه في مكانها نشبحله لين ادرق..
تنهدت من قلبها..بعدين ولت خشت داخل...
فهالوقت...
نزلوا عدنان ولينا من شقتهم متوجهين لباب الكوجينه الخلفي..
لينا:ماشاء الله الجنان سمح واجد وزارعين فيه حاجات واجده..
سفيان:بوي يحب الخضرة هلبه..هو اكثر من يهتم بيها وياويل اللي يقطع ولايكسر منهم حاجه..ياما صار بينه وبين صغار خواتي ع خاطرهم..
ضحكت لينا..
وصلوا في باب الكوجينه..
عدنان:تبي تخشي ولانادي على امي تجي هني..
لينا حست بصدرها ضاق...
هي ماتبيش تخش..في نفس الوقت ماتقدرش تقعد برا وتراجي عزوزتها تجيها لحد عندها..
بس اختارت تثبت لعدنان حسن نيتها لما قالت:تو نخش..
ابتسم وقال:خشي..
بلعت ريقها ومشت للباب وخشت...
شافت منى وزهور في الكوجينه حاصلات في ماعين الفطور..
بعد مامررت نظرها ع الكوجينه شبحتلهم وقالت:صباح الخير..
هما الزوز شبحولها وقالوا:صباح النور..
لينا:احمم..كيف حالكم..
زهور ومنى بأصوات متقطعه:الحمد لله..
منى:مبارك عليكم..ربي يهنيكم دوم ان شاء الله..
لينا:تسلمي..
زهور:مبروك..
لينا:الله يبارك فيك..معليشي نبي نخش داخل نسلم عليهم..
منى:تعالي..
خشت لينا ومشت مع منى..
وزهور تشبحلها بنظرات امتعاض..
منى:هونا الدار هديكا كلهم فيها.
لينا:مشكورة..
ومشت للدار وقلبها يدق بقوة وهي تسمع في
أصوات هدرزتهم..
فجأة طلعت قدامها رنا بنت عفاف اللي كانت ادب ع رجليها..
لما شافتها لينا ابتسمت وهي تقول:الله يبارك..
البنت جت قدامها ورفعت ايديها..
ضحكت لينا وقالت:شن تبي ياسمحه..طبست خدتها وقامتها..
ع جية اختها التانيه وين شافت لينا قايمه اختها مشت تجري للدار..
خشتلها وهي تقول:العروسه طابه رنا ...
سمعتها لينا ضحكت ومشت بيها للدار...
وين وصلت فيها لقت عدنان مقعمز داخل يشوفلها بإبتسامه..
قلبها اللي كان يرف بخوف رجع لوضعه الطبيعي..
لينا:صباح الخير..
وجيهه:صباح النور..
عفاف:صباح الخيرات...هي جاتك ولاانتي خديتيها..
لينا بإبتسامه:هي جتني وقامت ايديها..
عفاف بضحكه:شكلها حباتك..
لينا:سلمها يارب هالعسل..ربي يحفظها..
عفاف :تسلمي..
ووجيهه مركزة ع ولدها كيف يتأمل فيها وناسي روحه..
بعدين شبحتلها وقالت:تعالي قعمزي..
مشت لينا قعمزت حدا عزوزتها..
••في دار رتيل..
نوريه وهي نكتب في الورقه؛ايه وكريمات مرطبه...
رنده بضحكه:الورقه تعبت من الجيهتين..
نوريه:خل تتعبى حلوة والله العبده هادي اللي حتى طرابلس كانت تسمع بيها سمع بتحط في فرنسا توا وتبيها تبرطع بروحها..
رنده بضحكه:صدقتي..
مدت نوريه الورقه لرتيل وقالت:اعطيهالها هي مش هو..
رتيل خدت الورقه وقالت؛باهي...
🏵🏵🏵🏵
فم باب الكوجينه..
وجيهه:ولدي اشحط روحك شويه..
عدنان:باهي جيبيلي المفتاح الانجليزي..
وجيهه شبحتله بآمتعاض..
هو ضحك بعدين نادى:لينا...
داخل...
رتيل:كان ماجبتوا منهم شي بنقول انتي ماخلتيشي..
لينا:وتحطي ذنبي في رقبتك عادي..
رتيل قعدت تشبحلها وهي ساكته..
ضحكت لينا وقالت؛ماتخافي مانيش ساحرة شريرة راني...سلام...
ومشت خشت للكوجينه ورتيل تشبحلها وهي تقول:عطيها دي ساحره من غير سحر..محلاها..
في الكوجينه..
لينا؛توصن ع حاجه..
زهور:لاصحيتي..
منى:صحيتي..
لينا بضحكه ؛غير قولن شن تبن الاخرين مش خير منكن في شي..اشرت بيدها اللي فيها ورقة القائمه..
منى ضحكت وقالت؛باهي جيبلي عطر**** خاطري فيه..
لينا:****..خلاص حفظته في راسي..وانتي..
زهور؛قتلك مانبيش صحيتي..
لينا بضحكه:تو نجيبلك حاجه ع ذوقي ان شاء الله تعجبك..هي بالسلامه توا نشوفكن ع خير..
منى:توصلوا سالمين بالسلامه..
زهور وهي تشبح للينا من فوق لتحت:بالسلامه...
طلعت لينا برا...
الزوز قدموا يشوفولهم من الروشن..
لقوها تسلم ع وجيهه بعدين راجلها خداها من يدها ومشوا..
ووجيهه جت خاشه..
كل وحده فيهم بسرعه ولت للي دير فيه..
خشت وجيهه ومشت طلعت من الباب التاني..
زهور بغيظ:ااخ بس اااخ..ناس ليها فرنسا وناس ليها كوجينة وجيهه ..
منى:اللي ماعنده حظ لايتعب ولايشقى...

صلُّو على محمد …

يتبع …
الفصول الاربعة