#شكولينا
#الجزء_السادس_والخمسين1
#الجمان_الفريد
كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
واقف بالسيارة وهو يدربك ع الدومان ويغني ويصفق بصوابعه..
شويه وطلعت من حوش بوها ...
وجت للسيارة وركبتها...
محمد؛نورتي ياقلب قلب قلبي انتي...الشيخ والشهود يراجو فينا ياحلو..
رنده بصدمه:ماليا تبروا مني قبل لنطلع..
محمد؛ولايهمك ياقلبي من اليوم وبرا غادي اني عيلتك اني كل شي ليك اني وبنتا..صديقني يارنده بعد نطلعوا من البلاد حنرتاحوا..وحنعيشوا عيشه ولافي الأحلام ياعمري..ووعد مني نعوضك عن كل شي وانسيك اللي جاك مني والله نسيهولك كله رنودتي..
وشغل السيارة وشد يدها بعدين قال:نموت فيك ياعمري..انتي لينا اني وبس...وتحرك بالسيارة...
كان طول الطريق يغني وطارب..وهي تشبح للطريق بعدم استيعاب مش مصدقه شي من اللي صار..
كيف استسلمت فيسع..
كيف ع خاطر بنتها انجبرت تولي لراجل طعن في شرفها وماخلا مادار معاها وقال فيها...
كيف ضحت بعلاقتها مع عيلتها وحرمت روحها منهم لأخر العمر..
مش مصدقه روحها شن دارت في عمرها..مش مصدقه..
شويه ووقفت السيارة..
محمد:هي انزلي حياتي..
شبحت من الروشن هو وين واقف...فتحت الباب ونزلت..
محمد جاها وهويقول:نفس الفندق ياحياتي وهالمرة حنخشوله خشة غير عن اللي فاتت..
قعدت تشبحله بنفس النظرات..
وهو خدي يدها وقال:هيا ياعمري الشيخ والشهود يراجو..
ومشي وهي مشت معاه منساقه..
زي الحمل اللي يرفعوا فيه للذبح وهو مسلم ومستسلم..
خش هو وياها للفندق..
وطول مشوا للأصنصير..
ركبوا فيه ورفعهم للدور اللي فيه الغرفه..
طلع منه وهو جابدها معاه..
لين وصلوا للغرفه...
فتحها وخش بيها وسكر الباب بعدين طلق يدها ومشي وقف في نص الغرفه وقعد يشبحلها..
وهي قعدت تمشيله بخطوات منساقه انسياق وكأنها تمشي من غير اراده...
لين وصلت فيه...مررت نظرها ع الغرفه وقالت..
رنده:وين الشيخ والشهود؟
هو قعد يشبحلها بإبتسامه..
رنده:الشيخ والشهود وين!؟؟
حطت ايديه في نصه وقعد يشبحلها بنفس الإبتسامه..
هي انقلبت ملامح وجهها للصدمه وقعدت تقول:اني شن درت في عمري.....شن درتي..حي عليا اني الحمارة الغبيه..!
وهو بدي يقرب منها..
ورنده واقفه في مكانها وتردد في نفس الكلام..
لين وصل وكان حيتمكن منها زي مايتمكن الوحش البري من فريسته...
☄فتحت عيونها وشقهت شهقه..
اشبه بشهقه الغريق بعد مايرجع من ع حافة الموت للحياه..
مررت عيونها حواليها...
ايه هدا سقف دارها هي واختها...وريحة التطييب متاعها..
ناضت قعمزت ...وخدت نفس عميق...
صوت عياط بنت خوها..
ضيقت عيونها وهي تركز في السمع بش تتأكد منه...فعلا
كان صوت عياطها..
نزلت من السرير ومشت طلعت من الدار..
شبحت لدار التقعميز لقتها مسكره والصوت جاي منها..
شبحت القدام وقعدت تمشي شافت مرت خوها واقفه حاطه ايديها ع وذانها ومغمضه عيونها..
وفي جنبها مرت خوها التانيه واختها....
هي غمضت عيونها بعدين فتحتهم وقالت:يحجموا فيها؟
منى هزت راسها بإيجاب..
تنهدت رنده بعدين مشت للكوجينه تشوف غداها..
تبعتها بعيونها اختها الصغير..بعدين رجعت شافت للينا اللي تقول..
لينا بنفس الوضعيه:امتى تكمل هدي..
رتيل:نزلي ايديك لينا خلاص ياسيمين سكتت..
لينا فتحت عيونها ونزلت ايديها ومشت للدار وهي خايفه فتحتها وخشت..
رتيل:حتى اني نفكر نحجم..
منى:خليها يوم تاني تكوني صايمه عالريق خير..
رتيل هزت راسها وهي ساكته...
🍁🍁🍁🍁
"صايم"
سفيان:ايه صايم ع خاطر الحجامه..
انس :اها بالشفاء ان شاء الله..
سفيان:ان شاء الله..حط ايديه ع عيونه مسحهم ونزل بيهم وهما مطبقات ع بعض ع انفه وفمه..
بعدين حط وحده منهم ع فخده والتانيه ع الطاوله وقال:انس اني اليوم جاي..نشكرك جزيل الشكر ع اللي درته معانا بتوا صح هو واجبك بس تستحق الشكر..
ضيق عيونه بإستغراب وقاطعه يقول:مافهمتش؟
هز سفيان راسه وقال:نفهمك..خلاص لعند هني..
انس:رد بالك تقولي بتسحب الدعوه اني من قبل قلت القضيه اللي ناخدها نكمل فيها للأخر..
سفيان:لا مش حتسحب الدعوة..حنلغوا الوكاله..
ارتسمت ع وجه انس ملامح الصدمه..
سفيان:عن نفسي شفتك درت جهدك وزياده..لكن رنده عندها نظرة تانيه...قالت قضيه زي قضيتي تبي مراة نعرف نتفاهم اني وياها..
ابتسم انس ابتسامه صدمه وقال تهكما:بعد قريب سته شهور جايه تقول هكي!
سفيان تنهد وقعد ساكت هو محرج منه ومش عارف شت يقوله من مبرر اذا كان هو نفسه مش مقتنع..
انس:راهو ياسفيان اني معاش قبلت ولاقضيه مع قضية اختك قعدت متفرغ ليها هي وبس ونجري عليها في جري اقسم بالله ماصار في اي قضية تانيه ماسكها..
يعني فهمني..هي بعد الجلسه السريه تحسابهم بيحكموا لصالحه ولاتحساب اني معاش عندي شي نديره.!! لو كنت ساكت ع اللي ندير فيه لسبب واحد مانبيش اللي ندير فيه يطلع لحد او يسمع بيه حد لين يجي موعد الجلسه الجايه ونحطه قدام القاضي..
سفيان:انس اني اسف جدا..بس من رأيي الأفضل توكل محاميه مايكونش في بيناتهم حواجز وتقدر تتواصل معاها امتى ماتبي..
انس:الكلام اللي قلته كله مالاش اهميه عندك ياسفيان!؟
سفيان:ابدا مش هدا القصد بس الموضوع محسوم اصرارها شديد ع انها تغيرك وحتى لقتها المحاميه اللي بتسلمها القضيه..اني جيتك اليوم بش نعطيك اتعابك تامه...وطلع ظرف فلوس معبي وحطه ع الطاوله..
انس قعد يشبح لظرف الفلوس وعيونه تعبوا الدموع بعدين شبح لسفيان وقال:مافيش مرة صارت معاي الحاجه هادي مافي حد وكلني محامي ليه وغيرته..مافيش قضيه خسرتها لتوا...اللي دراته معاي اختك مايعوضه شي..
سفيان بضيق:تبي نزيدك مافيش مشكله...
شبحله انس شويه بعدين خدي ظرف الفلوس وناض من ورا مكتبه ومش لسفيان ومد يده..
سفيان ناض وصافحه وهو يقول:متأسف جدا..
هوابتسم بأسف وهز راسه..بعد طلق يد سفيان وشدها من ظهرها وهي مبسوطه وحط فيها ظرف الفلوس وقال...اني ماناخدش فلوس قضيه ماكلمتهاش... طلق يد سفيان وقال...من هي المحاميه اللي بتوكلوها!؟
سفيان شد ظرف الفلوس بقوة وهو يحاول يكتم عصبيته وقال:نجاح الوداني..
رفع حواجبه وقال:كويس..نجاح ممتازة واقدم مني...عقد حواجبه وهز راسه وقال:موفقين ان شاء الله..ربي سمعني عنكم كل خير..
سفيان:واياك..السلام عليكم...ومشي سفيان طلع..
وانس وهو واقف في مكانه ويشبح في الفراغ ودموعه في عيونه رد..وعليكم السلام...
قعد واقف لحظات يفكر..
بعدين مشي ورا مكتبه..خدي تليفونه التاني الخاص..وبدي يكتب في رقم رنده واتصل بيها...
نادي لين فصل ومارد حد...
ضم شواربه لداخل بغضب وبلع ريقه وكأنه يمنع في دموعه من النزول..وعاود اتصل بيها..نفس الشي نادى ومارد حد..
لوح التليفون ع المكتب..بعدين غمض عيونه ومسح ع وجهه بعصبيه..فتح عيونه..وقعمز الكرسي...
قام سماعة التليفون واتصل برقم معين..
انس:قهوة مرة.......وسكر السماعه...
بعدين اتكى بمرفقه ع يد الكرسي وحط سبابته في فمه وقعد يعض فيه بغيظ وقلبه يوجع فيه...هلبه..
هلبه....
🍁🍁🍁🍁🍁
الساعه 4:30عصرا..
"خود اشربها كلها"
خدي سفيان طاسة العصير وقال:ليا سنين ندير فيها غلط..
لينا:ايه الحجامه صح ع الريق..ابن القيم قال..الحجامه ع الريق دواء..وعلى شبع داء..
سفيان؛مزبوط..صحتي كل يوم لتالي مع الضغط النفسي اللي زاد الهم ع الهم استغفر الله وخلاص..وبدي يشرب في عصير العنب ولينا تشبحله بعد كملها قالت..
لينا؛ماكلمكش صاحبك؟
سفيان؛لا....بس جديات الموقف قاعد مضايقني لتوا..الراجل عنده حق قاعد يخدم ويجري ع القضيه وماقصرش بكل وفجأة نسحبوها منه..والله لولا البكاوات اللي دارتهم امس ماخليتها تغيره بكل..
لينا تنهدت وهزت راسها وهي تقوله:ان شاء الله خير..
سفيان:ان شاء الله..
لينا؛خليك ماتحركش من مكانك لين نجيبلك غداك..
وناضت ومشت طلعت..
وخلاته مقعمز مع نفسه ويفكر..قطع عليه تفكيره الاتصال اللي جاه..
خدي التليفون من ع الكامدينو شاف المتصل فتح الخط وقال..
سفيان:ايوه مروان..
بصوت باين فيه الخوف
"سفيان انت وين"
سفيان بقلق:في الحوش..شن فيه!؟
"اختك عفاف جابوها بكري مغمى عليها صايرلها انسداد في واحد من الشرايين وتوا يديرولها في قسطرة"
سفيان من الصدمه جي واقف وقال:شن تقول انت!!؟
"ماقدرتش نبلغكم اول ماجابوها لهيت بيها.."
سفيان:جاي جاي..وسكر عليه..
ومشي خدي السوريه متاعه وقعد يلبس فيها..
ع خشة لينا فيدها سفرة الغدي قالت:شن قتلك نا؟
سفيان وهو يبطم في سوريته:عفاف في المستشفى يديرولها في قسطره..
لينا بصدمه:لاحول ولاقوة الابالله...اسمع راجي راجي خل نلبس عبايتي ونجي معاك..
سفيان خدي تليفونه ومفاتيحه وقال:خفي روحك..
طلعت لينا تجري..
وهو مشي خدي فلوس من الدولاب بعدين طلع من الدار..
شاف لينا ماشيه بإتجاه المدخل بتلبس شاربها..
لبستها ولبست في رجليها..
لبسوا كنادرهم مع بعض...
بعدين فتح سفيان الباب وطلع ولينا وراه وسكرت الباب..
لينا عطاته تفاحه وقالت:هاك كول هدي بش تقيم روحك وتعرف تسوق .
خداها سفيان وقعد ياكل فيها بعصيبه وهو نازل ولينا معاه.
لين وصلوا في السيارة وركبوا..
شغل السيارة...وتحرك طول..
في الطريق..
سفيان:ليها فترة مش عاجبتني بس مشكله رنده لهتني عنها..
لينا:ربي يهديها حتى هي هامله روحها قولنالها عدي عايني لكن مابتش تسمع الكلام..
سفيان بغضب:والحمار اللي واخداته شن فايدته..ياخدها من يدها غصب عنها ويرفعها يعاينها ..خبط الدومان وقال...ااخ..بس..اااخ..
لينا:سفيان هدي وركز في السواقه..وهاك اشرب بيش تقيم روحك وجهك اصفر..
سفيان:مانبي شي يالينا ماعندي نية في شي..
لينا:مش بالنيه هي راك النهار كله ودرت حجامه ماتوصل للمستشفى الا وانت مغمى عليك ماشي بتشوف اختك ولابطيح معاها!
خدي من لينة باكو العصير وقعد يشرب..
ولينا قعدت تشبحله وهو يشرب وع وجهها ملامح القلق..
🍁🍁
وصلوا للمستشفى...
وخشوا بسرعه هو وياها...لاقاهم مروان...
سفيان وهو يمشي:شن صار فيها
مروان وهو ماشي معاه :الحمد لله العمليه مشت امورها اساسا هي عمليه بسيطه..
سفيان؛شن هو الانسداد.اللي يصير في مراة قاعده مافاتتش نص الثلاتينات!
مروان:انسداد الشرايين ليه علاقه بالنفسيه..
هز سفيان راسه وقال:عارف اني عارف..
وصلوا للممر اللي يرفع لحجرة عفاف شاف سفيان عبدالصمد مقعمز وحاط راسه بين ايديه..
قدمله بسرعه وقف قدامه وقال:شن درتلها؟
رفع عبدالصمد راسه وعيونه كانوا حمر من البكي..
لينا لما شافاته وجعها..لفت وبعدت عنهم.
سفيان:شن درتلها بش وصلتها لهالحاله..
غير عيونه عنه وشبح جهة غرفتها دموعه نزلوا ومسحهم..
حرك راسه يمين ويسار ورجع حطه بين ايديه..
سفيان وعيونه معبيات دموع:قسما برب العزة لو بعد تفيق تشكي منك ولاتقول دارلي ورب العزة مانخليها تقعد معاك اكثر ماقعدت..
مروان شد ذراع خوه وقال:خلاص سفيان...مش هني
نفض سفيان يد خوه والتفت بيكلمه حست بدوخه سكر عيونه وفتحهم بعدين قال:فيها كيف نشوفها؟
مروان:توا لا..خيرك انت..
سفيان؛شي..وجي بيمشي جهة مرته حس بدوخه اقوى..
شد جبهته بأطرف اصابعه..
مروان:سفيان..
ولينا مشتله تجري..
وصلت فيه وشداته من ذراعه وقالت بقلق:تعال قعمز..
مروان:خيره؟
لينا؛حجم اليوم ع صيام وماكلي شي..
سفيان؛تو نولي باهي..
وقعمز..
مروان:ماشي نجيبلك شن تاكل..ومشي..
ولينا قعمزت حدا راجلها خدت يده وقعدت تمسح عليها وهي تقول:هدي حبيبي واذكر الله..
سفيان:لاإله إلاالله..
لينا قعدت تمسح ع يده وهي ساكته..وهو قعد يشبح في الفراغ ويفكر ودموعه في عيونه..
ولينا تشبحله بحزن..
ع جية نوريه تجري ووراها حسين.
حسين لما شاف مرت سفيان وقف بعيد..
ونوريه وهي تبكي وصلت فيهم وقالت؛خشتيولها..
سفيان شبح لنوريه وقال:مازال..
نوريه:كيف صار فيها هكي قولي!؟
سفيان شبح لعبدالصمد بكره..
ونوريه التفتت شبحتله بحقد وقالت:يابخوت عفاف ورنده بخوت سود..
ولينا تشبح لعبدالصمد..حساته مظلوم وظالم في نفس الوقت..
حالته اللي هو فيها تأكد شدة حبه لعفاف..
بس حقده ع اهلها ولؤم طباعه هما اللي خلوه ظالم وصلها لهالحاله...
🍁جابوا لسفيان ماياكل وقعدت تغصب فيه غصب لين كمل..
ونوريه سقدت حسين وقعدت تراجي في اختها امتى تفيق بش تخش تشوفها..
ومروان خبر مرته..وهي وصلت الخبر لرنده اللي انصدمت وقريب ماتت من الخوف ع اختها...بلغت امها بالشويه بالشويه باللي صار بس مع الاسف رعشت وجيهه هلبه ومن الرعشه فقدت الوعي...وبهكي سمع حتى الشريف اللي كان اقوى في تحمل الخبر ..
بعد مافيقوا وجيهه مشت هي وراجلها للمستشفى..
ولما وصلوا في الممر اللي فيه حجرة عفاف..
الشريف لما شاف عبد الصمد فقد اعصابه ومشاله طول جبده من سوريه ونهضه وهو يقول:شن درت في بنتي..
ولاده جوه شدوه..
وسفيان يقول:بوي صل ع النبي..
مروان؛بوي لاوقته ولامكانه..
وعبدالصمد يشبح للشريف بنظرات ألم غارقه بالدموع...
الشريف طلقه وقال:والله لو نعرف انك سبب في اللي هي فيه معاد تحلم تشوف ظفرها..مش لاقي بناتي في الشارع ياكلاب..مش لاقيهم في الشارع..قال كلامه بغضب وعيونه مليانات دموع ونبرة صوته وضحت فيها بحة البكي..
مشي من قدامه وولاده لحقوه..
ووجيهه مع نوريه ولينا كانت تشبح لعبدالصمد يحقد ودموعها ينزلوا..
اما هو ولى قعمز ورجع لنفس الوضع اللي كان عليه...
🍁🍁🍁🍁
"كيف حالك بابا"
عفاف بتعب:كويسه..
الشريف ودموعه في عيونه:بابا شن اللي جاك..مازلتي صغيره ع امراض هادي يابابا..
عفاف دموعها نزلوا..
مسحت امها ع راسها وقالت بنبرة باكيه:بعيد السو ع بنيتي..
عفاف يدوب ابتسمت لأمها بعدين قالت:بناتي..
الشريف:بناتك في حوشنا خليت خالهم مروان يجيبهم من مدارسهم لحوشنا طول..
عفاف غمضت عيونها وهزت راسها..
ع خشة الممرضه قال:خلاص ياريت تتفضلوا ساد هكي..
هما الزوز شبحولها بعدين قالت وجيهه:هيا ياشريف..
الشريف هز راسه وهو متألم ومشي طلع مع مرته..
والممرضه درت دورة عليها بعدين مشت طلعت...
🍁🍁🍁🍁
"توا نوريه كلمتني قالت خشوا عليها بوي وامي شويه كلموها وكلمتهم.."
رتيل بدموع:الحمد لله ياربي..
ع جية رنا شدت في رجل خالتها وقالت بلهجه طفوليه:همام..
رتيل:باهي ياقلبي..ورفعتها في غمرها ومشت بيها للحمام..
اما رنده مشت ولت للدار وخشتلها بتاخد تليفونها وتمشي تقعمز حدا الصغار..
خداته وطلعت من الدار ومشت قعمزت في دار التقعميز..
كانوا كلهم قدام التلفزيون..
ماعدا بحر كان يلعب هو ورفيده بنت عمته اللي كانت تحب تلعب الصغار هلبه وبحر يحب يلعب معاها..
قعمزت رنده وهي تشبحلهم بعدين شبحت لتليفونها لقت فيه 4مكالمات فائته ورساله..
استغربت وفتحتهم لقتهم من رقم غريب..
بعدين فتحت الرساله..
(عطيني سبب مقنع يخليني نعذرك)
قلبها بدي يدق بقوة...الدقات كانت مؤلمه العيون تعبوا بالدموع..
حست روحها تبي تبكي بس منعت نفسها ع خاطر الصغار.
نزلوا دموعها مسحتهم طول وحذفت رسالته ومسخت مكالمتها..وشبحت للتلفزيون..
جي بين عيونها كل شي صار بينها وبينه من اول مرة شافتها فيه لاخر مرة جاب فيها بنته...
واذكرت كلام طليقته...حست وكأنه ضلوعها طبقوا ع قلبها...
🍁اما هو وصل للحوش..
لما خش لاقاته امه..
فاطمه؛روحت..
انس:ايه شن حالك يام توا..
فاطمه:الحمد لله..وين الصغار مش مفروض اليوم تجيبهم..
انس وهو يحاول يدير روحه عادي قدام امه:حتى غدوة..وجاي بيخش لداره..
فاطمه:نحطلك ماتاكل..
انس:مانبي شي..نبي نرقد بس..
قعدت تشبحله لين ادرق من قدامها بعدين سمعت باب داره انفتح وتسكر..
فاطمه بقلق:اشبح شن صاير معاه مش مزبوط...
🍁وهو بعد خش لدار حط شنطه ع الزيانه وشبحلها..
عيونه جو ع مشبك الشعر متاعها ع هيئة نجمه..
هو عرفه متاعها من شكله يبان مش للأطفال..
مشي قعمز ع الكرسي..وهو يتأمل فيه...
ويذكر في المرة اللي وقف عليها فيها وكلمها...
《 انس:الجلسه مش حنكون فيها انتي وياه بس حتى محاميته مش حتحضر .
رنده...
"مش حتكون معاي!؟"》
اتكى بمرفقه ع الزيانه وحط يده ع عيونه بعدين نزلهم وحطهم ع فمه وعيونه المعبيات دموع على مشبك الشعر..
《 سفيان:ابدا مش هدا القصد بس الموضوع محسوم اصرارها شديد ع انها تغيرك وحتى لقتها المحاميه اللي بتسلمها القضيه》
هو حس وكأنه ماقدرش يحصل ع ثقتها..
حس وكأنها شافاته مش قد انه يحميها ويجيب حقها..
لو انها سحبت الدعوه كان اهو عليه من انها تغيره..
صاباته في مقتل باللي داراته..
ماهماش سمعته كمحامي لامع ديما القضايا اللي ياخدها رابحه لاول مرة يسحبوا منه قضيه ويسلموها لغيره..
همه كله في قلبه اللي اول مرة يعرف الحب...
القلب اللي يبي قرب حبيبه...ويحاول يقصر المسافات بينهم ويكسر الحواجز بكل الوسائل..
اليوم يكتشف ان المسافات زادت طالت...والحواجز زادت بيناتهم وتعلت....
بعد ماولى عايش يراجي في اليوم اللي يجمعه بيها في حوش واحد..
توا كيف حيعيش من غير هالأنتظار اللي برغم صعوبته بس كان حلو بالمرة..
الانتظار اللي خلا عنده شغف بالحياة... كيف حيكمل حياته توا وهو فاقد هالشغف..
من الغضب بسب العجز وخيبة الامل..ضرب بيده شيشة عطره طيحها..وحط سبابته بين سنونه وقعد يعض فيه بغضب وقهر...
☘☘☘☘
ويمروا ثلاثه ايام..
قعدت فيهم عفاف في المستشفى وامها معاها مرافق..
جو زاروها خواتها رتيل ورنده..ومرت خوها منى..
وجتها عزوزتها وحمواتها اللي كانت تكلم فيهم من نفسها وامها ماتبيش تشبحلهم حتى الشبح...
اما راجلها عبدالصمد ماسيبش المستشفى الا سويعات قليله يمشي يشوف فيهم شغله ويوليلها بس ولامرة خش عليها وكلمها..
كان حاس بالخجل..والاحراج..والذنب..
حتى كلمة اسف مايقدرش يقولها من خجله...
وع قد ماشاف من بوها وخوتها في الايام مااهتمش كل همه عفاف اللي قلبه دق دقته الاخيره لما حس روحه بيفقدها..
وجي يوم الخروج...
"بنروح معاكم"
الشريف؛بتروحي معانا مال شنو..
عبدالصمد:الاولى تروح لحوشها وعمتي تجي تقعد معاها بعد اذنك..
عفاف:نبي نقعد في حوشنا...حوش بوي..
هو رعش لما سمعها شن قالت شن قصدها من كلامها هدا؟!
الشريف:سمعتها شن قالت..خلاص البنت تروح لحوشنا تقعد لين تشد صحتها..
هو شبح لعفاف اللي كانت تشبح لبوها..
تنهد وهز راسه بإيجاب وقال:اللي يريحها...
🍁🍁🍁🍁🍁
"انت تعالى للمكتب واني نزيد نشرحلك بعض الأمور...فيك بارك الله...وعليكم السلام"
سكرت وحطت هاتفها قدامها..ورجعت تشوف لملف قضية رنده قدامها وتقرا فيه..
فجأة..دق باب مكتبها المفتوح..وسمعت صوت يقول..
"السلام عليكم"
رفعت راسها وشافت للباب..ابتسمت وناضت من مكانها وهي تقول:استاذ انس..وعليكم السلام..تفضل تفضل..
هو قدملها وع وجهه ابتسامه جاده وقال:يزيد فضلك استاذة..
وقف قدامها وقال..كيف الحال..
نجاح:الحمد لله..كيف حالك انت..
انس:الحمد لله على كل حال..
نجاح هزت راسها و اشرت ع الكرسي وقالت:تفضل..
انس:شكرا...ومشي قعمز قدام المكتب..
وهي مشت قعمزت ورا المكتب...
انس:ان شاء الله مانكونش معطلك عن حاجه..
نجاح بإبتسامه:كنت نقرا في ملف قضية رنده بن عامر..قطعت فيه شوط طويل..
انس:خدمت فيها القضيه هادي بقلب ورب وتمنيت نكمل فيها للنهايه..
نجاح هزت راسها وقالت:هو من حظي انك جيت كنت حنقطع مشوار من طويل من الهضبه للسياحيه ع خاطر القضيه نبي نعرف منك بعض التفاصيل..
انس:حاط في بالي هالشي ومجرد ماعرفت ان ملف القضيه وصلك جيتك طول..
نجاح:نبي نوضحك حاجه مهمه...رنده سحبت منك القضيه وسلمتهالي لسابق معرفتها بيا حني كنا جيران زمان وعيلتي وعيلتهم كانت وحده..بس بعد حولوا اللي هدا لهي في حياته ومعاش سمعنا عن بعض شي لليوم شفتهم فيه بالصدفه قدام المحكمه هي واختها ماتمنتيش نشوفهم في هديكا الحاله..رنده كانت منهاره تماما..
هي تتكلم وهو يسمع وكأن في من يعصر في قلبه ....
نجاح:ممكن لما يكون بين المحامي وموكله علاقه بعيد القضيه يبدا عند المحامي دافع اكبر انه يدافع ع موكله ويكسب قضيته..
🍁وهدا اللي كان يصير مع انس..كان يدافع عن رنده وكأنها تخصه مش بس موكلته..
تنهد وقال:مزبوط..شوفي اني مش هامني حاليا شي غير ان رنده تكسب القضيه وتاخد حضانة بنتها وحقوقها منه...اني قبل كنت ناوي نخليها ترفع عليه قضية سب وقذف ونطلع عيونه في المحاكم..لكن تنهد وقال..قدر الله وماشاء فعل..
نجاح هزت راسها وقعدت ساكته..
انس:المهم توا نبي نقولك..اني ليا فترة نسعى ورا حاجه ونبي نوصللها...رنده قالت ان طليقها لما كانت ع ذمته في اليوم اللي طلعت فيه من الحوش كلمها مرتين الصبح وقبل لتطلع..وهو طبعا خدي منها تليفونها لهالسبب..بش مايخفي اي شي يثبت انها اتصاله بيها..اني سمعت معلومه ان شركة الاتصالات تجيب المكالمات اللي صارت بين رقمين لو انطلب منها باليوم والتاريخ والساعه والدقيقه..وطبعا لان الموضوع ليه وقت طولوا في البحث وقالوا حيكلموني لما يوصلوا لنتيجه...
نجاح:كويس هلبه بس يعني هو مرات يقول رقمي مسروق ويألف قصة جديده..
انس ابتسم بثقه وقال:ع قد ماحاول يكون ذكي وماكر وحابكها صح غفل عن النقطه هادي وماغيرش رقم هاتفه...
نجاح رفعت حواجبها وقالت:ماشاء الله عليك..صح اني اقدم منك واكثر خبره..بس انت داهيه..
انس ابتسم وقال:مشكورة...اني اللي اطمن قلبي ان رنده اختارتك انتي...
ضيقت نجاح عيونها وهي مبتسمه وتشبحله..
وهو ارتبك من نظرتها حست انها فهمت عليه وهو ماقدرش يدرق اللي فداخله..
حاول يدارك الموقف لما انسحب سريعا وناض وقف وهو يقول:تبي اي مساعده اني موجود ورقمي تعرفيه نتمنى منك تبلغيني ع اللي يصير معاك في القضيه اول بأول ان امكن.
نجاح وقفت وهي تقول بإبتسامه؛ان شاء الله...
هز انس راسه وهو مبتسم بجديه وقال:السلام عليكم..
نجاح؛وعليكم السلام..
انس مشي طلع من المكتب وهي تبعانه بعيونها اللي كانت مضيقتهم وتفكر في شي يدور في بالها....
🍁🍁🍁🍁
اليوم اللي بعده...
الساعه 7:00صباحا..
في جنان حوش الشريف..
"مافي شي احلى من انك تتمشي ع الصبح وتتنفسي هوا الصبح النظيف"
عفاف بإبتسامه:صح..يرد الروح..
الشريف:اني كل يوم نتمشى فيه..والعشيه نمشي للفروسيه نقعد قريب نص ساعه واني نمشي...حسيت ولت خير من قبل تصدقي!؟
عفاف:ربي يدوم عليك صحيحتك وبيي ويطول في عمرك يارب..
الشريف:ويحفظك بنيتي..هي طولي خطوتك وانتي تمشي..
وصلوا قدام باب الحوش لقوا رتيل ماشيه بتطلع للباص..
رتيل بإبتسامه؛صباح الخيرات والليرات..
الشريف وعفاف:صباح الخير..صباح الفل...
فتح رتيل باب الحوش..
وكملوا عفاف والشريف تمشايه..
ع نزلة سفيان من فوق ومعاه لينا..
لينا:بنكلمك مرة مرة في الطريق رد عليا مش تفوتني..
سفيان بضحكه؛باهي باهي..
لينا:رد بالك من روحك ماتسرعش مصراته مش طايره..
سفيان هز راسه وهو يضحك..بعدين وقف التفتلها باسها ع راسها وقال:مروح العشيه بعون الله..
لينا:تمشي وتجي سالم يارب..
سفيان :ردي بالك ع روحك وع سيف باشا..وقرة قلبي..
لينا بإبتسامه:ماتوصيش حريص...
ابتسم وحط نظاراته فوق طاقيته ومشي لسيارة..
ركبها وشبح للينا اللي واقفه تشبحله غمزلها..
وهي ضحكت..
ابتسم بعدين شغل السيارة وتحرك طلع من الحوش..
وهو ماشي بسيارته خطم من قدام حوش جارهم جمعه..
اللي كان مقعمز هو ومرته في جنانهم ع مندار فوق حصير..
ويشربوا في قيهوة الصبح ويسمعوا في الراديو...
مرت جمعه:امس لمينا رواحنا اني والجارات ومشينالهم..
جمعه:وخيرها بنتهم..
:دارت عملية قسطرة لقلبها..
جمعه:اها..ورشف من القهوة ...
:والله تقول عين طرشقتهم هالعيله من هم لهم..مش ساد اللي فيه بنتهم هديكا اللي حاصله في المحاكم بش تاخد بنيتها..
جمعه:اين منهم؟
:الصغيره اللي كان واخدها الورفلي..
جمعه:اه ايه ايه سامع بيها..
:عليك حقير هالراجل قالوا لما طلقها سفرها بروحها..
جمعه:اني من هداكا اليوم كيف شوفته واقف فى اول الشارع وهي جايه من حوش ماليها بالبنيه ع رجلها قلت في عقلي في حاجه صايرة بينه وبين اهلها..
:هدا امتى!؟
جمعه:ليها وقت...تعرفي محل عمك عبد الهادي..
:ايه هدا اللي يجي حدا حضانه عيت بوصاع..
جمعه:ايوه..ريته غادي قبلها كان ياخد في مواد غذائيه متاع واحد مسافر ولاماشي زرده..طلعت وخليته قاعد يشري..وكعبت للحوش..وين وصلت للشارع درس يسيارته وراي وقدامي نشبح في بنت الشريف جايه من بعيد وفي ايديها بنتها وشنطه مذكرها زي توا....وين التفتت شفته لقيته يقيم في المرش متاع السياره نحسابه بينزللها...شويه كملتله لين ركبت السيارة وهو مابي ينزل..
:وخيرك ماحكيتلي من قبل مادرق عليا شي انت..
جمعه:ليها بولدك والحادث اللي داره ودقدق بيه السيارة..
مرت جمعه:ربك نجاه الحمد لله..المهم توا بناخد اذنك اليوم موليين اني ومرت خليفه ومرت بشير..
جمعه:وعلاش ماشية مرتين؟
مرت جمعه:حاجه زبيده جاية اليوم واني خاطري نشوفها قاتلي وجيهه ولي هدرزي وشوفيها..
جمعه:اليوم وخلاص ايوه..وانتي مغلى عليك التنسريف..
مطت مرته شواربها بملل وقعدت تشرب في القهوة...
🍁🍁🍁🍁🍁
في حوش الشريف..
خشت لينا بصغارها للحوش..
لينا:هي عدوا لحنينه..
مشوا يجروا وهما ينادوا بلهجه طفوليه..نينه نينه..
وهي مشت خشت للكوجينه وتضحك..
لقت فيها رنده ادير في مشلتت وشواربها يتحركوا..
لما قربت عليها فهمت منها في شن تردد..
"اللهم صل على محمد وعلى آل محمد..كما صليت على ابراهيم وعلى آل ابراهيم انك حميد مجيد وبارك على محمد وعلى آل محمد كما باركت على ابراهيم وعلى آل ابراهيم في العالمين انك حميد مجيد"
لينا:صباح الخير..
رنده شبحتلها وقالت بإبتسامه:صباحو..
لينا:لا اليوم الله يبارك جوك سمح..
رنده؛ويهبل..كان نقولك يالينا ع الحلم اللي حلمته..
لينا بفضول:احكي..
رنده؛بعد الكوابيس السودا اللي كنت نحلم بيها بهداكا الشيطان واهله..امس في الليل حلمت بالرسول عليه الصلاة والسلام..ودمعوا عيونها...
لينا بدهشه:الله.!
رنده:والله..كان لابس سويه طويله زيتيه وعليها عبايه سودا..وعمامه فضيه وسودا بس شكل وجهه ماشفتاش ماكانش واضح..قالي زي توا والله يالينا...قالي لاعليك..الزمي الاستغفار وصلي على الرسول...والله هكي يالينا بعدين عطاني بظهره ومشي..
لينا وهي تمسح في دموعها:شن درتي قبل ترقدي؟!
رنده:قعدت في فراشي نصلي عليه لين خداني النوم ورقدت ممكن اول مرة نصلي عليه بكثرة هكي كل صلاة كنت نحس بيه يسمع فيها ويقولوله الملايكه هادي من رنده بنت الشريف ووجيهه..ونتخيل فيه يبتسم بعد يقولوله...
لينا:يااه..انتي وصلتي لاعلى درجات الاستشعار واضح انهن وصلنه وربي في كل الحالات يقبل الصلاة عليه حتى لو العبد ماكانش مركز فيها..نفدتي اللي وصاك عليه..
رنده:وهاني نفد فيه..متفائله هلبه يالينا هلبه..
لينا بإبتسامه:ربي ينصرك ويفرح قلبك..
رنده؛آمين..بجد ياشكولينا انتي ربي ماحطك بيناتنا الا ع خاطر سفيان ع خاطر هالأيام..
لينا ابتسمت وقالت؛باهي كملي المشلتت متاعك ولد خوك يبيه..
رنده بضحكه:عيوني لسيفو ولد سافيوش..
ضحكت لينا وهي تشوف لرنده.....
مش قادره تصدق ان هي هادي نفسها رنده اللي آذتها بالكلام والافعال..
رنده اللي كانت يوم من الايام تقوللها..."عبدة"..
اليوم تنادي فيها #شكولينا
رنده اللي كانت كارهه وجودها..وتوا ممنونه لربي اللي جابهالهم..
رنده اللي كانت وين تسمع اسمها تتعوذ من الشيطان..
وتوا ولت اقرب الناس ليها في حوش العيله..
🍁جزا الله الشدائد ألف خير🍁
🍁🍁🍁🍁🍁
الساعه 2:00ظهرا..
وجيهه:هاه بنيتي تبي حاجه؟
عفاف:لاميمتي مانبي شي...من رفع البنات للمدرسه..
وجيهه:مروان..
عفاف هزت راسها وقعدت ساكته..
وجيهه:كلموني الجارات وقالوا بنجوا العشيه..
عفاف تنهد وقالت:باهي..
وجيهه:حتى نويره قالت بتجي العشيه..
ابتسمت عفاف وقالت:ياريت تبات..
وجيهه:اكيد بتبات توا معاش يفرق عند حسين بياتها من قعادها مدام عنده غيرها..
تلاشت ابتسامه عفاف وعيونها تعبوا دموع..
🍁🍁🍁🍁
"ملاحظه ان ليك قريب اسبوع ماحصلتش معاك يوم واحد"
نوريه:هكي احسنلك خيرلك من وجع راس..
حسين:وجع راس وهو دورك.
نوريه وهي ترتب في حوايجها في شنطه:معاش تفرق..
حسين:نوريه لما نشوفك زاهده فيا تحرقي فيا..
نوريه شبحتله وقالت:زاهده فيك عينك..اني مانبيلكش انت المشاكل اني كان بندير زي البوبريصه هديكا مش حتتهنى ولاترتاح...
قعد يضحك..
نوريه:نكبر عقلي ونفوتها المهم دماغك انت يرتاح..وبالمرة بش تعرف قداش نحبك..نبي راحتك بس مش التنكيد عليك..
حسين بضحكه:اقسم بالله نموت فيك يامراة انتي كل يوم اكثر من اللي قبله..
نوريه بضحكه:وهو المطلوب..
🍁🍁🍁🍁
الساعه 5:30عصرا...
الصاله معبيه بالجارات والأم وبناتها وكناينها يهدرزوا..
وكان الموضوع مفتوح موضوع رنده اللي كانت تسمع في هدرزتهم عليه وهي مضايقه..
:فكك منه ربي وان شاء الله بنتك توليلك..
:انتي كان تتزوجي يعطيك البنت..
نوريه:والله صدقتي..
رنده:لالا الزواج معاش نبيه بكل ساد ماريت اني توا نبي بنتي بس نبي تعيشلها عمري كله مانبي شي تاني.
مرت جمعه:لكن والله خسارة هالوريده تقعد هكي ع خاطر واحد مايسواش..حتى عمك جمعه اليوم يحكيلي قالي الورفلي اللي كان واخد بنت الشريف مش مزبوط..خدي عنه هالفكره من لما راه مرة جايك بيروح بيك..كان واقف اول الشارع وانتي جايتيه من حوشكم ع رجليه..
رنده قعدت تشبح للمراة وعيونها متوسعات ع الآخر من الصدمه..
لينا ونوريه وعفاف شبحوا لرنده بدهشه بعدين نوريه قالت:امتى راه خالتي نجميه؟
:والله هو قال من مده طويله..راه في محل عمك الهادي اللي حدا عيت بوصاع..قال كان ياخد بضاعه متاع واحد بيسافر..عمك جمعه قال طلعت وخليته وروحت للحوش ع رجليها ولما وصلت الشارع هو كان واصل بسيارته وراك منين جتيه من بعيد..قال لانزلها لادورها خلاها تكمل الطريق لين وصلت فيه..
رنده غيرت عيونها عنها وقعدت تشبح للينا وهي مصدومه..
ولينا تشبحلها بدهشه وعيونها معبيات دموع...
#صلوا_على_محمد
...يتبع..
الفصول الاربعة
