#شكولينا 🍫
#تابع_الجزء_الثالث_عشر
#الجمان_الفريد
جزء صغيرون..
الصلاة أولا...💕💕💕💕
《في بعض من الحوارات حقيقيه وهي تعبر عن وجهة نظر اصحابها 》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
وصلوا زهور وسفيان وعدنان لفم الباب وقعدوا عدنان وسفيان يدقوا عليه بقوة...
••داخل..
طلعت رتيل تجري من الدار بش تفتحه..
خطمت من قدام الكوجينه اللي طلعت منها لينا وهي تجري متوجهه للدار..
خشت عليهم وهي تقول بفزع:شن في خيرك منى؟!
منى اللي كان وجهها لونه شاحب وتبكي من الألم:بنموت يالينا..
لينا قعمزت وقعدت تتحسس في بطن منى بيدها..
وجيهه وهي تبكي:خيرها يابنتي..
"شن في يام"..
وجيهه:اطلعي لخوتك ياعفاف كلميهم..
طلعتلهم عفاف تجري وهي ترعش..
ورنده اللي كانت ضامه لحضنها صغار خواتها تشوف لمنى بخوف...
••الشريف:اشبح شن خلوها ادير عارفهم اني عارف..
عفاف:الله يسامحك يابوي ..
الشريف:ضمي فمك واسكتي..
سفيان تنهد بخوف..
وعدنان قال بأسف:لاحول ولاقوة الابالله..
ع طلعت لينا وهي تقول؛اتصلوا بالإسعاف..
كلهم شبحوا للينا بخوف..
ماعدا سفيان اللي زاد خاف من كلامها...
الشريف:لهالدرجه..
لينا:ايه ياعمي كلموهم لازم يجوا بسرعه..
وولت للدار..
سفيان:إنا لله وإنا إليه راجعون..ومشي طلع وهو يقول..تو نتكلم اني..
ومشي طلع من حداهم..
الشريف:غير نطلعوا من هالمصيبه ليا تصرف تاني...
••داخل..
لينا وهي شاده يد منى كانت تقرا في القرآن...
ووجيهه كانت مقعمزة وهي تمسح ع رجليها من الخوف وتدعي....
وزبيده حتى هي تدعي ...
لينا وهي تقرا شبحت لرنده بحده..
ورنده قعدت تشبحلها بتوتر..
منى بألم:اااه ياربي...ياربي...
لينا شبحتلها وقعدت تمسح ع يدها وهي تقرا:
إياك نعبد وإياك نستعين..
🏵🏵🏵🏵
خلال عشرة دقايق كانت سيارة الاسعاف واصله..
خشوا المسعفين بالباريلا وطلعوا منى اللي مشت وراها وجيهه في سيارة ولدها سفيان..ووراهم عدنان ومعاه اخته عفاف...
اول ماصلوا بمنى للعياده...
اتصلوا بمروان وبلغوه...ولأن العياده قريبه ع المستشفى اللي مناوب فيه مروان اختاروا انهم يخبروه بعد مايجيبوها للعياده...
خش مروان يجري وهو يدور وقلبه قريب يطلع من صدره خوف ع مرته وولدهم..
مروان بخوف ولهفه:خيرها منى خيرها..مازال مش توا موعدها...شن جاها شن صارلها..
سفيان:استهدى بالله يامروان..
عدنان وهو يمسح ع ظهره؛مافيش خوف يامروان دخلوها العمليات وقالوا مافيش عليها خطر لو ولدت توا ولا ع العيل..
مروان من خوفه نسي نفسه وقال:توا بس خشت التاسع هدا اول اسبوع ياعدنان..
خوته شبحوا لبعض...
وامه جاته وهي تقول:تعالى قعمز ولدي..
مروان نمشي معاها وهو يقول؛شن صار يام!
قعمزاته امه وقالت؛مش عارفه كانت راقده معانا في الدار عادي مانندروش عليها لين ناضت وهي وتعيط..
اتكا مروان بمرفقه ع اليد الكرسي ودرق عيونه بإيديه..
وبدي يبكي..
ووجيهه قلبها وجعها ع ولدها..
وعفاف كذلك وجعها خوها...
وسفيان قعدوا يشبحولها بنظرات أسف...
🏵🏵🏵🏵🏵
"هالحنه الغبره ارزيكم فيها"
رنده؛ترا بالله ماتحطوهاش في راسي اني مادخليش هي من البدايه مش مهتمه بنفسها..
لينا شبحتلها بحده..
رنده:خيرك تشبحي هكي انتي؟!
لينا غيرت عيونها عنها وقالت :شي..
رفعت رنده حاجبها وقالت؛ننصحك نصيحه انتي ماتكتريش ع ماوصوك تمام..
لينا ناضت ومشت طلعت من الدار..
رنده رفعت حواجبها وقالت:اشي!!من تحساب روحها السودا هادي!
زبيده:خلاص سكري فمك وخلي هالليله تعدي على خير..
رنده؛تمام بنسكت توا ياحناي لكن بعدين نعرف كيف نتفاهم معاها...
🏵🏵🏵🏵
ويمر الوقت..
والخوف والترقب مخليه وكأنه يمر ببطء شديد...
ويخليهم تحت رحمة الإنتظار القاتل..
مروان قلبه مقبوض وعقله جابله الأفكار السودا بس..
وخوته يحاولوا يطردوا هالأفكار من راس بكلام مطمئن وهما حالهم من داخل مش احسن من حاله...
وكلهم تحت رب رحيم انهى هالانتظار باخبار مبشره...
الدكتورة:الحمد لله...المدام وولدك بخير دكتور..
مروان بلهفه:يعني منى ماصارلها شي دكتورة!
الدكتورة بإبتسامه؛مافي شي خطير يادكتور اطمن مش اول حاله تجينا يصير معاها هكي..ربي يهديها مدام منى نصحتها هلبه ترد بالها من صحتها ومعاش تجهد نفسها لكن هي شكلها ماتسمعش في الكلام...
شبحوا مروان وعدنان لأمهم وهي كانت تشبح للدكتورة عادي وكأن الكلام اللي سمعاته مايعنيهاش..
عفاف:باهي الوليد دكتورة شن حاله..
الدكتورة:الحمد لله صحته كويس بس لازم يقعد في الحضانه فترة...
مروان تنهد وقال:الحمد لله..
وجيهه:الحمد لله ع سلامتهم ولدي..
مروان ابتسم بأسف وقال:الله يسلمك يام...
🏵🏵🏵🏵🏵
مكالمه هاتفيه..
لينا:باهي الحمد لله ع سلامتهم...يتربى في عز الله ويجعله مم حملة كتابه........باهي حاضر.....سلام..
وسكرت ومشت خشت للدار وهي تقول بجديه:توا كلمني عدنان قال منى جابت بالعمليه وحالها هي والعيل كويس...
زبيده:باهي الحمد لله..
لينا:تصبحوا على خير...ومشت...
رنده؛الله لا يصبحك بخير..شوفي الحيوانه كيف تتكلم وتشبح..
زهور:ماتوقعتهاش هكي الحق اللي يشوفها يقول طيبه وعلى نياتها..
رنده:حني اللي طيبين وعلى نياتنا..
وزبيده تشبح لزهور وهي مضيقه عيونها...
🏵🏵🏵🏵
الساعه 6:00صباحا...
خش الشقه وتوجه لدار النوم لقي مرته فايقه ..
مقعمزة ع السرير وتقرا في القرآن لما شافاته وقفت وحطت المصحف على جهة وقالت:شنو حالها متى تو؟
عدنان تنهد وقال:حالها باهي..
قعمز ع السرير وقال؛مفروض كملتي نومك عندك خدمه اليوم..
لينا؛وكان مانعدي اليوم خير الدنيا ملخبطه..
عدنان:لامخلبطه لاغيره..امشي اخدمي خدمتك وماعليك في حد في لوطا بدال الوحده تلاته..
لينا:لكن مش حلوة نح..
قاطعها وقال بجديه؛لينا قتلك قبل انتي هني تسمعي كلامي اني بس وملزمه بحوشك بس..في الجديد ماتنزليش لوطا الا في العشيه وتروحي بعد العشي..وكان ماخاطركش تنزلي ماتنزليش واجبك تخدمي حوشك اهوا وبس..
لينا:حاضر كيف ماتبي...
عدنان:وبعدين انتي مش حتلقي وقت تنزلي فيه لوطا..بتبدي في خدمه الشكلاطه من اسبوع هدا...
لينا:كيف؟
عدنان:امس ولد عمتي ربيعه كان هني ولد عمتي هدا عنده محل حلويات فاتحه ومسلمه لأخته اساور..المهم عندهم جميع انواع الحلو ماعدا الشكلاطه ويبوا يخدموا معاهم حد يدير فيها...يعني يتعاملوا معاه..والشكلاطه متاعك عجبتهم ويبوها يكون من ضمن مايبيعوا في محلهم..
لينا بإبتسامة فرح؛حلو واجد..
ابتسم وقال؛مش هدا اللي نبي نسمعه..
لينا بضحكه:نحبك دنيا دنيا...
🏵🏵🏵🏵🏵
"انتم نساوين هالوقت ماتنفعوا في شي ولاتتحملوا شي"
زهور وهي تحدد في حوايج سفيان:مش كلهم ياسفيان..
سفيان وهومقعمز وماد رجليه ع السرير وحاط يده اليسار ورا راسه وباليمين شاد تليفونه يتفرج عليه قال:اممم..تو نشوفوك بعدين..
زهور ابتسمت وقالت؛إن شاء الله...
هو قعد يشبح لتليفون...فجأة رن..
عقد حواجبه وفتح الخط ورد..
سفيان:آيوه..
"إن مت يوما في هواك فلاتسل
فالنحل آثر ان يموت مع العسل
والقلب اضناه الحنين بداخلي
يرنو إلى لقياك يمنعه الخجل."
وكالعاده انقطع الخط...
نزل التليفون وع وجهه بدت ملامح العصبيه...
حط الرقم في الحظر ورجع فتح ع الانستقرام..
زهور:مني؟
سفيان بدون مايشوفلها:واحد غالط..
هي قعدت تشبحله بنظرات حاده للحظات..بعدين غيرت عيونها للدبش اللي قعدت تحدد فيه بعصبيه..
🏵🏵🏵🏵
الساعه 8:00صباحا...
نزل سفيان من فوق ووراه زهور...
هي مشت طول خشت للحوش..
وهو توجه للسياره..فتحها وحط فيها الشنطه ..
بعدين قعد واقف يستنى....
لين طلعتله رنده...قدملها وقال:صباح الخير..
رنده:صباح الخيرات..
سفيان :رنده بنسألك..في حد من العيله الفترة الاخيره طلب رقمي منك..
رنده وهي تفكر حركت راسها بالنفي..
سفيان:باهي في وحده تعطي فيها تليفونك وتاخد راحتها وهي تستعمل فيه عادي..
رنده:كذا وحده من بنات االعيله بنات عمتي ربيعه وبنات عمي سليمان..وبنات خالي نبيهه هادم اقربهم ليا..
سفيان طلع تليفونها وحط ع الرقم من قائمة الحظر ووراه لاخته وهو يقول..تعرفيه لمني هدا..
هي خدت التليفون وقعدت تتمعن في الرقم بعدين قالت:لا مش مار عليا..ع العموم تقدر تعرفه لورجعت للشركه..
سفيان خدي التليفون وقال:تمام..الموضوع يقعد بيناتنا نلقاه طالع مخطرك الأسود..
رنده ضحكت بخوف وقالت؛حاضر...
ع جية عدنان ومعاه لينا...
شبحوا جيهتهم...
عدنان:صباح الخير..
اما لينا طول مشت ركبت السيارة..
هما ردوا؛صباح الخير ..صباح النور..
سفيان:للعياده..
عدنان وهو بيركب:لا..وركب وسكر الباب..
وشغل السيارة وتحرك..
شبح سفيان لرنده وقال:وين ماشيين ع صبح ربي!!؟
رنده وهي مبتسمه بتهكم؛رافع مرته للعمل..
التفت سفيان للباب وهو مصدوم..
لفي السيارة طلعت والباب تسكر..رجا شاف لاخته وقال:تتسهوكي!
رنده؛قصدك انت ماتعرفش!!عدنان مرته ولت تخدم في مجمع العيادات اللي يخدم فيه مروان...
سفيان بصدمه:كنة عيت الشريف..تخدم...وممرضه فوقها!!!؟
رنده:حكم عدنان...
سفيان قعد يشبح للفراغ لحظات وهو مش قادر يصدق بعدين قالت؛هزلت...والله هزلت...
ولف ومشي ركب للسيارة وقال:ومازال ياما جاي مادام دخلنا نماذج زي هادي لعيلتنا..
وسكر باب السيارة بقوة...وشغلها وتحرك وهو يحرق في العجل..
ورنده تشبحله وتقول بمكر:بإذن الله تطفيشها ع يدك انت...
وابتسمت بمكر ولفت ومشت خشت للحوش وهي تتمختر بمشيتها كالعاده....
🏵🏵🏵🏵
في الطريق..
عدنان؛لينا زي ماتعرفي يوم السبت مولي الجنوب..لهدا درتلك سواقه ترفعك وتجيبك ماتخممي في شي...وزي ماقتلك لينا اهتمي بنفسك بالدرجه الاولى..احتجت لشي بري لبوي طول..صادفاتك مشكله في مكان عملك خبريني طول واني نقول لمروان يتصرف..تمام..
لينا وهي تحاول تخفي ضيقها وادير روحها عاديه قدامه؛ان شاء الله حتى انت ماتخافش عليا وكون مطمئن..
عدنان؛عارفك قد روحك...المهم...في الليل باتي لوطا ولو خليتي امي تركب تبات معاك يكون احسن..
لينا بضحكه:هدي صعبه..
عدنان ابتسم وقال:انتي حاولي بس..
تنهدت لينا وقالت؛ان شاء الله...وحتى انت عدنان رد بالك ع روحك..وحط في بالك ديما ان عندك مراة تحبك واجد ترجى في مرواحك ليها بالساعه والدقيقه..
شد يدها وقال:اكيد من غير ماتقولي..
ابتسمت لينا وعيونها غارقه بالدموع اللي تحاول تشدهم بكل قوة...
🏵🏵🏵
وجي يوم السبت وتسقد عدنان للجنوب بعد ماتمت اجازته اللي كانت مدتها شهر فقط لاغير...
اليوم اللي سافر فيه عدنان لينا حست بالغربه والوحشه..
وانتباهها شعور قلق من اللي جاي...
بس وضع منى وجيابها خلا المتربصين بيها يلهوا عنها..
طلعت منى بعد يومين لشقتها طول..واهلها بدوا يمشوا عليها ويجوا....
والكل ولوا شبه مستقرين في شقة مروان...
عفاف قاعده في حوش ماليها ماروحتش اهلها فاهمين ان راجلها مسافر..بس مافي حد يعرف انها جاية حرجانه غير نوريه...
اللي في ارض الله المقدسه...ومع هذا مش مخليه حد في حالها والاستخبارات متاعها يوميا تزود فيها بالمعلومات...
رنده...
اللي ماجتش بكل لمنى..وكانت ناويه تجيها بعد مايطلع ولدها ويديروله لمه...
وجي اليوم اللي طلع فيه ولد منى من العياده..هو مازال مفروض يقعد اكثر بس وجيهه خافت ع فلوس ولدها يتموا خلاته يطلعه وهي تقوله" علاش خسارة الفلوس تو نردوا بالنا عليه هني خير منهم "
وهو طبعا اقنعه الكلام وطلعه فورا...
🏵🏵🏵🏵
في كوجينة حوش الشريف...
لينا:هكي تمام..
زهور:هلبه العصير كان صبتيه في طواسي اصغر..
لينا؛مش لايقات اللي اصغر من هكي هدينا احلى..
زهور"تو توريك وجيهه اللي يليق بيك": باه...
لينا:انتي ترفعي ولااني..
زهور:لا اني تو نرفع انتي ضمي الكوجينه..
لينا؛-تمام..
خدت زهور السفره ومشت طلعت..
اما لينا فبدت ضم في الكوجينه...
••ركبت زهور لشقة سلفتها..
في الوقت طلعوا فيه من المربوعه..
سفيان والشريف ومعاهم بو منى وخوتها...
ومروان كان فوق قاعد حدا ولده بش يطمن عليه...
.........
في دار رتيل...
كانت اختها مأمنه عندها بنتها الصغيره رنا..
ورتيل لهت بالتليفون ونست البنت..
طلعت رنا من دار خالتها وتوجهت للكوجينه وخشتلها..
لينا ماانتبهتش انها خشت..كانت لاهيه بغسل الماعين..
البنيه وهي ماشيه لقت موس طايح ع الأرض خداته ومشت كملت بيه وطلعت من الكوجينه من الباب الخارجي..
لما طلعت لينا حست بشي .
شبحت للباب شافت الستار تحرك رغم انه مافيش ريح..
مصمصت ايديها ومشت طلعت..
شافت ايمينها مالقت حد..شافت ايسارها لقت رنا ماشيه يالموس..
انفجعت ونادت:رنا...ومشت ناحيتها..
البنت وين التفتت وشافت لينا جايه ناحيتها دارتها لعبه وهي في قمه الاستمتاع طلقت رجليها للريح..
ولينا قعدت تجري وراها وهي تقول:رنا وقفي..
عترت في قونتها "تنوره" قريب طاحت بعدين كملت جري...
ورنا تجري وتضحك وعاجبها الجو..
ولينا كل همها انها تلحق ع رنا وتاخد منها الموس قبل مادير بيه حاجه لروحها..
وتركيزة ع عالشي بروحها..خلاها ماتسمعش اصوات الرجاله وهما يهدرزوا..
لاحست بشي...ولاركزت على شي...ولاانتبهت لشي..
الا لما لحقت ع رنا وشدتها قامتها وحولت منها الموس ولما رفعت راسها وشافت قدامها انصدمت..
كانوا كلهم يشبحولها..
هي طول طلعت تجري برنا وهي تقول بصوت يرجف:حي عليا حي شن درت حي يافضيحي..ياغبارتي المغبرة...
وهي تجري ورنا تضحك وأخر انبساط...
☘ليكم انكم تتخيلوا موقف سفيان والحاج الشريف قدام اهل منى كان موقف سيء ومحرج لأبعد حد..
اهل منى دارو رواحهم ماشافوا شي..
وكملوا الهدرزة عادي...
والحاج الشريف كان مضايق...
بينما سفيان..بركان...بركان بدي يطلع في دخانه معلنا قرب انفجاره...
الحاج الشريف وهو يودع في ضيوفه اللي طالعين بسياراتهم.:في امان الله..
وسفيان حاط ايديه في جيوبه وهو يهز في رجله بغضب...
طلعت السيارات وتسكر الباب..
التفت الشريف ومشي خش داخل وهو يقول:لاحول ولاقوة الابالله..
اما سفيان غمض عيونه بغضب بعدين فتحهم ولف ومشي للدروج وقف فيهم وقعد ينادي بغضب:يام...يما...
ولينا مقعمزة في الكوجينه تسمع في صوته وهي تبكي...
ولانها واصله لأقصى مراحل التوتر كانت تقرض في ظوافرها لين نزف منهم دم...
.......
نزلت وجيهه تجري ومعاها زهور وعفاف..
وجيهه:خيرك شن في؟!..
سفيان بغضب:خشي يام للحوش بروا خشوا للحوش..
عندي كلمتين حاصلات هني..واشرت ع رقبته وقال...ولازم نوصلهم لمولاهم..خشوا..
وجيهه وهي خايفه ومش فاهمه مشت خشت للحوش..
ووراها بنتها وكنتها...وهولحقهم وسكر باب الحوش وراه بقوة كادت تقلعه من مكانه...
يتبع…
الفصول الاربعة
