شكولينا

الجزء الثالث والاربعون

#شكولينا
#الجزء_الثالث_والأربعين
#الجمان_الفريد

عماد حياة المسلم..واكسيرها الصلاة..
واول شي يتحاسب عليه..لاخير في عمل يلهي عنها..
صلوا صلاتكم...بعدين ديروا اللي وراكم...
وقولوا لاإله إلا الله بقلب سليم طاهر تفلحوا❤
🌾صلوا على غيث القلوب وريها
     خير الخلائق رحمة الرحمن🌾
🍫🍫🍫🍫🍫🍫🍫🍫🍫🍫🍫🍫🍫🍫
العاصفه اللي صايره برا..ماتجي شي جنب اللي صارت في داخله بعد ماسمع منها الكلمه اللي طال انتظاره ليها..
زي العطشان المستني شربة مية ترويه..
قعد يتأمل فيها بعيونه وهو منقطع عن كل شي..
ماكانش متوقع ان الكلمه حيكون تأثيرها عليه قوي لهالدرجه..
سمعها بطريقه حلوة..بنبرة حلوة..بنغمه حلوة....
زادت هالكلمه حلاوة ع حلاوتها..
وهي تحشمت هلبه من نظراته....وقلبها يدق بقوة يدق بسرعه..
ع جية النادل ومعاه زميله بالعشي..
قعدوا يحطوا فيه قدامهم ...
لينا كانت متشتته بينهم وبينه هو اللي قاعد يشبحلها وخلاص..
بعد ماحطوا الحاجات..
النادل:صحتين وعافيه..
لينا هزت راسها بدون ماتقول كلمه..
هما مشوا وهي تبي تخلي سفيان يطلع من الحاله اللي هو فيها..
لينا:والله الشتا مايبي كان الماكله..هي تعشى..
وبدت تاكل وهي مركزة في العشي بس قلبها مركز معاه هو كان يفر فران وسط ضلوعها..
وهو مازال ع حاله..
قامت عيونها بالشويه وشبحتله بعدين ضحكت بإنزعاج وقال:خلاص عاد سفيان تعشى ومعاد.تشبحلي هك احرجتني..
تنهد بعدين حول نظاراته وحطهم في جيبه وهز راسه بإيجاب وبدي ياكل وعيونه عليها..
عقدها ماخلاهاش تعرف تاكل كويس...
فجأة..
طلع صاحب المطعم وقال:ياريت تركزوا معاي شويه من فضلكم..
كلهم شبحوله..
:الطريق اللي طلع من هني تسكرت بالميه يعني مافيهاش كيف تطلعوا بكل..
ارتفعت اصوات الزباين بالإحتجاج..
:باهي كيف الحل توا؟
؛الحل ان نستنوا المطر لين توقف وتجي سيارة البلديه تشفط الميه طبعا هدا كلامهم هما..ضحك وقال..كلنا حصلنا هني يعني اني نسكن في مكان بعيد مش بالساهل نوصل فيه..قدر الله وماشاء فعل..اعتبروا هالليله ذكرى حلوة تهدرزوا بيها بعدين..وابتسم..
تقبلوا الموجودين الوضع..وماابدوش اي عبارة اعتراض اللي صار خارج عن اراده صحاب المطعم...
صاحب المطعم:ليلتكم سعيده...صحتين وعافيه..
ومشي خش داخل..
لينا:حيي كيف بيصير تو؟
سفيان بإبتسامه:زينا زي هالناس...
لينا:باهي خبر هلك..
سفيان:ناسيه تليفونك؟
لينا:ايه طلعت وخليته ع الزيانه..
هز راسه والتفت للنادل اشرله بعد ماشافه كلمه بالإشارة عن التليفون...
هز راسه ومشي بيجيبله الهاتف..
🍁🍁🍁🍁🍁
"ياربي وينهم وين مشوا"
مروان؛غير صلي عالنبي يام اكيد حصلوا في الطريق..
وجيهه بقلق:لالا قلبي مش متريح..
فجاة رن تليفونها..
شافاته طول ردت..
وجيهه بلهفه:وينكم وليدي وين.
"كيف وين يام..ماقالتش رتيل"
عقد حواجبها وقالت:شن بتقوللنا رتيل
"؛لان شحني قرب يتم بعتلها رساله وقلتلها بنتعشوا برا"
وجيهه:رتيل..يارتيل..
"المسبوهه ماشافتهاش حتى والتليفون في يدها"..
وجيهه:الضي هرب وليدي وهي شحنها تم..
"مسكسكه"
ع جية رتيل:نعم ماما..
وجيهه:فتحتي هاتفك..
رتيل:لا..
وجيهه:بري افتحيه يامنجوهه وشوفي خوك شن باعت..
رتيل:حي عليا..ومشت تجري لدارها..
"اسمعي يام الطريق مسكره بنعطلوا في المرواح"
وجيهه:مش مشكله وليدي المهم انتم كويسين مافيكم شي..
"الامور هانيه يام ماتخافيش سامحيني  خوفتك".
وجيهه؛معليشي وليدي غير جوك غير...ومادور شي حني هني امورنا تمام وخوك مروان معانا..
"ربي يحفظك ومايحرمني منك حبي"
وجيهه:ولامنك وليدي...هي بالسلامه وسلم ع لينا..
"ايه يام لينا تليفونها مش معاها"
وجيهه:ايه عرفتها عرفتها...هي بالسلامه توا.
"في حفظ الله"..
سكرت وجيهه وقالت:متعشي برا هو ومرته احسن خل يغيروا جوهم..ومشت خشت داخل ومروان يشبحلها لو كان هو مكان سفيان راهو دارتله قصه...
كم مرة حرماته هو ومرته من انهم يعيشوا جوهم يطلعوا يدهوروا ياكلوا برا...حتى وكان طلعوا ييطلعوا معاهم يايقعدوا قالبين عليهم..او يلقحوا لين يندموهم ع الطلعه..
قعد مروان يفكر في اللي مفروض يكونوا احلى ايام بينه وبين مرته كيف مشوا كلهم في ارضاء امه وخواته...
وكل ماله يزيد يحس باللي كانت تمر بيه منى ويكره نفسه كيف كان سلبي قدام كل المواقف اللي صارت بين اهله ومرته...
تنهد بضيق...ومشي للمربوعه قعمز فيها..
🌺🌺🌺🌺🌺
"عجبك العشي؟"
لينا:اها واجد..
سفيان:مش باين ماكليتي شي..
لينا:لا كليت وواجد اخرى..
ضحك وقال:مطرح مايسري يمري..
ضحكت لينا..
وهو نادى النادل يجي يرفع ماقعد من العشي من قدامهم..
بعد رفعوا العشي..
لينا:عجبني المكان واجد..ياريت دور لأبوبكر ع غيره..
سفيان:اولا معاش تقولي اسمه..وتانيا حاضر معاش نجيبوه هني...نخلي هو يجيبني..
ضحكت..
سفيان؛وبهكي معاش نجوا للمطعم هدا اني وياه مرة تانيه..لانه قفاص كبير مايهون عليه شي..
لينا بضحكه:مش باين ..
سفيان بضحكه:مش قفاص حريص شويتين..
ابتسمت لينا وقالت:انت عكسه كريم لين مولي سخي..
سفيان؛يقولوا اللي فيدي مش ليا..مرات تقرصني عمتك وجيهه بش نشدها شويه..
لينا:اها اللاي نوعها حريصه واجد..
سفيان؛عكسها بوي قريب يوزع فلوسه ع الناس في الشارع..
لينا:ربي يباركله ويزيد...
سفيان؛احم..عندي سؤال خاص وانتي حره تجاوبي ولالا..
لينا:اسأل..
سفيان:اولا اسف اني اطفلت ع خصوصياتك بس مرة قريت في المذكرة متاعك انك تخلي في مبلغ ع جنب لوحده من خواتك استغربت..علاش؟
ابتسمت لينا وشدت شيشه الميه بعدين شبحتلها شويه ورجعت شافتله وقالت؛اختي امال ايام كنت بنت خشت معاي في الخدمه متاع #شكولينا كانت تسوقلي وتجيبلي ف المواد..وهي ظروفها شوي صعبه راجلها يخدم سواق بطاح واللي يدخله يدوب يسدهم..كانت الخدمه معاي دايرتلها حل..
وبعد سيبتهم قعدت نبعت في الفلوس ليها ولهلي عن طريق المصرف تحويلات يعني..هي توا تخدم في الخمرة والدلكه والبخور وتبيع..بس انا ماقدرتش نوقف عنها اللي كنت نساعد فيها بيه..
ابتسم بإستغراب وقال:باهي خوتك..ملاحظ يعني ان علاقتكم ببعض شويه رسميه..
لينا ضايقها السؤال هلبه لدرجه ان الدمعه عبت عيونها..غيرتهم عنه وقعدت توزع فيهم قدامها.
سفيان:اني اسف اسف جدا..
لينا شبحتله وقالت؛سؤال عادي وعندي ليه اجابه..
علاقتنا ببعض كيف علاقة كل الخوت بس الدنيا تلهي وكل حد بعد موت باتي وامي اللي يرحمهم ينشغل بحاله..
هو هز راسه وقال:فعلا عندك حق..العيله مايلمها كان الاب والأم ..
نزلوا دموع لينا وقعدت تمسح فيهم..
سفيان بضيق:اسف جدا لينا سامحيني..
لينا حركت راسها يمين ويسار وهي تقول:مش مشكله..
ناض من قدامها وقعمز في الكرسي اللي يجي مقاديها..
سفيان :خل نغيروا القناه المنكده هادي...وخدي بالطوه من ع الكرسي اللي كان مقعمز فيه .
وهي تشوفله بإبتسامه..
وطلع منه بوكس مربع متوسط الحجم ومدهلولها وقال:شوفي..
لينا خداته منه وهي مستغربه..فتحاته ..
وارتسمت ع وجهها ملامح الانبهار....
سفيان:شن رايك..
لينا طلعت العقد وقعد تشوف فيه..
كان عقد ذهب ناعم..سلسال...وفيه تعليقه صغيره ع هيئة زهرة الياسمين..
لينا؛حلو واجد واجد...
سفيان بإبتسامه؛تعرفي امتى خديته؟
لينا نزلاته وحطاته في علبته وقالت:امتى..
سفيان؛في اخر سفرة ليا لألمانيا خديته من غادي..كنت ناوي نروح نرضيك بيه ..بس صارت حاجه مش حاسب حسابها قلبت الموازين..
ابتسمت لينا بخجل..
سفيان بإبتسامه:حاولت نهديهولك مرة تانيه في وقت يكون مناسب وظرف مناسب بس مع الأسف المشاكل والاحداث اللي صارت خلتني مش قادر نفكر في شي غيرهم..
طبعا ماطلعتهاش من السيارة قعدت في الدرج متاعها لين جي هاليوم قبل لتطلعي من حوش اهل مرت مروان طلعتها وحطيتها في جيب البالطو..كان عندي احساس ان هالليله حتكون مميزة بكل شي فيها.
وهي تسمع وتشوفله بإبتسامه حب
سفيان:تحبيني..
لينا هزت راسها بإيجاب وهي تضحك وقالت:ايه..
سفيان بإبتسامه؛ايه شني؟!
لينا بضحكه:ايه..نزلت عيونها وقالت..انت عارف..
سفيان :مانعرف شي انتي قولي..
لينا بإبتسامه خجل:خلاص عاد خليها تطلع تلقائيه..
سفيان غمض عيونه وتنهد من قلبه..
وهي تشبحله بإبتسامه..
فتح عيونه وقال:ربي يصبرني..كيف ماطيحني في وحده تتفنن في تعذيبي..
لينا بضحكه:يالطيف...!
سفيان هز راسه وهو مبتسم برفعة حاجب:زيدي تسهوكي زيدي..
ولينا تضحك...
🌺💎وكملوا هدرزتهم اللي كانت منوعه وعن اكثر من موضوع تتخلها مناقرات وكلمات غزل من سفيان ل #شكولينا 
فهالوقت المطر كانت واقفه و سيارة البلديه جت بش تشفط
خدت وقتها لين لقوا ارواحهم خاشين ع الساعه واحد ليلا..
طلعوا من المطعم وهما شادين في ايدين بعض..
كانوا محتارين ومش عارفين شن يديروا..
سفيان:الطريق من هني للحوش وفهالوضع نوصلوا التلاته..
لينا:باهي شن الحل..
سفيان شبح ايساره لمكان يبان عليه من بعيد وبعدين قال..في فندق قريب من هني نقعدوا فيه الليله..
لينا:حي ع الاحراج قدام هلك..
شبحلها ورفع حاحبه وقال:نديروا في حاجه غلط؟
لينا:هو لا..بس يعني..
سفيان قاطعها بحزم:لابس لايعني..وهي تعالي..
ابتسمت ومشت معاه...
ركبوا سيارتهم...وتوجهوا للفندق وفي الطريق بلغ سفيان خوه مروان....
🍁ومروان خش بلغ امه...لاحظ في عيونها الفرحه لولدها..
ووجعاته نفسه اللي امه مالاحظتش في عيونه الحزن..
او هو هكي فكر..
وكمل ليلته وهو يفكر وماجاشي نوم..
اتصل بمنى..انصدم لما لقاها حطاته في الحظر....
حس انها ناويه من جدها تطلق...وهالشي خلا النوم معاش يجيه من الخوف وحرق الدم...
🌺🌺🌺🌺
تاني يوم..
الساعه 12:00قبل الظهر..
وجيهه:مرة تانيه اختاروا الجو والوقت المناسب للطلوع..
لينا بإبتسامه:ان شاء الله...المهم توا اللاي بنحكي معاك ع مشوار امس..
وجيهه:ايه وين كان؟!...
🍁🍁🍁🍁
"غير علاش هدا كله يامروان..والله ماهو لازم بكل"
مروان:ريت هالحاجه الكبيره ياعمي..
:ربي يهديك ياولدي خش تفضل خش..
ومشي مروان خش للمربوعه..
وشويه وطلعت ام منى شافت اللي جايبه مروان قالت:حي عليك حشمه غير علاش هدا كله بس..
كان جايب معاه قضيه كامله خضرة وسبيزة..وحاجات لمنى ولولده..وحتى من الحلويات جابهم..
••في الكوجينه..
منى تشبح للي جابه بكره...
وامها تقول؛وكان تروحي مع راجلك خير مش معقوله في كل جيه يخش علينا خشة زي هادي .
ع جية بوها..
:منى اطلع لراجلك..
تنهدت وهزت راسها بإيجاب..
ومشت طلعت من حداهم..
بوها؛متأكده ماصاير بيناتهم شي؟!
امها:هي تقول مافي شي لكن الباين غير هكي بالمرة..
بوها تنهد وقال:يستر الله...
•••في المربوعه..
خشت منى عليه وهي لابسه حجاب..
هو لما شافها ناض بش يسلم عليها...
بس هي قعمزت بعيد عنه بدون ماتصافحه..
هو قعمز وقعد يشبحلها شن لابسه وقلبه ينعصر عصر..
منى:خلاص قررت..
مروان عقد حواجبه وقال:ايه تنوضي تروحي معاي..
منى ابتسمت بتهكم وحركت راسها يمين ويسار..
مروان:ماطلعنيش عن طوري منى والله لو قعدتي مسكره راسه ولدك تنسيه..
منى:بدير زي مادار محمد..
مروان:واحرف منه...
منى:بدال ماتجي تتأسف وتطلب السماح جاي تهدد فيا!!اني هكي زدت تأكدت ان الطلاق احسن شي ليا..
وناضت بتمشي..
هو ناض بسرعه لحق عليها وشدها من يدها..
منى وهي تجبد في يدها:حول يدك حول..
مروان:اسف اني اسف لكن انتي طيرتهالي...قعمزي خل نتفاهموا بالعقل...
قعدت تشبحله بحده..
وهو يشوفلها برجاء..
جبدت يدها بقوة ومشت قعمزت..
هو ابتسم بفرح ومشي قعمز جنبها..
🍁🍁🍁🍁
"ماتشبحش في الظروف"
لينا:اللاي مافيش ظروف تمنعهم يقيموا تليفون ويتصلوا ينشدوا عنها راهو المراة خسرت جنينها وقريب عدت فيها واللي صار معاه سبق اللي صار لرنده..
وجيهه:اني لما كنت معاها في العياده عاملتني بأسلوب زي الزفت..
لينا:وقتها ماتنلام ع شي ياللاي ع عينك ظرف بنتك رنده..
سكتت وجيهه..
لينا:حتى قدام هلها ياللاي ماتحطوهاش وتحطوا ارواحكم في موقف..
سكتت وجيهه وهي تفكر في كلام لينا..
🍁🍁🍁🍁
منى:اني مانبيش اكثر من قدري واحترامي مش طالبه نطلع  من الحوش..
مروان؛عندك حق..وصدقيني يامنى حتشوفي كيف حيتغير كل شي..
منى:وبالنسبه ليك انت مش حنصفى من ناحيتك وحيقعد في عقلي وقلبي اللي درته ومش حننساه لين نموت يامروان..والله ماوليت لولا ولدي..
مروان ابتسم وهز راسه وقال:براحتك المهم تقعدي معاي..
منى:طبعا مش حنولي لبعد مانكمل الاسبوع هدا في حوش اهلي..
مروان:ولو انه حيكون صعب عليا لكن عادي مش مشكله نصبر ونتحمل..
ناضت وقالت:الشريف راقد ومانبيش نوضه..
ولفت ومشت طلعت..
وهو معاه بعيونه وابتسامه حب ممزوجه بالفرح ع وجهه
🌸🌸🌸🌸🌸
ونفس ابتسامه الحب..
كانت ع وجه رياض وهو يشوف لرتيل وهي طالعه من المدرسه وكالعاده لحقها للحوش..
بعدين توجه لحوش اخته الكبيره...
اخته هادي عندها بنات ووحده فيهم تقرا شهاده ثانويه وكانت لخالها اخت وصديقه..اسمها ميسم..
••تفضل ابو الروض..
خدي رياض طاسه السحلب وقال:صحيتي..
قعمزت ميسم وقالت:سلمك..قولي شن جو القرايه..
رياض: ماشيه الحمد لله..ش جو قرايتك انتي.
ميسم:اهو دبس وتني ركاب..
رياض:ادهنيهم بالزيت ركابك..
ميسم:لا ماتزيدش تخوفني..
ضحك وقال:باهي خلينا من القرايه توا..
ميسم:اوو شكله موضوع خطير..
ابتسم وقال:مهم جدا بالنسبه ليا...شرب من السحلب وحط الطاسه ع الطاوله وقال..امم...مليح السحلب...وضحك..
ميسم بضحكه:خشن في الموضوع خش...
تنهد ومسح كفوفه في بعض وقال بجديه:في بنية عاجبتني ونبيها بالحلال..
رفعت بنت اخته حواجبها وهي متفاجئه..
رياض؛المشكله انها صغيره تقرا اول ثانوي يعني مستحيل اهلها يعطوها توا..
ميسم:شور..
رياض:واني مانبيش البنت تريح مني نبيها تعرف نيتي اتجاهها وتقتنع بيا وماتشوف لحد غيري لين تطلع من المدرسه وقتها اني حنكون واصل لسنة التخرج نخطبها وبعد التخرج الزواج..
ميسم؛اياه انت مخطط لكل شي..
رياض:من اول مرة شفتها فيها..
ميسم؛وين؟
رياض:طالعه من حوش صاحبي مبشر صاحبة اخته وتسكن في نفس شارعهم...وشفتها مرة تانيه صدفه في غنيمه..
طالع من البحر بعد ماعمت لين طاح جهدي لما شفتها حسبت روحي بديت نهلوس بيها..
ضحكوا..
رياض بضحكه؛لين تأكدت اني شفتها هي..وقعدت غادي تلاته ايام هي وعيلتها....سألت عنها وعن عيلتها مافي حد ماشكرهمش وهي زادت خشت راسي اكثر واكثر..لين كبدت عليها..
ضحكت ميسم..
رياض بإبتسامه؛نبيك غدوة تجي معاي وتكلميها...
ميسم؛وين نكلمها؟!..
رياض؛في المدرسه االلي تقرا فيها؟
ميسم:كيف!!؟
رياض بإبتسامه:تو نقولك كيف...
🍁🍁🍁🍁
"ماتملش حتردها زي ماردت اللي قبلها"
مبشر:لا هالمره نبيك تعطيها رساله تقراها قبل بعدين تقرر تاخد الهديه ولالا..
الهام؛فكرة مني حكاية الرساله هادي!؟
مبشر:واحد صاحب..
الهام:مقدم جوكم..
مبشر رفع حاجبه وقال:وعلاش شن هو الجو الجديد اللي تعرفيه!؟
الهام بضحكه ارتباك:لا وخيي مانعرف فيها حاجه..غير تكلمت هكي وخلاص..
مبشر تنهد وقال:تمام المهم صري عليها تقرا الرساله الرساله اهم من الهديه..
الهام:باهي فهمت..
هز راسه ومشي طلع من دارها...
هي قالت:خلا عندي فضول نقراها...لالافكني منه..
ومشت دستها في شنطتها هي والهديه بعدين طلعت كتاباتها بش تقرا..
🍁🍁🍁🍁🍁
وبعد العصر..
مشت وجيهه ومعاها عفاف لحوش اهل منى بش يطمنوا عليها..ومروان في خشة اهله حتى هو ماخلا ماجاب..
كان يبي يدير قدر لمنى قدام اهلها...
استقلبتهم استقبال كويس قدام اهلها..
لكن كانت موطيه عليهم العين فالهدرزة وعفاف وامها لاحظوها..
••••••
"دايرة روحها حرجانه الللا ع اساس ماتعرفش اللي حني فيه"
مروان:يام من حقها تاخد ع خاطرها ماحد دورها بكل..
عفاف:اني ماسمعت بشي من الاول..وبعدين هانا مشينالها شن مازال تبي تاني السفيرة عزيزة..
مروان عقد حواجبه وقال:معليشي لو سمحتوا ياريت تردوا بالكم وانتم تدووا عليها قدامي..
وجيهه:تعالى مدني بالكف وخلاص بش نتربى ونعرف ندوي عليها..
مروان بضيق:مش هدا قصدي يام..لكن زي مادايرين لغيرها قدر ديرولها حتى هي..
وجيهه:شن قصدك!؟قصدك اني دايره الفرق بينها بين لينا!؟ الزوز عندي زي بعض مافيش فرق بكل..واهي مرت خوك قايمه الحوش كله فوق دماغها وتعاني فينا كلنا وهي تضحك وفرحانه..وفوق مارت وشافت برا شوف كيف تتعامل مع خواتك وشن دير معاهم..
عفاف:في اللي هناك يعرف كيف يدخل روحه في الناس ويكسبهم ...
مروان:تو منى طلعت ماتنفعش ومادير في شي!؟
وجيهه:ماحد قال هكي..انت اللي قارنت مش حني...الزوز زي بعض عندنا كلنا مافيش فرق في المعامله...والزوز بنات اصول ودايرات واجبهم...
عفاف قلبت عيونها بعدم رضا وشبحت للروشن..
ومروان قعد ساكت ومن داخل دمه محروق..
بس شايف روحه مضطر يسكت..مايبيش يخسر امه...
🍁🍁🍁🍁
في الكوجينه ...
واقفات مع بعض يهدرزوا...
لينا:من رايي مادخلي حد واسطه بينك وبينه عدي كلميه بروحك مش حيردك..
رنده:خايفه يعصب عليا..
لينا:وكان عصب وقال كلمتين معليش هدى خوك يقولوا يضربك ويضرب عليه...في النهايه همه كله مصلحتك يارنده..
تنهدت رنده بخوف وقالت:ماشيتله..
لينا هزت راسها وقالت:عدي..
خدت رنده نفس..ومشت طلعت من الكوجينه..
ولينا معاها بعيونها لين ادرقت بعدين تنهدت وبدت توتي في العشي...
🍁وصلت رنده في المربوعه..
في الوقت اللي خشت فيه سيارة مروان للحوش...
خدت نفس...وخشت للمربوعه..
لقت خوها يشرب في الشاهي الأخضر ويتفرج ع الاخبار..
حس بيها خشت بس تجاهلها..
رنده:سفيان..
ماعدلش عليها..
هي مشت قعمزت جنبه وقالت:اني آسفه..
شبحلها بحده..
نزلت عيونها لوطا بخجل..
سفيان:اطلبي السماح من ربي ع الجريمه اللي درتيها..
رنده دموعها نزلوا وقالت بخجل:والله اللي درته خير مش جريمه..
رفع حواجبه وقال:صار مش حاسه ان اللي درتيه غلط!
رنده بنبرة باكيه :لاعارفه انه غلط..لكن...وقعدت تبكي..
هو غير عيونه عنها وشبح القدام بنظرات امتعاض..
كانت واجعاته بس مش قادر يعديلها اللي دارته ولالقيلها مبرر مقنع يشفعلها عنده..
سفيان؛باهي انتي شن جايه تبي..
رنده هدت بكي وقالت:كيف عرفت اني نبي حاجه؟
سفيان:مش اني اللي نغبى فيك يارنده..
مسحت دموعها وتنحنحت بعدين قالت:نبي حقي..
حرك عيونه جيهتها..
رنده:نبي حضانة بنتي ونبي حقوقي كامله..مش حنخليه يعيش مرتاح بعد اللي داره..
سفيان قعد يشبحلها وهو ساكت..
رنده رفعت عيونها فيه وقالت:انت قتلي انك وراي ومش حتخليني..
سفيان:يعني متأكده من قرارك؟ راهو الحكايه مش حتكون ساهله حتتعبي هلبه لازم تكوني مستعده تتحملي كل شي بيصير بعدين..
رنده:انتم تتحملوا ؟
سفيان:اني وبوي معاك لأخر لحظه..بوي بالذات هو اكثر من يبيك تاخدي حقك..ممكن اكثر منك حتى انتي..
رنده مسحت دموعها ورشفت وقالت بحسم:امم مستعده..
تنهد سفيان وقال:حسبنا الله ونعم والوكيل نعم المولى ونعم النصير..
رنده بصوت هامس:يارب..
ع خشة مروان للمربوعه..
هي لما شافاته طول ناضت وطلعت حداهم..
وهو تجاهلها ومشي قعمز حدا خوه وقال:خيرها..
سفيان؛تبي ترفع قضيه حضانه..
مروان برفعة حواجب:ايوه وتفتح باب الفضايح!
سفيان:ارجوك مروان...بوي يبي هكي حتى هو..
مروان:كيف يبي هكي..تعرفوا انتم شن حيصير في قضيه زي هادي تعرفوا هداكا الحيوان شن حيدير؟!
سفيان:اني حنستشير محامي قبل لندير اي شي..
مروان:وعد للألف..
سفيان تنهد وشبح للتلفزيون وقال:شن صار فيك؟
مروان بإرتباك:في شني؟!
سفيان؛فيك انت وعيالك نفسيتها تعدلت؟
مروان تنحنح وقال:ايه الحمد لله امورها تمام وان شاء الله اخر الاسبوع مروح بيها..
هز سفيان راسه وقعد ساكت..
بلع مروان ريقه وحك شعره من الخلف وقال:ترا حط ع بي إن سبورت..
سفيان:في حاجه اليوم؟! ليا وقت عالكورة..
مروان:الدوري الانجليزي بادي..
سفيان رفع حواجبه:اوووو..وخدي الريموت وحط ع القناة الرياضيه وانشغلوا هو وخوه باخبار كرة القدم ونسوا هموهم شويه...
🍁🍁🍁🍁🍁
وجي اليوم اللي بعده...
ومع الساعه العاشرة صباحا كان الحاج الشريف مروح لحوشه من حوش اخته...لكن الحاجه زبيده مش معاه..
••وجيهه:علاش ياشريف!؟
الشريف:غادي اريحلها..قالت بنتي ملزومه بيا مش الكنه..
وجيهه بصدمه:كيف!؟ معقوله اللاي تقول هكي؟!
الشريف:الحق ياوجيهه هي تعبت ومعاش عندها حيل للمشاكل واني فضلت تقعد عند ربيعه..
وجيهه:خايفه يقولوا عليا قصرت معاها..
الشريف:مافي يقوله الكلام هدا ليها فوق 20سنه عندنا تعاني فيها خير منهم تقول امك واني شاهد وهما توا عارفين ظروفنا..
وجيهه:كيف عارفين ظروفنا!؟
تنهد الشريف وقال:حكيتلهم اللي صار مع رنده بس ماقال سفيان..تعاركت هي وياه وطلقها وسفرها وخدي منها البنت..
وجيهه اضايقت ع الآخر..
الشريف:تو بيبدوا يجوك ع خاطرها...خليك مستعده..
ومشي حول كبوطه وعلقه ع الشماعه ووجيهه تشبحله بضيق..
تو بتبدا تسمع وتشوف مالايسر...والمتشمت اكثر من اللي واجعه الحال...
🍁🍁🍁🍁🍁
"بعتتها؟!"
مبشر بإبتسامه جانبيه:ايه..بس بعد نوصل فيها مش عارف كيف بنقعنها ان هدا تعبيري وهدا خطي.
ضحك رياض وهو يسوق بعدين قال:قوللها خدوني بعين..
ضحك مبشر بعدين قال:ان شاء الله غير تلينها شويه..
رياض؛تو انت مش قتلي انها تبادلك نفس المشاعر ع حسب ماقالتلك اختك..
مبشر:ايه..بس اني نبي التواصل بيني وبينها يكون مباشر معاش نبي جو المرسول هدا..
رياض:اسمع كان البنت ماعندهاش في جو العلاقات والدوة زايده اخطبها طول وخلاص..
مبشر:لالا لازم نتعرف عليها ونعرفها قبل بعدين نديرها الخطوه هادي..
رياض:كيف قصدك كان ماعجبتاكش عن قرب تفوتها؟
مبشر:لا مانفوتهاش..كل حد يمشي في حاله وخلاص الزواج هدا يبي الزوز يعرفوا بعض كويس هادي قناعتي..
عقد رياض حواجبه بعدم رضا..وماباش يعلق ع كلام صاحبه..
وصلوا الزوز في القاعه..
خش مبشر وهو يقول:مثقل دمها المحاضره هادي..
وخش بعده رياض وقال:مثقل دمها وبس...لكن مجبورين نحضروا..
مبشر:هيا هادي..
🌸🌸🌸🌸🌸
"خودي"
رتيل بضجر:افف..مايملش خوك هدا..
الهام:غير اقريها قبل بليز ريتا قبل تم الإستراحه..
رتيل قلبت عيونها بملل...
بعدين فتحت الظرف وطلعت منه الرساله..
فتحت الورقه...
اول ماشافت الخط عجبها وقالت:متحسن خطه..
شافت الهام الورقه تفاجئت وقالت بإبتسامة ارتباك:ايه وهلبه..
بدت تقرا في رتيل...كلام مكتوب من القلب..
اللي كتبه كان يترجم في مشاعره بالحرف...
(عارف اللي بتقوليه توا....هدا مايملش....وعارف ان فكرة الرساله بحد ذاتها حتخليك تحكمي عليا حكم مش حيعجبني...
لكن الأهم من هدا كله..وهو اللي لازم تعرفيه...
ان في قلبي ليك شي انتي نفسك ماتقدريش تتخيليه..من لما شفتك واني مش عارف شن صارلي...وليتي شغلي الشاغل..لقيت روحي بدون مانحس نرسم معاك في المستقبل..قلت هادي هي اللي حنكمل معاها عمري)
ابتسمت وهي عاقده حواجبها بعدم تقبل..
(نتخيل فيك توا وانتي تقري في كلامي..عاقده حواجبك ومستغربه ومش متقبله اللي قريتيه)
رفعت حواجبها بدهشه..
(حاسه في كلامي مبالغه بس والله وصدقيني مازال ماقلت شي ولاحكيت شي.....مانبيش نطول عليك...لان خير الكلام ماقل ودل..نبيك من قلبي ومانبي شي في حياتي غيرك..انتي ويجي بعدك كل شي....نتمنى من الله يكون لكتبته لقي لقلبك طريق وحسيتي بيه....
                                مبشر)
ارتسمت ع وجهها ابتسامه خفيفه وتنهدت..
الهام:حي عليك دختي.ترا اقريلي شن كاتب؟
رتيل طوت الورقه وردتها للظرف وقالت:نقرا عينك..وخدتها وحطتها في حيب التوب متاعخا..
الهام بضحكه:اوو صاب الهدف..
رتيل سكرت السوسته متاع الجيب وقالت:صاب عينك..قولي لخوك الجو هدا مايمشيش معاي واللي في باله مش حيصير منه..حاليا مانبي ننشغل بشي غير قرايتي وقوليله حتى هو يلهى بقرايته من غير دوة فاضيه..
الهام:باهي علاش دسيتي رسالته..
رن الجرس..
ناضت رتيل وتعنقت ذراع الهام وقالت:هي تعالي نلحقوا ع الطابور قبل لتطلع ابله نزيهه..
ومشت بيها تجري والهام تضحك عليها..
🍁🍁🍁🍁🍁
الساعه 12:15 قبل الظهر..
في احدى المقاهي..
كان مقعمز يستنى ويشوف للساعه وللباب..
لعند ماشاف صاحبه ومعاه واحد خاشين..
شاف صاحبه كيف يكلم في اللي معاه وهما يشبحوله بعدين جو ناحيته..
لما وصلوا فيه ناض وقف..
الزوز قالوا:السلام عليكم..
هو رد:وعليكم السلام..
ابوبكر مد يده وصافحه وقال:شن الامور..
سفيان:تمام الحمد لله..
طلقوا ايدين بعض وابوبكر قال:انس الهمالي المحامي..
سفيان ابتسم مجامله ومد يده وقال:سفيان بن عامر..
صافحه انس وقال:فرصه سعيده..
سفيان:شكرا..قعمزوا تفضلوا..
قعمز انس...
ابوبكر:اني عندي مشوار قريب من هني ربع ساعه وجاي.
هز سفيان راسه بآيجاب..
وانس يشبحله..
مشي ابوبكر...وسفيان شبح لأنس وقال:تشرب قهوة؟
انس:مرة..
سفيان هز راسه ونادى ع النادل..جاه..
سفيان:زوز قهوة وحده معدله والتانيه مره..
النادل:حاضر استاذي..ولف ومشي...
سفيان:ان شاء الله مانكونش عطلتك ع شي ابوبكر قال حصل معاك الموعد بالسيف..
انس:فعلا مشغول هلبه وع خاطر ابوبكر عطيتك من وقتي ساعه..
ابتسم سفيان مجامله وفي نفسه قال"شكلي بنتعب في التعامل معاه هدا"
حط انس مراقفه ع الطاوله وشبك صوابع ايديه في بعض وقال:ياريت تخش في الموضوع..نسمع فيك..
هز سفيان راسه وبدي يحكي لأنس..
وانس منصت انصات تام..
جت القهوة...قعد يشرب فيها ويسمع في سفيان شن يقول..
لين نهي سفيان كلامه..
حط فنجانه وقال:امم..الموضوع نوعا ما معقد..
سفيان؛كيف يعني قضيه خاسره؟
ابتسم ابتسامه جانبيه وقال:ماقلتش هكي..بس لازم نسمع منها هي..
سفيان:علاش اني حكيتلك كل شي!
انس:مش زي مانسمع منها هي زي مانسمع من حضرتك..المحامي لازم يسمع من موكله مباشرة بش يعرف كيف يدافع عنه..
سفيان غير عيونه عنه وقعد يشبح القدام وهو يفكر..
وانس يشرب من القهوة ويشبحله..
هز سفيان راسه بعدين شبحله وقال:مش مشكله..
انس حط الفنجان وقال:ومفروض مايكونش في مشكله..اني فاضي بعد يومين بعد العصر تقدروا تجوني للمكتب..
سفيان شبحله وقال؛اني نفضل اللقاء يكون في مكان تاني..
انس رفع حواجبه ونزلهم بعدين قال:تمام...طلع الكرت متاعه..هدا رقمي لما تحدد المكان كلمني وذكرني بالموعد..
سفيان خدي الكرت وهز راسه بإيجاب..
ناض انس وقال؛شكرا ع القهوة..السلام عليكم..ومشي..
وسفيان معاه بعيونه وهو يقول:وعليكم السلام..
قعد يشبحله لين طلع بعدين شاف للكرت وضيق عيونه...
شويه وخش ابوبكر..قعمز حداه وقال:هاه شن صار؟
سفيان شبحله وقال:هو ديما هكي ولاغير اليوم بس!؟
ابوبكر بضحكه؛طبعه جدي شويه..
سفيان:رافع خشمه شويه..
ابوبكر:لا ابدا هو هكي غير انت ماتعرفاش..
سفيان؛ماعلينا..المهم ينفعنا..
ابوبكر؛ماجبتهولك الا واني عارفه محامي شاطر وعارف شغله..ولو شافت متجهم هكي بسبب الظروف اللي  صايرة معاه..
سفيان:ظروف شني!؟
ابوبكر تنهد وقال:مالاش هلبه مطلق من مراة الله لايوريك حتى لعدو مانتمناها..وحده حرفه لسانها طويل مش عارف كيف صبر عليها 5سنين..
سفيان:قصدك هو يحكي عليها هكي!؟
ابوبكر:لاطبعا..يخي الى الآن وين ينشده عنها حد يشكر فيها ويقول ماتفهمناش هدا علاش انفصلنا..
سفيان:باهي كيف عرفتها مش كويسه ماتقوليش من دوة النساوين..
ابوبكر:ياريت ياصاحبي..ريت بعيوني وسمعت بوذاني في وفاة بوه شن دارت..اقسم بالله صوتها مسموع للخيمه وهي تتعارك مع امه خالاته ولما خش مسكين بش يسكتها فتحت فمها عليه حتى هو..
سفيان وهو مفنص عيونه بغضب ودهشه:وعلاش مادفنهاش في مكانها!؟
ابوبكر:هو شخصية صبورة..تحسه حليم هكي..وعنده حكمه..اللي عرفته بعدين ان حطها في حوش اهلها قعدت فتره وردوها خوتها..قالوا مشت باهيه مده وبعدين ولت لحالها الاول..
سفيان:وشن صبره عليها 5سنين راك تقولي يحبها!؟
ابوبكر:تي هي كرهاته في روحه شن بيحب فيها حتى زواجه منها تقليدي..اخت صاحبه كان يمشي عليهم ويجي عجباته العيله قال نخطب منهم  ودارها في روحه حتى صحبه خسره في جرتها..ماصبره عليها كان صغاره متعلق بيهم هلبه..
سفيان:وهما الضحيه..
ابوبكر مط شواربه لداخل بأسف ورفع حواجبه ونزلهم..
سفيان:ع هكي هدا مرات يحط عقدته من نساوين في اختي..!
ابوبكر بضحكه:كان هدا من 5سنين ماربحش فيها قضيه وحده..الراجل حقاني وعقله كبير..
هز سفيان راسه وقال:ع العموم هو عطاني موعد بعد يومين بش يسمع من اختي ع قولته..واني مانبيش اختي تخش مكاتب محاماه والناس تشوفها..
ابوبكر:شي زي هدا مايدرقش ياصاحبي.
سفيان:عارف..لكن مش البلاد كلها تسمع بيه..يقعد في حدود العيله وتم..ع الأقل حاليا...
ابوبكر وهو يفكر:شن رايك تجيبها لحوشي وتجي ونقوله هو يجي ويجيب امه وصغاره بش يبدا الموضوع طبيعي جدا وغادي يسمع منها وهي تتكلم بأريحيه..
قعد سفيان يشبحله وهو يفكر..
ابوبكر:وبالمرة جيب معاك عيالك..
تنهد سفيان وغير عنه عيونه بعدين هز راسه بالموافقه..
ابوبكر ابتسم وقال:خلاص نراجو فيكم بعد العصر ان شاء الله..
سفيان:ان شاء الله..
ابوبكر:تمام..هي اطلبلي اكسبريسو...
سفيان عقد حواجبه وقال:نوض تحرك قدامي نوض منوض ع قولت امي..
ابوبكر وهو يضحك:عندك حق وقت غدي خل نمشوا لمطعمنل هداكا..
سفيان:مطعمنا هداكا انساه خلاص معاش بنعزمك عليه مرة تانيه..تبي تعزمني انت باهي..
رفع ابوبكر حاجبه اليسار وقال:حتى الشاورما تشبع تو ناخدوا من القهوة اللي جنب هادي تلاته شاورما وحده ليك ووحده ليا..ووحده نقسموها بالنص..
سفيان بضحكه:عندي حوش نتغدا فيه بلا منيتك..
ابوبكر:والله حق...تطييب حوشكم ماكليتش زيه هي نوض نوض..
وناض ابوبكر ومشي بيطلع..
وهو سفيان يشبحله بدهشه..بعدين حرك راسه يمين ويسار ودفع الحساب وطلع وراه...

يتبع …
الفصول الاربعة