شكولينا

الجزء الرابع

#شكولينا 🍫
#الجزء_الرابع
#الجمان_الفريد

اللي فايتاته صلاة او خش عليه وقت صلاة يصلي الأول بعدين يقرا...اول ماتتحاسب عليه الصلاة يوم غدوة...💕
《تنويه...في كلام حيكون مؤذي وغير مقبول نعتذر عنه مسبقا بس هو ع لسان الشخصيات اللي في منهم هلبه في مجتمعنا ومايعبرش ابدا عن وجهة نظري...نتمنى انكم تحاولوا تتقبلوا لان كل شي حنكتبه حيخدم قصة الروايه والرساله متاعها》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
انفتحت بوابة الحوش..
طلعت سيارة سودا عاليه عائليه...
ولحقتها سيارة صغيرة رماديه...
السيارة الاولى كانت لسفيان..
رافع فيها امه ومرته واخته عفاف وصغارها ومعاهم رنده..
والتانيه لمروان..فيها مرته وخواته رتيل ونوريه بصغارها...
كلهم متوجهين لواحد من اكبر مدن الألعاب في مدينة طرابلس...
وطول الطريق وبنات وجيهه يهدرزوا مع خوتهم وينكتوا ويضحكوا..ومرة مرة الصغار يتشاكسوا يعاركوا فيهم..
لين وصلوا للمكان المقصود..
بعد مانزلوا من السيارات..
طول الصغار قعدوا يجروا ورا الألعاب وخوالهم معاهم..
اما النساوين خدوا طاولات وقعمزوا..
وهما يتفرجوا ع الصغار كيف بدوا يركبوا الألعاب وخوالهم معاهم..
نوريه:ياه قداش ليا ماطلعتش حسين ديما لاهي في الخدمه وقراية هالصغار حبستني في الحوش..
وجيهه:كان قلتي لواحد من خوتك يجي يطلعك..
نوريه:خوتي شني يام يخدموا ويتعبوا ويبوا يرتاحوا حتى هما..
وجيهه:مرة تانيه كلميهم كان استحقيتي لحاجه ولاتبي تطلعي..
نوريه بضحكه:ان شاء الله..
رنده:كان تقولوا لواحد فيهم ياخدنا قهوة وحاجه حلوة..
رتيل:تو نوض نكلمهم..
ناضت رتيل ومشت لمروان..
اللي كانت تشبحله منى من ورا الخمار بغيظ وشاده دموع القهرة بالسيف..
اما سلفتها زهور فكانت حتى هي تشبح من ورا الخمار في سفيان كيف يلعب مع الصغار ويضحك معاهم..
وقلبها موجوع وصدرها ضايق...
🍀🍀🍀🍀🍀
"عندي صبيتين مع عمتي ولامرة فكرت نخلي العويله حداهم وين نطلع والله كان قتلهم بنخليهم ياكلوني من غير ملح"
لينا وهي لاهية بصنع قوالب الشوكولا:خلاص عاد غيرن السيرة غميتن قلبي..
هناء :قصدك قلبك مش منغم من قبل انتي!
لينا ابتسمت وقالت؛لا وماعندي ليش نعمه هادوم عويلة خوتي يعني صغارنا وكان خلوهم على قلبي كيف العسل..
هناء وهي تحاول تكتم عصبيتها:نانقول نغيروا السيرة احسن..
لينا بضحكه:قتلكن..
امال:قداش بديري طرف..
لينا:100..ايه حقه بنقوللكن..
هناء:قولي..
لينا وقفت شغل وشبحتلهم:لقيت اسم لشكولاطي..
امال بضحكه:شن هو شوكولاطه انتي..
لينا ابتسمت وقالت:شكولينا..
هناء رفعت حواجبها وقالت:شكولينا..يهبل..
امال:ايه والله حلو..قوليلي كيف خطرلك..
لينا:ماخطرليش ني..
امال:مالا لمنو خطر؟!
لينا وقلبها بدي يدق بقوة قالت وهي بشي من الارتباك:خالتي بريكه..
هناء؛بريكه!
امال:تعرفي لينا نحس فيها تبي تخش معاك فهالخدمه هدي..
لينا؛كيف ان شاء الله
امال؛مرة ديرلك دعايه وتوا لقتلك الاسم..
لينا:تساعد فيا ياام سوء الظن انتي..
امال؛ايوه خليها تساعد وبس مانبوش نكثروا الشركه لينا..
لينا بضحكه:شركه مرة وحده! والله المراة مافي بالها حاجه غير انها تساعدني..المهم توا قولي لراجلك ع حكاية الاسم خل يتفاهم مع الجماعة اللي يجيبولنا في صناديق والتغليف متاع الشكولاطه يديروا عليها الاسم الجديد..
امال؛تمام..
لينا ابتسمت بعيون تلمع وهي تقول:الله يابنات تخايلن تنشهر شكولاطي في ليبيا كلها وندير محل كبير كيف المحلات المشهورة ونطلع حتى برا..
هناء بإبتسامه؛ان شاء الله ياربي ربي ينولك ماتمني..
لينا وآمال:آمين..
"تعالن يابنات اطلعن للجنان حدا العويله"
هناء تنهدت وناضت وهي تقول:هاني جايه..
مشت طلعت وامال قالت:راجيني..
وناضت لحقتها..
وخلوا لينا بروحها تخدم ع الشكولاته وهي تردد بهمس..
"استغفر الله استغفر الله استغفر الله"
🌺🌺🌺🌺
"اول مرة نذوق فتات زيه"
:فتات الجنوب مش زي فتات الجباليه والغرب..
عدنان:لكن مش عادي بنته في فمي..
:حتى الناس اللي عدينا تغدينا عندهم اليوم ذابحين وماخلوا مادارو وجابوا..
عدنان:ناس كرم اهل الجنوب حكوا عليهم وتوا شفت بعيني..
:الجنوب كل حاجه فيه سمحه..بالذات الشكولاطه..
عدنان شبحله بحده..
ضحك صاحبه وقال:والله مانقصد كان الشكولاطه بعينها..
غير عدنان عيونه عنه وهو يقول:هي نوض انت وياه ارواحكم عندنا مناوبه الليله..
🍀🍀🍀🍀🍀
بعد ساعه من اللعب..
خدوا الصغار ومشوا قعمزوا مع بعض..
سفيان كان مقعمز ع رجله بنت عفاف يوكل فيها..
وزهور عيونها عليهم..
اما عيون رنده كانت ع وحده مقعمزة مقابلتهم عيونها ع سفيان..
ابتسمت وقالت لعفاف:عيون المعجبات لاحقه سفيان كالعاده..
عفاف بضحكه:والله من بكري مركزة..
وزهور تسمع فيهم وولعت في قلبها النار..
عفاف نخصت رنده بعدين قالت بصوت مسموع:في وحده من بكري تشبح لرنوشه شكلها عجبتها اقري عليها سفيان..
سفيان شبح لعفاف وقال:قصدك ماقرتيش عليها انتي كم مرة قلتلكم اقروا ع صغاركم قبل اطلعوهم..
عفاف:والله نسيت..وااك وهديكا مانزلتش عيونها بكل..
شبحوا كلهم وين ماتشبح عفاف..
وسفيان كذلك...لقي البنت تبتسمله..
نوريه شبحت لرنده ورفعت حواجبها ورنده ابتسمت على جنب..
ومنى كذلك لاحظت وشبحت لزهور..
مروان بضحكه:البنت ماتشبحش لرنا تشبح لخالها..اقرا ع روحك اقرا..
فنص فيه سفيان..
وهما يضحكوا..
ووجيهة ضحكت وهي حاطه يدها على فمها..
زهور نزلت من عينها دمعه درقها الخمار..دمعه قهر ع حالها
مش لاقية ذرة احترام من عيلة من لما جتهم لاقصرت معاهم ولاقللت من احترامهم ومش محصله منهم كان كل شر..
والأمر..راجلها اللي مش دايرلها قدر بيناتهم بل يزيد يطيح فيه قدامهم...
كان الله في عون كل وحده عايشة اللي تعيش فيه زهور🍁
🍀🍀🍀🍀🍀
قاعدة تشتغل ع الشوكولا متاعها..
قامت عيونها تشوف في الساعه...تنهدت بعدين وقفت شغل وغمضت عيونها وبدت تدعي...
..يارب افتحلي عليا وارزقني رزق حسن وطيب يارب ووصلني للي نتمناه يارب..يارب ارزق اختي هنيوه الذريه وفرح قلبها يارب..
فتحت عيونها بعدين تنهدت وقالت..وماتخلينا ظالمين ولامتجبرين يارب انت عالم بالنوايا اللي مايحبلنا الخير ويودلنا الشر اجعل نيته تولي عليه ونجينا منه ومن شر يارب..
نزلت عيونها وكملت شغلها وهي تقول..
..يارب اتنا في الدنيا حسنه وفي الآخرة حسنة وقنا عذاب النار...
وقعدت تردد في الصلاة على النبي لين آذن المغرب..
••في الجنان
الحازة:هيا خشوا خشوا مغاريب..
امال:هيا تحركوا داخل..
خشوا الصغار كلهم للحوش وهما لحقوهم وسكرو الباب...
غ خشة سيارة عبد الله مروح بمرته ...
نزلوا من السيارة وركبوا طول لشقتهم ع الدروج البراني.
وعبدالله حامل ومحمل بأكياس حاجات واخدتهم مرته..
بعد ماخشوا لشقتهم...
وردة:ترا عبودي انزل جيب سلومه..
عبدالله وهو يحط في الكياس:حاضر..
ومشي بيطلع من الحوش..
وهي جت تجري للكياس تشوف في اللي خداته وبطير من فرحتها...
وهو بعد نزل لوطا وصل في الفم وقعد ينادي..
"سالم..سالم"...
امال؛سالم باتك ينادي عديله..
سالم؛نبي نقعد..
"سالم"..
جت الحازة لحفيدها خداته من يده وهي تقول بعصبيه:ماتسمعش في باتك..
سالم بدي يبكي وهو يقول:نبي نقعد نبي نقعد..
وحناه تجبد فيه جبد..
سالم ببكي:نبي عمتي لينا...وقعد ينادي..عمتي لينا..
ولينا وهي تصلي وتسمع فيه..
عقلها تشتت وقلبها يوجع فيها عليه..
عبدالله اللي كان واقف في الباب الفاصل شاف امه كيف جايه وهي تجبد في ولده..
لما وصلت فيهم دفاته لبوه وقالت:اهو ولدك..
عبدالله خدي ولده وهو يشبح لأمه بحده بعدين رفعه وهو يقول:لاحول ولاقوة الا بالله..
الحازة مشت وهي تقول بعصبيه:تعرفه الله انت...
ومشت للحمام..
امال وهناء وهما يشبحولها وحده فيهم قالت..
هناء:والله مانلومها..
امال:ولاهو اللي كيف مصبي في الفم وينادي لاقال نخش نشوف خواتي ولانهدرز عليهن..
هناء:متعودين بيه ع خاطر!
ع جية لينا وع وجهها ملامح الحزن:خيره سالم!
امال:باته يبيه يروح وهو مايبيش..
لينا:اني وعدته هو وصغار بعد نكمل نلعب معاهم..
هناء:الهي بروحك سلم وخيتي ماك قاعده ديما سيورك تعدي تزوجي خليهم يتعودوا يربوا عويلتهم برواحهم ومايعبوا ع امي..
لينا لفت ومشت وخلتهم وهي مضايقه..
وهما الزوز جو بيخشوا يقعمزوا في الدار..
وقفوا لما سمعوا صوت ورده وهي تلعلع..
"والله معاد رايين ظفره ولدي بالله"
امال؛ريت الحقيرة..
"حقد ياناس حقد مش عارفه ليش "
هناء:الحيوانه! الناس تسمع فيها..
امال:العيب عالهيدوق اللي واخدها..
.........
"خلاص اسكتي نقصي حسك"
وردة بعصبيه:خليني ياعبدالله دمي محروق قلبي معبي..
عبدالله:خلاص حبيبتي فوتي ماتنسيش راك حامل..
وردة:والله كان صارت فيا حاجه في جرة امك وخواتك..
هو جاها وقال:بعيد السو عليك..شد راسها بإيديه وباسه بعدين قال...ع خاطري اهدي غلاي..
تنهدت وهي مغمضه عيونها بعدين فتحتهم وقالت:ترا حول شويه..
بعد عنها..
هي خدت ولدها ومشت بيه للدار تقوله:ماتبكيش ماما ماتبكيش تعالى شوف شن خديتلك..
وعبدالله حط ايديه في نصه وهو يشوفلها بضيق..
بعدين نزلهم وتوجه للحمام...
🍀🍀🍀🍀🍀🍀
خشوا السيارتين للحوش...
نزلت وجيهه ومشت للحوش تجري تبي تكون موجوده في الحوش قبل مايروح راجلها وعزوزتها من حوش وحده من حمواتها..
نوريه وهي نازله:امي ماتبيش بوي يخش للحوش ومايلقهاش..
مروان: ياحسرة على نساوين الدق الأول ..
سفيان:والله صدقت ياحسرة..
زهور"ماهو كان خليتونا دابنا داب حياشنا راهو درنا زيها"
منى"ع اساس حني عندنا كيف نستقبلوكم وين تروحو!"
مشوا كلهم للباب..
ماعدا زهور ومنى ركبوا لشقاقهم بيغيروا..
رنده:انزلوا مش تباتوا وراكم عشي .
عفاف:اني بنروح مع اذان العشي..
مروان:سقدي يامنى...
ومشوا خشوا للحوش كلهم..
ماعدا سفيان اللي ركب لشقته...
كان راكب ورا مرته وقبلهم منى مرت مروان..
وصلت شقتها فتحتها وخشت..
وهما وصلوا شقتهم..
فتحتها زهور وخشوا..
سكر هو الباب ورمي اللي فرجليه..
وزهور بعد رمت كندرتها مشت طول لدار النوم..
وهو لحقها..
هي خشت للدار ورفعت خمارها..
شاف وجهها يبان عليها باكيه...ارتسمت ع وجهه ملامح الامتعاض..
مشي للدولاب طلع حوايجه من الدولاب ومشي للحمام بش يدوش.
ولااهتم لحالتها ولادموعها..
وهي متعوده خلاص..ولت معاش توجعها لامبالاته..
رن تليفونها طلعاته من جيب الجلابيه..
شافت المتصل تنهدت بعدين ردت..
زهور:ايوه سريوة..
اسراء اخت زهور
"هلا زهيره وينك من بكري نراجو"
زهور خبطت بيدها ع راسها وقالت
"لا ماصارليش اليوم سفيان مش فاضي"
"لالا! خسارة"
زهور:كلكم غادي؟
"ايه اني ومنال ونرجس ومفيده دارت ع خاطرك عصبان قالت قداش ليها زهور تقول خاطري فيه"
نزلت دمعتها وهي تقول:ربي يجبر بخاطرها وخيتي قوليلها قتلك زهور اعتبريني كليته
"يلا فيها خيره مرة تانيه وخلاص"
زهور غمضت عيونها وهي تحاول تشد روحها قالت:ان شاء الله..
"زهور...زهور"
زهور بآستعجال:سفيان ينادي فيا سريوة بنسكر..
"باهي بالسلامه سلمي ع العويله"
زهور:يوصل..وحتى انتي سلمي ع الجميع..
"يوصل..تصبحي ع خير"
زهور سكرت طول ومشت تجري لسفيان..
وقفت فم الحمام وهي تقول:نعم..
سفيان بعصبيه:ساعه! من كنتي تكلمي؟
زهور:اختي..قولي شن تبي؟
سفيان؛جيبيلي الفوطه...
زهور:باهي..
ومشت تجري للدولاب طلعت فوطه وجاته بيها تجري ...
بعد خداها منها ولت للدار وقعدت تبدل في حوايجها..
شويه وطلع من الحمام وهو ينشف في شعره طلع لقاها بتمشي وقفها وقال:شن تبي اختك؟
زهور؛يحسابوني بنجي..
سفيان؛ماقتيلهمش انك من جايه امس..
زهور:نسيت..
مشي خش الدار بدون مايعلق..
وهي تنهدت بعدين مشت طلعت من الشقه...
🏵🏵🏵🏵
ودارو عشاهم بسرعه هي ومنى...
وتعشوا عفاف ورنده واللي هادي جاها راجلها وروحت...
في الكوجينه..
منى:زهور شوفي شوفي..
شبحتله..
مشت منى للجرة متاع الميه المحوطه ع الطاوله خدتها بعدين رفعتها ودارت روحها طيحتها..
ضحكت زهور وهي تعض ع شاربها..
ومنى حطت الجره وهي تضحك وولت تكمل باقي غسل الماعين مع سلفتها..
زهور بصوت منخفض:لكن النويرة بردع عشره..
منى:ووك ياربي شن بيفوت هاليامات..
🍀🍀🍀🍀🍀🍀
"ان شاء الله غير ماتعبوكش ياعمتي"
الحازة؛سلامتهن عاقلات..
نجمه بإبتسامه:هي مالا تصبحي على خير..
الحازة:قدامك كل خير..
عبدالسلام:تصبحي على خير يما..
الحازة:قدامك كل خير ياباتي..
ومشوا بصغارهم لسيارتهم..
بعد ركبوا وطلعوا...خشت الحازة وسكرت الباب..
وفوق في روشن صالة شقة عبدالله..
كانت ورده واقفه تراقب؛تعرفي من تقدري ياعزوز النار..
وسكرت الروشن...
••لوطا
وصلت الحازة في الدار اللي ترقد فيها هي ولينا..
لقتها مقعمزة تقرا في القرآن..
تمددت هي ع فراش وتغطت بالبطانيه ورقدت..
اما لينا بعد كملت قراية قرآن فرشت لروحها ورقدت...
🏵🏵🏵🏵
وجي تاني يوم...
كان دوام لينا فهاليوم الصبح..
••"كيف كل مرة مش طايقات نساوين خوتي"
مريم:بصراحه يالينا هن ماينطاقن.
امل:نفس العينه اللي عندنا بالضبط حقارة ع براده..
لينا ضحكت بعدين قالت:ربي يهدي..قعمزت حداهم وهي تقول..خلونا في المهم..واخيرا لقيت اسم للشكولاطه متاعي..
ابتمسوا مريم وامل وقالت امل..
امل:ها شن هو؟
لينا بإبتسامه؛شكولينا..
بانت ملامج الاعجاب ع وجوههم بعد ماسمعوا الإسم وقالت مريم؛شكولينا..شكولاطه..لينا..
امل:الله محلاه كيف خطر عليك؟.
لينا تعكرت ابتسامتها لما سمعت سؤال مريم..
وكيف جت بتجاوب خشت عليهم بريكه..
بريكه:صباح الخير يابنات طلبة الامتياز جو..
امل:الله!وقامت تليفونها وحطت ع الكاميرا الأماميه وهي تشوف في وجهها ومكياجها بعدين ناضت وطلعت تجري..
مريم بضحكه موجهه الكلام للينا:وانتي امتى تلودي على روحك وتخدمي على راسك..
لينا رقصت حواجبها بثقه قالت:كان عندي نصيب لحد عندي مش نا اللي نعديله..
بريكه ضحكت وهي تقول:نجك ليا ياشكولينا..
مريم عقدت حواجبها وهي مبتسمه قالت:حتى بريكه تعلم بيها..
بريكه؛شن ماقتلكم لينا؟!
ارتسمت ع وجهه لينا ملامح التوتر والخجل..
مريم:لاقالت لكن اني حاسه في من وراها قصه..
ابتسمت بريكه وهي تقول:اها اسمعي ياحنه..
🌺وبدت بريكه تحكي لمريم..
وقلب لينا يدق بقوة..دقات متسارعه..زادتها توتر ع توترها وفي نفس الوقت خلتها تحس بشعور حلو....
مريم بدهشه؛حيي فرخه لينا!
لينا بإرتباك؛ليش حي شن فيها يعني!؟
مريم؛فيها واجد ياحنه قال قعدت في راسه وفكر فيها وليش يفكر فيها ويتعب في روحه كان مش صاحبة الشأن بروحها تهمه..
لينا؛فكيني من قطافك ترا..
بريكه بضحكه؛والله حتى انا فكرت فيها..وكان نقولك شن طلع اسمها بش تثبت..
لينا:بريكه!
مريم بفضول؛فوتيها وقوليلي..
بريكه رفعت حواجبها وقالت:عدنان..
مريم خبطت ايديها ببعض وقالت بضحكه؛برااا..عدنان ولينا..
بريكه تضحك..
لينا بإنزعاج ممزوج بالخجل:مبردكن..
مريم بدت تغني:عدنان ولينا..وبريكه قعدت تغني معاها..
ولينا معاش عرفت شن تقوللهم ناضت وطلعت من حداهم وهي متحشمه وشاده ضحكتها وقلبها مازال يدق بقوة..
وهي ماشيه..
جي قدامها ممرضه وقالت:باهي اللي ريتك الدكتور محمود قالك تعالي للغرفه رقم......فيها الجرحى اللي جو اولامس ودارولهم عمليه نزلوهم من العنايه..
لينا؛حاضر..
ولفت ومشت طول..
🍀🍀🍀🍀🍀
في حوش الشريف..
صايرة حالة استنفار..
فرش الحوش كله برا ماعدا البساطات..
استغلت نوريه صفاء الجو واعتداله ودارت حملة تنظيف لحوش اهلها..
او اشرفت عليها لان اللي كان ينفد..
منى وزهور...
واختها الصغيره استغلت غياب بوها وخوتها..
وشغلت المنظومه في الصاله وقعدت تهيج عليها..
زهور وهي تمسح في الانتريه تدعي بهمس:ياربي جيب سفيان على غفلة..
ومنى تمسح في مراية المدخل وتدعي في خاطرها نفس الدعاء..
ع خشة نوريه من برا..كانت تمسح في منادير جلسة المربوعه
سمعت صوت المنظومه ضحكت وهي تقول:حي ع رتيل.
وصلت في الصاله وشاشت لوحت الفوطه ع طول يدها وخشت الصاله شاشت مع اختها..
زهور ومنى شبحوا لبعض بإمتعاض بعدين اللي هادي لهت باللي دير فيه..
"ايييه ايييه ايييه..."
زبيده في الدار:وكان مازلت بصحتي راني نضت كسرتها ع روسهم..
وجيهه وهي تطبق في الدبش قالت بضحكه:خليهم يفرجوا ع ارواحهم شويه اللاي..
زبيده:يفرجوا ع ارواحهم يديروا العار!
وجيهه:مايسمع فيهم حد يااللاي اللي هدا لاهي بعمره..
"وين نويرة وين...وينها...وين رتوله وين وينها"
وزبيده تسب ووجيهة تضحك..
شويه مشت زهور بطريقها للدار وهي خاطمه من حدا الصاله شافتهم يتراقصو ومعاهم نور بنت نوريه..
ابتسمت مجامله وكملت طريقها للدار وصلت فيها..
زهور علت صوتها وقالت:اللاي شن ندير الغدي؟
وجيهه؛ديروا برا مكرونه ع الحطب نويرة خاطرها فيها..
زهور هزت راسها وقالت:باهي..
ومشت طلعت...
وفاتت من جديد حدا الصاله لقتهم قاعدات يهيجوا..
"يانا ياروحي هايمه"
ابتسمت من جديد مجامله وهي تقول في خاطرها..
"يارب جيب سفيان"
🏵لكن سفيان مش باينله جيه..
كان يعطي في المحاضرة متاعه...اللي مستحيل يخلي منها دقيقه..بس فجأة جاه تليفون...استأذن وطلع من القاعه..
والطلبه بدوا يهدرزوا..
بس في وحده ناضت ومشت لطاولته فتحت شنطة اللاب توب متاعه حطت فيها ومشت ولت بسرعه لمكانها..
:حي عليك حي ..
:والله ماهمتني حاجه طز..المهم هو يحس بيا ويعرف..
ع خشته وهو يقول:اسف جدا..وقف ورا طاولته وقال..ارجعوا ركزوا معاي كويس..
الطالبه اللي حطتله الحاجه تنهدت وقالت في نفسها..
"معاك ديما معاك والله"
🍀🍀🍀🍀🍀🍀
"لينا تعالى شوفي الحالات اللي في الطوارئ في من يبي قياس ضغط وسحب دم.."
لينا:حاضر..
مشت تجري وين ماقالولها..
خشت للطوارئ..
اللي كان موجود فيها"ياسين"..
طالب الامتياز اللي يكن مشاعر اعجاب اتجاه لينا من اول جي يدرب في المستشفى كل شي حلو في لينا جذبه ليها..
الاهم من شكلها الجميل..
طيبة قلبها..اسلوبها اللطيف..حشمتها وحيائها..اجتهادها في خدمتها وطموحها الكبير..
كانت  ملفته بداخلها زي خارجها لينا..برغم انها ماتلبسش في لبس ملفت ولافي مرة راها متزينه ولو بشي بسيط...
كانت طبيعيه لأبعد حد..وكلها حياء..
قعد يراقب فيها كيف تتعامل مع الحالات وكيف هما يبتسموا غصب عنهم وينسوا في وجعهم معاها..
بعد كملت شغلها ولفت ع باقي الحالات بعدين مشت طلعت..
ياسين وهو واقف ع وحده من الحالات ويشوف في لينا وهي طالعه مم ورا الستار:ان شاء الله لاباس ياحاج..
ومشي طلع حتى هو..
بس ماكانش لاحقها كان يدور ع وحده تانيه لين لقاها..
"ابله بريكه"
بريكه وهي تشبحله مستغربه في ملامح اللهفه اللي على وجهه:نعم ياسين..!
ياسين تنهد بعمق بعدين قال:نبي في موضوع ضروري..ضروري واجد..
🍀🍀🍀🍀🍀🍀
في الجنان...
مع الجو المشمس بلطف...والنسمه المعتدله..وريحة المكرونه ع الحطب..
كانوا مفرشين حصيرة مقعمزين عليها البنت وامهاوحناها..
قدامهم صفرة فيها طواسي شاهي وحليب ونفاص طن..
ترديده قبل الغدي..
الغدي اللي كانوا يعولوا عليه الكناين المش محسوبات في الترديده طبعا..
منى بصوت منخفض:جعانه حتى فطور زي الناس مافطرتش هديكا تحسب علينا في اللقمه..
زهور:اني نضت الفجر صليت ودرت لروحي فطور ملوكي زي مايقولوا ماخليت فيه حاجه عارفه اللي بيصير كان راجيت نفطر معاهم..
منى:باهي اني كيف ندير والله جعانه ومش قادره نقول نبي ولانقدر ندير بروحي..
زهور شبحتلهم لقت لاهيين بالهدرزة..
ناضت وهي تقول:تو نشوف..
ومشت خشت للكوجينه..
بعد هي خشت...رن تليفون نوريه..
قاماته شافت المتصل ابتسمت وردت:ايوه رنوده..
"نويرة شن جوكم"
نوريه؛يهبل مقعمزين برا ودايرين غدانا مكرونه ع الحطب
"وااااو ياربي..علاش روحت بس!"
ضحكت نوريه وهي تقول:شن غداك انتي؟
"لا اني اليوم بيطلعني محمد نتغدا برا ماخاطريش نطيب"
نوريه:اشيه ياحنه...
"والله ماعندي خلوق وين نشم ريحة تطييب نرجع"
نوريه:لاعندك حق المهم كولي كويس حاولي تشدي روحك راك حامل..
"باهي...قوليلي من عندكم"
نوريه:حد اهل الحوش بس..
"باهي شن صار في موضوع اخت زهور"
نوريه:وين نندري عليه اني..
"اسمعي قولي لاني تقول لسفيان يرفعها لحوش ماليها العشيه تجس النبض"
نوريه:امم..باهي..
••وزهور واقفه فم باب الكوجينه تأشر لمنى..
ناضت متى بهدوء بدون ماتلفت انتباه..
ومشت للكوجينه وخشت..
عطتها زهور فردة خبزة وطن وقالت:بري كولي..
خداته منى..
ع خشة نوريه شافتهم..
جبدت زهور النص من منى..
نوريه؛هدا فاش فالحات كناينا في في الخشرة بس..
زهور:خاطري فيه..
رفعت حواجبها وقالت؛خاطرك فيها! وكملت تقول بتهكم..فال وع الله الكمال..
منى شبحتلها بضيق..
نوريه:سيبي اللي في يدك واطلعي لأمي تبيك..
زهور عطت النص لمنى..منى خداته..
وهي مشت طلعت بعد نوريه...
منى قضمت  من النص بعصبيه وقعدت تاكل..
••برا
زهور:نعم اللاي..
وجيهه:اتصلي بسفيان وعطيهولي غير اني رصيدي تم..
زهور طلعن التليفون من جيبها وهي تقول:حاضر..
اتصلت بسفيان ومدت التليفون لعزوزتها..
خداته....
.............
وهو فهالوقت خش لمكتبه...
لما رن تليفونه حط الشنطه ع الطاوله وشاف المتصل:شن تبي هادي؟
فتح الخط ورد:ايوه..
"سفيان"
عقد حواجبه وقال:امي !
"شن حالك توا"
سفيان:الحمد لله..خير يام في حاجه!
"لامافي شي ماتخافش..غير نبيك بعد العصر ترفع مرتك لحوش ماليها"
رفع حاجبه وقالت:قصدك شكتلكم هي؟!
"تي لالا في موضوع نبيها تمشي ع خاطره"
سفيان:موضوع شني؟!
"مش ضروري تعرف كل شي ياودي"
سفيان ضحك..
"هاه شنو بترفعها ولالا"
ابتسم سفيان وقال:حاضر تو نرفعها..
"خلاص مالا برا كمل شغلك بالسلامه"
وسكرت..
هو ضحك وحط تليفونه في جيبه..
بعدين مشي طلع من المكتب وسكر بابه..
وهو متوجه لمكتب زميله وصديقه في نفس الوقت..
خطمت من جنبه معيده وقالت؛كيف حالك دكتور.
سفيان ببرود:الحمد لله..
وخش لمكتب صاحبه..
وهي ماشيه وتتلفت وتشبح لباب المكتب..
••في المكتب..
سفيان؛فاضي بوبكر؟
ابوبكر "صديقه" وهو لاهي باللاب توب؛شويه بس..
ضغط ع زر معين بعدين شبحله وقال؛-خيره وجهك مقلوب..
سفيان بإنزعاج؛فاد..مال..متبغدد..
ابوبكر؛غير خيرك ان شاء الله خير..
ع جية المعيده نفسها طقت باب المكتب..
لما شافها سفيان ارتسمت  ع وجهه ملامح الآمتعاض..
ابوبكر؛تفضلي استاذة.
المعيده وهي تسرق في النظر لسفيان؛بنسألك عن الدكتور عمر بيجي اليوم..
ابوبكر؛ايه كلمني وقال جاي..
المعيده هزت راسها ومشت طلعت..
شبح بوبكر لسفيان وقال:عارفها علاش جت ولا؟
سفيان؛لا ومانبيش نعرف..
بوبكر بضحكه؛باهي نوض نشربوا قهوة ..
سفيان:احسن شي..
وناضوا جميع ومشوا طلعوا من المكتب متوجهين للكافتيريا..
وهما ماشيين فاتوا من حدا طالبات كانوا مركزين مع سفيان..
:شكله ماقرهاش..
:وان شاء الله مايقرهاش بش مايودركش في ستين داهيه..
تأففت بضجر بعدين سكتت..
🍀🍀🍀🍀🍀🍀
"وانت تبيها جديات؟"
ياسين؛اها مال شن نبي نخطبها نا خالتي بريكه..
بريكه وزعت نظرها يمينها وهي تفكر..
ياسين؛راك تقولي عندها حد؟
شبحتله وقالت؛لاوالله نهائي..بس نبي نتأكد منك لأن لينا بنيه جديات مش متاع علاقات وكلام فارغ..
ياسين؛ولانا لي فيه الجو هدى نبيها جديات والله ناوي نخطبها هي بس تقول باهي نبعت هلي..
شبحتله بريكه شويه بعدين ابتسمت وقالت:حاضر تو نكملها..
ابتسم ياسين وقال:بارك الله فيك خالتي..نراجي منك في البشارة من توا..
ضحكت وقالت؛إن شاء الله...
...........
"وتيتهن مية طرف تعالن خودوهن العشيه ان شاء الله"
مريم ؛تمام..
امل؛بنات..
الزوز قالوا بأصوات متقطعه:شنو..اممم..
امل؛مش ماليه يدي من جابر وين نحكيلك ع الخطبه يغير الموضوع..
مريم:ماهو قتلك من الأول مش مريح انتي اللي سكرتي راسك عليه..
لينا؛كانك مش متريحه سكري عليك هالباب والله مامحصله منه كان الذنوب..
امل:بتبدا الشيخه لينا..
مريم ضحكت..
لينا:والله نا نصحتك وانتي حره..
ارتسمت ع وجه مريم ابتسامه وهي تقول:شكولينا شكولينا..
ولينا تلخبطت بالمرة..
امل:خيركم شكو لينت شني!!؟
فهاللحظه..
فات من جنبهم عدنان ومعاه واحد من صحابه و سرق نظرة لينا..
وقفوا التلاته وقعدوا معاهم بعيونهم..
امل:شن القصه فهمني يامصايب!
مريم شبحتلها وقالت؛نقصي حسك واسمعي..
لينا شبحت كم بالطو مريم وهي تقول بتوتر:شن بتحكي!
ومريم تتكلم ومش مدورتها..
هي شبحت لعدنان كيف وصل للدروج بيركب..التفت وشبحلها..
طول غيرت عيونها عنه..
هو ابتسم وركب فوق..
حطت امل ايديها على فمها وهي مذهوله..
لينا:خير دعوتكن انتن عادي راهو عادي مافيش من وراها شي..
امل ضربتها ع يدها وقالت:عينك عادي..واضحه راهي..
مريم بضحكه:حتى تو منين خطم قعد يشوفلها من تحت لتحت..
امل:عطك الهنى فرخة لينا انظر شن درتيلها في الشكولاطه متاعك..
لينا:شن قصدك مافيا مايعجب!
امل:لا ياهبله بس كيف الاتراك ابيض احمر والعيون زرق سمح واجد..
مريم:كيف قصدك عشانها سمرا وهكي..
امل:اها وشن نسيتي اللي صار للدكتورة رابحه مع الدكتور اللي جا من طرابلس العام اللي فات يخي هداك مش كيف هدى..
لينا :شن صار!
سألت هالسؤال بإعتبار انها ماكانتش تخدم في المركز الطبي قبل..
مريم؛ياحنه عجباته وعجبها والمستشفى كلها تعرف وقاللها يبي يخطبها واخر اسبوع ليه هنى قاللها بيعدي لطرابلس يفتح مع هله الموضوع ويجيبهم يخطبوا..ومن يومها معاد ريناه..
امل؛وبعد وقت هي عرفت منه ان هله مايبوهاش لأنها سمرا..
لينا:قصدكم في ناس مازال تفكر هكي!خيرنا نحنا نساوين خوتي خديناهم بيض كيف الاوروبيات وهلهم عطوهم وهما فرحانين..
مريم:في هكي وهكي يالينا..
امل؛نقولك حولي الموضوع من راسك من تو لمصلحتك..
لينا وهي تحاول تبان عاديه:من قاللكم نا حاطه في راسي شي انتم كذبتوا الكذبه وصدقتوها..
مريم؛خلاص سكرن ع الموضوع وخل نعدوا نتغدوا جيعانه ..
امل:حتى نا..
ومشوا التلاته ولينا مازالت تفكر في كلام البنات وحاسه بشعور ضيق...
🍀🍀🍀🍀🍀
"مش مرتاح في حياتي يابوبكر"
بوبكر:موضوع الصغار..
سفيان حرك راسه يمين ويسار وهو يقول:تس..بصراحه..نادم اللي تزوجت توا..نادم اللي تزوجت من اصله..
بوبكر؛جيت لكلامي قتلك قرار زي هدا متاخداش تحت الضغط لكن انت ع خاطر امك ماسمعتش نصيحتي وضحيت براحتك..
تنهد سفيان وقال:نبي حل..
بوبكر؛مافيش غير انك تتأقلم مع حياتك وخلاص..
سفيان:مانقدرش..مش هادي المراة اللي نبي نكمل معاها حياتي يابوبكر..هي كويسه ايه لكن ماتناسبنيش..
بوبكر:من هي اللي تناسبك انت!؟ ماعاجبك حد..
سفيان ابتسم وقال؛لافي..اني تعجب فيا المراة القويه اللي عندها شخصية مستقله اللي تفرض في رايها اللي تعرف كيف تقنعني بيه..مراة..مراة تتمرد عليا وتخليني نرضح لتمردها..مراة تغير في سفيان الحاجات اللي هو يبي يغيرهم..
بوبكر بإندهاش مصطنع:قصدك انت عارف انك في حاجات اخي ولازم تتغير! الحمدلله
سفيان بضحكه؛ندوي جديات ياتافه..
بوبكر؛واني بنرد عليك بجديات المراة هادي اللي رسمتها في خيالك متأخر هلبه صلي عليها اربعه ركعات..وحاول تتأقلم مع زوجتك..وعسى ان تكرهوا شيئا ويجعل الله فيه خيرا كثيرا..
هز راسه ورشف من من فنجان القهوة..
بوبكر؛ربي يهدي سرك ياصاحبي..
سفيان بعد ماشرب من القهوة؛مم..امين..
🏵🏵🏵🏵🏵🏵
"نوريه"
نوريه وهي تشوف في الطنجرة:نعم يما..
طلعتلها وجيهه وهي تقول؛طابت.
نوريه:حطيت فيها الفلفل المدخن توا..
وجيهه:بوك توا جي ومعاه مروان خوك وتلاته انفار صحاب مروان صبيلهم قصعه..ولحناك صونيه..
نوريه:معاش يقعد منها..
وجيهه:تي غير صبي هيا حني ناكلوا اي شي..
نوريه:باهي...منى ..زهور وتوا صفرة وصواني وجيبوهم..
جاهم صوت زهور وهي تقول..
"باهي"..
••وسقت نوريه للرجاله ولحناها صونيه ولأمها صونيه ولصغارها صونيه..
وهي قعدت تاكل من الطنجره..
وزهور ومنى..نفاص دحي..
منى:ااخ وخلاص ويقولولي منين جاك الهبوط..
زهور:كولي الصبح بكري وفي الليل لما تركبي لشقتك اللي فالتلاجه حطيه..
منى:شكلي بندير هكي وخلاص..
ع خشة نوريه بالطنجره؛بالله منى اقليلي دحيه..
منى وهي تاكل هزت راسها بإيجاب..
حطت نوريه الطنجره في اللاوندينو ومشت طلعت..
منى بدون صوت تأففت ومشت للتلاجه بطلع دحي..
🍀🍀🍀🍀🍀
"بنروح نرقد طول حتى غدي مش متغدي"
هدا زميل عدنان يكلم فيه وعدنان مش معاه بكل كان يدور بعيونه في لينا..
زميله قاله:افندي!
شبحله عدنان وقال؛نعم!..
زميله؛ادور ع حد؟!..
عدنان هز راسه وقال؛اطلع استناني في السيارة جايك..
زميله:ماتعطلش بالله..
عدنان:تمام..
مشي زميله من حداه وهو قعد يدور على لينا...
لين لقاها واقفه ع وحده من عاملات النظافه تهدرز عليها..
ابتسم..
لينا؛حاضر من عيوني تو نقول لأمي تحسبك في شيشة رب..
العامله:الله يربحك ويربحها...
"معليشي"..
شبحوا الزوز يمينهم.
لينا قلبها قريب وقف من الخلعه..
عدنان بإبتسامه:شن جو..
لينا شبحت للعامله بعدين شبحتله وقالت بجديه:تفضل..
حك حاجبه بعدين حط ايديه في جيوبه وقال:وصلتلك الاخت بريكه.؟
لينا؛ايه مشكور..
عدنان :بس هالخدمه هادي تبي مقابل..
العامله:عطيني الاذن بنتي..
لينا حست بالآحراج من الموقف:لا خالتي خليك..وانت خوي تفضل قول شن تبي طول..
عدنان بآبتسامه:يوم الاربعاء ان شاء الله نبي باكو شكلاطه بنروح بيه للعيله..
لينا؛تمام..تو نخدملك 50طرف..
عدنان؛نبيها بالإسم الجديد..
لينا :ان شاء الله الاربعاء تجي تلقاها واتيه..عن اذنك..تعالي خالتي..
ومشت لينا هي والعامله وقلبها يقربع تقربيع خافت لتسمع العامله صوت نبضاته القويه..
العامله؛شن يبي منك هدى؟
لينا وهي تحاول تخفي ارتباكها:كيف ماسمعتي خالتي..
العامله:ردي بالك ماتريحتلاش راهو..
لينا؛اطمني خالتي مايقدر يديرلي شي ان شاء الله..
العامله:ربي يحفظك يابنيتي..
لينا:تسلمي ويطول في عمرك..
💎وعدنان طلع من المستشفى وفي داخله شعور قعد يكبر بسرعه هائله اتجاه لينا..وزادت كبرت في عينه بعد ماشاف كيف كلماته وتعاملت معاه..
ركب السيارة لقي صاحبه راقد..ضحك وشغل السيارة بعدين تنهد وقال...توكلنا على الله..وتحرك...
🍀🍀🍀🍀🍀🍀
بعد العصر..
لبست خمارها وهي رافعه طرفه عن وجهها وقالت؛هيا سفيان واتيه..
سفيان وهو يرتب في وراق تخص عمله:اطلعي لاحقك..
زهور؛باهي..
مشت زهور باتجاه الباب..
طلعت من الشقه ع طلعة سلفتها من شفتها..
منى بضحكه وصوت منخفض:بنمشي ناكل في حوش ماليا..
زهور قعدت تضحك بصوت مكتوب..
ونزلوا الزوز مع بعض....
..........
بعد مارتب سفيان وراقيه وحطهم ع تركينه..وقعد يدور ع تليفونه..
سفيان؛وين مشي..شبح للشنطه وقال..حطيته هني!؟
وطلع اللاب توب اللي طلعت معاه الورقه...
لكنها طاحت تحت رجل الطاوله وهو لقي النقال..
خداه وخدي مفاتيح السيارة ومشي طول طلع من الدار...
🍀🍀🍀🍀🍀🍀
مقعمز ياكل في البيتزا اللي جايبها من برا لأنه روح ومالقاش غدي..وحوش ماليه اللي تعود ياكل عندهم مايقدرش ياكل عندهم توا بعد اللي صار..
في الدار...
حداه مرته لاهيه بتليفونها وولده ياكل معاه..
نزلت وردة التليفون وقالت؛عبودي شن صار في الفلوس اللي قتلك عليهم..
عبدالله؛جبتلك 900 بس هدى اللي عندي توا.
وردة؛من جدك عبدالله!شن بيديرولي 900!راهو الدنيا في طرابلس شايطه فيها النار..
عبدالله"صححت وجهي واسلفت بيش جبتهن"؛هدا اللي لقيته تو..
وردة تأففت وقالت؛الله غالب نقعد طول عمري معاك خاطري في الحاجه ومانوصلها..تو تقول لاختي تسلفني وين نمشيلها..الله غالب عليا..
وناضت من حداه ومشت للدار وهو يلحق فيما بعيونه..
ولقمه البيتزا قاعده في فمه وطرف في يده..حطه وهو مضايق..وقعد يمضغ بالسيف...
🍀🍀🍀🍀🍀🍀
"درت روحي اغمي عليا وجت معاي سبحان الله"
هادي منى تحكي لأخته ع المقلب اللي داراته في راجلها ومتاعينها..
واختها تضحك..
منى وهي تاكل:كان مادرتش هكي...راهو اجهضت هديكا اليله...
هند "اختها": والله ماني عارفه شن مصبرك ع هالعيشه..
اشرت منى ع بطنها..
واختها ابتسمت بتهكم وهزت راسها ...
...............
بينما في حوش اهل زهور..
اللي فيه بوها وخواتها التمانيه وزوز خوت ولاد..
ام زهور متوفيه...وعندها اربعه خوات متزوجات وقعدوا اربعه..
حالتهم الماديه ع قد...
اختها الكبيره عمرها 43مش متزوجه وهادي كانت ليهم بمثابة الأم..
وزهور لانها تحبها هلبه وماتبيش تكدرها لاهي ولاباقي خواتها كانت تحكي عن حياتها على انها....
زهور:امس طلعني بعد كلمتني مشينا ل***** وقعد لبعد المغرب..
اختها الصغيرة ايناس:سعدودك امتى حتى اني تنزوج وراجلي يرفعني ويجيبني..
مفيده:تحشمي يافرخه..
وخواتها يضحكوا...
وزهور تشبحلهم بإبتسامه تخفي غصايص ليها اول ماليها اخر..
تشبح لاختها الصغيرة وفي نفسها تقول..
"اختي هادي ماتهونش عليا نلوحها هالتلويحه ساد اني"
••بعد هدرزوا شويه..
ناضت مفيده للكوجينه..
وزهور لحقتها...
مفيده:تعالي زهيرة قوليلي مافيش جديد.
فهالوقت اختهم جت للكوجينه لما سمعت سؤال مفيده وقفت تسمع..
زهور بضيق:تس..
مفيده:مش مشكله في بالي حاجه كان صار منها تو نقولك عليها ان شاء الله تنفعك في حكاية الصغار ونعرفوا السبب..
زهور:حاجه شني!؟
مفيده؛في وقتها تعرفيها..المهم قوليلي متاعينك شن دايرين معاك ع هالموضوع!
زهور:عادي زي قبل يدعولنا خلاص..ايه وبنقولك حاجه مش متعوده ندرق عليك..
مفيده؛شنو؟
زهور:كلموني حمواتي عن ايناس يبوها لخوهم..
ايناس قريب طارت من الفرح بس فيسع غصت بفرحتها لما سمعت زهور تقول..
زهور:لكن بنخط في الموضوع..
مفيده:علاش!
زهور:ولدهم عسكري ويخدم في الجنوب مانبيش اختي تقعد متبهدله وخدمته تخوف الحق مش حنعطوها بش تولي ارمله..
مفيده وهي تفكر في كلام زهور قالت:عندك حق..خلاص سكري عليه الموضوع..
وايناس وهي مضايقه لدرجة البكاء مشت طول هربت لدارها هي وخواتها...
🍀🍀🍀🍀🍀🍀
في جنان حوشهم..
مقعمزة لينا سرحانه وتفكر في كل شي صار معاها في المستشفى..
قطعت عليها امها تفكيرها وهي تقول؛لينا..
لينا شبحتله وقالت:نعم..
الحازة؛جن صاحباتك خدن حاجتهن؟
لينا؛ايه..
الحازة؛عندك مازال غيرهن بتخدميهن السبوع هدى؟
لينا:اها 120 طرف..ايه حقه قالت امال راجلها اتفق مع الراجل اللي يدير في الغلافات والباكوات قال اخر الاسبوع يوصلني وعليهن الاسم الجديد..
الحازة؛شن هو حقه!؟
لينا بضحكه:شكولينا شكولينا يمي..
الحازة ضحكت وقالت:باهي ربي يفتحها عليك ويرزقك..
لينا:آمين يارب..
الحازة؛هي خل نخش ندير العشا..
ومشت بتخش..
لينا:شن العشا يما..
الحازة قبل تخش:مقروضة بالقديد.."مقطع"
لينا وعيونها يلمعوا من الفرحه؛ياعيني...
وكيف ناضت...سمعت صوت خوها عبدالله ينادي..
"لينا"..
شبحت لمصدر الصوت لقاته جاي ع يمينه..
مشتله وهي تقول؛عبد الله..
طلعلها وقال؛شن جو؟
لينا؛تمام شن جوك انت وشن داير سالم استاحشته واجد..
عبدالله:كويس..تو بعدين نزله...غير قبلها بننشدك..
لينا:ع شني؟
عبدالله:مانلقاش عندك 300جني..
لينا؛300!
عبدالله؛حتى 200 باهي غير معتازلهن توا والراتب كمل..
لينا؛الله لايعوزك لغيره ياوخي..راجي شويه..
ومشت خشت تجري..
وهو واقف يستنى..
شويه وجاته وجابت 300 وعطتهومله..
هو خداهم وبدي يعد فيهم..بعد كمل عد قال:تمام 300كاملات تو نردهنلك بعد ينزل المعاش..
لينا؛مانبي منك شي..
هز راسه وقال:تو نردهن...ومشي بالسرعه للدروج..
وهي تشبحله لين ادرق من قدام عيونها..
بعدين تنهدت ولفت ولت لباب الحوش وخشت وسكرت الباب...

يتبع …
الفصول الاربعة