شكولينا

الجزء الثامن والاربعين

#شكولينا
#الجزء_الثامن_والأربعون
#الجمان_الفريد

كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
"السلام عليكم"
:وعليكم السلام..
ومشي سفيان سلم ع نسيبه..
عبدالله:شنو حالك ..
سفيان:الحمد لله شن حالك انت وحال الأسرة.
عبدالله؛الحمد لله...
بعد سفيان عن عبدالله وشبح للشيباني اللي جنبه ضيق عيونه وهو يشوفله حس روحه يعرفه..
والشيباني بإبتسامه قال:ماشاء الله..سفيان ..
سفيان ابتسم وهو يحاول يذكر وقال:حاس روحي نعرفك بس مش قادر نذكر..
عبدالله بإبتسامه:هدى عم زوجتي وقال ان في معرفه قديمه كانت تربطه بالحاج الشريف..
قعدوا يشبحوله مروان وسفيان...
ابتسم وقال؛عزالدين بوعايشه...
سفيان رفع حواجبه وقال:عمي عز الدين بوعايشه!
وقدمله وسلم عليه بحرارة..
ومروان يمرر عليهم في نظره وهو مبتسم بإستغراب..
وعبدالله يشبحلهم بإبتسامه...
سفيان؛عاش من شافك..شن حالك شن حال صحتك..
:الحمد لله الحمدلله..شن حال بوك ووينه..
بعد سفيان وقال :الحمد لله..الحاج ماشي لحوش عمتي  يزور في حناي...انت غير تفضل تو نكلموه يجي..تفضل تفضل..
:يزيد فضلك ياولدي..
سفيان:تفضل عبدالله..
عبدالله:لو فيها كيف نبي نشوف اختي..
سفيان:حاضر لحظه بس..تفضل عمي عزالدين..
ومشي خش بالراجل للمربوعه ومعاهم مروان وعبدالله..
وشويه وطلع كلم امه بش يوتوا الضيافه للراجل..
بعدين خدي عبد الله وركب بيه للشقه...
سفيان؛فاجئتونا الحق..ياريت عطتيونا علم قبلها راهو درنا معاكم الواجب..
عبدالله:نحنا عيله وحده ياسفيان والحاج عزالدين معرفه وديما واجبكم سابق..
سفيان:بارك الله فيك..
فتحله المربوعه وقاله؛تفضل خش..
عبدالله:يزيد فضلك..وخش داخل قعمز...
سفيان:لحظه نادي لينا..
ومشي خش داخل..
خدي دفايه ومشي حطها في المربوعه...بعدين ولى طلع وهو ينادي..لينا..
لكن ماسمعش رد..
لين وصل دار الصغار خش لقاها تشبح لصغارها وهما يلعبوا ودموعها في عيونها..
سفيان:لينا خوك عبدالله في المربوعه يبي يشوفك..
ناضت لينا وقفت وقالت:جاي بروحه..
سفيان وهو مركز ع ملامح وجهها:لا في معاه واحد صديق قديم للوالد..في المربوعه اللي لوطا.
لينا هزت راسها ومشت طلعت وهو مشي معاها وقعد مركز ع حالته وكأنها طالعه بالسيف..
وصلت في المربوعه..خشت وقالت:السلام عليكم..
عبدالله وقف وقال بإبتسامه؛وعليكم السلام..
جاته مدت يدها بتصافحه هو ضمها لحضنه..
وسفيان يشبحلهم..
عبدالله؛شن حالك لينا..
لينا:الحمد لله...
عبدالله بعدها وقال:وين عويلتك..
لينا وهي شاده دموعها بقوة:لحظه تو نجيبهم..ومشت طلعت...
سفيان حس ان لازم يخليهم بروحهم...
سفيان؛نستأذن نازل لوطا...خود راحتك عبدالله..
عبدالله:تسلم....
سفيان مشي وطلع...
وخلا عبدالله مقعمز يراجي في لينا والصغار وهو يمرر في نظره المربوعه..
لين خشت عليه لينا بصغارها وهو يمشوا حداها..
لما شافهم ابتسم بإعجاب وقال:ماشاء الله ماشاء الله لاقوة الا بالله...وناضلهم..
••••••••••
"اخر عهدي بيكم سفيان ممكن عمره 11سنه ومروان 6سنين كيف خاش المدرسه"
سفيان بإبتسامه:قعدت نسأل في بوي عليك هلبه قالي عمك بوعايشة سافر..
عزالدين بإبتسامه:ايه وقعدت عمر غادي ليا توا 4سنين مروح ...
سفيان:نصيبنا نتلاقوا بعد السنين هادي كلها..
عز الدين هز راسه وقال:فعلا..
ع خشة الشريف وهو جاي مبتسم بدهشه:بوعايشه.!
ناض عز الدين وهو مبتسم بفرح:شريف بن عامر..
وجو لبعضهم وسلموا بالأحضان..
وسفيان ومروان يشبحولهم بإبتسامه..
بعدوا عن بعض وهما شادين بعض..
الشريف؛وينك ووين ايامك مشيت وقلت عدولي ع قولت المصرية..
عز الدين بضحكه:ياما صار معاي فهالسنين يا شريف..
طلقوا بعض والشريف قال:قعمز قعمز..
شويه وسمعوا صوت الجرس..
ناض سفيان ومشي طلع...
لقي امه في الممر وفيدها سفرة ضيافه..
وجيهه:بوك جي؟
سفيان خدي منها السفرة وقال:ايه..معليشي يام كان اديروا سفرة تانيه لخو لينا نركبها فوق مافيش ماضيفه كل شي هني..
وجيهه:حاضر حاضر.
سفيان مشي بالسفره..وامه خشت داخل...
•••••••••
عبد الله:ربي يحفظهلك ويفرحك بيهم..
لينا:تسلم..شن حال عويلتك..
عبدالله:كويسين الحمد لله..سالم ينشد عنك واجد..
لينا بتهكم؛وشن كنت تقوله انساها ومعاش تنشدني عنها..
عقد حواجبه وقال:شن الكلام اللي تقولي فيه هدي!؟
لينا ودموعها في عيونها؛نقول في الحق...لما عرفت انك جيت قلت شن كان فاقد الذاكرة وولتله..
نزل عيونه وهو يشوف لخاتمه اللي في صبعه ويحرك فيه بإبهامه..
لينا:حتى بالتليفون ماتنشدوا معقوله!!؟ لهالدرجه ماتبوش تتحملوا حتى مسؤولية النشده عليا..
شبحلها وقال:انتي لو تعرفي اللي صار معاي تعذريني..
وهما يتكلموا والصغار حداهم يلعبوا..
وبحر مشي لباب المربوعه وسكره..
هي سمعت الباب شافتهم ناضت خدتهم وهي تقول:والله مانقدر نعذرك مهما قلت ياعبدالله..
ومشت قعمزت بيهم...
••••••••••
الشريف:ليك 4سنين مروح لاسألت لادورت!؟
عزالدين تنهد وقال:ماارتحتش من لما روحت زوجتي كانت مريضه وقعدت متفرغ ليها هي بس الخبيث وماادراك مالخبيث..
الشريف:الله يشفيها ويعافينا..
عز الدين:لا الحمد الله ربك كتبلها الشفاء من عام تقريبا..
الشريف:باهي الحمدلله ع سلامتها وطيب فيك..
عزالدين:الله يسلمك..الحمد لله..المهم من بعدها خوي تعب حتى هو وقعدنا نعانوا فيه فترة مرضه وربك أراد ياخد امانته من اربعه شهور..
الشريف:مني من خوتك..
عز الدين:علي...
الشريف عقد حواجبه بأسف وقال:عظم الله اجركم الله يغفرله ويرحمه..
وسفيان ومروان بأصوات متقطعه قال:عظم الله اجرك..
عز الدين:اجرنا واجركم...وخدتنا هالدنيا.. امس جت زياره لبنت خوي نهدرز اني وراجلها وسيرة تجيب سيرة لين جت سيرتك وقال الشريف بن عامر نسيبنا...ضحك وقال...قتله الشريف بن عامر اللي ولاده سفيان ومروان وعدنان قال ايه هو....رحمة الله ع عدنان وفرحت لما عرفت كيف مات موتة تشرف اسأل الله يتقبله من الشهداء..
تنهد الشريف بحسرة وقال:اللهم آمين..
عزالدين؛المهم قلت لعبدالله ضروري غدوة نمشوا نديروله زياره..
الشريف بإبتسامه؛من قال بعد هالسنين..يقولوا مصير الحي يتلاقى..
عز الدين هز راسه وقال:ايه..
الشريف:شن صار فيك؟
تنهد بإبتسامه وقال:بعد تعب وجري سنين من العمر ولله الحمد درت لروحي مكانه في عالم الاعمال وربي فتحها عليا من أوسع ابوابه..
الشريف بإبتسامه؛ماشاء الله الله يبارك..
رن جرس المربوعه مرة تانيه..ناض سفيان وطلع من حداهم..
••••••••••
لينا ودموعها ينزلوا:سامحني مالقيتلك ولاعذر في اللي قلته..تي انت خليتني نحس ان مرتك وهلها هما هلك ونحنا ولاحاجه..
قعد عبدالله يشبحلها بضيق..
لينا؛كنتوا عيوني ياخوتي مايغلى عليكم شي كنت نخدم فيكم وفي عويلتكم من قلبي..نحول من فمي ونعطيكم ونقول مش خسارة في خوتي عزوتي وسندي...وفي الاخير طلعتوا لاعزوة ولاسند ولاحتى خوت..رميتوني بايديكم للنار وعطيتوني ظهوركم وعديتوا..
عبدالله:مش مرتاحه في حياتك؟!
لينا مسحت دموعها وقالت:مش هدى قصدي من كلامي..اللي نقصده الأيام اللي ريتهن وتحملت كل شي فيهن بروحي في من شي كان فوق طاقتي وانجبرت نتحمله لأن ماعندي على من نولي من يوقف معاي ويسندني..
🍁فهاللحظة فتح سفيان الباب وخش بالسفره..
شاف باب المربوعه مسكر..استغرب قرب منه وجي بيدق بس تراجع لما سمع لينا تقول..
لينا:باتي الله يرحمه قالي مش حتشوفي من خوتك خير وكان عنده الحق..بعد ماتخليتوا عني وين جيتكم مكسورة وقلبي متقطع بعويلتي يتامى..خليتوني نعيش مجبورة ع حياة مانبيها...تحملت هم ثقيل وياما بلعت من غصايص انجبرت نساير ونمشي وناكلها في روحي لاني ماعندي على من نولي يعلم الله باللي ريته واللي شفته وكله بسبب خذلانكم ليا...وسكتت وهي تبكي...
🍁بهدوء شديد كعادته....
انسحب ومشي طلع من الشقه....
وهي هدت بكي بعدين قالت:مهما نحكي مش حنقدر نوصف اللي مريت بيه..لكن الحمد لله..عوضني براجل ولى ليا خويا وباتي..سندني ووقف معايا وربي جبرني بيه احلى جبر وخلاني نسيتكم وطاريكم معاد نبي نسمعه مش نشوفكم..
عبدالله بحزن:والله مانقدر نلومك ع كل كلمه قلتيها عندك حق..
لينا قعدت تشبحله شويه بعدين حطت ايديها ع وجهها وانهارت بالبكي..
برغم الكلام القاسي اللي قالته من غضبها الشديد منه الا ان نظرة الحزن في عيونه وجعتها هلبه وماتحملتهاش..
صغارها تعلقوا بقونتها وهما يطبطبوا عليها ويقولوا..
ماما...
والمنظر هدا قطع قلب عبدالله...ناض ومشي قعمز جنب اخته وضمها لحضنه وقعد يمسح ع كتفها..
وهي خدت راحتها في البكي في حضنه وهي تشم في ريحة بوها وامها فيه...
•••••••••••
"علاش رديتها؟!"
سفيان بتوهان:دارتله..طلعتله...عقد حواجبه وقال..خودي يام..
خدت السفره..وهو مشي من حداها وهي معاه بعيونها مستغربه بعدين مشت خشت داخل..
🍁وهو وصل لمكانه جنب خوه وقعمز وذهنه متشتت تماما..
عزالدين:اني اليوم جيتك نردلك في دين عمره اكثر من ثلاثين عام..
الشريف عقد حواجبه وقال:دين شني؟!
عز الدين:الالف جني ياعزالدين اول مكسب كسبته في حياتك بتعبك وجهدك..وجبتهولي وقتلي فك ضيقتك ياصاحبي..
الشريف ابتسم وقال:ياااه ياعزالدين قاعد مذكر..
عزالدين :وكيف تبيني ننسى المعروف اللي خلا الكل برا يعرفني  بعز الدين بوعايشه رجل الاعمال الليبي.!
الشريف ابتسم بحسرة وقال:ماتواخدنيش في ناس هلبه من بعد فضل الله خليتهم يوقفوا ع رجليهم من سنة واتنين وتلاته فاتوا ونسوا..
عز الدين:قليل الأصل هو اللي ينكر المعروف واني مش قليل اصل ياشريف..جيتك اليوم بش نقولك خودي مني مايسد دينك..وفك ضيقتك ياصاحبي..
الشريف عيونه غرقوا بالدموع ماعرفش شن يقول..
ناضله عز الدين وقال:دين ليك عليا ووفيته مش فضل مني بكل..ووصل فيه وكب ع راسه...
ومروان متأثر ع الآخر..
لكن سفيان مش قادر يركز معاهم عقله مش معاه...مش قادر يسمع شي غير صوتها وكلامها...
🍁🍁🍁🍁
باس عبد الله ع راس اخته وقال:حقك عليا سامحيني..
بعدت لينا وهي ترشف وتمسح في دموعها قالت:الله يسامحك..
عبدالله:نبيك حتى انتي تسامحيني..
لينا:دام دعيت ربي يسامحك معناها حتى انا مسامحه..
مسح ع شعرها وقال بإبتسامه:قلبك ابيض من يومك..
ابتسمت لينا بحزن بعدين ناضت وقالت:خل نوض انديرلك قهوة.
عبدالله:قاعده اديري في الشكولاته؟
لينا:اها تو نجيبلك منها..
وناضت ومشت وهي تقول:بالله عينك عليهم..
عبدالله شبح لصغارها وقال بضحكه؛تمام..
طلعت من حداهم...
وهو حي لصغارها يلاعب فيهم...
🌺وضيفت لينا خوها وهدرزت عليه شويه..بعدين سقداته بعلبة #شكولينا لصغاره...
نزل لوطا وصل في المربوعه دق عليها..
جاه سفيان ودخله...
سلم عبدالله ع الشريف وقعمزوا هدرزوا شويه..
وبعدها سقدوهم وروحوا...
وبعد روحوا..
خش الشريف ومعاه مروان يبشروا العيله باللي صار.
لكن سفيان...
قعد مقعمز برا وهو مربع ايديه وعاقد حواجبه ويشبح فالفراغ وسرحان...
يذكر في كلامها..ودموعه مغرقات عيونه...
《 خليتوني نعيش مجبورة ع حياة مانبيها...تحملت هم ثقيل وياما بلعت من غصايص انجبرت نساير ونمشي وناكلها في روحي لاني ماعندي على من نولي يعلم الله باللي ريته واللي شفته وكله بسبب خذلانكم ليا.》
حياة ماتبيها!؟.....
انجبرت تساير وتمشي...لأن ماعندها على ماتولي..!؟
مش هدا الكلام المفروض تقوله لخوها عن حياتها معاه..
اللي سمعه منها...صدمه...وحطمه...
يعني هي توا عايشه معاه مجبورة لأن ماعندها حد..!
يعني هي توا عايشه معاه حياة ماتبيهاش!
ايه...هي حتى كلمة نحبك ماتقولش فيها الا لما هو يطلبها بإلحاح...
لو كانت تحبه بصدق قالتها من غير مايطلبها..
جي بين عيونه كل شي عاشه معاها المدة الأخيره..
حست روحه تلخبط هلبه ودماغه قريب انفجر..
فرك بيده ع جبهته بعدين مسح بيها وجهه..
وناض..ومشي لسيارته...شغلها..ومشي طلع من الحوش...
ع نزلة لينا بالصغار من فوق..
شافت باب الحوش لما تسكر وشافت مكان سيارة سفيان..
استغربت..
بعدين مشت بصغارها لحوش شيابينها وخشت وتلقت الاخبار المفرحه...
🌺لينا بإبتسامة فرح:والله قلبي كان حاس وقتها لسفيان بكري...سبحان الله كيف انفرجت..
وجيهه بضحكه:من قال بوعايشه اللي ليه مسيب البلاد سنين يجمعنا ربي بيه مرة تانيه في ظرف زي هالظرف..
لينا:والله كله ببركة الصلاة ع النبي يااللاي اللي قعد ملازمها سفيان لين ربك فتحها ع الجميع..
رنده؛كيف ملازمينها مافهمتش؟.
لينا:تو نقولك كيف...وقعدت تحكيلها عن الصلاة على النبي بالصيغة الابراهيميه اللي تنقال اخر تشهد في الصلاة..وعددتلها فضائلها ورنده ورتيل يسمعولها بإنتباه..
🌷كثرة الصلاة على النبي...تفتح المغلقات...وتخفف المثقلات..وتكفر الهموم والأزمات..اللهم صل وسلم وبارك على نبينا محمد🌷
🏵🏵🏵🏵🏵
"الحمد لله ياربي مابعدالضيق الاالفرج"
هادي نوريه تكلم في امها بالتليفون..
نوريه:زي مايقولوا كل ساعه وفرجها..الحمد لله على هالساعه.............ان شاء الله يام ان شاء الله....هي بالسلامه توا........وسكرت من امها وشبحت لعزوزتها وقالت...بوي خلص دينه كله..
رمضانه:باهي باهي..طيب فيكم...
نوريه:ايه والله طيب فينا...الحمدلله...
ع خشة حسين واكرام...
الزوز قالوا؛السلام عليكم..والفرحه تتنطر من عيون اكرام..
ردوا عليهم:وعليكم السلام..
بعدين رمضانه قالت:الحاج الشريف وفى دينه كله..
حسين ابتسم بفرح وشبح لنوريه وقال:طيب فيكم..
نوريه بدون ماتشبحله:طيب وقتك..حتى انت بارك الله فيك..
حسين؛وخيرك تقولي فيها وكأنك تكلمي في براني!
رمضانه:ايه بنيتي حسين زي ولده راهو..
هزت نوريه راسها بدون ماتتكلم..
اكرام بضحكه:المهم عمتي توا خليك معاي عندي ليك خبر يفرحك بالحق..
شبحتلها نوريه..
وحسين يشبح لنوريه بضيق..
رمضانه:خبر شني؟!
اكرام؛اني حامل عمتي ..
نوريه حست بقلبها انعصر بقوة...قعدت تشبح لإكرام ودموعها عبوا عيونها..
رمضانه بفرح:الله يبارك الله يبارك..تنوضي وتشوفيه ع خير بنيتي..
اكرام؛اللهم آمين..اهم شي عندي اني فرحتك انتي وحسين..
رمضانه:فرحتيني هلبه..
اكرام:وان شاء الله يجي وليد بش تزيدوا تفرحوا...
رمضانه:آمين.
نوريه:مبارك..
اكرام:الله يبارك فيك..
نوريه بإبتسامه؛وين الزردة ياحسين قبل ماتخشش الابيها 
رمضانه:ايه في كل حمل لنوريه كنت تخش بالزردة..
اكرام رفعت حاجبها وهي تشبح لنوريه اللي كانت تشبح لحسين بإبتسامه مستفزة..
حسين؛علاش مستعجلين الزردة غدوة جايه ان شاء الله...بنطلعكم كلكم نغديكم برا في احسن مكان..
ابتسمت اكرام بمكر وهي تشوف لنوريه..
نوريه بضحكه:اهو في جرتك حصلنا تغدايه برا عيلك جي بخيره من قبل ماتجيبيه..
حسين قريب ينفجر من الغيظ..
واكرام اكثر منه...
شويه قال:هي قدامي للحوش لازمك راحه انتي..
اكرام بإبتسامه:حاضر..
مشي حسين وهي طلعت وراه..
ناضت نوريه وقالت:خل نمشي نصلي المغرب ونبدا في العشي ...
ومشت من حداها..
ورمضانه ناضت وهي تقول:خل نمشي نتكا في دويرتي شويه صقع هني ياكبدي..مش عارفه امتى بيصلحوه هالمكيف قعدنا في الجميدي حتى الدفايات مايفلقوش...
🍁ونوريه اول ماخشت للحمام انهارت بالبكي..
قعدت تبكي في الحمام بكتمان وهي حابسه عبراتها..
وبعد ماطاب اللي في خاطرها...توضت للصلاة وطلعت تكمل باقي رحلة مجابهتها للحياة باللي فيها..
🍁🍁🍁🍁
وخوها كان في حال يشبه حالها...
ويحاول يشغل عن نفسه عن التفكير فيما يضنيه بالخدمه..
كان ناوي يغرق فيها..مايبيش يلقى وقت لشي...بالذات ليها هي..
••الساعه 9:45ليلا..
طالع من المحل بطريقه للسيارة وهو يتكلم بالتليفون..
سفيان:لالا بنستلم الاشراف ع المشاريع ان شاء الله..
"شن غير رايك"
سفيان ركب السيارة وقال؛ماتغيرش رايي اني ماسيبتش الجامعه ياابوبكر..
"والله كان عارف روحك تقدر توفق مافيش باس"
هز راسه وقال؛نقدر نوفق نقدر بعون الله..هي توا تصبح ع خير..
"وانت من اهله..ليلتك سعيده"
سفيان:ليلتك اسعد..وسكر..وبعدين سكر الباب وشغل السيارة وتحرك للحوش..
وطول الطريق وهو يفكر كيف بتفوت عليه هالليله كيف يقدر ويصبر ع اللي بيديره!؟
بس الجرح اللي في قلبه الألم متاعه كان يزيد يحرض فيه..
ماكانش جرح قلب بس..وجرح كبرياء..وكرامه..
وصل في الحوش..
خش...درس...ونزل...ومشي ركب للشقه ..
خدي نفس عميق...بعدين فتح الباب وخش..
سكر الباب وكمل لقدام ...ع طلعتها هي من دار الصغار بإبتسامه فرح حلوة ع وجهها هو عاشق لهالأبتسامه..
بس للأسف معاش مصدقها...
لينا بفرح؛واخيرا روحت..كنت نبي نشوف فرحتك باللي صار..شفت ياسفيان مش قتلك..ربك كريم..
هز راسه ومشي وهو يقول:الحمد لله...
هي عقد حواجبها بإستغراب من اسلوبه في الكلام..
مشت لحقاته وقالت؛صايرة حاجه تانيه..
سفيان وهو ياخد في حوايجه قال من فوق نفسه:لا...
ومشي طلع من حداها وخش للحمام..
هي زادت استغربت فيه وانتابها شعور بالضيق.
شويه وطلع وهو يمسح ع شعره للخلف.
لينا؛نديرلك عشا؟
سفيان؛تس نبي نرقد..حددلي حوايج غدوة ماشي للجامعه..
لينا:ليش.
سفيان؛استاد في الجامعه علاش يمشي للجامعه في رايك؟
لينا:كيف يعني بتولي تخدم عادي؟
سفيان:وعلاش اني امتى سيبت..
لينا وخرت شعرها ورا وذنها وقالت:قصدي يعني بتسيب الخدمه مع باتك.
سفيان:لا..وخش للسرير..
لينا؛بس هكي تعب عليك واجد.
سفيان؛هدا شي يرجعلي..
لينا ضيقت عيونها وقالت:شن في سفيان!؟
سفيان بشي من الأنفعال:شني شن في ستين هم فوق راسي مازال خسارة نبي نعوضها  ومخزن يبي هداكا الحساب لصيانته وغيره وغيره..وانتي عارفه هدا كله ومازال تسألي شن في!؟
هي قعدت تشبحله بصدمه ودموعها في عيونها بعدين قالت:آسفه..ومشت بتطلع..
هو رقد وقال:سكري الضي والباب وانتي طالعه..
هي شبحتله لقاته عاطي بالظهر..تنهدت بضيق وسكرت الضي والباب ومشت لدار صغارها..خشتلها ودموعها ينزلوا بعدين سكرت الباب ومشت قعمزت ع السرير وهي مصدومه ومش فاهمه شي...وقعدت تبكي بصمت...
🍁وعدت عليها هديكا وهي تبكي..وتراجي فيه يخش عليها يرضيها..
بس استنت بلافايده..
وهو ماقدرش يرقد غمضه حس روحه راقد ع شوك وتحت راسه حجر...وقلبه كان يوجع فيه هلبه...
وكانت من الألم الدموع تبي تنزل وهو يمسح فيها قبل لتنزل..
يكره حالات ضعفه...يكره دموعه....
☘☘☘☘
ومروا اربعه ايام..
وقعد هدا حاله هو ولينا...
جفاء قوي من ناحيته وهي مسكينه كانت تعطي فيه المبررات والأعذار وتقول معليشي مضغوط نفسيا واللي هو فيه مش شويه...
وتقول لروحها خليه ع راحته لين يروق ويهدا ويولي زي ماكان...برغم انها كانت تتعذب هلبه من جفائه المفاجئ...
وحماتها...
بعد حملت ضرتها..رمضانه بدت تهتم بيها بزياده وكأنها حامل بأول حفيد ليها...علاقتها بيها قاعده كويسه بس كان يأذي فيها هلبه دلال عزوزتها لضرتها..
وهالدلال كان حتى من جانب حسين اللي تجاهل عمدا وجود نوريه زي ماهي متجاهلاته....
ومع هذا نوريه كانت ديما تحاول تبان قويه ومافي شي يكسرها...
واختها المكسورة بخوف كانت تراجي في يوم الجلسه...
وجي هاليوم...
مشي انس بس....
واستنى يشوف اي حد من طرف محمد او محمد نفسه بس ماجي حد...
نادوا ع اساميهم...محمد ورنده...
انس خش للقاعه..وماخش حد من طرف محمد....
لهذا اجل القاضي الجلسه لمنتصف شهر 2....
••انس وهو يتكلم بالتليفون:توقعته يماطل يبي يطولها..
"ولشن حيوصل كان طولها"
انس؛يكسب وقت..
"يكسب وقت لشني"
تنهد انس وقال:مش معروف في شن ولايفكر ولاشن في فراسه بس صدقني مهما دار مش حيربح الافي حالتين..
"اللي هما"
انس:لو الاخت رنده تنازلت...او استدرجكم لفخ خطأ كبير يكون لصالحه...ردوا بالكم..
"اطمن من هالناحيه...بس لأمتى حيقعد يماطل"
انس:مهما ماطل حيجي غصب عنه...
"ان شاء الله خير"
انس:ان شاء الله..اهم شي تفهم الاخت رنده وذكرها ان في قضايا زي هادي يصير هكي هلبه قوللها تكون صبورة وتتحمل وتحول من راسها فكرة الإنسحاب..
"لا الانسحاب مش وارد بكل اطمن بدينا شي حنكملوه"
ابتسم انس وهز راسه وقال:كويس كويس...
🍁🍁🍁🍁🍁
"الحقير توقعته مايحضرش "
لينا:معاش جاك ولا؟
رنده؛تس معاش شفته عارفة شن في فعقله..مازال متأمل نوليله بعد اللي داره هالمريض...
لينا:مش مصدقه ان في تريس بدناءة هدي.

رنده:فيه وهلبه البلاد معبيه مرضى وعاهات..
لينا:صدقتي..بس انتي ردي بالك تضعفي يارنده..
رنده:مستحيل درس وتعلمته...
فتحت وجيهه الباب وخشت:لينا سفيان قال اليوم ماشي لمصراته وبيروح غدوة..
ناضت وهي تقول:حقه!؟..وجت بتمشي وقفتها عزوزتها لما قالت...وين ماشيه..طلع..
شبحت لينا لعزوزتها شويه بعدين هزت راسها وقالت؛رنده بتعدي معاي اليوم للمحل..
رنده:ايه..
لينا:تمام..ومشت طلعت من حداهم ودموعها نزلوا..
وجيهه:شكلهم متعاركين..
رنده:ليهم وقت جوهم مش تمام بس يبينوا في العكس..
وجيهه تنهدت وقالت؛على كيفهم يتعاركوا ويتراضو..
ومشت طلعت من حدا رنده..
ورنده رجعت سرحت وهي تفكر في حالها ...
🍁🍁🍁🍁🍁
الجامعه....
كلية العلوم....
في المكتب...
كان مقعمز ورا جهاز اللاب توب ومشغول بيه..
دق الباب..
قال:تفضل..
انفتح وخشت منها بنت كانت بكامل اناقتها قالت:السلام عليكم..
سفيان بدون مايشبحلها:وعليكم السلام..تعالي قعمزي..
مشت قعمزت ع الكرسي قدام مكتبه..
سفيان؛غيداء..
ابتسمت وقالت:عفراء.
شبحلها وقال؛اسف عفراء....مشروعك تحت اشرافي ياعفراء واكيد انتي تعرفيني كويس..
ابتسمت وقالت:حضرتك قريتني..
رفع حواجبه وغير عيونه عنها وقال؛كويس..تمام قولي شن الموضوع اللي تبي اديري مشروعك عليه..
هي بإبتسامة:ظاهرة الإحتباس الحراري..
سفيان:امم..حلو...بس موضوع كبير هلبه..
:واني شغوفه بيه استاذ وعنده عليه خلفيه ومتأكده حندير مشروع ممتاز..
سفيان:كويس..ان شاء الله تقعدي محافظه ع حماسك هدا..
ضحكت وقالت:إن شاء الله استاذ..
سفيان؛تمام..نبيك ديري بحث ع الموضوع مبدئيا وانتي شن تبي تناقشي فيه تحديدا..وجيبيه يوم الخميس الساعه 10صبح..
:تمام....
سفيان وهو يشوف للاب توب: تقدري تتفضلي.
ناضت وهي تقول:عن اذنك استاذ..
هز راسه...وهي مشت طلعت...
هو تنهد وقام تليفونه يشوف فالشاشه كان يراجي يجيه اي شي منها اتصال ولارساله..
واخد منها موقف صح..بش مش قادر ع جفاها معذبه اكثر مامعذبها...حط تليفونه وتنهد بعدين سكر اللاب توب وحطه في الشنطه..
وناض لبسها وخدي تليفونه ونظاراته ومشي طلع من المكتب..
حول نظاراته الطبيه ودسهم في جيبه ولبس السود..وكمل طريقه..
ومجموعة بنات يشبحوله من بين عفراء..
:ياحظك يابنت اول وحده يشرف ع مشروعها..
عفراء بضحكه؛باش تعرفوا..لكن تصدقوا صبايا عن قريب احلى بهلبه وجذاب اكثر..راكز ورزين ويدوب شبحلي..
؛معروف استاذ سفيان محترم هلبه..
عفراء:تعرفوا واني نحكي معاه تخيلت لو صار بينا قصه حلوة ويوم مناقشة مشروعي يعرض عليا الزواج..بس فقت واني مفجوعه لما شفت الدبله اللي في يده..يعني علاش مايصيرش معاي هكي حقه بس..
:عادي الشرع محلل اربعه..
عفراء بضحكه؛انا زي الفريك مابحبش الشريك..
:طيري مرته..
عفراء بضحكه:نفكر..بعدين ضحكت وقالت..نبصر كله  الاخراب البيوت...هيا انتي وياها خل نمشوا نفطروا جعانه...
ومشت هي صاحبتها وطلعوا من القسم....

#الباقيات_الصالحات

يتبع …
الفصول الاربعة