شكولينا

الجزء التاني والاربعون

#شكولينا
#الجزء_الثاني_والأربعين
#الجمان_الفريد

عماد حياة المسلم..واكسيرها الصلاة..
واول شي يتحاسب عليه..لاخير في عمل يلهي عنها..
صلوا صلاتكم...بعدين ديروا اللي وراكم...
وقولوا لاإله إلا الله بقلب سليم طاهر تفلحوا❤
🌾صلوا على غيث القلوب وريها
     خير الخلائق رحمة الرحمن🌾
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
طلع من المحل متوجه للسيارة..
دار اتصال وقعد يراجي في الرد..
ركب السيارة وسكر الباب..
سفيان:ايوه شن جو؟
"تمام الحمدلله  انت شن جوك"
سفيان:تمام الحمد لله..بنقولك ماشي لزليطن ومع المغرب مروح بإذن الله..
"باهي توصل سالم ان شاء الله اول ماتوصل كلمني"
سفيان بإبتسامه:حاضر..ردي بالك ع روحك وع الصغار وحتى ع امي ورنده..
"من عيوني"..
سفيان تنهد وقال..
ياافتن الناس ألحاظا إذا رمقا
وأعذب الناس ألفاظا إذا نطق
"اهو بيبدا يدوخ فيا خل نسكر خير"
ضحك وقال:في امان الله..
"في ودايع الرحمن رد بالك ع روحك"..
سفيان بإبتسامه:نحبك..
ضحكت وقالت..
"سلام"..بعدين سكرت..
هو ضحك وحرك راسه يمين ويسار..
بعدين حط التليفون قدامه...
وشغل السيارة وتحرك..
🍁🍁🍁🍁
حطت التليفون في الدولاب..
وكلمت حوسة ماعين الغدي....
وعزوزتها متكيه في دار التقعميز..
وحداها بنتها تلعب مع صغار خوها..
رنده:هاكي هادي ياسي هيا هيا..
جتها ياسمين خدت منها اللعبه..
خدتها رنده وحطتها في حضنها وهي تقول:تحبي عميمه..
ياسمين:ايه..
رنده:ياعمري واني نموت فيك..وضمتها وقعد تبوس فيها..
وامها تتفرج عليها وهي حابسه دمعتها بقوة واجعتها بنتها..
شويه شافت بحر متعلق بعمته ويبي يخش لحضنها وهي تضبط فيه وتضحك...
فجأة...
حست بوجع بدي خفيف..
تعكرت ضحكتها وهي تقول:خلبوصاتي نجيهم..
زاد الوجع..وقاوماته...
ع خشت لينا وفي يدها سفره في شاهي اخضر..
حطاته قدام عزوزتها وقالت..هيا اللاي نوضي اشربي الشاهي..هي تعالي رنده..
رنده:شويه بس..
خلت الصغار ومشت ناضت طلعت من حداهم والوجع اللي تحس بيه كان ع نوبات...
لين خشت للكوجينه..
قعدت ادور ع براد الزنجبيل..
لقاته مشتله طول خدت طاسه ومشت صبت منه تاني..
وشرباته طول...ورقبتها زادت وجعتها من طعمه الحاد الحارق...
حطت الطاسه ع الرخامه..والوجع زاد..
"شن ديري!؟"
شبحت لباب الكوجينه وهي تتوجع...
وجهها ولى شاحب وفمها ولى لونه ابيض..
جتها لينا وهي تقول بفجعه:شن درتي يامهبوله شن درتي..
حطت رنده يدها ع بطنها وقعدت تتوجع بقوة ..
لينا بفجعه:رنده..
رندة بألم شديد:آااه..
لينا:تعالي تعالي هنى...وقعمزتها ع الكرسي..
ومشت بتصبلها طاسة عصير عنب لأن ضغطها هابط..
ورنده تتوجع...بعدين زادت حدة الوجع وبدت تعيط..
ع جية امها واختها رتيل يجروا..
ورنده تعيط وهي تقول:-بنموت..بنموت..
وجيهه بعياط:خيرها بنتي خيرها..
لينا جتها تجري حطت الطاسه وهي تقول:خودي يارنده خودي..عطتها حبه..
خدتها رنده وهي ترعش..
شربتها وراها  عصير نصه تبزع عليها..
رتيل بفجعه:دم دم تنزف...
وجيهه خبطت بإيديها ع وجهها وقالت:-ووه عليا بنتي..ووه..
لينا:اتصلي بمروان يارتيل بسرعه..
طلعت رتيل تجري من حداهم..
ورنده شاده بقوة في يد لينا وهي تتوجع وتعيط..
ولينا وهي متفلوشه وراعشه..حطت يدها ع بطن رندة وقعدت تقرا في الفاتحه وهي ترعش...
ورنده شادتها وهي تبكي بعياط..
ووجيهه تبكي وتدعي تقول:يارب..
🍁وهالأيام الصعبه توالت وطالت ع عيلة الشريف..
اللي عاشوا سنين في رخاء وراحه يسمعوا بالمصايب وماجتهم..
ماكانوش عارفين انهم في فترة من الزمان حياخدوا نصيبهم منها...
اجهضت رنده العيل..واقدامها على هالفعل كان سببه خوفها عليه..
خافت بوه ينتقم منها فيه...مش ساد البنت اللي خداها منها بالحيله ومش عارفه كان مازال ترجع تشوفها مرة تانيه ولا لا..
يعني حتجيب منه عيل تاني يكون ضحية هالانتقام!..
ايه صح فكرت ان ممكن يكون ولدها منقذ ليها من اللي هي فيه من بعد الله..
بس ماهانش عليها يخش صراعات زي هادي..
فعل رنده غير مقبول لاشرعا ولاعرفا...
لكن هي فكرت انها هكي دير في الصح...
الوحيد اللي كان عاجبه اللي صاير مروان من البدايه شايف ان هدا الأصلح ليها..
بس لينا كانت خايفه من ردة فعل سفيان اللي كان رافض تماما فكرة الإجهاض..
ماطولتش رنده في العياده..بعد مااطمنوا ع حالتها..
كل اللي قعدتهم فيها اربعه ساعات لين تم كيس التغذيه بعدين طلعوها..
الحمل كان في بدايته وحالة الاجهاض فهالمرحله ماتكونش صعبه هلبه...
🍁وصل الخبر لنوريه..
نوريه اللي كانت متأمله تكون حامل بعد شافت ع روحها بعض الاعراض بس لما حللت طلعت النتيجه سلبيه..
حالة الخيبه وفقدان الامل اللي هي فيها خلتها مش قادرة تفكر في حد غير نفسها..
عزوزتها زاد الحاحها ع الموضوع وبدت تحكي عنه بطريقه مباشرة وغير مباشرة..
وحاسه راجلها بادي يتأثر بكلام امه..وهالتأثير ماكانش ايجابي يعني ماولتش عنده رغبه في انه يجيب صغار بأي وسيله..
لكن المقصود هني انه مولي يضايق من الحاله اللي وصلتها نوريه بسبب امه وكلامها...
🍁ومن جهة اخرى..
عفاف اتصلت بأمها تسأل عنها وعن اختها وتخبرهم ع اللي صارلها...
بعد ماعرفت من أمها اللي صاير فيهم انصدمت بقوة وخلت راجلها يرفعها لحوش اهلها..
🍁🍁🍁🍁
"خيرك حتى انتي شن صارلك؟"
عفاف:شي يام حاجه بسيطه..رنده وين!!؟
وجيهه بدموع:في دار رتيل..
ومشوا الزوز خشوا للدار..
ولينا في الكوجينه دير في العشي وتراجي في مرواح راجلها..
شويه اتصل بيها..
هي ردت طول..
لينا؛سلام عليكم سفيان..
"وعليكم السلام..اهو قريب نوصل حبيبي جعان بنطيح من الجوع"
لينا بإبتسامة:خسى الجوع ع قولة السوريين..خلاص واتي هو..
"واني خلاص وصلت"...
وسكر..
شويه سمعت باب الحوش انفتح..
ارتسمت ع وجهها ملامح القلق..
🍁وهو خش للحوش..
نزل من السيارة ومشي ركب للشقه طول...
🌺اما هي بعد طفت ع طنجرة البرودو اللي دايرتها لرنده..
صبت منها وحطت خبزة وعصير طبيعي في سفرة...
ومشت بيها لدار رتيل..
دقت ع الباب..
ناضت رتيل فتحت..
خشت لينا وهي تقول:هي نوضي رنده كولي..
رنده بتعب؛ماخاطري في شي..
لينا:مش بخاطرك حبيبتي..بالله اللاي ساعديها تقعمز.
وجيهه:هيا بالله بنيتي نوضي كولي ع خاطري ياماما ماتوجعيش قلبي عليك بزياده..
عفاف:هيا رنوده حبيبتي نوضي..
ناضت رنده بعد الحاحهم وقعمزت..
عطت لينا السفره لعزوزتها..
خدتها منها وقالت:هيا بنتي..
"لينا"
وجيهه:روح سفيان؟
لينا:ايه خل نطلع نعشيه..
وجيهه:عشيه وبعدين خبريه..
هزت لينا راسها ومشت طلعت من االدار والقلق مسيطر عليها بس حاولت تخفيه لما شافاته..
ابتسمت وقالت:حمد لله ع السلامه...
سفيان وهو حاط ايديه في جيوب سروال التوته:الله يسلمك..وين عشانا..
لينا:خش قعمز العب مع بحر وياسمينه شويه ويجيك عشاك..
ابتسم سفيان وقال:استاحشتهم الخرابيش..
ضحكت ومشت للكوجينه وهو مشي بطريقه للدار..
🌺لينا؛يارب بردا وسلاما يارب..
صبتله عشاه ونساقاته بطريقه تفتح النفس..
بعدين جاته بيه للدار لقاته يركب في المكعبات مع الصغار..
ضحكت وقالت:بنيتلهم ستين حاجه اليوم..
سفيان وهو عاقد حواجبه ومركز مع اللعبه:تخليك منسجمه غصب عنك..
لينا بضحكه:صح..هي ابدا تعشى قبل يبرد وانا تو نكمل معاهم..
هو بعد شويه وجي للسفره وهي جت في مكانه وقعدت تلعب مع الصغار..
وهو يتعشى ويتفرج عليهم..
لينا؛ركب هدي ماما هنى...ايوه..ايوه حبيبي...شاطر ياسمح شاطر..وهي توا دور عسوله ماما ركبي انتي هدي هنى..
وركبت ياسمينه المكعب وقعدت تصفق لروحها..
وامها ضحكت وصفقت معاها...
لينا:هيا حتى انت صفق..
ضحك سفيان وقعد يصفق معاهم..
غار بحر وجي للي بنوه ضربه طاح..
لينا بشهقه:حييي..
بدت ياسمينه تبكي..
لينا؛ليش هكي ياماما غلط هكي...خداته شدت يده وقعدت تضرب فيها ضرب خفيف وتقول:كخا هكي..اعا..
سفيان:بالشويه عليه..
لينا:لاخليه يتأدب من توا..
حطت ولدها لوطا وقالت:هي...وقعدت تفك فيهم من بعض..
بعدين عطت مكعب لبحر وقالت:هي ابدا...حطه هنا..
حط بحر المكعب وين مااشرتله امه..
بعدين عطاته مكعب تاني وقالت:عطيه لياسي..واشرتله عليها..
هو مدها لاخته خداته..
لينا:سلمه وليدي السمح..وباساته..بعدين باست ياسمينه وقالت...حطيه هنى...
وحطت ياسمينه المكعب وين ماقالتلها امها..
وقعدت تركب هيا وياهم...وسفيان منسجم معاهم وهو ياكل..
وعيونه يتأملوا في لينا بإعجاب شديد..
شويه وقال:امي حدا رنده؟
لينا بلعت ريقها وقالت:ايه..حتى عفاف هنى..
سفيان:غريبه ماطلعتش سلمت..عفاف...
لينا ابتسمت وولت تلعب مع صغارها وهي متوتره..
شويه وجت عفاف خشت عليهم..
سفيان عقد حواجبه وقال:خيرك؟!
عفاف بضحكه:مافي شي كسر عادي..
ومدت يدها اليسار سلمت عليه..هوشدها وجابها قعمزها جنبه وقال:كيف صار فيك هكي!؟
عفاف بدت تحكيله..
ولينا تشوفلهم وهي مركزة ع خوف سفيان عليها انتباهه معاها وهي تحكي..
كل ماتشوف جمال علاقته بأمه وخواته يزيد اعجابها بيه اكثر..
🍁وع فكرة الحب شي والاعجاب شي..
الاعجاب لو استمر مع الحب هدا يعني ان هالحب حيقعد في حالة زيادة وتجدد مستمرين..
لكن الحب بروحه غالبا مع الوقت يفتر بين الطرفين لو مالقاش مايجدده وتصبح حياة الطرفين فيه روتنيه عاديه وحبهم عادي...🍁
سفيان؛لاحول ولاقوة الابالله..
عفاف:مادورش وخيي مافيا شي كسر وحينجبر مع الوقت..
سفيان تنهد وقال؛ياريت الكسور كلها زي كسر العظم..
لينا؛كله ينجبر ياسفيان...كسر الروح والقلب ربك هو اللي يجبره...
ابتسمت عفاف..
سفيان:ولاعمرك حتسمعي حد في الدنيا يعرف يدوي زيها..
لينا تفاجئت بكلامه..
سفيان:غير نسمعها تدوي نرتاح..
عفاف ضحكت وهي متفاجئه بعدين قالت:عمرها ماصارت يالينا...سفيان بالعاده مايحب يشكر حد راهو..
سفيان قعد يشوف للينا وهو مبتسم..
وهي نزلت عيونها للصغار وع وجهها ابتسامه خجوله من الخجل قريب تتبخر..
عفاف:وحتى هي تستاهل من يشكرها بنت اصول وقايمة راجلها وصغارها والعيله ع راسها ربي يحفظهالك ونشوف صغاركم..
سفيان نزل عيونه للصونيه وخدي منها كشيك وهو مبتسم..
ولينا تبي تهرب من كثر الخجل معاش قدرت تقيم عيونها..
عفاف ابتسمت وقالت؛نخليك تكمل عشاك براحتك..وناضت..
سفيان شبحلها وقالت:امتى مروحه؟
عفاف:بعد ساعه تانيه.
هز راسه وولى ياكل...وهي مشت طلعت..
شبحلها لقاها مازال متحشمه
سفيان:تولي مش عاديه لماتتحشمي
لينا:عليك احراجات اللي ديرلي فيهن!
سفيان:الحق فيا اني نحسابك بتفرحي..مش عارف علاش ماعنديش حظ معاك مهما نديرلك مش عاجبك..
لينا:من غير دراما يامدردم تو انا مش عاجبني منك شي..
سفيان بضحكه:باهي كانك مراة تقولي شن عاجبك فيا..
لينا:لا مانيش مراة راجل بشناباتي..
قعد يضحك وولى ياكل لقي بحر مقعمز وشاد فيده فردة الخبزة بياكلها..
لينا:هدى شني!؟
سفيان:هدا المستقبل الواعد متاعه ييجيك كبير بطن الباب مايدخلاش..
خدت منه فردة الخبزة كسرت منها وقالت:لالا تو بيجي سمح وجسمه قنين كيف عمه..اصلا يشبهك في طبعك سبحان الله تحسه عصبي واحرف وحرنيف وماعاجبه شي..
سفيان وهو يشبحلها بربع عين:شكرا..
وهي قعدت تضحك...
🌺وكمل سفيان عشاه ولينا مشت تغسل في ماعينه وهو قعد مع الصغار..
وشويه وجي راجل عفاف وروح بيها...
في الطريق..
عبدالصمد:ايه شن حالها امك..
عفاف:حال اللي واخد برده.
ابتسم بتهكم بعدين قالت:اكيد شكوا فيا عاطيك طريحه كاسرك..
عفاف:لاماليا ماعندهمش في سواد نيه مافي حد منهم جاب سيرتك..
عبدالصمد؛اممم..
عفاف:خديت للصغار مايتعشوا؟
عبدالصمد:ايه وحسبتك رغم انك ماتستاهليش..
عفاف:شن خديت؟
عبدالصمد:غريبه قبل تفتحيلي في دسكه حزينه وين نبصر عليك بصارة زي هادي .
عفاف:بصارة ولاجديات انت ملزوم بيا وهدا واجبك مش بجميلك...
عبدالصمد:باهي اسكتي خير مانكمل عليك.
عفاف ببرود:باهي اعطيني من اللي جبته..
عبدالصمد:لا..
هي التفت بتاخده بروحها وجعها كتفها وقالت:آااه..
عبدالصمد بتوتر:اففف..التفت وخدي الشكارة وحطها في حجرها وقال..خودي وفكينا من دوشتك..
هي شدت ابتسمتها وطلعت من الشكارة حاجه فتحتها لقت فيها مقلوبه اكثر حاجه تحبها..
شبحتله لقاته يشبح القدام وهو عاقد حواجبه.
شدت ضحكتها وبدت تاكل...
🌺🌺🌺🌺
الساعه 11:00ليلا..
شرب طاسة البابونج اللي دارتهاله..
حس روحه مسترخي..سيب الحسابات وناض للسرير طول..
وهي شويه وخشت..
خدت جهاز المكيف وعدلت درجة التدفئه..
بعدين مشت سكرت باب البالكونه كويس..
وخلت الدار مفتوحه..ومشت خشت السرير وهي تقول:قالوا الليله بتصير عاصفه رعديه..
سفيان:ايه سمعت بيها هي باينه من العشيه الدنيا مسحبه والسحاب اسود..
لينا:اممم..سفيان بنقولك حاجه..
هو ركز معاها وحسها بتقول شي مهم..
لينا وزعت نظرها ع الدار..بعدين قالت:رنده..شكلها من وضعها النفسي ماقدرتش تحافظ ع حملها..
عقد حواجبها بصدمه وهو يشوف للينا...
لينا بلعت ريقها وقالت:رمت..
هو قعد يشبح للينا بصدمه وغضب وعيونه تعبوا دموع..
لينا:اصلا توقعت نفسية المراة لما تكون تاعبه واجد تكون سبب في الاجهاض..
هو هز راسه وقال:ياويلها من ربي..
لينا:شن دخلها هي .
سفيان:بالله لينا ماتحاوليش تقنعيني بالعكس نعرف اختي كويس..
لينا سكتت شويه بعدين قالت:حتى لو غلطت ياسفيان...قدر وضعها وحاول تحس باللي هي قاعده تمر بيه..نشوف فيها قويه واجد اللي لعند توا قاعده تتنفس..
سفيان قعد يشبح في الفراغ وهو يفكر بألم..
اي شي ليه علاقة بالذريه حساس اتجاهه سفيان....
لدرجة انه كان عنده استعداد ياخد من رنده هالولد ويربيه كان هي ماتبيشي.....
وممكن هالشي نابع من كونه حاس ان ربي مش حيرزقه بصغار هدا علاش قسمله يربي صغار خوه...
ماقدرش يزيد كلمه زياده...كان حاس برغبه شديده في النوم حط راسه ع المخده وبدي يغمض في عيونه شويه شويه ولينا تشوفله لين رقد..
تنهدت لينا ورقدت حتي هي...وقعدت تشبحله وهي تقرا في الأذكار لين رقدت...
وهديكا الليله لاكان في عاصفه رعديه ولاحتى مطر فاتت بدون مايصير فيها اي شي قالوا عنه جماعة الأرصاد الجويه..
وعدت...وجي اليوم اللي بعده...
مزاج سفيان سيء بالمرة كانت لما تكلمه لينا يدوب يرد عليها..
وطلع من الحوش من غير مايفطر..
لينا مابتش تصر عليه خوفا من عصبيته..بس كانت مضايقه ع خاطره هلبه..
نزلت لحوش العيله..
شافت رنده نايضه ومقعمزة في دار التقعميز وتتفرج ع التلفزيون...
لينا:صباح الخير..
رنده التفتت وقال:صباح الخير..
خشتلها لينا وقالت:شن حالك اليوم؟
رنده:الحمد لله احسن...سفيان عرف؟
لينا هزت راسها بإيجاب...
رنده؛وشن قال؟!
لينا:معصب واجد..
رنده بضيق:عارفاته..خايفه يقاطعني.
لينا قعدت تشبحلها وهي ساكته..
رنده؛حاولي ترطبيله قلبه عليا يسمع منك هو..
لينا:خليه ياخد وقته ع مايصفى قلبه من ناحيتك...
رنده؛اني مانبيش سفيان يقاطعني سادني مروان..
لينا؛ماتهونيش عليهم انتي اختهم مع الوقت تو يرجع كل شي كيف ماكان..
رنده:تتوقعي يرجع كل شي زي ماكان في حياتي اني!؟
لينا:لا..بس نقول ان اللي جاي احسن من اللي كان بواجد ..
رنده:شن اللي مخليك تقولي هكي!؟..
لينا:حلو الفال الباهي..الرسول كان يحبه..
ابتسمت رنده ابتسامه خفيفه..
لينا:حتى انتي تفائلي خير...تو يجيك..
رنده تنهدت وقعدت ساكته ورجعت تشوف للتلفزيون..
شافت لينا للتلفزيون...شافت عنوان الحلقه متاع البرنامج..
"عجائب الذكر"
مشت خدت الريموت وعلت الصوت ..
ومشت قعمزت حدا رنده..
وقعدت تتفرج ورنده تتفرج معاها...
وكان الداعيه يتكلم عن ذكر"التوحيد"ومدى تأثيره ع البني آدم وحياته بكل تفاصيلها..
وتطرق لدعاء يونس في بطن الحوت..
"لاإله إلا انت سبحانك اني كنت من الظالمين"
اوله توحيد...واوسطه تسبيح...واخره استغفار...
يعني ذكر كامل شامل...يدير العجائب لمن يلزمه..
لينا؛مريت بمواقف واجده لزمت فيهن هالدعاء...نذكر زمان الباص اللي يرفع فيا المعهد عطل عليا وقعدت في الشمس نستنى ووقتها الجو كان حمو ساخن واجد معروف الصيف عندنا...
بنتصل بباتي الله يرحمه لقيت هاتفي تم شحنه...
طول قعدت نردد فيه وانا حاسه روحي بنذوب من الحمو..
شويه شويه حسيت الجو راح سمح مش عارفه كيف..
وبعدها جاني الباص طول...وهدى موقف بسيط من مواقف واجده..
تنهدت رنده وشبحت للينا وقالت:تعرفي الكلام هدا كله نعرفه بس ولامرة طبقته....
لينا؛طبقيه توا وشوفي شن يصير معاك....
رنده شبحتلها شويه بعدين ابتسمت وقالت:عنده حق يحبك فرق كبير بينك وبين زهور..
لينا:وشن جاب سيرتها زهور توا المراة عدت ع حالها..
رنده بضحكه من بين دموعها؛لازم ننزل في حد مانقدرش نشكر بس..
ضحكت لينا..
رنده بضحكه:خاطري ننزل فيك بس مش قادره..حاسه روحي نحبك..
لينا زادت ضحكت..
رنده:ماتفرحيش هلبه ردي بالك..
لينا بضحكه:لاهو انا راده بالي وواجد..
رنده ضحكت..
ولينا ضحكت معاها..
فجأة سمعوا صوت الرعد..عيطوا الزوز..
ع خشة وجيهه عليهم قالت:رعد رعد خيركم..
ضحكوا الزوز..
ابتسمت وجيهه وقالت؛بنمشي ندير فطور..
لينا؛لا خليك اللاي انا بنعدي نديره..
وجيهه:لالا اني بنديره خاطري فيه..
لينا:براحتك...
وجيهه:كلماتك منى ولاانتي كلمتيها..
لينا:لا..لاأنا ولاهي..
وجيهه:صايره حاجه بينها وبين مروان..
لينا؛مش عارفه..
هزت وجيهه راسها ومشت..
رنده:نحلفك بالله حقه ماتعرفيش..
لينا ابتسامه...اهم جو العويله...باح الخيل عميمه..
رنده فتحت حضنها:ياصباح العسل والسكر..
جوها طاحوا عليها وهي ضمتهم وقعدت تبوس فيهم بالذات ياسمين ولينا تشوفلها بإبتسامة حزن...
🍂🍂🍂🍂🍂
"هي خشوا بسرعه"...
بنية ووليد خشوا يجروا في حوش كبير ماكانش فيه حد غير مراة في أواخر الخمسين...
لقوها مقعمزة في دار المعيشه حداها صفرة فيها طاسة سحلب كانت شاربتها كلها..
خشوا عليها للدار...وهي لما شافتهم فرحت بيهم..
:صباح الخيرات صباح الوردات..
وهما جوها ضموها وكل حد فيهم قال:صباح الخير حنينه..
هو اللي كان يتأمل فيهم بإبتسامه:صباح الخير يام..
:صباحك مبروك وعدوك مهلوك ولدي..
:سامحيني يام اليوم بنخليهم عندك للعصر عند جلسه وبعدها خدمه مشغول هلبه..
:شن تقول وليدي هادم صغار ولدي راهو شن سامحيني ماسامحيني..
هو بإبتسامه قال؛ربي يحفظك ويطول في عمرك ويعطيك صحتك..
:ويحفظك وليدي..انس وليدي راك تنسى الموعد متاعي غدوة..
انس:من غير ماذكريني يام حاجه زي هادي ماننسهاش..
ابتسمت وقالت؛برا مربوحه وليدي..
ابتسم بعدين شبح لصغاره اللي كانوا يشبحوله اشرلهم بيده يودع فيهم وهما ردوهاله..
بعدين لف ومشي...
امه بعد مادرق من قدام عيونها قالت:ربي يعوضك خير ياولدي ويريح بالك...
:حنينه نبي ثحلب..
ضحكت وقالت:حاضر ياحنينه...
🍁🍁🍁🍁🍁
الساعه 1:00ظهرا..
قدام المدرسه الثانويه..
المطر كانت تصب بقوة..وهو مدرس بسيارته قدامها يراجي امتى تطلع ويشوفها...
وهي داخل مع صاحبتها يراجو في الباص..
رتيل:باردات بناويت خالك ومايتحشموش احني قداش عندنا ولاد في العيله علاقتنا بيهم محدوده سلام من بعيد وخلاص..
الهام:وخيرك حمقتي انتي؟!
رتيل وهي تظاهر بالبرود:وعلاش بنحمق..ندوي عادي قلت رأيي فيهم بس..سوري كان زعلتك..
الهام بضحكه:لاهو رأيي فيهم حتى اني..
ضحكت رتيل..
شويه رن تليفونها..
رتيل:جي الباص هي نوضي...
ناضت الهام..
فتحت رتيل السحابه وطلعوا الزوز يجروا تحتها..
لين طلعوا من بوابة المدرسه..
هو اول ماشافها سوا تقعميزته وقعد مركز فيها يدوب قدر يشوف وجهها..
الهام:حي هداكا جي..
شبحت رتيل وين ماتشبح الهام جو عيونها في عيونه غيرتهم طول وقالت؛مبرده حتى الجو هدا مخلاشي يقعمز في الحوش..
الهام بضحكه:تو مبشر يحبك صح لكن مستحيل يطلع من الحوش في جو زي هدا بش يشوفك تي هو حتى للكليه مامشاش..
ركبوا الزوز للباص ورتيل تفكر في اللي قالاته الهام..
جت عند روشن وشافت منه لقاته مازال واقف بالسيارة...
غيرت عيونها وشبحت القدام..
ومشي وراهم بالسيارة لين وصلهم الباص لراس الشارع..
نزلت الهام ومشت تجري للحوش..
ورتيل مشت تجري وسحابتها فوق راسها وهي تقول:علاش مدايرة باص كان بيوقفني في راس الشارع...
وين قربت توصل للباب فتحت الباب وشبحت يسارها شافت نفس السيارة قريبة للحوش..
خشت طول وهي تقول:مبرده..
بعدين سكرت الباب..
اما هو بعد ماخشت ضحك..وولى بالسيارة لين وصل لأول الشارع ودرس قدام حوش صاحبه..
رياض:قدام الحوش اطلع..
نزل تليفونه وقعد يستنى...
شويه وطلعله مبشر يجري..
ركب جنبه وقال:صحه ليك اللي طالع في جو زي هدا...
ابتسم رياض وقال:مش تنبال زيك..
مبشر:غير قول الحق طلعاتك الكبيده..
ضحك رياض والتفت خدي الشيت ومدهوله...
خداه وقال:والله مانطلعها ع خاطر روحي في جو زي هدا..
رياض بضحكه:باهي انزل انزل..
ضحك مبشر وقال:منور..ونزل من السيارة وهو يجري..
ورياض تحرك طول....
🍁🍁🍁🍁
الساعه 4:35عصرا
خشت للشقه وسكرت الباب وهي تتكلم بالتليفون..
لينا:السلام عليكم منمن شن جو..
"وعليكم السلام..الحمد لله..شن جوك انتي لينو"
لينا:تمام الحمد الله..شنو حال صحتك..
"الحمد لله الحمد لله احسن"
لينا:شن جو شيرو..
"يلعب وجوه مليح ومرات يسال فيا ع الصغار وين ياسي وين بهوري"
ضحكت لينا وقالت:وخيتي سلمه ونجيه..
"ويسلم اللي عندك"
لينا:تسلمي...قولي منى قاعد جوك كيف الجو اللي برا؟
"وأزفت"
لينا:مازلتي مسكرة راسك..
"بالقفل يالينا خلاص عليه هو وع عيلته اللي ماينفع فيهم خير..معقوله مافيش وحده تتصل وتسأل"
لينا سكتت وهي مضايقه منى عنده الحق شن بتقوللها مافيش مبررات.
"حتى قدام اهلي مادارولي قدر يالينا..مانبي حد يجيني غير يتصلوا بس.."
لينا:عندك حق..لكن راهو صارت مشاكل واجده اليومين اللي فاتن..
"شن صار تاني"
لينا تنهدت وقالت:رنده مرضت واجد ورفعوها للعياده ركبولها تغذيه..
قعدت منى ساكته..
لينا:الوضع ملخبط واجد يامنى..
"نقولك حاجه من قبل وتوا هدا حالهم ناسيه في وفاة بوك وامك شن دارو معاك قليلات اصل هادم"
لينا:هدي منى حبيبتي ايه عند حق وهن حركاتهن تكسر الرقبه لكن في النهايه يقعدن عمات ولدك..
"من حبهم ليه ولد خوهم ع عينك كل شي يالينا"
لينا تنهدت وقالت؛والله ماعارفه شن نقولك لكن زيدي فكري في وضعك انتي ومروان ع خاطر ولدك
"مروان!..تو انتي يالينا عارفه كل شي واني نعرف انك عارفه كل شي لو كنتي مكاني تقعدي معاه"
سكتت لينا وهي متفاجئة من وين عرفت منى ومن قاللها ان هي تعرف..
"لينا ردي عليا"..
لينا:عادي نجيكم اليوم..
تنهدت منى وقعدت ساكته..
لينا:كان فيها كيف..
"تفضلي مرحبتين بيك لكن من توا نقولك مش حتقدري تغيري موقفي"
لينا:انا نبي نشوفك مانبيش نغير فيك شي..
"مرحبتين بيك امتى تبي تعالي"..
لينا:خل نشوف سفيان ونرد عليك..
"تمام"
لينا:سلام توا...
"سلام"
سكرت لينا منها واتصلت براجلها..
نادى مرتين وانفتح الخط..
"ايوه"
لينا:شن جو..
"تمام"
لينا:فاضي توا؟
"علاش شن في"
لينا:مافي شي غير نعدي يالا منى نبي نطمن عليها ونهدرزوا..
هو قعد ساكت..
وهي تراجي في رده..
تنهد بعدين قال..
"ربع ساعه ونجي نتصل بيك تطلعي طول"
لينا:حاضر..راك تنسى الأذكار..
"بعد صليت قريتهم"
ابتسمت وقال:كويس..في امان الله .
"سلام"...
سكرت لينا بعدين اتصلت بمنى..
"ايوه منى"
🍁🍁🍁🍁🍁
في الطريق..
"باهي من وين عرفت"
لينا؛هدى اللي ماشيه ع خاطري نبي نعرف من قاللها من اللي يبي يخرب عليها..
سفيان:لاحول ولاقوة الا بالله..
وقعد يسوق بحذر الطريق كان اغلبها بحيرات..
سفيان:مش عارف امتى هالبلاد هادي يتعدل وضعها حتى المطر خلونا نكرهوها..
لينا:ربي يفرج وخلاص...
قعدوا ساكتين لين وصلوا لشارع حوش اهل منى...
درس قدام الحوش وقال:استني هني..
نزل من السيارا ومشي رن جرس الحوش..
ولينا تشوفله شويه انفتح باب الحوش..
شافاته يسلم ع واحد هدرز هو وياه شويه بعدين اشر للينا تنزل..
نزلت لينا من السيارة..
خش وهي خشت بعده..
سفيان:من غادي..
لينا هزت راسها ومشت طول لوين مااشرلها..
تلاقت هي وهند..
هند:اهلا لينا مرحبتين بيك..
لينا:اهلين بيك...وسلمت ع هند بعدين دخلتها هند للحوش..
لقت ام منى ومنى في استقبالها...
سلموا عليها بحرارة بعدين قعمزوا هدرزوا عليها وضيفوها..
وشويه وخشت هي ومنى لدار وسكروا عليهم..
وزادو ام منى واختها هند شكوا ان في شي صاير مع منى..يابينها وبين راجلها يابينها وبين اهل راجلها..
••••••
لينا:من اللي قالك انتي..
تنهدت منى وقالت:رنده..ماقالتهاش ليا وجها لوجه قالتها لأمها واني سمعتها..
تنهدت لينا وقعدت ساكته..
منى ودموعها في عيونها:شفتيه بعيونك لينا؟
لينا قعدت ساكته وهي تشوفلها.
منى دموعها نزلوا وهي تقول:بالله يالينا قوليلي كل شي كل شي..
لينا هزت راسها وقالت؛اللي بنقوله يامنى ان مروان ضعف وغلط في يوم من الايام وبعدين رجع عن غلطه لأنه يحبك ويشهد الله طول ماخدمت معاه في المستشفى لاريت منه غلط ولاسمعته عنه...
منى قعدت تبكي..
لينا؛في رجاله واجد يضعفوا وتكون ليهم نزوات بس المهم انهم يستاقظوا لارواحهم ويولوا عن غلطهم ويصلحوه والله من بعد ذلك غفور رحيم..
منى بنبرة باكيه:لو كنتي انتي مكاني لو خانك سفيان شني ديري..
لينا تنهدت وقالت:مانعرف والله شن يطلع معاي وقتها لإني مش حنكون بعقلي حنولي بحالتك تو ونتصرف من غير حكمه..
منى:هدا الطبيعي يالينا من ترضاها ع روحهاش!؟
لينا:اكيد معاك..بس لو هو ندم وتاب وتوبته كانت حقيقيه نسامحه اكيد..
منى قعد ساكته مش مقتنعه بكلام لينا..
لينا:اللي يستمر في الخيانه هو اللي مفروض تنهي حياتك معاه ومروان مش مستمر فيها يامنى..
مازال منى ساكته وهي تشوف لدبلتها وتحرك فيها..
لينا:تمام أدبيه..شعفيه لكن الطلاق انسيه..حوليه من راسك..
منى تنهدت وقعدت ساكته..
لينا:والله مانقولك فهالكلام بش نلين قلبك بس مروان يحبك واجد يامنى له يومين ماخش للحوش وحتى امه ماراها..زيدي فكري منى واعطيه فرصه تانيه يستاهلها مروان صدقيني..
••••••••••
"حسيتيها اقتنعت"
لينا:محتارة..حسيتها محتاره...
سفيان:ان شاء الله تقتنع مش ناقصين وجع قلب..
لينا:ربي يهدي سرهم ان شاء الله..
سفيان؛ان شاء الله..
وقعدوا ساكتين لين هو قال..
سفيان؛نتعشوا برا اليوم؟
لينا ابتسمت وقالت:ياريت..بس تخاف تحبسنا المطر.
سفيان:لالا قداش ليها واقفه قالوا هدا حدها..
لينا:كان هكي باهي بس ماقلنا لحد.
سفيان:تو نبعت لرتيل رساله 24ساعه وهي شاده تليفونها تو تشوفها وتقوللهم..
لينا:باهي كيف ماتبي..
سفيان شبحلها ورفع حاجبه بإبتسامه وقال:انتي تبي..
لينا ضحكت وهزت راسها بإيجاب..
شبح القدام ومشي درس قدام واحد من المطاعم ونزل هو وياها ومشوا خشولها..
وهو يكتب في الرساله ويبعت فيها لرتيل...
🌺🌺🌺🌺🌺
في دار التقعميز..
كانت رتيل مقعمزة تشرب في السحلب مع امها واختها وحداهم الصغار...
وجيهه؛بوك اليوم كلمني صوته عجبني...
رنده وهي حاضنه ياسمين:عاد قاعد عن عمتي ربيعه الدلع كله..
وجيهه:وخيرنا حني هني ماندلهعوش..
رنده ابتسمت بحزن وقالت:هني في مشاكل يام معاش في دلع..
تنهدت وجيهه وقالت:يفرج ربي...
ورتيل تشوف لاختها بحزن..
تشبحلها كيف ضامه ياسمين وتلعب معاها وتبوس فيها..
ورنده وين مانشبح ياسمين تخطر عليها ميرال وقلبها يزيد يوجعها..
《 اني نبيك تفكري في حكايه القضيه....وحطي في راسك ديما اني وراك ومش مخليك بكل..》
باست ع راس ياسمين وعقلها مابطلش تفكير في كلام خوها..
فجأة..
هرب الضي..
رتيل:ايييييه.. من بيفتح المولد توا
وجيهه فتحت فلاش هاتفها وهي تقول:سفيان ع جيه قالت لينا مش معطلين ...
رتيل:ترا هاتي يام تليفونك بنجيب تليفوني..
وجيهه؛بري بروحك الصغار مانقدرش نخليهم من غير ضي..
تأففت رتيل وناضت مشت لدار وهي تتلمس..
وخشتلها وقعدت تتلمس وهي ادور في التليفون لين لقاته..
خداته لقاته مقفل..
رتيل:ووووك عليا.
"خيرك بلاك تعيطي"
رتيل:تليفوني شحنه تم..
"سلمك فالحه"
خلاته في الدار وطلعت منها وهي تتلمس لين وصلت في دار التقعميز...
🍁🍁🍁🍁
ورجعت الدنيا سحبت..
ورعدت ومطرت...والاجواء كانت شتويه بإمتياز...
••سفيان بضحكه:والله لو كنا مرتبينها ترتيب ماجت هكي..
لينا بضحكه:سبحان الله ليك وقت تقول خاطري نهرب انا وياك في جو كله شتا ومطر ورعد وجاتك كيف ماتبي..
هو ابتسم وقال:بش تعرفي نيتي صافيه وقلبي لربي..
ضحكت ..
سفيان بإبتسامه وهو رافع حاجبه:والله ندوي مني جد..
حطت مرفقها ع الطاوله ويدها تحت ذقنها وهي مبتسمه وترفع في حواجبها وتنزلهم..
سفيان؛خليني من محاولات اقناعك اني راجل طيب..واسمعي الابيات هادم..
ضحكت ضحكة خفيفه.
طلع تليفونه وقال:مش حافظهم قريتهم من مده عجبوني كتبتهم في الحافظه بش نحفظهم وع عينك الظروف باهي اللي قعدت حافظ اسمي..
ابتسمت بأسف..
تنهد بعدين شبح للتليفون وابتسم وبدي يقرا...
اتعلمين أي حزن يبعث المطر؟
وكيف ينشج المزاريب اذا انهمر
وكيف يشعر الوحيد بالضياع..
شبحلها لقاها تشوفله بإبتسامه حلوة وهي منسجمه معاه..
هو ابتسم ورد عيونه للتليفون وكمل.
بلا إنتهاء
كالدم المراق كالجياع
كالحب..كاالاطفال..كالموتى..هو المطر
اخاف ان تمطر الدنيا وانتي لستي معي..
فمنذ ان رحلت وعندي عقدة المطر
شبحلها وقال..
احتاج...
للسير معك تحت المطر
لجنون غيرتك علي..
لمساء تشاركيني تفاصيله بحب
ساوا نظاراته الطبيه وشبح للتليفون وكمل يقول..
لكتاب تهديني اياه
لصوتك يداعب مسامعي..
للقاء ترتبه الصدف...
شبحلها وقال...وكأنه يحكي عن اللي تمنيته واهو صار..
لينا:بنقولك شي..
نزل تليفونه وقال بلهفه:واخيرا..قولي..
لينا ابتسمت وقالت؛جعانه...
ضيق عيونه وهو يشوفلها..
لينا بضحكه:الشتا يجوع..
سفيان وهو مضيق عيونه حرك راسه وهو يقول:والله جيتي بتقوليها يامحتاله ياشريرة يامسومه..هز راسه بعدين قال...لكن باهي بش نبينلك اني اطيب منك حنطلبلك عشي ونتغاضى عن جو الليبيات اللي درتيه توا..
ولينا تضحك عليه...
اشر للنادل جاه...
وقاله شن يبي طلب ماتحب لينا وطلب لروحه بعدين قال:في عندكم هني شحن لهاتف ايفون؟
النادل:ايه موجود..
عطاه التليفون وقال..لو سمحت حطه في الشحن..
خداه النادل..
سفيان:امانه راهو..
النادل:اكيد استاذي في هلبه غيرك حاطين هواتفهم في الشحن غادي قدامهم..
شافوا هو لينا للمكان..
هز راسه..
والنادل مشي بالتليفون..
حط الطلب متاعهم بعدين خدي شحن ايفون وحط تليفون سفيان في الشحن قدامهم..
لينا:جايه قبل ؟
سفيان:ايه مع ابوبكر..
لينا:لامعليش لازم تكونلي اماكن خاصه تميزني عنه صاحبه هدى..
سفيان برفعه حاجب:شوفي ابوبكر زي مايقولوا توأم روحي تمام...وانتي مكانتك عندي مس لقيلها وصف اوكي...لكن مكانتي عندك لتوا نحس فيها زي مكانتي عند ابوبكر..
لينا فنصت بضحكه..
هو هز راسه وقال:اي نعم...ومش حنشوفها غير هكي الا لو قلتي الكلمه اللي مايقولش فيها ابوبكر لان مش مهم عندي نسمعهامنه..
لينا بضحكه:شوف اللفه والدورة اللي دارها بش يوصل للي يبيه..
قعد يضحك..
لينا قعدت تحرك في راسها وهي تقول بتضييقة عيون:آمان منك ياسافيوش آمان..
وهو هدى ضحك ضم كفوفه لبعض وحطهم تحت ذقنه وقعد يتأمل فيها..
وهي ابتسمت بخجل ونزلت عيونها..
🍁🍁🍁🍁🍁
"وينه هدا عطل"
رنده؛ترا كلميه..
وجيهه:اهو بنكلمه...اتصلت بيه عطاها مقفل..عقد حواجبها بخوف وقالت:عطاني مقفل..
رنده:كلمي لينا..
واتصلت وجيهه بلينا ينادي ومايرد حد:ماتردش..
رنده:وينهم هادم!؟
وصوت الرعد والمطر قالبين الدنيا..
شويه سمعوا صوت الباب انفتح..
وجيهه:اهم خشوا..
رنده:والله ماجو طلوع ماقالوش وين ماشيين..
وجيهه:لينا قالت مشوار قصير ومش معطلين ولما نروح تو نحكيلك..
رنده:ان شاء الله خير...
"يما"..
رنده حطت بنت اختها وناضت طلعت من الدار..
وجيهه تنهدت بضيق وقالت:خش يامروان مهناك حد..
شويه خش عليهم مروان وفي يده تليفونه فاتح فيه الفلاش:خيركم مش مشغلين المولد؟!
وجيهه:مافي حد يعرف يشغله ..
مروان:سفيان ماروحش..
وجيهه بقلق:لا ماروحش بعد العصر جي خدي مرته ومشوا قالوا عندهم مشوار ومش معطلين واهو العشي قريب يأذن ومابانوش..
مروان وهو يدور ع رقمه بش يتصل بيه:كلمتوه؟
وجيهه؛ايه رقمه مسكر ومرته ماتردش..
حط مروان التليفون ع وذنه جاته الاجابه من البداله ان الرقم مقفل..
نزله وقال:غريبه..
وجيهه:زعمه مش صايرلهم شي ياكبدي..
مروان:ماتخافيش يام ان شاء الله مافي شي ماشي نولع المولد..
ومشي من حداهم..
وجيهه:قلبي قبضني..
رتيل:ماتقوليش هكي ماما ان شاء الله مافي شي اكيد الطريق تسكرت من الغدران ولاحاجه زي هكي خلتهم يعطلوا..
تنفست وجيهه بقوة من الخوف وقالت:الطف بيا يارب والله مامتحمله..
ولع الضي..
واشتغل التليفزيون ناضت رتيل تجري بش تسكره ع خاطر الصغار راقدين..
بعدين طلعت لدارها..
خشتلها لقت رنده مقعمزة ع روس صوابعها وفاتحه الدرج...
رتيل:ادوري ع حاجه؟
رنده سكرت الدرج وقالت:شن صار في سفيان..
رتيل بقلق:كلمه مروان وماحصلاش..
رنده وقفت ع حيلها وقالت:ان شاء الله خير..
ومشت قعمزت ع السرير..وخدت تليفونها وفتحت ع تطبيق القرآن وبدت تقرا..
ورتيل التفتت لتليفونها حطاته في الشحن بعدين خدت شنطتها وطلعت منها كتاباتها وبدت تقرا...
•••في المربوعه..
مروان:هاه ابوبكر شن جو...............الحمد لله.........ضحك وقال ان شاء الله ان شاء الله............عقد حواجبه وقال...كيف قصدك ماتلاقيتش انت وياه اليوم!؟.........لا العيله قالوا طالع هو وعياله من بعد العصر وقالوا مش معطلين ولتوا ماروحوش نتصلوا بيه يعطي مقفل وعياله مايردوش...............ان شاء الله خير بالله كان حصلته كلمني......تمام....هوينا....وسكر وهو يقول...وين مشوا هادم!؟
🌺🌺🌺🌺🌺
"علاش"
سألاته هالسؤال وهي تضحك..
سفيان:مش عارف كنت نشوف فيها هبله وعبيطه ونقوله مش ماشيه معاك لكن هو سكر راسه عليها..وفي الحقيقه هداكا الوقت هي ولاغيرها كنت حنطلع فيهم عله المهم نخليه يفوت المواضيع هادي لانها كانت بالنسبه ليا دوة فاضيه وضياع وقت...هو بعد طاح فيها ولت دوته كلها عليها كان دوي ع القرايه شويه لازم يجيب سيرتها ويمشي الوقت كله في الدوه عليها..
لينا بضحكه:وانت كنت تعطي فيه ع راسه..
سفيان ساوا نظاراته وقال؛مرة نعطي فيه ع راسه مرات نساير فيه مرات نلز فيه..
ضحكت لينا وقالت؛اعترف كنت تغير منها..
مسح ع حاجبه وقال بضحكه:صدقا...ايه..
قعدت تضحك لينا..
سفيان:بس غالبا كنت نشوف ان ابوبكر قاعد يشغل في نفسه بكلام فاضي لما مالقاش مني فايده استعان بفوزي الله يذكره بالخير..وبدوا يخططوا الزوز بش يوصل ابوبكر فيها ويقنعها فيه..ياقداش كنت نشوف فيهم تافهين.....
لينا ضحكت..
سفيان حك لحيته وقال متسائل:كنت شن اللي يخلي راجل يتردد ويخاف يصرح لوحده يبيها بمشاعره طالما هو ناوي الخير وناوي يجي من الباب..الموضوع ساهل تمشي توقف عليها تكلمها قالت باهي باهي قالت لا سلامته وربك يعوضك بخير منها..راجل انت راجل عيب تخاف وتوتر قدام مراة وع حاجات تافهه زي هادي..
رفعت حواجبها وهي متعجبه..
سفيان:يعني اني الشي الوحيد اللي توترت قدامه في حياتي هو استاذ فيزياء جاي من بريطانيا لليبيا ناقشت رسالتي الماجستير في حضوره بجديات هداكا الوقت كنت متوتر لأبعد حد..وفي نظري الحاجات اللي زي هادي هي اللي تستحق الراجل يتوتر ع خاطرها..
شبحلها شويه بعدين ابتسم وقال...لين شفت عيونك..
ابتسمت..
سفيان:اقسم بالله وبدون مبالغه..توترت ارتبكت تلخبطت...ومن بعدها وين نشوفك ولا تجي قدامي ولانلمحك نحس بنفس الشعور..وماكنتش عارف علاش..ومع الوقت لقيت روحي طايح واني مش عارف....وحسيت مشاعري اتجاهك قاعده تجرف فيا بقوة لين لقيت روح غارق بالمرة..
وقتها بس فهمت اللي كان يحس بيه ابوبكر..
الراجل بطبيعته مايتحملش مراة ترفضه..كيف لو كان يحبها ..يحبها بقوة...رفضها ليه يكسره من داخل...ورفضك ليا كسرني مرات ومرات..وكنت نجبر في كسري بروحي وترجع نحاول معاك مرات ومرات..
ابتسمت بحب وهي تشبحله..
تنهد وقال:فهمت بعد ماحبيتك..ان الحب عمره ماكان شي تافه...الحب شي عظيم..بس في من ينزل من قيمته لما يخليه عباره عن علاقه محرمه ملوثه تافهه ماتمش للحب بصله بس هما يلبسوا فيها ثوبه...وفي من يعطيه قيمته الحقيقيه في كونه شعور عفيف وراقي وطاهر..
شد حواف نظراته بإيديه وقال:يعني زي...نزل ايديه ع الطاوله وقال..زي قصة عمرو بن العاص..لما جي للرسول عليه الصلاة والسلام وهو منتصر انتصار عظيم..جاه في مجلس في اكابر الصحابه والقوم وقتها بش يسأل من احب الناس ليك...هو كان متوقع يقول انت بعد الانتصار الكبير للي حققته للإسلام والمسلمين...بس الرد كان مفاجئ جدا...
رد عليه بدون تردد....عائشه...
كبرت ابتسامه لينا وعيونها تعبوا دموع..
سفيان قال:عمرو قال قلت في نفسي خل نعاود نسأله ونحددله اكيد حيقول اسمي...فقاله من الرجال يارسول الله..اسمعي الرد...قال...أبوها..
مسحت لينا دموعها وهي مبتسمه وقعدت تصلي همسا ع الرسول..
سفيان:اللهم صل وسلم وبارك عليه...ماقالش ابوبكر...لا...قال ابوها..نسبة ليها هي....الموقف هدا خلاني نعرف ان الحب والتصريح بيه عمره ماينقص من قيمة الراجل ولا من مكانته ولامن اخلاقه ولا من دينه..ولاهو شعور تافه وكلام فاضي..
الحب اعظم عاطفه حطها ربي في البشر...واول مشاعر حب بين البشر ماكانتش حب الامومه ولاالأبوه ولا الاخوه ولا الصداقه..
او مشاعر حب كانت بين زوج وزوجته..آدم وحواء اللي طلعت من هني...وحط يده ع المكان اللي يجي تحت قلبه..
لينا مسحت دموعها وهي مبتسمه بحب وقالت بنبرة صوت حنونه تتخلها رعشة بكاء..
"نحبك.."

يتبع…
الفصول الاربعة