شكولينا

الجزء السادس والاربعين

#شكولينا
#الجزء_السادس_والأربعين
#الجمان_الفريد

كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫
في دار المعيشة..
مقعمزات هي وسلفتها..
سلفتها تشبحلها وهي مضايقه ع خاطرها هلبه..
وهي مقعمزة بنتها قدامها تمشطلها في شعرها...
فجأة...
انفجعوا لما سمعوا صوت الزغاريد..
مها قعدت تشبح لنوريه اللي كانت تظفر في شعر بنتها والدموع ينزلوا من عيونها..
اكثر شي صدم مها هو حمواتها اللي من اول ماجت شافت مكانه كبيرة لنوريه وسطهم كيف توا مش مراعيين شعورها ع الاقل..!
يزغردوا وفرحانات تقول اول مرة خوهم يتزوج!
لامش هكي وبس؟!
"يامبروك عليه شقيقي....هدا وين زمطته ريقي.."
ومها مصدومه...وقلبها يدق بقوة من الخوف..
هدا كنتهم اللي يحبوه وليها معاهم عمر ودارو فيها هكي
كيف هي اللي ماسكرتش معاهم عام...!
هما زوجوا خوهم بش يكثر الصغار وهو عنده من قبل..
كيف هي اللي بتقعد عامين من غير صغار!؟ باهي كان ماصارلهاش حمل بعد هالعامين شن حيكون مصيرها!!؟
استاقظت من تفكيرها وين شافت الشريف ولد نوريه خاش..
الولد كانت ع وجهه ملامح صدمه ممزوجه بالغضب يشبح لأمه كيف تظفر في شعر بنتها ودموعها ينزلوا..
الشريف:امي تعرفي وين كان بوي؟!
نوريه قلبها زاد وجعها...الشريف مش صغير واعي وفاهم كل شي...
الشريف:امي بوي خدي مراة تانيه..
نور قعدت تشبحله..
الشريف:علاش يما؟!
ونوريه كانت حاسه روحها تبي تصرخ..اطلع كل الألم اللي تحس بيه في صرخه...بس قعدت هالصرخه مكتومه داخلها..
"نوريه"
غمضت عيونها لما سمعت صوته تماسكت وتمالكت نفسها..
فتحت عيونها ومسحت دموعها...
بعدين قالت:ترا شويه ماما..
بعدت نور..
ونوريه ناضت لبست قناع البرود ومشت طلعتله..
ومها وصغارها بعيونهم معاها..
مشت طلعت وقعدت تمشي لين وصلت للصاله اللي فيها حمواتها وعزوزتها..
كلهم كانوا يشبحولها بنظرات ضيق..
وهو كان مبتسم بإستفزاز لما قال:هي تعالي..
شبحتله شويه بعدين ابتسمت ومشتله..
وصلت فيه سلمت عليه وهي تقوله؛مبارك وبالذريه الصالحه..
حسين؛الله يبارك فيك..والفال لما تشوفي صغاري وترفعيهم بين ايديك بتساعدي امهم فيهم راهو صغيره وماعندهاش خبرتك في الصغار..
الحموات شبحوا لبعض..
وامه كانت تشبحلهم بعدم رضا ع تصرفات ولدها
خافت منه وسبب الخوف حيبان بعدين..
نوريه بإبتسامه:إن شاء الله..
رمضانه:نوريه بنتي..
شبحتلها..وحسين عيونه عليها..
رمضانه:مانبيش نقولك كوني انتي وياها كيف الوخيات..بس بنقولك راعيها لله..البنيه صغيره ويتيمه وترملت بكري مسكينه وانتي عارفه علاش راجلك واخدها..
ساوت وشاحها وهي تهز في راسها وتقول:فاهمه وعارفه عمتي..
رمضانه؛ربي يكملك بعقلك يانوريه يابنية الاصول..
:ايه والله ديما تثبتي انك بنت اصول ومافيش منك يانوريه ولو جبنا غيرك ميه مافي وحده تجي في ربعك..
نوريه:بارك الله فيكم..
هو تنهد وقال؛بعد يومين يام بنروح بيها ايه حقه..هي بنسكنها في حوشي مدام نوريه قعدت هني بالصغار..
رمضانه وهي تشبح لنوريه:احسن شي..
حسين:بنركب دار نوم جديده خلال هاليومين..
نوريه وهي تسمع فيه حست كلامه زي الموس يشق في قلبها شق..
وهو متابع يقول:وبندير عشي يوم جيتها ونبيكم تفرحوا بيها..
رمضانه:اكيد وليدي من غير ماتقول...
هز راسه بعدين مشي طلع...ونوريه حتى هي مشت ولت لدار التقعميز...
:وجعتني الحق
رمضانه:هدا شرع الله مافيه شي يوجع..وتو غدوة تعرف ان اللي صار فيه مصلحة الكل وين تشوف لصغار خوت يوقفوا معاهم ويسندوهم...زي مادار بوكم الله يرحمه بعد مرته معاش قدرت تجيب صغار خداني وجبتله البنات والولاد وكلكم لاقيين بعضكم توا..
:ان شاء الله الامور تمشي ساهله هكي يام ومايصيرش فيها جو الضراير وتبدي ناويه خير ويجيك شر..
رمضانه:لالا بعون الله ماجاي كان الخير...
🍁🍁🍁🍁
وعدوا اليومين..
ونوريه ماشافتش حسين ولاحسين شافها يبات في حوشه التاني وماكلته وشرابه يوصلوه غادي..
كان عايش عذاب مابعده عذاب..وكل يوم يراجي من نوريه اي ردة فعل اي مبادرة لكن للأسف نوريه مادارت شي..
••••••••
"مش مستوعب كيف حب سنين فرطت فيه بالساهل هكي وتقولي لمصلحتك يلعن بوها مصلحتي"
خوه:اهلها عرفوا..
حسين حرك راسه بالنفي..
خوه:ماتخافش تصير مشكله لو عرفوا وياخدوها منك خصوصا ان مافيش لزواجك ع بنتهم اي مبرر مقنع...
عقد حواجبه بخوف وقال؛شن ياخدوها مني هادي !؟هادي مرتي مافي حد يحكم فيها غيري..وبعدين هي راضيه هما علاش بيعارضوا.!؟
خوه:هلبه عايلات صار في بناويتهم زي ماصار لمرتك وخدوهم غصب عنهم وطلقوهم حتى الطلاق..
حسين بغضب:على جثتي..والله ماياخدوها مني واني نتنفس..
خوه:ربك يستر وخلاص...هي نوض نوض بش تحلق وتلبس..
تأفف بضيق وقال:أستغفر الله العظيم..الله يسامحك يام وخلاص...
🍁🍁🍁🍁
"بكري كلمتني وقالت اليوم"
رنده:وخيرها ماجتش لحوشنا..علاش قعدت غادي تبي تموت بالعرق!
"والله ماني عارفه خير بلاها خايفه تصيرلها حاجه يارنده مش متريحه"
رنده:كان مش هي محلفتني مانقولش كان هدا قلت لواحد من خوتك يمشي يجيبها...
"وهدا اللي كتفني حتى اني..باهي كلميها رنوده مرات تسمع منك"
رنده:باهي تو نحاول معاها...
🍁وسكرت رنده من عفاف واتصلت بنوريه لقت رقمها مقفل..
رنده بنرفزة وخوف:وااك منك يانوريه وااك..
🍁وفي الكوجينه..
لينا:بنبدوا السبت ان شاء الله..
منى:تمام غدوة نكون فاضيه وندير كذا نوع حلو..
لينا:كويس...
منى:مالا خل نمشي نركب نوتي روحي..
لينا ابتسمت وهزت راسها بإيجاب..
طلعت من حداها منى..
وهي كلمت تنشيف الكوجينه..
وبعد كملتها...بخرت الحوش..وبعدين مشت توتي في روحها لصلاة العصر..
وهدا كله ورنده عايشه حالة قلق ع نوريه ومش قادره تتشارك مع حد اللي تحس بيه ماتقدرش تبوح بسر اختها حتى لأمها...
🍁🍁🍁
"روح قتلي"
هدا سفيان يتكلم بالتليفون  وهو في السيارة...
"ايه روح ليه يومين "
سفيان:تمام تمام منور يامشري..
وسكر منه واتصل بأنس ودمه يغلي وسط عروقه من الغضب كان يلقى يمشي يقتله في مكانه..
سفيان:ايوه استاذ انس السلام عليكم..
"وعليكم السلام خوي سفيان كيف الحال"
سفيان:الحمد لله..كيف حالك انت..
"الحمد لله بارك الله فيك"
سفيان:فيك بارك الله..استاذ انس محمد روح..
"عندي علم"
سفيان؛عندك علم!؟
"ايه عندي من متابع خوته وعرفوا انه روح ليه يومين لتوا"
سفيان؛هدا ماروح طول الا وعنده شي مخططله..
"اكيد مال شنو الخطه رسمها ونفدها من زمان وتوا جي الوقت اللي يستعمله فيها"
سفيان:باهي كيف بيصير توا نبيك تحطي في الصورة..
"بندير المتعارف عليه في القضايا اللي زي هادي بنمشيله بنفسي ونحاول نتفاهم معاه نحلوا الموضوع بتراضي..اقتنع خير وبركه مااقتنعش القاضي يفصل بينا وبينه.."
سفيان هز راسه وقال:تمام تمام..
"الاخت رنده تعرف؟"
سفيان؛لا اني اول ماعرفت كلمتك انت طول..
"كويس حاليا ماتقوللها شي نفضل انها ماتعرفش حاليا ع الأقل'
سفيان:وهدا رايي بالذات بعد قررت تكمل الماجستير واني وافقتها قلت ممكن الشي هدا يعزز ثقتها في نفسها ويقويها..
"ممتاز جدا هدا يعني انها تبي تقاوم وتوقف ع رجليها...من الأفضل انها ماتعرف شي حاليا حاول ع قد ماتقدر.."
سفيان:لالا مش حتعرف...
"ونصيحه ليك انت خوي سفيان..تحكم في اعصابك ع قد ماتقدر اني مقدر اللي انت فيه لكن في صالح اختك توا انك تضبط اعصابك ماتخليش العقل يغيب ودير تصرف تندم عليه  باقي عمرك"
تنهد سفيان وقال:وهدا علاش اتصلت بيك بش نسمع النصيحه هادي..
"بإذن الله حتاخده حق اختك حتاخده..بس لازم من الصبر"
سفيان:ربي يصب علينا الصبر الصب..
"آمين..نستأذنك توا مشغول"
سفيان:تمام ربي يعاونك..السلام عليكم..
"وعليكم السلام"
سكر سفيان وشبح القدام وهو يفكر..
مش قادر يتحمل فكرة وجود محمد قريب عليه ومايمشيش ياخد حق اخته وحقهم منه...غمض عيونه وهو يحاول يهدي نفسه...بعدين نزل عيونه وفتحهم وشبح ليده واذكر شن علمتاه لينا لما كان متوتر قبل عمليه الزايده..
وبدي يستغفر في الاول ماحس بشي تغير.
بعدين بالشويه بالشويه حس نفسه هدت...
شد الدومان وشغل السيارة وتحرك وهو مازال يهمس بالإستغفار...
🌷بكثرة إستغفارك..يزال همك..ويقضى دينك..وتمحى خطيئتك وتوفق لكل خير..وتفتح لك أبواب السماء فلايرد لك دعاء🌷
🍁🍁🍁🍁🍁
الساعه 9:00ليلا...
خش حسين بسيارته وفيها العروس الثانيه اللي كانت متحشمه ومتوترة...
جابوها بالكلاكسات..او لازم من اظهار الفرح ولو بشي بسيط للإشهار...
درس فم باب الحوش الدخلاني مباشرة...
نزل من السيارة..ومشي فتحلها الباب ونزلها ودخلها داخل..
تلقوها خواته وهما يزغردوا..
وهو مشي طلع للرجاله...
🍁دخلوا خواته العروس للصاله ووراها خشوا زوز من خواتها ووحده من خالاتها..
كان الصاله معبيه بالأقارب من الدرجه الاولى..
نساوين خوت حسين من بوه وخواته..وخواته الشقيقات ومرت خوه وعماته وخالاته..
كلهم عيونهم علي العروسه يراجو يشوفوا شكلها..
حولولها عبايتها...
وكلهم ركزوا عليها بالنظر..تبان من جيل مها صغيره..وكانت قنينه وطلتها حلوة..
قعمزوها ع الكرسي..وبدوا يجوها يسلموا عليها..
ومها تشبحلها كانت مش طايقتها تقول جايه ضرة عليها هي..
شويه وجت الحاجه رمضانه...
ناضت العروس وسلمت عليها وكبت ع راسها...
بعدين مشت رمضان وقعمزت حدا اهلها وقعدت ادور بعيونها في نوريه...لين جو ع نور اللي كانت واقفه تشبح للعروس بكره..
والعروس بعد ماانفضت من حواليها الزحمه قعدت ادور بعيونها في ضرتها ونشوف في وجوه الحاضرات وتتسأل زعمه من فيهم نوريه؟
ونوريه فهاللحظه جت خاشه...
وخشتها كانت مذهله للجميع..
كانت في غاية الأناقه والجمال بفستان خمري زادها جمال..
خطفت الأنظار من العروس..
هي مشت طول للعروس وسلمت عليها وقالت:مبارك..
والعروس تدعي في نفسها وتقول "ان شاء الله مش هي ياربي ان شاء الله مش هي"
نوريه:اني نوريه..
قريب ماتت قعدت تشبحلها ولون وجهها انخطف هزت راسها وقالت :واني إكرام..
ابتسمت نوريه مجامله وقالت:عاشت الأسامي..
ومشت قعمزت حدا سلفتها..
مها:الله يبارك عليك ابله نوريه طالعه زي الغزاله..
ابتسمت نوريه وقالت:عيونك الحلوة...
🍁ومرت نص الساعه وحطوا العشي..
وحسين حايس حوسه...يبي يشوف نوريه ومش عارف كيف..
يبي يشوف شن حالها توا وشن صاير فيها بعد شافت ضرتها..
يبي يشوف شي يبرد قلبه..
خش ووقف في السقيفه ورن ع وحده من خواته تناديهاله..
وقعد يراجي...
دقايق وجاته...هو كان يبي قلبه يبرد...بس اللي صار العكس....
نوريه:نعم حسين..
وحسين هايم فيها ومش قادر يتكلم...
نوريه:حسين..
حسين حرك راسه يمين ويسار وقال:حسبي الله ونعم الوكيل وخلاص..
بعدين مشي طلع..
هي تنهدت ورفعت عيونها فوق وقعدت تمروح عليهم بإيديها..
بعدين رشفت ولفت وخشت داخل..
🍁🍁🍁🍁
ورنده مقعمزة في الدار حدا امها وسرحانه بالتفكير في اختها ونست همها..
ع خشة سفيان وهو يقول:السلام عليكم..
وجيهه وهي متكيه:وعليكم السلام وليدي..
ركز سفيان بالنظر ع اخته لقاها قاعده سرحانه..
قعمز جنبها وجبد شعرها جبده خفيفه وقال:هييي وينك..
شبحتله وقالت:سفيان..
سفيان؛شن جو..
هزت راسها وقالت:تمام..
مسح ع شعرها بعدين قال لأمه:غريبه اليوم لانوريه لاعفاف الحوش مسكت..
وجيهه:عفاف قالت رنا مريضه مانقدرش تجي..
سفيان:خيرها؟!
وجيهه:برده.
طلع سفيان تليفونه من جيب البالطو..
وامه متابعه تقول:ونوريه قالت عندها لمه...
حط التليفون ع وذنه وقال:اني نوريه مش عاجبتني بكل يام..
وجيهه:والله حتى اني وليدي لكن اختك هادي ديما ادس ماتحكي في شي..
سفيان:ايوه عفاف شن جو..............تمام الحمد لله توا امي قالتلي رنا مريضه خيرها.............
ع خشة لينا ومعاها بحر وياسمينه كل وحد فيهم شاد نص تفاحه وياكل..
طول مشو قعمزوا في حجر عمهم وهما ياكلوا..
وهو مسح ع روسهم ويكلم في عمتهم..
ورنده ووجيهه يشبحولهم بإبتسامه..
سفيان:باهي تبي اي شي كلميني طول...ان شاء الله لاباس عليها.......قدامك كل خير..
نزل تليفونه وقال:ماقالتش بتجي غدوة ولالا نوريه؟!
وجيهه:لا ماقالتش..
ورنده تسمع فيهم وهي مضايقه..
شويه سمعوا باب الحوش انفتح..
وجيهه:شكله مروان..
سفيان:اليوم عنده مناوبه قال..
لينا:مرته كانت تحضر في مناسبه وتوا روح بيها..
سفيان:اها..
لينا؛تبي نديرلك حاجه شاهي سحلب؟
سفيان:لالا توا ماخاطري في شي...شن يام بوي راقد..
وجيهه:ايه من بكري..
هز سفيان راسه وقال:حتى اني النوم بيغلبني خلاص..
قام الصغار وناض ووقف.
ناضت لينا وقالت:لانهاري كيف هكي!؟
وخدت منه بحر...
سفيان؛تي خلاص بري نعاش زي قبل..
لينا:خل تسكر شهر قبل..
وجيهه:عندها الحق اسمع الكلام..
سفيان بإبتسامه؛حاضر..شبح للينا وقال..هيا..تصبحوا ع خير..
لينا:تصبحوا على خير..
وجيهه ورنده:قدامكم كل خير...
ومشوا هما الزوز طلعوا...
بعد طلعوا اتكت رنده وقعدت تتفرج ع التلفزيون...
وعدت نص ساعه..
وخشت منى بالشريف وهي قايماته في غمرها..
كان وجهها يبان عليه ملامح ارتباك حاولت تخفيها:السلام عليكم..
ردوا عليها السلام..
رقدت ولدها وغطاته..
ووجيهه تسأل فيها؛شن صار في العرس.
بلعت ريقها وقالت:مش عرس هو يااللاي..
وجيهه:المهم فيه عروس معناها عرس..كيف طلعت..
قعمزت منى وقالت:مش بطاله باهيه..
وجيهه:وشن دارو كله..
ومنى تنهدت وبدت تكي ومن داخل كانت خايفه..
ورنده كذلك اللي ماكانتش معاهم عقله عند اختها وخلاص..
🍁زي عفاف اللي كانت مقعمزة تبكي في دار بناويتها...
شويه وخش عبدالصمد..
مسحت دموعها فيسع..
هو دار روحه ماشفهاش...جي لبنته تحسست حرارتها بإيديه بعدين قال:عطيتيها دواها؟
عفاف رشفت وقالت:ايه..
هو شبحلها بعدين قال:اليوم وصلتني اشاعه..قالوا راجل اختك الكبيرة خدي عليها صح؟
شبحت وابتسمت ابتسامه مزيفه وهي تقول:ايه..الفال ليك..
عبدالصمد رفع عيونه وقال:آمين..
بعدين مشي طلع من الدار وسكر الباب..
وهي بعد انهارت بالبكي بس كان بكاء مكتوم ماتبيشي يسمعه ويزيد يتشمت فيها..
🍁🍁🍁
الساعه 12:30ليلا...
ونوريه..
توا قاعده تعيش اصعب واشد حالاتها..
كانت تبكي بشده وبقهر..
فشت قهرها في يدها اللي كانت تعض عليها لين درات اثر وأدمتها..
حست روحها ليلتها انها حتموت من كثر ماكانت موجوعه والنار تاكل في قلبها...
🍁عدوا تلاته ساعات.
تعبت فيهم من البكي..حطت راسها مخدتها..
وقعدت تشوف لأثر العض في يدها ودموعها ينزلوا..
فجأة انفتح باب..
فزعت لما سمعاته..وين شافتله ناضت قعمزت وهي متفاجئه..
هو كان جاي ناحيتها يشوف فيها كيف رايحه وشن صاير فيها..
قعمز مقابلها..
نوريه بصوت مبحوح:كيف تطلع في الصقع وشعرك مبلول..
حسين:كنت لابس ع راسي...
سكتت وهي تشبحله.
حسين:علاش درتي فيا وفيك هكي..
نوريه:لأني عارفه ومتأكده كان برضاي وغصب عني حيصير..انت قولي لو امك حكمت عليك تقدر تعترض..لا...
حتى لو في الأول سكرت راسك هي حتكسره وتخليك دير ماتبي..
حسين:أقسملك بالله كنت مستعد ع خاطرك نواجهها..لكن انتي قهرتيني حسستيني اني مانسوى شي عندك كل شي في حياتك يجي قبلي واني في اخر القائمه..
نوريه:بالعكس..والله العظيم نحبك ياحسين هلبه واكثر من قبل..
حسين:بس مش اكثر نفسك..
قعدت تشبحله بألم وهي ساكته..
حسين:ومع هدا يانوريه حنقعد نحبك ونعشق فيك مهما ديري معاي..شد ايديها وقال...مانقدرش ع فراقك..
نوريه:ايه واضح بعلامه الايام اللي قعدت راقد فيهم في الصاله..
حسين بإبتسامه:لكن كنتي قريبه عليا نشوفك امتى مانبي..
ابتسمت من بين دموعها بعدين:-لكن خليتها في بروحها..
حسين؛الحوش هني نقز من روشن هدا نولي عندها في الدار..
جبدت ايديها وقالت:برا نقز..
هو رجع شد ايديها وقالت:راقده بالنوم..
نوريه؛نوض من قدامي كان جاي تحرقلي في اعصابي نوض
حسين بضحكه:تولي مش عاديه لما تغاري ..
نوريه ضحكت غصب عنها وقالت:خطروا عليا ايام الجامعه..
حسين:لما كنت نلحق فيك من تركينه لتركينه وانتي ماكنتيش طايقتيني..
نوريه بضحكه:بعتلي قريب سته مرات.
حسين؛سبعه..
نوريه ضحكت وقالت:والبنات يقنعوا فيا بيك سموح وحليوه يقرا في الدراسات العليا ياهبله تو تطلعله بعته وتسافري معاه..اقنعوني بيك بعدين..
حسين؛انتي كنتي رافعه خشمك وشايفه روحك هلبه تعبتيني معاك..
نوريه:انت اللي تعبتني بالغيره متاعك درت مشاكل وعار مابعده عار وين تخطر عليا هديكا اليوم نقول كيف ماسيبتاش من عمايله..
حسين بضحكه:طحتي فب الشرك ياحلوة معاش تقدري تطلعي خلاص..
ضحكت وهو ضحك معاها..
بعدين قالت:خايفه لو تندري عليك عمتي انك عني
ديرلنا مشكله..
حسين؛ماعندها علاش ادير مشكله هي وصتني بالعدل واني قاعد نعدل..
ابتسمت وقالت؛ايه اعدل في المعامله لكن في قلبك مافيش عدل..
حسين:القلب مانملك من امره شي هو ملك لله وهو سبحانه زرعك فيه زرع...ترابه ماينبت عليه شي كان حبك بس..
نوريه بضحكه:وواك منه لسانك هدا..
ضحك...بعدين قرب راسها ليه وباسه..وشد يدها وقال:نحبك..
نوريه بإبتسامه:حتى اني...
🍁🍁🍁🍁
تاني يوم...
الساعه 10:25صباحا..
في الكوجينه..
نوريه بضحكه:طلع الفجر من عندي هارب هروب بش ماتشوفاش امه..
مها بضحكه:عليك جو..
نوريه:بش تعرفي حبيبتي لو يجيب غيري الف مراة مافي وحده تسوى عنده حاجه جنبي..
مها بإبتسامه؛ربي يسخره ليه بروحك دووم..
نوريه:آمين..هي طلعي الصفرة هديكا ..
مها؛باهي..
وطلعوا مع بعض بصفر لفطور للصاله..
وصلوا فيها وخشوا ..
كان فيها حمواتها بس..
حطوا قدامهم السفر...ع خشة رمضانه قالت لوحده من بناتها..
رمضانه:نوضي ديري لخوك ومرته فطور وارفعيه لدار التقعميز..
كلهم شبحوا لنوريه اللي ولى وجهها في لون تاني..
ناضت المقصوده وقالت:حاضر..ومشت طلعت من حداهم..
ورمضانه قعمزت وبدت تفطر...
مررت عليها نظرهم وقالت:افطروا..افطري نوريه بنيتي افطري...
نوريه بلعت لقمتها اللي نزلت عليها زي السم وقالت:اهو نفطر عمتي..
وقعدوا يفطروا..ومها عيونها ع نوريه قلبها موجوع عليها وخايف من الوصول لنفس المصير..
شويه وطلعت حماتهم بسفرة فطور من حداهم متوجهه لدار التقعميز..
ولحظات وخشت عليهم وقعمزت معاهم وعيونها ع نوريه...
🍁بعد الفطور..
خشوا الكناين يتعاونوا ع الماعين..والحموات يضموا في باقي الحوش..
ع خشة العروس بالسفره
اكرام:ربي يعاون..
شبحولها وردوا عليها..
ووحده منهم قالت:هونا من غادي الكوجينه..
اكرام هزت راسها بإبتسامه ومشت للكوجينه..
والعيون معاها..
لين وصلت للكوجينه وخشت..
شافت نوريه تحوس فيها..رفعت حاجبها وقالت:صباح الخير..
مها التفت وردت عليها:صباح الخير.
ونوريه ردت بدون ماتشبحلها:صباح الخير..
حطت السفرة وقالت:حسين نفسه مفتوحه اغلب الفطور كلاه هو..
مها شبحت لنوريه..
اكرام حطت يدها في نصها وقالت؛قوليلي نوريه هو وكال هلبه ولاغير اليوم هكي..
نوريه:حسين يحب وجبة الفطور اكثر من الغدي والعشي..
اكرام بضحكه:عارفه قالي..بس نبي نعرف كان وكال هلبه ولالا..
نوريه:لا عادي..
اكرام:اممم..هو الحق باين عليه جسمه ماشاء الله حتى الكرشة ماعنده..واضح انك تاكلي اكثر منه..
التفتت نوريه وشبحتلها..
ومها تشوف لإكرام من فوق للوطا..
اكرام بضحكه:ماشاء الله ماشاء الله ماتقوليش عيطت عليك..المهم ربي يعاون..ايه حقه بالله عليكم ابعتولنا الغدي مسلفر بش يوصل سخون...يعطيكم الصحه..
ولفت ومشت طلعت..
ونوريه مازال تشبحلها..
مها بإزدراء:عليك وحده بيئة...
تنهدت نوريه بعصبيه والتفتت كملت شغلها...
🍁🍁🍁🍁
"صباح الخير لينا"
لينا:صباح الخيرات..راحت عليك نومه..
منى:قعدت ساهره للفجر صليت وشربت مع اللاي القهوة ومع اني شربت قهوة رقدت..
لينا:شن مسهرك الشريف مريض؟
منى:لالا...بعدين قربت من لينا وقالت..مصيبه وخلاص..
لينا بخوف:مصيبة شني؟!
منى:ريتي العرس اللي كنت فيه امس..
لينا:ايه!
منى:طبعا اني وبنات العيله كان عندنا فضول نشوفوا العريس..ومشينا كلنا وقفنا ع روشن يفتح ع الشارع..وشفناه وين جي يروح بيها..اول ماشفته حسيت روحي نعرفه ولما ركزت فيه اكثر تأكدت اني نعرفه..ولما مشيت سألت خواتها من يكون وشن اسمه الجواب قريب جابلي الجلطه..
لينا؛قولي نشفتيلي دمي!
منى بلعت ريقها بعدين قالت بصوت منخفض:حسين راجل نوريه...
حطت لينا يدها ع فمها بعد ماشهقت بصدمه..
منى:مش عارفه اذا كان هي تعرف ولامن وراها؟
لينا نزلت يدها وقالت وهي تفكر:شكلها تعرف هدى ليش جوها المده الأخيره مش تمام..
منى:تصدقي ع بلاها وع اللي داراته معاي لكن وجعتني مش عارفه كيف..
لينا:لاهي من ناحية توجع...توجع الحق..
منى:اني اللي ماقدرتش نستوعبه كيف حسين يديرها وياخد عليها خوها مروان بروحه ديما يقولي ماريتش زوز متفاهمين زي حسين ونوريه...وهو يحبها هلبه ع حسب ماسمعت من خواتها وبنات العيله قالوا واخدين بعض ع علاقه..
لينا:حكاية العويله..
منى:عويله شني!؟مش عندها تلاته ولدين وبنت في اللي مش لاقيهم..
لينا:في ناس يحبوا العزوة يحبوا تكتير العويله..تلاته هادم عندهم كأنك ماجبتي..في حالات مرن عليا لما كنت نخدم عانن من القصه هدي..زي وحده كانت شبه كل عام تحمل لين جابت 6..ومازال تبي تجيب وصحتها ماتسمحش..عيت الدكتور وهي تهزب فيها لين خلتها تبكي..وقالتلها الله غالب مش بيدي راجلي يبي صغار واجد..ووحده اخرى كانت تجيب بالعمليه وفي اخر عيل الرابع قريب عدت فيها...حذرتها الدكتورة وقالت كان حملت مرة اخرى ممكن الرحم ينفجر لازم تراجعي عامين اخرات..قالتلها مانقدر يادكتورة راني مش صغيره بيش نراجي..وبات راجلي يبي ولده يجبب صغار لأنه ولد واحد يبي يعوض وحدانيته في الاحفاد..
منى:لاحول ولاقوة الا بالله..
لينا:واجد ناس هكي عقلياتهم..
منى:اني خايفه لو يعرفوا انها قريبتي احتمال يقولوا اني اللي مدبرتها..
لينا قعدت تشبحلها ..
منى؛والله يقولوها من قبل يحبوني هما...
لينا تأففت بضيق..
ع خشة رنده وهي تقول:أمتى تبدوا؟
شبحولها هما الزوز بفجعه..
رنده وقفت ع الطاوله وهي تشبحلهم قالت:بعد الغدي؟
لينا بلعت ريقها وقالت:ايه ان شاء الله..
رنده:امم..باهي فيها مشكله لو شاركت معاكم بنوعين حلو متاع شكلاطه كلهم يقولولي تبدعي فيهم..
لينا:هي ع المواد الموجوده عندنا..
رنده:باهي انتم قولوا شن ناقصكم واني نبعت نشري..
منى:مش حيكون ناقصني غير مقادير اللي انتي بديريه..
رنده هزت راسها وقالت:تمام تو بعد العصرنكلم المحل في اول الشارع عندهم خدمة توصيل..
هما الزوز هزوا رووسهم وع وجوههم ابتسامة مجامله..
رنده:شن بديروا الغدي اليوم..
لينا:بازين..
رنده؛لا البازين لعبتي خلوه ليا اني...
منى:اليوم دوري اني في الغدي..
رنده:مش مشكله خودي راحه اليوم..طلعتوا اللحم..
منى :ايه..
رنده:تمام..وحده فيكم ديرلنا قهيوه قنينه..
منى:اني تو نديرها..
رنده هزت راسها ومشت للاوندينو بش تغسل اللحم.
ولينا تشبحلها بضيق وتفكر في حكاية اختها وشن ممكن يصير من وراها حتى هي..
🍁🍁🍁🍁
وجي وقت صلاة الجمعه...
وعدا...وروحوا الرجاله من الصلاة..
حسين وخوه ورجالة خواته اللي جو يتغدوا عندهم..
كان يبي يتغدا معاهم..بس وصلاته الأوامر من امه يمشي يتغدا في حوشه مع مرته التانيه....
تناقش هو وياها بس في النهايه كلمتها هي اللي مشت..
وبعتولهم غداهم غادي...
ويقعد حسين في حوشة لبعد اذان العصر...طلع منه ومشي للجامع يصلي..
واكرام لبست وتأنقت بعدين حطت عليها حجابها ورفعت السفرة لحوش عزوزتها..
•••••
في الصاله..
اكرام؛الحمد لله ياعمتى..عطيه الصحه اللي طيب.
رمضانه؛صحيحتين بنتي..
وحمواتها وسلفها وضرتها مقعمزين معاهم ويشبحولها..
اكرام:ماشاء الله ع النظام اللي دايرينه للحياش عجبني بس حسيت حوشي مختلف عليهم في التصميم..
نوريه انطمست لما سمعت كلمة حوشي ع حوش بناته مع راجلها طوبة طوبة وحرمت روحها ع خاطره..وتوا تجي وحده ع البارد وبكل بساطه تقول هدا حوشي..
رمضانه؛لا حوش حسين بروحه مش زي حياشنا جابله مهندس تاني..
اكرام؛اممم..
:قولي اكرام شعرك امس طويل حقه هكي واللي موصل؟
اكرام ابتسمت وفتحت شعرها وحطاته ع جنب وقالت..طبيعي مية في الميه..شحيه عمتي ترا...وضحكت..
رمضانه:ماشاء الله ماشاء الله..
ونوريه كانت تحاول تبان عاديه ع قد ماتقدر ومن داخل حاسه بنار تاكل فيها ماكله..
فجأه دق الباب وسمعوا صوت حد يقول...
"السلام عليكم"
رمضانه:خش حسونه خش..
وخش حسين ومزال اكرام فاردة شعرها وتمشي عليه..
حسين:انتي هني؟!
شبحتله وابتسمت..
ونوريه تشوفله كيف يشبحلها نظراته ماكانتش فاضيه بكل..
رمضانه:جت تهدرز..
حسين شبح لنوريه غيرت عيونها طول بعديت تنحنح وقال:باهي اني طالع ماتبوا شي..
رمضانه:قبل لتطلع تعال خود..
هو استغرب وجي لأمه..
مدتله زوز تذاكر سفر:غدوة بتمشي انت واكرام لتونس اقعدوا 15يوم...
هو اتفاجئ..
واكرام فرحت..ونوريه انصدمت
والحموات ومها يشوفوا لردود افعالها وخلاص..
رمضانه؛خوك امس تملك فيهم وجابهولي هديه مني راهو..
هو خداهم وقال؛ربي يطول في عمرك يام..
اكرام بضحكه:واني نقول علاش سألتوني عن جواز السفر..
رمضانه؛ايه بنيتي عرسان انتم عيشوا ايامكم..
مها بصدمه قالت في نفسها"واني البكر وراجلي العزري للبده ماخليتنا نمشوا!؟"
وحتى نوريه يامها ماسفرتش قبل بكل لاشهر عسل ولاغيره..كل سفراتها كانت لسبب اما ع خاطر
عزوزتها ومرة وحده لنفسها بش تعالج..
هو كان متجنب يشبح لنوريه..
هز راسه وقال:صحيتي يام..
ولف ومشي..واكرام حطت وشاحها حط ع راسها وناضت طلعت وراه..
رمضانه شبحت لنوريه وقالت؛نبيهم ياخدوا ع بعضهم..
نوريه اغتصبت ابتسامه ع وجهها وهزت راسها وهي تمسح ع شعر بنتها اللي شبه فاهمه وواعيه للي قاعد يصير..
ع خشة اكرام وهي مبتسمه قعمزت جنب عزوزتها وقعدت تلم في شعرها وتقول....الجو مصقع..
رمضانه:نوضوا افتحوا الدفايه حتى اني صقعت..
ناضت وحده من البنات وفتحتها..
ونوريه وهي دايره روحها لاهيه ببنتها كانت مصدومه في عزوزتها..
كانت تعامل فيها تقول امها..كان تحسس في نوريه انها بنتها..
شن اللي خلاها هكي فجأة..
معقوله هدا كله ع خاطر الصغار!؟
وفعلا عقلية رمضانه كانت هكي..تبكي تكثر لولادها الصغار تبي عيلتها تكون كبيرة واللي يحملوا اسم راجلها من ولادها هي يكونوا اكثر من ولاد ضرتها...
وتوا تشوف في اكرام صغيره ودلل فيها هي اللي حتقدر تحققلها ماتتمنى مع الولد البكري...ولمعرفتها بحب ولدها لمرته الأولى خافت يهمل التانيه ويفوتها خصوصا انه واخدها بالإجبار لهدا هي قاعده تبعد فيه عن نوريه حاليا وتقرب فيه من مرته التانيه اللي باين انها مش ساهله بكل...
🍁🍁🍁🍁
"العبي بابا"
شدت ميرال الآيباد بعد عطاهولها بوها وبدت تلعب.
وهو مقعمز جنبها قعد لاهي بتليفونه..
كان يدور لو في حساب جديد ع الفيس لرنده مالقاش..
شويه جاته رساله ع الهاتف..
فتحها..
لقي فيها رقم رنده الجديد..واسم حسابها الجديد ع الفيس ومكتوب تحتهم...ارجوك معاش تطلب مني حاجه تانيه..
ابتسم بتهكم وقال؛سوري ياحلوه مرات نستحقك مرة تانيه..
وحط ع رقم رنده.....وقعد يشبحله هلبه ..
بعدين شبح لأسم الحساب...وطول خش ع الفيس ودار عليه بحث..
طلعله...كان بإسم..
"زمرد"
عض ع شاربه وعيونه تعبوا دموع وهو يذكر..
<<محمد:عيونك شن لونهم بالزبط قوليلي زرق خضر عسليات فيهم الالوان هادي كلها..
رنده؛يقولوا لونهم زمردي ...
محمد وهو سرحان في عيوني؛ياقداش يقتلوا فيا ويحيوا عيونك هادم..
وهي ابتسمت بخجل وغيرت عيونها عنه>>
مسح دمعه نزلت من عينه اليسار بظهر سبابته وقال:انتي اللي درتي فينا هكي يارنده انتي..
فجاه انحطت يده صغيره ع خده وقالت صاحبتها:بابا.
هو شبح لبنته...وهي قربت من عينه وباستها..
ضحك وضمها وقال:نحبك..نحبك..نحبك.
ميرال:حبك بابا..
محمد:روح بابا..وباسها ع راسها وقعد يمسح ع ظهرها وعقله مع امها.....

يتبع …
الفصول الاربعة