شكولينا

الجزء التاني والخمسون _القسم الاخير

#شكولينا
#الجزء52_القسم_الاخير
#الجمان_الفريد
كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
قعمزت مع اختها وامها ومرت خوها في تركينه مقابله لإكرام اللي كانت تشبحلها وبس..
اما هي تصنعت تجاهل اللي صار وكأنه ماصار وخلت روحها عاديه جدا..وهي مش عارفه اذا كان كل الموجودين يعرفوا او بعض منهم...
المهم عندها انها مانبانش مكسورة ولامثيرة للشفقه بل ع العكس..تخلي ضرتها هي المسكينه واللي تستحق التعاطف لانها ماتنحطش معاها في مقارنه..
وهدا اللي حساته اكرام وهي مركزة ع اللولو اللي يبرق عليها...
ومن جهة تانيه..
منى؛شفتوها كيف شبحتلي..
هند:خلي روحك عاديه انتي..زيك زيهم ماكنتي تعرفي شي..
منى:لكن عرفت من تلاته شهور وبعدت ساكته ياهند..
هند تنهدت بقلق وقعدت ساكته..
شويه وجابت وحده من قريبات العيله الدربوكه..
وقعمزت وبدت ادربك وجت وحده تانيه وعاونتها..
وبدوا شوط دربوكه هادي بعدين نشط...
واكرام كانت تغني بحماس وتعطي فيهم ابيات وهما يردوا وراها..
ونوريه وين تغني اكرام توقف تصفيق..
ولينا مركزة معاها حستها وحده مش ساهله وشبه فهمت وضعها مع نوريه..
اكرام...
وياسلملي مولى بيتي..او مولى بيتي..
ياسلملي مولى بيتي او مولى بيتي...
وع العدوان فرض شخصيتي فرض شخصيتي..
عيطوا خواتها وقووا في التصفيقه..
وهي تشبح لنوريه وع وجهه ابتسامة مكر..
وام منى وخواتها شبحوا لبعض بعدين شبحولهم...
نوريه تنهدت وقالت:عفاف ترا هاتي وشاحك..
عفاف بضحكه:ماعندكش الروح معاها الدربوكه..
هزت نوريه راسها وهي مبتسمه مسايرة..
بعدين ناضت وخدت الوشاح وكلهم عيونهم توجهت ليها..
واكرام تشبحلها بغيظ..
وبدوا يغنوا لنوريه...
الله وحد الله عليها عوينه راك ضريها...
وامها تصفق وهي تشبحلها بإبتسامه وتغني معاهم..
بعدين غنت عفاف...
سلمها وسلم فارسها...هلي في الحوش مونسها..
نوريه شبحت لاختها وهي تبتسم..
عفاف:..
الزينه سلم سيفها...مخليها ع كيفها...
وهما يردوا وراها....
عفاف..
الزينه سلم سيفها...ماعنده والي كيفها...
ضحكت نوريه وبعتت بوسه طايرة لأختها..
وعفاف ردتهالها بضحكه...
واكرام قريب تموت من الغيظ والغيره...
شويه غنت منى..
اللي ترقص هي وجنينها...ان شاء الله المولى يعينها
نوريه استكردت منى تماما...
ولينا عيونها ع منى كيف منحرجه ومتوتره..
شويه وحده من الموجودات مقعمزة قريبه ع اكرام قالت..
:بالله هادي شن ناقصها بش ياخد راجلها..
:الله هادي واخد عليها راجلها عطيه دعوه..
:قالوا مرته التانيه مطلقه ولا ارمله مش عارفه بالزبط..
:ياريتها حتى بنت وتلقيها توا من هالمزيتات المعفنات هما ولوا هكي يطيحوا فهالنماذج التافهه ويفضلوهم ع المراة المقومه...طيح سعده
: خزي مايملى عينهم كان التراب...
اكرام خدت وشاحها وناضت..
ومنى وخواتها وامها ركزوا عليها..
ولينا تمرر في نظرها عليها وعلى نوريه..
وبدت اكرام تنافس في نوريه...
من غيظها اكرام كانت تبان متحمسه بزياده وقاصده تقعمز نوريه..
ونوريه ماحبتش تخش معاها في منافسه تافهه..
حولت الوشاح ومشت ولت لمكانها...
وكملت اكرام رقيص وهي تحساب روحها غلبتها....
شويه..ووقف الشوط وولت قعمزت...
وحده من خواتها قالت:شن قصتك معاها هادي؟
:حتى اني حسيت بشي...
اكرام؛هادي نوريه..ضرتي .
الزوز بصدمه قالوا:شنوو.!!
صوتهم كان عالي الكل ركز معاهم..
اكرام:نقصوا صوتكم درتوا العار..
••عفاف بإزدراء؛قداش دره في الكبد الفرخه هديكا بالذات وهي تغني ع راجلها تحساب مافيش وحده دارت راجل غيرها هي..
نوريه بتعالي:بيئة...شلافطيه...
🍁🍁🍁
وبدوا يفرقوا عليهم في الضيافه واول حاجه كان العصير مع #شكولينا...
اللي كعادتها عجبت كل من كلاها وقعد يسأل عليها ودلوهم ع لينا اللي قعدت تنتقل من وحده للتانيه تسأل فيها عليها ومنهم هلبه شكروها ع لقائها في البرنامج التلفزيوني...
شويه نادتها اكرام..
لينا مشتلها وطبست عليها وقالت:تفضلي..
اكرام:انتي سلفة منى؟
لينا؛ايه..
اكرام؛الشكلاطه هادي قالوا انتي ديري فيها..
لينا؛نبي..
اكرام؛تمام..نبي نحجز عندك من توا لجيابي..
لينا التفتت وشبحت لنوريه لقتها تهدرز مع اختها وماتشبحش جيتهم..
رجعت شافتها وقالت:آسفه شوفي غيري...وابتسمت مجامله ولفت ومشت..
واكرام تشبحلها من فوق لتحت بعدين؛شكلها مدايرتلهم الرعب العقرب هادي حتى منى وجهها مولي اصفر من الخوف..الباين ماتعرفش..
؛شن ماتعرفش؟
اكرام:هديكا نوريه ماتعرفش اني قريبة منى..
:اها...
🍁ومرت ساعه وزعوا فيها جزء من الضيافه....
بعدين مشوا بيجيبوا العروسه...
وقعد الجو مشحون لين جابوا العروسه...
استقبلوها استقبال حلو.....ودارولها شوط قنين...
وبعدها فرقوا باقي الضيافه والعشي...
وهكي...لين جت الساعه عشرة.. وحسين اتصل بإكرام..
ناضت ومشت ردت عليه...
وعيون نوريه معاها..بعدين ولت وهي تضحك وتقول لخواتها بصوت مسموع...
اكرام:رويجلي جي..
نوريه قلبها ولعت فيه النار...حست روحها بتطلع البرود اللي كانت تحس راح بعد ماتحسنت علاقتها براجلها اللي خلا كل المشاعر الحلوة القديمه ترجع تحيا من جديد واقوى من قبل..
قعدت تشبحلها كيف تلبس عبايتها وبتطلع..
انقهرت اكتر لان اكرم حدت يومين مع حسين ورا بعض..دورها واليوم هدا اللي بتبات نوريه في حوش اهلها...
طلعت اكرام..ونوريه هربت منها دمعه فيسع مسحتها وشدت الباقي بقوة..
عفاف:خيرك نويرة..
نوريه:شي..هيا خل نروحوا..
عفاف اشرت لأمها اللي كانت مقعمزة بعيد شويه انهم بيروحوا..
وجيهه شبحت للينا واشرتلها تكلم راجلها..
لينا هزت راسها وناضت ومشت اتصلت براجلها...
شويه وجتهم وقالت؛هيا...
وجيهه؛منى جيبي العبايات...
منى هزت.راسها ومشت بسرعه...
شويه وجت...بدت بعزوزتها الاولى بعدين عطت سلفتها لأنها الاقرب..وبعدين حمواتها..
نوريه خدت منها العبايه هي تشبحلها برفعة حاجب من.فوق لتحت..
منى غيرت عيونها عنها لعفاف وقالت:شويه نجيبلكم حصة البنات..
ومشت طلعت من حداهم...
هما لبسوا وطلعوا مع بعض...
وهي لحقت عليهم مع امها...
عطوهم حصة رتيل ورنده..وسقدوهم....
وروحوا...
🍁🍁🍁🍁
حولت عبابتها وحطتها ع السرير وقالت..
اكرام؛قول من شفت غادي..
حسين وهو يحول في ساعته بيحطها ع الزيانه:مني.
اكرام جاته وقفت حنبه وحطت يدها في نصها وقالت؛نويرا...
عقد حواجبه بإستغراب وقال:شني!!؟
اكرام:والله طلعت حماة بنت خال أمي..
حسين قعد يشبحلها وهو مصدوم...
اكرام؛اني زيك انصدمت لما شفتها والله ماكنت نعرف..رفعت حاجبها وقالت وهي تهز في راسها.. ع فكرة حتى هي انصدمت شكلها ماتعرفش..
غير عيونه عنها وقعد يشبح للدبله اللي في يده اليسار كانت دبلة زواجه الاول ماحولهاش ولالبس غيرها واقنع اكرام انها الدبله توضح ان هو متزوج فقط لاغير ماتخص حد والحقيقه عكس هكي...
اكرام برفعة حاجب:في شن تفكر؟!
هو شبحلها وحرك راسه بالنفي وقال:مانفكر في شي..
ومشي للدولاب بيطلع حوايجه..
وهي وقفت قدام المرايه وبدت تحول في الطقم وقالت؛شفتها لابسه عقد وخراصات لولو انت واخدهولها..
حسين سكر الدولاب وقال؛ايه..
اكرام:حقاني ولا؟
حسين:ايه...
التفتت وقالتله:واني واخدلي هدا تضحك بيه عليا!؟
شبحلها وقال:تعرفي قداش حقه اللي لابستيه!؟
قعدت تشبحله وعيونها معبيات دموع..
حسين؛ماتفهمنيش غلط..بس مااعتقدش انك لبستي حاجه غاليه هكي في حياتك..
اكرام:اها هي بنت الباشا واني بنت الغفير!
حسين؛ولا هي لبست حاجه غاليه في حياتها زي اللي شفتيه عليها اليوم..الزوز خديتلكم بنفس السعر بالزبط..
اكرام بضحكه وعيونها في دموعها:ماتضحكش عليا..اللي خدتهولها هي اغلى لانه.قطعتين بس..امااني سعر طقم كامل..
حسين:انتي شن تبي بالزبط.!!؟ قاعد نعامل فيكم الزوز زي بعض يخي انتي مازال خير منها..حتى يوم اليوم انتي خدتيه..رفعت للمزين  اللي تبيه ونوريه عمرها ماعفست مزين...غديتك في احسن مكان  وحني مروحين قتلي وقفني ياحسين ع المخل فلاني نبي ناخد منهم كندره وخديتلك الكندره اللي جي خاطرك فيها ونوريه في اول عام ليها معاس ماخشت عليها مني حاجه جديده بسبب ظروفي وقتها ولامرة طلبت حاجه ولاحسستني ان ناقصها حاجه...و درت بيك دورة بالسيارة..نهاري كله معاك انتي وهي في حوش ماليها...حتى للمناسبه هادي ماطلبت مني ولاقالت نبي..
اكرام:انت قاعد تقارن ركز 
حسين؛غصب عني بنقارن..انت خلتيني نقارن..اني نبي نفهم شن شفتي عندها زياده عليك قوليلي..انتي زايده عليها في كل شي اللي انتي عشتيه معاي نوريه ماعاشتش ربعه..وراك تنسي انت اللي جيتي عليها مش هي يعني الجو هدا مفروض نشوفه منك مش العكس..
قلبت وجهها عنه وقعدت تشبح للزيانه ودموعها ينزلوا..
حسين:اكرام ماتخلنيش ننفر منك...
ومشي وطلع من حداها..
وهي بعد طلع مسحت دموعها...ومشت تجري للدولاب طلعت لبسه ليها..
🍁🍁🍁
اما هو بعد طلع...اتصل بنوريه اكثر من مرة وماردتش عليه بكل..بعدين بعتلها رساله..ومشي خش للحمام..
لحظات...
وطلع من الحمام ومشي لدار النوم كان متردد يخش توقع يلقى مناحه وبكاوات..
ومع هدا خش بش يطيب خاطرها....
لكن اللي شافه فاجئه هلبه..
اكرام بضحكه:تعالى نحكيلك شن قالوا عليك ولما سألوني عن حياتي معاك شن قتلهم..وايه ماقدرت ناكل شي عليك حصتي كلها خليتها بش ناكلها معاك...مايفوتش في حلقي من غيرك حسونتي....
🍁🍁🍁🍁🍁
"بسرعه بسرعه نوريه"
نوريه وهي قايمه حوايجها في يدها:هيا هي..
ومشت بسرعه للحمام وخشت سكراته وبدت تعلق في حوايجها..
وتجي بين عيونها اكرام..ولبسها..وشكلها...وغناها.. الجو اللي دارته...وضحكتها لما قالت"رويجلي جي"..
غلبوها دموعها...وغلبها بكاها ماقدرتش تشد روحها قعمزت ع حافة البانيو وقعدت تبكي بعبرة مكتومه وهي حاطه ايديها وحده ع فمها والتانيه ع قلبها اللي حساته حيولي رماد من كثر ماانحرق..
🍁🍁🍁🍁
حاضن ياسمين وهو يقول:علاش ماما حلوة هكي ياسمينه.
لينا وهي ادير في مرضعه لياسمين كانت تسمع فيه وهي مبتسمه بخجل..
وياسمينه ترد عليه بلغة طفوليه لذيذة..
سفيان:ايوه..بش تعب قلب عمك بنيتي اكثر ماهو تاعب..
لينا وهي تضحك:باهي خلاص اسكت..
سفيان قلدها وهو يقول:باهي خلاص اسكت..نسكت فيك عينك..
ياسمين؛إينك..
فنص...
وهي فنصت بضحكه وقالت؛حي بدي تلقط في الكلام راهي رد بالك..
سفيان ضحك وهو يفنص ويشبح لياسمين...
جتهم لينا وعطاته المرضعه وقالت:هاك رضعها لين نبدل..
سفيان؛لا ماتبدليش خليك هكي وضمي الحوسه..
لينا بضحكه؛وينها الحوسه..
سفيان؛راجي شويه..حط المرضعه ع الطاوله ونزل ياسمين وقال...هي انطلقي العبي بالمخاد....
لينا ضحكت بصدمه...
وياسمين ماصدقت حاست في وسط الحوش حوسه صح قلباته قلب..
وهو ناضلها وضحكته صوتها عالي..
جاها قامها فوق وقال:خلاص هي تعالي نشربوا حليب..
ومشي خدي الرضاعه وقعمز بيها وبدي يرضع فيها...وشبح لأمها واشرلها بعيونه ع الحوسه..
هي بضحكه حركت راسها يمين ويسار وبدت اضم..
وهو يتأمل فيها بعدين تنهد وقال..
وإني أغار من ذاك الذي يراك
بينما عيني منك تحرم
تنال اعينهم منك نصيبها..
ونصيبي منك على سواي مقسم..
ان كانوا هم اقرب لك مني
فليس سواي بك متيم..
قعدت ترتب في المخاد وهي مبتسمه بخجل بدون ماتشوفله...
بعد كملت قالت:رقدت خلاص..
هو تنهد تاني وحول الرضاعه وناض بياسمين ومشي للدار...
ولينا ضحكت وكملت باقي ضم الحوسه...
🍁🍁🍁🍁
الساعه 4:00فجرا...
طلع للجنان...
وهو يمسح ع شعره المبلول..بعد ماتوضا للفجر..
قام تليفونه واتصل بيها..
🍁هي كانت مقعمزة تقرا في القرآن في الصاله ودموعها مابطلوش نزول..وتليفونها يرن ع الصامت في شنطتها المعلقه ع الشماعه في الدار..
نزل التليفون وهو مضايق ع الآخر..بعدين مشي خش داخل...
بهدوء خش لدار النوم..
بدل ولبس سوريه عربيه...وبنفس الهدوء طلع من الدار ومنها من الحوش كله قاصد الجامع...
🍁وصلى حسين...
وبعد الصلاة قعد يدور بالسيارة في الشوارع لين جت الساعه 8الصبح...توجه طول لحوش نساباته عيلة بن عامر...
🏵وفي حوش بن عامر...
نوريه هي وخواتها وامها وبوها مقعمزين في الجنان يشربوا في القهوة ويهدرزوا...والاجواء كانت حلوة بالمرة...
نوريه بضحكه:ووك بوي قاعد مذكر ماينساش بكل..
عفاف بضحكه:حاجه زي هادي تنتسى..
الشريف:هدا علاش سماها سفيان نوري.
حطت نوريه يدها ع فمها وهي تضحك وتمرر في نظرها عليهم وهما يضحكوا..
بعدين حولت يدها وقالت:هي اطورت معاي الحكايه وبدت نقض حتى في المكيفات ونصلح ..
عفاف:حتى اني خشيت عليه الجو هدا..
رنده:قعدلكم السيارات بس..
نوريه هزت راسها وقالت؛يومها بدلت زيت لسيارة حسين..
كلهم ضحكوا..
الشريف؛والله هالحسين ربي عطاه نعمه هو ماقدرهاش..
خفتت ضحكاتهم وشبحوا لنوريه..
هي ابتسمت وقالت؛لا بالعكس وبيي ماتظلماش حسين قاعد زي قبل..
هز راسه وقعد ساكت...
شويه سمعوا صوت دق الباب..
كلهم استغربوا..
وجيهه:مني ع صبح ربي!؟
ناض الشريف بيشوف  الباب...والبنات مع بوهم بعيونهم...
وجيهه:ان شاء الله مومن ياكبدي..
رنده؛وجايب معاه خير..
شويه وجاهم الشريف وصل فيهم وقال...
الشريف:حسين يانوريه..
هي تفاجئت وقالت؛قتله العشيه يجي!..
الشريف:نوضي شوفيه يسأل عليك..
نوريه مررت نظرها عليهم بعدين ناضت ومشت..
وبوها ولى قعمز في مكانه..
وجيهه؛تو بيقوللها اقعدي نهارين تانيات..
شبحولها البنات وهما يفنصوا واشروا ع بوهم...
هي شبحت للشريف لقاته يكسر في البريوش وياكل وهو يشبح في الفراغ بضيق....
تنهدت بضيق وقعدت ساكته..
••••••
نوريه وصلت في حسين وقالت؛صباح الخير...
حسين وهو عاقد حواجبه: صباح الخير..تليفونك وين ياأبله؟
نوريه حكت مقدمة انفها وقالت:في الشنطة علاش؟
حسين:من امتى في الشنطه؟
نوريه:من امس من لما مشينا للعرس..
حسين رفع حواجبه وقال:ماشاء الله! رجع عقد حواجبه وقال...برا شوفي كم مرة اتصلت بيك..
نوريه:علاش شن في ان شاء الله خير عمتي صايرلها شي؟
حسين قعد يشبحلها شويه بعدين خبط بقبضه يده ع صدره وقال:اني اللي صايرلي مش امي..
نوريه رفعت حواجبها وقالت؛ اها فهمت..نزلت حواجبهة وقالت..تلاقيت اني وياها غادي لكن ماجيتش جنبها بكل ولاكلمتها شن ماقالتلك كذابه..
حسين هز راسه وقال:هيا هي وتي روحك انتي والصغار وهيا..
نوريه:مش اتفقنا ع العشيه!؟
حسين بحزم؛اني قلت توا يعني توا..تم...
نوريه تنهدت وقالت:حاضر..
هو مشي طول طلع...وهي مشت خشت داخل وتفكر كان صارت حاجه خلت حسين يجيها الصبح بهالحاله...
•••••••••
"مانعرفش ياعفاف"..
رنده:ان شاء الله خير وخلاص...
عفاف بعد ماساوت شعر نور قالت:هي نوضي بنتي..
ناضت نور وقالت؛بالسلامه خالتو..
باستها عفاف بعدين قالت:بالسلامه ياعمري...
وسلمت نوريه ع خواتها وامها..
وبوها سقدها وطلعها بروحه لسيارة لراجلها..
الشريف:ردبالك ياحسين حطها في عيونك..
حسين شبح للشريف وقال بإحراج:من غير ماتوصي ياعمي..السلام عليكم..
الشريف:وعليكم السلام..
وتحرك حسين والصغار يحيوا في جدهم بحركة اليد وهو يرد عليهم...
بعدين تنهد وخش داخل...
🍁في الطريق ماكانش في كلام بين نوريه وحسين الهدرزة كانت بينه وبين الصغار..
لين وصلوا للحوش...
نزلهم الصغار قدام حوش جدهم وقال؛بروا سلموا ع حناكم مستاحشتكم...
والصغار طول مشوا يجروا لحوش جدهم...
وهو كمل بنوريه لحوشهم...
🍁في حوش الجد...
رمضانه:مرحبتين مرحبتين تعالي نوارتي هني في حجري..
مشت نور باست خدود حناها بعدين قعمزت في حجرها..
رمضانه:قعمزوا وليداتي حداي قعمزوا...
قعمزوا الولاد حواليها..
رمضانه؛وين امكم؟
الشريف:روح بيها بوي للحوش..
رمضانه؛باهي...ونادت بصوت عالي...اكرام..يااكرام..
شويه وجت اكرام شافت الصغار بدي دمها يغلي من الغضب..
اكرام؛نعم عمتي...
رمضانه؛ديريلي فطور اني وياهم..
كتمت غضبها وقالت؛حاضر...
ولفت ومشت وهي تقول بهمس؛بالسم ليك وليهم...
•••••••••••
نوريه؛عادي..عادي..ايه صح تفاجئت بس بعدين عادي...يعني الناس كلها تعرف ان راجلي واخد عليا مش مهم هلبه من تكون ولامن وين نعرفها..
حسين قرب منها وهو يشوف لعيونها وقال؛بكيتي امس..
نوريه غيرت عيونها عنه وقالت؛علاش بنبكي..
حسين تنهدت بألم وقرب راسها ليه وباسه وقال:اقسم بالله ماقدرت نرقد غمضه...
هي ماقدرتش تشد روحها وملامح البكاء غالبه ع وجهها قالت بنبرة مرتعشه:اني رقدت..
ودموعها يطيحوا ورا بعض..
قداش كانت موجوعه من داخل ومنكسرة صح ماشكتش بس حالتها اللي هي فيها وضحت كل شي هي تحاول تخفيه..
وهو احتواها بكل مافيها بكل وخلاها تزيد تبكي المهم طلع اللي في قلبها وترتاح..
نوريه ببكي:نبي نكرهك...لالا..مانبيش نكرهك..مانبيش لانحبك ولانكرهك مانبي نحس اتجاهك بأي شي نبيك نشوفك زي اي حد مانعرفاش ولاعمري عرفته..بش نرتاح...ياريت ياحسين فهالسنين اللي فاتت قتلت كل شي حلو بيني وبينك ياريتك كنت زي باقي الرجاله ينسى مرته مع السنين ومعاش يولي ليها في قلبه شي..بش يخليها حتى هي تولي باردة من ناحيته ومعاش تحس اتجاهه بشي...علاش انتي ماكنتش هكي علاش..قعدت تضرب ع صدره وهي تقول...علاش...علاش...وانهارت بالبكي..
وهو كان يحتوي فيها ويتلقى في غضبها بدون مايزعل ولايضايق..قلبها عليها وخلاص واجعه حاله وحالها...
دموعه نزلوا منه غصبا عنه...وهو يقول:نحبك..نحبك انتي وبس..وربي يانوريه انتي بس اللي قلبي انتي بس...انتي عليك بقلبي وبس يانوريه شي تاني صدقيني والله مايهم لأنه مايغير شي..
ونوريه تسمع فيه وتزيد تبكي...وهو بصعوبه بش قدر يهديها...
🍁ع الكنبه كانوا مقعمزين ساكتين...
شويه هي قالت..
نوريه:حسين اشبحلي..
شبحلها..
نوريه:معاش دور خلاص..معاش تهتم..لو بتقعد هكي في موقف يصير تجي ترضي وتواسي انت اللي هتتعب بيني وبينها..مهما درت مش حتقدر تهون لاعليا ولاعليها.....انت دير واجبك ومادورش الباقي...
حسين قعد يشبحلها وهو ساكت..
نوريه؛زي ماقلت قبل اني اللي جتبه لروحي ممكن لو خديت موقف ماخليتش الشي هدا يصير بس ماكنتش نبي المشاكل لأن اهلي مش ناقصين..ولاكنت نبي نخسر امك وعيلتك...لكن مع الأسف خسرتك انت وماكنتش فاهمه وقتها ان خسارتك انت اكبر خسارة...خليني نتحمل نتيجه اللي خسارتي وماتحاولش تواسيني..
شد يدها بقوة وقال؛حتى لو خسرتيني ع قولتك..اني مش نخسرك..
ضحكت من بين دموعها..
حسين بضحكه:بش تعرفي من فينا يحب تاني اكثر.
ضحكت مرة تانيه...وهو ابتسم وقربها ليه وباس راسها..
وهي غمضت عيونها وتنهدت بألم....
🍁وكمل حسين يوم الجمعه كله مع نوريه....
وخلا اكرام تزيد تسحن وتحقد ع نوريه ومعاهده نفسها ان مش حتستسلملها وتسلملها في حسين...
🍁🍁🍁
يوم الأحد
الساعه 11:12صباحا..
ابوبكر:ياراجل والله قصه..اللي يتبع النساوين يتعب من توا ننصحك مادللش هلبه وماتعودهاش ع شي ماتقدرش عليه في كل وقت...
سفيان :وفر نصايحك لنفسك لاهكي نافعه ولاهكي نافعه تودر فيا في كل الحالات..
ابوبكر قعد يضحك..
شويه دق باب المكتب..
ابوبكر هدا ضحك وقال:تفضل..
انفتح الباب وخشت عفراء وهي تشبح لسفيان قالت:السلام عليكم..
فجاة خشت معاها بنيه صغيره..
لما شافوها تفاجئوا..
عفراء بضحكه:آسفه جبتها معاي مضطرة..
سفيان:مش مشكله المهم تكون هاديه..
عفراء خدتها وقعمزتها ع الكرسي وقالت:فوق ماتتصور استاذ هاديه هلبه..
سفيان شبح للبنيه..كانت جدا جميله ووجهها لطيف ابتسملها وهي حطت صبعها في فمها وابتسمت..
ابوبكر قعد يتفرج ع المشهد وهو ساكت...
عفراء ركزت ع سفيان كيف يشبح للبنيه ابتسمت وقالت؛تفضل استاذ..
شبحلها وتغيرت ملامحه للجديه وقال:هاتي..
خدي منها كتاب المشروع وقال..خليه عندي يومين نشوفه وندقق فيه...
عفراء:تمام استاذ...
سفيان:بإذن الله المناقشه حتكون بعد العيد مباشرة..
عفراء:إن شاء الله استاذ...ماتبي مني شي تاني..
سفيان؛خليك شويه وجاي..
وناض ومشي طلع من المكتب...
وعفراء قعدت تشبح لبنت اختها وتلعب فيها..وابوبكر يشوفلهم تحت لتحت...
بعد بضع دقايق ولى سفيان وفيده كيسه معبيه حاجات حلوة للبنت الصغيره جاها وقال:خودي ياحلوة..
عفراء بإبتسامه:علاش متعب روحك استاذ..
سفيان من غير مايشبحلها قال:مش مشكله..
عفراء:زيون قولي شكرا..
البنيه قعدت تاشر بيدها بش يرفعها..
عفراء بضحكه:تبيك تقيمها..
سفيان انحرج وجي للبنت رفعها....والبنيه باساته ع خده وقالت..شكرا..بلغة طفوليه...
هو ابتسم وقال؛العفو..
عفراء ناضت وفيدها تليفونها قعدت تتكلم بيه وهي تقول:هي هكي متعوده..هي تعالي زيون..
البنت شافت النقال وقعدت تقول:صورة صورة..
رفع ابوبكر حواجبه..
عفراء:خلاص زيون عاد تعالي..
البنت اصرت ع الصورة وكانت حتبكي..
سفيان ع مضض قال؛خلاص مش مشكله ديريلها ماتبي..
عفراء:اسفه جدا استاذ ماتواخذنيش..
سفيان:مش مشكله..
هي وجهت كاميرا هاتفها ليهم وصورتهم..
وابوبكر مازال يراقب بصمت...
عفراء:اسفه مرة تانيه استاذ..
هز راسه ونزل البنيه من غير مايتكلم...
عفراء؛هيا زيون..السلام عليكم..
سفيان وابوبكر:وعليكم السلام..
وطلعت عفراء من المكتب وسكرت الباب..
رفعت بنت خوها اللي كانت شاده كيسه الحلو وباستها وقالت؛صحه ليها بنت عمتها الشاطره...
بعدين ضحكت ومشت بيها..
••في المكتب...
ابوبكر:لتوا متسغرب فيك كيف استلمت مشروع بنت..
سفيان؛لا البنت هادي محترمه وماعندهاش في جو بنات هالوقت..
ابوبكر:متأكد؟
شبحله وقال؛شايف عليها حاجه.!؟
ابوبكر:لالانهائيا ..
سفيان؛مالا علاش تدوي هكي..؟
ابوبكر؛كنت نبي نعرف انطباعك عنها بس..
سفيان بضحكه:علاش بثني؟!
ابوبكر بضحكه:لامش اني كان انت تبي ثني..
سفيان؛لااني موحد وحنموت واني موحد دين ودنيا بإذن الله..
ابوبكر بضحكه؛واني ع طريقك...
ضحك سفيان وقال؛قاعدين ع موعدنا..
ابوبكر بإبتسامه؛اكيد ...
سفيان؛تمام...وناض وهو يقول..هي اني ماشي توا نتلاقوا بعدين..
ابوبكر؛زينه...
سفيان لم حاجاته ومشي طلع من المكتب...
وابوبكر تنهد وولى لخدمته...
🍁🍁🍁🍁
الساعه 5:30عصرا...
في محل #شكولينا
في الغرفه الداخليه...
كانت مقعمزة تسمع في حماتها شن تقول وهي متاثرة بكلامها..
رتيل بحزن؛وجعتني هلبه قعدت تقولي كان قدرتي توصلي فيه يارتيل خليه يسامح خوي ويطلعه..اني اصلا ماكنتش نعرف ان هو دار فيه هكي.
لينا:وليش يدير فيه هكي يبي يبعده عن طريقك يعني؟
رتيل:اني كرهته حتى هو ومعاش طايقه نسمع سيرته بعد اللي سمعته من الهام..في النهايه صاحبه هو معقوله يدير فيه هكي ع خاطر بنت..
لينا تنهدت وقعدت ساكته..
شويه وخشت عليهم "رحمه" العامله اللي تبيع في المحل..
:في وحده قالت تبيك انتي شخصيا مدام لينا ...
لينا ناضت ومشت طلعت معاها...
وخلت رتيل تمسح في دموعها حزنا ع حالي صاحبتها واهل صاحبتها ومحمله روحها الذنب...
برا...
لينا بإبتسامه:اهلا تفضلي..
؛يزيد فضلك..كيف حالك..
لينا؛الحمد لله..
:اني جاياتك من طرف امي زبونه عندكم نبي نشوف شغلك..
لينا:المحل قدامك تفضلي شوفي..
؛لا نبي نشوف اللي مطلعيش فيه للعرض طلبيات الزباين نبي نشوف شن عندكم وعليه نقرر..
لينا وهي متسغربه قالت؛باهي..تفضلي..
مشت البنت خشت مع لينا داخل..ولينا سكرت الباب..
شبحت البنت ايسارها لما سمعت صوت صغار لقت صغار لينا يلعبوا في المكان المخصص ليهم..ابتسمت..
لينا:من هني..
البنت شبحت جيهتها ومشت معاها..
لينا؛هدى شغلنا...
:اني جايتك لحاجه تانيه..
لينا استغربت..
ورتيل تشبحلهم...
:اني جاية من طرف عمي رياض*****
تفاجئت لينا وشبحت لرتيل..
ناضت رتيل وقالت:عمك..
شبحتلها البنت وقالت؛ايه..
رتيل بحده:وشن يبي؟
استغربت البنت فيها..بعدين وين ركزت فيها قالت:انتي رتيل..
رتيل:ايه..
لينا:قولي لوسمحتي شن يبي عمك..
طلعت من جيبها ظرف فيه رساله ومدتها لرتيل وقالت:اقريها ضروري..
لينا قعدت تشبح لرتيل..
وفكرت حكمت عقلها وقالت في نفسه خل نسايره بش يطلع مبشر..خدت الرساله وقالت؛تمام..وقوليله قالتلك رتيل ارجوك طلع صاحبك من الحبس..
البنت مع عدم معرفتها باللي صار قالت:باهي تو نقوله..ع سريع خل نعرفك بنفسي اني اخلاص بنت خو رياض..ونقولك يابختك لو وليتي من نصيب عمي..وهي عن اذنكم مستعجله اختي تراجي برا..
لينا؛تفضلي..
ومشت لينا سقدت البنت...
ورتيل قعدت تشبح للظرف شويه وفتحاته...
وطلعت منه الرساله وبدت تقرا...
(هادي تاني رساله تجيك مني وتقريها..)
هي قعدت تفكر شن قصده بكلامه..بعدين اذكرت الرساله اللي جتها من مبشر..كل شي في هديكا الرساله استغرباته كان بعيد عن مبشر...وتوا عرفت سبب استغرابها..
كملت قرايه وهي متفاجئة...
(ايه اللي فكرتي فيه صح..كانت مني اني...كنت نبي نساعد صاحبي اللي حكالي هلبه عنك بدون مانعرف انك نفسها البنت اللي نبيها وتمنيتها..اقسم بمن احل القسم ماعرفت الا في هداكا اليوم...
الله بس يعلم اللي صار فيا يومها موقف مانتمناش لمن يعاديني..موقف بايخ صعب..تافه بس مع الاسف انحطيت فيه..
اني بس نبيك تعرفي حاجه وحده مش حنتنازل عنك لاي سبب لأني حبيتك بكل صدق ونيتي معاك صافيه وربي العالم...مش تقولي باع صاحبه ع خاطر بنت..لا والله اني شاريك انتي بروحي ووالله مانبالغ في كلمه كاتبها....
ومازلت عند كلامي يارتيل..وصدقيني مش حنخليك لحد حنتمسك بيك حتى لو انتي رخيتي وسيبتي حنتمسك بيك لين ربي ينولني مانبي...
                   رياض
نزلت الرساله وشبحت قدامها شافت لينا واقفه تشبحلها..
لينا:شني؟!
رتيل بحزم:غير يطلع مبشر من الحبس بس..حنطلعه من عقلي..حنطلع كل شي ماعدا قرايتي من عقلي ومش حنفكر في غيرها مرة تانيه..
لينا؛نتمنى تلتزمي بكلامك هدى يارتيل..
رتيل؛والله ماحنولي فيه...ساد اللي صار لتوا شن مازال نبي يصير بعد هكي...خلاص...
لينا هزت راسها موافقه لكلامها....
☘☘☘☘☘
ومرت الأيام...
ومعاش ولى يفصل عن شهر رمضان غير بضعة ايام...
اللي صار في هالفترة...
رياض لعيون رتيل طلع مبشر من الحبس...ومبشر طلع من غادي وهو متربي فعلا من اللي شافه واللي عاشه في الحبس ومسح رتيل من راسه...
ورتيل مسحتهم هما الزوز من حياتها..ومع الاسف حتى علاقتها بصاحبتها الهام انتهت من الطرفين...
وقررت رتيل بعد نهاية السنه هادي تحول لمدرسة تانيه....
🍁اما اختها نوريه..
عايشه حياتها زي قبل...تتعامل مع حركات اكرام ببرود وتجاهل ..
اما حسين فكان يحاول ع قد مايقدر يعدل بيناتهم في الحقوق الشرعيه..لكن القلب مالاش عليه اي سلطان مالكاته نوريه كله ...
🍁وعفاف..
عايشه حياة بارده تماما مع راجلها..ولت خاليه من اي مشاعر..
تأدي في واجبها اتجاهه وقايماته..بس كله كان مجرد من المشاعر ...بس المشكله ان عفاف من داخل قاعده تنهار بالبطيء
وصار اللي قالت عليه لينا....
🍁لينا..
حياتها مستقره تماما وجوها هي وسفيان حلو...وانتظارهم لطفلهم الأول زايد حياتهم حلاوة...
🌺قبل رمضان بثلاثه ايام..
في احد الاسواق للمواد الغذائيه...
سفيان:تي مش ياسر من دوران ..
وجيهه؛مازال في حاجات ماخديناهم..
وخر سفيان خطوتين ومشي لمرته وقال:تعبتي؟
لينا بإبتسامه:لالا ماتخاف اموري تمام..
سفيان؛عاد انتوا النساوين مغلي عليكم طلعة السوق..
شاف واحد جاي من بعيد بيخطم..
قدم وحط لينا وراه والراجل مشي خطم ع حاله..
سفيان شد يده وقال؛خليك جنبي..ومشي هو وياها ولينا شاده ضحكتها..
وقدامهم رنده ووجيهه يدوروا وياخدوا ويحطوا في العربه متاع السوق..
رنده؛الماشروم قريب نسيناه...
وجيهه:خودي خودي..
مشت رنده للرف اللي فيه الماشروم خدت حكة وتنين...
وبعد ماخدت التالته..جو عيونها الزمرديه في عيون تعرفهم كويس..
بانت تجاعيد حوالين عيونه تبين انه ابتسم لما شافها..
هي خدت الحكه الرابعه ومشت بسرعه حطتها في العربه وهي مرتبكه..ودفتها..
وجيهه:تعالي هني وين ماشيه..
وقفت رنده وهي في قمة الارتباك...
وامها جت حطت الحاجات اللي خدتهم وقالت:خيرك خشتي بعضك؟
رنده حركت راسها بالنفي وقالت:لالا..
ع جية لينا وهي تقول:اللاي..
التفتت وجيهه وقالت:خيرك..
لينا:صدفه نلاقينا مع محامي رنده وامه معاه تعالي سلمي عليها..
شبحولهم...
رنده التفتت وشبحتله هو كيف يهدرز مع خوها..
بعدين شبحت لامها لينا وهما ماشيين ناحية امه اللي قدمتلهم...
وسلموا ع بعض..
هي غيرت عيونها عنهم وشبحتله لقاته منشغل بخوها..
خدت العربه ومشتلهم بيها..
وصلت فيهم ووقفت..
رنده؛السلام عليكم..
فاطمه؛وعليكم السلام...كيف حالك بنتي..
وسلموا ع بعض...
شبح انس جيهتهم ع السريع بعدين شبح لسفيان وقال..
انس:لا معاش كلمني حد..
سفيان:ياريت الجلسه كانت بعد رمضان غير بيفسد صيامي هداكا اليوم كان شفته الوضيع هدا..
انس:بالعكس وانت صايم لازم تكون في اقصى حالات ضبط النفس..واعرض عن الجاهلين..
سفيان:استغفر الله اللي زيهم ماعندهمش كنترول ع انفاعلاتهم يصير العكس تماما...
انس:انت خليك مذكر ان ابسط تصرف غلط منك مش حيكون في صالحكم وهكي انت حتساعده ع ربح القضيه..
هز سفيان راسه وهو يمرر في نظره ع المكان وقعد ساكت..
وانس شبح لرنده لقاها مربعه ايديها وتهدرز مع امه وهي مبتسمه..غير عيونه عنها بسرعه وشبح لسفيان وقال:الاخت رنده وقفت قيدها؟
سفيان شبحله وقال:لا..هي كانت تبي توقف بس انا عارضت نبيها دير امتحاناتها..وحاط في بالي نقدم شكوى في حق هداكا بش يمنعوه انه يقرب منها كنت ناوي نجيك للمكتب ونستشيرك في الموضوع هدا لكن اهو جابك ربي..
انس ضحك وقال:فعلا جابني ربي..لان كنت ناوي نكلمك تجيني للمكتب غدوة لنفس السبب..
سفيان بإستغراب؛كيف؟!
انس:قدمت طلب للمحكمه فيه انهم يطلعوا حكم يمنعوا فيه محمد من الاقتراب من الاخت رنده بمسافه معينه في اي مكان تكون هي موجوده فيه..وامس قبلوا الطلب وطلع الحكم ووصله عن طريق محاميته يعني توا حيكون حريص مايطلعش في مكان هي فيه اكثر ابدا..
سفيان:فاجئتني..وزدت خليت ثقتي بيك تزيد فعلا عارف شغلك زي ماقال ابوبكر...
انس بضحكه:بارك الله فيكم..
ابتسم سفيان والتفت شبح لأخته..
وانس حتى هو قعد يشبحلها...
هي غيرت عيونها بش تشبحلهم جو فعيونه هو...ارتبكت وغيرتهم لخوها لقاته يشوفلها بإبتسامه..هي ردتها ..
التفت سفيان..وبسرعه انس شبحله..
سفيان:ان شاء الله خير..
انس:بإذن الله...هي مالا حني نستأدنوكم..
سفيان :اذنك معاك ورب صدفه خير من الف ميعاد..
انس:فعلا..وشبح لأمه ونادي..امي...
••فاطمه بإبتسامه؛هي مالا مانعطلش عليكم فرصه سعيده..
وجيهه:حني اسعد..
فاطمه:ان شاء الله كل عام وانتم بخير..
هما باصوات متقطعه:كل سنه وانتي طيبه...
فاطمه:بالسلامه..
وجيهه:بالسلامه..تصبحي ع خير..
فاطمه وهي ماشيه:قدامك كل خير..
وجيهه؛ماشاء الله عليها حتى هدرزتها قنينه..
لينا؛ايه صح...
ورنده تسرقله في النظر..
وهو ماشي شبحلها لقاها تشبحله..
هربت بعيونها ولفت بالعربه وقعدت تمشي وقلبها يدق بقوة وفي نفسها تقول..
"علاش صار فيا هكي لما شفته اليوم !؟"..
اما هو لما وصلت فيه امه مشي بالعربه وهو مبتسم..
فاطمه؛ماشاء الله عليها امه حتى هدرزتها حلوة..
ضحك وهز راسه وهو ساكت..
وامه تشوفله بطرف عينها وهي مبتسمه...
جي سفيان شد يد مرته..
لينا:حسيته قالك شي فرحك..
سفيان بإبتسامه:نموت فيك يلي تفهمني من نظره..
لينا بضحكه:غير هيا قول...
سفيان:بعد نروحوا نحكيلك...
لينا بإبتسامه:تمام..
••••••••
"الله!"
لينا بضحكه؛والله..
شبحت رتيل لرنده بفرحه وهي تقول:سمعتي رنودي...
رنده اللي كانت متفاجئة وقلبها يدق بقوة قالت:سمعت..
لينا:ياهكي المحامي يابلاش الحق انا متفائلة واجد..
رتيل:حتى اني..
رنده بلعت ريقها وقالت وهي تمرر في نظرها عليهم:إن شاء الله خير...
الزوز قالوا:إن شاء الله..
☘☘☘☘
وخش شهر الخير..
جاي بخيره...وطمأنينته وأمانه...
وزي ماهو معروف الشياطين تتكبل فيه..
بس البشر يقعدوا مطلوقين....
••ثالث يوم رمضان....
اكرام؛والله ماني قادره نتحرك ولاندير حاجه..
رمضانه:قعمزي بنيتي قعمزي واضح عليك التعب..تعالي ارقدي..
مشت اكرام رقدت حدا عزوزتها ودايرة روحها بتموت..
وخلت مها ونوريه مشنوقات في الكوجينه..
مها؛توقعتها بديرها من امس تلمح..
نوريه:فوتيها..هي وجهها مش وجه اجر..
ضحكت مها وقالت:وجه فقر..
نوريه بضحكه؛ماتخليهاش تفسد صيامك..
مها بضحكه:ع قولتك....
نوريه؛في الليل بنمشي لحوش ماليا مرت خوي دايره لراجلها عيد ميلاد..ضحكت وقالت..لاول مرة في حياته..
مها ضحكت بعدين قالت؛بطول عمره وربي يخليهم لبعض..
نوريه بإبتسامه:اللهم آمين...
🌺🌺🌺🌺🌺
في حوش الشريف..
الكوجينه الخارجيه اللي تفوح منها احلى روايح الاكل اللي تشهي المفطر يابال الصايم...
المكيف المفتوح...
وتحته رف..محطوط عليه مصاحف..
وجنبهم راديو مفتوح ع اذاعه الإيمان...
يسمعوا منه في محاضرة لأحد العلماء....وهما يشتغلوا والسنتهم تلهج بذكر الله...
شويه رنده قالت:ايه حقه بكري قلتيلي خربتي المفاجاة..
لينا بضحكه؛ياحنه بعد الفجر قعدت نخدم ع التورته ولماكملتها قلت خل نحطها في الثلاجه ونرقد ساعتيه بعدها نوض ننزل ونزلها..
راجت عليا نومه لعند الساعه تسعه وعوني ياسمينه وبحر..
وين فقت عديت للكوجينه بنديرلهم فطور لقت عمك سفيان مصبي قدام التلاجه ويتفرج قريب اغمى عليا منين ريته..
قعدوا يضحكوا..
رتيل بضحكه؛شن قال؟
لينا؛لما راني سكر الثلاجه وقال لاريت ولاشبحت...وهو يضحك وعدى طلع من الشقه ..
رنده بضحكه؛خسارة..
لينا:يللا مش مهم المهم نديروله جو سمح..
ع خشة وجيهه:على مني الحلو..
منى:اني اللاي..
وجيهه؛بري فيسع ابدي االعصر قريب يذن..
منى مصمصت ايديها ومسحتهم في المريول وهي تقول؛هيا هي...ومشت طلعت من حداهم بسرعه..
وجيهه:وانتي شن صار الطاجين اليوناني درتيه بروحك؟
رتيل:الكذب حرام صيام ورمضان..عاونتيني فيه منى..
وجيهه؛مافيش باس اول مرة عادي لكن في الجديد كله بروحك..
رتيل:حاضر حاجه وجيهه..
رنده؛فال وعلى الله الكمال..
وجيهه بإبتسامه:العام هدا عمرة وحجه ان شاء الله..
كلهم بأصوات متقطعه قالوا:ان شاء الله...آمين يارب...
🍁🍁🍁🍁🍁
"اللهم اني صايم وخلاص"
فاطمه طلعت من الكوجينه وهي تقول:خيرك ولدي..
انس:شوفي المخلوقه هديكا شن باعته مع الصغار..
شبحت للصغار لقتهم شادين حافظات في ايديهم..
فاطمه جتهم باستهم الزوز وهي تقول:مرحبتين بنور العين..من جابكم..
فواز؛خالي...
انس؛تحطيلي منها اللبز اللي باعتاته نسيب الفطور ونطلع..
فاطمه؛باهي غير صل ع النبي ولدي واستهدى بالله ماني حاطه منه شي..
هز راسه وقال؛اني فوق نخدم...ومشي من حداهم...
فاطمه تنهدت وقالت؛ هي تعالوا غواليا..
ومشت هي والصغار خشوا للكوجينه....
🍁🍁🍁🍁🍁
"تعال ولدي تعال"
محمد وهو يمسح  ع شعر ميرال اللي راقده ع رجله؛متأكده يام؟! مش نجي متسهف ع ماكلتك ونحصل لزة ويقعد في خاطري..
"لالا وليدي لا..هو قال قوليله يجي هو بنته"
ابتسم محمد وقال:تمام تمام ياغاليه..جاي ان شاء الله..
"نراجو فيك..هي بالسلامه"
محمد؛سلام..وسكر بعدين قال..عارفه علاش يبيني نجي..هز راسه وقعد ساكت وغير عيونه لبنته طبس ع راسها باس بعدين قعد يمسح عليه وسرح بتفكيره في يوم غدوة...يوم الجلسه...
🍁🍁🍁🍁🍁
وقبل المغرب بربع ساعه...
كانوا نوريه وعفاف في حوش بوهم...
قعدوا مقعمزين في الصاله يهدرزوا ع بوهم وامهم..
شويه وجوهم خوتهم الولاد قعمزوا حداهم وانضمولهم باقي البنات...
في الكوجينه...
لينا:خليك عاديه نوريه مدام سكتت المده هدي كلها معناها مش حدير مشكله وتتغاظى عن الموضوع
منى:سكات نوريه احرف من كلامها يالينا
لينا انتي ماتعرفيهاش زي مااني نعرفها حتحطني في راسها واني ماصدقت تريحت يالينا وعلاقتي بيها ولت باهيه وارتاح دماغي من المشاكل وحرق الدم والهم..
لينا تنهدت وقالت:احسن شي انك توضحيلها اللي صار بالزبط..
منى:واني هدا اللي بنديره...
لينا:هي تعالي نعدوا للدار بيذن خلاص..
تنهدت منى ومشت طلعت هي وسلفتها للدار..
خشوا قعمزوا داخل والصغار راقدين حداهم...
شويه وخشت عفاف..
عفاف:كناينا...
ومشت سلمت عليهم بعدين قعمزت وهي تقول:راقدين عساسيلي..
لينا:اها ريحونا سلامتهم...
عفاف بضحكه:سلامتهم..
شوية وخشت نوريه وقالت:السلام عليكم..
منى بلعت ريقها وهي تشوفلها..
ولينا ردت السلام...
جتها نوريه سلمت عليها...
بعدين سلمت ع منى ومشت قعمزت حدا اختها..
نوريه:احسن حاجه رقدوا الصغار سلامتهم نكره الحوسه ع سفرة فطور رمضان..
ع خشة امهم وخواتهم والبنات الصغار مع خالاتهم..
وجيهه:قعمزوا حدا امهاتكم بنياتي..وقعمزت..
وكل حد خدي مكانه ع سفرة الفطور والمغرب آذن...
وبدوا يفطروا..
منى وهي تاكل جو عيونها في عيون نوريه..
نوريه غيرت عيونها ورفعت حاجبها..
ولينا تسرقلهم في النظر...
🍁ومر الوقت بهدوء ونفس الاجواء الحلوة متاع ايام رمضان..
وانشغلوا بالتجهيز لحفلة ذكرى ميلاد سفيان..
البنات برا يضموا في الحوش ويجهزوا في الصاله..
ولينا في الكوجينه توتي في التورته ومايتبعها...
"لينا"
انخلعت ولفت درقت التورته...
لينا وهي تفنص مخلوعه:شن مقعدك انت عدي للتروايح!
سفيان غمض عيونه وقال:مانشبح في شي مانشبح في شي ماتخافيش...
لينا بضحكه؛صامت ..
فتح عين وحده وقال؛قولي خاطرك في حاجه نجيبها معاي..
لينا حركت راسها بالنفي..
سفيان فتح عينه التانيه و عقد حواجبه وحاجبه اليسار مرفوع شويه وقال:مالا ماتراجونيش ع السحور بنتسحر برا مع الجماعه.
لينا:لابالله لا روح بعد التروايح..
سفيان؛عاطي موعد للجماعه مانقدرش نوخر..
لينا؛غير حاول تفوته ع خاطري..
سفيان:امم باهي علاش انتي مصرة ع مرواحتي بعد التروايح..
لينا؛هكي نبي نقعدوا عيله مع بعضنا نهدرزوا تقعميزة عائليه..
سفيان:اممم..هو هدا بس...!؟ باهي علاش حاس ان في شي تاني..
لينا؛لاتاني لاتالت..
سفيان:-اهمم..وقدملها خدي كاشيك بياخد من التورته..
هي ضربت كاشيكها بالكاشيك اللي في يدها.
سفيان رفع حواجبه وقال:اشيي!..
وضرب كاشيكها وهي ردتها وقعدوا يضاربوا بالكواشيك..
لينا:بلا صماته ياصامت داير روحك مش عارف..
سفيان:وانتي دايره ماتعرفيش اني داير روحي مش عارف..اااووه..دخت..
لينا وهي تضحك :باهي ياسر ياصامت..
سفيان؛لا لين يطيح الكاشيك اللي في يدك..
ع خشة امه شافتهم هكي رفعت حواجبها بتعجب..
هو من الاحراج طاح منه الكاشيك بروحه وقال:صار قلتي ماتبي شي..تمام..سلام..ومشي طلع من الباب متاع الجنان..
لينا وهي شاده الكاشيك وتشبح لعزوزتها بإحراج قالت؛تبي حاجه اللاي..
وجيهه بنبرة تهكميه؛شنطة عدة...ولفت ومشت طلعت من الكوجينه..
ولينا قعدت تضحك....
🍁في دار التقعميز..
منى مقعمزة توكل في ولدها...
خشت عليها نوريه...
شافتها وقعدت تشبحلها..
نوريه سكرت  الباب..
ومنى الميه نزلت في ركابها..
نوريه حطت يدها في نصها وقالت؛من امتى تعرفي..ماتكذبيش وتقولي مانعرفش امي قبل حكت قدامي ع قريبتك اللي بياخدها راجل متزوج وهي ارمله وحجته انه مايجيبيش في صغار...وطبعا انتي مايفوتك شي اكيد عرفتيه من يكون..
بلعت منى ريقها وقالت:ايه..تعرف بس ماقدرتش نقول..
نوريه:ايه بش تتشمتي فيا بينك وبين نفسك وتضحكي عليا لين تشبعي..
منى؛لا والله ماهكي..
نوريه:ماتحلفيش...ع العموم توا مش مهم اللي صار صار..وانتي كل مالي نتأكد من نظرتي فيك..شبحتلها من فوق لتحت وفتحت الباب وطلعت...
غمضت منى عيونها بضيق بعدين فتحهم وشبحت لولدها..
الشريف:ماما..
خدت نفس وقالت:كول ماما كول حبيبي...
🌺🌺🌺🌺🌺
بعد صلاة التروايح..
كانت الصاله واتيه فيها مظاهر الاحتفال كلها...
شويه وجو البنات الصغار يقولوا:جي خالوا جي...
لحظات وخش عليهم سفيان...
ويستقبلوه نوريه وعفاف بالفرقعه متاع المناسبات..
هو انخلع بعدين قعد يشبح للورق الملون اللي ينزل عليه...
وخواته يضحكوا...
بعدين شبح للصاله فنص عيونه بطريقه مبالغ فيها ع اساس انه متفاجئ وقال:هدا شنو..لمنو!؟ ليا اني!؟ عقد حواجبه وقال..علاش اليوم التاريخ شنو..
نوريه:33\13..
قعدوا يضحكوا..
لينا بضحكه:هيا قدم تعال...
هو ابتسم ومشي وقف حدا امه وقال:ريتي شن صار فيا ع كبر عيد ميلاد ياوجيهه .. مادرته واني في عمر بحر..
وجيهه بضحكه:سلم مريتك ياكبدي ادلل فيك وتبي تفرحك..
لينا:سلمك انتي ياللاي اللي تقدري فيا..
سفيان قعد يشبحلها وهو مبتسم وحاجبه مرفوع..
وهي غيرت عيونها عنه وهي شاده ابتسامتها..
رفيده:هيا خل نغنوا لخالو...
رنده:هيا هي...
وبدوا يغنوا...
سنه حلوة ياجميل..
سفيان رفع حاجبه وهز راسه بإيجاب...
ضحكوا وهما مكلمين غني..
سنه حلوة ياجميل..
سنه حلوة سنه حلوة ...
سكتوا هةوالبنات الصغار كملوا..
سنه حلوة ياسافيوش..
شبح للينا...
لقاها تضحك معاهم..
نوريه:سافيوش يا..
عفاف:ياسافيوش يا.
رنده:ياسافيوش يا..
وجيهه:ع اخر الوقت وليت سافيوش ياسفيان..
ولينا تضحك من جدها لين دموعها نزلوا..
سفيان؛اني الغالط اللي فوتت طلعة جماعه..
وكلهم يضحكوا عليه..
بعدين نوريه قالت:هي قص الطورطه..
سفيان:لاغير راجي خلي الهانم تكمل ضحك..
ولينا مش قادرة تبطل ضحك لين قعدت تكح..
سفيان بقلق:تي عطيها ميه ياعفاف جنبك..
صبت عفاف للينا ميه وهي تضحك..
ولينا خدت الميه وقعدت تشرب..
سفيان؛هي خلاص ياسرك ضحك..
لينا بعد ماشربت ميه قالت بضحكه؛حاضر..
سفيان:هي هاتي الموس انتي التانيه..
مداته نوريه وهي متصنعه الخوف خداه منها وقصها بالنص طول..
وجيهه:هدا يذبح !..
قعدوا يضحكوا..
سفيان حط الموس وجبد رقم 39وقال:العمر ينحسب بالأعمال مش بالأرقام..
لينا قعدت تشبحله وهي تقول:ع فكره انت في احلى مرحله راك..
نوريه:صدقت..
سفيان؛عارف...المهم الهدايا هي..جيبوا جاي..
لينا:حل نبدا بهديتي انا الاولى..
ومشت خدت بوكس ابيض وجاته بيه ومدتهوله..
لينا:هدي المفاجأة اساسا..
كلهم قعدوا يشبحولها...
وسفيان بفضول واستغراب خدي البوكس..وفتحه ولقي فيه حذاء بيبي...لونه خلا ابتسامه مفاجأه ترتسم ع وجهه..
وخواته معاه اللي كانوا يشوفوا شن في فالصندوق شبحولها وهما متفاجئات..
وهي قعدت تشوف لردود افعالهم وهي مبتسمه بفرح....

#سبحو
يتبع
الفصول الاربعة