شكولينا

الجزء الخمسون

#شكولينا
#الجزء_الخمسون
#الجمان_الفريد

كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
في المحل..
كالعاده موجوده في الغرفه الداخليه تغلف في علب الشكولاته والترافل ومعاها وحده تساعد فيها وتغلف في الحلو...
:شن رايك؟
لينا شبحت للسفرة اللي شكلتها وغلفتها ابتسمت وقالت:حلو..طلعيها..
مشت البنت طلعت بالسفرة وعطتها للمراة اللي تبيع...بعدين ولت مرة تانيه تكمل في شغلها..
:تعرفي امس نزلت صور لشغل الحل في واحد من القروبات من امس لليوم حصل المنشور 5الاف لايك هدا غير اللي خشوا يسألوا فيا ع مكانه والاسعار..
لينا بضحكه:وانا نقول علاش اليوم مش ملحقين....
ضحكت البنت وقالت؛عندي ليك اقتراح..
لينا؛قولي..
:ياستي في معرض كبير هلبه حيندار في فندق السلام..المعرض هدا عن الانتاج المنزلي من ماكله وكماليات اثاث وهكي...اني فكر لو تشاركوا في ركن الاكل..الحلو تحديدا بالشكلاطه متاعك..عندك علم زوار المعرض من برا ليبيا..في من مصر والأردن والسودان وتركيا وتو٨نس والمغرب وقالوا بيجوا حتى اجانب..
لينا قعدت تفكر وهي ساكته..
:شن رايك انتي؟
لينا:امتى هو؟
:الأسبوع الجاي من 25واحد لثلاثين واحد..
لينا تنهدت وقالت:خل نزيد نفكر ونشاور ونشوف شن يصير..
:تمام..وياريت توافقي فرصه كبيرة ليك تزيدي تنتشري برا ليبيا مرات تحصلي حد يتبنى شغلك ويسوقه برا..
لينا بضحكه:زدتي حمستيني..
ضحكت وقالت؛خلاص ماضيعيش الفرصة
هزت راسها وقالت:إن شاء الله..
🍁🍁🍁🍁🍁
مقعمزة حدا امها واختها ومرت خوها في الصاله...
امها دير في العاله وهما حداها يهدرزوا..
وهي مش معاهم بكل..
عقلها سارح في اللي صار اليوم...
في محمد اللي طلع فجأة بعد المضايقة اللي تعرضتلها هدا يعني ان هو يجي ديما ويراقب فيه من بعيد..
ولا مرات يكون جايها فهداكا اليوم صدفه شاف الموقف قدامه ..
باهي وأنس!!!؟
استاقظت من سرحانها لما جتها بنت خوها بمشط في يدها تبيها تمشطلها شعرها..
ابتسمت وقعمزتها ع رجيلها وبدت تفكلها في شعرها...
ومن جهة تانيه الشريف يلعب مع بحر بالقطار..
تكنطى منه بحر خبشله وجهه...
رتيل:لااا بحر..
والشريف ضربه كف..بدي يبكي..
جت منى لولدها تجري قعدت تضرب فيه..ورتيل خدت بحر في غمرها وقعدت تسكت فيه..
وجيهه:ليه عليك ياولدي شن هالشر هدا..
منى بضيق:شر شني يااللاي صغار وتعاركوا..
وجيهه:لالا ولدك عنيف هلبه يامنى..
منى:بحر اللي بدي عليه ياللاي..
رتيل:بحر قاعد بيبي يامنى..
رنده:حتى شريف بيبي مايعرفش..وبعدين هادو صغار يضاربوا توا يتراضو بعدين.
شبحت منى لرنده وعيونها مليانات دموع وجعها ولدها كيف مش متحملاته حناه بس كلام رنده ريحها شويه..
وجيهه:ماقلنا شي...ياودي خلاص كل واحد يلعب بروحه وخلاص..
رتيل:أحسن شي..
وخدت بحر وجبدت القطار وحطاته قدامه وقعدت تلعب هي وياه..
ومنى حطت العاب ولدها قدامه وقعدت تلعب معاه..
رنده:كملنا...ترا نشوف...ترا..
التفتت ياسمين وشبحتلها..جت بين عيونها بنتها..
ضمتها بقوة وهي تقول ودموعها عبو عيونها:ربي يبارك عليك ويحفظك ياقلبي..
وامها تشبحلها بحزن..
🍁🍁🍁🍁🍁
"وتخلوا بابا بروحه؟!"
فواز:باهي علاش انت ماتخليش امي تروحلنا ..
سكت انس وهو مضايق ومش عارف يرد..
فطومه؛اني نبي نقعد مع ماما اني..نقعد مع ماما بابا..
انس بحزن:واني نقعد بروحي؟
فطومه:تعالى معانا باهي حوش جدو كبير...
انس كان يشد في دموعه بقوة وهو بقول:انتم تقعدوا هني مع بابا وماما تمشولها ايام العطله زي ماأتفقنا..
فطومه بإعتراض:لالا..نبي ماما ديما نبي ماما..
فواز؛حتى اني بابا نبي امي..
انس حس ان مش قادر يفرض كلامه ع صغاره حس انهم بدوا يتاخدوا منه بعد ماكانوا متعلقين بيه...امهم عرفت كيف تستغلهم صح..
انتابه غضب شديد وقاللهم بعصبيه:اني قلت تقعدوا معاي بعني تقعدوا معاي خلاص..
فواز عقد حواجبه بغضب..
وفطومه بدت تبكي وهي تقول:مانحبش فيك بابا اني مانحبش فيك..نبي ماما نبي ماما..
ع خشة امه عليهم قالت:خيركم خيرك تكشخ عليهم..
انس ناض وهو يقول بعصبيه:تعالي اسمعي يام تعالي شوفي شن دارت هديكا..توا تبي الصغار يقعدوا معاها! يعني تبي تشدني من يدي اللي توجعني بش نردها حلم ابليس بالجنه..
فطومه وهي تبكي وتعيط:مانحبش فيك بابا..خيي انت بابا خيي..
فواز:معاش نبي نقعد معاك معاش نبيك..
هو قعد يشبح لصغاره بغضب وصدمه ودموعه ع طرف جفونه...
وامه تشبحله بحزن..
ماعرفش يتصرف...ولاقدر يتحمل...
طلع من حداهم وهو يمشي بعصبيه ودموعه غلبوه...
وامه قعدت مع صغاره تحاول في البنت بش تسكت...
🍁هو بعد طلع برا للجنان...
قام تليفونه واتصل بيها...
وهي بعد مانادى مرتين فتحت الخط وقالت..
"هلا انس"
انس بغضب:اللي في بالك انسيه حوليه من دماغك..لو تطبق السمي ع الأرض ماتتسمي عليا مرة تانيه..وكان تبي صغارك يقعدوا عنك ماعنديش مشكله اساسا هدا حقك من غدوة حيكونوا عندك...وسكر في وجهها..
ومشي للدروج وركب لشقته...
🍁🍁🍁🍁
"نعم!!!؟"
حسين:اللي سمعتيه..
اكرام؛كيف تبيني نسيب حوشي ونقعد في حوش اماليك..
حسين:هدا حوشي وحوش نوريه مابنيتاش بروحي راهو..
فتحت عيونها ع وسعهم بصدمه وهي تقول:كيف حوش نوريه وخليتني فيه!؟
حسين؛مش هدا المهم...المهم توا تلمي كل شي ليك هني وترديه لشناطيه غدوة بنجيب عمال يفكوا ديار النوم يرفعوا هادي غادي ويجيبوا هديكا هني..
اكرام؛لاحسين هكي مايجيش اني نبي زيي زيها حوش بروحي..
حسين:وعند امي حتكوني بروحك ولا ماتبيش امي؟
اكرام:لا مش هدا قصدي لكن غادي حوش العيله للعيلة كلها مش ليا اني..
حسين:اني لما جيت خطبتك قلت لخوتك بنسكنها مع امي ماعنديش قدره نديرلها حوش تاني وهما ماأعترضوش ابدا وقالوا امك زي امها ..
اكرام حاولت بكل قوة تكتم غضبها وقالتله بعد هزت راسها:باهي باهي..اللي تبيه حاضر..
حسين:ايوه هكي نبيك تكوني في طوعي تسمعي وتقولي حاضر وتنفذي اني نفضل المراة اللي هكي ياإكرام نحطها فوق راسي..
ابتسمت وهزت راسها وقالت:وحتلقاني ديما في طوعك المهم رضاك حسونتي...
هو هز راسه وابتسم مجامله...
🍁🍁🍁🍁
الساعه11:00ليلا..
طلعت من دار صغارها ومشت لدار النوم..
لقاته مقعمز ورا اللاب توب..
دقت الباب وقالت:اسفه ع الازعاج نبي ناخد من وقتك شي..
شبحلها..
وهي تشوفله بجديه...
تنهد بعدين رجع شاف للاب توب وقال:تعالي قعمزي..
هي خشت وقعدت واقفه ربعت ايديها وقالت:في معرض حيبدا يوم 25 واحد الاسبوع الجاي في فندق السلام خاص بالإنتاج المنزلي...شبحلها..
وهي متابعه كلامها...يعني عن المنتجات المنزليه ماكله وغيرها..كيف الشكولينا صناعة منزليه لامن مصنع ولامعمل..
سفيان؛تبي تشاركي قصدك؟
لينا؛ايه..
سفيان قعد يشبحلها...
وهي تشبحله...
للحظه نسوا كل شي وهما يشوفوا لعيون كانت مليانه شوق نظراتهم..
هي استاقظت فيسع وعقدت حواجبها وقالت:شن قولك؟
تنهد بعدين شبح للاب توب وقال:شن اسمه المعرض..
لينا:معرض طرابلس الدولي للمنتجات المنزليه..
هو كتب اسمه المعرض ودار عليه بحث ..
وقعد يقرا في نتايج البحث..بعدين شاف صور الاستعدادات ليه..وطريقة المشاركه فيه..
ناض من ع الكرسي وقال؛قعمزي ..
هي بإستغراب قعمزت ع الكرسي..
هو حط يد ع الطاوله وطبس وحط يد ع ظهر الكرسي وقال:هي سجلي ..
هي بتوتر قربت للاب توب وبدت وتكتب في المعلومات..
كانت متلخبطه هلبه..
سفيان:خلي خلي..وجاب ليه اللاب توب وقعد يكتب..
وهي تشبحله...كانت شاده دموعها بقوة...اشتاقتله هلبه...
هو قال:هكي تمام..وشبحلها...
هي وخرت بالكرسي وقالت:كويس شكرا..واسفه ع الإزعاج..
ومشت طلعت..
وهو يشبح للكرسي بضيق وغضب..بعدين خدي نفس وقعمز...
🍁🍁🍁🍁🍁
تاني يوم...
بعد مانقلوا الديار النوم وشناطي الحوايج..
جي وقت انتقال كل وحده لمكانها الاصلي...
هو كان واقف برا يشبح لكل وحده فيهم وهما ماشيات..
لين تقابلوا وكل وحده منهم فاتت من جنب التانيه..
نوريه كانت متجاهله اكرام..لكن اكرام شبحلها بطرف عينها بحقد..
لين وصلت في الحوش وخشت..
ونوريه كملت طريقها لحوشها...بعد ماشافها خشت..
مشي ركب سيارته وطلع من الحوش بيشوف مصالحه..
🍁في حوش أمه..
رمضانه:جيتي..
اكرام وهي متصنعه الابتسامه:ايه جيت ياعمتي..
رمضانه:مالا قبل ترتبي حويجاتك بري خشي الكوجينه ديري الغدي..
اكرام:عمتي اني نتوحم مش متحمله ريحة تطييب قلت لحسين يجيب من برا..
رمضانه:وان شاء الله بيقعد يجيب من برا وين يجي دورك..لا ربح هلبه..
اكرام:قتلك نتوحم ياعمتي..
رمضانه:وكان تتوحمي..نوريه قبل تغم خشمها بمحرمه وطيب..
اكرام؛هديكا نوريه ياعمتي.
رمضانه:وهي مش خير منك..بري سلم بنيتي بري طيبي الغدي ديري كسكسي واني ديريلي شربة شوفان مع رز ابيض..
اكرام هزت راسها وقالت:حاضر..
ومشت للكوجينه وهي تسحن..
ورمضانه ولت تتفرج ع التلفزيون...
🍁🍁🍁🍁
ومرت الساعات..
وحسين روح تغدا مع امه وطبعا مرته تانيه..
واكرام بكيد النساء المعروف خلاته عندها للمغرب...
وحسين لأنه كان شايل في قلبه ع نوريه من اللي دارته كان قابل للإستجابه ...
اما نوريه ماكانتش مهتمه نهائيا لحضوره او غيابه كله عندها واحد..كانت مهتمه بس بنفسها وصغارها ومرتاحه من الشقا اللي تعودت عليه وكان ع قلبها زي العسل بس ماثمرش في اهله..
وحل الليل...
بعد ماعشت صغارها الولاد خشوا يرقدوا..
وهي خشت مع نور بش ترقدها..
وحسين فهالوقت خش للحوش....
شم ريحة النظافه....والوشق.....
الريحه ذكراته بأيامهم الحلوة في هالحوش..
ايام ماكانش متخيل في يوم انها تنتهي وتولي مجرد ذكريات..
تنهد بحسرة..ومشي بإتجاه دار ولاده فتحها بهدوء لقاهم راقدين في اسرتهم..
سكر الباب..بعدين مشي لدار نور لقاها مردوده..
فتحها شافها راقده معاها...فهم..وصلاته الرساله...
سكر الباب...ومشي بإتجاه دار النوم
وخشلها...مرر نظره عليها ودموعه في عيونه...بعدين مشي للدولاب فتحه وطلع منه حوايجه اللي كانوا مرتبات احلا ترتيب بعد بدل...
قعمز ع سريره وقعد يفكر يمشيلها ينوضها ويتكلم معاها...
ولايخليها...
خايف من صدها...من غير شي هو واخد منه موقف من حرقها للصور...الحركه هادي اثرث فيه هلبه وخلاته يحمل في قلبها عليها هلبه...
ترن في وذنه جملة.."انت انتهيت بالنسبه ليا ياحسين"
وتستفز فيه كل مشاعره..ناض بيمشيلها...
بس وقف لما رن تليفونه..
خداه وشاف المتصل رد طول..
حسين:ايوه..
"حسين"
حسين بقلق:خيرك.!
"حاسه ضغطي هابط بالله تعالالي ياحسين"..
تنهد بضيق وقال؛باهي...وسكر..
ومشي طلع من الدار ومنها من الحوش كله...
🍁🍁
في اليوم التالي...
الساعه 6:30فجرا..
خش للحوش بهدوء..
وقعد يمشي بسرعه باتجاه دار النوم..
"تشرب قهوة ولاشربت غادي"
وقف في مكانه وغمض عيونه بشده..بعدين فتحهم والتفتلها..
لقاها واقفه فم الكوجينه تشبحله ببرود..
غير عيونه عنها وهو يوزع في نظره قدامه بعدين شبحلها ومشي جيهتها وقف قدامها..
حسين:كانت تعبانه ماقدرتش نخليها بروحها..
نوريه:عارفه..
حسين بإستغراب:عارفه!
نوريه:ايه عارفه..هدا علاش اختصرت عليك وعليا ورقدت في دار بنتي..وع فكره.في كل ليله في دوري حيتكرر نفس السيناريو وانت حدير نفس الشي..
حسين:علاش مصرة اطلعي روحك مسكينه ومظلومه ديما..
ابتسمت بتهكم وقالت:ابدا ومانحبش نعيشها الادوار هادي مش ليا اني..تعرف بديت نحمد في ربي ع اللي صار نقول كويس انه صار بش كشفلي كل شي ووراني كل حد ع حقيقته..وفوقني من وهم حبك وخلاني نحطك في مكانك الصح..زيك زي كل الرجاله مافيش فرق تحبوا بسرعه..وتنسوا بسرعه...مايملا عيونكم شي..ولاتثمر فيكم عشرة ولاتحفظوا معروف...الا من رحم ربي..
حسين وهو يشوفلها بألم؛تو اني طلعت هكي يانوريه؟!
نوريه:واكثر ياحسين..ابتسمت بتهكم وقالت..كنت نقول حسين غير كل الرجاله..حسين يحبني حب مافيش راجل يحبه لمراة توا..حسين راجل عينه مليانه عنده نوريه واقطع الخبر..حتى لما سلمت للامر الواقع ورضخت لرغبة امك وشجعتك بش تتزوج...قلت حنقعد عنده اني الاولى والاخيره ..بس حني النساوين هبلات ديما تفكيرنا فيكم خيالي..يغرنا كلامكم الحلو...يغرنا هلبه...انت مافاتش شهر ع زواجك نسيتني ونسيت مايجي مني...شفتك واحد تاني معاها...تخيلت لو...نزلت من عينها دمعه ومسحتها طول...تخيلت لو متت قبل ماتتزوج هادي......ممكن بعد 40يوم تتزوج وتعيش وكأنك اول مرة تتزوج....وتنسى نوريه وصغارك من نوريه وكل مايجي نوريه...واني في بالي انك بعدي ممكن تعيش سنين وحداني..ضحكت وقالت...وهم للمليون..
وهو يسمعلها كلامها كان زي السكاكين تطعن قلبه طعن.
رشفت وقال:نقولك من توا اني مسامحتك في حقي عليك..اساسا معاش عندك مادير بيا مراة مازللها كم سنه وتخش 40 والصغار معاش تقدر تجيبهم..معاش تنفعك بشي.
برا جدد شبابك معاها وعيش حياتك...بس صغارك رد بالك تنساهم...
ولفت ومشت لدار نور وخشتلها...
وهو قعد واقف في مكانه يحس بألم فضيع في كل شي فيه قلبه روحك نفسه...حتى جسده..
معقوله حب سنين انتهي في شهرين! ...
بصعوبه تحرك ومشي طلع من الحوش كله..
وهي سمعت باب الحوش تسكر من وسط دموعهاضحكت ضحكة متهمكه....
☘☘☘☘☘
بعد مرور عدة أيام...
الساعه 11:00صباحا..
واقف المرايه يبخ من عطره...
رن تليفونه بنغمة رساله الواتساب..
قامه وفتح الرساله..
لقاهم مجموعة صور باعتتهم عفراء يخصوا المشروع..
قعد يشوف فيهم بتمعن..بعدين اتصل بيها...
نادى مرة وانفتح الخط..
سفيان:السلام عليكم..
"وعليكم السلام استاذ"
سفيان:كنتي في الشرق..
"ايه استاذ وتحديدا في الجبل الأخضر في ناس ساعدوني وعطوني صور من الآثار اللي خلفتها الحرائق وهي توا شبه مختفيه استعنت حتى بأساتذة فيزياء من هني.."
سفيان:ممتاز ممتاز جدا ياشيماء..
"عفراء يا استاذ "
سفيان ابتسم وقال وهو يهز في راسه:ايه عفراء عفراء ..المهم توا نبيك دوري ع تنبؤ لعالم فيزياء عن الاحتباس الحراري في سنة 97 وتحقق في وقتنا الحالي نبي المشروع يكون حول التنبؤ هدا وكيف تحقق مع الوقت وشن الاسباب اللي أدت لهكي نبي كل شي يكون دقيق ومفصل واني حنساعدك اكيد..
"تمام استاذ"
سفيان:عاجبني حماسك هلبه مش عارف علاش اسمك مش مار عليا من قبل..
"حضرتك درستني الفصل اللي قبل اللي فات وكنت تتلخبط في اسمي زي توا..اني جبت عندك اعلى درجه "
سفيان:العتب ع الذاكرة..ع العموم استمري بحماسك هذا واني نأكدلك ان مشروعك حيكون من اهم.المشاريع اللي مرت ع القسم..
"ان شاء الله نكون عند حسن ظنك'
سفيان:ان شاء الله...موفقه ياعفراء..
بضحكه قالت..
"واخيرا"
هو شد ضحكته وقال:السلام عليكم...وسكر..بعد ضحك وقال...عفراء...عفراء...عكرش وجهه بعدم تقبل...
بعدين ضحك..والتفت..
تلاشت ضحكته لما لقاها واقفه في الباب تشبحله..
اشرلها براسه بمعنى شني؟
لينا وهي تحاول تبان عاديه:احم..انا ماشيه..
هو هز راسه وقال..موفقه..
غيرت عيونها عنه بعدين لفت ومشت...
وهو مشي طلع وراها..
وقف وقعد يشبحلها وهي ماشية اتجاه الباب ..
وهي كانت تستنى يوقفها ويقول اني نرفعك اني حنكون معاك فهاليوم.....
بس بان مش مهتم لشي نهائيا...حتى من باب الغيره مافكرش يكون موجود معاها!؟
شن صارلك ياسفيان شن جاك شن بدلك عليا هكي!!؟
وقفت في مكانها كانت تبي تسأله خلاص معاش قادرة تتحمل..
بس لما التفتت سمعت باب دار النوم تسكر..
تراجعت ...لما حست ان اجابة اسئلتها ممكن تجرحها اكثر ماهي مجروحه...
بسرعه لفت ومشت للباب فتحاته وطلعت...
☘☘☘☘☘☘☘☘☘☘☘☘☘☘☘☘
وتمر الأيام تتبعها الايام...ويعدوا شهرين...
خش فيهم الربيع...
الربيع....تغنوا بجماله الشعراء والأدباء..حتى لما يجوا يوصفوا احلا مرحلة في العمر...يقول عليها ربيع العمر..
بس الربيع احيانا يكون متقلب واجوائه متعبه وتمرض..
يعني عنده وجه تاني سيء حتى هو..
وبوجهه التاني عاشوا سفيان ولينا فترة بعد وجفاء كل مالها تزيد تكبر مع مكابرة الطرفين..والفكرة الغالط اللي واخدها كل طرف عن التاني ..
هو هدا الحب..حتى سوء الفهم متاعه مبالغ فيه..
لأن الحبيبين يكونوا حساسين اتجاه بعض هلبه من حبهم لبعض..
ولاهو ارتاح ولاهي ارتاحت..يتعذبوا ويكابروا وخلاص...
ع صعيد اخر من حياتهم..
الشكولينا بعد المعرض ولت مشهورة حتى برا البلاد..
ولأن الشغل توسع زادو العاملات اللي يخدموا معاها...
وبدت تعتمد بشكل كبير ع قريبة منى في ادارة المحل في غيابها..المراة كانت امينه وتخدم بضمير...
عيلة راجلها كانت تدعم فيها هلبه بالذات الحاج الشريف اللي كان يبي يضم المحل متاعها تحت اسمه التجاري ويدعمها ماديا..
ايه الحالة تحسنت وسفيان فهالفترة بذل جهد كبير بش يعوض الخسارة ومش هكي وبس حقق شي خلال هالفترة هو نفسه ماكانش متوقعه...
وهدا كله كان ببركة السحر الحلال المقبول في كل حالات والظروف..
🌷اللهم صل وسلم وبارك على محمد وعلى آل محمد🌷
🌺🌺🌺🌺🌺
في الحوش الشريف...
الساعه الخامسه مساءا...
واقفه ورا القيطون في يدها سفرة لحم شوا متبل..
نوريه:خود..
سفيان خدي السفرة وقال؛شغل مني هدا؟
نوريه بضحكه:الشكولينا..
شد ابتسامته وحواجبه معقودات ومشي وهي ضحكت ومشت....
فاتت من حدا اساور ورنده ومرام ووحده من بنات خلاتهم وهما مقعمزات يهدرزوا حدا كوازين العصبان..
نوريه:مازال..
اساور:شويه بس..
هزت نوريه راسها ومشت خشت للكوجينه ع طلعت عفاف بحوافظ السلايط...مشت بيهم للكوجينه الخارجيه حطتهم ع طاولتها وقالت...خلاص كل شي واتي...بعدين طلعت ومشت خشت للكوجينه الدخلانيه..
لقت فيها نوريه ومنى يوتوا في الحلويات والمشلتت
طلعت من حداهم خطموا من قدامهم البنات الصغار يجروا ورا بعض..
عفاف: قعمزوا واهفتوا قعمزوا..
واصوات هدرزة النساوين تنسمع في الحوش كله..
وفي دار رتيل..
رتيل:هاه شني لينا كويسه توا..
لينا بوجه شاحب ومتعب:ايه....
رتيل:خليك راقده ماتطلعيش لين تحسي روحك وليتي كويسة مزبوط..
هزت لينا راسها وغمضت عيونها...ورتيل مشت طلعت من حداها وسكرت الباب..
وهي ماشيه صادفت ياسمينه تجري وتكركب..
طبتها وهي تقول:وين ماشيه ياعسوله..
ومشت خشت بيها للكوجينه وطلعت منها للجنان..
رتيل:نمشوا للعصفورة..
ياسمين:ايه..
ومشوا الزوز بإتجاه قفص العصافير وقفوا عليه...
حداهم بمسافه...
كانوا اساور ورنده بس واقفات مع بعض..
رنده؛تلاته جلسات ورا بعض ماحضرهمش..
اساور:وشن بيصير توا..
رنده:بيبعتوله اخطار تاني من المحكمه ماجاش يكروه كر..
اساور:الواطي..معاش كلمك ولاجاك..
رنده:ولامرة..بس في ارقام كانت تتصل بيا هلبه وين نرد عليهم من غير مانتكلم يطلعوا رجاله مانعرفهمش.
اساور:ماتستبعديش يكون موزع رقمك يديرها النذل بش يشد عليك شي..
رنده :الله ينتقم منه شر انتقام...
اساور:امين...قوليلي العده متاعك تمت..
رنده:امس..
اساور:اها...بعدين رفعت حاجبها وقالت..حور اختفت بكل..
رنده:الواطيه المنحطه اه بس لو طيح في يدي نربيها ربايه عيشه والصابر ماربوهاش..
ضحكت اساور ...
....من بعيد ورا  القيطون....
كانت زحمة الرجاله كبيره...
الاصحاب والمعارف والأقارب...
حتى انس كان معزوم....
باهي شن المناسبه!؟
هل هي عزومة الحاج الشريف متاع كل عام..؟!
ايه مزبوط..بس هالمرة كانت بمناسبه...
الشريف ولى الوكيل معتمد لأحدى الشركات المصنعه للأدوات الكهربائية...
وهالنجاح عرابه سفيان اللي حققه بعد تعب وجهد كبير...
اللي كان واقف ع الشوايه ويشبح لنسيبه عبدالله اللي يهدرز مع خوه مروان..
شويه جاه ابوبكر وقال:نحس في الراجل جوه مليح وسلامه عليك كان حار..
سفيان؛تعرف قبل ليروح بنحكي معاه..
ابوبكر:شن بتقوله؟.
سفيان؛تو نشوف...
ابوبكر:ربك يستر...
سفيان شبحله ع جنب..
هو ضحك بعدين قال:نسيبك هداكا لليوم مش قادر نزرطه شوف كيف مقعمز رافع خشمه ومش عاجبه حد...
شبح سفيان لعبدالصمد بعدين قال...عليك خشم هو....بعدين كمل يقول...
لك انف ياابن وجدي انفت منه الأنوف...
انت في الأقصى تصلي وهي في مكه تطوف...
ابوبكر بضحكه؛ياتافه..وقلب وجهه وقعد يضحك بكتمان..
وسفيان يقلب في الشوا ومرة مرة يشبح لعبدالله..
🍁داخل..
انفتح باب دار رتيل..وطلعت لينا تجري للحمام...
خشت وسكراته عليها وقعدت ترجع..
ع جية نوريه وامها...
وجيهه:ماتعبتش هكي في حملها بالتوامه..
نوريه:يتغير الوحم يام مرات من بطن لبطن.دقت الباب وقالت...لينا..
"امم"
نوريه:نخشلك..
مالحقتش ترد قعدت ترجع بقوة قريب اطلع احشائها..
فتحت نوريه الحمام وخشتلها..
وهي مازال ترجع..
نوريه:لااليوم بزياده يالينا..
وجيهه:بنكلم سفيان وخلاص..
لينا بتعب:لا بالله عليكم...لا....ماتخربوا عليه..
نوريه:شن ماتخربوا عليه انتي التانيه راك بتموتي..
لينا:انا كويسه..هاه..نرتاح لما نرجع اصلا..
وفتحت السيفون..بعدين جت للاونيدينو وقعدت تغسل في وجهها..
نوريه:تسكري في راسك ع شني..ع صحتك..متأكده كان مشيتي عاينتي بيطلع عندك فقر دم..
وجيهه:وسوء تغديه ماتاكلش بكل ع قد مانعارك ونهزب..
لينا بلعت ريقها وقالت:هاني وليت كويسه..
وخدت المعطر وبخت في الحمام..بعدين صبت المطهر..
نوريه:ذنبك ع جنبك..
ومشت طلعت..
ولينا طلعت وراها..
وجيهه:بري لدار رتيل خل نجيبلك مايقيم ضغطك..
هزت راسها ومشت بتعب لدار رتيل..
خشتلها وارتمت ع السرير وتغطت...
🍁وجي وقت العشي ...وطلعوا صواني العصبان الرز بالخلطه.مع مجموعة سلايط ولحم مشوي..
وبدوا يتعشوا رجاله ونساوين...
🌺عند لينا...
خشت عليها رنده وفيدها صفرة فيها قلاية كبده وعصير عنب وخبزة..
رنده:هي نوضي لينا..
لينا لما شمت ريحة الكبد...ناضت تجري وطلعت من حدا رنده..وخشت للحمام..وقعدت ترجع...
عند النساوين..
زبيده:تبي المستشفى المراة راهو..
ربيعه:تو بيصيرلها هبوط..
وجيهه بخوف؛بنكلم راجلها..
وناضت من ع السفرة ومشت خدت تليفونها مع الطاوله واتصلت بسفيان..
...برا...
ناض سفيان من ع السفرة لما رن تليفونه..
بعد عنهم ورد..
سفيان:ايوه يام..
"مرتك مريضه هلبه ياولدي"
سفيان بفجعه:خيرها!!؟
"غير تعالي للكوجينه نفهمك.."
مشي بسرعه للكوجينه...وصل في الكوجينه وخش..
لقي امه قدامه...
سفيان وهو مفجوع؛خيرها لينا!؟
وجيهه:تعبها الوحم هلبه اليوم من الصبح وهي ترجع..
سفيان:من.الصبح!! هدا وين تقولوا يام!؟
وجيهه؛هي قالت ماتقولوش مانبيش نفسد عليه..
قلبه وجعه ع.الآخر وقال:وينها هي..
وجيهه؛في دار رتيل..
سفيان:حطي الساتر بنخش..
وجيهه؛باهي..ومشت طلعت...
وخلاته واقف ع نار والقلق ياكل فيه ماكله..
شويه وجاته وقالت:خش..
مشي خش بسرعه..
وجي عند رتيل وخشلها..
لقاها راقده ومتكمشه في بغضها...
وحداها خواته..
سفيان بألم؛لينا..
لينا بتعب:ليش ناديتوه ليش..
جاها وطبس عليها وقعد يحول في شعرها من ع وجهها ويقول؛وكيف تبيني مانعرفش شن صاير مرتي انتي ولامش مرتي..
لينا قعدت ساكته..
التفت مرر نظره خواته..
نوريه:احمم..هي تعالوا اطلعوا..
طلعوا الأربعه وسكروا وراهم الباب..
قعمز.ع روس صباعه قدامها وقال:علاش ديما ديري فيا هكي..
لينا بتعب:انا اللي ندير فيك صار!
هو تنهد بعدين قال:عندك عباية لوطا..
لينا:ليش
سفيان:شن ليش بنرفعك نعاينك..
لينا:لا مش لازم شويه ونولي.كويسه انت عدي لضيوفك..
سفيان:لينا فكيني من الجو اللي ديري فيه..
لينا.:جو صار!..باهي باهي..ولفت وعطاته بالظهر وهي تقول..اطلع اطلع عندك حاجات مازالت اهم من الجو اللي ندير فيه..
وقف ع حيله وقال:مافي شي اهم من ولدي..
هي التفتت وشبحتله بنظرة عين مليانه دموع..شافت ملامح العصبيه باديات ع وجهه ..
غيرت عيونها عنه وناضت قعمزت وهي تقول:قول لرنده تعطيني عبايتي معلقه في دار المعيشة..
هو شبحلها شويه بعدين مشي فتح الباب وطلع..
🍁🍁🍁🍁
برا..
مروان:خير ان شاء الله شن في؟
سفيان:مافي شي المراة تعبانه شويه تعب عادي نزل القيطون بنطلع بيها توا..
مروان فهم ع خوه وقال:تمام...
"خيرها لينا"..
التفت سفيان ومروان شبح لعبدالله اللي حس ان في شي صاير يخص اخته يافيها يافي صغارها..
سفيان توتر بس حاول يخفي توتره لما قال:شي شويه تعب مافي شي يخوف..
عبدالله قعد يشبحله شويه بعدين قال:بترفعها انت؟
سفيان:ايه توا..
عبدالله:بنعدي معاكم..
مروان:مش لازم اهو راجلها انت خليك مستريح واطمن عليها بالتليفون..
عبدالله شبح لسفيان بطرف عينه بعدين شبح لمروان وقال:لا معليش بنعدي معاها بش نطمن..
سفيان:تمام ع راحتك..
ع طلعة لينا..
مروان انسحب ومشي..
وعبدالله لما شافها قال:لينا..
هي وين شافت خوها شافت اهلها كلهم فيه..
مشتله وهي دمع وارتمت في حضنه..
سفيان تفاجئ من الحركه وضايقاته هلبه..
اما عبدالله حط يده ع راسها وقال بقلق:خيرك ياوخيه شن في..
لينا بعدت وهي تشوفله:ماتخافش تعب بسيط..
هو مسح دموعها وقال:عدي مع راجلك عدي وانا جاي وراكم.
لينا هزت راسها بإبتسامه بعدين مشت لسيارة راجلها..وسفيان يلحق فيها بعيونه بعدين مشي ركب...
شغل السيارة وتحرك..
وخوها مشي طلع وراهم ركب سيارته اللي كانت مدرسه وراهم ولحقها..
🍁في الطريق.
سفيان:شن الجو اللي درتيه قدام خوك شن بيقول في باله توا..
لينا بعصبيه:شن قصدك بالكلمه هدي اللي شادهلي من بدري..الجو اللي ندير..نكذب عليك ولانمثل مثلا ولابالك نستدرج في عطفك ! وبعدين هدى خويا..حتى انا عندي خوت يصبوا معايا ويحسوا بوجعي مش غير انت مع خواتك..
سفيان بعصبيه:شن تفتفتي انتي شن تقولي تو هدا الرد المناسب ع اللي قلته!؟ طالعه لخوك تتبكي وتضبطي تقول كانوا يعذبوا فيك داخل...لو كنت مش حنفهم غير هكي..
لينا ودموعها ينزلوا:نتبكى!!...بالله عليك اسكت ارجوك اسكت..
سفيان بعصبيه:ماتستكنيش..
هي انفزعت من صوته العالي...غيرت وجهها وقعدت تشبح للروشن وهي تبكي بصمت..
وهو متابع يقول بعصبيه:تصرفاتك موليه خي تحرق العصاب حتى ياسمين ماديراش جوك هدا...
هي قعدت ساكته وتبلع في كلامه الجارح ودموعها مابطلوش نزول..
هو تنفس بعصبيه وقال:استغفر الله العظيم طلعوا الواحد عن طوره..
شبحلها..لقاها تشبح للروشن وواضح عليها انها تبكي..
زاد اضايق وعصب..وقعد يفش في غله في السواقه..
لينا بتموت من الخوف بس ماقدرتش تقوله حاجه..
وهو بلعاني كان يزيد فيها شويه بش تتكلم..
ناسي انها حامل وقعد يرعش فيها بتصرفاته ومن غير شي هي تعبانه..
وصلوا للمستشفى..
نزلوا من السياره...
وعبد الله مشي وراهم وهو يشوف لاخته بقلق..
ولينا مجرد ماوصلت لباب المستشفى معاش قدرت تقاوم طاحت من طولها وراجلها تلاقها وهو مفزوع...
سفيان:لينا..لينا خيرك..
وعبدالله طبس عليها وهو يضرب ع وجهها ويقول بفجعه:لينا..لينا..
سفيان شبح لداخل المستشفى وقال بصوت عالي :تي وينكم ياهووه..وينكم انسحقتوا...
🍁وشويه وجو يجروا بالباريلا..
حط عليها سفيان مرته وهو يشرحلهم في وضعها رفعوها طول لقسم النساء والولادة..
وغادي كانت معاها الدكتورة اللي اتابع عندها اماني..
اللي طلعت من الحجره بعد الفحص وهي معصبه قالت:عندها موعد فات وماجتنيش فيه..قالت راجلي مش فاضي ومافيش من يجيبني..وتوا جايبنها ووضعها مدهور هلبه..دمها 6 وضغطها هابط وسوء تغذيه وتعبانه هلبه باهي اللي مااجهضتش شن الاهمال هدا ياأستاذ معقوله هكي!
عبدالله كان واقف بعيد شويه بس صوت عراك الدكتورة واصله..
سفيان بقلق:لهالدرجه تعبانه!؟
الدكتورة قعدت تشبحله وهي ساكته كانت متنرفزة لأبعد حد من غير شي لينا ليها معزة خاصه عندها..
شويه هزت راسها وقالت:ايه ياأستاذ لهالدرجه..ياريت تقدر مرتك وتهتم بيها شويه في ظرفها هدا هالمرة وحمها واعر هلبه وطبيعي جدا يأثر ع نفسيتها راعيها شويه..
هز راسه وهو مضايق هلبه من نفسه وماقدرش يرد ع الدكتورة بكلمه..
اماني تنهدت وقالت؛لاباس عليها...ومشت من حداه...
شويه وجاه عبدالله وهو يقول:شن القصه ياسفيان؟! انا كنت مطمن عليها واجد معاك بالذات بعد اخر مرة جيت فيها ماخلت ماقالت وهي تمدح وتشكر فيك..كانت تكذب عليا ولاكيف!؟
سفيان قعد يشبحله وهو مش مستوعب اللي يقول فيه عبدالله..
شكر شني!!؟...مالا شن هو اللي سمعه يومها!!؟
عبدالله:ياريت تحطني في الصورة نبي نعرف وضع اختي كويس..
استجمع سفيان نفسه وقال:مافي شي من اللي فبالك ياعبدالله اختك قاعده معاي معززة مكرمه وربي بس اللي يعرف قدرها عندي والمشاكل تصير بين الراجل ومرته شي عادي جدا..اما ع وضعها توا اعتقد واضح جدا وطبيعي جدا يصير معاها اللي صار وهي بوضعها هدا..
عبدالله غير عيونه عنه ووزع نظره ع المكان وهز راسه وهو ساكت..بعدين مشي بعيد عنه وقعمز ع واحد من الكراسي وسفيان يشبحله بضيق
🍁🍁🍁🍁
في الكوجينه الخارجيه ..
بنات الشريف وكنتهم ملتمات  يغسلوا في ماعين العشي..
نوريه وهي واقفه تاكل:عطيها الهني لينا خليقة تتبيله دير فيها للشوا مش عاديه..
رنده التفتت وقعدت تشبحلها كيف تاكل بنهم..
نخصت عفاف..
عفاف شبحتلها بعدين شبحت لنوريه..
نوريه وهي تاكل:امم..لكن نفيسه مدايرة حاجه في وجهها نافخه نحس فيها..بوتكس يعني..
منى:حتى اني لاحظتها..
نوريه:امم..شفتيها ولا واضحه..
رنده:نوريه ياسرك من بكري وانتي تاكلي..
نوريه:شن تحسبي فيهم عليا ولاكيف؟!
عفاف:مش هكي لكن هدا لحم كترت ايكاله مش باهيه..
نوريه:صح..لكن مش قادرة نوقف نحس في روحي مازال جعانه..
عفاف:اللي خسرتيه في تلاته شهور ردتيه فهاليومين من امس وانتي زي الماكينه مابطلتيش..
نوريه:اعوذ بالله منك!
ضحكت رنده وقالت؛نوريه...حالتك هادي نعرفها كويس.
عفاف بإبتسامه؛حتى اني..
ومنى تسمع فيهم وهي مبتسمه بفضول..
نوريه عقدت حواجبها وقالت:حالة شني؟!
قدمتلها رنده وقالت:في كل حمل ليك كنتي هكي مانعرفوكش حامل الا لما تاكلي هلبه..
نوريه بلعت لقمتها وهي تشبحلهم زي المسبوهه...
بعدين رمشت عيونها بسرعه وقالت:لالا..اني وين جيت هني نفسيتي تعدلت ونيتي انفتحت ع الماكله..
خواتها شبحوا لبعض بضيق..بعدين اللي هدا ولت ولهت باللي دير فيه..
ومنى التفتت شبحت لنوريه بضيق وقلق بعدين غيرت عيونها عنها..
ونوريه قعدت تاكل بس كانت تفكر في كلام خواتها..
🍁🍁🍁🍁
خش عليها و راقده ع السرير وحداها الكانيولا..
قدملها وقال:شن جو توا؟
شبحتله شويه بعدين غيرت عيونها عنه وقعدت ساكته..
تنهد وقعمز حداها..شد يدها وقال:اسف..
ابتسمت بتهكم وقعدت ساكته..
سفيان:انتي استفزيتيني لينا كلام تقولي فيه وتصرفات ديري فيها تحرق دم..
جبدت يدها هو شدها وقعد يضحك بعدين قال:باهي ياودي باهي اني الغالط ومافي حد غالط بينا غيري..
مابتش تعبره..
سفيان ابتسم:اسف اسف هلبه الفترة اللي فاتت كنت مضعوط شويه وفشة الغل جت فيك انتي..
شبحتله وقالت:اها تجي فيا انا بس..غيري ليهم الاسلوب السمح والهدوء والإحترام..اما لأني قاعده نتحمل ونمشي دير فيا ماتبي ولا..
عقد حواجبه وقال:من تقصدي؟
غيرت عيونها عنه وقعدت ساكته..
فجأة رن تليفونه..قامه وشاف المتصل تنهد..
هي شبحتله وقالت؛رد عليها رد..خود راحتك..
شبحلها بإستغراب..
لينا؛رد عليها حرام عليك ماتخليها تستنى..انت تصبي من ع غداك وعشاك بش ترد عليها....
ارتسمت ع وجهه ابتسامه وهو مضيق عيونه وعاقد حواجبه لما عرف من تقصد..رفع حاجبه اليمين..وفتح الخط وقال..
سفيان:ايوه
"السلام عليكم"
سفيان:وعليكم السلام
"ها شن صار معاك"
سفيان:لالا فاضي ماعندي شي مهم
"شني!؟؟"
سفيان: ايه تمام نقولك حاجه الكلام مايجيش ع التليفون غدوة نتلاقوا ونهدرزوا في عندي موضوع تاني نبي نحكي فيه معاك غير المشروع..
"كيف في خط تاني خش عليك ولاشني معاك بوبكر ياهووو الوووو"
سفيان؛تو تعرفي غدوة مادام كل شي ولى مكشوف..
"هدا خيره!!! " ...وسكر عليه..
سفيان:تمام عفراء..
شبح للينا لقاها تشبحله بامتعاض..
سفيان؛ولاشن رايك ناديك عفو...ولافيري فيري احلى واخف.... انتي الحلوة ....ولاعمري ريت احلامنك..
غرزت ظوافرها في يده اللي شادها بيه..
سفيان:ااه ياعنشكلك....لامش عليك انتي....لاانتي ربي يخليك ليا وخلاص وربي نحبك ونموت فيك..
نزل التليفون وقال بضحكه...يامهبوله ..ياختشه..وقف وطبس ع راسها وباسه وقال..من عقلك انتي اني نشبح لغيرك.!! اني من قبل مانعرفك ماعرفتش نخون مش توا وقلبي معبي بيك ع الأخر وعيوني مايشوفوا في غيرك..
لينا:شاطر في الكلام انت وفعلك عكس كلامك..
سفيان:باهي اسف..
غيرت عيونها عنه..
تنهد وقال:باهي تو نحكيلك كل شي بس بشرط مانبيكش تاخدي مني موقف عاركي هزبي وفي نفس الوقت اعذريني..
شبحتله لينا وقالت بجديه:نسمع..
🏵🏵🏵🏵
"وشن ديري ماشية معاي!؟"
نوريه:نبي نطمن ع وضعها مرات الدكتورة تبي تقول كلام ماتقدرش تقوله لخوك..
مروان:اللي عنده كله تقوله مافيش حشم في المهنه متاعنا..
نوريه:ياودي اني نبي نعرف مانقدرش نسأل خوك ماناش دكاترة حني..
مروان:انتي خلاص سكرتي راسك..بري البسي وهيا..
نوريه:هيا خمسه بس..
ومشت خشت داخل..
ومروان طلع برا لقي حسين قدامه..
حسين:ترا ناديلي نوريه..
مروان:خشت توتي في روحها..
حسين بإستغراب:كيف قصدك بتروح توا؟
مروان بإستغراب:كيف ماتعرفش ولاكيف ماخدتش اذنك..
ع طلعتها لما شافت حسين تلخبطت..
هو شبحلها وقال؛وين مدام؟
نوريه:بنمشي نشوف مرت خوي..
حسين؛قلتيلي!؟
مروان قعد يشبحلها بإمتعاض..
نوريه:توا جيت بنخبرك..
حسين:وانتي موتيه روحك بتطلعي!؟
مروان:خلاص نوريه خليك اني ماشي.
شدت خوها وقالت؛من الاخير بنمشي ندير تحليل دم حاسة دمي هابط..وين نمشي مع خوي يراعوني غادي اكثر..
حسين؛وخيرك ماقلتليش اني..
نوريه؛مانبيش نكلف عليك..
مروان حول ذراعه من يد اخته وقال:خلاص يرفعك راجلك..
حسين:لا ارفعها يامروان اساسا اني عطلت هلبه..غدوه من الصبح جاي...
نوريه هزت راسها وقالت:باهي..
حسين:تصبحوا على خير..ومشي من حداهم وطلع من الحوش..
مروان؛شن الجو اللي درتيه هدا!؟حطتيه في موقف زي الزفت..
نوريه:يستاهل..
مروان:نوريه!
نوريه:بالله عليك وخيي هيا معاش في وقت ليل..
مروان تنهد وقال:باهي بري اركبي..
مشت بسرعه للسيارة..
ومروان خشي وراها وهو يحرك في راسه يمين ويسار..
وركبوا السيارة..وطلعوا من الحوش..
🍁🍁🍁🍁
"حالك باهي تو؟"..
لينا وهي مقعمزة ع السرير ردت عليها خوها بإبتسامه:ايه الحمد لله..
عبدالله:الحمد لله..شبح لسفيان اللي كان واقف مربع ايديه ويشوفلها بعدين شبحلها وقال:شن رايك تجي تقعدي عندي نهارين تلاته..
شبحله سفيان وهو رافع حواجبه..
لينا بإبتسامه:لامانبي نضيق عليك ونديرلك دوشه بعويلتي..
عبدالله:ضيق ودوشة شني..الشقه كبيرة وكانك ع الدوشه حتى انا عندي العويله..وحتى سالم يفرح بيك واجد..
لينا:توحشته واجد..
عبدالله بضحكه؛حتى هو..
سفيان:نجوكم زيارة ان شاء الله..زيارة..
شبحوله الزوز..
عبدالله:انا قلت تجي تقعد عندي تغير جوها..
سفيان:لاجوها مليح..شبحلها وقال..جوك مليح ولا..
شبحت لينا لخوها وقالت:صحيت عبدالله ان شاء الله نجوك زيارة وانت تجيب العيله وتجينا زيارة...
ابتسم سفيان..
عبدالله:على راحتك تعالي في أي وقت..
لينا:تسلم..
عبدالله:مالا خل بنعدي توا..تبي اي شي كلميني طول لينا..
لينا هزت راسها وقالت:نبي سلامتك بس..
عبدالله هز راسه وقال:تصبحوا على خير..
ومشي للباب..
وسفيان مشي وراه بش يسقده...
🍁وصله لباب المستشفى..
وعبدالله مابطلش توصيات ع اخته وسفيان يطمن فيه...
بعد مامشي عبدالله..وصل مروان هو ونوريه..
شاف سفيان نوريه استغرب..
قعد واقف لين وصلوا فيه...
نوريه:هاه شن حالها لينا توا..
سفيان؛شن جابك انتي..
مروان:قالت جايه دير تحاليل
نوريه:هيا خشوا داخل خشوا صقع..ومشت خشت للمستشفى
وهما خشوا وراها..
سفيان:تحاليل شني..
مروان:وين نندري..اختك من بعد خدي عليها راجلها اللي جاها جاها تصرفاتها ولت غريبه...
سفيان قعد ساكت وهو يشبح لأخته بضيق..
شويه وقفت والتفتت وقالت:الدكتورة اللي تابع عندها لينا وين تجي؟
سفيان:شن بديري بيها؟
نوريه:بننشدها عليها..
سفيان:اني نقولك..
نوريه:اني نبي نسمع سفيان معليشي..
شبح لمروان وقاله:دلها..
مروان:تعالي معاي..
مشوا هما الزوز....وسفيان ولى لحجرة زوجته...
🍁🍁🍁🍁
"شايفاتك قبل لكن وين مش عارفه"
اميرة بعد سحبت عينه الدم:اني اميره اخت زهور..
نوريه وهي متفاجئة:الله!
اماني:تعرفوا بعض!؟
نوريه:ايه معرفه قديمه...شن حالها اختك..
اميرة:تزوجت..
نوريه:كويس ودارت صغار ولامازال؟
اميرة:حامل..
نوريه:كويس كويس ..
اميرة:مش عايشه هني هي توا في تركيا.
نوريه رفعت حواجبها:ربي عوضها خير ماشاء الله..
اميرة:ايه الحمد لله..راجل مقوم وعيله باهيه..
ومشت طلعت من الحجره..ونوريه تشوفلها من فوق لتحت بتهكم..
اماني:احمم..
شبحتلها نوريه.
اماني:شاكه في روحك حامل؟
نوريه:ايه...رغم اني متوقعه انه مجرد اوهام ..
اماني:علاش..
نوريه:ليا 7سنين ماحملتش..حتى مشيت عالجت برا بس بلافايده..
اماني:عندك مشكله..
نوريه:قعدت فترة ناخد في حبوب منع حمل..
اماني:قداش قعدتي تاخدي فيهم..
نوريه:سنتين..
اماني:اها فعلا يسبب مشاكل في الانجاب تعاطي حبوب منع الحمل لفترة طويله..
نوريه سكتت وع وجهها بدت ملامح الحزن..
اماني:انتي تبي تحملي ولاراجلك..
نوريه:امه..
اماني:وانتي..
نوريه:ايه خاطري  خاطري نحمل مرة تانيه..
اماني:قداش عندك.قبل..
نوريه:3..
اماني:ربي يحفظهم ويفرحك بيهم..
نوريه:آمين يارب..
🍁وقعدت ادردش مع الدكتورة شويه لين جت اميرة بنتيجة التحليل...
مداته للدكتورة..
خداته اماني شافاته بعدين شبح لنوريه بإبتسامه وقالت:ترا نوضي مدام..
نوريه وهي مستغربه..وقلبها بدي يدق بقوة..ناضت..
اماني:اميرة تعالي...ومدام انتي تفضلي تمددي هني..
نفذت نوريه اللي طلباته منها الدكتورة..
واميرة دارت شغلها معاها..
وبدت اماني تفحص فيها بجهاز الإيكو..
رفعت حواجبها وقالت؛قداش ليك شاكه في روحك حامل..
نوريه بضحكه:ساعتين بس..
اماني بدهشه:معقوله!!؟ اللي نشوف فيه قدامي ان الجنين عمره تقريبا 3شهور..
نوريه بمفاجأة:كيف!!؟
اماني:ماطلعتش عليك اعراض ماتوحمتيش..
نوريه وهي متفاجئة:هو اني في صغاري التلاته ماتوحمتش نتعب في الشهور الاخيرة اني..
اماني:باهي الاعراض التانيه..
نوريه:عادي يعني..شي نحس بيه ساير الأيام من التعب دوخه خفيفه بس...
اماني بضحكه:هو يصير عادي...بس مش لدرجة تقعدي تلاته شهور مش حاسة بروحك حامل!؟
نوريه بضحكه ودموعها في عيونها:صارتلي في صغاري كلهم ماحسيتش بروحي حامل الا بعلامه وحده كترت ايكالي بس..
اماني بضحكه:ياستي مبارك طلعتي حامل حقه ماتتوهميش..وتو نعطيك صورة من الجهاز وورقة التحاليل بش تقريهم وتشوفي وتتأكدي..
نوريه حطت يدها ع فمها وهي تضحك بفرح ودهشة...
🍁🍁🍁🍁
طلعت حوايجها من الدولاب بش تحددهم..
واختها تشبحلها بعدين قالت..
رتيل:رنودي..
رنده؛امم..
رتيل:شفته المحامي متاعك بكري .
التفتت رنده وقالت:وين؟
رتيل:من روشن المربوعه..سمعت مروان يقوله استاذ انس..انصدمت مانحسباش طرف هكي..يجنن..
رنده مطت شواربها بملل بعدين خدت حوايجها ومشت طلعت بيهم لدار الكوي..
رتيل:غير استني شويه قوليلي..سنقل ولامتزوج..بعدين ضحكت...
🍁🍁🍁🍁
"ها شن حالك توا"
لينا:احسن نراجي فهدي امتى تم..
نوريه:باهي قوليلي دكتورتك هادي كويسه..
لينا:ممتازة ماشاء الله عليها...
نوريه:كويس معناها بتابع عندها حتى اني..
لينا فتحت عيونها و سعهم وهي متفاجئه..
نوريه بضحكه:ايه حامل وليا قريب تلاته شهور ومانعرفش..
لينا:معقولة! ماحستيش بكل؟!
نوريه؛حتى لو حسيت كنت حنكذب احساسي اني فقدت الأمل بكل..
لينا:سبحان الله..
نوريه:ايه والله سبحان الله..
لينا بإبتسامه؛مبارك..
نوريه:الله يبارك فيك..وننصحك نصيحه..ماتعطي حد فوق طاقتك..ولاتتأملي في حد هلبه خليك ديما متوقعه كل شي...
بش لو جاك يوم ولاقدر الله كليتي كف من الدنيا يفيقك يكون الوجع خفيف وتقدري تولي توقفي ع رجليك من اول وجديد..
لينا ابتسمت وهزت راسها بإيجاب..
نوريه تأففت بإنزعاج وقالت:تي وينه خوي هدا..!!؟
🍁وشويه وجاهم سفيان...جاب ماكله للينا وبعدين خدي نوريه وروح بيها..وولى من جديد لمرته...
••سفيان:تو حني اتفقنا ماتاخديش مني موقف ولا؟
لينا:لامااتفقنا على شي..
تنهد وقعد ساكت..
لينا:انت مانكش ملاحظ ان نفس الغلطه تكررت وهدي مشكله كبيره..في المرتين ماكنتش واثق فيا ياسفيان ولامصدقني..
سفيان:المشكله عندي مش عندك.
لينا:باهي امتى بتعالجها امتى بتفتك من هالعيب ياسفيان!؟
قعد يشبح لأيديه اللي مشبكهم في بعض وهو عاقد حواجبه...
لينا تنهدت وقالت:باهي..نبي توا تعطيني وعد اي شي يضايقك او يزعلك مني تجي تقوله ع طول وانا مش من النوع اللي يهرب من الغلط متاعه..نعترف بيه ونصلحه..
سفيان شبحلها وقال:خلاص وعد..
لينا تنهدت وقالت؛ومع هدا خليني هالفترة لين نروق من ناحيتك....
ابتسم وقال:ياودي خود وقتك عندك من غدوة الصبح لليل..
لينا قلبت عيونها وشبحتله ع جنب.
وهو يشبحلها بحاجب مرفوع وشاد ضحكته..
🍁🍁🍁🍁🍁
وعدا هاليوم..
وجي اليوم اللي بعده..
ومن الصبح حسين جي روح بنوريه والصغار...
حطها في حوشها وتسقد لعمله..
وهي طول قعدت توتي في حوايج صغارها بش يمشوا لمدرستهم..وبعد سقدتهم..
مشت لحوش عزوزتها...
لقت سلفتها غادي مقعمزة هي وعزوزتها في الصاله يهدرزوا..
نوريه:السلام عليكم..
ردوا عليها:وعليكم السلام..
قعمزت حدا سلفتها وقالت:شن حالكم..
مها؛الحمد لله شن حالك انتي..
رمضانه:الحمد لله..شن تخبرينا عن عزومتكم..
نوريه:ولاجت عزومه الله يبارك زي العاده..
ع خشة اكرام:السلام عليكم..
نوريه وهي تشبحلها:وعليكم السلام..
قعمزت اكرام حدا عزوزتها وقالت:ظهري يوجع فيا ياعمتي ماظنيش نقدر نطيب الغدي..
مها شبحتلها بحده..
اكرام وهي تمرر في نظرها ع مها ونوريه:الله غالب الحمل والوحم مدايرنها فيا...
رمضانه:نويرة اديرلنا انتي الغدي اليوم..
نوريه بإبتسامه:حاضر عمتي من عيوني...بس قبلها..هاك مها شوفي..وطلعت نوريه من جيب مالتها صور الأيكو لعيلها وعطتهم لمها.
مها خدتهم وشافتهم تفاجئت هلبه وقالت:نوريه!!
نوريه قعدت تضحك..
ورمضانه واكرام استغربوا..
مها بضحكه:مبارك مبارك مبارك..
رمضانه:ع شني تباركيلها فهمونا!
مها:نوريه ياعمتي حامل..
اكرام انصعقت..
ورمضانه اندهشت وهي تقول:حامل!..
نوريه وهي تأشر بتلاته اصابع من يدها قدام اكرام؛في الثالت ياعمتي التاااالث...
اكرام قعدت تشبحله بحقد وهي مصدومه..
مها:كيف مازبطتيش روحك قبل؟!
نوريه بضحكه؛اني ديما هكي اهي تقول عمتي الحمل متاعي مافيشي وحم..
شبحت اكرام.لعزوزتها واذكرت لما قالتلها نوريه تخش للكوجينه واطيب وهي حامل غامه خشمها..
بس رمضانه كانت ناسيه..هي توا رمضانه مش حتذكر شي من صدمتها وفرحتها..
رمضانه:الله يبارك.الله يبارك...اسمعوا ماتقولوش مانبي حد يعرف انكم الزوز حوامل الناس ماتخلي حد في حاله..
نوريه؛حاضر عمتي.
اكرام بلعت ريقها وقالت:حاضر..بعدين رفعت حاجبها وقالت لنوريه..طيب فيك..غير ردي بالك ع روحك الحمل في السن هادي خطير راهو..
رمضانه:لاخطير لاسو جبت.بنتي الاخيره واني اكبر منها..
نوريه:مازال صغيره ماتعرفش..تو ان شاء الله حتى انتي وين تكبري تحملي وتجيبي صغار بش تعرفي انه عادي.
مها شدت ضحكتها..
اكرام:ان شاء الله يارب نجيب لحسين جيش يحامي عليه..
رمضانه؛جيش شني ياكبدي من وين بيصرف عليهم حتى اربعه مع خوتهم سادين..الفال ليك يامها..
تلاشت ضحكة مها..
نوريه:قريب ان شاء الله ياعمتي تشوفي احفادك من مهيوه من توا نقولك مش حيجي حد في زينهم..
ابتسمت مها وهي تشوف لنوريه بإمتنان..
رمضانه:ان شاء الله يارب..هي بسرعه نوضوا ابدوا في الغدي..
نوريه:هي هاني نايضه..وناضت..
رمضانه:ايه حقه..حسين عنده علم؟!
نوريه شبحتلها شويه وقالت:تو نقوله بطريقتي..
ومشت من حداهم...
مها:شكلها تبي اديرله مفاجأة..
رمضانه:على كيفهم..
شبحت مها لإكرام لقتها سرحانه وبادي ع وجهها ملامح الغيظ..
ابتسمت بشماته بعدين غيرت عيونها عنها...
🍁🍁🍁🍁
طلع من المحكمه...
وهو متوجه لسيارته..قبل مايوصل فيها رن تليفونه..
وقف وفتح الخط ورد..
انس:ايوه..
"السلام عليكم استاذ انس الهمالي معاي"
انس:وعليكم السلام..معاك انس الهمالي تفضلي..
"يزيد فضلك..معاك رفعة الحشاني محامية السيد محمد الفاسي"..
رفع حواجبه بعدين هز راسه وقال:تفضلي..
🍁🍁🍁🍁
فهالوقت...
كانت رنده مقعمزة تستنى في سفيان...
سرحانه بتفكيرها في حالها...
مرة تحس روحها قويه..مرة ضعيفه...والاحساس بالخوف والقلق مش مفارقينها..
مرات تقول نسحب الدعوة ونرتاح ونريح من عيلتي من الخوض في حروب عواقبها وخيمه..
بس وين تخطر عليها بنتها قلبها ينحرق عليها...
وين يخطر عليها اللي داره فيها توجعها نفسها وتتحرك عندها الرغبه في الانتقام واخد حقها منه...
"عارف في شن تفكري"
استاقظت من سرحانها وشبحت يمينها لقاته مقعمز جنبها بمسافه..
هالمرة طالع بهيئته بدون تخفي...
وهو يشبح القدام كمل يقوللها:صدقيني انتي الخاسرة الوحيده..حتخسري سمعتك وسمعة عيلتك حتريح في القص حتى هي..
اني فوتت تلاته جلسات ومامشيتش ع خاطرك..كنت نعطيك فرصة تفكري كويس..لكن مع الأسف انتي مازال مسكرة راسك وتبي تخشي مع عيلتك في حرب انتم بس الخاسرين فيها..هادي اخر فرصه نعطيهالك يارنده...لو ضيعتيها نقولك حضيعي روحك يارنده وبنتك مش حتاخديها...
سكت وشبحلها بعدين قال..فكري...
🍁ع خشة سيارة سفيان للكليه..
وهو يشوف للمكان اللي تعود يلقاها فيه..
ضيق عيونه لما تهيئله ان في واحد مقعمز معاها
لما كمل القدام..بدي يبان عليه كويس
فتح عيونه بصدمه...شد فرينو ووقف السيارة ونزل طول
ومشالهم
محمد: اني اللي عليا درته...وناض من مكانه بعدين شبحلها
فجأة شاف رنده اختفت من قدامه وجي في مكانها خوها وهو واقف يقول..
سفيان بغضب:شن دير هني ياكلب يانجس!
محمد وقف وقال تهكما:هدي ياوحش هدي مش حلوة في حق اختك..
سفيان:امشي اركبي السيارة..تحركي..
رنده؛ماتخليشي يستفزك ياسفيان بالله عليك..
سفيان:قتلك بري..
رنده وهي خايفه مشت بسرعه ركبت السيارة...
سفيان:اسمع ياكلب انت لولا القضيه اللي بينا وبينك كنت عرفت شغلي معاك وانت تعرفني كويس وتعرف شن يطلع فيدي..
محمد؛تهدد!؟
سفيان:اني مانهددش اني نفعل..اسلوب التهديد لأشباه الرجال اللي ماعندهمش شرف..
محمد رفع حواجبه وهز راسه بعدين قال:تمام..تو نعرفوا في المحكمه الرجال...من اشباه الرجال..واللي عنده الشرف.
من اللي...ماعنداش...وابتسم بإستفزاز..
ضم سفيان شورابه لداخل بغضب..بعدين جي بيمشي..
ومحمد يشبحله وهو رافع حواجبه ومبتسم بتهكم...
وفي لحظه..
ماحسش الاوخشمه وفمه شبه تخدروا هو اندفع للخلف بقوة...
سفيان: ردها كان قدرت...
هو قعد يمسح في انفه وفمه وهو يشبحله..
واللي حواليهم يتفرجوا ع الموقف..
سفيان؛بري اشكي فيا زي مادارو خوتك..ع غيرها ماتقدروش...ودفل عليه...
ومشي لسيارته ركبها..بعدين شغلها وتحرك وهو يحرق في العجل..
ومحمد معاهم بعيونه وهو يهز في راسه ويقول:تو تشوف ع شن نقدر ياولد الكلب...
ومشي لسيارته حتى هو وركبها وتحرك...

يتبع …

"اسفه ع التاخير الفترة هادي الوضع في الحوش مخليني مش فاضيه للكتابه....اذكروا الله وصلوا ع النبي"
الفصول الاربعة