#شكولينا
#الجزء_السابع_والأربعين1
#الجمان_الفريد
كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫
درس سيارته...
ونزل...ومشي بإتجاه الباب ودق ع الباب الرئيسي...
عاود دق مرتين تانيات..
لين انفتح الباب..
الشريف:خالي..!
سفيان بإبتسامه؛حاج شن جو..
الشريف ابتسم وقال:كويس..خش خالي خش..
خش سفيان وقال:بسم الله...بوك قاعد..
الشريف:لا طلع..
سفيان؛مافي حد قاعد في الحوش عمك مهناش؟!
الشريف:ايه حتى هو ماهناش..تعالى خالي خش للمربوعه .
سفيان:لا خليني هني حتى هني كويس ناديلي امك..
الشريف:حاضر..
ومشي الشريف وهو خايف..فاهم كل شي وواعيله كله..خايف لوخاله عرف ياخد امه...
وسفيان اللي كان جاي يشوف اخته المشغول باله عليها..
قعد واقف برا يستنى..
شويه وشاف اخته جايه تمشي بسرعه..
هو قدملها...لين وصلوا في بعض..
سلموا ع بعض بالخد ونوريه تقول:كيف حالك وخيي شن اخبارك؟
سفيان؛الحمد الله شن حالك انتي؟
بعدت وقالت بإبتسامه:الحمد لله..خش وخيي خش..
سفيان:لامانبيش نخش لحوش مافيشي راجل..خليني حتى هني كويس..
نوريه:باهي تعالى قعمز هني ماتقعدش واقف..
مشي سفيان قعمز ع كرسي..ونوريه جبدت كرسي وقعمزت مقابلاته..
نوريه:ياريت قلت قبلها راهو ماطلعش حسين..
سفيان:اني جايك انتي مش جاي لحسين..
نوريه بقلق:علاش ان شاء الله خير!
سفيان:مش عارف قلبي مشغول عليك حاس فيك شي صاير معاك شي متغيره وحتى صحتك نحس فيها ولت لتالي..
نوريه بكل ماعندها من قوة تماسكت واظاهرت بأنها عاديه جدا ضحكت وهي تقول:نهاري! مافيا شي وخيي اموري كلها تمام وعايشه في خيار الخير..
سفيان:متأكده؟!
نوريه بضحكه:ياعليك سفيان وخلاص..صدقني مافيا حاجه وكل شي تمام..
هز سفيان راسه وقال:الحمد لله..وين نور ومؤيد؟
نوريه ناضت وهي تقول:تو نخش اناديهملك..
ومشت من حدا خوها وهي تقاوم في دموعها..
وسفيان يشبحلها ويفكر..ماصدقهاش حس ان في شي وهي تحاول ادرقه...
فجأة انفتح باب الحوش..
وخشت سيارة حسين ووراه خوه..
حسين وهو خاش بالسيارة كان يشوف لسفيان بخوف وقلق...
درس السيارة...ونزل ومشي لسفيان طول..
سفيان ناضله..ومد يده وقال؛بونسيب..
ابتسم حسين بتوتر وصافحه وقال:شن الامور؟
سفيان وهو يصافح فيه:ماشيه الحمد لله..شن حالك انت..ماشاء الله عليك مولي عريس..
خو حسين سمع الكلمه وتفاجئ..
وحسين بلع ريقه وضحك ضحكه يحاول يخفي بيها ارتباكه..
خوه:سفيان..
سفيان طلق يد حسين وصافح خو حسين وقال:اهلا.
ع طلعة نوريه بنور ومؤيد ومعاهم الشريف..
لما شافت راجلها وخوه خافت..
وهو حسين يشبحلها بقلق..
هي كملت طريقها بصغارها لخوها..
مؤيد ونور:خالو..
وجو يجروا لخالهم وسلموا عليه..
ومازال حسين يشبه لنوريه وهو في قمة التوتر..وهي كانت تشبح ليده..كيف يحك في إبهامه بسبابته....معناها هو حاليا في قمة التوتر..
حسين:نوريه خشي ديرلنا قهوة..
نوريه؛حاضر..ولفت ومشت..
وحسين؛تفضل سفيان..قعمز..
قعمز سفيان وحط ع رجله نور وقال:شن الاخبار..
قعمزوا حسين هو وخوه وحسين يقول؛زي قبل...
🍁وكملوا هدرزة..
وسفيان لاحظ ع حسين انه مش ع طبيعته التوتر كان واضح عليه..
.................
"في شي اني متأكد حدسي مايخيبش"
لينا وهي تحدد في حوايجه قعدت تفكر في اللي سمعاته منه وتأكدت ان نوريه ماتبي حد يعرف..هدا علاش قالتله: مافي شي غير انت موسوس بس..
سفيان؛كيف موسوس!؟انتي بروحك قلتي نفس الكلام قبل..
لينا:ايه..بس يعني مشاكل عاديه اللي تصير بين المراة وراجلها عادي..
سفيان:لو ع الموضوع نفسه اللي قلتي عليه قبل مانحسش فيه مشكله عاديع..
لينا:لاعاديه وتنحل بالتفاهم...معاش تشغل روحك انت وتحرق ع اعصابك على مافيش..توا بس خليك في موضوع رنده ومحكمتها..
سفيان تنهد من قلبه وقال:واني في شي شاغلني قد رنده واللي صاير فيها...الزفت هداكا روح..
لينا بمفاجأة؛روح!
سفيان:ايه ردي بالك يالينا تعرف ردي بالك..
لينا؛اكيد مش حنقوللها باهي اللي ولت تعيش في حياتها عادي...برغم انها في الأخر حتعرف..
سفيان:ايه لكن مش توا..وحتى المحامي وصى بهكي..
هزت لينا راسها وقعدت ساكته..
سفيان:لينا مايطلع لحد يالينا حتى لسلفتك..
شبحتله وقالت؛اطمن سفيان والله ماتطلع مني لوالي..
سفيان هز راسه وقال:بعد تكلمي ديريلي بابونج نبي نشربه ونرقد..
لينا:حاضر...
وبدت تعلقله في حوايجه...
بعدين مشت طلعت من حداه..
وهو قعد يفكر ويخمم...لين جاته بطاسة البابونج..
شربها..واسترخى..بعدين رقد..
اما هي قعدت سهرانه ع تغليف علب الشكولاته..وعقلها يفكر في اللي قاعد يصير حواليها..
🍁🍁🍁🍁
"اكرام قالك حسين اطلعي"..
سمعت الكلام هدا وهي تشوف لحماتها..بعدين غريت عيونها عنها لضرتها..
اللي ناضت وهي تلف في الوشاح ع راسها وتقول:تصبحوا على خير..تصبحي ع خير عمتي..
وهما ردوا عليها:قدامك كل خير.
مشت طلعت من حداهم وابتسامتها شاقه وجهها..
نوريه معاش تحملت ناضت وهي تقول:تصبحوا ع خير..
هما ردوا عليها وعيونهم معاها وهي ماشيه..
:الحق يام واجعتني نوريه ع الآخر..
رمضانه؛وعلاش توجعك..مجوعينها ولالزينها في الصقع! كل شي تم برضاها وهي اللي جايه بدورله ولاريتها بكت ولاعيطت..حتى نهار جاب العروس كانت لايسه ومتكمه تقول عرس خوها..ماعندها علاش توجعك ياحنه..
:هي تكابر يام راهو ودارت هكي بش ترضيك..
رمضانه؛واني والله راضيه عليها غير انتم تقولوا في دوة تحرق الاعصاب خلاص توا اللي صار صار وخوكم تزوج وتمت انهوا الكلام في الموضوع هدا..
سكتوا بناتها..وهي ناضت وقالت؛ماشيه نرقد..
ومشت من حداهم وهما بعد مامشت كملوا حديث في نفس الموضوع...
🍁ونوريه في دارها عايشة ليله سودا بكل معنى الكلمه...
مش خير من الليله اللي قبلها..
بس الأسوأ..انها قعدت تستنى في حسين يخش عليها في أي لحظه...وعدت الساعات لين أذن الفجر..ولاجي حسين...
في هداكا الفجر نوريه صلت وهي تبكي من اول مابدت صلاة لعند ماسلمت...
بعدين مشت ارتمت ع سريرها ورقدت..
وكانت هادي المرة الاولى...
اللي ماتفطرش فيها رمضانه من كنتها ولاتشرب معاها القهوة ولا تضربلها اليبرة..زي ماتعودت كل صبح..صح بناتها داروله هدا كله..
بس حست بوجع في قلبها لأنها بدت تخسر نوريه وهدا ماخلهاش تندم ولاتشوف انها غلطت باللي داراته..
🍁🍁🍁
بعد ساعتين...
نوضوها صغارها...
ناضت وفطرتهم..بعدين قعدت تراجي في حسين يخش بش تستأذنه بش تمشي لحوش اهلها..
قعدت واقفه في الروشن تراجي يبان عليها..
شويه وشفتهم هو واكرام..
شاد الشنطه ويهدرز معاها ويضحك..وهي متعنقه ذراعه وتضحك..وين تضحك تحط في راسها ع ذراعه..
ونوريه تشوف لهدا كله وهي مصدومه...
شن هدا!؟
شن جي وقاللها هديكا الليله وشن صار فيه توا!؟
قعدت مركزة بنظرها ع اكرام..صغيره وتتدلع وهو كبير عليها..
وفي من رجاله ماعندهمش عزم مع المراة اللي تصغرهم في شن بهلبه..
ابتسمت بتهكم ودموعها ينزلوا..
تهكم ع نفسها اللي صدقت كلامه..وصدقت انه في حب يقعد صامد سنين وماينهيه شي..
الكلام هدا كله ولى في نظرها مش موجود الا في الخيال بس..
سكرت الستار ومسحت دموعها ومشت لولدها الشريف بش تبعته لبوه...
🍁في السيارة..
حسين؛بنخليها في المطار لين نروح..
اكرام؛مايصيرلها شي..
حسين بضحكه:مايصيرلها شي..
ابتسمت اكرام بعدين شبحت القدام وقالت؛حسين ولدك..
شبح وين ماتشبح شاف الشريف يأشرله..
نزل من السيارة ومشاله..
حسين؛خير ولدي تبي حاجه؟!
الشريف بوجه متجهم:قالتلك امي بعدين بيجي واحد من خوالي وبنمشوا معاه لحوش جدي نقعدوا غادي لين تروح..
حسين بلع ريقه بتوتر وقال؛برا ناديلي امك..
هز الشريف راسه ومشي..
واكرام تشبحلهم بإمتعاض وهي رافعه حاجبها..
شويه وطلعت نوريه؛نعم؟
حسين:اسمعي ردي بالم تفكري ديري شي من راسك يانوريه..قسما بالله ننجن واني لما نهبل تعرفيني نخش ناخدك من وسط حوشكم..
نوريه؛وعلاش هدا كله..!اني قلت نبي نقعد في حوش ماليا لين تروح والصغار في عطلة نص السنه يغيروا جوهم في حوش جدهم..
قعد يشبحلها وهو ساكت..بعدين شد يدها بقوة وقال:لما نروح بنجيك طول نروح بيك..
شبحت نوريه لإكرام اللي كانت تشبحلها بحده بعدين شبحتله وقالت:هدا كان اذكرتنا..
وجبدت يدها ومشت خشت
داخل..
هو غمض عيونه وحط يده ع جبهته وقعد يفرك فيها..بعدين نزلها وفتح عيونه ولف ومشي للسيارة..
ركب وهو ساكت..
اكرام؛عطلنا ع موعد الطيارة..
حسين شغل السيارة وقال:مازال..
وتحرك وطلع من الحوش..
وماقعدش ع حاله في الطريق قدرت اكرام تغيرله جوه..
لدرجة انها فتحت الأغاني في السيارة وقعدت تغنيله وهو منسجم معاها ويضحك ع جوها....ونسي نوريه ومايجي منها..
🍁🍁🍁🍁🍁
بعد ساعه..
مشي مروان جاب اخته لحوش اهله بعدين توكل لخدمته..
هي اول ماخشت رجعت لبست قناع القوة وكأن ماصاير معاها شي..
لما سمعت بيها عفاف جايه حتى مشت لحوش اهلها طول.
وقعدت نوريه متماسكه هي وخواتها قدام امها وبوها..
لبعدالعصر..
امها وبوها واختها رتيل مشوا مع سفيان ولينا ومنى للمحل اللي كان فهاليوم افتتاحه..
الاجواء غادي كانت حلوة وفي من ناس من العيله حضروا للدعم..
زي اساور ومرام والعمه ربيعه..
واخت منى "هند" وامها..
اصدقاء مقربين للينا زي الدكتورة اماني وممرضات جو اشتغلوا معاها..
وطبعا جت سهيله وجابت معاها المراة اللي بتخدم بياعه في المحل...
وكل شي سفيان صوره فيديو بش ينزله ع حسابه في الإنستقرام..ويدير دعايه للمحل..
🍁🍁🍁🍁
فهالوقت..
في الحوش..
تحديدا دار المعيشه..
نوريه وهي تمسح في دموعها هما ينزلوا:معاد حد يقولي لاحب لاغيره..كله مع بعضه كذب...كله كلام في كلام..
عفاف ودموعها ينزلوا؛في الاول مايخلوا مايسمعوك يخلوك عايشه في الوهم..لين يجيك يوم تفيقي ع واقع اسود..
رنده رشفت وقالت؛بالنسبه ليا اني النتيجه هادي وصلتلها بكري هلبه قبل حتى مايصير معاي اللي صار...
نوريه شبحتلها وقالت؛ماوصلاتكش اخبار عنه كان روح ولا لا..
حركت رنده راسها يمين و يسار وقالت؛مانعرفش ومانبيش نعرف..مسحت دموعها وقالت..ايه حقه غدوة بنمشي نسجل في الدراسات العليا..
عفاف:احسن حاجه درتيها
نوريه:ايه قوي روحك وكملي حياتك وانتي رافعه راسك مادرتي شي يحشمك..واذكري ديما انك رنده الشريف بن عامر..
هزت رنده راسها وشدت في يد نوريه..
وعفاف تشبحلهم بإبتسامه من بين دموعها...
🍁🍁🍁🍁
"الله يبارك والله كل شي يهبل"
لينا؛كله ذوق سفيان..
ابتسم..
رتيل:طول عمره ذوق يهبل خوي هدا..
ضحك سفيان وقال؛شكار العروس.
لينا بضحكة دهشه:اول مرة مايقولش ماقلتي شي جديد...قالتها وهي تقلد في صوته..
ورتيل وسفيان يضحكوا..
وبعد طول مسافه وصلوا سفيان هو وبوه للحوش..
وخشوا بحصة البنات اللي جابوهالهم من حفل الافتتاح..
وكانت الاجواء هاديه وحلوة...
بس منى يدها ع قلبها طول الوقت..
🍁في الكوجينه..
منى؛غير تجي جنبي نرعش..
لينا:خليك عاديه يامنى ماتجبيش لروحك الشبهه..
منى:مش مني من الرعب اللي هي ركبتهولي منها..
لينا:تعرفي نحس في خواتها يعرفن ماعدا رتيل..
منى:اكيد ماتقدرش دس عليهم..
تنهدت لينا بضيق وقالت؛تصدقي ماواجعني حد في اللي صاير كله قد عمي وسفيان الزوز يخمموا واجد واكلين هم الكل ..سفيان هدى مايبطلش تخميم لعند امس وهو يحكي ع نوريه..يقولي صايرة معاها شي..
منى:ربي يكون في العون وخلاص..مش عارفه شن مازال مدسوس القدام..
لينا بقلق:ربي يلطف...
🍁🍁🍁🍁
تاني يوم...
الساعه 10:30صباحا..
"كولي من حناك حبيبتي"..
ام محمد؛بنتك واخده عليك انت وبس يامحمد..
محمد بضحكه؛حتى للعمل غادي نرفع فيها معاي..
ام محمد؛وكيف تخليك تخدم!؟
محمد:في الشركه اللي تخدم فيها في مكان مخصصينه للصغار زي الحضانه في من يهتم بيه غادي ويلعب معاهم ناس متخصصه مش اي كلام..
امه بتعجب:اشيه..
ع خشة واحد من خوته قال..
:محمد في واحد برا يبيك..
محمد بإستغراب:مني!؟
:مش عارف..
ام محمد:مفروض سألته من يكون..
:قالي صاحبه يام..
ناض محمد وهو يقول:مش مشكله مش مشكله..
:نطلع معاك؟
محمد؛لاخليك مش لازم..
ومشي محمد وهو حاط في باله ان اللي جاه حد يعرفه ..
طلع برا ونزل من الدروج..شبح قدامه وهو مضيق عيونه من الشمس اللي جايه اشعتها عليه..
شاف واحد اول مرة يشوفه..
قدمله وهو مستغرب..
وصل فيه وقال؛تفضل.
انس:محمد الفاسي؟
محمد:وصلت..
مد انس يده وقال:انس الهمالي محامي رنده بن عامر..
رفع محمد حواجبه ومرر نظره ع انس من تحت لفوق...
بعدين شبحله وصافحه وهو يقول:اهلا..
طلقه وقال؛بشن نقدر نخدمك..
انس؛ تقدر تقول جاي نهدرز عليك مانبيش منك خدمه..بس فضل..والفضل لله..
محمد قعد يشبحله وهو ساكت شويه بعدين قال:تفضل..
واشرله ع طاوله فيها كراسي موجوده في الجنان...
مشي انس وهو يقول:يزيد فضلك..ومحمد مشي معاه وهو يشبحله من فوق لتحت..
قعمز انس..وقعمز محمد مقابله وحط رجل ع رجل وقال؛هات اللي عندك..
ركز انس ع الحركه وع نظراته واسلوبه..ابتسم وقال: بحكم مهنتي مروا عليا هلبه قضايا من نفس النوع...ديما اكبر ضحيه فيها هما الصغار..وديما نتمنى لو نقدر نطلع الصغار من الصراعات اللي تصير بين والديهم..صراعات تأثيرها الأكبر عليهم هما...لهدا نتمنى منك استاذ محمد طلع بنتك من المشاكل اللي صايره بينك وبين امها..وتخليها تاخد حقها الطبيعي في انها تعيش مع امها فهالمرحله من عمرها بالذات اللي هي في أمس الحاجه ليها...وهدا حق الشرع والقانون كافله للأم..وطبعا هدا مايعنيش حرمانك منها بالعكس حيكون ليك ايام تحددها المحكمه تشوف فيها بنتك وممكن تتفق انت وامها ع نظام معين...المهم.البنت ماتعشيش محرومه وتكون ضحيه لصراعات حتما حتأثر عليها نفسيا مستقبلا...انت أب..والأب المفروض يبدي مصلحة صغاره ع كل شي..حتى كرامته..
محمد؛كملت كلامك.
انس؛نسمع منك..
تنهد وقال؛والله يا...واشر عليه بسبابته..
انس ابتسم وقال؛انس..
محمد؛والله ياأستاذ انت ادرى ان الشرع والقانون مايعطيش حق الحضانه مراة خاينه عديمة اخلاق ودين..مراة نلقاها في فندق مع واحد فاسد وجارها بنتي معاها لوساختها...تحمد ربها اللي مارفعتش عليها قضيه ونفست بيها سمعتها وسمعة عيلتها...بدال ماتشكرني ع معروفي هدا معاها ترفع في القضايا..ماريتش في حياتي وحده وقحه زيها..وهدا اقل مانقول عنها...
انس مط شواربه للأسفل وقال:مش فاهم..يعني وحده منحطه اخلاقيا لهالدرجه كيف مابانش عليها هالشي من البدايه..يعني اللي نعرفه انك ماخليت من بعتت بش ترجعلك وهي رافضه..ومستحيل الراجل يتمسك بمراة فاسده اخلاقيا..
محمد رفع حاجبه وقال؛هي دارت اللي دارته بعدين نكاية فيا....
انس:علاش!؟ شن درتلها انت بش تنتقم منك بهالشكل..ولو انها في الحقيقه انتقمت من نفسها اكثر..
محمد قعد.يضرب برووس صوابعه ع رجله وهو يقول:انت جاي تحقق معاي شكلك..
ضحك انس وقال:لاابدا مجرد اسئلة فضوليه لاأكثر..
محمد؛خل نعطيك الزبده المراة اللي واخد قضيتها خيانتها مثبته بأدله دامغه وشهود يعني لو سكرت راسها وماسحبتش الدعوة..حتنفضح فضيحه هي وعيلتها حتلقها لولد ولدهم..
انس؛نبي نذكرك لاخر مرة ان هادي ام بنتك..يعني الفضيحه حتلحقها حتى هي..
محمد؛في رقبة امها ليوم القيامه..
انس:امم..يوم القيامه...هز راسه وناض وهو يقول..معناها مافيش قدامنا غير القانون هو اللي يفصل بينك وبينها..
محمد؛هي اللي اختارت..
انس تنهد وقال:السلام عليكم..
ومشي ناحية الباب...ومحمد مشي وراه لين طلع بعدين سكر الباب بقوة..
ولف ومشي بيخش وهو يقول بغضب مكتوم:تو نوريك يارنده تو تشوفي..لا وبدال مادير محاميه دارت محامي...لكم باهي..باهي يارنده...
🍁🍁🍁🍁🍁
"خلاص تميتي ولا"
رنده بإبتسامه:ايه..
سفيان؛من الأسبوع الجاي حتبدي..
رنده؛ايه عارفه..
ومشوا هما الزوز..طلعوا من كليه اللغات ومتوجهين للبوابه الرئيسيه..
في الطريق رن تليفون...
قامه وشاف المتصل فتح طول..
سفيان؛ايوه السلام عليكم..
"وعليكم السلام كيف حالك خوي سفيان"
سفيان:الحمد لله كيف حالك انت؟
"الحمدلله..بنقولك قبل شويه كنت مع محمد الفاسي'
ووقف سفيان ورنده وقفت معاه وهي تشوفله بقلق..
سفيان:ايه!
"نبي نعرف وينك توا يااني نجيك ياانت"
سفيان:انت وين توا
"في ******"
سفيان؛قريب هلبه ع المكان اللي اني فيه جامعة طرابلس قاطع ب..
"ايه قريب هلبه شويه ونوصل فيك"
سفيان:تمام..وسكر..
رنده؛شن في...
سفيان شد يدها وقال:تعالي معاي..
مشت معاه رنده وهي في قمة القلق..
شويه وقف ييها خدا مكان مقابل البوابه وقال:خليك هني ..
وقعد واقف يستنى لين خش انس من البوابه الرئيسيه..
شافته رنده قلبها انقبض من الخوف.
وسفيان مشاله طول..
انس وهو ماشي ناحينه سفيان بعد ماشافه شبحلها هي..
حس بشعور غريب..فيسع تجاهله لما وقف سفيان قدامه..
تصافحوا بعدين سفيان قال:ايه قولي شن صار معاك..شن قالك النجس هدا..
تنهد انس وبدي يحكي بس طبعا بعد مافلتر هلبه كلام بش مايثيرش اعصاب سفيان...
ورنده تشبحلهم وحاسه في شي كبير صاير..
واول حاجه خمنتها ان محمد روح...
••سفيان؛ماتوقعتش منه غير هكي النذل هدا..
انس:مش مهم اللي قاله بكل..المهم انك تضبط اعصابك..
ممكن خلال الفترة هادي يدير حاجات يحاول يستفزكم بيها بش ترتكبوا غلطه يستخدمها ضد اختك..الكلام هدا ماشي ع الكل..ردوا بالكم..القضيه حساسه..وتبي صبر وحكمه..
تنهد سفيان وهو يحاول يهدي اعصابه...شويه رن تليفونه شافه..كان الاتصال مهم لهدا رد عليه...
بعد شويه وقعد يتكلم..
وانس بعد ماكان يشبحله شبح لرنده..ورنده بعيونها من خوها..
وهو يشوفلها اذكر محمد وتفاصيله..والكلام اللي قاله..
وزاد صدقها اكثر وحس ان عنده دافع قوي مخليه يخدم ع هالقضيه من قلبه..ومستعد ع خاطرها كل شي بش يكسبها..
هي غيرت عيونها عن خوها وشبحله..
حس بالإرتباك غير عيونه عنها وحط ايديه ورا ظهره ومشي تباعد شويه...
كمل سفيان المكالمه بعدين مشاله..تكلموا شويه بعدين.انس مشي طلع...
وسفيان اشر لاخته تجيه..
ناضت ومشتله..وصلت فيه وقالت؛شن صاير سفيان؟..هداكا روح؟!
سفيان:لا..كنا نحكوا في شي تاني يخص القضيه..
رنده:باهي كان ماروحش شن يصير..
سفيان؛ممكن ماتشغليش بالك بشي توا الا قرايتك اللي حتبدا الأسبوع الجاي...
تنهدت رنده وهزت راسها وقعدت ساكته...
لين وصلت للسيارة هي وخوها..ركبوا وتحركوا..
☘☘☘☘
وتوالت الايام في مضيها..
وحسين مااتصلش بنوريه كان مرتين بس...وهي بدت تأقلم في نفسها ع وضعها الجديد..ع بالها انها حتتكيف معاه مع الوقت وتكمل حياتها عادي..
ومازال الموضوع مدرق عن باقي افراد عيلتها..
وطول فتره قعدتها ومنى عايشه في حالة توتر وكل يوم تتخيله اليوم اللي بتعرف فيه نوريه وتتخيل شن يصير فيها بعدين..
بينما سلفتها اللي انشغلت بالمحل متاعها وخدمتها عليه..
كان همها الوحيد راجلها اللي خايفه عليه من اللي قاعد يصير مع خواته وقلبها مش مستريح بكل..
وهو كان يحاول يتعايش مع الظروف اللي برغم صعوبته..
كان يستمع بشي من وقته مع الصغار..
وشي من وقته مع زوجته اللي كانت مصدر سكينته ومايرتاح الا لما يكون موجود معاها هي وبس..
وحال خوه قاعد زي ماهو يحاول يتودد لمرته بكل الوسائل لكن بدون فايده..مازالت مقسيه قلبها عليه اكثر من قبل...
ومافي حد كان باله مرتاح زي رتيل..اللي كان كل همها نتيجتها وبس..طبعا لأن في هلبه حاجات صارت مع افراد عيلتها هي ماتعرفهاش...
☘وراح.هالأسبوع...
وجي اليوم اللي بتبدا فيه رنده قرايه..
رفعها سفيان من الصبح..
في البدايه كانت منطويه شويه بس بعدين انطلقت ونست همومها كله..
••الساعه 11:43صباحا..
جايه من الكافتيريا وفي يدها مق مسكر شاهي اخضر..
تشرب منه وهي ماشيه في ممرات كليتها..
وين وقربت توصل في اخر واحد من الممرات..
وقفت جامده في مكانها..
لما شافت واحد لابس سروال جينز ازرق غامق..
ع فانيليا شتويه برقبه طويله لونها ابيض وفي حافه الرقبه لون ازرق..
عليهم بالطو اسود طول للركبه..وطاقيه صوف سودا مغطيه الوذان..والعيون مغطياتهم نظرات سود كبار..
ابتسم ع جنب ابتسامه مفتوحه...عرفت الابتسامه كويس..
من فجعتها طيحت الطاسه من يدها ولفت ومشت بسرعه....
#استغفروا_الله
يتبع …
الفصول الاربعة
