#شكولينا
#الجزء_الحادي_والثلاثين"القسم الثاني"
#الجمان_الفريد
لاخير في عمل يلهي عن الصلاة..
الصلاة اولا ❤
قولوا لاإله إلا الله تفلحوا❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
طلع من داره وهو يسمع في اصوات الصغار ..
لقاهم مقعمزين في الصاله وحواليهم الألعاب وياخدوا ويلعبوا ويتعاركوا..
ضحك ومشالهم....
وصل فيهم رقد ع ظهره بيناتهم وهو يقول:ياصباح العسل..
وهما طلقوا اللي في ايديهم وبدوا يلعبوا ع وجهه وهو يضحك..
هي كانت تلبس في وشاحها في الدار.
بعدين طلعت وشافتهم قعدت تضحك..
سفيان غمض عيونه وهو يقول:تي لا عيني عيني يامعفن انت وياها..
ولينا تضحك..
خشت للكوجينه..ومشت خدت شيشه ميه..حطتها ع الطاوله..
بعدين طلعت من الثلاجه شيشة زهر ومشت قعمزت بيها ع الطاوله..
هو ناض وقال:شوهتوني يامجارم..ظوافركم يبوا القص..
شبح للكوجينه شاف شيشه ميه وتقرا فيها..
ابتسم بعدين مش قعمز الكنبه..
حط رجل ع رجل ويده حطها ورا راسه وقعد يتأمل فيها..
والصغار ولوا يلعبوا بألعابهم..
هي كملت وبدت تشرب منها..بعدين ناضت بيها وهي تسكر فيها..
حطتها ع الرخامه وشبحتله..
لينا:تبي قهوة ولا فطور؟
سفيان:وشن يصلح بيا في رايك؟
لينا ابتسمت ومشت للتلاجه..
هو ابتسم ابتسامه حلوة..
لينا وهي توتي في الفطور:اليوم اول يوم لرتيل في الامتحانات..
ضيق عيونه وقال:ياعليك سيرة ع الصبح انفتحت..
لينا:اسفه خلاص معاش نفتح سير.
هو ضحك وناض مشالها وهو يقول:مش قصدي يا #شكولينا
غير خطروا الامتحانات اللي بيبدوا من غدوة ومراقبه وحال..
قعمز ع الكرسي اللي قدام رخامة البار وهو يقول..وفوق هكي مشرف ع مشروع وفوق هكي بنبدا نوتي روحي للفصل الاستثنائي اللي داروه لطلبة الدراسات العليا عطوني ماده نقريهم فيها...وصيف...حط يده ع عيونه وهو يقول ...ياإلهي!
لينا قعدت تشبحله كيف يتكلم بتذمر منظره كان مضحك وكأن طفل صغير يتذمر من كثر طلبات بوه وامه عليه.
ضحكت وقالت؛هي ضريبه الاول على جميع الأصعده..
حول يده وقال بضحكه:مزبوط..
جاته وعطاته تفاحه وقالت:تفاحه في اليوم......؟!
هو خداها وقال:ولاعشرة ع الشجره..
ضحكت وقال:صامت..
وهو قرش من تفاحه وع وجهه ابتسامه..
سكتوا شويه..
هي تجهز في الفطور...وهو ياكل في التفاحه ويشبحلها..
شويه سمعوا صوت عياط ياسمين..
لينا:انظر شن دارلها الشرير هداك..
هو ضحك ونزل من الكرسي ومشالهم..
وهي شبحتله بإبتسامه بعدين ولت لهت بتجهيز الفطور..
🏵🏵🏵
وبعيد عن الصباح الرايق..
في من صبحه كمل في النكد..
عفاف بإنفعال:كذبت اني ماكذبتش!كله مني ومن اهله وهما عارفين هدا علاش جو كلهم وعسكروا هني.
عبدالصمد:بتحترمي نفسك ولا نفصل ع جد اصلك فصله تنسفك..
عفاف:انت غير جرب ديرها ترا ديرها..
جي بيضربها لكن شد روحه بعدين قال:لمي شلاتيتك لمي انتي مكانك في حوش اماليك كان مش مقدرة الراجل اللي قاعده عنده..
عفاف وهي تبكي بإنفعال:ياريتني قعدت في حوش اماليا ولا وليت عندك..
استفزاته وصدماته بالكلام اللي قالاته واول مرة يطلع منها..
ولأنه جرح غروره اللي كبراته فيه بإيديها..
كان رده عليها...
عبدالصمد؛مدام انتي هكي..مالا بري انتي طالق..
هي فتحت عيونها فيه بصدمه..وحست بجسمها كله صقع...
ومن وين ماهما موجودين في دارهم...
كانوا امه وخواته يسمعوا في النقاش ولما سمعوه رمي عليها اليمين...تشمتوا فيها أيما شماته..
عفاف استاقظت ع نفسها من الصدمه واستجمعت كل قوتها وقالت بتحدي:اقعد فيها انت وياهم وصغارك معاهم لما جيت من حوش بوي ماجبتهمش معاي..
عبدالصمد زاد استفزه كلامها وقال:غالب فيهم صغاري تحسابيني...نجيلهم اللي خير منك بمية مرة..
عفاف؛مبروك من توا..
ومشت للدولاب وهي تلم في حوايجها..
وهو يشوفلها ويراجي تجيه تعتذر وتترجاه يسامحها كالعاده خصوصا بعد رمي عليها اليمين كان متوقع تجيه اطيح عند رجليه وتتوسله بش يردها..
لكن اللي داراته عفاف فاجئه هلبه وماكانش متصوره..
عفاف:الله يلعن هداكا اليوم..الله يلعنه..
عبدالصمد:اليوم اللي خديتك فيه!؟
عفاف:وهو فيه غيره هداكا اليوم الأسود..
هز راسه بوعيد وقال:باهي ياعفاف باهي كان ماخليتكش تلعني هاليوم وهالساعه مانبداش راجل..
ومشي طلع من حداها..
وهي مشت للزيانه وتبكي...خدت تليفونها بتتصل بخوها مروان...
🏵🏵🏵🏵
ومروان فهالوقت ..
كان متنكد مع مرته وولدهم ..
منى؛شوف ياناري ايديته كيف ولت شوفه هو ياروحي كيف وجهه لتوا واجعه خاطره..
مروان قعد يشبح لولده وهو مضايق ع الآخر..وناقم على نوريه...
فجأة رن تليفونه..
تأفف وقامه شاف المتصل استغرب..
فتح الخط ورد...
مروان:صباح الخير عفاف...
منى قعدت تشبحله بإستغراب..
مروان:كيف!!!!؟.................باهي باهي جايك توا..توا جايك..
وسكر وهو يقول بغضب..الكلب..
منى:شن في؟!
هو مشي طلع من حداها بدون مايرد عليها وخلاها في حالة قلق وفضول...
طلع مروان وشبح لشقة سفيان فكر يمشي يبلغه..
لكنه تراجع لما تخيل ردة فعله من غير شي هو مش طايق راجل عفاف...
لهدا كمل طريقه ونزل طول...
🌺فهالوقت في الشقه..
مفرشين مفرش كبير في الصاله..
حاطين عليه سفرة الفطور..
وحداهم الصغار في جراياتهم وامهم توكل فيهم..
لينا:مافيش احلى من الماكله ع الوطا مانحب جو الطاولات هدى ماناخدش في راحتي عليهم..
وهو ياكل ويسمعلها..
لينا:عارفاتك بتقول في خاطرك ماك مش واخده عليه...اها مش واخده عليه حياتي كانت بسيطه بكل شي فيها..ولعند توا نبيها نتقعد هكي..
سفيان بلع وقال:باهي علاش سوء الظن هدا..اقسم بالله مافكرت هكي بكل..وبعدين شن تشبحي فينا حني ناكلوا ع الطاولات ماهو زينا زيكم...
لينا قعدت ساكته وهي توكل في صغارها..
سفيان:بعدين في حاجه لازم تعرفيها عني عادة نفكر بصوت عالي رأيي في حد نقوله حتى لو بملامح وجهي..
لينا:باهي اسفه..
ابتسم وكمل ماكله...
قعدوا ساكتين شويه بعدين قال..
سفيان؛الغدي لوطا ان شاء الله..
لينا شبحتله وقالت؛كملت فطورك؟
هو عق حواجبه وقال:ايه الحمد لله..
لينا تنهدت وقالت:انا اعفيني مش نازله دامن خواتك قاعدات..
هو قعد يشبحلها بنفس النظرة....
لينا؛حتى امس منين رني ماكلفنش رواحن يقولن عظم الله اجرك..وفوقها نزلن.فيا هزايب..
تنهد.وقال:حقك...تمام خلينا هني..
لينا:لاانت انزل تغدا معاهم مانبيهم يفهموا غلط ارجوك مش ناقصه راني..
سفيان:كيف بيفهموا غلط؟!
لينا:مرات يقولن عبت راسه وخداته منا ومن هالكلام..
سفيان؛هما يعرفوني كويس..مايقدر حد يقلبني عليهم ولو من ماكان يكون...
لينا:ومع هذا انزل تغدا لوطا وخود معاك بحر وياسمينه رجاءا
سفيان:وتقعدي بروحك هني؟!
لينا:عادي مش مشكله اصلا خاطر عليا ندير حاجات واجده..
طلبية شكولاته طلبتها مني زميله معايا..وابتسمت وقالت..وبنديرلك حاجه قعدت في خاطرك وماكليت منها..
ابتسم برفعة حاجب وقال:كعك مخمر..
لينا:كعك مخنفر شن مخمر هدي..
هو قعد يضحك..
وهي ضحكت معاه...
وهو في عز ضحكته قعد يتأمل في ضحكتها..
روحها الحلوة...جوها الجميل وهي رايقه ويزيد يغرق فيها اكثر واكثر..
هي شبحت اللي مشوا من حداهم يلعبوا بالجراي:تي تعال هنى انت وياها..ناضتلهم وهي تقول...هي تعالوا ندوشوا ونلبسوا لبسه حلوة وننزلوا لجدو وحنه..
وهو يتأمل فيهم وابتسامه حب ع وجهه...
ومشاعر حلوة متجمعه في صدره..مخلياته جنه في جسد انسان...
🏵🏵🏵🏵
ومن جنة العيش..لضنك العيش...
مروان بعصبيه؛هيا اطلعي....
طلعت عفاف وهي تبكي وبناتها يجروا وراها وهما يبكوا وينادوا فيها.
وهي عافسه ع قلبها بقوة...ركبت السيارة..
ومروان حط الشنطه متاعها في السيارة ومشي ركب..
رفيده ببكي:ياماما ماما ماتخليناش..
غيداء وهي تبكي:ماما...نبي ماما..
ومروان وجعه حالهم بس كان معصب هلبه ..
ركب وتحرك طول..
والبنات قعدوا يجروا ورا السيارة وهما يعيطوا..
لين طلعتلهم وحده من عماتهم..
:تعالي جاي انتي وياها تعالوا...وجبدتهم بعنف ودخلتهم للحوش..وهما مقطعين ارواحهم من البكي..
وامهم تبكي بعبرتها في السيارة..
مروان:الكلب هدا...والله ماكبرله واحد راسه كان بوي..لكن احسن مادرتي لما خلتيله صغاره..
وهي حاطه ايديها ع فمها وتبكي بحرقه..
مروان قعد ساكت ماباش يتكلم اكثر...
بعدين اتصل برنده...
🏵🏵🏵🏵
وهما فهالوقت ملتمين ع صفرة الفطور يفطروا ويهدرزوا..
رنده:بنمشي معاكم يام..
وجيهه؛تعالوا كلكم مادابيا..
نوريه:اني في الشك..بنلهى بالعرس عارفين كل شي راسي..
وجيهه:عارفه بنيتي عارفه..ااخ..كان نعرف علاش ربي ماطيحنيش في كنه زي بنتي تهنيني ع كل شي..
رنده:مش كل النساوين يعرفوا يربوا زيك اميمتي..
نوريه:ايه حتى عزوزتي ديما تقولي فيها سلم وجيهه اللي ربت.
وجيهه بإبتسامه؛ربي يحفظها..قداش تعز علياعزوزتك هادي..
نوريه:والله حتى اني يام نحبها هلبه..
زبيده:كيف عزوزك كيف حمواتك الله يخلف عليهم ريت منهم هلبه..
نوريه :ايه والله وخيات مش حموات..
ع رنة تليفون رنده..
قاماته وشافت المتصل قالت بإستغراب:مروان..
وجيهه:ان شاء الله خير..
نوريه:في العمل هو ولا؟
وجيهه:والله ماني عارفه..
رنده:ايوه مروان..
"اطلعي للجنان ترا"..
ناضت وهي تقول:باهي...ومشت طلعت من حداهم..
بنتها جت بتلحقها شدتها خالتها وهي تقول:زعمه خيره!؟
••طلعت رنده برا وقعدت واقفه تراجي..
ع نزلت سفيان من شقته وهو شاد الصغار..
سفيان:خيرك واقفه هني..
رنده بقلق:كلمني مروان وقالي خليك واقفه برا.
هو عقد حواجبه وشبح للباب..بعدين مشي خش بالصغار داخل..
ع جية مروان...
خش بالسيارة ورنده لاحظت عفاف فيها تبكي..
راجت لخوها درس مشتلهم طول..
جت جيهة اختها وفتحت الباب وقالت؛عفاف خيرك..
نزلت عفاف وضمت اختها وهي تبكي..
ع طلعة سفيان لما شافها تبكي ارتسمت ع وجهه ملامح الغضب وهو يقول:خيرها!؟
مروان؛خشوا داخل قبل..
رنده خدت اختها وخشت بيها داخل..
بعدين لحقهم سفيان ووراه مروان بشنطة حوايجها..
🏵🏵🏵
فوق..
قدام شقة سفيان..
منى:مش عارفه...كلماته طلع يجري..
لينا؛ان شاء الله غير مش وحده من البنات صايرتلها حاجه..
منى:يستر الله...تنزلي؟
لينا؛لالا مش نازله مرات يبوا يحكوا بين بعضهم مادخلناش نحنا احسن..
منى؛ع قولتك..
لينا:خشي نكسدوا شويه..
منى:مش حنقول لا..خل نمشي نجيب الشريف ونجي..
لينا:نرجى فيكم...
مشت منى ولينا خشت داخل..
🏵🏵🏵🏵
"تستاهلي تستاااهلي...اليوم هدا قداش ليا نراجي فيه"
وجيهه؛سفيان..!
سفيان بعصبيه:ارجوك يام..
وجيهه شبحت للشريف وهو اشرلها بعيونه تسكت.
سفيان:هو هالسريفه المعفنه كان يحلم حتى الحلم يناسبنا..وبوي ربي يسامحه زاد كبرله راسه هالمصطاردي..
وعفاف تسمع وتبكي..
الشريف:نحسابه راجل...
سفيان:تي هدا اقل من الكلب..لكن باهي كان ماندمتاش مانبداش سفيان..ولف شبح لبوه وكأنه يراجي فيه يعطيه الإذن..
غمض الشريف عيونه وفتحهم وهو يهز في راسه بالموافقه ع اللي يدور في راس ولده...
وسفيان مجرد ماخدي الاشارة من بوه مشي طلع...
الشريف وهو يشبح لبنته؛تقعدي في حوش بوك معززة مكرمه وهو اللي حيجيك لعندك يترجاك تولي..ووقتها مش حنرد ليه لين نخليه يبكي بدموعه...ولولا الصغار اللي بيناتكم والله ماتولي..
ومشي من حداهم...
وعفاف تبكي بالعبره في حضن نوريه.
نوريه؛عطيهم مايسحن كبودهم ياربي..
وجيهه:هالمسخ هدا غلطتي لما ولتيله طول اخر مرة مفروض شعفتيه..
رنده؛خلاص يام مش ناقصه هي..
عفاف بالعبرة..بناتي..
بعدت عن نوريه وهي تقول..طلعوا..وراي يجروا...وينادوا...ماما...وانهارت بالبكي..
ونوريه ضمتها بقوة ودموعها نزلوا وهي تقول:نبيهالهم كبيره مش صغيرة ياربي..
وجيهه ودموعها ينزلوا:ايه والله..
وزبيده تشوف لعفاف بأسف وماحبتش تعلق بشي...
الكلام توا مافيش منه فايده بالذات مع ام صغارها بعاد عليها..
اما رنده وهي تشوف لحال اختها كانت تبكي..وحاسه في قبضة بقلبها..وهي اضم في بنتها ميرال لحضنها...
🏵🏵🏵🏵🏵
الساعه 12:00قبل الظهر..
في شقة مروان..
مروان؛خديت اجازة اليوم مش ماشي..وانتي خودي ولدك وانزلي لوطا..
منى قعدت ساكته وهي مضايقه..
مروان بإنزعاج:بالله منى فكينا منه الجو هدا انزلي وماتحتكيش بنوريه وخلاص..وماتدخلي في شي..اسمعي واسكتي..
منى هزت راسها وهي مضايقه بعدين مشت خدت وشاحها من ع الشماعه وحطاته ع راسها..
مروان؛شريف وين؟
منى:خليته عند لينا يبي يقعد معاها..
مروان:اخطمي عليها خوديه ونزليه..
منى:نخليه عندها خير..
مروان:اني قلت نزليه..هونا صغارها هي لوطا..
منى؛صغارها صغيرين مش زي شريف حركي ودوشته دوشه.
مروان:لاحتى هما بدوا يتحركوا ويتعبوا وقاعدين شادينهم وع قلوبهم زي العسل..مافي حد خير من حد..
منى استغربت في كلام مروان ولاحظت انه متحسس من معاملة اهله لصغار خوه..
بس ماعطتاش العذر ..في النهايه هما ايتام وبوهم اللي هو ولدهم وخوه ميت..يشموا عليه في ريحته طبيعي تكون معاملتهم خاصه..
مشت طلعت من شقتها لشقة سلفتها...
خدت منها ولدها ومشت نزلت...
وقعدت لينا في الحوش لاهيه بالطلبيه...
💎وراجلها في مكان تاني لاهي بتأديب نسيبهم..
خش لوحده من محلات بيع الاثاث العربي الكبيره...
سفيان:السلام عليكم..
صاحب المحل راجل كبير في العمر جاها صافحه وهو يأهل ويسهل؛اهلا اهلا استاز سفيان تفضل تفضل..
سفيان حول نظاراته وقال:يزيد فضلك..جايك في خدمه متأمل فيك تلبيها..
:عارف كلمني الحاج العربي كون هاني تعاملنا معاه حنقطعوه بالمرة لين انتم تطلبوا العكس..
سفيان بإبتسامه جانبيه؛هدا عشمنا فيكم ياحاج...
:حني نخدموكم من غير مانفكروا بوك من بعد ربي افضاله علينا كبيره..
سفيان بإبتسامه؛الفضل لله وحده...
...............
في الجنان..
تحت المظله مقابل الكوجينه الخارجيه..
سفيان:كلهم بيقطعوا تعاملهم معاه ويسكروا عليه السوق..ناسي الوضيع هدا ان حني اللي درناله قيمه.
مروان؛قالوها اذا اكرمت اللئيم تمرد..
الشريف بإبتسامه؛عندك قيمة واعتبار بين التجار وكأنك تاجر زيهم..
سفيان:القيمة قيمتك والاعتبار اندارلي ع خاطرك..
الشريف هز راسه وابتسم بعدين تنهد بحسرة وقال؛حارقتلي قلبي اختكم..
مروان؛سلامتك ياحاج..بإذن الله يصير كيف ماحني نبوا ويلتم شملها هي وصغارها..
سفيان:اني والله خايفها تضعف كان جي بيردها تولي طول..
الشريف:مش حنخليها تولي حتى لو هي تبي لين نربيه..واني قلتلها الكلام هدا..
مروان:هي خلتهم بإرادتها تبيه تربيه زينا واكثر.
سفيان؛ان شاء الله دير لروحها قدر..بعدين ناض وقعد ينادي...رتيل...
الشريف:شن بدير بيها؟
سفيان؛نبيها تجيب الصغار بنركبهم لأمهم..رتيل...
شويه وطلعت..
رتيل؛نعم....
جاها وقال:شن درتي في امتحانك اليوم.
رتيل:تمام الحمد لله جي ساهل..
سفيان:كويس..باهي بري خشي جيبي الصغار..
رتيل:هي شويه بس..
وخشت داخل..
لحظات وطلعتله بيهم...
سفيان:هاتيهم...وفتح حضنه..
جاته وحطتهم عليه وهو ضمهم الزوز..
رتيل:عساسيل..
سفيان؛قولي الله يبارك..
رتيل بضحكه:الله يبارك..
الشريف؛ترا جيبهم شويه ياسفيان ..
مشي بيهم لبوه..
طبع قبله ع روسهم..ومروان يشبحله..
سفيان؛وقت الغدي كلموني..
مروان؛تم..
ومشي سفيان بالصغار...
والشريف معاهم بعيونه...
مروان؛ياريت سميك ياخد من الحب شويه..
عقد بوه حواجبه وشبحله وقال:كيف!؟
مروان:ع الغلا اللي واخدينه كله صغار عدنان..
الشريف شبحله وقال:الله يرحمه..
مروان نزل عيونه وقال:الله يرحمه...بعدين قال:هي خش داخل بوي الجو سخون مش باهي ليك..
ناض الشريف..
ومشي هو ومروان باتجاه الحوش من القدام بش يخشوا طول للمربوعه..
🌺🌺🌺🌺
"لاحول ولاقوة الابالله"..
سفيان:حالتها النفسيه تاعبه وتعبت امي وبوي معاها .
لينا ودموعها فعيونها:مش عارفه كيف طاوعها قلبها تخليهم..
سفيان؛في امور حسابات القلب تودرها يالينا لازم ديرله حد وماتخليشي يحس ان عندها نقطه ضعف يضغط بيها عليها..قعد فترة يجيب فيها بروحها لحوشنا ويشد في الصغار قصدا..يبيها ديما عايشه في خوف وتحت التهديد.
لينا:ويستغل في بناته مسكينات الله شن صاير فيهن توا..
سفيان بغضب وقهر:ااخ بس لو يولي الوقت لتالي والله ماخليته ياخدها.. ديما نظرتي نظرة في الناس عمرها تخيب البنادم اللي مانقبلاش من البدايه نعرف انه عافن ومع الوقت تطلع نظرتي في محلها..
لينا رفعت حواجبها وهي تشوفله...
هو انتبه لروحه شن قال...عقد حواجبه بشي من الأرتباك وقال:غالبا مش ديما..
هي نزلت حواجبها وقالت؛خل نعدي نغدي العويله ونرقدهم..انت متغدي لوطا ولا..
سفيان:استني..
لينا وقفت وهي تشوفله..
سفيان؛معليشي بعدين تنزلي ع الأقل ع خاطر امي..
لينا شبحتله شويه بعدين هزت راسها بآيجاب..
هو ابتسم وقال:تعرفي انك احسن وحده ...
لينا ضحكت وقالت:عارفه...ولفت ومشت للدار...
هو تنهد من قلبه وقال بصوت مسموع ليه هو بس..
"نحبك"...
بعدين مشي بإتجاه باب الشقه وطلع...
🍁🍁🍁🍁
ومر الساعات..
وكانت سنين ع عفاف...اللي حبست روحها في دار اختها تحاول ترقد بش تنسى منظر بناتها كيف كان لما جت طالعه ماقدرتش كانت تبكي طول الوقت وخلاص...
لابت تاكل ولاتشرب..حاسه نفسها انسدت من الدنيا كلها...
🌺بعد العصر..
نزلت لينا بالصغار..
وكانت متخوفه هلبه من وجودها في وسط هالجو المشحون هي حاسه روحها وكأنها متطفله ع خصوصيات حد تاني..
مهما تقعد كنتهم مش كل اللي يصير معاهم لازم تعرفه..
وصلت في الصاله مالقت حد..
خشت للدار لقت رنده متكيه وحداها بنتها راقده..
مشت للكوجينه لقتها فاضيه لكن سمعت صوت هدرزة جاي من برا..
طلعت للجنان...
شافتهم مفرشين حصيره ومقعمزين يهدرزوا..
لينا:السلام عليكم..
ردوا عليها كلهم ماعدا نوريه اللي قعدت تشرب في القهوة وكأنها ماتشبحش فيها..
سلمت بالكلام وقعمزت وفكت صغارها من الحماله وحطتهم حدا حناهم..
وجيهه:مرحبتين بنور العين..
نوريه قعدت تشبحلهم بإبتسامه بعدين خدت ياسمين وضمتها وهي تقول:حشل ياناش...وبدت تبوس فيها..
وجيهه وهي شاده بحر:تعرفي نويره ياسي ذكرتيني بيك وانتي صغيره..
نوريه:الله اني كنت حلوة هكي ياناس؟
ابتسمت لينا بدون ماتشبحلها..
زبيده:سفيان قاعد..
لينا:لاطلع قال عنده مشوار..
وجيهه:شن تغديتي انتي..
لينا:درت حاجه خفيفه ..
وجيهه:سقيتلك صونيه هوينا في الكوشه.
لينا:ليش متعبه روحك ياللاي بس..
وجيهه؛نوضي نوضي تغدي..وانتي منى نوضي طلعي القرنيط العشي مبكبكه ..
منى:حاضر...غير بالله عيونكم ع الشريف..
وجيهه:ماتخافيش بري..
ناضوا منى ولينا الزوز ومشوا للكوجينه..
ونوريه بعيونها معاهم لين خشوا ..
نوريه؛ان شاء الله غير مافلقوش ولادك لنساوينهم الشكاره..
وجيهه:زي مانشبح فيك..
نوريه؛مالا نبهي عليهم وحده فيهم تفتح فمها ولاطلع شي تشوف..
وجيهه:من غير ماتوصي كلمت منى ولينا تو نكلمها..
••في الكوجينه..
منى:مايبوش الدوة تطلع..
لينا؛اكيد مش حتطلع ليش ندووا في حاجات ماتخصنا..
ع خشة رنده وفي يدها بنتها:شن اجتماع دول الساحل والصحراء هدا..
شبحولها الزوز وهما ساكتين..
رنده مشت وهي تقول:شي ماليكمش فيه ماتتكلموش فيه ولو سمعنا الموضوع طالع برا معناها انتم اللي طلعتوها وحلوها كان تقدروا تحلوها بعدين..
ومشت طلعت..
منى شبحتلها بإزدراء من فوق لتحت.
اما لينا قالت بصوت منخفض :ربي يشفي...
🌺وعدت عشيتهم عاديه..
ومنى ولينا يشوفوا ويسمعوا ويطنشوا..
لعند ماآذن المغرب...
خشوا داخل بالصغار...
واللي هدا صلت...وحتى عفاف طلعت من الدار بش تتوضا للصلاة بعدين خشت للدار تاني ومعاش طلعت منها..
فهالوقت..
كانت رنده توتي في روحها راجلها بيجي يروح بيها..
ع المدخل واقفه تساوي في وشاحها ونوريه واقفه حداها تهدرز..
نوريه:بنقصه معاش نبيه يطول ونبي نغير لونه..
رنده؛ديريه زيتوني يطلع عليك طلعه مش عاديه..
نوريه؛نو نشوف..
ع خشة مروان شاف بنت رنده تلعب بالكنادر..
مروان:شن دير هادي...خداها ورفعها فوق...
رنده:هدا لعبها حتى في الحوش عشقها الشلايك..
ضحك وباسها بعدين نادى"منى"..
ونوريه تشبحله حساته مستكردها..
ع جية منى:نعم..
مروان:شويه واركبي حدديلي حوايجي..
منى:حاضر..
مروان؛وين الشريف..
منى:عند عمي في المربوعه ماشفتاش..
مروان:لاخشيت طول هني..باهي بري كملي اللي ديري فيه..
منى:باهي ..ولفت ومشت..
نوريه:شن جو يامروان..عبرنا عدل علينا..
مروان بملامح وجه حاده نزل البنت وقال:ياريت معاش تكلميني بكل..
ولف ومشي طلع..
وهي ورنده واقفات مصدومات ع الآخر..
نوريه:ريتيه!!؟؟؟..
رنده حطت يدها ع فمها وماقدرتش تعلق..
خشت نوريه ودموعها ينزلوا...ورنده رفعت بنتها وخشت وراها..
رنده:نوريه...نوريه..
نوريه:فوتيني ترا..
وهي ماشيه بعصبيه طلعت في وجهها امها انخبطت فيها..
نوريه ودموعها ينزلوا:سامحيني يام بالله عليك سامحيني..
وجيهه وهي شاده كتفها:خيرك تبكي..
نوريه:خيرني نبكي..من حال خوتي اللي تغير نبكي يام..مروان..مروان...قالي معاش تكلمني..
وجيهه:علاش شن في بينك وبينه؟!
نوريه:بيني عقرب..شيطانة رجيم اشبح بشني معبيتله راسه..
••في الكوجينه..
منى متكيه ع الدولاب وهي يدها ع رقبتها بخوف ودموعها في عيونها...ولينا تسمع في نوريه شن تقول وتشبح لمنى..
نوريه:لكن ماعندي مانقول كان ياربي اللي تفرق بين الخوت فرق بينها وبين ضي عيونها..
طلعت عفاف من الدار وهي مخلوعه..
ورتيل جت من الدار اللي حدا المربوعه بعد كانت تقرا فيها..سمعت الدوشه وهي مفجوعه بالذات وين شافت نوريه تبكي..
بعد ماقالت نوريه اللي عندما مشت خشت للدار وخواتها لحقوها حتى من رتيل..
زبيده:خيرك يابنتي..
نوريه ببكي:خليني ياحناي بالله عليك خليني..
رنده:خلاص هدي يانوريه..
عفاف:شن صار بينها وبين مروان..
رنده:قالتله كيف حالك وخيرك معاش تعدل قاللها ياريت معاش تكلميني.
رتيل:مروان!؟
عفاف:معقوله!؟ باهي شن السبب.
نوريه خبطت ايديها في بعض وهي تقول بكره:من غيرها العميه هديكا اكيده اشبح شن قايلتله..
رنده:معاودتله ضربك لولده..
زبيده:لاحول ولاقوة الابالله...
••في الكوجينه..
وجيهه بحده:شن قايله لمروان تكلمي..
حاطه قفا يدها ع فمها وهي تعض فيها ودموعها ينزلوا..
ولينا تشبحلها بضيق..
وجيهه؛ماتبيش تقولي..معناها كلامها حق فتنتي بيناتهم وتسببتي في هالمشكله..ماعندي مانقول كان خزي وخلاص..
ومشت وطلعت من حداهم..
حطت منى ايديها ع وجهها وقعدت تبكي..
ولينا تقول:إنا لله وإنا اليه راجعون..
"الله لاتسامحها الفتانه الخرابه..الله لايوجهلها الخير..
فرق بينها وبين ضي عيونها ياربي"
منى وهي تسمع في نوريه زادت بكي..وحست بصدرها مطبق عليها...مشت طلعت للجنان بش تاخد نفس..
ولينا خدت شيشة ميه مرقيه لمنى وطلعت بيها..
لينا:هاك اشربي منى..
خدت منى الشيشة وهي تتنفس بسرعه..
شربت منها بعدين قالت..حكيتله من كثر وجعني ولدي والله يالينا وهو راقد يبكي ويقعد يشد في يده اللي ضرباته عليها ويقول ددي..واجعه خاطره هلبه..حتى اليوم وين يشوفها يهرب منها..
لينا ودموعها في عيونها :لاحول ولاقوة الابالله...
🍁والدنيا منقلبه لوطا ومروان اللي قلبها في شقته ياخد في دوش....
والشريف ولده في المربوعه مع صغار عمه يتفرجوا ع وحده من قنوات الاطفال متاع الأغاني فالتلفزيون وجدهم حداهم...
🍁🍁🍁
بعد وين بش هدت هالزوبعه..
روحت رنده وبعدها روحت نوريه وهي موجوعه هلبه وامها مضايقه هلبه ع خاطرها..
ونفسيتها تعبت هلبه من اللي صار طول هاليوم..
🌺🌺
بعد كملوا غسل ماعين العشي...
مروان ركب بعيلته..
وقعدت لينا تراجي سفيان امتى يقول هيا..
كانت مقعمزة في دار المعيشه وحداها صغارها ووجيهه وعزوزتها راقدين...
وهي ملت من التلفزيون..
ناضت ومشت طلعت من الدار متوجهه للجنان..
طلعتله ...ومشت للمظله قعمزت تحتها وقعدت تتفرج ع العصافير..
شويه سمعت صوت بكي..
التفتت شافت من بعيد حدا الشجره عفاف مقعمزة..
ضي القمر هو اللي بينها وسط الظلام..
وجعتها ع الآخر...شويه شافت سفيان جاي من بعيد..
خافت لو يشوف عفاف بهالحاله يعاملها بشده وجفاف..
••سفيان وهو متوجه للكوجينه سمع صوت بكي..
عقد حواجبه وهو مستغرب وقعد يقرب من الصوت لين شاف عفاف مقعمزة تبكي.
وقف وقعد يشبحلها...وهي حاطه وجهها ع ذراعها وتبكي..
تنهد بعدين قربلها وقعمز جنبها..
هي انتبهت ان في حد جي قعمز جنبها قامت راسها وشبحتله سكتت عن البكاء من الخوف..
سفيان:عارفه صعب..ومش ساهل..لكن لازم تتحملي..
عفاف بنبرة باكيه:حاسه روحي ام مش كويسه..كيف جاني قلب وخليتهم بس..
سفيان:في نظري انتي ام كويسه..درتي بش تأدبي بوهم اللي قاعد يستغل فيهم بش يضغط عليه..
عفاف:باهي افرض..لو دارها وتزوج وحده تانيه وحرمني منهم..
سفيان:مايقدرش والله مايقدر..
عفاف:وعلاش انت واثق هكي!؟
سفيان:لإني نعرف بوهم اكثر ماإنتي تعرفيه..صدقيني حيجيك لعند ويترجاك توليله...
عفاف نزلت عيونها ودموعها تنزل..
هو حاوطها من كتافها وضمها ليه وهو يقول:خليك واثقه في خوك بإذن الله حتولي لصغارك وراسك فوق واللي صار معاك قبل مش حيصير مرة تانيه.
شدت فيه عفاف وقعدت تبكي..
سفيان:ايااه علينا عاد الجو هدا مانحباش ماتخلنيش نندم اللي درتلك فيها جو الأخ الحنين..
ضحكت عفاف في عز بكاها وقالت:اصلا استغربت فيك..بعدت عنه وقالت..واخده تكشخ وتفنص..
قرصها من انفها وقال:خزي عليك اني هكي..تو يعني عمري ماحنيت عليك انتي وخواتك!
عفاف:هما كلهم تلاته مرات اللي حنيت علينا فيهم يوم عرسنا قبل نمشوا المزين بعد محاضرة طويله عريضه نصها هزايب بوستنا ع راسنا.
رفع حاجبه اليسار وهو يذكر في المواقف اللي حكت عنها بعدين قال:باهي باهي نوضي خشي داخل صلي ركعتين وارقدي..
عفاف تنهدت وقالت:باهي..
🌺وهما يتكلموا مع بعض لينا كانت تتفرج عليهم..صح ماتسمعش في كلامهم..بس اللي شافاته يكفي بش يخليها تحس بالحسرة..ع نفسها...كانت متمنيه لو كان في وراها خوت زي ولاد الحاج الشريف.
كيف ساندينها وواقفين في ظهرها واستنفروا استنفار ع خاطرها...
قارنتهم بخوتها اللي تنصلوا من مسؤولية حمايتها ودعمها وخلوها تقبل تعيش في ظروف هي رافضتها..
وحتى بعد مشت في حالها مافي واحد فكر يتصل بيها ولايسأل عنها..
غيرت عيونها عن سفيان واخته وقعدت تبكي بصمت..
واذكرت بوها وامها..لما كانوا ينصحوا فيها ترضى تتزوج سفيان خوفا عليها من اللي داسه الوقت لأنهم عارفين ان معندهاش سند..وخوتها خوت بالإسم..
وكأنهم كانوا حاسين باللي حيصير القدام..
زاد وجع قلبها..زاد الألم...وهي تبكي بحرقها وتكتم في عبراتها...
••وسفيان ماشي مع عفاف للكوجينه
سفيان:ديري زي ماقتلك..
عفاف:حاضر..
سفيان؛وفي طريقك قولي للينا تركب..
عفاف:باهي...وخشت داخل..
وهو جاي بيلف وبيمشي جو عيونه ع مظله شافها مقعمزة وعاطيه بالظهر..
قدملها...وين قرب منها لاحظ انها تبكي..
قعمز مقابلها وقال وهو عاقد حواجبه بنبرة قلق:لينا..
هي هدت بكي وقعدت تمسح في دموعها..
سفيان:خيرك تبكي؟!
رشفت وقالت؛احمم...شفت عفاف وهي تبكي وجعتني..
سفيان:مافيش سبب تاني؟.
لينا:وشن شويه اللي فيه اختك..حطيت روحي مكانها وتخايلت لو جي يوم وخدوا مني عويلتي شن بيصير فيا والله نموت..
سفيان؛تي غير خيرك يامهبوله من بياخدهم منك بس..!
لينا:مانعرف مانندري ع الدنيا وشن داسه..
سفيان:مش داستلك الا كل خير..مش قتلك قبل اني معاك..
قعدت تشبحله بريبه..
سفيان؛قاعده مش حاطه فيا الثقه..تمام..اني حنخلي الوقت يثبتلك اني معاك بكل ماتعنيه كلمة معاك..
لينا غيرت عيونها عنه وهي تفكر كيف كلمة تمنت تسمعها من خوتها قالت اخر شخص كانت تتوقع تسمعها منه..
ومع هذا صعب تحط فيه الثقه...الثقه اللي خوتها اولى بيها منه..
صح راجلها بس هي لهالحظه مش قادره تحس بهالشي.
الثقة والامان اللي كانت لاقيتهم مع عدنان وحاطتهم فيه..
مش قادره تحسهم مع سفيان...
حاجز الجليد المحاوط بقلبها مش مخلي احساس سفيان يوصله.....
يعني هي من الأساس مش متوقعه ان ممكن سفيان يحس اتجاهها بأي شي..غير مشاعر التعاطف اللي جدت عليه مؤخرا معاها..وهو بروحه طلب منها يكونوا اصحاب ع خاطر الصغار...فمش قادرة تتنبه ان اللي فيه سفيان توا شي بعيد كل البعد عن اللي هي تفكر فيه..شي ممكن يكون واضح للناس كلها ماعداها هي..
سفيان بشي من الربكه؛خيرك تشبحيلي هكي!؟
فهاللحظه العصافير دارو صوت..
شبحتلهم..وخطر عليها صاحبهم..
ارتسمت ع وجهها ملامح البكي..بعدين درقت عيونها بيدها وقعدت تبكي..
سفيان بتوتر والم؛تي غير علاش بس..لاحول ولاقوة الا بالله..
ولينا تبكي...
وهو يشوفلها بعجز مش قادر يدير شي..
مش قادر يحتويها ويطبطب عليها..ولايمسح دموعها..
مش قادر يدير مايقدر يديره الزوج لزوجته وين يواسيها..
حس روحه يتقطع من داخل..
وكأن هالابيات قاعده توصف في حاله..
هون عليا فلست اقوى ادمعك
إني عجزت عن الضنى ان ارفعك..
ياعاجزا يرجو معونة عاجز..
اقصى عطاء القلب ان ابقى معك...
🌺بس هو ماكانش متقبل كونه عاجز لهالدرجه .
ناض وقرب منها الكرسي وقعمز...بعدين بكل ماعنده من شجاعه خدي يدها وضمها بإيديه الزوز وقعد يمسح عليها بحنان بش يهون عنها.
وهي تبكي..
سفيان:خلاص عاد يابنت الناس رقتيلي الزيت..
هي سكتت عن البكي ونزلت يدها وشبحتله برفعة حواجب..
سفيان وهو عاقد حواجبه:مانعرفش نسكت مراة تبكي..لهدا اسكتي بروحك احسن..
لينا قعدت تشبحله وهي متعجبه فيه هلبه..
وهو يشوفلها بتوتر ويقول:خيرك تشبحي هكي!؟
لينا حطت ايديها ع عيونها مرة تانيه بس هالمرة قعدت تضحك..
هو تلقائيا بانت ع وجهه الابتسامه..
وهي مازال تضحك.
سفيان رفع حاجبه وقال:مش قتلك دمي خفيف..
لينا قعد تشبحله وهي تضحك..
وهو يشوفلها وخلاص..
بعدين هدت ضحك وانتبهت ليدها...جبدتها طول وقالت وهي تحاول تخفي ارتباكها:هي خل نرقوا للشقه خلاص ليل وانا ناعسه وبكرا وراي خدمه..
ناض وهو يقول:الخدمه...هز راسه وقال:الصغار داخل..
لينا:امم..تعال طلعهم معاي..
سفيان:مافي حد داخل .
لينا؛لالا في الدار اللي فيها هما مافي حد كان امك وجداك..
مشت خشت قبله وهو وراها..
وصلوا للدار وخشوا بهدوء..
هو خدي الولد وهو خدي البنت ومشوا طلعوا مع بعض..
سفيان بصوت منخفض:ش جوها امي..
لينا بنفس نبرة الصوت؛قاعده مضايقه..
ضم شواربه القدام بأسف..
طلعوا وهو سكر الباب كويس بعدين ركبوا لشقتهم..
وهما راكبين..
لينا:ايه حقه شن راي جماعتك في الكعك..
سفيان:ماعندك ماديري بيه رايهم المهم رايي حاجه سمحه واجد..
ضحكت وقال:من غير قولك..
سفيان:لسانها يبي القص يبي الفرم..
وهي تضحك وخلاص...
🌺ووصلوا للشقه...وخشوا كملوا مناقرتهم داخل...
🌺🌺🌺🌺
وعدت هالليله..
وعدوا بعدها ايام..
الوضع بين سفيان لينا ولى كويس وخالي من التصادمات..
هي بدت تحس اتجاهه بقبول بس كان قبول عادي زيه زي اللي تحس بيه اتجاه اي حد في حياتها حاليا...
لكن هو كان كل ماله يزيد يغرق في حبها اكثر واكثر..
ومشاعره اتجاهها كانت جدا قويه وجارفه..
بس كانت عنده قدره كبيرة ع كبتها...
بس غضب ع راجل اخته مش قادر يكبته...
كان يتابع في شغله وقعد وراه لين وقفله شغله تماما...
حال اخته اللي كان يقطع القلب وهو يشوف فيه يوم عن يوم كان يزيد يشعل في نار غضبه...
الغضب اللي غضباته وجيهه ع منى كان كبير..استكراد تام وتجاهل...ولوشدت منى روحها في شقتها مروان ينزلها رغما عنها من التلقيح اللي يسمع فيه من أمه..
وهي كانت عايشة بين المطرقه والسندان وبدت نفسيتها تتعب من الحال اللي هي فيه..
حاولت لينا تهون عليها وكانت ترتاح وين تهدرز معاها بس هالراحه مادومش مجرد ماتشوف حركه من وجيهه وحتى من رتيل اللي كانت غضبانه لاختها..تهينها او تحرجها..
اما عفاف فكانت لاهيه بهمها ماعندهاش حيل تلهى بحد تاني.
كل يوم تحاول تتصل بصغارها بش توصل فيهم لكن ماقدرتش.
انجبرت تكلم حتى عماتهم بس هما كانوا مايردوش ع مكالماتها...
وبناتها عند حناهم...ام بوهم..
رفيده:اي ياحنينه بالشويه..
حناها وهي تمشطها في شعرها:سكري فمك سكري من غير دلع زايد..
ع جية غيداء تجري:حناي رنا بزعت السكر..
حناها:هييي! بزع دمكم...وناضتلها وين خشت للكوجينه شافتها مبزعه السكر وتاكل منه...شدتها وخدت ايديها وقعدت تضرب فيها عليهم بقوة وهي تقول:شن درتي يابنت الكلبه..
والبنيه تبكي وتعيط وخواتها يشبحولها بخوف..
ورنا تبكي وتقول:ماما نبي ماما...
طلقتها حناها وقال:والله مادخلي فيه بوكم يروح يديرلكم حل معاش نقدر نتحمل...
ومن غير شي بوهم بيدير حل لأن حاله وقف تماما..
وفي يوم خميس خدي البنات وتوجه لحوش الحاج الشريف..
ويومها الشريف وولاده موجودين ومافي حد بي يطلعله..
كان رتيل..
رتيل:مافيه حد الحوش..هو مرر نظره ع السيارات وهز راسه وقال:اهم صغار اختك وهادم حوايجهم..
ولف ومشي طلع منهان من الحوش.
اما رتيل خدت بنات اختها ومشت بيهم تجري للجنان جهة الكوجينه
عفاف:ياعمري بنياتي..
ومشتلهم تجري وضمتهم التلاته بقوة وقعدت تبكي..
رفيده:استاحشتك هلبه ماما.
غيداء:حناي شريرة ماما كانت تضرب فينا..
وجيهه:ضربه براس حربه..
عفاف:ياروحي ياماما ياروحي سامحوني ياماما.
وقعدت تبوس فيهم..
ولينا تشبحلها وهي متأثرة ودموعها ينزلوا..
وسفيان اللي كان واقف مع مع مروان بعيد عنهم بمسافه بسيطه يشبحلها من ورا النظارات الشمسيه وهو مبتسم ابتسامه خفيفه..
🌺🌺🌺🌺
وتمت رتيل امتحاناتها..
وجي يوم المشيه لغنيمه...
طبعا ماكانتش مشيه خاصه بيهم..
لصقت معاهم ربيعه....
وواحد من خوت الشريف.
وصديق الشريف بعيلته راجل بنت عمه عيشه...
والمشيه حتستمر تلاثه ايام..
🌺في الطريق..
سفيان:تسكت ياخربوشه اسكت خيرلك..
لينا :حرام عليك معاد تنت فيه هك..
سفيان:اطلعي منها انتي خليني نعرف نربي الولد.
لينا:تبيه يولي نسخه منك..
رفع حاجبه وقال بغرور مصطنع:من زيك يولي عندك مني نسختين.
لينا بخوف مصطنع:لا يامامي..
قعد يضحك...
بعدين شبح لياسمينه لقاها تبان سرحانه..
سفيان:البنت هادي ديما سرحانه شن قصتها!؟
لينا بتهكم:شكلها تحب..
رفع حاجبه وقال؛صار تعرفي ان اللي يسرح هلبه يحب..
لينا:هما يقولوا مانعرف..
سفيان:انتي شن تعرفي انتي قوليلي شن تعرفي في شن تفهمي غير فالشكلاطه بس...
لينا:وان شاء الله مانفهم في غيرها..
سفيان؛وتدعي فوقها!
لينا قعدت تضحك وهي تقول:خيرك انت اليوم مافهمتك متحمس ولا معصب..
سفيان:الزوز مع بعض حاس روحي بنقلبها بيكم من الحماس..
لينا فنصت وقالت:لا الله يرحم والديك نخاف من السرعه تربح هدي..
هو هدى سواقه وابتسم...
لينا:هاك اشرب مية رقيه..
سفيان:شن خايفه جنوني ينوضوا..
لينا بضحكه:لاياصامت ماشربتش اليوم...
خدي منها الشيشه..
لينا:قريت الاذكار ولا؟.
هز راسه بإيجاب وهو مبتسم بعدين فتح الشيشه وبدي يشرب وهي تشبح للطريق..
بعد شرب سكر الشيشه ومدهالها خدتها بعدين قالت شمس اليوم قويه..
هو حطلها الواقي ع المرش بش يحجب عنها الشس..
هي ابتسمت بعدين التفتت لصغارها لقتهم باديين يرقدوا.
لينا:رقدوا..
شبحلهم من المرايه وابتسم.
لينا:حتى انا دخت وبنرقد..
سفيان:واني نقعد بروحي؟
لينا بضحكه:باهي خلاص مش راقده.
سفيان:ايوه وهدرزي افتحي موضوع..
لينا:اممم....باهي ترا احكيلي عنك ايام الجامعه..كيف كنت..
سفيان:اني نفسي توا مافيش فرق.
لينا:قصدك جوك كان سمح ؟!
سفيان:قصدك اني جوي سمح؟!
لينا؛صراحه فترة الصحبه هدي خلتني نكتشف فيك حاجات واجده عكس حاجات اخرى واجد شايفينها فيك الناس وانا معاهم..
سفيان؛ مالا ياريتني مرضت من زمان...
لينا بضحكه:رب ضارة....
سفيان؛خير من الف ميعاد..
لينا بضحكه:ياصامت معاش تشقلب الامتال..
سفيان قعد يضحك..
سكتوا شويه بعدين هي قالت بشي من تردد..
لينا:باهي...حبيت من قبل...؟!
#سبحان_الله_وبحمده
#يتبع
الفصول الاربعة
