#شكولينا
#الجزء_51_القسم_الاول
#الجمان_الفريد
كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
خشت للحوش وهي تمشي بسرعه ..
وصلت في دار اختها خشتلها وسكرت الباب بقوة..
امها اللي كانت كيف طالعه من دار التقعميز شافتها وهي خاشة للدار هالخشه..
لحقتها وجت بتفتح الباب لقاته مسكر بالمفتاح..
دقت عليها الباب وهي تقول:رنده...خيرك...افتحي الباب يابنت..
ولينا ومنى في الكوجينه يسمعوا وهما مستغربات..
سيبت وجيهه الباب ومشت بتطلع وهي تقول :وينه سفيان هو؟!
وصلت في الباب وطلعت برا..
مالقتش حد..حتى سيارات مافيش برا..
وجيهه تنهدت وقالت:لاحول ولاقوة إلابالله..
وولت خشت داخل..
جت للدار من جديد لقتها مفتوحه..خشت لقتها فاضيه..
عرفت انها خشت للحمام..
قعمزت ع سرير رتيل وقعدت تستنى...
🍁🍁🍁🍁
عند نهاية الدوام..
قدام المدرسه..
رتيل وهي تمرر في نظرها ع الطريق:شن جد عليه!؟
الهام:طلع يحبك غير كان مضايق منك كيف صدتيه..
رتيل بضيق:افففف..
الهام:عطيه فرصة ريتا بعد يقول بنخطبك خلاص..
شويه وجت سيارة رياض درست قدام المدرسه..
بانت ع وجه رتيل ملامح السعاده..غيرت عيونها للجهه التانيه..
والهام شافتها بعدين شافت رياض وقالت:خلاص فهمت مافيش امل بكل..
رتيل بدون ماتشبحلها:ايه..
تنهدت الهام وقعدت ساكته..
ورتيل تحاول تسرق النظر لرياض..غيرت عيونها للجهة التانيه يدوب شبحتله بعدين قعدت تشبح لاخر الطريق..
وهو يشوفلها بإبتسامه..
والهام تمرر في نظرها عليهم وهي مبتسمه بضيق ع خاطر خوها...
شويه جاهم الباص..مشوله بسرعه ركبوا..
بعدين تحرك..وهو لحقهم..
🌸حط الباص الهام قدام حوشهم..بعدين قال لرتيل..
:بنزلك هني نبي نكمل طول..
رتيل:مش مشكله..
مشت نزلت من الباص..
وقعدت تمشي ع رجليها...ورياض وراها بالسيارة لين وصلت في الحوش وخشت وهي مبتسمه...
وقعدت تمشي للباب وهي فرحانه وتتنهد..لين وصلت فيه..
خشت..حولت اللي فرجليها وكملت طول وين وصلت في
دراها لقتها مسكره..حاولت تفتحتها ماانفتحتش..
سمعت اصوات امها واختها يتناقشوا..
وجيهه:والله قلبي ماتريحلها قرايتك هادي..
رنده ببكي:اهو خلاص بنقعمزلك تريحي..
وجيهه:شن الاسلوب اللي تكلمي فيا بيه هدا!؟
رنده ببكي:ياماما حرام عليك راهو مش ناقصه مدمرة راهو مدمرة ماتزدينيش..
وجيهه قعدت تشبحله بغضب ممزوج بالألم وعيونها معبيات دموع..
بعدين مشت طلعت..لقت رتيل في وجهها.
فاتت من حداها..
ورتيل خشتلها وهي تقول:شن صاير؟
رنده ببكي:اسكتي وخليني في حالي..
سكتت رتيل وهي مضايقه وسكرت الباب..
🍁🍁🍁🍁
وسفيان فهالوقت كان في مكان الوكيل المتعمد..
يشرف ع الوضع غادي..يحاول يركز معاهم ع قد مايقدر..ماباش يتحول من قدام عيونه الموقف اللي صار
بس مش حاس بالندم ع ضربه لمحمد المهم برد قلبه ولو شويه..
فجأة..رن تليفونه..
شاف المتصل توتر..
مشي طلع ورد عليه..
سفيان:السلام عليكم..
"وعليكم السلام سفيان كيف الحال"
سفيان تنهد وقال:الحمد لله ع كل حال..
"خيره صوتك كأن في شي"
سفيان غمض عيونه وفتحهم بعدين قال:اليوم صار موقف ممكن يضرنا..
"موقف شنو"
وحكي سفيان ع الموقف لأنس بالتفصيل....
"تو اني كم مرة نبهت عليك ياسفيان علاش تعطي فيه الفرصه؟!..واضح هدا الهدف من جيته "
سفيان؛تبيني نتحمل شي فوق طاقتي..اللي درته معاه شويه والله خاطر ع بالي نبعتله حد يخبطه ع راسه بحديده يخليه يكمل عمره بعاهه
"لالالا ياسفيان وحد الله...وصل ع النبي في الامور حلها بالعقل خير الف مرة من العنف..الاسلوب هدا يخليكم اكبر الخاسرين"
خدي نفس بعدين قال:استغفر الله العظيم...حسبنا الله ونعم الوكيل..
"خلاص صار خير....بس ارجوك ارجوك لو تبيني نكمل في القضية تلتزم بالكلام اللي نقوله ولاخلي نسيبها من توا"
تنهد سفيان بعدين هز راسه وقال:حاضر حاضر..واني اسف ع اللي صار..
"المهم..اني متصل بيك بش بنقولك انه وكل محاميه..اليوم كلمتني وطلبت نتلاقوا غدوة.."
سفيان:وشن تبي؟!
"غالبا موكلها عنده شروط للتنازل يبي يحل الموضوع ودي"
سفيان:مااعتقدش.
"ايه عندك حق ماتعتقدش بعد اللي درته اليوم"
سفيان قعد ساكت وهو محرج..
"ع العموم تو تشوف شن يصير..كان جد جديد تو نخبرك.."
سفيان هز راسه وقال:تمام..
"السلام عليكم"..
سفيان:وعليكم السلام....
••••••••••••
الساعه 3:00بعد الظهر..
في جنان الكوجينه تحت المظله..
لينا:ربي يهديك ياسفيان ماعندي مانقول كان ربي يهديك..
سفيان بضيق:باهي فاهم وعارف روحي غلطت..
لينا:انت لازم تاخد دورات في ضبط النفس لازم..
سفيان قعد يشبحلها وهو ساكت..
لينا:الغضب والعصبيه ديما مودرينك بجد بديت خايفه عليك من نفسك..
سفيان تنهد وقعد يشبح للطاوله وهو مضايق..
هي تنهدت بعدين حطت يدها على يده وقالت:عارفه وفاهمه انك مضغوط والمشاكل تلاقن عليك في مرة واللي في وضعك معذور..لكن لازم تحاول تتحكم في نفسك وتصرفاتك...
سفيان شبحلها وقال:تعرفي خاطري نبعد شويه نبي ناخد استراحه نريح فيها اعصابي ونفسيتي بعدين نولي..
لينا؛باهي كويس..رفعت حواجبها وهي تقول...شن رايك تعدي للعمرة اسبوع وتروح قبل رمضان..
سفيان ابتسم وهو عاقد حواجبه وقال؛ياريت..
لينا:ليش ياريت انت انوى بس..
سفيان:تمام..لكن تمشي معاي..
لينا؛صعب مع العويله ارفع مع عمتي مسكينه نفسيتها تعبت واجد تبيها المشية للعمرة
سفيان قعد ساكت وهو يفكر..
لينا:ماترددش خلاص احسم امرك..
سفيان تنهد وقال:إن شاء الله إن شاء الله..
لينا طبطبت ع يده وقالت:خل نجيبلك غداك..
ابتسملها..
وهي بادلاته الابتسامه وناضت ومشت بإتجاه الكوجينه..
🍁🍁🍁🍁
حطتله سفرة الغدي وهي تقول..
اكرام:هي تغدا حسونه..
حسين شبح للصونيه ابتسم وهو يفكر..
منظر الصونيه وريحة الغدي يعرفهم كويس..
خدي كاشيك وبدي ياكل...
ضيق عيونه وقال:انتي..درتيه؟
اكرام رفعت حاجبها وقالت:لا مش اني...نوريه..
رفع حواجبه بتعجب:نوريه!
اكرام:ايه فرحانه بروحها ماهو..
حسين عقد حواجبه وقال:اكرام..
اكرام:نحكي جد مانتسهوكش..
حسين بإستغراب:شن قصدك..
اكرام فكرت تقوله هي بش تخرب ع نوريه المفاجأة اللي بديرها ع حسب مافهمت..
اكرام:قصدك ماتعرفش!؟..طلعت حامل..
فتح عيونه ع وسعهم وقال بدهشة؛نوريه حامل!
اكرام:قصدك انت اخر من يعلم!!؟
حسين اذكر كيف امس مشت مع خوها وقالت تبي ادير تحاليل..
حط الكاشيك وناض من مكانه ومشي طلع من حداها..
واكرام بمكر قالت:احتفلي انتي وياه..
🏵في الكوجينه..
نوريه وهي تغسل في الماعين كانت دندن وهي طاربه..
فوق لاح شفقها الشمس طلعت فوق لاح شفقها..
الشمس طلعت فوق لاح شفقها...
خش عليها لقاها بهالحاله وسمع شن دندن..
ابتسم وقال..
فوق لاح شفقها والسما صافية
محلى مزرقها....
شبحتله وكملت معاه بإبتسامه..
والشمس طلعت فوق لاح شفقها..
ضحك وقال:صوتك احلى من صوتي..
نوريه بإبتسامه:لا الحق صوتك انت احلى معاش تجاملني..
ابتسم وقدملها وهو يقول؛علاش ماقلتيش لما روحت بيك..
نوريه:حسيتك معصب وقتها قلت يسمعه وهو رايق احسن..
حسين:لو قلتيه وقتها راهو رقت..
نوريه:في كل الحالات عرفت..
حسين:هدا علاش مشيتي تعايني؟
نوريه:كنت نبي نتأكد قبل قلت بالك نتوهم..
حسين تنهد بإبتسامه:اقسم بالله ليا وقت مافرحت زي توا..
رفعت حواجبها بتعجب بعدين نزلتهم..والتفتت للماعين وقعدت ترتب فيهم..
هو ضحك وحرك راسه يمين ويسار بعدين مشي طلع من حداها..
هي التفتت لقاته مهناش ضحكت بتهكم وقالت:زي ماتوقعت..
🍁حسين توجه لباب الحوش بيطلع..
لاقاته اكرام وقفاته وقالت:وين ماشي ؟
حسين وهو مبتسم بفرح :عندي مشوارضروري...
ومشي لبس في رجليه وطلع...
وهي تشبحله وتسحن عليه سحن من الغيظ بعدين مشت ولت لدار التقعميز خدت السفرة ومشت بيها للكوجينه..
لقت نوريه ادندن وهي تنشف في الأرضيه..
حطت السفرة بقوةع الطاوله بغيظ بعدين مشت طلعت من حداها...
ضحكت نوريه..وكملت دندنه وهي طاربه من الفرح..
🍁🍁🍁🍁🍁
سمعوا صوت دق ع باب دارهم..
الزوز قالوا:خش..
انفتح الباب وبانت عليهم وع وجهها ابتسامه مريحه. وقالت:نقدر نخش عادي..
رنده:خشي..
خشت لينا وسكرت الباب وقالت:شنجو توا..
رتيل:تمام..
رنده:ماشيه..
مشت لينا خدت الكرسي من ورا الطاوله وقعمزت عليه وقالت:حكالي سفيان اللي صار اليوم..
رتيل:الحقير ماشيلها للجامعه..
رنده ودموعها نزلوا:مش عارفه شن يصير توا بعد اللي داره سفيان..خايفه يشكي فيه ويحبسه..
لينا:لو شكي فيه تراهو ليهم وقت جايين ورافعينه..
رنده:مش عارفه اني خايفه خايفه هلبه يالينا..خايفه من اللي بيديره هالشيطان الرجيم..والله مرات نقول نتنازل خيرلي..بس في نفس الوقت بنتي مش هاينه عليا نحس في روحي بنموت لو انحكم عليا ننحرم منها عمري كله..وقعدت تبكي..
رتيل قعدت تشبحلها ودموعها ينزلوا..
ولينا تشبحلها بحزن وعيونها مليانات دموع قالت:خلي املك بالله كبير انتي مظلومه والمظلوم ربي ينتصرله..
رنده ببكي:واني والله متوكله ع الله ومستعينه بيه..لكن كل مالها تتعقد وتتعقد..نشبح فيك كيف ديما ترددي في الصلاة ع النبي نشبح اللي يصير معاك ونزيد نتمسك بيها الاستغفار حتى هو..بس اني اللي يصير معاي العكس..كل مالها تتسكر في وجهي..ضمت ايديها في بعض وقالت..هكي...حاسه اللي اني فيه مطبق عليا هكي..حاسه ربي مش قابل مني شي ومش حيساعدني ..وقعدت تبكي..
لينا مسحت دموعها وقالت:اسمعيني جاي في حاجتين لازم تحطيهم في بالك لما تلجئي لله في المحنه...
اولهم اليقين...
يكون عندك يقين واستحضار قلب ان ربي مش حيخليك مادامك لجئتيله...وانتي ترددي في الاستغفار..لازم نحطي ذنوبك كلها قدامك وتستغفري عنها وانتي نادمه عليها من قلبك...وانتي ترددي الصلاة ع النبي لازم تكوني فاهمه وعارفه ان الصلاة الوحده منك مقابلها عشرة تنزل عليك من رب العالمين..وصلاة ربي عليها هي رحمات ينزلها وسكينه..
وحده من صور هالرحمه استجابة الدعاء....
وبعدين تتحقق النتيجه....كفاية الهم وتفريج الكرب..وغفران الذنب..
هدت رنده بكي وقعدت تسمعلها...ورتيل سرحت في الفراغ وهي تسمع في كلامها وتفكر فيه..
ولينا متابعه تقول:والحاجه الثانيه وهدي راهي مهمه واجد..
لو لقيتي بعد هدى كله ان المصيبه اشتدت اكثر راهو مايعنيش بكل ان ربي ماتقبلش..بالعكس هو تقبل واستجاب وحيرفع عنك هالمصيبه..لكن يبيك تطلعي من المحنه وانتي نظيفه يبي يطهرك من كل الذنوب اللي درتيها في حياتك..
ووين تطلعي من هالمحنه طاهرة من ذنوبك كلها حيخليك تخشي ع حياة جديده سمحه واجد حياة فيها ليك تعويض عن كل شي عشتيه...من جمال العوض متاع ربك تنسي المرار اللي عشتيه كله..وكأنك ماعشتيه في حياتك..
رتيل شبحت للينا وهي تذرف في دموعها وابتسامه حلوة مرسومه ع وجهها من تأثرها بالكلام..
رنده كذلك كانت بنفس الحاله..
🌺مش كل حد ربي عاطيه القدره ع ابداء النصيحه بأسلوب سمح وحلو يخش القلب طول...عنده القبول كلامه يكون زي البلسم للي يسمعه..ولينا من هالناس اللي يملكوا هالمميزات اللي خلا كلام لينا مقبول مؤثر حتى في رنده اللي في يوم من الأيام مش طايقة حتى تشوف لوجهها🌺
رنده :كلامك يريح هلبه..
لينا بإبتسامه:مش كلامي هدى انا نفسي ما كنت نعرفه سمعته من ناس وقريت عنه واجد وطبقته ولقيث اثره في حياتي..
دق باب الدار وانفتح خشت وجيهه وقالت؛كلكم هني واني قاعدة بروحي..
رتيل وهي تمسح في دموعها:وين منى؟
وجيهه:مشت لماليها عندهم عزومه ماعزومه..
لينا:بنعدي ندير كعك مخمر...
رنده مسحت دموعها وقالت:ايه نوضي ديريه خاطري فيه ونبيك تعلميني...صفقت بإيديها وناضت وهي تقول..نوضي نوضي..
ناضت لينا وهي تضحك وقالت:هي تعالي..
مشوا الزوز طلعوا مع بعض..
ووجيهه تبع فيهم بعيونها وهي تضحك بتعجب وقالت:كان من يقولي قبل رنده ولينا بيولي هدا حالكم مانصدقه لو يحلف..
رتيل بضحكه؛ولا أني...
شبحتلها امها برفعة حاجب وقالت:وانتي امتى بتخشي للكوجينه وتتعلمي حاجه تنفعك لعمرك!؟
رتيل:اياه عاد ماما بالله عليك مش وقته توا وقت قرايه..
وجيهه؛مش وقته عينك مادام بدوا يخطبوا فيك بتتعلمي اطيبي غصب عنك رمضان جاي ياللا يد بيد مع اختك ونساوين خوتك ايوه..
ومشت طلعت من حداها..
هي غمضت عيونها بشده وفتحتهم وهي تقول:حطتني في راسها وجيهه...
بعدين تلوحت ع سريرها وغمضت عيونها..
🍁🍁🍁🍁🍁
"قالت لا"
مبشر عقد حواجبه وقال:حتى بعد قلت بنخطبها !؟
الهام:هي بعد الموقف هداكا خلاص..
مبشر قعد يشبحلها وهو يفكر بعدين هز راسه وقال:الولاد جايين توا بعدين ساهل..
ومشي من حداها وهي تنهدت بعدين مشت لدارها...
••••••••
"بنمشي نكلم خوها الكبير معاش عندي صبر"
ميسم بضحكه:وكان لزك..
رياض بضحكه؛نبعت خوالك لبوها..
ميسم:مانقول كان يابختك يارتيل..
رياض ابتسم ع جنب وهو محرج وقعد ساكت..
ع خشة نوال وهي تقول:تعالوا نشربوا القهوة في الجنان..
ميسم:ايه والله الجو يجنن برا..هي نوض خالو..
تنهد رياض وقال:هي...
ناض..وهي ناضت معاه ومشوا طلعوا مع بعض....
🍁🍁🍁🍁🍁
فهالوقت...
في جنان حوش اهل حسين..
ذبح حسين زوز ضحايا صدقه بعد سمع خبر حمل نوريه...
وشراهم زوز بش ماتحرجش اكرام..
ومع هكي مش حيقدر يمنع حرجها لأنه مادارش الشي هدا الا بعد ماسمع بحمل بنوريه وهي مر ع حملها تلاثه شهور من لما عرف بالخبر وماطلعش معاه الاعزومة غدي وياريتها كانت ليهم بروحهم...
••في الصاله...
مها:حقه في كل حمل ليك كان حسين يذبح ويصدق؟
نوريه هزت راسها بإيجاب وهي مبتسمه..
رمضانه:في نور ماكانش عنده حق خروف وقتها شري نعجه وصدق لحمها..
مها:ماشاء الله...
واكرام تسمع وهي متمالكه اعصابها بقوة...
ونوريه تسرقلها في النظر ووين تشوف الدموع اللي في عيونها يبرد قلبها...
خش عليهم وهو يقول:بنرفع لخواتي وخوتي يام..تبي نرفع لحد تاني؟
رمضانه؛لحوش الحاج بهلول هداكا خودله كتف وضعهم الفترة الاخيره مش زي قبل..
هز حسين راسه وقال:حاضر..
شبح لنوريه وابتسم...هي يدوب ردتله الابتسامه..
واكرام تمرر في نظرها عليهم..
حسين:ماتبو شي...
رمضانه:سلامتك ولدي..
هز راسه بعدين مشي طلع..
نوريه؛خل نمشي ندير قهيوة حداها سينابوناتي مسيحه عليهم شكلاطة مرت خوي ...
مها:الله تسهفت..!
ناضت وهي تقول بضحكه:هي شويه بس..
رمضانه؛حاسبتيني ولا؟
نوريه:كيف عاد ياعمتي انتي الأولى..
رمضانه بضحكه؛سلم بنتي سلم بنتي..
مشت نوريه وهي تضحك..
واكرام تبع فيها بعيونها وكان في يدها الموت راهو طلقاته عليها...
ومها مركزة معاها...
🍁🍁🍁🍁🍁
الساعه 8:15مساءا
قايمه ولدها في غمرها وتغسله في ايديه وهي تقول:معاش نعطيك شكولاته بكل بكل.
بحر بغضب:إلااا..
لينا بحده:شن هو اللي لا..
سكت بحر وهو عاقد حواجبه بغضب..
نزلاته وقالت:هيا عدي لحنينه..
بحر طلع يجري من حداها...
وهي مشت تشوف في العشي..
شويه رن تليفونها..غطت ع العشي ومشت خدت التليفون من فوق بوكس الخبزة الخشبي...
شافت المتصل لقاته رقم غريب..
قعدت تشبحله لين فصل...جت بترده لمكانه رن من جديد...
قعدت تشبحله شويه..بعدين فتحت الخط وحطاته ع وذنها..
جاها صوت انثوي يقول..
"السلام عليكم"
لينا:وعليكم السلام ..
"لينا عبدالودود صاحبة محل #شكولينا"
لينا بإستغراب:ايه تفضلي.
"يزيد فضلك حبيبتي معاك معدة برنامج" 4ونص " اللي يعرض ع قناة السلام تعرفيه ؟"
لينا وهي متفاجئه: ايه نعرفه...اهلا اهلا بيك...ومشت بسرعه طفت تحت العشي..
"اول شي شن اخبارك شن دايره"
لينا وهي مرتبكه بعض الشيء:تمام الحمد لله..
"تمام...لينا حني سمعنا عن الشكولاته متاعك وجربناها وشفنا وين وصلت تعدت الحدود ماشاء الله بالذات بعد مشاركتك في معرض المنتجات المنزليه..ونبوك تكوني معانا يوم الاربعاء ان شاء الله في البرنامج وطبعا ليك حرية الخيار تبي تكوني موجوده معانا شخصيا وبإتصال هاتفي"
لينا؛والله شن بنقولك..انا متفاجئة واجد..ويوم الاربعاء بعد يومين يعني قريب نبي نشاور قبل بعدين نعطيكم الكلام الأخير...
"تمام حبيبتي مافيش مشكله شاوري اليوم وردي علينا غدوة شن رايك"
لينا هزت راسها وهي مبتسمه وقالت:ان شاء الله..
"ان شاء الله تطلعي معانا يالينا حتكون فرصه ليك ولينا..ليك للأنتشار اكثر..ولينا لدعم النساء المبدعات في بلادنا في أي مجال كان"
لينا؛مشكورة واجد..خلاص بكرا ان شاء الله نرد عليكم..
"واني في انتظار اتصالك سلامات لينا"..
لينا:وعليكم السلام...وسكرت...بعدين حطت يدها ع قلبها اللي يدق بقوة من المفاجأة...
قعدت ساكته وهي تفكر وتحاول تستوعب اللي صار..بعدين مشت طلعت للجنان...
قامت تليفون ودارت اتصال..
وقعدت تمشي وتجي في الجنان وتراجي في الرد..
بس ماردش عليها..تنهدت بعدين قالت..اكيد مش فاضي..
ابتسمت بحماس وولت خشت داخل..
🍁🍁🍁🍁
راكبه فوق السطح تتفرج ع النوبه اللي دايرينها جيرانهم عندهم عرس...
الهام؛غير امتى حتى حني نديروا عرس ونجيبوا ونهيجوا..
شويه سمعت اصوات خوها وصحابه..
الهام؛هيي حي عليا..ووخرت شويه وهي تشوف فيهم..
مابينهم في واحد لفت انتباهها حست روحها تعرفه..
زادت ركزت فيه وهي تشوف فيه كيف محاوط كتاف خوها ويضحك هو وياه وباقي اصحابهم..
فتحت عيونها بصدمه وقالت:حييي!؟ لالا مش هو!!؟....
قعدت مركزة فيه وهي تقول..لاوالله لهو!!؟ كيف هكي نهارك مبارك!؟ معقوله يطلع هداكا وخوي صحاب!!؟..
وقعدت تفكر بصوت عالي..حيي كان مايطلع يخون في خوي وحط ع البنت اللي يبيها!! مافيش غير هكي..وخوي المسكين مايندري علي حاجه....لازم نقوله....لالا شن نقوله!؟ وكان يدير هو وياه عركه وتصير مصيبه..!؟باهي نقول لرتيل!؟......مرات تنصدم وتخش في اكتئاب....بضيق تأففت وقالت...ووك ياربي كيف ندير!؟
سمعت باب الحوش تسكر...وشافت خوها خش...
مشت بسرعه نزلت....
🍁🍁🍁🍁🍁
الساعه 10:40ليلا...
كان حسين ناوي يمشي لحوش التاني لأن الدور ع نوريه..
بس حب يستفقد اكرام خصوصا انه معاش شافها من لما روح...
مشي لدارها فتح الباب وخش..
لقاها راقده متغطيه وتبان كأنها تبكي
عقد حواجبه بقلق وسكر الباب ومشالها
حسين؛اكرام..اكرام..
جاه صوتها الباكي وهي تقول:نعم
حول من عليها لقاها غامه وجهها وتبكي..
قعمز جنبها وحول ايديها وهو يقول:خيرك يابنت الناس تحسي في حاجه؟
اكرام ببكي:ايه خاطري واجعني منك هلبه.....علاش هكي تعامل فيا قولي..قدري عندك مش زي قدرها اللي ديرلها فيه مش زي اللي ديرلي فيه..علاش ديما تحسس فيا انك واخدني ع خاطر الصغار..
حسين بضيق:تو حني المواضيع هادي مش تكلمنا فيها قبل واتفقنا.!؟
اكرام ؛مانشوفش فيك ماشي عليه الاتفاق...لليوم غير عرفت انها حامل نسيتني بكل وكأنك تقولي خلاص معاش تلزميني..
ضحك وقال؛غير منين تجيبي فيها الدوة هادي بس..
هي قعمزت وقالت:هدا اللي نشوف فيه...حسين اني حبيتك حبيتك من قلبي والله ماحبيت حد غيرك..اني معاك حسيت روحي اول مرة نتزوج..خديت راجل راجل بمعنى الكلمه ومانبيش نخسره..ربي عوضني بيك ياحسين ومانبيش نخسرك
حسين قعد يشبحلها كيف تبكي وملامح الرجاء والمسكنه ع وجهها خلوا قلبه يوجعه وخايف يظلمها معاه لأن قلبه مع نوريه لو تزوج غيرها عشره
وكذلك فكر في وضعها حامل والحزن الشديد مش باهي ليها
احتواها زي مايحتوي الزوج زوجه..وقعد يطبطب عليها وهو يقول..حولي الافكار السودا والوساوس هادي من راسك راك غاليه عليا حتى انتي وقدرك كبير ومن لما خديتك لتوا ماريتش منك الا كل حاجه حلوة...
شداته وقعدت تبكي...بعدين قالت؛اقعد معاي شويه لين نرقد بس
هو غمض عيونه بإستسلام بعدين فتحهم وقال:حاضر
وهي مبتسمه من بين دموعها بمكر.
🍁ونوريه كانت في دارها
مقعمزة شاده تليفونها وتقرا في نفس المنتدى اللي ولت عاكفه ع قراءة مافيه يوميا من نصائح..
عقلها كان يقوللها ارقدي وماتستنيش حسين
بس قلبها خلاها ادير العكس
وتمر الساعه لبعد منتصف الليل قعدت نوريه تراجي وهي تقاوم في النوم...والنوم غلبها ورقدت.....وماجاش حسين..
🌺🌺🌺🌺
"قصدك صوت بس؟"
لينا:ايه..
سفيان قعد ساكت وهو يفكر..
لينا:الحق فرحت واجد حسيت بشعور مش عارفه كيف نوصفه
ابتسم وشبحلها
لينا:يعني اللي صار معاي لعند توا في خدمة الشكولاته نحس فيه انجاز كبير...ولما حد يشوفه على انه انجاز ويقدره نفرح واجد..بجد سفيان فرحت واجد...
قعد يتامل فيها بحب وهو مبتسم بعدين قال؛وانا متشوق نسمع شن بتقولي عني..
لينا :يعني موافق..
غمض عيونه وهز راسه بإيجاب بعدين فتحهم وهو مبتسم..
وهي ضحكت بفرح وقالت...نحبك دنيااا.
سفيان:ياويح قلبي..لما تقوليها ومعاها دنيا نحس فيه طلع من صدري وطار..
وهي تضحك وقلبها يدق بقوة من الفرح...
🌺🌺🌺🌺🌺
تاني يوم...
انفتح باب الحوش وخش...
كان واضح عليه من الارتباك..كان يبي يبرر اللي صار بس مش عارف بشني..
اي مبرر حيكون تافه وغير مقنع....
برغم انهم ليهم شهرين ابعد مايكون عن بعض وتعاملهم مع بعض رسمي..
بس خبر حملها نساهم الزوز اللي صاير بيناتهم وردهم لأيام حلوة راحت...
قعد يمشي وهو خايف من طلعتها في وجهه فجأه...
وطلعت من الكوجينه ماشيه لطاوله موجوده في وسط الحوش كان في عليها ستاير...
كانت تبان زي قبل جوها عادي...وطلتها حلوة كعادتها حتى بحوايج الحوش...
لاباين عليها بكي لاحزن لاضيق...
فاتت من حداه وقالت:صباح الخير..
ووقفت ع الطاوله..حطت الخلالات متاع الستاير وبدت تركب فيهم..
وحسين يشبحلها وهو ساكت بعدين قال بشي من الإرتباك:امس...كانت تاعبه...هي..يعني متعبها الحمل مش زيك انتي..ضحك بعدين بلع ريقه وقال..ماقدرتش نخليها..سكت وشبحلها شويه بعدين قال...نوريه...تسمعي فيا!؟
نوريه وهي تشتغل:ايه...بس مش عارفه انت توا تبرر ولاشنو..ولو تبرر لشنو تبرر؟
قدملها وقال:نوريه...آسف..
شبحله وقالت بإبتسامة استغراب:على شني!؟
استفزاته هلبه..تحولت ملامح الارتباك اللي ع وجهه للعصبيه..
شد يدها وحول منها الخلال والستار وخداها..
نوريه بفجعه:خيرك..!؟
قعمزها ع الكنبه..وهو قعد جنبها وقال؛اسمعيني شي وماتقاطعنيش بكل..
قعدت تشبحله وهي ساكته..
حسين وهو يتكلم بإيديه بشي من الإنفعال:توا اللي صار صار واني تزوجت غيرك برضاك وتحريض منك...والمراة هادي مسؤوله مني قدام ربي لازم نعاملها بمايرضي الله..هي مالهاش ذنب في شي نهائي..لاجرت وراي لالفت عليا وخدتني منك..نقولوا جابها النصيب..وتوا هي بتولي ام ولدي ولابنتي يعني ليها قدر عندي...لكن والله يانوريه ماقدرت تخلي قلبي يلتفتلها حتى شويه..قلبي ليك انتي بروحك..اقسم بالله الحب ماحسيته مع مراة غيرك انتي ولافي من يقدر ياخد مكانك..حتى الجفا اللي بيني وبينك انتي السبب فيه يانوريه..
تنهدت وغيرت عيونها للستاير وقالت؛نكمل تركيب الخلالات وانت تركب الستاير باهي..
هو قعد يشبحلها بحده..
وهي ناضت وقالت؛مانقدرش نركب السلوم توا..
وكيف بتمشي ..ماحستش الا وذراعها اليسار الملويه ومحطوطه ع ظهرها...
نوريه بضحكه:لالا بالله عليك لا..
حسين بغل:لين تحسيها...
ونوريه تضحك..
وحسين يزيد يقوي فيها..
نوريه ونوريه تضحك مكر فيه بس عيونها مدمعات من الالم وهو يشبحلها وعيونه دمعوا لأن عيونها مدمعات..
"بوي..ماما"..
الزوز شبحوا للشريف ونور كيف يشبحولهم بصدمه خوف يحسابوا بوهم يضربوا في امهم..
حسين ضحك بإرتباك وقال:بصارة..نبصر عليها..وطلقها بالشويه...
نوريه بضحكه:ايه بصارة ماما..حتى هاه..وخدت يد حسين ولوتها ورا ظهره بقوة..
الشريف ونور قعدوا يصفقوا عليهم..
الشريف:اقوا عليهم يازعيمه..
نور:قويه ماما هلبه..
نوريه وهي تتمايل بغرور..
حسين ضحك بتفنيصه وقال:شن تقولي للصغار انتي!!؟
نوريه زادت شدت عليه وقالت بصوت منخفض؛مانقوللهم في شي هما يشبحوا ويميزوا مش صغيرين..
بعدين طلقاته ومشت للستاير وهي تقول:صليتوا ماما..
الشريف:الحمد لله.
نور:ايه ماما..
وصلت في الطاوله وهي تقول:شريف نوض مؤيد وبروا للكوجينه افطروا..
الشريف:حاضر..
ومشوا الزوز مع بعض..
وهو لحقهم بعيونه بعدين شبح لأمهم لقاها ولت تركب في الخلالات..ابتسم وهو يدلك في ذراعه بعدين مشي وهو يقول:ماشي نجيب السلوم..
هي ابتسمت برفعة حاجب وبدت ادندن...
🍁🍁🍁🍁
الساعه 11:20صباحا..
في باحة المدرسه..
كانت تتناقش هي وصاحبتها..
رتيل:خلاص خوك طاح من عيني من بعد اللي صار ومعاش متقبلاته بكل..
الهام:باهي انتي اقري الرساله وبعدين قرري ماتتسرعيش..
رتيل دفت يد الهام اللي فيها الرساله وقالت:مش حنقرا شي خلاص الهام..
الهام نزلت يدها وقالت:صارحيني رتيل الولد هداكا عاجبك بديتي تميليله ولا؟
رتيل تنهدت وقعدت ساكته..
الهام؛اني صاحبتك رتيل..
رتيل مررت نظرها ع الساحه وقالت:ايه..
قعدت الهام تشبحلها وتفكر هل تقول ولاتقعد ساكته أفضل..
وشافت انها تقعد ساكته خير لانها خايفه من العواقب..
رن جرس نهاية الإستراحه..
رتيل خدت ذراع صاحبتها وقالت؛خلاص توا فوتي وسكري ع الموضوع...
هزت الهام راسها وقالت؛براحتك..
ومشوا مع بعض وقفوا في طابورهم...
🍁🍁🍁🍁🍁
"نتأسف مرة تانيه اللي خديت من وقتك"
انس:مش مشكله في النهايه كلامنا في شغل..
رفعة:مزبوط..ضمت شواربها لداخل بعدين قالت..زي ماخبرتك ان المحاميه اللي وكلها محمد الفاسي..حكالي اللي صار بينه هو وطليقته بالتفصيل من قبل الطلاق وبعده..واللي حاكهولي لو استخدمه في المحكمه حيضر موكلتك هلبه..حيضر سمعتها وممكن يدمر مستقبلها.
انس يسمعلها وع وجهه ابتسامه متهكمه وهو شاد ذقنه بيده..
رفعه:اني حاولت نقنعه نحلوا الموضوع ودي ونخلي طليقته تتنازل عن الحضانه ويتخصصلها مواعيد تشوف فيها بنتها في النهايه هي ام بنته واي شي يضر سمعة الام حيولي ع البنت مستقبلا..وهدا سبب جيتي ليك يوم..نبيك تقنع موكلتك تتنازل ما في شي لصالحها..حتخسر القضيه حتما..
انس نزل يده وقال:وهدا من ثقتك بنفسك ولان من اللي عرفتيه يثبت ان موكلتي مش حتكسب القضيه؟!
رفعت حاجبها وقالت؛الزوز..
ضحك بتهكم بعدين حك مقدمة انفه وقال:موكلتي رفعت القضيه وهي عارفه كويس اللي حيديره طليقها واني كذلك كويس كويس..لهدا الكلمه الاخيره للقاضي هو اللي يحدد من الطرف اللي حجته باطله من اللي عنده برهان قوي ومنها نعرفوا من الخاسر في هدا كله..
ابتسمت بجديه وهزت راسها وقالت:-اني اللي عليا درته..ناضت وقالت..شكرا اللي عطتيني من وقتك..
ناض وقال؛العفو..
رفعة؛السلام عليكم..ولفت ومشت..
وهو رد عليها:وعليكم السلام..
بعدين تنهد وقعمز وقعد يفكر شن اللي حيستخدمه محمد قدام القاضي....حط كل الاحتمالات في راسه من البدايه واستعدلها استعداد تمام..بس يقعد شي من القلق يراوده بخصوص مايخفيه الخصم محمد والمحاميه اللي وكلها وهو يعرفها كويس محاميه متمكنه ومرافعاتها ممتازة..
🍁🍁🍁🍁🍁
الساعه 5:00عصرا
"هدا شنو ياحسين!!؟"
حسين بضحكة استغراب:عجبك ولاشنو؟!
اكرام بفرحه:عجبني وبس..يخوخم هدا حسونه يخوخم عليك ذوق عندك يجنن في كل شي تهبل انت حسين..
حسين بإبتسامه:اهم شي رضيتي..
اكرام:ديما راضيه اني حسونه..
حسين رفع حاجبه وقال:والكلام اللي قلتيه امس.
اكرام:هدا عتب حسونه الواحد مايعاتب كان اللي يحبه..
شد خشمها وقال؛هاللسان اللي عندك..
وهي تضحك...
طلقها بعدين قال:هي وتي روحك بنخطموا ع حوش ماليك ناخدوا ولدك ونطلعوا مشوار..
اكرام بفرح:نحبك هلبه هلللبه ياناس...
قعد يضحك بعدين مشي طلع من حداها..
وهي بسرعه مشت دست طقم الذهب اللي جابه.. وطلعت حوايج طلعه...
لبست ع السريع وطلعت من الدار...
وهي ماشيه شافتها مها اللي كانت مقعمزة تفرط في البازليا...
مها تنهدت وقالت:والله ماتقدري عليها ياأبله نوريه...
🍁وركبت اكرام للسيارة وتحرك حسين وطلع من الحوش..
ونوريه كانت واقفه في روشن الصاله متاع حوشها...
شافتهم وهما طالعين..متأثرش..بدت تحس اتجاه كل شي قاعد يصير بالبرود...
لفت ومشت خشت تشوف صغارها بعد روحوا من المدرسه...
🍁🍁🍁🍁🍁
"مابتش تقراها!!؟"
الهام؛ايه..خلاص فوتها بالله عليك البنت قالت طاح من عيني شن مازال تبي بعد هكي..
مبشر بصدمه؛طحت من عينها!!؟
الهام هزت راسها وهي مضايقه...
تبدلت ملامح وجهه للحده وقال:في حد تاني ولا؟
قعدت تشبحله وهي ساكته..
مبشر هز راسه وقال:معناها في حد..
غيرت الهام عيونها عنه ومازال محتفظه بصمتها...
مبشر :تمام..تمام...
ومشي طلع من الحوش...
الهام بقلق:ياحليلي هيي..مال كان تعرف اللي نعرفه شن دير عليك غبارة وخلاص...
🍁🍁🍁🍁
ورتيل فهالوقت امها عالقه في الكوجينه...
وجيهه:اطرحيها هكي هاه هكي وهكي...بعدين قيمها هكي.......وحطيها في الطاجين..
رتيل:صعب ياماما من الأول نجيبه صح..
وجيهه؛هيا ديري طرف بسرعه...وقلبت طرف السفنز ع وجهها التاني..
ورتيل تشبحلها شن دير وتطرح فالعجينه وهي خايفه..
شويه وطلعت وجيهه طرف السفنزة بالشوكه والكاشيك وحطتهم في صونيه كبيره..
وجيهه؛هي حطي اللي درتيها..
رتيل وهي خايفه قامت العجينه المطروحه واللي كان منظرها مزري بالنسبه لأمها..
وهي خايفه حطتها في الزيت...
وجيهه:هاك حطيتها شن صارلك..هي خودي شوكه وحركيها..
خدت رتيل الشوكه اللي كانت محطوطه ع سفرة فيها شويه ميه...
وحطتها في الطاجين..وتبدا الدنيا تتفرقع...
عيطت وطلقت الشوكه وطلعت تجري من الكوجينه..
وجيهه وهي رافعه حواجبها:أشي كيف هربت تجري تقول لغم تفجر!!!تي تعالي هني ياركيكه يابايرة تعالي..طلعت وراها وهي تقول...والله مامكمله غيرك...
وصوتها مسموع برا في الجنان وواصل للشريف ورنده اللي كانوا مقعمزين تحت المظله يهدرزوا..
الشريف بضحكه؛ياعليك وجيهه وخلاص شن خطر عليها توا؟
رنده؛قالت مادام بدو يخطبوا لازم نعلمها..هي الحق ببتها هلبه حتي زمان دخلتنا الكوجينه من وحني في الابتدائي...
الشريف:الصغيرة عاد لازم تدلل..
رنده؛اهي دللتها وحصلت فيها...
ضحك الشريف شويه بعدين قال:وانتي شن دايرة بابا؟
رنده ابتسمت وشدت دموعها بقوة وهي تقول:اهو عايشة والحمد لله..
الشريف:الحمد لله دائما وابدا وعلى كل حال...مافيش حال يدوم يابابا الدنيا يوم هكي ويوم هكي..وكله حيعدي مافيش يقعد لافرح يدوم ولاشدة دوم يابنتي..نبي منك حاجتين بس..تخلي ايمانك بالله قوي ربك في الوجود يابنتي وحقك واخده واخده لأنه مايرضاش بالظلم...والحاجه التانيه..نبيك تعرفي ان بوك معاك ووراك ومش مخليك..مهما انقال عنك مهما صار معاك..اني عارفكم كلكم عارف صغاري كويس عارف روحي كيف ربيناكم اني وامكم..مش
حيغير حد نظرتي فيكم مهما دار ومهما قال..بالذات انتي يارنده...
كانت تسمع فيه وهي تشبح في الفراغ ودموعها ينزلوا بعد سكت مسحت دموعها وقالت بإبتسامه؛ربي يطول في عمرك ويخليك تاج على روسنا طول العمر وبيي..
الشريف؛ويحفظكم وينصركم بنتي كلكم اللهم آمين..
رنده:آمين..
🍁🍁🍁🍁🍁🍁
تاني يوم...
الساعه 11:00صباحا....
"كيف؟"
انس؛انت اللي مشيت جبتها من الفندق وكنت شاهد ع وضعها وقتها شاهد عن ان شنطه حواجبها ماكانتش معاها..هاتفها وجوازها وهويتها مش موجودات..اللي بيدير هكي شن مصلحته غير انه يبي يفضحها فضيحه مدبرة؟!
سفيان؛وشهادتي ياخدوا بيها ؟! اني خوها..!
انس:ياخدوا بيها..هاه شن قلت..
سفيان قعد يفكر...حيخش محكمه ويتواجه مع الشخص اللي طعن في شرفهم..حيكون موجود غادي بش يدافع عن شرف اخته..
شي صعب..صعب جدا...
قال في نفسه..."ياربي دلني يارب"
انس:ع العموم خود وقتك مازال ع الجلسه الجايه 15يوم..
سفيان شبحله بضيق..بعدين هز راسه وهو ساكت...
🍁🍁🍁🍁🍁
الساعه 12:36 ظهرا..
"ماتتصرفش برعونه يامبشر"
مبشر بعصبيه؛البنت هادي ليا اني ومش حتكون لغيري يااني ياهو الكلب هدا..
رياض :مرات تخسرها بكل يامبشر..
مبشر؛مش حنخسرها..لبس طاقيته وقال..مش حنخسرها..
ومشي بإتجاه سيارته...
رياض حرك راسه يمين ويسار بأسف بعدين شبح لتليفونه شاف الساعه..ابتسم وقال:مازال...
🍁🍁🍁🍁
الساعه 12:55 ظهرا...
وصل باص البنات للمدرسه..
ركبوا وتحرك بيهم الباص لحياشهم...
رياض كان ماشي وراه بالسيارة وهويشبحله ويشبح للطريق..
لين جي قدام حوش مبشر...
شاف اخته لما نزلت من الباص..وشبح لسيارة مبشر لقاها مدرسه قدام الحوش استغرب..
لما تحرك الباص تحركت وراه سيارة مبشر..
هو زاد استغرب ولحقهم...
حط الباص رتيل في بداية الزنقه وهالشي بدي يدير فيه مؤخرا لأن طريقه تغير بعد ماانضمت وحده جديده للباص...
بعد ماحطها ومشي...
هي كملت طريقها للحوش..
فهاللحظه درس مبشر ونزل من السيارة وراها..
هني رياض شد فرينوا وقعد يشبحله بصدمه..
••مبشر وهو ماشي وراها بسرعه:رتيل..رتيل..
رتيل لما سمعاته ينادي فيها قلبها قريب وقف من الخوف سرعت مشيتها..
وهو زاد سرعته وجاها وقف قدامه...
فالوقت اللي جي فيه سفيان من الجهة التانيه..
كان مضايق ومعصب من موضوع قضيه رنده اللي حتبدا في الجديات...
في عز تفكيره عيونه جو ع رتيل واقفه وواحد جي وقف قدامها..
سفيان بصدمه؛هدا شنو!!!؟
رتيل هربت من مبشر جي قدامها مرة تانيه..
رتيل وهي ترعش؛حول من قدامي حول..
مبشر:غير اسمعيني شويه بس..تعالي اليوم لحوشنا ارجوك نبي نقولك كلمتين بس..
رتيل:تي حول وفكني من سوك...
وكيف جت بتهرب..
سمعت حد يقول لمبشر بصوت عالي بنبرة صدمه..
"شن دير انت"
شبحتله لقاته رياض شاد مبشر من ياقة قميصه..
مبشر بصدمه:رياض!..
هي هربت وهي مصدومه من كل شي صار...
تسمع وراها في دوشة صايره..
وكأنهم يضاربوا وكأن في جاهم يحز.
وهي تمشي بسرعه..
قلبها يدق بسرعه...
تتنفس بسرعه...
من الصدمه...ومن الخوف....
وبعدين من الرعب...
لما وقفت في الباب وشافت سيارة سفيان جايه وهو فيها يشبحلها بغضب..
بلعت ريقها..وكاد قلبها يوقف من الخوف...وغيرت عيونها عنه...
وطلعت المفتاح وهي ترعش وتقول بهمس:حي عليك يارتيل..اليوم نهايتك يارتيل..خلاص يارتيل..تمتلك يارتيل...
وفتحت الباب وخشت تجري وسكراته وراها..
وسفيان درس قدام الحوش...
#صلو_على_محمد
....يتبع.....
(نعتذر اعتذار شديد الظروف الايام هادي مانعتني نلتزم بالمواعيد..وحتى من الكتابه..وماتخافوش خير كله خير الحمد لله)
الفصول الاربعة
